Huihutton do Dalan na Dipatudu Jahowa

SIAN INGGRIS TU AFRIKA

Au tubu taon 1935 di Darlaston, Black Country, bagian ni Inggris. Didok do inganan i Black Country ala jotjot do adong disi asap hitam na sian akka pabrik. Tikki marumur au hira-hira opat taon, marsiajar Bibel ma natua-tuakku tu Saksi Jahowa. Dung remaja au, mulai ma pos rohakku on do hasittongan. Jadi tardidi ma au taon 1952 tikki marumur 16 taon.

Dang leleng dukkon i, magang ma au di sada perusahaan na balga na memproduksi bagian-bagian ni kendaraan. Dilatik ma au gabe sekretaris di perusahaan i. Lomo hian do rohakku karejo disi.

Sada tikki diundang sahalak pengawas wilayah ma au manguluhon Pembahasan Buku Sidang di huria Willenhall. Alai maol do hurasa mamutusson lao manjalo undangan i. Alana tikki i marpungu di dua huria do au. Molo di parsitongaan ni minggu marpungu ma au di huria na jonok tu karejokku di Bromsgrove. Hira-hira 32 kilometer ma daona sian jabu ni natua-tuakku. Molo di ujung ni minggu tikki mulak au tu jabu ni natua-tuakku, marpungu ma au di huria Willenhall.

Ala lomo do rohakku mendukung organisasi ni Jahowa, hujalo ma undangan ni pengawas wilayah i. Alai ikkon hutinggalhon do karejo na huhalomohon i. Dang hea husolsoli keputusan on. Ala hupaloas Jahowa manogu-nogu dalanku, gabe godang ma dapottu pasu-pasu sian Jahowa saleleng ngolukku.

Tikki marpungu di huria Bromsgrove, pajuppang ma au dohot sahalak donganta borua na bagak jala semangat melayani Jahowa, goarna si Anne. Menikah ma hami taon 1957, jala rap merintis biasa ma hami. Dung i, ditugasson ma hami gabe perintis istimewa, pengawas wilayah, dohot melayani di Betel. Las hian do rohakku ala sai didukung si Anne do au.

Taon 1966, diundang ma hami tu Sikkola Gilead kelas 42. Ditugasson ma hami tu Malawi. Godang halak mandok molo Malawi on jantung ni Afrika. Alana akka halak disi, burju-burju jala ramah. Alai dang hurippu hami holan satokkin do hami tinggal disi.

TANTANGAN TIKKI BARU SAHAT HAMI DI MALAWI

Sahat ma hami di Malawi tanggal 1 Februari 1967. Huparsiajari hami ma bahasa na disi saleleng sabulan. Dung i, mulai ma hami melayani sebagai pengawas distrik. Mobil Jeep na balga do kendaraannami disi. Alana didok halak, boi do mobil i diboan manang na tudia pe, bahkan ninna boi mangalewati sunge na bagas. Hape dang toho i, holan mangalewati sunge na dangkal do boi mobil Jeep i. Hami tinggal di jabu na atapna sian durame. Jadi molo musim udan, ikkon hulapisi hami do atap i pakke terpal asa unang masuk aek tu bagasan. Dang mura situasi on di hami. Baru dope hami gabe misionaris, hape pittor dapotnami tantangan songon i. Alai nang pe songon i, las hian do rohanami.

Di bulan April, hubege ma sian radio na lao adong tantangan sian pamaretta. Presiden Malawi, Dr. Hastings Banda mandok, Saksi Jahowa dang olo mambayar pajak jala mambahen masalah politik di Malawi. Tottu tuduhan palsu do i! Alana takkas do taboto molo Saksi Jahowa netral di politik. Sasittongna na mambahen pamaretta muruk, ala dang olo Saksi Jahowa manuhor kartu anggota partai politik.

Di bulan September, hujaha hami ma di koran adong tuduhan sian presiden na mandok molo Saksi Jahowa mambahen godang masalah. Di sada pertemuan politik, diumumhon ibana ma satokkin nai diorai nama Saksi Jahowa di Malawi. Ujungna tanggal 20 Oktober 1967, dibahen ma pelarangan tu Saksi Jahowa. Dang leleng dukkon i, ditutup polisi dohot kantor imigrasi ma kantor cabang di Malawi. Jala diusir ma akka misionaris na tinggal di negara i.

Dipenjarahon ma hami saleleng tolu ari. Dung i diusir ma hami tu Mauritius, i ma negara na dikuasai Inggris. Alai dang diloas pamaretta ni Mauritius hami tinggal disi sebagai misionaris. Jadi ditugasson ma hami tu Rhodesia (saonari digoari Zimbabwe). Dung sahat hami di perbatasan, pajuppang ma hami dohot sahalak petugas imigrasi. Dang diloas ibana hami masuk. Didok ibana, “Nga diusir hamu sian Malawi, di Mauritius pe so diloas hamu tinggal, i do makana disuru hamu tuson.” Gabe tangis ma si Anne. Hira na so adong na olo manjalo hami. Di tikki i, tarpikkir do au naeng maninggalhon tugasnami jala mulak tu Inggris. Alai ujungna diloas petugas imigrasi i ma hami marborngin di kantor cabang, syaratna marsogotna i ikkon melapor hami tu kantor pusat imigrasi. Susa hian do huhilala hami tikki i. Jadi hupaboa hami ma perasaannami tu Jahowa, jala hupaima hami ma Ibana pasaehon masalah i. Dang hurippu hami marsogotna i dapotnami ijin tinggal sebagai turis di Zimbabwe. Dang tarhalupahon au songon dia perasaanku tikki i. Pos do rohakku, Jahowa do na manogu-nogu dalannami.

