Referensi tu Parpunguan Hangoluan dohot Pangkobasion na Laho Diparsiajari
2-8 SEPTEMBER
ARTA NA ARGA NA ADONG DI BIBEL HEBER 7-8
“Malim na Saleleng ni Lelengna na Songon si Melkisedek”
it-2-IN 67 ¶4-5
Melkisedek
Raja ni Salem najolo jala “malim ni Debata Natumimbul”. (1Mus 14:18, 22, Bibel siganup ari) Ibana do malim na parjolo sahali disurat di Bibel. Taon 1933 SM ma ibana dilantik gabe malim. Salem, lapatanna i ma “Dame”. I do umbahen didok si Paulus si Melkisedek i “Raja ni Hadameon”. Alai molo goar ni si Melkisedek lapatanna “Raja ni Hatigoran”. (Heb 7:1, 2) Najolo, Salem do goar ni luat i. Salem i ma na gabe pusat ni kota Jerusalem di pudian ni ari. Saonari dipaganjang ma goarna gabe Jerusalem, jala sipata boi do didok holan “Salem”.—Ps 76:3.
Dung ditaluhon si Abraham si Kedorlaomer dohot angka raja na asing, sahat ma ibana di rura Sawe manang “rura ni raja”. Diboan si Melkisedek ma “sagusagu dohot anggur”, dipasu-pasu ma si Abraham, jala didok ma, “Dipasupasu Debata Natumimbul i, na manompa nasa na adong, ma si Abram. Pinuji ma Debata Natumimbul, na mangalehon hamonangan di ho maralohon angka musum.” Dung i dilehon si Abraham ma tu malim raja i “saparsampulu sian luhutna”, i ma “saparsampulu na dumenggan” sian sude na binuatna sian parporangan i.—1Mus 14:17-20, Bibel siganup ari; Heb 7:4.
it-2-IN 68 ¶1
Melkisedek
Boasa boi didok ndang adong ari hatutubu ni si Melkisedek dohot ari hamamatena?
Dipaboa si Paulus do hatorangan na ringkot taringot si Melkisedek. Didok ibana do, “Ndang adong na mamboto ise amang dohot inang ni si Melkisedek. Jala ndang adong na manurat taringot tu tarombona, ari hatutubuna, dohot hamamatena. Alai dibahen do ibana songon Anak ni Debata, jala gabe malim ma ibana saleleng ni lelengna.” (Heb 7:3) Sarupa do si Melkisedek tu angka halak na asing. Tubu do ibana jala ujungna mate. Alai ndang adong disurat di Bibel taringot goar ni bapakna dohot omakna. Ndang disurat taringot angka opungna dohot angka pinomparna. Jala ndang adong disurat taringot songon dia ngoluna najolo jala songon dia ujung ni ngoluna. Alani i, cocok do si Melkisedek on manggombarhon Jesus Kristus, na gabe malim salelengna. Ndang adong disurat ise do malim andorang so si Melkisedek, jala ise panggantina. Jadi Kristus pe songon i do. Andorang so ibana, ndang adong sintua ni malim jala ndang adong panggantina gabe sintua ni malim. Asing ni i, taboto do molo Jesus i najolo halak Juda jala tubu sian pinompar ni Raja Daud. Alai ndang i na mambahen ibana gabe sintua ni malim. Jahowa sandiri do naung marjanji laho mangalehon tugas i tu ibana.
it-2-IN 67 ¶6
Melkisedek
Gombaran taringot Kristus na Gabe Malim. Di Psalmen, adong do disurat surirang taringot Messias. Dipaboa disi, marsumpa do Jahowa tu halak na gabe “Tuan” ni si Daud. Didok Ibana do, “Songon hamalimon ni si Melkisedek ma hamalimonmu, alai manongtong ro di saleleng ni lelengna.” (Ps 110:1, 4, Bibel siganup ari) Hombar tu surirang i, gabe diboto halak Heber ma Messias i do haduan na gabe malim dohot raja. Tingki dibahen si Paulus surat tu halak Heber, dipapos ma roha ni nasida taringot ise do na dipaboa di surirang i, i ma “Jesus Kristus na gabe sintua ni malim songon si Melkisedek”.—Heb 6:20; 5:10; ida ma PERJANJIAN.
