Referensi tu Parpunguan Hangoluan dohot Pangkobasion na Laho Diparsiajari
© 2023 Watch Tower Bible and Tract Society of Pennsylvania
6-12 NOVEMBER
ARTA NA ARGA NA ADONG DI BIBEL JOB 13-14
“Molo Mate Jolma, Boi do Ibana Mangolu Muse?”
w99-IN 15/10 3 ¶1-3
Marsitutu do Akka Halak asa Ganjang Umur ni Nasida
HIRA-HIRA 3.500 taon naung salpu, disurat do di Bibel holan parsatokkinan do ngolu ni jolma. Tutu do i na masa. Dang boi hita poso torus, pasti matua do hita jala mate. Alani i ma sian najolo dibahen akka halak do godang cara asa ganjang umur ni jolma.
Contohna di jaman ni si Job porsea do halak Mesir, asa boi muse mulak haposoon ni nasida, ikkon diallang nasida do buah zakar ni binatang. Di pudian ni ari, adong do muse akka halak na mambahen ubat siinumon asa tamba ganjang umur ni jolma. Porsea do tong nasida boi do mas tiruan mambahen nasida mangolu salelengna, jala molo mangan sian piring mas, boi do tamba ganjang umur ni nasida. Asing ni i akka penganut Taoisme najolo di Cina mandok, molo diulahon sasahalak meditasi, olahraga pernafasan, dohot diet, boi do i manguba proses kimiawi di dagingna. Ujungna didok nasida boi ma jolma mangolu salelengna.
Adong do muse sahalak bawa sian Spanyol na margoar si Juan Ponce de León, na markaliling dunia lao mangalului aek na boi mambahen jolma poso torus. Asing ni i hira-hira 300 taon naung salpu, adong ma sahalak dokter na manurat bukku na marjudul Hermippus Redivivus. Dipaboa ibana do di bukkuna i, adong do ubat na boi mambahen tamba ganjang umur ni jolma. Cara mambahen ubat i, i ma ikkon dikurung do akka anak boru di sada ruangan na soppit di musim semi. Dung i, dipapungu ma hosa ni nasida i tu sada botol lao mambahen ubat i. Sian sude cara i, dang adong nanggo sada pe na marhasil.
w15-IN 15/4 32 ¶1-2
Boi do Tubu Muse Hau Naung Ditaba?
NANG PE dang songon hau ares na sian Libanon bagak ni hau jetun [Olea europaea], alai ulleleng do umur ni hau jetun. Boi do umurna sappe 1.000 taon nang pe hurang bagak cuaca dohot kondisi ni tanona. Asing ni i nang pe ditaba batang ni hau jetun, boi dope tubu hau i alana bagas do uratna tartanom tu tano. Jadi molo adong dope uratna, boi do tubu muse hau jetun i.
Alani i ma dipakke si Job hau jetun gabe tudosan lao patuduhon na tolap do Debata pahehehon halak naung mate. Didok si Job, “Haru hau pe boi do mangolu muse. Molo ditaba hau i, boi do i tubu muse.” Molo nga salpu logo ni ari jala ro udan, boi do hau jetun tubu muse jala “mardakkai do i songon suan-suanan na baru” nang pe nga sanga naeng mate. (Job 14:7-9.) Jadi pos do roha ni si Job molo mate pe ibana, boi do ibana mulak mangolu muse.—Job 14:13-15.
w11-IN 1/3 22 ¶5
“Masihol do Ho”
Hata ni si Job on patuduhon massai holong do roha ni Jahowa tu akka toppaanna. Jonok do Jahowa tu akka halak na songon si Job, ala nungnga dipasahat nasida ngoluna tu Jahowa jala dioloi akka parettana. (Jesaya 64:8) Massai diargai Jahowa do akka naposona na setia. Nang pe nga mate nasida, alai “masihol” do Ibana. Menurut sahalak pakar, di bahasa Heber “dalam do makna ni hata masihol na didok di ayat on. Lapatanna, i ma sasahalak na naeng pajuppang hian dohot donganna”. Jadi Jahowa dang holan mangingot akka naposona naung mate, alai masihol do Ibana jala tarpaima hian do Ibana naeng pahehehon nasida.
Arta na Adong di Bibel
it-1-IN 33 ¶3
Abu
Hata abu boi do tong dipakke lao manggombarhon manang aha pe na so mararga, na so marguna, dohot na so marlapatan. Misalna didok si Abraham do tu Jahowa, “Holan orbuk dohot abu do nian au.” (1Mus 18:27; ida muse Jes 44:20; Job 30:19.) Asing ni i dipatudos si Job do hata ni akka donganna “dos songon abu”.—Job 13:12.
