1-3. (a) Boasa busisaon roha ni si Ester laho manjumpangi tungganedolina? (b) Aha do sungkunsungkun na laho taulas taringot tu si Ester?

BUSISAON do si Ester tingki masuk tu istana di Susan. Mansai bagak jala uli do istana i. Adong do uhiran ni lombu na marhabong, parsior (pemanah) dohot uhiran ni singa di tembok na marhillong. Adong muse angka patung raksasa. Istana on dipajongjong jonok tu Dolok Zagros na marsalju, jala jonok tu sunge Khoaspes. Sude on patuduhon tu halak na ro, balga do huaso ni baoa na laho didapothon si Ester, na mandok dirina ”raja na sangap”. Jala tungganedolina do baoa sijumpanganna i.

² Tungganedoli! Imbar situtu do si Serses tu tungganedoli na sininta ni roha ni sahalak borua Jahudi na marsihohot!a Ndang diihuthon si Serses sitiruon ni halak na marsihohot, songon si Abraham na rade manangihon si Sarah tungganeboruna. (1 Mus. 21:12) Jahowa do Debata ni si Ester, alai ndang ditanda baoa on ise Jahowa dohot patikNa. Na diantusi si Serses, i ma uhum ni halak Persia, dohot ma i uhum na mangorai ulaon songon na binahen ni si Ester. Aha ma i? Hombar tu uhum i, patut do diuhum mate manang ise na ro mandapothon raja, molo so ala na jinou ni raja i. Tingki i, ndang dijou raja asa ro si Ester, alai marsitutu do ibana manjumpangi raja i. Lam jonok tu alaman ni istana i, lam busisaon ma si Ester. Songon laho manopot hamateanna do dihilala ibana.​—Jaha Ester 4:11; 5:1.

³ Boasa olo si Ester mangulahon i? Jala, aha do na boi taparsiajari sian haporseaon ni ibana? Parjolo, taparrohahon ma songon dia si Ester boi gabe ratu manang tungganeboru ni raja Persia.

Hatorangan taringot tu Si Ester

4. Ise do si Ester, jala boasa ibana tading dohot itona si Mordahai?

⁴ Na so marama so marina do si Ester. Ndang adong dipaboa taringot tu natuatuana na mambahen goarna si Hadasa, lapatanna di hata Heber ”mirtel”, duhut na marbunga na bontar jala uli. Dung mate natuatuana, dipagodanggodang si Mordahai ma si Ester, dibahen do ibana songon boruna sandiri. Si Mordahai, i ma ito ni si Ester sian tubu ni bapakna na marhahamaranggi. Alai, dao do gumodang umur ni si Mordahai.​—Est. 2:5-7, 15.

5, 6. (a) Songon dia do si Mordahai pagodanggodangkon si Ester? (b) Songon dia do parngoluan ni si Mordahai dohot si Ester di Susan?

⁵ Si Mordahai dohot si Ester, i ma halak Jahudi na tartaban jala tading di ibukota ni Persia. Godang do elaela tu nasida ala mangoloi Patik ni Debata. Alai, solhot do paralealeon ni si Ester tu si Mordahai, na mangajari ibana taringot tu Jahowa, Debata na paluahon naposoNa sian tingki tu tingki. (3 Mus. 26:44, 45) Alani i, boi ma lam togu holong dohot paralealeon ni nasida na dua.

⁶ Ra, si Mordahai karejo di istana di Susan, ala somal do ibana hundul di harbangan ni istana rap dohot angka naposo ni raja. (Est. 2:19, 21; 3:3) Ndang dipaboa aha na diulahon si Ester di tingki haposoonna. Alai boi taboto, diurupi ibana do ulaon di jabu ni si Mordahai, na di bariba ni sunge dohot istana. Ra, las do rohana laho tu pasar di Susan mangida angka perhiasan na binahen ni tukang mas, tukang perak dohot na asing. Ndang hea ro tu pingkiran ni si Ester, na gok angka perhiasan diparade tu ibana di ari na naeng ro.

”Uli dohot Rupana”

7. Boasa ndang gabe ratu be si Wasti, jala aha do diulahon raja dungkon i?

⁷ Sada tingki, tarsar ma barita na so denggan taringot tu rumatangga ni raja. Tingki ditamue si Serses angka pejabat, diparade ibana do sipanganon dohot anggur. Dijou raja ma muse ratu Wasti, na di tingki i mambahen pesta tu dirina sandiri. Ala ndang olo ratu Wasti ro, gabe muruk ma raja i, jala disungkun ibana ma tu angka pamodai, aha uhum na patut dibahen tu si Wasti. Ujungna, ndang boi be ibana gabe ratu. Dilului angka pamodai ni raja i ma di humaliang ni negeri i angka anak boru na poso jala uli rupana. Sian i, pilliton ni raja ma sada gabe ratu manggantihon si Wasti.​—Est. 1:1–2:4.