Mangalului Arta na Adong di Bibel
w00-IN 15/8 14 ¶11
Angka Pelean na Mambahen Las Roha ni Debata
11 Didok si Paulus, “Ganup sintua ni malim dipillit do laho pasahathon silehon-lehon dohot pelean.” (Heber 8:3) Parrohahon ma, adong dua bagian na dipaboa si Paulus dison, i ma “silehon-lehon” dohot “pelean” manang “pelean alani dosa ni angka jolma”. (Heber 5:1) Somalna halak mangalehon hadiah alani holongna do jala asa boi marale-ale tu donganna. (1Mus 32:20; Poda 18:16) Suang songon i ma, boi do angka pelean i dipatudos songon silehon-lehon na mambahen las roha ni Debata. Alai molo dilanggar Patik, ingkon adong do ganti rugina. Alani i, porlu do dibahen “pelean alani angka dosa”. Di buku 2 Musa, 3 Musa, dohot 4 Musa, godang do disurat taringot angka na porlu diparade laho mamelehon marragam pelean. Ra, maol do taingot i sude. Alai porlu do taparrohahon piga-piga na ringkot sian i.
it-2-IN 479 ¶5
Parjanjian
Boasa parjanjian Patik i boi gabe “buruk”?
Tingki dipaboa Debata tu si Jeremia na laho dibahen nama parjanjian baru, boi ma didok gabe buruk parjanjian Patik i. (Jer 31:31-34; Heb 8:13) Taon 33 M, ndang marlangku be parjanjian Patik i ala nunga mate Jesus di hau partinaonan (Kol 2:14), jala parjanjian baru ma na marlangku.—Heb 7:12; 9:15; Ul 2:1-4.
9-15 SEPTEMBER
ARTA NA ARGA NA ADONG DI BIBEL HEBER 9-10
“Bayangan ni Angka na Denggan na Naeng Ro do i”
it-1-IN 115 ¶10
Manalpuhon
Hombar tu uhum na dilehon Debata tu bangso Israel, molo adong sasahalak na mardosa tu Debata dohot tu donganna, boi dope disalpuhon angka dosana i. Carana, ingkon diangkui ibana do hasalaanna. Jala somalna, ingkon dilehon ibana do pelean mudar tu Jahowa. (3Mus 5:5–26) I do umbahen didok si Paulus, “Hira sude do dipabadia marhite mudar jala molo ndang adong mudar diusehon, ndang adong hasesaan ni dosa.” (Heb 9:22) Alai sasintongna, mudar ni pelean binatang i ndang boi sempurna manalpuhon dosa jala mambahen ias panggora ni roha. (Heb 10:1-4; 9:9, 13, 14) Alai molo parjanjian baru i, boi do manalpuhon dosa marhite tobusan ni Jesus Kristus. (Jer 31:33, 34; Mat 26:28; 1Kor 11:25; Eps 1:7) Jala tingki di tano on pe Jesus, dipatudu do na boi ibana manalpuhon dosa ni sahalak baoa na lumpu.—Mat 9:2-7.
cf-IN 183 ¶4
“Tongtong ma Ihuthon Ahu”
4 Memang ndang dicaritahon di Bibel songon dia Jesus dijangkon dung mulak tu surgo, jala songon dia las ni rohana dohot Bapakna tingki pajumpang muse nasida. Alai, nunga disurat hian di Bibel taringot aha na masa dung mulak Jesus tu surgo. Najolo di tingki ni halak Jahudi, sadari di bagasan sataon, ro do sintua ni malim tu Inganan na Mansai Badia di bagas joro. Jala dipispishon ma mudar ni pelean tu Ari Pardamean di jolo ni poti parpadanan. Somal do halak Jahudi mangida ulaon i. Manggombarhon Messias do sintua ni malim i. Digohi Jesus ma surirang taringot ulaon i dung mulak ibana tu surgo. Ro ma ibana tu adopan ni Jahowa, di Inganan na Mansai Badia, jala dilehon ma pelean tobusan tu Bapakna. (Heber 9:11, 12, 24) Dijalo Jahowa do i?