13-19 NOVEMBER
ARTA NA ARGA NA ADONG DI BIBEL JOB 15-17
“Unang ma Tiru si Elipas Tikki Makkatai tu Halak na Marsak”
w05-IN 15/9 26 ¶4-5
Bolokkon ma Cara Marpikkir na Sala!
Sian hata ni si Elipas tu si Job, hira na didok si Elipas ma paborattu do akka paretta ni Debata diulahon. Alani i ma dang boi jolma pasonakkon roha ni Debata. Didok si Elipas, “Ida ma! Haru tu akka naposona dang porsea Debata, sai dilului Ibana do sala ni akka suru-suruanna.” (Job 4:18) Didok si Elipas do muse, “Dang porsea Ibana tu akka suru-suruanna, haru langit pe dang badia di Ibana.” (Job 15:15) Jala didok do muse, “Gabe las haroa roha ni Pargogo na So Hatudosan i molo tigor ho marroha?” (Job 22:3) Songon i do tong pandangan ni si Bildad taringot Debata. Didok ibana, ‘Haru bulan pe dang tiur jala akka bintang pe dang badia di jolo ni Debata.’—Job 25:5.
Unang ma porsea hita tu cara marpikkir sisongon i. Unang ma tadok di rohatta paborattu do akka paretta ni Debata diulahon. Alana molo songon i cara marpikkirta, boi do i manegai hubungatta tu Jahowa. Akibatna molo dipasingot hita, ‘gabe jut ma rohatta’ bahkan gabe muruk hita tu Jahowa. Dang be serep rohatta manjalo sipasingot i. (Poda 19:3) Jadi bahaya do cara marpikkir sisongon i!
w15-IN 15/2 9 ¶16
Tiru ma Jesus na Serep Roha jala Lambok
16 Hatatta. Molo lambok hita, pasti taronjar do rohatta lao ‘patoguhon roha ni na marsak’. (1 Tes. 5:14) Aha do na boi tadokkon lao patoguhon roha ni nasida? Paboa ma na massai parduli do hita tu nasida. Tapuji ma kelebihan dohot akka sifat ni nasida asa boi semangat muse nasida. Paboa ma muse, Jahowa sandiri do na mamillit nasida tu hasittongan, jadi pasti massai arga do nasida di Jahowa. (Joh. 6:44) Asing ni i, papos ma roha ni nasida sai diparrohahon Jahowa do akka naposona na “mandele” jala na “hancur rohana”. (Ps. 34:18) Jadi molo lambok hita jala tadok hata na tabo begeon, boi ma hita mangapuli roha ni halak na marsak.—Poda 16:24.
Arta na Adong di Bibel
w06-IN 15/3 14 ¶11
Akka na Denggan sian Bukku Job
7:9, 10; 10:21; 16:22—Sian akka hata ni si Job i, na so porsea do ibana tu haheheon? Sian Job 14:13-15 tarida do na porsea situtu si Job tu haheheon. Jadi aha do maksud ni hata ni si Job i? Olo do ra lapatanna molo mate ibana, dang na lao idaon ni akka halak na di jamanna be ibana. Menurut si Job, di pandangan ni akka halak dang na lao mulak be ibana tu jabuna, jala dang na lao ingoton ni akka halak be ibana sahat tu na dipahehe Debata ibana. Asing ni i olo do ra lapatanna dang boi jolma na mate mambahen dirina mulak mangolu muse, molo dang alani Debata.
20-26 NOVEMBER
ARTA NA ARGA NA ADONG DI BIBEL JOB 18-19
“Unang ma Tatinggalhon Dongan Sahaporseaotta”
Parsiajaran sian Situasi na Mambahen Jesus Tangis
9 Sai taurupi ma akka dongan na marlungun ni roha. Tikki diida Jesus tangis si Marta dohot si Maria, dohot do ibana tangis. Asing ni i, ditangihon Jesus do halak i jala dipatogu do roha ni nasida. Hita pe, porlu do tabahen songon i tu akka dongan na marlungun ni roha ala mate halak na dihaholongi nasida. Taida ma jo saonari aha na didok donganta si Daniel, sahalak sintua na tinggal di Australia. Didok ibana, “Tikki mate istrikku, hancur hian do perasaanku. Alai burju hian do akka dongan. Adong do piga-piga pasangan na sai rade mandongani au. Dang bosan nasida mambege au marcarita. Dang diorai nasida au tangis. Alani i gabe dang maila au patuduhon perasaanku di jolo ni nasida. Rade do nasida mangurupi au manucci mobil, belanja dohot mangaloppa. Jotjot do hami rap martangiang. Dos songon keluargakku do nasida, na sai adong di labbungku ‘tikki masa sitaonon’.”—Poda 17:17.
