Rap Marpungu laho Manomba Debata

1. Aha do pangurupion na dilehon tu angka sisean jala boasa mansai dihaporluhon i?

NDANG sadia leleng dung hehe Jesus, marpungu ma angka siseanna laho masipajujuan. Ditutup nasida do sude pintu ala mabiar tu musu. Alai, muba do biarnasida i dung diida Jesus di tongatonga ni nasida jala mandok, ”Jalo hamu ma Tondi Parbadia!” (Jaha Johannes 20:19-22.) Tingki marpungu nasida muse, dilehon Jahowa ma tondi parbadiaNa tu nasida. Pangurupion na mansai balga do on di nasida laho mangulahon ulaon marbarita!​—Ul. 2:1-7.

2. (a) Songon dia do Jahowa mangalehon pangurupion, jala boasa tahaporluhon i? (b) Boasa mansai ringkot panombaon na sasaripe? (Ida surat na di toru dohot kotak, ”Panombaon na Sasaripe”)

² Songon angka sisean di abad na parjolo, hita pe mangadopi paraloan. (1 Ptr. 5:9) Adong do sian hita na mabiar tu jolma, alani i tahaporluhon do pangurupion ni Jahowa asa boi tongtong marbarita. (Eps. 6:10) Diparade Jahowa do pangurupion marhite angka parpunguan. Di parpunguan ari Minggu, adong Jamita tu Loloan dohot Parsiajaran Joujou Paboahon. Di parpunguan Parsitongaan ni Minggu, adong diulas Hangoluan dohot Pangkobasion ni Halak Kristen.a Ganup taon, adong opat parpunguan na asing, i ma kebaktian regional, dua hali kebaktian wilayah, dohot Borngin Parningotan ni Tuan. Boasa mansai ringkot ro tu parpunguan i? Songon dia do parpunguanta lam tu dengganna saonari? Aha do na tapatudu molo tongtong taihuthon parpunguan?

Boasa Ringkot Marpungu?

3, 4. Aha do na pinangido ni Jahowa sian naposoNa? Bahen tudosan.

³ Nunga leleng dipangido Jahowa asa marpungu angka naposoNa manomba Ibana. Umpamana taon 1513 SM, dilehon Jahowa do Patik tu halak Israel, dohot ma i, taringot tu ari Sabbat mingguan. Na tinujuna, asa boi do na sasaripe mambahen panombaon tu Ibana jala diajar marhite Patik i. (5 Mus. 5:12; 6:4-9) Tingki diihuthon halak Israel parenta i, togu do angka keluarga ni halak Israel jala ias di partondion. Alai, tingki ndang diulahon nasida be Patik ni Debata taringot tu marpungu manomba Jahowa, ndang dihalomohon Debata nasida.​—3 Mus. 10:11; 26:31-35; 2 Kron. 36:20, 21.

⁴ Taparrohahon ma tiruan na dibahen Jesus. Ganup minggu di tingki ari Sabbat, sai tu sinagoga do Jesus. (Luk. 4:16) Dung mate Jesus jala dipahehe, diihuthon angka siseanna do hasomalan laho marpungu nang pe nasida ndang mangihuthon patik taringot tu ari Sabbat. (Ul. 1:6, 12-14; 2:1-4; Rom 14:5; Kol. 2:13, 14) Di parpunguan i, halak Kristen di abad na parjolo ndang holan mandapot pangajarion manang dijujui tu na denggan, alai dilehon nasida do pelean pujian tu Debata marhite tangiang, alus, dohot ende.​—Kol. 3:16; Heb. 13:15.

5. Boasa porlu ro marpungu ganup minggu jala ganup adong kebaktian? (Ida kotak ”Kebaktian na Patoguhon Haporseaon ni Naposo ni Debata”)

⁵ Tingki ro hita tu parpunguan ganup minggu dohot tu kebaktian, on patuduhon na ringkot do di hita Harajaon ni Debata, manjangkon pangurupion sian tondi parbadia, jala manjujui na asing marhite pengalaman na patoguhon haporseaon ni nasida. Alai na rumingkot, boi ma hita manomba Jahowa marhite tangiang, alus, dohot marende. Nang pe marimbar pengaturan taringot tu parpunguan na taulahon saonari tu parpunguan na diulahon halak Israel dohot halak Kristen di abad na parjolo, alai dos do ringkot ni sude parpunguan i. Songon dia do parpunguanta lam tu dengganna saonari?