it-2-IN 765 ¶3
Sempurna
Sempurna do Patik ni si Musa. Disurat do di Patik ni si Musa taringot ulaon ni angka malim dohot marragam pelean binatang. Ala sian Debata do i sude, sempurna do i. Alai sudena i ndang boi mambahen angka halak na mangihuthon Patik i gabe sempurna. I do na dipaboa apostel Paulus. (Heb 7:11, 19; 10:1) Ndang boi Patik i paluahon halak sian dosa dohot hamatean. Gariada Patik i patuduhon na mardosa do jolma. (Rom 3:20; 7:7-13) Nang pe songon i, adong do tujuan ni Debata mambahen Patik i. Patik i do na ‘manogu-nogu’ angka halak tu Kristus. Jala Patik do na gabe “bayangan ni angka na denggan na naeng ro”. (Gal 3:19-25; Heb 10:1) Alani i, adong do dipaboa si Paulus taringot angka “na so boi ulahonon ni Patik ni si Musa alani hagaleon ni jolma”. (Rom 8:3) Ra, ibana naeng paboahon ndang boi sintua ni malim Jahudi (na dilantik marhite Patik laho mangalehon pelean jala masuk tu Inganan na Mansai Badia di Ari Pardamean mamboan pelean mudar) paluahon angka halak. Hombar do i tu na disurat di Heber 7:11, 18-28. Nang pe pelean na dibahen angka malim i boi mambahen bangso i gabe tigor di adopan ni Debata, alai ndang boi i paluahon nasida sian dosa. Dipaboa apostel Paulus do tong taringot i. Didok ibana pelean pardamean i ndang boi “mambahen sun denggan angka na manomba Debata”. (Heb 10:1-4; bandingkon tu Heb 9:9.) Arga ni pelean na dilehon sintua ni malim i ndang boi manobus dosa ni jolma. Holan pelean na dilehon Kristus do na boi mangulahon i.—Heb 9:14; 10:12-22.
Mangalului Arta na Adong di Bibel
w92-IN 1/3 31 ¶4-6
Sungkun-Sungkun sian na Manjaha
Didok si Paulus, ingkon adong do na dipelehon asa marlangku parjanjian ni Debata dohot jolma. Umpamana Patik ni si Musa. Debata dohot bangso Israel do na mambahen parjanjian on, jala si Musa ma na gabe perantara di nasida. Balga do tugas ni si Musa dison. Ibana do na mangurupi bangso Israel asa boi masuk tu parjanjian i. Alani i boi ma didok, si Musa do na mambahen saut parjanjian na dibahen Jahowa. Alai ingkon dipelehon si Musa do mudarna asa marlangku parjanjian i? Ndang songon i. Boi do mudar ni binatang na dipelehon ganti ni mudar ni si Musa.—Heber 9:18-22.
Boha taringot parjanjian na dibahen tu Israel ni Debata? Jesus Kristus do na gabe perantara ni Jahowa dohot Israel ni Debata. Nang pe Jahowa na mambahen parjanjian on, alai ringkot do peran ni Jesus Kristus dison. Ndang holan gabe perantara Jesus. Alai tingki di tano on, ibana do na langsung mangurupi angka halak asa masuk tu parjanjian i. (Lukas 22:20, 28, 29) Asing ni i, ibana do na tama mangalehon pelean asa boi marlangku parjanjian i. Ndang boi binatang na dipelehon, ingkon ngolu ni jolma na sempurna do na dipelehon. Didok si Paulus ma Kristus i na mambahen saut parjanjian baru i. Dung masuk Kristus “tu surgo, tu jolo ni Debata”, baru pe marlangku parjanjian i.—Heber 9:12-14, 24.
