Sala do Marhabot ni Roha?

Hea do hamu marsahit? Olo do ra lupa hamu tu sahit i, ala nunga malum hamu. Alai, marhabot ni roha ndang sarupa songon na marsahit. Di buku Healing a Spouse’s Grieving Heart, Dr. Alan Wolfelt manurat, ”Ndang adong na boi mambahen malum habot ni roha.” Didok ibana muse, ”Alai lam leleng jala marhite pangurupion ni angka dongan, boi do ndang songon na parjolo i be lungun ni rohamuna.”

Umpamana, taparrohahon ma songon dia si Abraham marhabot ni roha tingki mate tungganeboruna. Bibel mandok, ”Jadi ro ma si Abraham mangandungi si Sarah, jala ditatangisi.” Hata ”ro ma”, patuduhon leleng do ibana marhabot ni roha.a Na asing muse songon si Jakkob, na digabusi naung mate anakna si Josep dibunu binatang. ”Leleng do” marhabot ni roha ibana jala ndang tolap angka keluargana mangapuli rohana. Pigapiga taon dungkon i, sai borat dope dipingkiri ibana hamamate ni si Josep i.​—1 Musa 23:2; 37:34, 35, Bibel siganup ari; 42:36; 45:28.

Saonari, masa do pangkilalaan na sarupa tingki mate halak na dihaholongi. Parrohahon ma dua pengalaman.

• ”Tanggal 9 Juli 2008, mate ma tungganedolingku, si Robert. Ndang adong na imbar huhilala sian ariari na asing di tingki ibana marlanggar. Dung sae hami sarapan, hupaborhat do ibana laho karejo, masihaolan jala hudok do ’holong do rohangku tu ho’. Nang pe naung onom taon dung mate ibana, sai lungun dope rohangku. Mansai maol do huhalupahon si Rob.”​—Gail, 60 taon.

• ”Nang pe naung 18 taon mate tungganeborungku, sai masihol jala lungun do rohangku. Tingki huida pemandangan na mansai uli, huingot ma ibana jala lungun do rohangku ala ndang boi be diida ibana songon na huida i.”​—Etienne, 84 taon.

Tangkas ma, somal do molo sasahalak marhabot ni roha jala marragam do cara laho patuduhon i. Alani i, unang ma tauhumi cara ni sasahalak patuduhon lungun ni rohana tingki marhabot ni roha. Unang ma sai taburai dirinta molo mansai lungun rohanta. Alai, songon dia do hita boi mangadopi habot ni roha?