Dung borhat Jesus dohot angka siseanna sian kota Jeriko, marborngin ma nasida tolu ari di Betania. Di ari Minggu manogot tanggal 10 Nisan, borhat ma nasida tu Jerusalem. Male ma Jesus, diida ibana ma hau ara, laho ma ibana mangalului parbuena.

Ujung ni bulan Maret do tingki i. Hape di bulan Juni do somalna hau ara marparbue. Alai ala diida Jesus naung marbulung hau ara i, dirimpu ibana ma naung adong parbuena. Hape ndang marparbue dope. Didok Jesus ma, “Tung so adong be na mangallang parbuem salelengna.” (Markus 11:14) Pintor malos ma hau ara i. Marsogotna i, dipaboa Jesus ma boasa dibahen ibana songon i tu hau ara i.

Dung i sahat ma Jesus dohot angka siseanna di Jerusalem. Nantoarina i, nunga ro Jesus tu bagas joro tingki botari. Laho ma nasida muse tu bagas joro. Diulahon Jesus ma muse naung hea diulahon ibana tolu taon naung salpu tingki ari Paska 30 M. (Johannes 2:14-16) Dipalao Jesus ma sude “angka partiga-tiga dohot panuhor na adong di bagas joro i. Ditunggalingkon ma meja ni angka situngkar hepeng dohot bangku ni partiga-tiga darapati”. (Markus 11:15) Gariada ndang diloas Jesus lewat angka halak na mamboan barang sian alaman ni bagas joro.

Boasa diulahon Jesus songon i? Didok ibana ma, “Nda tarsurat do, ‘Bagas partangiangan ni saluhut bangso do didok bagashu’? Alai dibahen hamu do i gabe inganan ni angka pangarampok.” (Markus 11:17) Didok Jesus do nasida pangarampok, ai arga situtu do digadis nasida angka binatang na laho gabe pelean situtungon.

Muruk situtu ma angka malim kepala, siboto surat, dohot angka pangituai mamboto na niulahon ni Jesus. Marsangkap ma muse nasida laho mambunu ibana. Alai ndang boi nasida mangulahon i. Ai nunga torop halak marroan laho manangihon Jesus.

Ndang holan halak Jahudi na marroan tusi, alai ro do halak na so Jahudi naung mangihuthon agama ni halak Jahudi laho mangarayahon Paska. Adong ma sian nasida halak Junani. Didapothon nasida ma si Pilippus, ala songon goar ni halak Junani goarna. Dipangido nasida ma tu ibana naeng pajumpang dohot Jesus. Dung i disungkun si Pilippus ma tu si Andreas. Didapothon nasida ma Jesus, ai di bagas joro dope Jesus tingki i.

Diboto Jesus do naeng mate ibana piga-piga ari nai. Alani i, ndang olo be ibana mangalusi sungkun-sungkun ni halak manang patandahon dirina tu halak. Dipaboa ibana ma sada tudosan tu dua sisean i. Didok ma, “Nunga jumpang tingkina asa dipasangap Anak ni jolma i. Tutu do na hudok on tu hamu, molo ndang madabu sada eme tu tano jala mate, tongtong do i sada. Dung pe mate i asa godang parbuena.”​—Johannes 12:23, 24.

Ndang adong gunana molo holan sabiji eme. Alai molo disuan i boi do parohon godang eme. Suang songon i ma, holan Jesus do jolma na so mardosa. Alai molo tongtong dioloi ibana Debata sahat tu na mate, gabe godang ma halak na boi mandapot hangoluan na saleleng ni lelengna. Nasida ma angka halak na maniru Jesus, na so holan mangkaholongi dirina. Dung i didok Jesus ma, “Manang ise na mangkaholongi ngoluna, agoan ngoluna do. Alai manang ise na rade agoan ngoluna di portibi on, na paluahon ngoluna do i laho mandapot hangoluan saleleng ni lelengna.”​—Johannes 12:25.

Ndang holan dirina na dipingkiri Jesus, ai didok ibana do, “Manang ise na olo gabe parhobashu ingkon ihuthononna do ahu, jala manang didia ahu disi do ibana. Manang ise na olo gabe parhobashu, pasangapon ni Ama i ma ibana.” (Johannes 12:26) Pasu-pasu na balga do on tu angka halak na dipasangap Debata. Ai rap mamarenta ma nasida rap dohot Kristus di Harajaon i.

Diboto Jesus do satongkin nai na laho hansit ditaon ibana sahat tu na mate. Didok Jesus ma, “Saonari susa do huhilala, aha ma na laho dohononku? Ale Amang, palua ma ahu sian hasusaan on.” Ndang na so olo Jesus mangulahon lomo ni roha ni Debata. Didok ibana ma muse, “Alai alani on do ahu umbahen na ro, asa hubolus hasusaan i.” (Johannes 12:27) Olo do Jesus mangulahon sude na dipangido Debata nang pe ingkon mate ibana.

Di ari Senin tanggal 10 Nisan, tingki di bagas joro dope Jesus, dipaboa ibana do naung jonok hamateanna. Diboto ibana do hamateanna boi pasangaphon goar ni Debata. Didok ibana ma, “Ale Amang, pasangap ma goarmi.” Tarbege ma soara na gogo sian surgo mandok, “Nunga hupasangap i, jala pasangaponku do i muse.”—Johannes 12:27, 28.