Toktong Togu Tikki Adong Keluargatta Na Dipecat
16 Rade ma hita mangurupi keluarga ni na dipecat i. Alana massai porlu do nasida dipatogu. (Heb. 10:24, 25) Sipata olo do halak i merasa hira na mandao do akka dongan sian nasida. Jadi unang ma mandao hita sian nasida. Akka gelleng ni na dipecat pe porlu do dipatogu, asa torus halak i setia manomba Jahowa. Molo donganta si Maria na dipecat suamina jala na maninggalhon halak i mandok, “Ro do berkunjung tu jabu akka dongan. Rap mangaloppa jala marsiajar Bibel do hami. Dang holan i, rap tangis do nasida dohot au, jala diattusi nasida do perasaanku. Tikki adong na manalahon au, dibela nasida do au. Gabe lam togu ma au.”—Rom 12:13, 15.
w90-IN 1/9 22 ¶20
Olo do Hamu Mandapot Tugas Tambahan di Huria?
20 Porlu do diboto akka sintua, molo dang gabe sintua manang parhobas di huria be sasahalak, olo do ra gabe marsak ibana nang pe ibana sandiri na mengundurkan diri. Mungkin dang sappe dipecat donganta i. Alai molo diida sintua gabe depresi ibana, ikkon lambok do nasida mangurupi jala patoguhon ibana. (1 Tessalonik 5:14) Ikkon dipapos do rohana na mararga do ibana di huria. Nang pe dipasingot donganta i, alai molo serep rohana jala diulahon ibana sipasingot i, boi do mulak muse ibana mandapot tugas tambahan di huria.
Arta na Adong di Bibel
w94-IN 1/10 32 ¶3-4
Pengaruh ni Hata na Denggan
Alani sitaonon ni si Job na massai borat i, porlu hian do ibana dipatogu. Alai hata ni si Elipas dohot dua donganna justru mambahen haccit rohana. Disalahon nasida do si Job jala ditudu do ibana mangulahon dosa makana susa ibana. (Job 4:8) Didok di The Interpreter’s Bible, “Sasittongna na dihaporluhon si Job, i ma asi ni roha sian halak na asing, alai dang dapotna i. Justru mulak-ulak do akka donganna mandok hata na mambahen metmet roha ni si Job. Attar-attar dihubungkon nasida ma hata ni nasida tu Debata asa hira na sittong begeon.” Alani i ma sappe didok si Job, “Sadia leleng nai bahenonmuna haccit rohakku, jala malala ate-atekku?”—Job 19:2.
Alani i unang ma asal tapandokkoni hatatta tu akka donganta na marsak asa unang gabe lam marsak manang mandele nasida. (Bandingkon tu 5 Musa 24:15.) Didok do di Bibel, “Marhuaso do dila parohon hangoluan dohot hamatean, songon dia halak mamakke dilana, laos songon i do upa jaloonna.”—Poda 18:21.
27 NOVEMBER–3 DESEMBER
ARTA NA ARGA NA ADONG DI BIBEL JOB 20-21
“Dang Sai Mamora Halak na Sittong”
w07-IN 1/8 29 ¶12
‘Mamora do Hamu di Adopan ni Debata’?
12 Didok Jesus dang boi hita mamora di adopan ni Debata huhut papunguhon arta tu diritta sandiri. Jadi unang ma papunguhon arta tu diritta sandiri na gabe tujuan ni ngolutta. Alai tapakke ma sude na adong di hita, termasuk hepengta lao mendukung lomo ni roha ni Jahowa. Molo taulahon i, gabe mamora ma hita di adopan ni Debata. Boasa? Alana pasti pasu-pasuon ni Jahowa ma na taulahon. Didok di Bibel, “Pasu-pasu ni Jahowa do na mambahen halak mamora, jala dang mardongan na haccit i dibahen Ibana.”—Poda 10:22.
Arta na Adong di Bibel
w95-IN 1/1 9 ¶19
Monang Mangalo Sibolis
19 Gabe ‘susa do pikkiran’ ni si Job alani hata ni si Elipas dohot si Sopar, ai sian Sibolis do sasittongna hata i. (Job 4:13-18; 20:2, 3) Alani i ‘asal dipandokkoni’ si Job ma hatana ala “mabiar situtu” do ibana. (Job 6:2-4; 30:15, 16) Alai anggo si Elihu, denggan do ditangihon ibana si Job. Diurupi ibana do si Job mangida situasina sian sudut pandangan ni Jahowa. Songon i do tong na diulahon akka sintua saonari. Parduli do nasida tu akka donganta na marsak, jala dang ditambai nasida arsak ni roha ni akka donganta i. Ditiru akka sintua do si Elihu, sabar do nasida manangihon akka donganta jala dipatogu nasida do akka donganta i marhite Bibel. (Job 33:1-3, 7; Jakobus 5:13-15) Alani i boi do Bibel mangapuli akka halak na marsak, na malala rohana, na trauma, dohot na ‘mabiar’ songon si Job.—Job 7:14; Jakobus 4:7.
