SIULASON NI MAJALAH ON
Ise do Sitindangi Ni Jahowa?
”Nunga leleng hutanda si Mike. Sitindangi Ni Jahowa do ibana. Alai ndang dapot rohangku huriana i. Ise do Jahowa? Boasa ndang parsidohot nasida tu angka ari raya? Agama sipelebegu do i?”—Becky, Kalifornia, Amerika Serikat.
”Tingki marsiajar Bibel hombar ni jabungku dohot Sitindangi Ni Jahowa, sungkunsungkun do rohangku, boasa nasida digoari Sitindangi Ni Jahowa? Asing do huhilala goar i!”—Zenon, Ontario, Kanada.
”Ninna rohangku dohot tunggani borungku, Sitindangi Ni Jahowa mangalului halak na so maragama asa gabe ruas ni nasida. Alai ndang dapot rohanami angka ajaran ni agama, dos do sude di hami.”—Kent, Washington, Amerika Serikat.
”Sasintongna, ndang tangkas huboto ise nasida jala aha na dihaporai.”—Cecilie, Esbjerg, Denmark.
Jotjot do ra hamu mangida nasida marbarita sian jabu tu jabu, di inganan na ribur manang mambagihon buku, jala manogihon hamu marsiajar Bibel. Hea do ra dapotmu majalah sian nasida. Alai, olo do sungkunsungkun rohamuna ise do sasintongna Sitindangi Ni Jahowa. Dos do ra pandapotmuna dohot angka halak naung dipaboa nangkin.
Molo adong sungkunsungkunmu taringot Sitindangi Ni Jahowa, sian dia do dapotmuna alusna? Sian dia do botoonmu aha na dihaporseai nasida? Sian dia do hepeng ni nasida laho marbarita dohot pajongjongkon inganan parpunguan? Boasa nasida ro marbarita tu jabumu nang di inganan na ribur?
Si Cecilie mandok, ”Godang do hatorangan na hujaha taringot Sitindangi Ni Jahowa di internet. Jotjot do hubege Sitindangi Ni Jahowa direhei. Alani i, ndang lomo rohangku mangkatai dohot nasida.” Alai, dung mangkatai si Cecilie dohot Sitindangi Ni Jahowa, dapot ma alus ni sungkunsungkunna jala las ma rohana.
Lomo do rohamuna mamboto hatorangan taringot Sitindangi Ni Jahowa? Hami manogihon hamu asa mangalului hatorangan sian Sitindangi Ni Jahowa—na pabinsarhon majalah on. (Poda 14:15) Las rohanami, mangurupi hamu mangantusi ise hami, aha na dihaporseai hami, jala songon dia ulaon parbaritaonnami na dipatorang marhite majalah on.