8. (a) Boasa mabiar si Mordahai ala naung anak boru si Ester? (b) Songon dia do hita boi mangihuthon hata ni Bibel taringot tu uli ni rupa? (Ida ma Poda 31:30.)

⁸ Boi do dapot rohanta, songon holong ni sahalak ama tu boruna do roha ni si Mordahai tu si Ester. Las do rohana mangida si Ester, alai biar do rohana ala naung anak boru jala uli rupana. Didok di Bibel, ”Na uli utus do pardagingonna, uli dohot rupana.” (Est. 2:7) Disurat di Bibel, lomo do roha mangida halak na uli rupana. Alai, molo ndang mardongan bisuk dohot serep ni roha, boi do parohon ginjang ni roha, late, dohot angka parange na roa na asing. (Jaha Poda 11:22.) Songon i do pangkilalaanmu? Gabe ginjang do roha ni si Ester manang serep do rohana dibahen uli ni rupana? Taparrohahon ma.

9. (a) Aha do na masa tingki diida naposo ni raja si Ester, jala boasa on parohon lungun ni roha tu si Mordahai? (b) Boasa diloas si Mordahai si Ester marhasohotan tu halak na so manomba Jahowa? (Ida ma kotak.)

⁹ Diida naposo ni raja do uli ni rupa ni si Ester. Dibahen ma ibana rap tu angka anak boru na asing, jala diboan tu istana. (Est. 2:8) Tontu, lungun do roha ni si Ester dohot si Mordahai. Ndang lomo roha ni si Mordahai gabe marhasohotan boruna tu halak na so manomba Jahowa, nang pe ibana sahalak raja. Alai, ndang adong na boi diulahon si Mordahai.b Tontu, ditangihon si Ester do poda ni si Mordahai andorang so diboan ibana! Ra, saleleng di pardalanan tu Susan, sungkunsungkun do roha ni si Ester taringot tu parngoluonna.

”Jumpangan Asi ni Roha ma Si Ester sian Saluhut Halak na Marnida Ibana”

10, 11. (a) Aha do parange na boi mangkorhon tu si Ester? (b) Songon dia do si Mordahai patuduhon na disarihon ibana si Ester?

¹⁰ Asing do parngoluon ni si Ester saonari sian na somal. Ibana tading rap dohot torop anak boru na dipillit sian sude luat di Imperium Persia. Marimbar do hasomalan, bahasa, dohot parange ni nasida. Si Hegai ma na dipillit laho mangaradoti nasida. Angka anak boru ingkon paulihon dirinasida asa lam uli saleleng sataon, dohot ma i didampol mamangke miak na angur. (Est. 2:8, 12) Tontu, on boi mambahen angka anak boru gabe lam marginjang ni roha, jala bais tu halak na asing. Songon dia do si Ester?

¹¹ Busisaon do roha ni si Mordahai taringot tu si Ester. Alani i, diparrohahon si Mordahai do ganup ari si Ester sian na dao laho mamboto aha na masa tu ibana. (Est. 2:11) Ra, las do roha ni si Mordahai mambege barita taringot tu si Ester sian angka naposo ni raja. Boasa?

12, 13. (a) Songon dia do pangkilalaan ni halak tu si Ester? (b) Boasa las roha ni si Mordahai ala ndang dipaboa si Ester taringot tu bangsona?

¹² Las do roha ni si Hegai mangida pangalaho dohot burju ni roha ni si Ester. Alani i, dilehon ma tu si Ester pitu halak pandongani, dohot inganan na dumenggan sian na asing. Dipaboa do muse, ”Jumpangan asi ni roha ma si Ester sian saluhut halak na marnida ibana.” (Est. 2:9, 15) Holan uli ni rupa do mambahen lomo roha ni sasahalak? Ndang songon i. Ndang holan rupa ni si Ester na uli.

¹³ Umpamana, dipaboa do taringot tu si Ester, ”Ndang dipaboaboa si Ester bangsona manang hulahulana, ai nunga ditonahon si Mordahai hian tu nasida, na so jadi paboaboaonna”. (Est. 2:10) Dipasingot si Mordahai do si Ester asa unang dipaboa molo ibana bangso Jahudi, ala ndang lomo roha ni halak Persia mangida halak Jahudi. Las do roha ni si Mordahai ala tongtong marbisuk jala unduk si Ester, nang pe ndang rap be nasida tading!

14. Songon dia do angka na poso saonari maniru si Ester?

¹⁴ Saonari, angka na poso boi mambahen las roha ni natuatuana manang induk somangna, nang pe nasida tading di humaliang ni halak na so marpangantusion, na mangulahon ulaon na rorang, dohot parjahat. Boi do nasida ndang tarelaela ala marsihohot tu pangantusion na sian Debata. Jala songon si Ester, nasida boi mambahen las roha ni Jahowa.​—Jaha Poda 27:11.

