Marlas ni Roha Melayani Jahowa

Sataon dukkon i, adong ma pengumuman tu keluarga Betel. Dihaporluhon relawan di Kantor Cabang Afrika Selatan, ala dipasang nama disi mesin cetak na baru. Hudaftarhon ma goarhu, jala las ma rohakku ala tarpillit do au. Asing ni au, adong dope tolu nai donganku sian Betel Kanada na tarpillit, i ma si Dennis Leech, si Bill McLellan, dohot si Ken Nordin. Jala dipaboa ma tu hami, leleng dope annon hami disi melayani.

Dung i hutelepon ma omakku. Hudok ma, “Mak, ditugasson do au tu Afrika Selatan.” Parsip do halakna omakku, alai togu do haporseaonna tu Jahowa. Jadi nang pe dang pola godang na didok ibana mangalusi au, alai huboto do didukung ibana do keputusanki. Ala dao do au lao, sabotulna lungun do roha ni omak dohot bapak. Alai dang gabe diorai au lao.

DITUGASSON TU AFRIKA SELATAN!

Sebelum lao tu Afrika Selatan, lao ma hami na opat tu Betel Brooklyn. Disi, dilatik ma hami saleleng tolu bulan lao mamakke mesin cetak. Dung i lao ma hami markapal kargo tu Cape Town, Afrika Selatan. Baru 20 taon dope umurhu tikki i. Dung sahat di Cape Town, botarina i lao ma hami tu Johannesburg markareta api. Dung saborngin hami di pardalanan, sogotna i so ma hami di kota Karoo sada kota na gelleng di padang gurun. Mohop do huta i jala marabu muse. Tikki huida hami tu luar sian kereta i, heran do hami mangida tempat i. Ai dang hea dope diida hami inganan na songon i. Jadi songon na khawatir ma hami, boi do annon hunikmati hami penugasannami dison? Di pudian ni ari tikki ro hami muse tu kota i, baru pe diboto hami bagak do hape tempat i jala burju-burju do halak disi.

Saleleng piga-piga taon ditugasson ma au mangoperasihon mesin Linotype. Dipakke do mesin on lao manusun akka huruf na adong di majalah Joujou Paboahon dohot Dungo ma! na lao dicetak. Jago do mesin on, alai agak rumit do mamakke on. Gabe boi ma dicetak akka majalah di Afrika Selatan dohot tu akka negara na adong di Afrika. Las hian do rohakku mamboto, marguna do hape mesin cetak na huboan hami sian Kanada on.

Dung i karejo di Kantor Percetakan do au. Alai dang holan i, dohot do muse au mangurus pengiriman dohot penerjemahan. Nang pe sibuk hian au, alai las do rohakku.

MENIKAH JALA MANDAPOT TUGAS NA BARU

Taon 1968, mangoli ma au tu sahalak perintis na margoar si Laura Bowen, jonok do jabuna tu Betel. Jadi dohot do ibana membantu Departemen Penerjemahan lao mangetik. Di tikki i, dang adong dope pengaturan boi tetap karejo di Betel akka pasangan na baru menikah. Jadi ditugasson ma hami gabe perintis istimewa. Agak khawatir do au, ala nungnga sappulu taon au karejo di Betel. Disediahon do sipanganon dohot tempat tinggal. Hape molo perintis istimewa, ikkon hami sandiri do na mangatur i sude. Dua pulu lima rand do tiap bulan hujalo hami pengganti ongkos (hira-hira 35 dolar AS). Alai asa boi dapotnami pengganti ongkos 25 rand, ikkon hupenuhi hami do kuota jam dinas, kunjungan kembali, dohot penempatan publikasi. Hepeng i ma na hupakke hami lao mambayar sewa ni jabu, manuhor sipanganon, transportasi, biaya kesehatan, dohot akka kebutuhan na asing.

Ditugasson ma hami tu kelompok di kota Durban, Samudera Hindia. Godang do halak India tinggal disi. Alana sekitar taon 1875, godang halak India na pinda tu Afrika Selatan lao karejo di perkebunan tebu. Saonari nungnga marmacam be karejo ni halak i. Alai tetap do dipertahatton halak i budaya dohot masakanna. Misalna masakan khas ni nasida songon kari na tabo i. Ala boi do halak i marbahasa Inggris, jadi dang pola ikkon belajar bahasa na baru hami.

Tikki i, 150 jom ma kuota jam dinas ni perintis istimewa tiap bulan. Jadi dibahen hami ma jadwal asa boi hami mardinas onom jom di bagasan sadari. Mohop do cuaca disi jala lembap. Ala dang adong dope kunjungan kembali dohot parsiajar Bibelnami, jadi ikkon boi ma hami onom jom mengabar sian jabu tu jabu. Parjolo sahali hami mengabar, hurasa nga leleng hami na mengabar on. Hape ternyata dung huida jam tanganku, holan 40 menit dope. Didok rohakku ma, ‘Molo songon on do hurasa dang boi hami memenuhi kuota jam dinasnami.’