Parpunguan na Mangurupi Hita Asa Masipajujuan tu ”Haholongon dohot tu Angka Ulaon na Denggan”

6, 7. (a) Aha do na tinuju ni parpunguanta? (b) Songon dia do parpunguan dipatupa di ganup kelompok?

⁶ Tingki dilului donganta si Charles Taze Russell hasintongan taringot tu Bibel, diparrohahon ibana ma porlu rap marpungu dohot dongan sahaporseaon. Taon 1879, disurat si Russell ma, ”Ganup ari Minggu, marpungu do ahu rap dohot angka dongan di Pittsburgh laho mangorganisasi jala mambahen kelas marsiajar Bibel laho manulingkiti Buku na Badia.” Dijujui do angka na manjaha Zion’s Watch Tower asa rap marpungu, jala taon 1881 dibahen ma angka parpunguan di Pittsburgh, Pennsylvania, ganup ari Minggu dohot ari Rebo. Watch Tower November 1895 mandok molo na tinuju ni parpunguan, i ma ”patoguhon paralealeon, holong, dohot sada ni roha” jala on ma tingki na denggan laho masipajujuan.​—Jaha Heber 10:24, 25.

⁷ Saleleng martaontaon, na diulas di parpunguan dohot sadia jotjot i dipatupa, ndang sai sarupa di ganup punguan ni Parsiajar Bibel. Umpamana, adong surat sian punguan di Amerika Serikat na dipabinsar taon 1911 mandok, ”Marpungu do hami pinomatna lima hali saminggu.” Parpunguan on dibahen di ari Senen, Rebo, Jumaat, jala dua hali di ari Minggu. Surat na asing sian Afrika na dipabinsar taon 1914 mandok, ”Dibahen hami do parpunguan dua hali sabulan, ari Jumaat dohot ari Minggu.” Alai, di pudian ni ari dipatupa ma parpunguan songon saonari on. Taida ma sejarah ni parpunguan.

8. Mulana, angka aha do na diulas di Jamita tu Loloan?

⁸ Jamita tu Loloan. Taon 1880, sataon dungkon dipabinsar si Russell Zion’s Watch Tower, diihuthon ibana ma tiruan na dibahen Jesus laho marbarita na uli. (Luk. 4:43) Dung i, ditontuhon si Russell ma na laho diulas. Saonari digoari ma on jamita tu loloan. Tingki dipaboa ibana taringot tu ulaon i, Watch Tower mandok molo si Russell ”marlas ni roha pasahathon jamita tu loloan ’Taringot tu Harajaon Ni Debata’”. Taon 1911, dung dibahen kelas manang huria di pigapiga negara, dijujui do ganup kelas asa manuru angka parjamita tu luat na adong di humaliang ni inganan i, pasahathon onom jamita na marjudul taringot tu panguhuman dohot tobusan. Di ujung ni ganup jamita, dipaboa ma jamita dohot goar ni parjamita tu minggu na naeng ro.

9. Aha do na lam dipadenggan taringot tu Jamita tu Loloan, jala songon dia do hita manolopi parpunguan i?

⁹ Taon 1945, The Watchtower paboahon dimulai ma kampanye Jamita tu Loloan di liat portibi on na mangulas ualu jamita taringot tu ”sitaonon na borat saonari on”. Saleleng marpulu taon, angka parjamita ndang holan mamangke rangka na diparade naposo haposan, alai dipasahat do muse jamita na dibahen nasida sandiri. Nang pe songon i, taon 1981 dilehon ma tudutudu tu ganup parjamita asa pasahathon jamita sian rangka naung diparade.b Sahat tu taon 1990, di pigapiga rangka ni jamita dohot do angka na ro mangalehon alus, jala dibahen do pertunjukan. Alai dipadenggan do muse tudutudu i, holan jamita do na dipasahat di jamita loloan. Mulai Januari 2008, jamita dipasahat saleleng 30 minut, ndang 45 minut. Nang pe nunga muba formatna, alai jamita naung dipasahat i patoguhon haporseaon tu Bibel jala mangajari hita taringot tu Harajaon ni Debata. (1 Tim. 4:13, 16) Ditogihon hamu do halak na dijumpangi hamu manang halak na asing asa ro manangihon angka jamita na ringkot on?