15, 16. (a) Boasa dipillit raja si Ester? (b) Boasa maol si Ester mangadopi na muba di parngoluonna?

¹⁵ Tingki laho tu adopan ni raja, diloas do si Ester mamillit angka na porlu di ibana. Alai serep do rohana, ndang dipangido ibana lobi sian na nidok ni si Hegai. (Est. 2:15) Diboto ibana do, ndang sae holan uli ni rupa mambahen las roha ni raja; alai ringkot do marserep ni roha, ala ndang somal halak patuduhon i di tingki i. Tutu do i?

¹⁶ Disurat di Bibel, ”Jadi humolong ma roha ni rajai mida si Ester, asa mida sude parompuan na asing, jumpangan asi dohot talup ni roha ibana di adopan ni rajai, gumodang sian saluhut namarbaju i; jadi dibahen rajai ma sada tumpal harajaon tu uluna, jala dipabangkit gabe raja, singkat ni si Wasti.” (Est. 2:17) Tontu, maol do di si Ester mangadopi angka na muba di parngoluonna. Saonari ibana gabe ratu, tungganeboru ni raja na tarbarita! Gabe ginjang do roha ni si Ester dung gabe ratu ibana? Ndang ginjang rohana!

17. (a) Songon dia do si Ester patuduhon molo ibana tongtong mangoloi si Mordahai? (b) Boasa si Ester gabe sitiruon na denggan di hita saonari?

¹⁷ Songon tona ni si Mordahai, tongtong do ndang dipaboa si Ester molo ibana halak Jahudi. Asing ni i, tingki diboto si Mordahai adong na martahi laho mambunu raja Serses, si Ester do na paboahon tahi na roa i tu raja Serses. On mambahen ndang saut raja hona mara. (Est. 2:20-23) Sitiruon na denggan do si Ester di tingkinta on. Somalna, dirimpu halak do sada hagaleon molo sasahalak marroha na unduk, jala didok nasida ndang sala molo sasahalak mangalo. Alai, halak na marhaporseaon marsitutu do asa marroha pangoloion songon si Ester.

Diuji ma Haporseaon ni Si Ester

18. (a) Boasa ndang olo si Mordahai marsomba tu si Haman? (Ida surat na di toru.) (b) Songon dia do angka donganta saonari on maniru si Mordahai?

¹⁸ Timbo do pangkat ni si Haman di istana ni raja. Dibahen raja do ibana gabe perdana menteri, penasehat jala halak na paduahon dungkon raja. Ditontuhon raja do ingkon marsomba sude jolma na jumpang dohot si Haman. (Est. 3:1-4) Aturan on manguji haporseaon ni si Mordahai, ala ingkon oloan do ibana tu Debata sian tu raja. Si Haman, i ma sahalak sian pinompar ni si Agag, raja Amalek na pinamate ni panurirang Samuel. (1 Sam. 15:33) Alani jahat ni halak Amalek, gabe alo ni Jahowa dohot Israel do nasida, jala hona bura do bangso Amalek.c (5 Mus. 25:19) Alani i, songon dia do sahalak Jahudi na marsihohot ingkon marsomba tu sahalak Amalek? Ndang olo si Mordahai mangulahon i, jala marsihohot do ibana. Sahat tu tingkinta on, marsitutu do angka donganta mangihuthon prinsip na mandok, ”Ingkon oloan do iba di Debata asa di jolma!”​—Ul. 5:29.

19. Aha do na laho diulahon si Haman, jala songon dia do ibana paposhon roha ni raja?

¹⁹ Tarrimas situtu do si Haman. Ndang sae holan si Mordahai na laho bunuonna, alai dohot do sude bangso Jahudi! Diparoaroa si Haman do halak Jahudi di adopan ni raja. Ndang dipaboa ibana goar ni bangso i, alai didok ibana do molo bangso i, ndang bangso na tarbarita, ”marserak, jala mampar tu tongatonga ni angka bangso”. Didok ibana do muse, bangso on ndang mangoloi patik ni raja, jala boi parohon mara. Rade do ibana mangalehon godang hepengna tu raja asa dipangke mambunu sude halak Jahudi di negeri i.d Dung i, dilehon si Serses ma tintinna laho patuduhon na dioloi ibana do hata ni si Haman.​—Est. 3:5-10.

20, 21. (a) Aha do pangkorhon ni boaboa ni si Haman tu sude halak Jahudi dohot ma i si Mordahai? (b) Aha do na pinangido ni si Mordahai ulahonon ni si Ester?

