Tahan Banting

AHA MAKSUDNA?

Halak na tahan banting dang mura menyerah tikki adong masalah manang tikki gagal. Sian pengalaman do boi dapotna sifat on. Sarupa ma i songon sahalak dakdanak na marsiajar mardalan. Pasti hea do ibana madabu. Dos songon i ma, molo hea sasahalak gagal jala dang menyerah ibana, boi ma ibana marsiajar sian pengalamanna i jala gabe halak na tahan banting.

BOASA PENTING?

Adong do dakdanak na gabe mandele tikki gagal, tikki adong masalah, manang tikki dipasingot. Jala adong do na gabe menyerah. Alai sebenarna, ikkon diingot nasida do:

• Pasti gagal do hita.​—Jakobus 3:2.

• Pasti sai adong do masalah.​—Parjamita 9:​11.

• Sude do hita porlu dipasingot asa gabe lam denggan.​—Poda 9:9.

Molo tahan banting gellengmuna, pasti dang menyerah ibana tikki adong masalah.

CARA MANGAJARHON I

Tikki gagal gellengmuna.

PRINSIP NI BIBEL: “Ai nang pe madabu halak na tigor marroha sappe pitu hali, hehe do i muse.”​—Poda 24:16.

Urupi ma asa denggan cara marpikkir ni gellengmuna. Misalna molo roa nilaina di sada mata pelajaran, olo do ra gabe lungun rohana jala mandok, “Memang oto do au!”

Asa boi tahan banting gellengmuna, urupi ma asa boi ibana marsiajar sian kesalahanna. Dung i boi ma ibana mangatur masalahna, dang gabe masalah i na mangatur ibana.

Unang urupi ibana pasaehon masalahna i. Alai ajari ma ibana songon dia carana pasaehon masalahna i. Boi do ra disukkun hamu tu ibana, “Boha ma carana asa denggan nilaimu di mata pelajaran i?”

Tikki adong masalah ni gellengmuna.

PRINSIP NI BIBEL: “Dang diboto hamu songon dia ngolumuna sogot.”​—Jakobus 4:​14.

Dang adong na hot di portibi on. Boi do halak na mamora toppu gabe marpogos. Boi do halak na sehat toppu gabe marsahit. Bibel mandok, ‘Dang halak na hatop marlojong na sai monang di parlumbaan, dang halak na gogo na sai monang di parporangan. Ai boi do masa tu nasida sude akka na so diharappon di tikki na so panagaman.’​—Parjamita 9:​11.

Hamu akka natua-tua, pasti berusaha do hamu lao manjaga gellengmuna sian bahaya. Alai ingot ma dang boi dibahen hamu asa bebas gellengmuna sian sude masalah.

Memang dang hea dope dihilala gellengmuna di-PHK sian karejo manang toppu gabe marpogos. Alai boi do diajari hamu gellengmuna boha carana menghadapi masalah. Misalna, tikki adong masalahna tu donganna manang tikki adong keluarga na mate.a

Tikki dipasingot halak gellengmuna.

PRINSIP NI BIBEL: “Tangihon ma poda . . . asa gabe halak na marbisuk ho.”​—Poda 19:20.

Molo dipasingot halak gellengmuna, biasana tujuanna dang na lao pabiar-biarhon gellengmuna manang mambahen haccit rohana. Alai ala na adong do na porlu dipadenggan sian gellengmuna i.

Molo diajari hamu gellengmuna asa olo manjalo sipasingot, boi ma dihilala hamu dohot dihilala gellengmuna manfaatna. Adong sahalak bapak na margoar si John mandok, “Unang pittor urupi tikki sala gellengmuna. Gabe dang boi annon ibana marsiajar sian kesalahanna. Gabe holan hita ma annon na diharappon pasaehon masalahna i. Hape sai godang do masalah di parngoluotta on. Akibatna gabe susa ma hita dohot gellengta.”

Jadi boha do carana asa olo gellengmuna manjalo sipasingot? Misalna molo dipasingot guru manang halak na asing ibana, unang ma pittor didokkon hamu dang cocok nasehat ni nasida tu gellengmuna. Alai tikki dipasingot gellengmuna, sukkun ma:

• “Hira-hira boasa ma dipasingot ho?”

• “Aha do manfaat ni nasehat i tu ho?”

• “Molo dipasingot ho muse, aha ma na lao bahenonmu?”

Ingot ma, molo olo gellengmuna manjalo sipasingot, dang holan tu saonari manfaatna. Alai sahat tu na balga ibana.