Ndang adong didok si Paulus, na si Musa dohot Jesus na mambahen parjanjian i. Alana Jahowa do na mambahen parjanjian i. Alai nasida na dua gabe perantara, asa boi saut parjanjian i. Jala sian angka parjanjian i, porlu do dibahen pelean. Pelean binatang ma na manggantihon si Musa. Alai molo Jesus, ngoluna sandiri do dibahen gabe pelean tu parjanjian baru i.
it-1-IN 309 ¶5
Pandidion
Didok si Lukas, martangiang do Jesus tingki tardidi. (Luk 3:21) Jala di surat ni si Paulus tu halak Heber, dipaboa si Paulus do hata ni Jesus tingki di “portibi on” ibana. Hombar tu naung tarsurat di Psalmen 40:7-9 (LXX), didok Jesus do, “Ndang lomo roham tu silehon-lehon dohot tu pelean. Alai diparade Ho do sada daging di ahu. Ale Debata, ro do ahu laho mangulahon lomo ni roham, songon na tarsurat taringot tu ahu di gulungan i.” (Heb 10:5-9) Halak Jahudi do Jesus tingki di tano on, jala adong do parjanjian ni Debata tu bangso Jahudi, i ma parjanjian Patik. (2Mus 19:5-8; Gal 4:4) Alani i, nunga di bagasan parjanjian i hian Jesus tingki ro ibana manjumpangi si Johannes asa dididihon. Jadi sasintongna dilehon Jesus do lobi sian na dipangido Patik. Dilehon ibana do ngoluna tu Debata, laho mangulahon lomo ni roha ni Amana, i ma mangalehon dirina gabe tobusan. On manggantihon pelean binatang naung ditontuhon di Patik i. Apostel Paulus mandok, “Marhite ‘lomo ni roha’ ni Debata, nunga dipabadia be hita marhite daging ni Jesus Kristus na dipelehon sahali ro di saleleng ni lelengna.” (Heb 10:10) Lomo ni roha ni Jahowa na ingkon diulahon Jesus, i ma sude ulaon ni Harajaon. Jala dilehon Jesus do dirina laho mangulahon i. (Luk 4:43; 17:20, 21) Dijalo Jahowa do i. Dilantik Ibana ma Jesus marhite tondi parbadia tingki didok Ibana, “Ho do Anakku, haholonganki. Halomoan ni rohangku do ho.”—Mrk 1:9-11; Luk 3:21-23; Mat 3:13-17.
16-22 SEPTEMBER
ARTA NA ARGA NA ADONG DI BIBEL HEBER 11
“Ringkot do Haporseaon i”
Marhaporseaon ma Hamu tu Janji ni Jahowa
6 Di Heber 11:1, dipaboa Bibel do lapatan ni haporseaon. (Jaha.) (1) Haporseaon, i ma “pos ni roha . . . di angka sihirimon”. Na didok “sihirimon”, i ma janji ni Debata taringot ari na naeng ro. Umpamana, porsea do hita na laho pasohotonNa hajahaton jala adong tano na imbaru. (2) Haporseaon, i ma “pamotoan na tontu” manang bukti “taringot tu na so niida”. Taboto, adong do Debata Jahowa, Jesus Kristus, suru-suruan, dohot Harajaon di banua ginjang, nang pe ndang boi taida. (Heb. 11:3) Songon dia do patuduhon na marhaporseaon hita tu janji ni Debata dohot tu na so boi taida? Tapatudu ma i marhite pangkataion dohot parniulaonta.
w13-IN 1/11 11 ¶2-5
“Lehononna do Upa tu Halak na Marsitutu Mangalului Ibana”
Aha do na ingkon taulahon asa las roha ni Jahowa? Didok si Paulus, “Molo ndang porsea sasahalak tu Debata, ndang boi bahenonna las roha ni Debata.” Ndang didok si Paulus maol mambahen las roha ni Debata molo ndang adong haporseaon. Alai na didok ibana, ndang mungkin boi tabahen las roha ni Debata molo ndang adong haporseaon. Jadi ingkon adong do haporseaonta asa boi tabahen las roha ni Jahowa.