²⁰ Pintor disuru do naposo ni raja laho tu sude luat di imperium i paboahon uhum mate tu halak Jahudi. Rimangi ma pangkorhon ni boaboa i dung sahat di Jerusalem, inganan ni deba sian halak Jahudi na mulak sian tano habuangan di Babel, na marsitutu laho pajongjongkon tembok Jerusalem. Dung ditangihon si Mordahai barita i, ra pintor diingot ibana do nasida, songon i nang angka sisolhot dohot alealena di Susan. Alani lungun ni rohana, diribak ma pangkeanna, dipangke ma goni, dibahen ma sirabun tu uluna, jala mangandungi di kota i. Alai, hundul do si Haman, minum rap dohot raja, ndang adong nanggo otik arsak ni rohana mamingkiri na masa tu sude halak Jahudi.​—Jaha Ester 3:12–4:1.

²¹ Diboto si Mordahai do ingkon adong ulahononna laho paluahon bangsona. Alai, aha do na laho ulahononna? Dung dibege si Ester na masa tu si Mordahai, ditongoshon ma pangkean, alai ndang dijangkon si Mordahai. Ra, nunga taralusi be sungkunsungkun ni si Mordahai, boasa diloas Jahowa si Ester dibuat sian ibana jala gabe ratu ni raja na so sisomba Jahowa. Alani i, disuru si Mordahai ma si Ester mangido asi ni roha ni raja laho paluahon ”bangsona i”.​—Est. 4:4-8.

22. Boasa si Ester mabiar manjumpangi tungganedolina, i ma raja? (Ida surat na di toru.)

²² Marsak do si Ester manangihon i. Diuji do haporseaonna laho mangulahon i. Mabiar do ibana. Alani i, disungkun ibana ma si Mordahai taringot tu uhum ni raja. Diuhum mate do sasahalak na ro tu adopan ni raja molo ndang dijou. Alai, boi do malua ibana molo disurdukkon raja tungkot harajaonna. Patut do ro si Ester tu adopan ni raja mangido asi ni rohana dung diida na masa tu si Wasti, na so mangoloi parenta ni raja? Dipaboa si Ester do muse naung 30 ari ndang dijou raja ibana! Alani i, ganggu do rohana atik naung muba roha ni raja tu ibana.e—Est. 4:9-11.

23. (a) Aha do didok si Mordahai laho patoguhon haporseaon ni si Ester? (b) Boasa porlu tatiru si Mordahai?

²³ Dilehon si Mordahai do alus na tangkas laho patoguhon roha ni si Ester. Didok do tu si Ester molo ndang olo ibana mangulahon i, ro do haluaon sian na asing tu halak Jahudi. Alai, songon dia do si Ester boi marpos ni roha malua sian uhum ni raja i? Pos do roha ni si Mordahai molo Jahowa ndang paloashon naposoNa diripashon, jala mambahen ndang saut angka sangkapNa. (Jos. 23:14) Dung i, disungkun si Mordahai ma si Ester, ”Angkup ni, ise umbotosa, atik ala ni tingki on do umbahen sahat harajaon tu ho?” (Est. 4:12-14) Tutu ma, patut do tatiru si Mordahai, na marhaposan tu Jahowa.​—Poda 3:5, 6.

Haporseaon na Umtogu sian Biar ni Roha tu Hamatean

24. Songon dia do si Ester patuduhon haporseaon dohot habaranionna?

²⁴ Ingkon hatop do si Ester manontuhon na laho ulahononna. Dipangido ibana do asa ditogihon si Mordahai halak sabangsona marpuasa saleleng tolu ari. Dung i, dipatuduhon si Ester do haporseaon dohot habaranionna marhite mandok, ”Molo tung mago ahu, ba mago ahu tusi!” (Est. 4:15-17) Saleleng tolu ari, martangiang do ibana. Ujungna, dipangke si Ester ma pangkean harajaonna dohot perhiasanna, asa denggan idaon ni raja. Dung i, borhat ma ibana.

25. Paboa ma songon dia na masa tingki ro si Ester mandapothon tungganedolina.

²⁵ Songon na dipaboa di mula ni pasal on, borhat ma si Ester manjumpangi raja Serses. Dapot rohanta do na mansai busisaon rohana, jala sai martangiang do ibana tu Jahowa. Masuk ma ibana tu alaman ni istana, jala diida ibana ma raja Serses hundul di habangsana. Ra, diparrohahon ibana do bohi ni raja i asa diboto songon dia rohana. Mabiar situtu do si Ester. Songgot do roha ni raja i mangida si Ester, alai lambok do rohana, pintor disurdukkon do tungkot harajaonna tu si Ester!​—Est. 5:1, 2.