Alai pittor dibahen hami ma jadwal. Tiap ari sebelum lao hami mardinas, huparade hami hian ma siallangon dohot kopi. Tikki istirahat hami, huparkirhon hami ma mobilnami di toru ni hau. Sipata ro ma akka gelleng ni halak India na disi mandapotton hami. Dikalilingi ma hami, jala sai dipanotnoti. Ala beda hian do diida halak i kulitnami tu nasida. Holan di bagasan piga-piga ari dope, nungnga dinikmati hami mardinas disi. Jala gabe hatop ma dihilala hami waktu berlalu.

Las hian do roha marbarita na uli disi. Alana burju do halak disi, ramah, sopan, jala partuhan do halak i. Maragama Hindu do halak i. Alai nang pe songon i, godang do nasida na olo mambege barita na uli. Lomo do roha ni halak i marsiajar taringot Jahowa, Jesus, Bibel, dohot hangoluan na saleleng ni lelengna. Jala las do roha ni halak i mambege janji ni Debata taringot tu haheheon. Holan di bagasan sataon dope, nungnga adong 20 parsiajar Bibelnami. Burju-burju do nasida. Margatti-gatti do parsiajar Bibel i menjamu hami mangan siang tiap ari. Las hian do rohanami alani i sude!

Dung i ditugasson ma au gabe pengawas wilayah di pesisir Samudera Hindia. Tiap minggu, manginap di jabu ni akka dongan do hami. Rap marbarita ma hami dohot akka dongan disi, jala hupatogu hami ma nasida. Dibahen halak i do hami songon keluargana. Las do rohanami marmeam dohot akka gelleng ni nasida, manang dohot binatang peliharaanna. Dua taon dukkon i, ditelepon Kantor Cabang ma hami. Didok ma asa mulak muse hami tu Betel. Sasittongna nungnga lomo rohakku melayani di lapangan, nang pe songon i olo do hami ditugasson manang tudia pe.

MELAYANI MUSE DI BETEL

Tugassu na baru di Betel, di bagian Departemen Dinas. Disi kerja sama ma au dohot akka dongan na togu haporseaonna jala naung berpengalaman. Tikki i molo nungnga sae berkunjung pengawas wilayah sian huria, dikirim ibana ma laporan taringot huria i tu Kantor Cabang. Dung i dikirim Kantor Cabang ma surat tu huria lao patoguhon jala mangalehon petunjuk. Biasana PW manulis suratna di bahasa Xhosa, Zulu, dohot bahasa-bahasa na asing di daerah ni nasida. Dung i sekretaris Departemen Dinas ma na menerjemahon i tu bahasa Inggris. Baru ikkon diterjemahon sekretaris Dinas ma muse balos ni surat i sian bahasa Inggris tu akka bahasa na dipakke di Afrika. Massai huargai do kerja keras ni akka dongan sekretaris i. Alani kerja keras ni nasida, gabe boi ma huattusi akka tantangan na diadopi donganta na markulit hitam di Afrika.

Tikki i dibahen pamaretta ni Afrika Selatan do peraturan, dang boi rap tinggal di sada daerah halak na beda rasna. Alani i dang boi bergaul halak i tu na so sarupa rasna. Jadi akka dongan na markulit hitam boi bergaul, marbarita, marpungu holan tu sesama halak i na sarupa bahasana.

Sebelumna, dang godang na huboto taringot akka dongan na markulit hitam. Alana saleleng on ditugasson tu sidang na marbahasa Inggris do au. Alai saonari gabe lam takkas ma hutanda nasida. Gabe boi ma huboto budaya dohot kebiasaan ni nasida. Huboto ma muse, godang do tantangan ni akka dongan disi. Misalna ditentang keluarga dohot akka dongan sahuta do nasida ala dang olo mangihutton tradisi dohot kepercayaan na so sesuai tu Bibel. Alai nang pe songon i, barani do nasida. Molo akka halak Afrika na kulit hitam na tinggal di huta-huta, massai pogos do nasida. Godang do sian nasida na so adong sikkolana. Alai nang pe songon i, diargai nasida do Bibel.

Hea do au dohot menangani kasus hukum na berkaitan tu kebebasan beragama dohot kenetralan. Misalna, godang do akka anak ni Saksi na dipakaluar sian sikkola ala dang olo nasida mangihutton acara keagamaan. Dang olo nasida martangiang manang mangendehon lagu-lagu keagamaan. Gabe dipatogu do au alani nasida. Massai barani do nasida jala toktong setia.