MELAYANI AKKA DONGAN DI MALAWI SIAN ZIMBABWE

Di kantor cabang Zimbabwe, ditugasson ma au karejo di Departemen Dinas lao mangurus kebutuhan ni akka dongan di Malawi dohot di Mozambik. Tikki i, nungnga mulai dianiaya akka dongan di Malawi. Ditugasson do au lao menerjemahon akka laporan sian pengawas wilayah na adong di Malawi. Hea ma sada borngin tikki karejo dope au, hujaha ma laporan sian pengawas wilayah na paboahon massai kejam do penganiayaan na dibahen tu akka dongan di Malawi. Gabe tangis ma au manjaha i.a Alai dipatogu do rohakku mangida nasida ala toktong setia tu Jahowa, toktong marhaporseaon, jala sabar manaon hasusaan i.​—2 Kor. 6:4, 5.

Tikki i berusaha do hami asa torus dapot ni akka dongan na di Malawi dohot akka dongan na melarikan diri tu Mozambik publikasitta. Bahasa Chichewa do bahasa utama di Malawi. Jadi hupapinda hami ma tim penerjemah bahasa Chichewa tu perladangan ni sahalak donganta na di Zimbabwe. Halak na burju do donganta on. Dibangun ibana do jabu dohot kantor tu tim penerjemahan i. Gabe boi ma nasida torus menerjemah.

Diatur hami ma asa boi ro akka pengawas wilayah di Malawi ganup taon mangihutton kebaktian distrik di Zimbabwe. Dapot ni nasida ma disi rangka khotbah. Dung mulak tu Malawi, nasida ma na pasahatton aha na dibahas di kebaktian i tu akka donganta disi. Diatur hami do muse asa adong Sekolah Pelayanan Kerajaan lao patoguhon nasida.

Di bulan Februari taon 1975, ro ma au mengunjungi akka dongan na lari sian Malawi tu kamp pengungsian di Mozambik. Diihutton akka dongan i do pengarahan na terbaru sian organisasi ni Jahowa, termasuk pengaturan taringot punguan ni akka sintua. Diatur akka sintua on do godang kegiatan rohani songon marjamita, pembahasan ayat harian dohot Joujou Paboahon, jala mambahen kebaktian wilayah. Diatur akka sintua i do kamp pengungsian on dos songon na mangatur kebaktian na balga. Dibahen halak i do akka departemen na mangatur kebersihan, pambagian sipanganon, dohot keamanan. Alani bantuan ni Jahowa gabe boi do diulahon nasida sudena i. Jala gabe lam dipatogu do au mangida teladan ni nasida.

Hira-hira taon 1979, kantor cabang Zambia ma na mengawasi ulaon marbarita di Malawi. Alai torus do hutangiakkon situasi ni nasida, songon i do akka dongan na asing. Tikki i, anggota Panitia Cabang di Zimbabwe do au. Jadi piga-piga hali pajuppang ma au dohot wakil kantor pusat, akka dongan na bertugas di Malawi, di Afrika Selatan, dohot di Zambia. Setiap pajuppang torus do dibahas hami aha dope na boi huulahon hami lao mangurupi akka dongan di Malawi.

Lam leleng lam moru ma penganiayaan na dihilala akka dongan di Malawi. Songon i nang akka donganta na lari sian Malawi tu kamp pengungsian di Mozambik. Boi ma nasida mulak tu hutana be. Akka negara na jonok tu Malawi pe nungnga mencabut pelarangan tu Saksi Jahowa. Songon i do na masa di Mozambik di taon 1991. Alai sukkun-sukkun do rohanami, “Andigan do dicabut pelarangan tu Saksi Jahowa di Malawi?”

MULAK TU MALAWI

Ujungna muba ma situasi politik di Malawi. Di taon 1993, dicabut pamaretta ma pelarangan tu Saksi Jahowa disi. Dang leleng dukkon i tikki makkatai au dohot sahalak misionaris, disukkun ibana ma tu au, “Olo do ho mulak muse tu Malawi?” Ala nungnga 59 taon umurhu tikki i nikku ma, “Daong bah nga matua iba.” Alai laos di ari i, dilehon Punguan na Mangaradoti ma penugasan asa mulak hami tu Malawi.