26. Boasa porlu halak Kristen barani songon si Ester, jala boasa tadok godang dope na laho ulahonon ni si Ester?

²⁶ Dijangkon jala rade do raja manangihon si Ester. Nunga marsitutu si Ester laho mangurupi bangsona asa malua, jala on gabe sitiruon tu sude naposo ni Debata sahat tu saonari. Songon na nidok ni Jesus, rade do angka siseanna patuduhon holong. (Jaha Johannes 13:34, 35.) Laho patuduhon i, dihaporluhon do songon habaranion ni si Ester. Nang pe naung marsitutu si Ester mangurupi naposo ni Debata asa malua, alai godang dope na laho ulahononna. Songon dia do ibana patuduhon asa porsea raja molo si Haman marsangkap na roa? Songon dia do ibana paluahon bangsona? Taparsiajari ma alus ni sungkunsungkun on di pasal na mangihut.

1-3. (a) Songon dia do pangkilalaan ni si Ester dung lam jonok ibana tu hundulan ni raja i? (b) Aha do na binahen ni raja tingki ro si Ester?

TAMBA do biar ni si Ester dung lam jonok ibana tu hundulan ni raja i. Tapingkirhon ma tingki mardalan si Ester mandapothon raja i, holan soara ni pat dohot soara ni pangkeanna do na tarbege. Ndang ganggu rohana laho mangida angka patung uhiran na di istana i. Sai sungkunsungkun do rohana taringot tu na laho tontuhonon ni raja i tu ibana.

² Tingki ro si Ester, disurdukkon raja i ma tungkot harajaonna. On ma tanda na patuduhon lomo do roha ni raja i di haroro ni si Ester, nang pe ndang dijou ibana. Dijama si Ester ma ujung ni tungkot i patuduhon hamauliateonna.​—Est. 5:1, 2.

³ Tarida do hamoraon dohot huaso ni Raja Serses sian sude na adong di ibana. Tingki i, marratus juta dolar AS do pangkean ni raja Persia. Alai, dipatuduhon raja i do holong ni rohana tu si Ester jala dijangkon do harorona. Didok raja i, ”Aha do na hurang di ho, ale Ester, jolma ni raja, jala aha do na pinangido ni roham? Sahat ro di satonga ni harajaon i ingkon lehonon do i tu ho.”​—Est. 5:3.

4. Aha do na diadopi si Ester?

⁴ Nunga dipatuduhon si Ester haporseaon dohot habaranionna laho paluahon bangsona, marhite ro tu adopan ni raja. Alai, adong dope na ingkon diadopi ibana. Ingkon paposonna do roha ni raja molo halak na dihaporseai ni raja i, halak na jahat, na marsangkap laho mangaripashon bangso ni si Ester. Songon dia do si Ester mangulahon i, jala aha do na boi taparsiajari sian haporseaonna?

Marbisuk Mamillit Tingki laho Mangkatai

5, 6. (a) Songon dia do si Ester mangihuthon prinsip di Parjamita 3:1, 7? (b) Songon dia do si Ester mamillit tingki laho mangkatai tu tungganedolina?

⁵ Denggan do molo dipaboa si Ester sude tingki i tu raja di jolo ni angka naposona? Molo diulahon i, boi do gabe maila raja jala si Haman pe boi patuduhon na so tutu hata ni si Ester i. Antong aha do na diulahon si Ester? Hombar tu na disurat raja Salomo marratus taon andorang so i, ”Martingki be do sude nasa na masa di portibi on . . . adong do tingki hohom, adong do tingki mangkatai.” (Pjm. 3:1, 7, Bibel siganup ari) Tontu taboto do songon dia si Mordahai mangajarhon prinsip on tu si Ester. Alani i, diboto si Ester do ringkot ni mamillit tingki laho mangkatai.

⁶ Si Ester mandok, ”Molo tung denggan di roha ni rajai, sai ro ma rajai rap dohot si Haman sadarion tu panggalangon na hupauli di ibana.” (Est. 5:4) Las do roha ni raja, jala ditogihon do asa dohot si Haman. Sian dia do boi taida bisuk ni si Ester? Sangap do dibahen ibana tungganedolina, jala dipillit do tingki na denggan laho mangkatai.​—Jaha Poda 10:19.

7, 8. Aha do na diparade si Ester tingki manamue, alai boasa ndang pintor dipaboa ibana na solot di rohana?

⁷ Marsitutu do si Ester laho manamue, marhite paradehon sipanganon na dihalomohon tungganedolina. Diparade do anggur na dumenggan. (Ps. 104:15) Las ma roha ni si Serses. Alai, tarpaima dope ibana tu sipangidoon ni si Ester. Saonari do paboaon ni si Ester tu raja i?

⁸ Ndang i dope tingki na dumenggan laho mangkatai. Ditamue si Ester dope muse raja Serses dohot si Haman di ari na mangihut. (Est. 5:7, 8) Boasa ndang pintor dipaboa tingki i? Taingot ma, nunga dibahen parenta laho mangaripashon bangso Jahudi. Alani i, ingkon manat do si Ester mamillit tingki na dumenggan. Jala marpaima do si Ester muse, asa boi patuduhononna na diparsangapi jala dihaholongi ibana do tungganedolina.