4-10 DESEMBER
ARTA NA ARGA NA ADONG DI BIBEL JOB 22-24
“Ai Marguna do Haroa Jolma di Debata?”
w05-IN 15/9 26 ¶6–27 ¶2
Bolokkon ma Cara Marpikkir na Sala!
Molo tahilala paborattu akka paretta ni Debata diulahon jala maol pasonakkon rohana, boi do i mambahen hita merasa dang marguna. Didok si Elipas, “Ai marguna do haroa jolma di Debata? Adong haroa halak na marbisuk na marguna di Ibana?” (Job 22:2) Jadi si Elipas mandok dang marlapatan jolma di Debata. Songon i do tong na didok si Bildad. Didok ibana, “Adong haroa jolma na tigor marroha di jolo ni Debata? Manang hea haroa tubu jolma na so marsala sian sahalak borua?” (Job 25:4) Alani i ma menurut nasida dang seharusna si Job mandok dirina sittong di jolo ni Debata.
Godang do halak saonari na negatif tu dirina sandiri. Mungkin alani cara ni nasida dipagodang-godang, manang ala borat ni sitaonon ni nasida. Asing ni i, olo do ra hea nasida direhei manang sogo roha ni halak tu nasida ala beda sukuna. Lomo do roha ni Sibolis dohot akka suru-suruan na jahat mandele hita. Alana molo mandele hita, gabe tahilala ma maol do pasonakkon roha ni Debata Pargogo na So Hatudosan i. Lam leleng boi do gabe maup hita jala mandao sian Debata.—Heber 2:1; 3:12.
Tikki poso hita, sehat, jala gogo dope, pasti godang do na boi taulahon lao mendukung ulaon marbarita dohot ulaon ni organisasi. Alai molo nga lam matua hita jala marsahit-sahit, gabe moru do na boi taulahon. Alani i, olo do gabe tadok di rohatta dang marguna hita jala dang adong na boi taulahon lao pasonakkon roha ni Debata. Alai, ikkon tapasiding do pikkiran sisongon i, alana lomo ni roha ni Sibolis dohot suru-suruan na jahat do i.
w95-IN 15/2 27 ¶6
Martahan Mangadopi Hasusaan
Molo dipakke tolu dongan ni si Job do bisuk ni Debata, tottu dang dohonon ni nasida akka hata na mambahen haccit roha ni si Job. Alai pikkiran ni nasida do na dipaboa nasida. Didok si Elipas do tu si Job, “Tu akka naposona dang porsea Debata” jala molo tung pe halak na tigor marroha si Job, dang penting i di Debata. (Job 4:18; 22:2, 3) Alani i ma haccit hian do roha ni si Job mambege hata ni nasida i. Alai ujungna dipasingot Jahowa do si Elipas dohot donganna na dua i. Didok Jahowa, “Dang didok hamu na sittong taringot tu Au.” (Job 42:7) Alai adong dope hata ni nasida na ukkejam sian i.
w03-IN 15/4 14-15 ¶10-12
Hamu Akka na Poso—Bahen ma Las Roha ni Jahowa
10 Songon na taboto sian Bibel, didok Sibolis do dang adong nanggo sahalak pe na boi toktong setia tu Debata jala na olo manomba Ibana sian nasa rohana. Nang pe tikki i taringot si Job do na dihatai Sibolis tu Jahowa, alai marlakku do hatana i tu sude jolma. Didok Sibolis do tu Jahowa, ‘Lehonon ni sude jolma do manang aha pe na di ibana asal ma boi mangolu.’ (Job 2:4) Termasuk do sude akka na poso ditudu Sibolis. Alai songon na dipaboa di Poda 27:11, dipangido Jahowa do asa marbisuk hita. Alana molo marbisuk hita, boi ma taalusi tuduhan ni Sibolis i. Bayakkon ma dohot ho dipangido Debata Natumimbul i mangalusi parsoalan na umbalga di alam semesta on. Sada hasangapon jala tanggung jawab na balga do i di ho. Rade do ho mangulahon i? Molo si Job, diulahon ibana do tanggung jawabna i. (Job 2:9, 10) Sian najolo nungnga godang naung marhasil mangalusi tuduhan ni Sibolis i. Contohna Jesus dohot sude akka naposo ni Debata na setia, termasuk ma akka na poso. (Pilippi 2:8; Pangungkapon 6:9) Ho pe boi do marhasil songon nasida. Ikkon pillitonmu do ise na naeng dukungonmu, Jahowa do manang Sibolis. Boi do i tarida sian parniulaonmu.
