Marsiajar mangargai borua dohot diri sandiri

NGOLUNGKU UJU I:

Ahu tubu di Mulhouse, di timur laut ni Prancis, huta na tarbarita gok hajahaton. Sursar do angka keluarga di ingananku tingki ahu dakdanak. Di keluargangku, ndang diargai borua jala ndang jotjot nasida mangkatai tu baoa. Diajari do ahu molo borua i holan karejo di dapur, mangurus tungganedolina dohot ianakhonna.

Susa do parngoluonku tingki dakdanak. Tingki marumur sampulu taon, mate ma bapakku ala holan na mabuk. Lima taon dungkon i, mate maningkot ma abangku. Di taon i, huida ma masibunuan keluargangku ala marbadai, gabe trauma ahu. Diajari do ahu mamangke piso dohot senjata laho marbadai. Dung i, hubahen ma tato jala jotjot ma ahu mabuk.

Dung marumur 16 taon, huinum do 10 sahat tu 15 botol bir sadari jala marnarkoba. Asa boi huulahon on, marbotot ma ahu jala manangko. Tingki marumur 17 taon, nunga masuk penjara ahu. Jala, 18 hali ahu ditudu manangko dohot marbadai.

Tingki marumur 20 taon, lam sursar ma parngoluonku. Huisap do 20 batang mariyuana di bagasan sadari. Dung i, hupangke do heroin dohot angka ubat na diorai. Jotjot do ahu naeng mate alani overdosis. Di sada tingki, manggadis narkoba ma karejongku. Alani i, jotjot ma sai huboan piso dohot senjata. Hea do hutembak sahalak baoa, alai tuani ma muntul peluru i tu ulu ni ikat pinggangna! Tingki marumur 24 taon, mate ma omakku, gabe lam mura ma ahu muruk. Molo adong halak mardalan, pintor mandao do nasida molo diida ahu. Ala sai marbadai, jotjotan do ahu di kantor polisi manang marubat di rumah sakit.

Dung marumur 28 taon, mangoli ma ahu alai, ndang huargai tungganeborungku. Marlea do ibana hubahen jala hupastapi. Ndang hea hami rap mangulahon manang aha pe songon na marripe. Huhilala sae do holan perhiasan na hutangko hulehon tu ibana. Alai, ndang sadia leleng, marsiajar Bibel ma tungganeborungku dohot Sitindangi Ni Jahowa. Holan sahali marsiajar dope, ndang marisap be ibana, ndang olo be manjalo hepeng na hutangko jala dipaulak perhiasan na hulehon. Muruk situtu ma ahu. Huorai ma ibana asa unang marsiajar Bibel jala jotjot huombushon timus ni sigarethu tu bohina. Hupaila do ibana di jolo ni angka hombar jabungku.

Di sada tingki, ala nunga mabuk, tartutung ma hubahen apartemennami. Tungganeborungku mangurupi ahu dohot borungku, na marumur lima taon, asa unang tartutung. Dung na masa i, huboto ma nunga marsala situtu ahu jala ndang tarsesa ni Debata be dosangku. Huingot do hata ni sahalak pandita na mandok, molo parjahat bahenonna tu api na roko. Sahalak psikiater mandok tu ahu, ”Nunga pagodanghu salam! Ndang na tarsesa be dosam.”

SONGON DIA BIBEL PAUBAHON NGOLUNGKU:

Dung na tartutung i, pinda ma hami tu jabu ni simatuangku. Tingki ro Sitindangi manjumpangi tungganeborungku, husungkun ma nasida, ”Boi dope sesaon ni Debata dosangku?” Dipatudu nasida ma 1 Korint 6:9-11 sian Bibel. Ayat on patuduhon taringot ulaon na dihasogohon Debata. Jala didok di ayat i, ”Angka sisongon i do hamu deba najolo.” Dung hujaha ayat on, pos ma rohangku, na boi dope ahu muba. Dijaha ma 1 Johannes 4:8, na patuduhon dihaholongi Jahowa do ahu. Hupangido ma tu nasida asa marsiajar Bibel dua hali saminggu. Ro ma ahu tu parpunguan jala tongtong ma ahu martangiang tu Jahowa.

Dung sabulan, ndang marnarkoba jala ndang mabuk be ahu. Alai, hansit ma dagingku! Sai marnipinipi ganup borngin, hansit ulungku, olo do manghutur dagingku jala mangae angka na asing. Huhilala ma Jahowa mangurupi jala mangalehon gogo tu ahu. Huhilala ma hata na disurat si Paulus, na mandok, ”Saluhutna do tarpatupa ahu marhitehite Ibana, na margogoihon ahu!” (Pilippi 4:13) Ujungna, boi ma ahu ndang marisap be.​—2 Korint 7:1.

Bibel mangurupi ahu mangarajai diringku jala mambahen lam denggan parngoluon ni keluargangku. Lam denggan jala huargai ma tungganeborungku. Umpamana, sian pangkataion hudok do hata ”tolong” dohot ”mauliate”. Dung sataon ahu marsiajar Bibel, hulehon ma diringku tu Jahowa jala tardidi, songon naung diulahon tungganeborungku.

LABA NA HUDAPOT:

Prinsip ni Bibel mambahen lam denggan parngoluonku. Angka keluargangku na so Sitindangi marpingkir, olo do ra ahu mate ala mamangke narkoba manang dibunu halak ala marbadai.

Dung huparsiajari Bibel, boi ma hupatudu tanggung jawab ni sahalak tungganedoli dohot ama di keluargangku. (Epesus 5:25; 6:4) Rap mulaulaon do hami. Saonari, ndang holan di dapur karejo ni tungganeborungku. Las rohangku mangurupi ibana gabe pelayan sepenuh waktu. Jala las do rohana mangurupi ahu asa boi denggan mangaradoti ulaon ni sintua di huria. Holong ni Jahowa dohot asi ni rohaNa, mambahen lam denggan parngoluonku. Marhiras ni roha do ahu paboahon angka parangeNa tu halak na hea mangkilala songon ahu. Huboto do molo Bibel boi mangurupi manang ise pe asa lam denggan jala marpangkirimon. Bibel ndang holan mangajarhon asa huhaholongi manang huargai baoa dohot borua, alai diurupi do ahu asa mangargai diringku sandiri.