9. Sadia ringkot do lambas ni roha, jala songon dia do hita boi maniru si Ester taringot on?

⁹ Ndang piga be halak na olo patuduhon lambas ni roha. Nang pe ponjot jala sai naeng patolhasonna tu raja i, alai sabar do si Ester paimahon tingki na dumenggan. Tatiru ma ibana, tingki taida adong parsoalan na porlu dipature. Tingki marsitutu hita paposhon roha ni sahalak panggomgomi laho pasaehon parsoalan, tatiru ma si Ester na marlambas ni roha. Poda 25:15 paboahon, ”Tupa do melok roha ni panguhum, binahen ni roha na lambat tarrimas, jala dila na lambok umponggolhon holiholi.” Molo sabar do hita paimahon tingki na dumenggan jala lambok tapaboa songon si Ester, paraloan na dipatudos songon holiholi pe, boi diponggolhon. Dipasupasu Jahowa do si Ester alani lambas ni rohana dohot bisukna?

Mangkorhon Haluaon do Lambas ni Roha

10, 11. Boasa tarrimas si Haman dung mulak sian istana, jala aha do na dijujui tungganeboruna dohot alealena bahenonna?

¹⁰ Mangkorhon na denggan do lambas ni roha ni si Ester. ”Marlas ni roha jala marhasonangan” do si Haman dung sae ditamue si Ester. Alai, dung sahat tu harbangan ni istana, tarrimas ma ibana mangida si Mordahai, na so olo marsomba tu ibana. Songon na taida di Pasal 15, ndang na so pantun si Mordahai tu ibana, alai dipatujolohon si Mordahai do panggora ni roha dohot panombaonna tu Debata Jahowa. Alani i, ”gabe tarrimas situtu” ma si Haman.​—Est. 5:9.

¹¹ Dung dipaboa si Haman tu tungganeboruna dohot tu alealena taringot si Mordahai, dijujui nasida ma asa dibahen tiang hirahira 20 meter timbona. Jala didok ma, asa dipangido tu raja asa di digantung si Mordahai tusi. Lomo do roha ni si Haman mambege hata i.​—Est. 5:12-14.

12. Boasa dipangido raja asa dijahahon surat resmi kenegaraan, jala aha do na diboto ibana dung dijaha i?

¹² Ndang tabo pangkilalaan ni raja di borngin i. Didok Bibel, ”Ndang [tarpodom] mata ni rajai.” Dipangido ibana ma dijahahon surat resmi kenegaraan. Tingki dibege ibana dijahahon laporan taringot tu tahi laho pamatehon si Serses, gabe diingot ibana ma na masa i, ditangkup jala dibunu do angka jolma na laho mambunu i. Alai, ndang diingot aha na dilehon tu si Mordahai, na paboahon tahi ni parjahat i. Tingki disungkun raja taringot i, songgot ma rohana ala ndang adong dope na dilehon tu si Mordahai.​—Jaha Ester 6:1-3.

13, 14. (a) Songon dia do si Haman gabe dipalea? (b) Aha do didok tungganeboru ni si Haman dohot alealena?

¹³ Busisaon ma roha ni raja i. Disungkun ma ise halak na boi mangurupi ibana pasaehon parsoalan i. Tingki i, tibu do ro si Haman tu istana laho mangido tu raja asa diloas ibana manguhum mate si Mordahai. Alai, ndang sanga dope dipaboa si Haman, nunga disungkun raja ibana aha do silehonon tanda hamauliateon tu halak na dihalomohon ni raja. Dirimpu si Haman do ibana na nidok ni raja i. Alani i, didok si Haman ma: Lehon ma tu baoa i pangkean harajaon. Suru ma halak na marpangkat na timbo mamboan ibana mangkaliangi huta Susan mamangke hoda ni raja, huhut mansoarahon pujian di jolo ni na torop. Tapingkirhon ma songon dia pangkilalaan ni si Haman tingki diboto ibana na si Mordahai do halak na manjalo pujian i! Ise do na disuru raja laho mansoarahon hata pujian? Si Haman!​—Est. 6:4-10.

¹⁴ Dioloi si Haman do pangidoan ni raja i ala ndang tarjuana. Dungkon i, mulak ma ibana tu jabuna. Didok tungganeboru dohot alealena ma, molo i tanda na so denggan, na patuduhon na so taralo ni ibana si Mordahai, halak Jahudi i.​—Est. 6:12, 13.

15. (a) Aha do labana ala sabar si Ester? (b) Boasa marbisuk molo tahalungunhon Jahowa?