Massai Holong do Roha ni Jahowa tu Ho!
11 Memang adong do artina di Jahowa aha na dipillit ho? Dang naung godang halak na setia na mangalusi tuduhan ni Sibolis i? Memang nungnga godang akka naposo ni Jahowa na mambuktihon sala do tuduhan ni Sibolis i. Alai lomo do roha ni Jahowa asa dohot ho marpihak tu Ibana ala massai arga do ho di Ibana. Didok Jesus, “Dang lomo roha ni Damang na di banua ginjang i mago apala sada pe sian na metmet on.”—Mateus 18:14.
12 Massai penting do di Jahowa aha na dipillit ho. Alana dipaboa di Bibel, berpengaruh do parniulaon ni jolma tu perasaan ni Jahowa. Contohna “haccit do roha” ni Jahowa ala mulak-ulak mangalo halak Israel tu Ibana. (Psalmen 78:40, 41) Asing ni i andorang so ro Aek na Sumar di jaman ni si Noak, ‘massai haccit do roha ni Jahowa’ ala “massai jahat akka jolma” di tikki i. (1 Musa 6:5, 6) Jadi molo diulahon ho na sala, haccit do roha ni Jahowa. Alai molo diulahon ho na sittong, las ma rohana. Nang pe songon i, dang na berarti holan perasaanna na dipikkiri Jahowa. Alai na diboto Ibana do molo diulahon ho na sittong, gabe denggan ma ngolum jala lehononna ma upa tu ho. (Heber 11:6) Jadi massai holong do roha ni Jahowa tu ho.
Arta na Adong di Bibel
w04-IN 15/7 21 ¶7-8
Bahen ma Cita-Cita na Pasangappon Debata
Taida ma boha cara ni Jahowa manoppa alam semesta. Lao paboahon urutan penciptaan, didok do di Bibel “salpu ma borngin jala torang ma ari muse”. (1 Musa 1:5, 8, 13, 19, 23, 31) Andorang so ditoppa Jahowa sudena, jolo ditottuhon Ibana do aha tujuanna dung i diulahon Ibana ma tujuanna i. (Pangungkapon 4:11) Didok do di Bibel, “Molo nungnga adong sakkap ni rohana, pasautonna do i.” (Job 23:13) Jala dung diida Debata sude akka na binahenna i didok Ibana ma “massai denggan do i sude”.—1 Musa 1:31.
Hita pe asa boi saut cita-cita rohanitta, ikkon botul-botul do lomo rohatta naeng pasautton i. Boha ma carana? Songon Jahowa, nang pe di tikki i dang dibahen Ibana dope manang aha, alai nga boi dibayakkon Ibana bagak ni tano on molo nungnga saut tujuanna i. Jala sai diingot Jahowa do manfaatna molo nga saut tujuanna i, i ma parohon sangap tu goarna. Dos songon i ma, molo tabayakkon hasilna dohot manfaatna molo saut cita-citatta i, pasti lam berusaha ma hita mencapai i. Taida ma pengalaman ni si Tony na marumur 19 taon. Hea ma ibana ro tu kantor cabang ni Saksi Jahowa di Eropa Barat. Las hian do rohana tikki i. Mulai sian i, sai didok ibana ma di rohana, ‘Tabo do ra ate tinggal jala karejo di Betel.’ Sai dipikkiri ibana do i torus jala berusaha do ibana asa dapotna cita-citana i. Piga-piga taon dukkon i, diundang ma ibana tu Betel. Las hian ma rohana.
11-17 DESEMBER
ARTA NA ARGA NA ADONG DI BIBEL JOB 25-27
“Dang Ikkon Sempurna asa Boi Toktong Setia”
it-1-IN 1051 ¶1
Toktong Setia
Si Job. Olo do ra si Job mangolu dung mate si Josep jala andorang so mamimpin bangso Israel si Musa. Didok di Bibel, “Halak na tigor marroha do ibana jala setia do ibana tu Debata [bahasa Heberna tam]. Dihabiari do Debata jala dang diulahon ibana na jahat.” (Job 1:1; ida it-1-IN 228 AYUB.) Sian pakkataion ni Jahowa dohot Sibolis taringot si Job, tarida do na disangsihon Sibolis kesetiaan ni sude jolma tu Jahowa. Ditudu Sibolis do si Job manomba Debata holan ala na dipasu-pasu Jahowa do ibana. Nang pe marhasil Sibolis mambuat sude arta ni si Job jala pamatehon sude anakkonna, alai gagal do Sibolis mambahen si Job dang setia tu Debata. (Job 1:6–2:3) Dung i ditudu Sibolis do muse si Job, molo artana dohot gellengna na mago, boi dope ibana setia tu Jahowa, alai molo nungnga ngoluna sandiri na terancam, pasti buraanna do Debata. (Job 2:4, 5) Alani i dibahen Sibolis ma si Job marsahit na parah, istrina pe mandele jala manjujui si Job maninggalhon Debata. Asing ni i, akka dongan ni si Job pe mangaleai ibana, jala mandok na so tutu taringot Debata. (Job 2:6-13; 22:1, 5-11) Alai dang ditinggalhon si Job haporseaonna tu Debata. Didok ibana do, “Sappe mate au, toktong do au setia tu Debata! Toktong do au marsitutu asa tigor marroha jala sai bahenokku do songon i. Saleleng mangolu au, ias ma panggora ni rohakku.” (Job 27:5, 6) Jadi ala toktong si Job setia tu Debata, dibuktihon ibana ma na pargabus do Sibolis i.
