Andigan jala Boasa Porlu Mamangke Tujungtujung?

Tingki mangulahon ulaon partondion, andigan jala boasa sahalak borua ingkon mamangke tujungtujung? Taparsiajari ma aha na disurat apostel Paulus taringot on. Dilehon ibana do hatorangan na mangurupi hita asa boi mangulahon na sintong, na parohon sangap tu Debata. (1 Korint 11:3-16) Dipaboa si Paulus do adong tolu na porlu tapingkirhon taringot mamangke tujungtujung: (1) ulaon na mambahen sahalak borua ingkon mamangke tujungtujung, (2) andigan sahalak borua porlu mamangke tujungtujung jala (3) boasa porlu sahalak borua mamangke i.

Ulaon. Dipaboa si Paulus do adong dua ulaon na mambahen sahalak borua ingkon mamangke tujungtujung, tingki martangiang dohot manurirangi. (Ayat 4, 5) Tangiang, i ma dalan na denggan laho mangkatai tu Jahowa. Saonari, ulaon manurirangi, i ma ulaon na diulahon sahalak Kristen laho mangajarhon isi ni Bibel. Alai, didok si Paulus do na ingkon martujungtujung sahalak borua ganup martangiang manang mangajarhon isi ni Bibel? Ndang didok songon i. Porlu do sahalak borua mamingkirhon andigan ibana mamangke tujungtujung.

Andigan dipangke. Sian hata ni si Paulus, boi ma taboto molo sahalak borua porlu mamangke tujungtujung tingki di keluarga dohot di huria. Ibana mandok, ”Baoa i do ulu ni boruboru . . . ganup boruboru, na martangiang manang manurirangi, so dihungkupi uluna, dileai do uluna, ai tudoshon na jinambak do nasida.” (Ayat 3, 5) Di keluarga, tungganedoli do na dibahen Jahowa gabe ulu ni borua. Alani i, tungganeboru boi do ndang mangargai huaso ni tungganedolina, molo diulahon ibana tanggung jawab partondion na dilehon Jahowa tu tungganedolina. Umpamana, tingki tungganeboru mangajarhon parsiajaran Bibel tu sasahalak, ingkon martujungtujung do ibana, molo disi tungganedolina. Ingkon ulahononna do i nang pe ndang tardidi gabe sahalak Sitindangi tungganedolina.a Molo sahalak borua martangiang manang mangajar, tingki adong ianakhonna baoa naung tardidi, ingkon martujungtujung do ibana. Nang pe ndang ulu di keluarga ianakhonna i, alai huaso laho mangajar di huria dilehon do tu angka baoa na tardidi.

Dipaboa si Paulus do muse boasa sahalak borua porlu mamangke tujungtujung di huria. Ibana mandok, ”Molo adong na giot marbada di rohana, ndang i adat di hami, nang di angka huria ni Debata pe.” (Ayat 16) Di huria, sahalak baoa naung tardidi do na boi manguluhon ulaon partondion. (1 Timoteus 2:11-14; Heber 13:17) Holan baoa do na dipillit gabe sintua dohot parhobas. Nasida dilehon tanggung jawab laho manjaga naposo ni Debata. (Ulaon ni Apostel 20:28) Sipata, olo do dipangido asa angka donganta borua na mangulahon ulaon na somal diulahon angka baoa na tardidi, na manggohi syarat. Umpamana, porlu do sahalak borua manguluhon parpunguan laho marbarita, ala ndang adong baoa na tardidi na manggohi syarat. Manang, sahalak borua manguluhon parsiajaran Bibel di jabu nang pe rap dohot sahalak baoa na tardidi, ala nunga ditontuhon hian.b Alai, ala sude on ulaon na di tontuhon tu angka baoa naung tardidi di huria, ingkon pangkeonna do tujungtujung laho patuduhon pangargaion.

Alai, godang do ulaon di partondion na boi ulahonon ni sahalak borua na so porlu mamangke tujungtujung. Umpamana, tingki ibana mangalehon alus di parpunguan, marbarita na uli sian jabu tu jabu rap dohot tungganedolina, manang rap dohot donganta baoa na tardidi. Dung i, tingki mambahen parsiajaran Bibel dohot ianakhonna na so tardidi jala rap martangiang nasida. Alai, molo ndang pos roha ni sahalak donganta borua taringot andigan ibana mamangke tujungtujung, boi do ibana mangalului gumodang hatorangan taringot on.c Jala, ndang sala molo panggora ni rohana manjujui ibana asa mamangke tujungtujung, songon na adong di gombar.

Boasa dipangke. Di ayat 10, Bibel siganup ari, taida do adong dua na mambahen sahalak borua ingkon mamangke tujungtujung, ”Ala ni angka surusuruan, ingkon marsaongsaong [martujungtujung] do boruboru i, patuduhon na di toru ni huaso ni tungganedolina do ibana.” Na parjolo, sahalak borua naeng patuduhon molo ibana ”di toru ni huaso”. Huaso ni ise? Tangkas ma, mamangke tujungtujung cara ni sahalak borua laho patuduhon pangargaion tu huaso, na dilehon ni Jahowa tu baoa na tardidi di huria. Alani i, dipatudu ma na holong rohana jala marsihohot tu Jahowa. Na paduahon, na mambahen sahalak borua ingkon mamangke tujungtujung ”ala ni angka surusuruan”. Aha do pangkorhon ni sahalak borua na mamangke tujungtujung tu angka surusuruan?

Lomo do roha ni angka surusuruan molo huaso ni Debata dioloi di surgo dohot di tano on. Porlu do angka surusuruan unduk tu aturan ni Jahowa. Alani i, mangkorhon na denggan do tu nasida molo angka jolma boi mangoloi Debata nang pe mardosa. Ala on ulaon na maol diadopi angka surusuruan di tingki naung salpu. (Judas 6) Olo do ra diida surusuruan sahalak donganta borua, na rade unduk tu huaso ni angka baoa di huria. Nang pe gumodang pengalamanna, pangantusionna jala ummalo sian donganta baoa na tardidi di huria. Olo do ra sahalak donganta borua i halak Kristen na miniahan. Jala ibana mandapot hak na sumurung na umbalga sian angka surusuruan ala rap mamarenta dohot Jesus di surgo. Sada sitiruon na denggan do on di angka surusuruan. Alani i, hak na sumurung do on, ala boi patuduhon roha pangoloion marhite marsihohot jala unduk di adopan ni marjuta surusuruan!