Ingkon songon dia do haporseaonta asa las roha ni Jahowa? Adong dua na ingkon taingot. Na parjolo, “ingkon porsea do [hita] na adong Debata”. Ndang mungkin boi tabahen las roha ni Debata molo ndang porsea hita na tutu adong Ibana. Alai ndang cukup holan porsea songon i. Alana suru-suruan na jahat pe porsea do na tutu adong Debata. (Jakobus 2:19) Ingkon tapatudu do haporseaonta i marhite ulaonta. Ingkon tabahen do las roha ni Debata di parngoluonta.—Jakobus 2:20, 26.
Na paduahon, “ingkon porsea” do hita molo Debata ‘silehon upa’. Molo balga do haporseaon ni sasahalak, pos do rohana lehonon ni Debata do upa tu angka naung binahenna. (1 Korint 15:58) Ndang boi tabahen las roha ni Jahowa molo ndang porsea hita na laho lehononna upa tu hita. (Jakobus 1:17; 1 Petrus 5:7) Molo adong sasahalak na mandok Debata i ndang parduli, ndang olo mangalehon pasu-pasu, jala ndang mangargai aha na tabahen, berarti ndang ditanda ibana dope Debata na sintong.
Angka ise do na laho pasu-pasuon ni Jahowa? Didok si Paulus, i ma angka “halak na marsitutu mangalalului [Jahowa]”. Sada referensi penerjemahan Bibel mandok, hata Junani na diterjemahon gabe “marsitutu mangalului”, boi do lapatanna manomba Debata. Jala referensi na asing mandok, kata kerja Junani na dipangke disi patuduhon molo i diulahon sian nasa roha. Jadi lehonon ni Jahowa do upa tu halak na manomba Ibana alani holong jala sian nasa roha.—Mateus 22:37.
w16.10 17 ¶10-11
Patogu ma Haporseaonmu tu Angka Pangkirimon
10 Di Heber bindu 11, didok apostel Paulus, ‘Dijalo angka ina na matena sumuang sian haheheon. Alai na deba disiksa do, so saut malua, asa anggiat taruli di haheheon na dumenggan.’ (Heb. 11:35) Ala marhaporseaon na togu tu haheheon na dijanjihon Debata, adong do na tongtong marsihohot tu Debata nang pe marsitaonon. Diboto nasida, paheheon ni Debata do nasida di ari na naeng ro jala mangolu salelengna di tano on. Rimangi ma taringot si Nabot dohot si Sakaria. Ala mangoloi Debata, didangguri ma nasida sahat tu na mate. (1 Raj. 21:3, 15; 2 Kron. 24:20, 21) Si Daniel didabuhon tu hurungan ni singa, jala angka donganna dipamasuk tu parapian na balga. Di rohanasida, tumagon do mate sian apala manadingkon Jahowa. Porsea situtu do nasida tu Jahowa, na laho lehononNa tondi parbadia jala mangurupi nasida martahan mangadopi sitaonon i.—Dan. 3:16-18, 20, 28; 6:14, 17, 22-24; Heb. 11:33, 34.
11 Godang do panurirang, songon si Mika dohot si Jeremia, na direhei manang dipenjara. Na asing, songon si Elia, “marpindapinda do nasida songon pangungsi di padang pasir dohot di dolokdolok, maringanan di liangliang dohot di angka lubang di toru ni tano”. Martahan do nasida mangadopi sitaonon jala marsihohot tu Debata, ala pos roha ni nasida tu pangkirimon.—Heb. 11:1, 36-38, Bibel siganup ari; 1 Raj. 18:13; 22:24-27; Jer. 20:1, 2; 28:10, 11; 32:2.