Keputusan na maol do on di hami. Lomo hian do rohanami tu penugasannami di Zimbabwe. Las hian do rohanami tinggal disi, jala nungnga akrab hami tu akka dongan disi. Memang, diloas Punguan na Mangaradoti do hami tetap tinggal di Zimbabwe. Jadi sebenarna boi do hupillit hami tetap tinggal di Zimbabwe. Alai huingot hami ma teladan ni si Abraham dohot si Sara. Rela do halak i maninggalhon jabuna na bagak nang pe nungnga matua nasida, ala lomo roha ni halak i mangihutton petunjuk ni Jahowa.—1 Mus. 12:1-5.

Diihutton hami ma petunjuk sian organisasi ni Jahowa. Sahat ma hami di Malawi tanggal 1 Februari 1995. Pas ma i 28 taon tikki parjolo sahali hami sahat disi. Dibentuk ma Panitia Cabang, termasuk ma au dohot dua donganta bawa. Jala pittor hatop ma diatur hami asa mardalan muse kegiatan ni Saksi Jahowa disi.

DIPASU-PASU JAHOWA DO ULAON MARBARITA DI MALAWI

Dipasu-pasu Jahowa do ulaon marbarita di Malawi. Hatop do tamba godang ni parbarita disi. Di taon 1993, hira-hira 30.000 dope parbarita di Malawi. Alai di taon 1998, nga lobi sian 42.000 parbarita.b Ala nga lam tamba kebutuhan di Malawi, disetujui Punguan na Mangaradoti ma asa dibangun kantor cabang na baru. Dituhor hami ma lahan na bidangna 12 hektar di Lilongwe, jala ditugasson ma au mengawasi pembangunan i.

Dibahen ma acara penahbisan kantor cabang i di bulan Mei 2001. Donganta si Guy Pierce do na pasahatton jamitana. Sahalak sian anggota Punguan na Mangaradoti do ibana. Adong ma 2.000 lobi donganta di Malawi na ro tu acara i. Godang sian nasida nungnga tardidi lobi sian 40 taon. Bertekun do nasida mangadopi penganiayaan dohot pelarangan na masa saleleng martaon-taon. Massai pogos do akka donganta on, alai toktong do setia nasida tu Jahowa. Diundang ma nasida ro tu Betel. Di Betel, diendehon nasida ma ende Harajaon mamakke gaya Afrika. Dipatogu do rohakku mangida nasida. Kesetiaan ni nasida gabe bukti, sai dipasu-pasu Jahowa do akka halak na toktong sabar manaon hasusaan.

Dung sae dibangun kantor cabang, las do rohakku menahbishon akka Bale Harajaon di Malawi. Dibahen organisasi do sada pengaturan asa hatop dibangun akka Bale Harajaon di negara na susa parhepengonna, termasuk ma di Malawi. Godang inganan parpunguan di Malawi najolo dibahen sian pohon eukaliptus. Sian ramba-ramba ma atapna, jala bangku panjang do na gabe tempat dudukna. Alai dung adong pengaturan i, kerja keras ma akka dongan on lao mencetak batu bata. Ujungna, gabe boi ma nasida marpungu di Bale Harajaon na bagak. Nang pe songon i, unlomo do roha ni halak i mamakke bangku panjang di Bale Harajaon. Alana boi do disusun-susun halakna asa godang na siat.

Las hian do muse rohakku mangida akka donganta disi lam togu parale-aleonna tu Jahowa, khususna akka donganta na poso. Lomo do roha ni nasida mangurupi organisasi. Rade do nasida dilatik jala hatop do nasida mangulahon i. Hasilna gabe memenuhi syarat ma nasida mandalatton tugas di Betel dohot di huria. Adong do muse na dilantik gabe pengawas wilayah, jala godang do sian nasida nungnga menikah. Dibahen akka donganta on do keputusan asa unang margelleng, nang pe keputusan i maralo tu hasomalan di inganan i jala adong tekanan sian keluarga. Gabe unggodang ma tikki ni nasida melayani Jahowa.

KEPUTUSAN NA TERBAIK NA HEA HUBAHEN

Dung 52 taon melayani di Afrika, marsahit ma au. Dipangido Panitia Cabang ma tu Punguan na Mangaradoti asa diloas hami mulak tu Inggris, jala setuju do nasida. Sasittongna borat do huhilala hami maninggalhon Malawi. Alai husadari hami ma, on do na dumenggan tu hami. Las do rohanami ala massai burju do keluarga Betel na di Inggris mangurus hami.

Pos do rohakku keputusan terbaik na hea hubahen di ngolukku, i ma mangihutton dalan na dipatudu Jahowa. Seandaina ma tikki i holan pikkiranku sandiri na huihutton, dang mungkin boi huhilala sude pasu-pasu ni Jahowa on. Holan Jahowa do na mamboto aha na huhaporluhon asa boi tigor akka dalanku. (Poda 3:5, 6) Tikki poso, lomo hian do rohakku marsiajar songon dia cara kerja ni perusahaan na balga. Alai di organisasi ni Jahowa, dapottu do tugas na mambahen las rohakku. Molo di au, holan melayani Jahowa do ulaon na mambahen hita botul-botul marlas ni roha!