Tongtong ma Hamu Setia!
3 Songon dia caranta patuduhon na setia hita tu Debata? Ingkon tahaholongi do Ibana sian nasa rohanta jala ingkon tabahen do na boi mambahen las rohana. Di Bibel lapatan ni hata “setia”, i ma ndang martihas manang ndang cacat. Umpamana, di Patik ni si Musa didok do tu halak Israel, ndang boi dilehon nasida binatang na cacat tingki mangalehon pelean tu Jahowa. (3 Mus. 22:21, 22) Ndang boi dilehon nasida binatang na so adong patna, pinggolna, matana, manang na marsahit. Ingkon na sehat do na dilehon nasida. (Mal. 1:6-9) Asa mura taantusi boasa dipangido Jahowa songon i, pingkirhon ma sada contoh. Molo tatuhor sada barang, tontu tapillit do barang na mansai denggan. Ndang olo hita manuhor barang i molo adong na sega apala saotik pe. Suang songon i ma pangkilalaan ni Jahowa. Molo holong rohanta jala setia hita tu Ibana, tontu ingkon talehon do na dumenggan tu Ibana.
4 Ganup ari, sai adong do hasalaan na tabahen. Alani i, unang ma didok rohanta ingkon sempurna hita asa boi setia. Boasa? Pingkirhon ma dua alasan on. Na parjolo, ndang hasalaanta na sai diida Jahowa. Didok Bibel, “Molo dibilangi Ho angka dosanami, ise ma na boi malua sian uhum?” (Ps. 130:3, Bibel siganup ari) Diboto Jahowa do molo hita jolma na so sempurna. Jala rade do Jahowa manalpuhon hasalaanta. (Ps. 86:5) Na paduahon, ndang dipangido Jahowa tu hita na so tolap taulahon. (Jaha Psalmen 103:12-14.) Jadi songon dia do carana mangalehon na dumenggan tu Ibana?
5 Holong do na mangonjar rohanta umbahen tongtong setia tu Jahowa. Alani i, talehon ma na dumenggan tu Jahowa jala tapatudu ma holongta sian nasa roha. Molo holong do rohanta tu Jahowa, boi do hita tongtong setia nang pe adong na mengela-ela hita. (1 Kron. 28:9; Mat. 22:37) Pingkirhon ma muse contoh sian tolu donganta i. Boasa dibahen nasida keputusan sisongon i? Na so lomo do roha ni donganta borua na di singkola i rap marlas ni roha ni dohot donganna di singkola? Manang, na lomo do roha ni donganta baoa na parila i asa direhei donganna i ibana? Asing ni i, na lomo do roha ni baoa i asa dipakaluar ibana sian karejona? Tontu daong. Ala diboto nasida do prinsip ni Jahowa. Jala rumingkot do di nasida mambahen las roha ni Jahowa. Ala holong do roha ni nasida tu Jahowa umbahen dibahen keputusan sisongon i. On patuduhon na setia do nasida tu Jahowa.
Arta na Adong di Bibel
Diatur Mangihuthon Buku na sian Debata
3 Tingki taida angka tompaan ni Jahowa, tangkas ma taboto Debata na taratur do Ibana. “Marhitehite hapistaran do dipaojak Jahowa tano on, jala marhitehite hapantason angka langit i dipadiri.” (Poda 3:19) Godang do na so taboto taringot angka tompaan ni Jahowa. Sasintongna, “holan husip dope na tabege” taringot tusi. (Job 26:14, Bibel siganup ari) Alai, taboto do taringot alam semesta na taratur ditompa Jahowa. (Ps. 8:4, 5) Taratur do parputar ni marjuta bintang di langit. Pingkirhon ma muse angka planet di tata surya na mangkaliangi mata ni ari. Sude on boi taratur ala Jahowa do na mangatur parputar ni sude planet dohot angka bintang. Tingki taboto songon dia huasoNa manompa langit dohot tano, gabe taronjar ma rohanta laho mamuji, manomba, jala marsihohot tu Ibana.—Ps. 136:1, 5-9.