Mangalului Arta na Adong di Bibel
it-1-IN 1045 ¶1
Haporseaon
Sitiruon di Tingki Najolo taringot Haporseaon. Sude halak na gabe saksi na “songon ombun” i, adong do dasar ni nasida porsea tu Debata. Umpamana si Abel. Tontu diboto ibana do janji ni Debata taringot “pinompar” na laho mangalisathon ulu ni “ulok” i. Jala boi do diida ibana na tutu do saut hukuman na dipaboa Jahowa tu natua-tuana tingki di Eden. Tingki i gabe maol do di si Adam dohot keluargana mangalului sipanganon. Alana ndang denggan be tano na diula nasida, jala godang do tubu duhut-duhut na marsuga dohot duri. Ra diida si Abel do muse na sai torus naeng jonok omakna tu bapakna, jala lomo-lomo ni bapakna do tu omakna. Pasti dicaritahon omakna do songon dia hansitna manubuhon nasida. Asing ni i, diida si Abel do angka kerub dohot podang na marputar manjaga porlak Eden. (1Mus 3:14-19, 24) Angka i ma na gabe “bukti na paposhon” roha ni si Abel na laho dipalua do nasida marhite pinompar na dijanjihon i. Alani i, gabe porsea ma ibana tu Debata. Dipelehon si Abel ma pelean tu Debata, jala ummarga do peleanna i sian pelean ni si Kain.—Heb 11:1, 4.
Aha do lapatan ni hata na mandok si Henok “tarhinsat” gabe “ndang diida hamatean”? Olo do ra dibahen Debata asa ndang dihilala si Henok tingki mate ibana. Alai “andorang so tarhinsat, dihatindangkon do ibana, halomoan ni Debata”. Songon dia carana? Andorang so mate si Henok, olo do ra dapotna parnidaan sian Debata, hira na diida ibana ma paradeiso di tano on. Huhut diida parnidaan i, tarpodom ma ibana laos mate. Taringot si Henok dohot angka baoa nang borua na marsihohot, didok apostel Paulus, “Di bagasan haporseaon do mate nasida sude.” (Heber 11:13) Dung i, dilului angka musuna ma bangkena alai “ndang jumpang be”, olo do ra na dipamago Jahowa i asa unang dipangke tu panombaon na so sintong.
23-29 SEPTEMBER
ARTA NA ARGA NA ADONG DI BIBEL HEBER 12-13
“Dipinsang Jahowa do Halak na Dihaholongi Ibana”
w12-IN 15/3 29 ¶18
Unang “Mangida tu Pudi”
18 Sipasingot na posi. Songon dia do molo jut rohanta tingki taingot muse sipasingot na dilehon tu hita? On ndang holan mambahen hansit rohanta, alai olo do gabe “mandele” hita. (Heb. 12:5) Tingki dilehon sipasingot tu hita, hape ndang boi taulahon, olo do gabe mandele hita, manang gabe leas rohanta tu sipasingot i. Ujungna, gabe ndang adong be guna ni sipasingot i di hita. Alai ingot ma na didok si Salomo, “Tongtong ma ingot naung ginuruhonmu. Ai na ginuruhonmi do hangoluanmu, ala ni i ramoti ma i.” (Poda 4: 13, Bibel siganup ari) Songon sahalak supir na mangihuthon rambu-rambu lalu lintas, tatangihon ma sipasingot, taulahon ma i, jala unang menyerah.—Poda 4:26, 27; jaha Heber 12:12, 13.
w12-IN 1/7 21 ¶3
“Tingki Martangiang Hamu, dok ma, ‘Bapa’ ”
Sahalak ama na parholong, dipinsang do ianakhonna ala lomo rohana asa gabe halak na denggan ianakhonna. (Epesus 6:4) Ra, tegas do ibana, alai ndang hea kasar tingki maminsang ianakhonna. Suang songon i do Jahowa. Sipata, olo do dipinsang Ibana hita. Alai alani holongna do umbahen na dipinsang hita jala ndang lomo-lomona mangulahon i. Dos songon Jahowa, ndang hea kasar Jesus tu siseanna, nang pe ndang pintor ditangihon nasida sipasingotna.—Mateus 20:20-28; Lukas 22:24-30.
