PARSIAJARAN 8

Mangajari Marhite Tudosan

Mateus 13:34, 35

NA INGKON DIULAHON: Tingki mangajari, bahen ma tudosan na menarik jala mura diantusi, asa boi tangkas diboto nasida tujuan ni hatoranganmuna.

Bahen ma tudosan na mura antusan. Songon Jesus, pangke ma tudosan na mura antusan tarlumobi tingki patorangkon parsiajaran na maol. Unang pasahat hatorangan na so porlu, na mambahen tudosan i gabe maol antusan. Pastihon ma tudosan i cocok tu parsiajaran na dipasahat hamu, asa boi diantusi nasida hatorangan i, jala ndang gabe bingung.

Ingkon diboto hamu do angka na masa di ingananmuna, parsiajari ma sijahaonta, jala tiru ma angka donganta naung marpengalaman. Surat jala simpan ma angka tudosan na dapotmuna. Molo diulahon hamu i, boi ma hamu mambahen tudosan na mura antusan.
Pingkirhon ma tudosan na pas tu nasida. Pillit ma tudosan na ditanda nasida manang na adong hubunganna tu ulaon ni nasida siganup ari. Alai, unang ma pangke tudosan na mambahen hansit roha ni nasida jala maila.
Patorang ma pokok utamana. Bahen ma tudosan taringot pokok utamana. Tingki patorangkon i, urupi ma nasida mangingot parsiajaran sian tudosan i. Ndang holan mangingot tudosanna sambing.