10-12. (a) Angka aha do na muba taringot tu mamparsiajari parsiajaran Joujou Paboahon? (b) Aha do na porlu tasungkun tu dirinta?

¹⁰ Parsiajaran Joujou Paboahon. Taon 1922, ditanda halak do angka donganta musafir, i ma angka parbarita sian Lembaga Menara Pengawal na pasahathon jamita tu angka huria, jala manguluhon ulaon marbarita. Dijujui nasida do asa adong parpunguan ganup minggu, tarlumobi mamparsiajari Joujou Paboahon. Diulahon do sipasingot on. Mulana, di parpunguan parsitongaan ni Minggu manang ari Minggu do diulas parsiajaran Joujou Paboahon.

¹¹ Watchtower 15 Juni 1932 paradehon tudutudu taringot tu cara mangulahon parpunguan on. Parsiajaran na dibahen di Rumah Betel ma gabe sitiruon. Artikel i mandok, sahalak donganta baoa do na manguluhon parpunguan i. Adong ma tolu donganta baoa hundul di jolo jala margantiganti manjaha paragraf. Ala ndang adong sungkunsungkun na diparade, dipangido na manguluhon i ma asa dibahen na ro sungkunsungkun taringot tu paragraf i. Dung i, dipangido ibana ma muse alus sian na asing. Jala boi do dibahen na manguluhon hatorangan na ”jempek” laho manambai.

¹² Mulana, boi do huria mamillit majalah na laho diparsiajari hombar tu na pinangido ni angka penyiar. Alai Watchtower 15 April 1933 paboahon, asa sude huria mamangke majalah na terbaru. Taon 1937, dilehon ma tudutudu asa parsiajaran on diulahon ari Minggu. Tudutudu na mambahen lam denggan parpunguan songon na taulahon saonari on, dipaboa di Watchtower 1 Oktober 1942. Di majalah i didok, angka sungkunsungkun adong di toru ni ganup alaman artikel siparsiajaran, jala sungkunsungkun i ma na dipangke. Jala diulas ma parsiajaran i saleleng sajom. Dijujui do nasida asa mangalehon alus, alai ndang holan ”manjaha na tercetak”. Dibahen naposo haposan ma parsiajaran Joujou Paboahon gabe sada parpunguan na ringkot, laho mangalehon sipanganon partondion di tingkina. (Mat. 24:45) Tasungkun ma dirinta, ’Huparade do parsiajaran Joujou Paboahon ganup minggu? Jala, marsitutu do ahu laho mangalehon alus?’

13, 14. Songon dia do Parsiajaran Bibel Huria dibahen, jala aha do na boi tadapot sian parpunguan on?

¹³ Parsiajaran Bibel Huria. Parsitongaan ni taon 1890-an dipatandahon ma buku Millennial Dawn. Dung i, dijujui donganta si H. N. Rahn, sahalak Parsiajar Bibel na maringanan di Baltimore, Maryland, AS ma asa dibahen ”Kelas-Kelas Fajar” (Dawn Circles) laho marsiajar Bibel. Mulana, jotjot do parpunguan on diulahon di jabu. Alai bulan September 1895, marhasil do Kelas Fajar on di godang inganan di Amerika Serikat. Alani i, Watch Tower bulan i manjujui sude Parsiajar Bibel mambahen parpunguan sisongon i. Ingkon na malo manjaha do na manguluhon parpunguan i. Dijaha ma sada kalimat, dipangido ma na ro mangalehon hatorangan. Dung dijaha jala diulas sude kalimat na di paragraf, dijaha ma muse angka ayat na dienet di paragraf i. Dung sae diulas pasal i, dipangido ma na ro pasahathon hatorangan na jempek taringot tu parsiajaran na boi dapot ni nasida sian pasal i.