“Tangihon ma Sipasingot Asa Marbisuk Hamu”
18 Olo do hansit pangkilalaanta tingki dipasingot, alai humansit do molo ndang tajangkon sipasingot na sian Debata. (Heb. 12:11) Taparrohahon ma pengalaman ni si Kain dohot Raja Sedekia. Tingki diida Jahowa si Kain marsogo ni roha tu anggina jala naeng bunuonna anggina i, dipasingot Jahowa do ibana, “Boasa muruk ho? Boasa murhing bohim? Molo diula ho na denggan, minar ma bohim; alai ala diula ho na jahat, mangonggop ma dosa i di pintu ni roham. Naeng rajaanna ma ho, alai taluhon ma i.” (1 Mus. 4:6, 7, Bibel siganup ari) Ndang olo si Kain manangihon sipasingot sian Jahowa. Dibunu ibana do anggina i. Ujungna, gabe ditaon ibana ma na hansit di ngoluna. (1 Mus. 4:11, 12) Autsugari olo ibana manangihon Debata, ndang ditaon ibana ngolu na mansai hansit.
Mangalului Arta na Adong di Bibel
w11-IN 15/9 18 ¶11
Tongtong ma Hita Marlojong di Parlumbaan
11 Angka ‘saksi na songon ombun’ on ndang holan manonton lomba lari manang mangida atlet favoritna monang. Alai dohot do nasida tu parlumbaan i. Jala sahat do nasida tu garis finis. Nang pe nunga mate, boi do nasida dipatudos songon pelari na gabe sitiruon jala boi mambahen semangat angka pelari na baru. Rimangi ma songon dia pangkilalaan ni sahalak pelari molo diboto ibana adong angka pelari na jago na manonton ibana. Tontu, gabe taronjar do rohana laho marlojong sian nasa gogona. Marsitutu do angka naposo ni Debata najolo asa boi monang, nang pe maol parlumbaan i. Alani i, molo sai dirimangi pengalaman ni angka saksi na “songon ombun” i, gabe dipatogu do halak Kristen di abad na parjolo asa ‘tongtong marlojong di parlumbaan’. Suang songon i ma di tingkinta saonari.
w89-IN 15/12 22 ¶10
Lehon ma Pelean na Mambahen Las Roha ni Jahowa
10 Alani i, ingkon manat do halak Heber asa unang dililuhon angka ajaran na sala sian halak Jahudi. (Galatia 5:1-6) Ndang ajaran i na mambahen togu roha ni nasida di hasintongan. Alai alani asi ni roha ni Debata na mansai balga i do. Adong do piga-piga halak na marsoal taringot sipanganon dohot pelean. Alana didok si Paulus, angka sipanganon i ‘ndang parohon laba tu angka na mangaradoti aturan i’. Boi do togu haporseaon molo unduk tu Debata, mangargai tobusan, jala ndang manguhumi na asing taringot sipanganon manang angka perayaan. (Rom 14:5-9) Asing ni i, gabe ndang marlangku be pelean ni angka malim ala nunga adong tobusan ni Kristus.—Heber 9:9-14; 10:5-10.
