Mangargai Hangoluan

BOASA PORLU TAARGAI HANGOLUAN?

Na so mangargai hangoluan do hita molo taulahon akka ulaon na boi mambahen hita marsahit jala na boi mambahen halak gabe bahaya.

Molo marisap sasahalak, lam leleng boi do ibana gabe hona kanker jala gabe maol ma ibana malum. Sian sude halak na mate alani kanker paru-paru, hira-hira 90 persen ma na mate ala marisap manang ala jotjot menghirup timus ni sigaret ni halak (perokok pasif).
Gabe trauma do saleleng martaon-taon akka halak na mangida kasus penembakan di sikkola. Songon on ma na didok Stanford University Amerika Serikat, “Sada penelitian patuduhon gabe trauma do akka halak na mangida kasus penembakan di sikkola saleleng martaon-taon, nang pe dang hona tembak nasida.”
Molo manginum alkohol manang marnarkoba halak na mamboan kendaraan, boi do i parohon bahaya tu pengendara na asing dohot tu halak na mardalan pat. Molo dang diargai sasahalak hangoluan, halak na so marsala do na jotjot gabe korban.

NA BOI DIULAHON HAMU

Jaga ma kesehatanmuna. Paso ma hasomalan na boi manegai dagingmuna, songon marisap, mangisap vape (rokok elektrik), mabuk-mabuk, manang marnarkoba. Molo diulahon sasahalak i, on patuduhon na so diargai ibana do ngoluna dohot ngolu ni akka halak na di sekitarna termasuk ma i keluargana.

“Tapaias ma diritta sian akka na mambahen ramun daging.”—2 Korint 7:1.

Jaga ma keselamatan. Asa unang celaka, rawat ma jabumuna dohot akka barang-barangmuna. Hati-hati ma mamboan kendaraan jala rawat ma kendaraanmuna. Unang ma olo hamu dipaksa mangulahon ulaon na boi parohon bahaya manang na boi mambahen mate.

“Molo dibangun hamu jabumuna, ikkon dibahen hamu do pagar tembok di atap ni jabu i, asa unang adong na madabu sian i, jala asa unang gabe marsala hamu ala adong na mate madabu sian i.”—5 Musa 22:8.a

Burju ma tu sude halak. Molo burju hita tu sude halak dang soal sukuna, negarana, na mora manang na pogos, parsikkola manang na so sikkola, on patuduhon na taargai do hangoluan. Taingot ma, sogo ni roha dohot pikkiran na negatif do na jotjot mambahen sasahalak mangulahon na jahat manang marporang.

“Bolokkon hamu ma sian dirimuna sogo ni roha, muruk, rimas, songgak-songgak, dohot akka hata na mangaleai na mambahen haccit roha ni na asing. Alai burju ma hamu tu na asing.”—Epesus 4:31, 32.

NA DIULAHON HAMI

Diurupi Saksi Jahowa do akka halak asa manjaga kesehatan. Godang do halak na diurupi hami marsiajar Bibel gabe marhasil pasohon hasomalan na boi manegai dagingna.

Sai diihutton hami do aturan keselamatan di proyek pembangunannami. Nungnga dilatik akka relawan na pajongjokkon tempat ibadahnami dohot bangunannami na asing asa manjaga keselamatan ni nasida. Jala taratur do dipareso akka bangunannami asa sesuai tu aturan keselamatan na adong di sada luat.

Diparade hami do bantuan kemanusiaan. Saleleng taon 2022, hira-hira 180 miliar rupiah ma hepeng sumbangan na dipakke hami lao mangurupi akka korban bencana. Dipakke hami do i lao paradehon bantuan kemanusiaan tu hira-hira 200 bencana.

Tikki menyebar virus Ebola di Afrika Barat taon 2014 dohot di Demokratik Republik Kongo taon 2018, diurupi hami do akka halak lao mamboto songon dia mambahen tindakan pencegahan. Jala dipasahat hami do jamita di acara ibadahnami na marjudul, “Parohon Haluaon do molo Unduk”. Diparade hami do muse inganan manucci tangan di jonok ni pintu masuk ni tempat ibadahnami. Jala sai dipaingot hami do akka dongan asa sai manucci tangan dohot mambahen tindakan pencegahan na asing.

Di sada siaran radio di Sierra Leone, dipuji do Saksi Jahowa ala nungnga mangurupi jemaatna dohot halak na so Saksi Jahowa. Diurupi Saksi Jahowa do akka halak lao mangattusi boha carana mambahen tindakan pencegahan penyebaran virus Ebola.

Sabar do Saksi Jahowa mangantri lao manucci tangan sebelum masuk tu Bale Harajaon. — Inganan manucci tangan di tempat ibadah ni Saksi Jahowa tikki menyebar virus Ebola di Liberia taon 2014

a Najolo di Timur Tengah, ikkon diihutton nasida do petunjuk on alana datar do atap jabu ni nasida jala disi do nasida ganup ari mangulahon akka ulaonna. Molo diihutton nasida petunjuk i, patuduhon na dijaga nasida do keselamatan ni anggota keluargana dohot halak na asing.