¹⁵ Ala sabar do si Ester paimahon sadari nai laho paboahon tu raja, gabe sanga ma si Haman mambahen rencana na pailahon dirina sandiri. Ra, Debata do na mambahen raja i ndang boi tarpodom. (Poda 21:1) Alani i ma, sai dipasingot Bibel hita asa ”dihalungunhon” rohanta Jahowa! (Jaha Mika 7:7.) Molo taulahon i, taantusi ma dumenggan do cara ni Jahowa pasaehon sada parsoalan, sian caranta sandiri.

Barani Paboahon

16, 17. (a) Andigan do tingki na dumenggan di si Ester laho mangkatai? (b) Aha do imbar ni si Ester sian si Wasti?

¹⁶ Ndang olo si Ester mambahen raja i tarrimas, alani i tingki ditamue ibana raja i na paduahalihon, dipaboa ma sude na di rohana. Songon dia carana? Disungkun raja i do muse aha pangidoan ni si Ester. (Est. 7:2) On ma tingki na denggan laho mangkatai.

¹⁷ Andorang so dipaboa, martangiang do si Ester di bagasan rohana. Dung i, didok ma, ”Molo naung jumpangan asi ni roha ahu di adopanmu, ale rajanami, jala molo tung denggan di roha ni rajai, sai pangolu ma hosangku ala pangidoanku, pangolu dohot hosa ni bangsongku, pasombu sihol ni rohangku.” (Est. 7:3) Didok si Ester do na pos rohana jala jumolo dipasangap ibana raja i. Tarida ma, imbar do si Ester sian si Wasti! (Est. 1:10-12) Asing ni i, ndang disalahon si Ester raja i, ala marpos ni roha tu si Haman. Alai, dipangido si Ester ma asa dilinggomi raja ibana sian halak na parohon jea tu ngoluna.

18. Songon dia do si Ester patolhashon na solot di rohana?

¹⁸ Songgot ma roha ni raja mambege i. Ise do na laho parohon mara tu si Ester? Didok si Ester ma, ”Ai nunga targadis hami, nang ahu nang bangsongku asa siaphononhon, bunuon dohot agoon; ummaha dope tung sura targadis hami, gabe hatoban baoa manang boruboru, jala masip boti ahu; ai ndang tartimbang musu panosahi harugian ni rajai.” (Est. 7:4) Molo taparrohahon dipapatar si Ester do sude parsoalanna i. Dipaboa ibana do ndang na pasahatonna i molo holan diparhatoban nasida. Alani i, molo ndang dipaboa si Ester na masa i, on boi mambahen rugi raja.

19. Aha do na boi taparsiajari sian si Ester?

¹⁹ Sitiruon na denggan do na binahen ni si Ester on. Tingki patorangkon sada parsoalan na ringkot tu halak na tahaholongi manang pamarenta, ringkot do tapatudu unduk ni roha, sabar jala tangkas ma tapaboa parsoalan i.​—Poda 16:21, 23.

20, 21. (a) Songon dia do si Ester paboahon tahi ni si Haman na jahat, jala songon dia do pangkilalaan ni raja? (b) Aha do tahi ni si Haman?

²⁰ Didok si Serses ma, ”Ise huroha na barani mambahen songon i? Di dia huroha halakna?” Pintor ditudu jala didok si Ester ma, ”Ianggo na mambahen hamagoan i, si Haman na jahat on do!” Hohom ma sude na di ruangan i. Hatahuton ma si Haman. Ra, pintor marrara do bohi ni raja i, dung diboto sahalak pamodaina manggabusi jala mambahen parenta laho pamatehon tungganeboruna. Mamintor ruar ma raja i tu alaman ni istana.​—Est. 7:5-7, Bibel siganup ari.

²¹ Pintor marsinggang ma si Haman di pat ni ratu, mangido asi ni rohana. Di na masuk raja i, diida ma si Haman manungkap di podoman ni si Ester. Marsigorgor ma murukna jala ditudu ma si Haman naeng perkosaonna ratu Ester. Diboan ma si Haman tu ruar, jala dihungkupi bohina. Dung i, dipaboa sahalak parpangkat di istana i ma naung dipajongjong si Haman sada tiang na timbo di si Mordahai. Pintor diparentahon si Serses ma asa digantung si Haman tu tiang i.​—Est. 7:8-10.

22. Songon dia do hita maniru si Ester?

²² Ra, ninna rohanta maol do mangkatindangkon hatigoran di portibi saonari on. Hea do dihilala hamu songon i? Ndang hea mandele si Ester, ndang hea mago pangkirimonna, jala ndang hea gale haporseaonna. Dung jumpang tingkina, barani do ibana mangkatindangkon na sintong jala mangasahon Jahowa. Tatiru ma ibana! Ndang mubauba Jahowa sahat tu saonari. Tongtong do margogo Jahowa manaluhon parjahat, songon si Haman.​—Jaha Psalmen 7:12-17.