30 SEPTEMBER–6 OKTOBER
ARTA NA ARGA NA ADONG DI BIBEL JAKOBUS 1-2
“Na Mambahen Mardosa jala Mate”
g17.4-IN 14
Ela-Ela
Molo sai dipingkiri hamu angka na sala jala lomo rohamuna laho mangulahon i, nunga tarela-ela be hamu. Umpamana, laho ma hamu tu sada toko jala dibereng hamu adong sada barang na bagak. Dung i, gabe tarpingkir ma hamu laho manangko barang i. Alai panggora ni roha mangorai hamu laho mangulahon i! Molo boi dipasiding hamu pingkiran sisongon i jala laho sian i, boi ma dialo hamu ela-ela i.
AHA NA DIDOK BIBEL
Ndang gabe halak na jahat hamu molo tarela-ela. Didok di Bibel, sude halak hea do tarela-ela. (1 Korint 10:13) Alai na rumingkot, i ma songon dia hita mangadopi ela-ela i. Adong piga-piga halak na sai mamingkirhon ela-ela i jala gabe mangulahon dosa. Alai na asing pintor dipasiding do ela-ela i sian rohana.
“Alai na tarunjun do ganup halak, ala ditarik jala dijorat sangkap-sangkapna sandiri.”—Jakobus 1:14.
g17.4-IN 14
Ela-Ela
Dipaboa do di Bibel aha na mambahen sasahalak gabe mangulahon na sala. Jakobus 1:15 mandok, “Molo sai dipingkiri sangkap-sangkapna [na sala] i, diulahon ma dosa.” Lapatanna, molo sai tapingkiri sangkap-sangkap na sala i, gabe taulahon ma na sala. Dos do i songon sahalak ina na laho tubu-tubuan. Alai boi do tapasiding sangkap-sangkap na sala i jala ndang diparhatoban be hita.
Mangalului Arta na Adong di Bibel
it-1-IN 488 ¶1
Hatiuron
Jahowa do “Sitompa Hatiuron”. (Jak 1:17) Ndang holan ala dilehon Ibana “mata ni ari gabe panondang arian, aturan ni bulan dohot angka bintang gabe panondang borngin”. (Jer 31:35) Alai ala Ibana do Mual ni sude hasintongan. (2Kor 4:6) Uhum, patik, dohot hatana, i ma hatiuron tu angka halak na olo ditogu-togu Ibana. (Ps 43:3; 119:105; Poda 6:23; Jes 51:4) Sahalak panurat psalmen mandok, “Di bagasan hatiuronmi huida hami hatiuron.” (Ps 36:10; bandingkon tu Ps 27:1; 43:3.) Songon hatiuron ni mata ni ari na lam marsinondang sian manogot sahat tu tonga ari, songon i ma dalan ni halak na tigor. Gabe lam tiur ma dalan ni nasida ala disondangi bisuk sian Debata. (Poda 4:18) Mangihuthon dalan naung ditontuhon Jahowa lapatanna mardalan di bagasan hatiuronna. (Jes 2:3-5) Alai, molo sai dipingkirhon sasahalak na jahat, nunga di bagasan haholomon ibana. Songon na didok Jesus, “Molo momar do matamuna, holom ma saluhut dagingmu. Molo haholomon do panondangmuna i, holom situtu ma haholomon i.”—Mat 6:23; bandingkon tu 5Mus 15:9; 28:54-57; Poda 28:22; 2Ptr 2:14.
it-1-IN 987 ¶5
Patik
“Patik Raja”. Boi ma didok “patik raja” i patik na rumingkot sian sude na dibahen laho mangatur songon dia jolma maradophon donganna na asing, songon sahalak raja maradophon rakyatna. (Jak 2:8) Dasar ni parjanjian Patik, i ma holong. Jala “ingkon haholonganmu do donganmu jolma doshon dirim” (patik raja), i ma parenta na paduahon jala na gabe dasar sian sude Patik dohot na Sinurat ni Angka Panurirang. (Mat 22:37-40) Nang pe ndang parjanjian Patik be na diihuthon halak Kristen, alai unduk do nasida tu patik na dibahen Raja, i ma Jahowa dohot Anakna Jesus Kristus taringot parjanjian baru.