SIULASON NI MAJALAH ON | ISE DO SITINDANGI NI JAHOWA?
Halak na Songon dia do Sitindangi Ni Jahowa?
Organisasi internasional do Sitindangi Ni Jahowa jala ndang parsidohot tu agama na asing. Nang pe kantor pusatna di Amerika Serikat, alai godang do nasida maringanan di negara na asing. Adong ualu juta halak di lobi sian 230 negara, mangajarhon Bibel tu na asing. Hami mangulahon aha na didok Jesus, ”Laos baritahononhon do barita na uli on na taringot tu Harajaon i di liat portibi on, laho mangkatindangkonsa tu saluhutna bangso.”—Mateus 24:14.
Didia pe hami maringanan, huoloi hami do aturan ni pamarenta alai ndang parsidohot tu politik. Alana Jesus mandok, ”Ndang sian portibi on” halak Kristen. Alani i ma, ndang marpolitik jala ndang parsidohot hami marporang. (Johannes 15:19; 17:16) Tingki masa Porang Dunia II, godang do Sitindangi Ni Jahowa dihurung, dipusa, ala ndang olo nasida parsidohot tusi. Sahalak uskup di Jerman manurat, ”Saleleng Rezim Nazi, tangkas do didok Sitindangi Ni Jahowa ndang olo nasida parsidohot tu dinas militer ala maralo tu panggora ni roha nasida.”
”Marparange na denggan do Sitindangi Ni Jahowa hombar tu aturan ni Debata. Halak sisongon on dihaporluhon do di politik—alai ndang olo nasida parsidohot tusi . . . . Diargai nasida do angka pamarenta, alai porsea do nasida holan Harajaon ni Debata do na boi pasohothon hasusaan ni jolma.”—Koran Nová Svoboda, Republik Ceko.
Ndang olo hami papulikhon diri. Diihuthon hami do tangiang ni Jesus taringot siseanna, ”Ndang apala hupangido, taitonmu nasida sian portibi on; alai naeng ma ramotanmu nasida maralohon na jahat i.” (Johannes 17:15) Alani i, ndang marimbar hami sian na asing. Karejo do hami, maronan jala laho tu singkola.