18-24 DESEMBER
ARTA NA ARGA NA ADONG DI BIBEL JOB 28-29
“Ditiru Hamu do si Job?”
w02-IN 15/5 22 ¶19
Patudu ma Holong ni Roha tu Akka Halak na Porlu Diurupi
19 Sian contoh ni Bibel na dibahas nakkin, taboto ma porlu do tapatudu holong ni roha tu akka halak na porlu diurupi. Songon si Betuel, dilehon ibana do boruna tu anak ni si Abraham. Asing ni i, diboan si Josep do holi-holi ni si Jakkob mulak muse tu Kanaan. Jala, olo do muli si Rut asa unang mago warisan ni keluarga ni si Naomi. Sian akka contoh i, porlu do si Abraham, si Jakkob, dohot si Naomi diurupi halak na asing. Songon i ma tong hita saonari. Porlu do tapatudu holong ni roha, tarlumobi tu akka halak na susa dohot na pogos. (Poda 19:17) Tatiru ma si Job. Burju do ibana tu “halak na pogos na mangido asa diurupi, songon i nang halak na so marama dohot halak na so adong pangalu-aluanna”. Diurupi ibana do “halak na naeng mate” dohot “ina na mabalu”. Asing ni i, “gabe mata ni halak na mapitung” do ibana “jala gabe pat ni akka na pakpang”.—Job 29:12-15.
it-2-IN 268 ¶7
Pakkean
Sian pakkean ni sasahalak, boi ma taboto karejo didia ibana jala bergabung tu organisasi na dia ibana. Di Bibel pe jotjot do dipakke hata pakkean lao patuduhon halak na songon dia sasahalak jala aha na uppetting di ngoluna. Contohna boi ma taida sian tudosan ni Jesus taringot sasahalak na so mamakke baju pesta. (Mat 22:11, 12; ida it-1-IN 1179 KASUT; it-2-IN 1083 TUDUNG KEPALA.) Asing ni i, di Pangungkapon 16:14, 15, dipasingot Jesus do halak Kristen asa toktong jaga jala mamakke abit ni nasida. Abit manang pakkean i manggombarhon na sisomba Jahowa do nasida. Molo dang torus dipakke abit i, boi do gabe dang selamat nasida tikki masa “porang di ari na balga, i ma ari ni Debata Pargogo na So Hatudosan i”.
w09-IN 1/2 15 ¶3-4
Songon dia do Reputasikku?
Dang boi tabahen goarta sandiri tikki baru tubu hita. Alai hita sandiri do na manottuhon reputasitta. (Poda 20:11) Coba ma jo pikkirhon sukkun-sukkun on, ‘Molo rap mangolu au dohot Jesus dohot akka apostelna, menurut nasida halak na songon dia do au? Molo menurut akka halak, sogon dia do sifathu?’
Ikkon manat do tapikkirhon sukkun-sukkun on. Boasa? Alana didok Raja Salomo, “Tumagon do tarbarita goar ni sasahalak sian apala gok artana.” (Poda 22:1) Memang penting do tabahen goar na denggan di jolo ni halak, alai na uppetting ikkon tabahen do goar na denggan di adopan ni Jahowa. Boasa? Asa dapotta hangoluan na salelengna, alana marjanji do Debata suratonna do goar ni akka halak na mabiar tu Ibana di ‘bukku parningotanna’.—Maleaki 3:16; Pangungkapon 3:5; 20:12-15.
Arta na Adong di Bibel
g00-IN 8/7 11 ¶3
Pengaruh ni Senyumanta
Molo senyum manang mekkel suping hita tu halak na asing, adong do pengaruh ni i tu nasida. Las do rohamuna molo senyum halak na asing tu hamu? Alai molo dang adong na senyum tu hita, olo do ra gabe gugup hita jala gabe dang tabo suasana. Jadi balga do pengaruhna molo senyum hita. Songon i do tong na diulahon si Job najolo. Bahkan tu akka musuna pe, senyum do si Job. Didok ibana, “Molo mekkel suping au tu nasida, hira na marnipi ma dihilala nasida. Jala dame ma dihilala nasida molo diida bohikku.”—Job 29:24
25-31 DESEMBER
ARTA NA ARGA NA ADONG DI BIBEL JOB 30-31
“Aha do na Diulahon si Job asa Toktong Badia?”
w10-IN 15/4 21 ¶8
Tapadao ma Matatta asa Unang Mangida Akka na So Marguna!