¹⁴ Nunga jotjot diganti goar ni parpunguan on. Hea do digoari Kelas Berea tu Parsiajaran Bibel, mangihuthon halak Berea di abad na parjolo na manat manulingkit Buku na Badia. (Ul. 17:11) Dung i, diganti ma muse gabe Parsiajaran Buku Huria. Saonari, gabe Parsiajaran Bibel Huria, jala sude penyiar mangulas on di Bale Harajaon. Saleleng marpulu taon, nunga marragam buku, brosur, dohot artikel Joujou Paboahon na gabe bahan siparsiajaran. Sian mulana, dijujui do angka na ro laho mangalehon alus di parpunguan. Parpunguan on mangurupi hita lam mangantusi isi ni Bibel. Sai taparade do na laho taparsiajari di parpunguan? Jala marsitutu do hita mangalehon alus?

15. Boasa dibahen Singkola Pangkobasion Teokratis?

¹⁵ Singkola Pangkobasion Teokratis. Donganta si Carey Barber na gabe sahalak sian Punguan na Mangaradoti Organisasi paboahon, ”Di ari Senen borngin, tanggal 16 Februari 1942, sude baoa sian keluarga Betel Brooklyn dijujui asa mandaftar tu Singkola Pangkobasion Teokratis.” Di tingki i, ibana karejo di kantor pusat di Brooklyn, New York. Taringot tu singkola on, didok ibana ma on ”sada hamajuon na tangkas tarida taringot tu cara ni Jahowa mangurupi naposoNa saonari on”. Marhasil do singkola on mangurupi angka donganta lam tu dengganna mangajari dohot marbarita. Alani i, taon 1943, buku ”Kursus Pelayanan Teokratis” (Course in Theocratic Ministry) sian tingki tu tingki diparade tu huria di liat portibi on. Watchtower 1 Juni 1943 mandok, Singkola Pangkobasion Teokratis dibahen asa naposo ni Debata ”diajari gabe sitindangi na malo pasahathon barita Harajaon”.​—2 Tim. 2:15.

16, 17. Holan asa malo marjamita do umbahen dibahen Singkola Pangkobasion Teokratis? Patorang ma.

¹⁶ Mulana, godang do na mabiar laho pasahathon jamita di jolo ni na torop. Donganta si Clayton Woodworth, Jr., na bapakna hea dipenjarahon rap dohot donganta si Rutherford dohot dongan na asing taon 1918 mangkatahon pangkilalaanna tingki dohot tu singkola on taon 1943. Ibana mandok, ”Maol situtu do ahu pasahathon jamita. Borat do huhilala naeng mangkatai, mahiang ma pamanganku, soarangku pe mangkahitir.” Alai dung lam leleng, lam malo ma ibana marjamita jala dapotna ma hak na sumurung laho pasahathon angka jamita tu loloan. Singkola on ndang holan mangajari carana marjamita, alai mangajari ibana asa martoruk ni roha, jala marhaposan tu Jahowa. Didok si Woodworth muse, ”Huantusi ma, ndang na marjamita na rumingkot, alai molo marsitutu paradehon jamita i asa denggan jala marhaposan tu Jahowa, dapot ni na manangihon ma parsiajaran sian jamita i.”

¹⁷ Taon 1959, ditogihon do angka donganta borua laho mandaftar tu singkola on. Donganta si Edna Bauer na manangihon boaboa i di sada kebaktian mandok, ”Las situtu do roha ni angka donganta borua huida, saonari adong hak na sumurung tu nasida.” Saleleng martaontaon, godang angka donganta na ditogihon mandaftar tu singkola i, jala mandapot pangajarion sian Jahowa. Saonari, hita pe mandapot pangajarion di parpunguan parsitongaan ni minggu.​—Jaha Jesaya 54:13.

18, 19. (a) Songon dia do hita mandapot pangajarion laho marbarita saonari? (b) Boasa hita marende di parpunguan? (Ida kotak ”Mangendehon Hasintongan”.)

¹⁸ Parpunguan tu Parbarita. Sian taon 1919, dipatupa do parpunguan laho mangatur ulaon marbarita na uli. Tingki i ndang sude huria ro tu parpunguan on, holan na dohot mambagihon lektur do na ro. Saleleng taon 1923, Parpunguan tu Parbarita diulahon sahali sabulan jala sude do ro na di huria. Taon 1928, dijujui do angka huria asa mambahen Parpunguan tu Parbarita ganup minggu. Taon 1935 marhite The Watchtower, dijujui do sude huria asa mangihuthon tudutudu naung pinatupa di Director (di pudian ni ari didok Informant, dung i gabe Panghobasion Harajaonta). Jala parpunguan on, gabe tording ni parpunguan na diulahon di ganup huria.