Dipatujolohon do na Ringkot di Jahowa dohot di BangsoNa

23. (a) Aha do upa na dilehon raja tu si Mordahai dohot tu si Ester? (b) Songon dia do surirang ni si Jakkob taringot tu si Benjamin digohi? (Ida kotak ”Surirang Naung Digohi”.)

²³ Ujungna, diboto raja ma ise sasintongna si Mordahai. Ibana, ndang holan sahalak baoa na hea mangalinggomi raja, alai ibana do induk somang ni si Ester. Dibahen raja ma si Mordahai gabe perdana menteri manggantihon si Haman. Dilehon ma tu si Ester sude arta ni si Haman. Alai, dipillit si Ester do asa si Mordahai na mangaradoti sudena i.​—Est. 8:1, 2.

24, 25. (a) Aha dope na mambahen marsak si Ester? (b) Songon dia do si Ester maneahon ngoluna muse?

²⁴ Nunga malua be si Ester dohot si Mordahai sian jea. Alai, nunga lumbang dihilala si Ester? Molo holan dirina sandiri do diharingkothon, ra nunga lumbang dihilala ibana. Alai, surat ni si Haman laho mambunu halak Jahudi nunga sahat tu sude luat ni pamarentaon ni Assur. Nunga dibahen undi, i ma pur laho manontuhon ari na dumenggan mangulahon sangkap ni si Haman. (Est. 9:24-26) Nang pe adong tingki pigapiga bulan nai, alai boi do disundati mara i?

²⁵ Didapothon si Ester ma muse raja i, tung pe so dijou. Tangis ma ibana mangido asa disundati raja i barita panguhuman tu bangso Israel. Hape ndang boi be disundati uhum naung dipapate di bagasan goar ni raja Persia. (Dan. 6:13, 16) Alani i, dilehon raja ma huaso tu si Ester dohot tu si Mordahai laho mambahen parenta na baru. Ditongos ma boaboa na paduahon, na paloashon halak Jahudi mangalo angka bangso, asa boi nasida mampartahanhon ngoluna. Laho ma angka suruan i tu saluhut huta di Imperium Persia. Marpangkirimon ma halak Jahudi. (Est. 8:3-16) Boi do tarimangi, tingki sude halak Jahudi di imperium i paradehon sinjata laho marporang. Ndang na boi ulahononnasida i molo ndang dibahen parenta na baru i. Alai, urupan ni ”Jahowa Zebaot” do naposoNa?​—1 Sam. 17:45.

26, 27. (a) Songon dia do hamonangan na dilehon Jahowa tu naposoNa? (b) Dia do surirang na digohi taringot hamamate ni ianakhon ni si Haman?

²⁶ Tingki jumpang tingki naung ditontuhon i, nunga rade sude naposo ni Debata. Godang do muse pejabat ni Persia mamihak tu nasida, ala naung tarsar barita taringot tu si Mordahai halak Jahudi. Marhamonangan do dibahen Jahowa angka naposoNa. Dilinggomi do nasida sian uhum mate, marhite manaluhon angka musu.a—Est. 9:1-6.

²⁷ Alai, busisaon do si Mordahai molo ndang diuhum dope sampulu ianakhon ni si Haman i. Alani i, diuhum mate ma nasida. (Est. 9:7-10) Digohi ma surirang ni Bibel taringot tu hasusuda ni halak Amalek, na sai marmusu tu naposo ni Debata. (5 Mus. 25:17-19) Ra, ianakhon ni si Haman ma na parpudi sian bangso Amalek.

28, 29. (a) Boasa dihalomohon Debata si Ester dohot bangsona marporang? (b) Boasa sitiruon sian si Ester gabe pasupasu di hita?

²⁸ Nang pe poso si Ester, alai martanggung jawab do ibana manontuhon uhum dohot aturan tu parporangan. Tontu, borat do mangulahon i. Alai dihalomohon Jahowa do asa dilinggomi bangso Israel sian mara, ala nunga ditontuhon hian marhite bangso i do ro Messias, na gabe dalan haluaon tu sude jolma! (1 Mus. 22:18) Alai, dung ro Messias tu portibi on, diorai do angka naposo ni Debata parsidohot marporang.​—Mat. 26:52.

²⁹ Nang pe songon i, marporang do halak Kristen di partondion; lam marsitutu do Sibolis manegai haporseaonta tu Debata Jahowa. (Jaha 2 Korint 10:3, 4.) Alani i, taihuthon ma sitiruon sian si Ester! Anggiat ma tapatudu haporseaon, bisuk, dohot lambas ni roha tingki paposhon roha ni halak. Unang ma hita mangkaringkothon diri sandiri, alai barani ma hita mangkatindangkon na sintong taringot tu naposo ni Debata.