Asing do muse tantangan na diadopi akka dongan na di negara Swaziland (saonari goarna Eswatini). Tikki mate Raja Sobhuza II, dibahen do peraturan na wajib diihutton sude warga negara i. Molo bawa ikkon dibotak, jala borua ikkon dipotong obukna pendek. Alai molo akka donganta, dang olo mangihutton tradisi i. Ala sarupa do i songon na manomba halak naung mate. Ala dang olo akka donganta i, gabe dianiaya ma nasida. Massai las do rohakku mangida kesetiaan ni halak i tu Jahowa. Dipatogu do haporseaonnami alani teladan ni nasida. Toktong do nasida sabar jala setia.

MELAYANI MUSE DI BAGIAN PERCETAKAN

Di taon 1981, ditugasson ma au muse tu bagian Percetakan. Tikki i nungnga lam maju metode percetakan jala nga mamakke sistem komputer. Ditawarhon sales ma mesin phototypesetter tu Kantor Cabang, asa diuji coba gratis. Jadi gabe hugatti hami ma sia mesin Linotype tu lima mesin phototypesetter na baru. Dung i hupasang hami ma muse mesin cetak na baru. Gabe boi ma lam godang publikasi hucetak hami!

Ala nga lam maju teknologi, gabe boi ma dipakke hami Sistem Penerbitan Elektronik Multibahasa manang MEPS. Sistem i dipakke lao manusun akka huruf ni publikasi na lao dicetak. Ala adong sistem MEPS on, gabe lam hatop do mencetak. Ukkatop do i sian mesin Linotype dohot mesin cetak na hea diboan hami sian Kanada tu Kantor Cabang Afrika Selatan. (Jes. 60:17) Tikki i, nungnga menikah be hami na opat tu akka dongan perintis na togu haporseaonna. Molo au dohot si Bill, toktong do hami melayani di Betel. Alai molo si Ken dohot si Dennis, adong do anakkon ni halak i.

Martamba do torus karejo di Betel, alana nga diterjemahon be publikasitta di godang bahasa. Dicetak ma publikasi i, dung i dikirim tu akka Kantor Cabang na asing. Alani i, porlu do dibangun Betel na baru. Dibangun ma i di sabola barat Johannesburg. Di taon 1987 do penahbisan ni Betel i. Las hian do rohakku boi mangida perkembangan ni ulaonta di Afrika Selatan on, jala boi melayani sebagai Panitia Cabang saleleng martaon-taon.

MANDAPOT TUGAS NA BARU MUSE!

Di taon 2001 diundang ma au melayani sebagai Panitia Cabang di Betel Amerika Serikat na baru dibentuk. Lungun do nian rohanami maninggalhon penugasan dohot dongan na di Afrika Selatan on. Alai tong do penasaran hami tu tugasnami na baru di Betel Amerika Serikat.

Alai adong do na mambahen hami khawatir pinda tu Amerika Serikat. Khawatir hami maninggalhon omak ni si Laura naung matua. Dang boi be huurus hami ibana. Alai adong do tolu adek ni si Laura. Olo do halak i na tolu mangurus omak. Didok halak i, “Dang boi hami melayani sepenuh waktu songon hamu. Jadi molo huurus hami omak, na mendukung hamu do hami asa tetap di dinas sepenuh waktu.” Mandok mauliate do hami tu halak i.

Songon i do tong na diulahon abangku dohot istrina na tinggal di Toronto, Kanada. Olo do halak i mangurus omakku naung mabalu. Lobi sian 20 taon omak rap tinggal dohot halak i. Alai dang leleng dung pinda hami tu New York, mate ma omak. Huargai hami do pengorbanan ni keluarganami, ala olo do nasida mangurus natua-tuanami nang pe dang sai mura i!

Tugassu na parjolo di Kantor Cabang Amerika Serikat, di bagian Percetakan na sistemna nga modern jala sederhana. Saonari au karejo di Departemen Pembelian. Las do rohakku karejo saleleng 20 taon di kantor cabang na balga on. Nungnga adong saonari 5.000 anggota Betel jala 2.000 komuter na karejo dison.

Molo huingot 60 taon naung salpu, dang hurippu boi hurasahon songon on godang ni pasu-pasu ni Jahowa tu au. Jala istrikku si Laura, torus do las rohana mendukung au manang tudia pe au ditugasson. Boi do hunikmati hami godang tugas sian Jahowa. Kerja sama do hami muse dohot akka dongan na togu haporseaonna. Termasuk ma i dohot akka dongan na melayani di akka Kantor Cabang na hea hukunjungi hami. Saonari umurhu nungnga 80 taon lobi, jadi dang godang be na boi hukarejohon. Jala nga dilatik be muse akka dongan na poso mangulahon karejo i.

Panurat psalmen mandok, “Marlas ni roha ma bangso na Debatana Jahowa.” (Ps. 33:12) Toho hian do hatana i! Massai las do rohakku boi kerja sama rap dohot akka naposo ni Jahowa.