Dua Anggota Baru Punguan na Mangaradoti Organisasi

DI ARI Rabu tanggal 18 Januari 2023, dibahen ma pengumuman istimewa di jw.org. Nungnga dipillit be donganta si Gage Fleegle dohot si Jeffrey Winder gabe anggota ni Punguan na Mangaradoti Organisasi Saksi Jahowa. Nungnga martaon-taon dua donganta on setia manomba Jahowa.

Molo donganta si Fleegle, magodang di sabola barat ni Pennsylvania, Amerika Serikat do ibana. Jala Saksi Jahowa do natua-tuana. Tikki remaja si Fleegle, pinda ma keluargana tu sada kota na gelleng na makkaporluhon godang parbarita. Dang leleng dukkon i, tardidi ma ibana di tanggal 20 November 1988.

Sai dijujui natua-tuana do si Fleegle asa marcita-cita lao merintis. Jotjot do diundang nasida tu jabu ni nasida pengawas wilayah dohot akka donganta na karejo di Betel. Gabe boi do diida donganta si Fleegle na marlas ni roha do akka donganta i. Dang leleng dukkon tardidi ibana, mulai ma ibana merintis biasa di tanggal 1 September 1989. Dua taon dukkon i, saut ma cita-cita na dibahen ibana tikki marumur 12 taon lao melayani di Betel. Mulai ma ibana karejo di Betel Brooklyn di bulan Oktober 1991.

Di Betel, karejo ma donganta si Fleegle saleleng ualu taon di bagian penjilidan. Dukkon i, ditugasson ma ibana tu Departemen Dinas. Di tikki i, di huria marbahasa Rusia ma ibana saleleng piga-piga taon. Di taon 2006 mangoli ma ibana dohot si Nadia. Gabe dohot ma si Nadia karejo di Betel. Bergabung di huria marbahasa Portugis ma nasida. Jala lobi sian sappulu taon bergabung do nasida di huria marbahasa Spanyol. Dukkon piga-piga taon donganta si Fleegle karejo di Departemen Dinas, ditugasson ma ibana di Kantor Panitia Pengajaran. Dukkon i, ditugasson ma ibana di Kantor Panitia Dinas. Di bulan Maret 2022 dilantik ma ibana gabe asisten ni Panitia Dinas na mangurupi Punguan na Mangaradoti Organisasi.

Molo donganta si Winder magodang di Murrieta, Kalifornia, Amerika Serikat. Sian natua-tuana do ibana marsiajar Bibel, jala tardidi ma ibana tanggal 29 Maret 1986. Piga-piga bulan dukkon i diputusson ibana ma lao merintis ekstra. Las hian do rohana na merintis ekstra i. Dukkon piga-piga bulan gabe perintis ekstra, mulai ma ibana merintis biasa tanggal 1 Oktober 1986.

Tikki remaja donganta si Winder ro do ibana manjuppangi dua abangna na karejo di Betel. Mulai sian i, tubu ma di rohana naeng karejo di Betel molo dung magodang ibana. Jadi di bulan Mei taon 1990, diundang ma ibana karejo di Betel na di Wallkill.

Di Betel, karejo di marragam departemen do donganta si Winder. Karejo do ibana di Departemen Pembersihan, Departemen Perladangan, jala di Kantor Betel. Taon 1997 mangoli ma ibana dohot si Angela jala rap melayani di Betel ma nasida. Di taon 2014 dipapinda ma nasida tu Warwick, jala disi donganta si Winder mangurupi di bagian konstruksi tu fasilitas kantor pusat. Di taon 2016 dipapinda ma nasida tu Pusat Pendidikan Menara Pengawal di Patterson. Karejo ma ibana di bagian Layanan Audio/Video. Opat taon dukkon i, pinda ma muse nasida tu Warwick. Ditugasson ma ibana di Kantor Panitia Personalia. Di bulan Maret 2022 dilantik ma ibana gabe asisten ni Panitia Personalia na mangurupi Punguan na Mangaradoti Organisasi.

‘Silehon-lehon’ sian Debata do nasida na dua. Alani i, tatangiakkon ma asa dipasu-pasu Jahowa nasida na toktong bekerja keras tu ulaon Harajaon.—Eps. 4:8.