¹⁹ Saonari nunga tadapot pangajarion na denggan laho marbarita na uli di parpunguan parsitongaan ni minggu. (Mat. 10:5-13) Molo nunga dilehon tu hamu lembar Na Laho Diparsiajari, diparade jala diulahon hamu do angka saran i tingki marbarita na uli?

Parpunguan na Rumingkot Sahali Sataon

20-22. (a) Boasa taulahon parningotan ari hamamate ni Jesus? (b) Aha do labana di hamu ala ro tu Borngin Parningotan?

²⁰ Disuru Jesus do angka siihuthon ibana laho pabadiahon ari hamamatena. Songon ari Paska, ari hamamate ni Jesus diulahon sahali sataon. (1 Kor. 11:23-26) Marjuta halak ro tu parpunguan i. On ma tingkina punguan na miniahan ni tondi parbadia mangarimangi hak na sumurung na laho jaloon ni nasida rap dohot Jesus di Harajaon ni Debata. (Rom 8:17) Jala tu birubiru na asing, on ma tingkina patuduhon roha na marsihohot dohot unduk ni roha tu Raja ni Harajaon ni Debata.​—Joh. 10:16.

²¹ Ujungna, diantusi si Russell dohot angka donganta na asing ma ringkot ni mangulahon Borngin Parningotan ni Tuan, jala diantusi nasida ma molo ulaon i holan diulahon sahali sataon. Watch Tower April 1880 mandok, ”Godang do sian hami na adong di Pittsburgh nunga somal . . . mangulahon Paska [Parningotan], dung i hupangan hami do roti jala huinum hami anggur.” Dungkon i, diulahon ma angka kebaktian dohot Borngin Parningotan di tingki na sarupa. Taon 1889 ma parjolo sahali ulaon sisongon i dibahen. Di tingki i, adong 225 halak na ro jala adong 22 halak na tardidi.

²² Saonari, ndang rap diulahon be ari Parningotan dohot kebaktian. Alai di Bale Harajaon dohot di inganan na asing ma i diulahon. Tagokkon do sude halak di luatta asa ro tu ulaon i. Taon 2013, lobi sian 19 juta halak ro tu parningotan ari hamamate ni Jesus. Hak na sumurung do di hita parsidohot jala manogihon na asing asa ro tu ulaon na badia on! Hiras do rohamu manggokkon torop halak asa ro tu Borngin Parningotan na diulahon ganup taon?

Na Pinatudu ni Parniulaonta

23. Songon dia do pangkilalaanmu tu angka parpunguanta?

²³ Ndang borat dihilala naposo ni Debata mangulahon parenta laho marpungu. (Heb. 10:24, 25; 1 Joh. 5:3) Umpamana, las do roha ni Raja Daud ro tu bagas joro laho manomba Jahowa. (Ps. 27:4) Tarlumobi ala boi ibana manomba Debata rap dohot angka halak na mangkaholongi Jahowa. (Ps. 35:18) Jala taingot ma muse Jesus. Nang pe poso ibana, las do rohana ro tu bagas joro ni Debata.​—Luk. 2:41-49.

24. Aha do na boi tapatudu tingki ro hita tu parpunguan?

²⁴ Molo ro hita tu parpunguan manang tu kebaktian, on patuduhon na holong do rohanta tu Jahowa, lomo rohanta patoguhon na asing, jala lomo do rohanta diajari asa boi gabe rayat ni Harajaon ni Debata. Asing ni i, di parpunguan do hita diajari asa lam denggan marbarita dohot mangurupi halak asa gabe siihuthon ni Rajanta, Jesus Kristus. (Jaha Mateus 28:19, 20.) Molo ringkot do parpunguan di hita, on patuduhon porsea do hita na tutu do adong Harajaon ni Debata. Alani i, anggiat ma sai taargai ganup parpunguan!