Tikki Debata mamaretta, marsada jala dame do sude toppaanna

Boasa Porlu di Hita Harajaon ni Debata?

Sian mulana ditoppa jolma, holan sada do na Mamaretta. Na Mamaretta i goarna, Jahowa. Jala ibana ma na Manompa hita. Dipatudu Jahowa do holongna tikki mamaretta. Ditoppa Jahowa do porlak Eden, inganan na massai uli tu jolma. Jala godang do diparade sipanganon tu nasida. Dang holan i, dilehon do tu nasida karejo na mambahen las roha. (1 Musa 1:28, 29; 2:8, 15) Dame do dihilala jolma molo torus nasida unduk tu pamarettaon ni Debata.

Si Adam maniop parbue ni hau na dilehon si Hawa. — Jolma na parjolo mangalo pamarettaon ni Debata

Bibel paboahon, suru-suruan na jahat na digoari Sibolis, mangalo hak ni Jahowa lao mamaretta. Didok ibana, undenggan do ngolu ni jolma molo dang mangihutton paretta ni Debata. Diihutton si Adam dohot si Hawa do Sibolis jala mangalo do nasida tu Debata.—1 Musa 3:1-6; Pangungkapon 12:9.

Ala mangalo si Adam dohot si Hawa tu Debata, dipalao ma nasida sian porlak Eden. Mardosa ma nasida, jala dang boi be nasida mangolu salelengna. (1 Musa 3:17-19) Gabe dohot do susa pinoppar ni nasida alani keputusan ni nasida. Didok Bibel, alani si Adam, gabe “masuk do dosa i tu portibi on . . . jala dosa i parohon hamatean”. (Rom 5:12) Gabe ro ma muse masalah na asing, i ma “jolma mangarajai donganna jolma mambahen ibana marhinamago”. (Parjamita 8:9) Lapatanna, molo jolma do na mamaretta, sai adong do masalah.

SEJARAH PAMARETTAON NI JOLMA

Si Nimrod patuduhon ginjang ni roha. Di pudina akka halak karejo lao pajongjokkon menara. — Si Nimrod mangalo Jahowa

Di Bibel dipaboa do, jolma na parjolo sahali mamaretta di portibi on, i ma si Nimrod. Mangalo do ibana tu pamarettaon ni Jahowa. Mulai sian si Nimrod, dang denggan cara ni jolma mamaretta. Hira-hira 3.000 taon naung salpu, didok Raja Salomo do, “Huida ma iluilu ni halak angka na hona pangarupaon hape ndang adong na mangapuli nasida; jala uhum gogo dibahen tangan ni angka pangarupa tu nasida.”—Parjamita 4:1.

Tong do songon i sahat tu saonari. Di taon 2009, sada artikel sian Perserikatan Bangsa-Bangsa mandok pamarettaon na so denggan do na “mambahen godang hasusaan di portibi on”.

TIKKINA DEBATA MAMARETTA

Porlu hian do di portibi on adong sada raja na dumenggan dohot pamarettaon na dumenggan. Jala nungnga dijanjihon Debata i!

Akka gambar: Na masa molo jolma na mamaretta. 1. Halak Asia hundul mangompa gellengna na tangis di inganan na kotor. 2. Sahalak opung na marsahit. 3. Akka tentara na maniop sinjata di parporangan. 4. Akka halak na mardemo jala maniop spanduk. 5. Sahalak ina dohot boruna mangida kaca ni pintu jabuna naung puttar. 6. Sada kota na hona polusi udara, godang cerobong asap, dohot akka kabel listrik. — Dang adong nanggo sada pe pamarettaon ni jolma na boi pasaehon sude hasusaan di portibi on

Nungnga dipajongjong Debata sada Harajaon na lao manggattihon sude pamarettaon ni jolma, jala “hot do anggo na sasada i ro di saleleng ni lelengna”. (Daniel 2:44) On ma Harajaon na jotjot ditangiakkon marjuta halak. (Mateus 6:9, 10) Alai dang sahalak ni Debata na mamaretta di Harajaon i. Dipillit Ibana do sada Raja na hea gabe jolma. Ise ma i?