Gabe mabiar ma angka halak na disi. Adong ma na mandok soara ni ronggur do i. Na deba muse mandok, “Suru-suruan do na mangkatai tu ibana.” (Johannes 12:29) Hape soara ni Jahowa do i. Sasintongna ndang holan sahali i be jolma hea mambege soara ni Debata tingki di tano on Jesus.

Tingki tardidi Jesus tolu satonga taon naung salpu, dibege si Johannes Pandidi do soara ni Debata na mandok, “On do Anakku, haholonganki, halomoan ni rohangku do ibana.” Dung Paska taon 32 M, diida si Jakobus, si Johannes, dohot si Petrus ma gabe marsinondang bohi ni Jesus. Dibege nasida ma soara ni Debata na mandok, “On do Anakku, haholonganki, halomoan ni rohangku do ibana. Tangihon ma ibana.” (Mateus 3:17; 17:5) Alai umgodang do na mambege soara ni Jahowa tingki di bagas joro.

Didok Jesus ma, “Tarbege pe soara i ndang na laho tu ahu i, alai laho tu hamu do.” (Johannes 12:30) On patuduhon na tutu ibana Anak ni Debata, Messias na dijanjihon.

Sai dioloi Jesus do Debata sahat tu na mate, jala gabe sitiruon ma ibana tu sude jolma. On patuduhon na pargabus do Sibolis, jala patut do ibana diuhum. Didok Jesus ma, “Nunga diuhumi saonari portibi on. Palaoon nama saonari parhuaso ni portibi on.” Ndang harugian hamatean ni Jesus, alai parohon godang laba do. Didok Jesus ma muse, “Molo dung diangkat ahu sian tano on, toguonku ma sude jolma ro tu ahu.” (Johannes 12:31, 32) Alani hamateanna, gabe boi ma sude jolma mandapot hangoluan saleleng ni lelengna.

Ala didok Jesus na laho “diangkat” ibana, didok angka halak na disi ma, “Hubege hami sian Patik i, mangolu saleleng ni lelengna do Kristus i. Boasa ma dohononmu ingkon diangkat Anak ni jolma i? Ai ise do Anak ni jolma i?” (Johannes 12:34) Nang pe nunga godang tanda na patuduhon Jesus do Anak ni Debata jala nunga dibege nasida soara ni Debata, alai ndang porsea nasida na tutu Jesus Anak ni Jolma i, Messias na dijanjihon.

Didok Jesus ma dirina “panondang” songon naung hea didok ibana. (Johannes 8:12; 9:5) Jala didok ma tu nasida, “Satongkin nai nama panondang i di tonga-tongamuna. Mardalan ma hamu saleleng di hamu dope panondang i, asa unang dirajai na holom i hamu. . . . Saleleng di hamu dope panondang i, patudu hamu ma haporseaon tu panondang i asa gabe angka anak ni panondang i hamu.” (Johannes 12:35, 36) Dung i laho ma Jesus, ala ndang i dope tingkina mate ibana. Tingki Paska 14 Nisan pe asa “diangkat” ibana, digantungkon tu sada hau.—Galatia 3:13.

Saleleng di tano on Jesus, ndang porsea halak Jahudi tu ibana songon naung disurirangkon si Jesaya. Didok si Jesaya do ndang marnida mata ni nasida jala ndang mangantusi roha ni nasida, gabe ndang olo nasida dipamalum. (Jesaya 6:10; Johannes 12:40) Ndang porsea godangan halak Jahudi na ibana do Sipalua na laho mangalehon hangoluan saleleng ni lelengna.

Porsea do si Nikodemus, si Josep sian Arimatea, dohot godang angka pamimpin ni halak Jahudi tu Jesus. Alai barani do nasida patuduhon i? Mabiar do nasida dipakaluar sian sinagoga, manang umholong do roha ni nasida tu “hasangapon na sian jolma”?—Johannes 12:42, 43.

Didok Jesus ma na ingkon ulahon ni angka halak na porsea tu ibana, “Manang ise na porsea tu ahu, ndang holan tu ahu ibana porsea alai dohot do tu na marsuru ahu. Manang ise na marnida ahu, diida do nang Ibana na marsuru ahu.” Mansai ringkot do Hata ni Debata na niajarhon ni Jesus. Alani i ma didok ibana, “Manang ise na so mangakkui ahu jala na so manjalo hatangku, adong do na manguhumi ibana. Angka hata naung huhatahon i ma manguhumi ibana di ari parpudi!”—Johannes 12:44, 45, 48.

Dung i didok Jesus ma, “Ndang sian ahu angka na huhatahon i, alai Ama na marsuru ahu i do na mangalehon parenta tu ahu taringot tu sihatahononku dohot siajarhononku. Huboto do parohon hangoluan na saleleng ni lelengna do parentana.” (Johannes 12:49, 50) Diboto Jesus do na ingkon mate ibana satongkin nai, asa malua angka halak na porsea tu ibana.—Rom 5:8, 9.