8 Boi do halak Kristen gabe mangulahon dosa molo mangihutton hisap-hisap ni dagingna dohot lomo ni roha ni matana. Alani i ma didok Bibel ikkon tarajai do diritta. (1 Kor. 9:25, 27; jaha 1 Johannes 2:15-17.) I do na diulahon si Job, sahalak na tigor marroha. Diboto ibana adong do pengaruh ni aha na diida tu roha dohot pikkiran. Alani i ma didok ibana, “Nungnga hubahen parjanjian tu matakku, na so jadi hupanotnoti anak boru huhut marsakkap na so denggan.” (Job 31:1) Jadi, dang olo si Job mangulahon seks tu borua na asing. Jala holan mambayakkon mangulahon i pe, dang olo tong si Job. Alani i songon si Job, ikkon toktong do tajaga ias pikkiranta. Alana didok Jesus, “Manang ise na sai mamereng sahalak borua huhut marsakkap na so denggan, nungnga mangalakkup ibana di bagasan rohana.”—Mat. 5:28.
w08-IN 1/9 11 ¶4
Pikkirhon ma “Akibatna”
Molo adong godaan mangulahon seks na so patut, porlu do tapikkirhon on, ‘Aha do akibatna molo huulahon i?’ Molo tapikkirhon aha “akibatna”, pasti dang olo hita mangulahon i. Misalna, molo mangulahon seks na so patut, boi gabe hamil di luar nikah. Adong na manggugurhon kandunganna, jala hona AIDS dohot akka sahit na asing. Boi do tong gabe sega hubungatta tu keluarga, jala sai tasalahon diritta torus. Dipaboa Apostel Paulus do muse aha akibat na umbalga molo diulahon sasahalak seks na so patut, i ma “dang adong parbagiananna di Harajaon ni Debata”.—1 Korint 6:9, 10.
w10-IN 15/11 5-6 ¶15-16
Hamu Akka na Poso—Ihutton Hamu ma Hata ni Debata
15 Tikki sadihari do maol dihilala ho setia tu Debata? Molo tikki di sikkola dohot di tempat karejo, boi do ra marhasil ho menghadapi godaan. Alai boha molo tikki sahalakmu? Boi do ho tetap mangihutton standar ni Jahowa?
16 Aha na diulahon jolma, boi mempengaruhi perasaan ni Jahowa. Contohna halak Israel najolo. Ala sai mulak-ulak nasida mangalo Jahowa, haccit do roha ni Jahowa. (Ps. 78:40, 41) Alai massai holong do roha ni Jahowa tu si Daniel. Alani i ma didok sada suru-suruan tu si Daniel, halak “na massai dihaholongi Debata” do ibana. (Dan. 10:11) Boasa? Ala toktong do si Daniel setia tu Jahowa di jolo ni halak nang tikki sahalakna. (Jaha Daniel 6:10.) Jadi sai ingot ma, aha na diulahon ho, boi do mambahen las roha ni Jahowa manang mambahen haccit rohana. (1 Mus. 6:5, 6; Poda 27:11) Boasa songon i? Ala “diparrohahon” Jahowa do ho. (1 Ptr. 5:7) Lomo do roha ni Jahowa ditangihon ho Ibana asa denggan ngolum.—Jes. 48:17, 18.
Arta na Adong di Bibel
w05-IN 15/11 11 ¶3
Talehon ma Rohatta Tikki Manangihon
Sasittongna tikki makkatai si Job, dibege akka donganna do ibana. Alai didok si Job do, “Autsugari ma adong na olo manangihon au!” (Job 31:35) Boasa didok si Job songon i? Alana dang botul-botul ditangihon akka donganna i ibana. Dang parduli nasida tu si Job jala dang diattusi perasaanna. Didok Apostel Petrus do, “Saroha ma hamu sude, sapakkilalaan, marsihaholongan, marasi ni roha, jala marserep ni roha.” (1 Petrus 3:8) Aha do lapatanna sapakkilalaan? Sapakkilalaan lapatanna parduli hita tu perasaan ni halak na asing jala berupaya hita mangattusi perasaan ni nasida. Tikki adong donganta na marcerita taringot masalahna, boi do tadok, “pasti haccit do roham ate” manang “hape dang songon i maksudmu ate”. Holan i pe na tadok, nungnga patuduhon na parduli hita tu nasida. Asing ni i, boi do taulangi saotik aha na nidokna. I patuduhon na talehon do rohatta tikki makkatai ibana. Jadi molo holong rohatta tu donganta, tikki marcerita ibana dang na holan mambege hita alai berupaya do tong hita mangattusi perasaanna.