Tutu do Adong Sibolis?
Na didok Bibel
Ido, tutu do adong Sibolis. Ibana do “na mangarajai portibi on”. Suru-suruan ni Debata hian do ibana. Alai, muba do ibana gabe jahat jala mangalo do ibana tu Debata. (Johannes 14:30; Epesus 6:11, 12) Takkas do dipaboa di Bibel songon dia pangalaho ni Sibolis. Jadi alani pangalahona i, gabe didok ma ibana:
Setan, lapatanna “Pangalo”.—Job 1:6.
Sibolis, lapatanna “Pargabus”.—Pangungkapon 12:9.
Ulok. Di Bibel, dipakke do ulok lao manggombarhon “Panipu”.—2 Korint 11:3.
Panggoda.—Mateus 4:3.
Pargabus.—Johannes 8:44.
Sibolis i dang holan sifat manang pangalaho na jahat
Adong do na marpikkir, molo Sibolis i holan sifat manang pangalaho na jahat na adong di diritta. Hape adong do dipaboa di Bibel, hea do Debata makkatai dohot Sibolis. Alai Debata makkatai tu Sibolis dang na makkatai taringot akka na jahat na dibahen Debata. Alana dang mungkin Debata mangulahon na jahat. Ai sempurna do Debata. (5 Musa 32:4; Job 2:1-6) Asing ni i muse, hea do Sibolis manggoda Jesus na sempurna. (Mateus 4:8-10; 1 Johannes 3:5) Sian on gabe taboto ma, molo Sibolis i na tutu do adong. Dang holan sifat i manang pangalaho na jahat.
Jadi, dang pola longang rohatta molo godang halak dang porsea molo Sibolis i na tutu adong. Alana dipaboa do di Bibel, dililuhon Sibolis do akka halak asa saut lomo ni rohana. (2 Tessalonik 2:9, 10) On ma sada cara ni Sibolis lao mangaliluhon akka jolma, asa godang na porsea na so tutu adong ibana.—2 Korint 4:4.
Pandapot na sala taringot Sibolis
Na didok halak: Adong do goar ni Sibolis na asing, i ma si Lusifer.
Na sasittongna: Di piga-piga terjemahan ni Bibel, hata Heber ni “Lusifer” lapatanna, “marsinondang”. (Jesaya 14:12) Alai hata marsinondang na didok dison, maksudna i ma akka raja ni Babel na dipaila Debata alani ginjang ni roha ni nasida. (Jesaya 14:4, 13-20) Jadi hata “marsinondang” disi, dipakke lao pailahon pamarettaon ni Babel dung hancur nasida.
Na didok halak: Dipakke Debata do Sibolis lao “manguji jolma”.
Na sasittongna: Musu ni Debata do Sibolis. Dang na disuru Debata ibana lao manguji jolma. Dialo Sibolis do akka naposo ni Debata jala didok ibana do akka na so tutu taringot nasida.—1 Petrus 5:8; Pangungkapon 12:10.