Diboto Hamu Do?

Songon dia do sada ukiran najolo patuduhon na tutu do isi ni Bibel?

DI BIBLE Lands Museum na di Jerusalem, adong do batu na diukir hira-hira taon 700-600 SM. Batu i dibuat sian gua na dipakke gabe kuburan. Dang dao jarak ni gua i sian huta Hebron na adong di Israel. Diukir do di batu i, “Sai diburai Yahweh Sabaot ma si Hagaf anak ni si Hagav.” Ukiran on patuduhon godang do halak di tikki i na mamboto goar ni Jahowa, i ma YHWH songon na disurat di bahasa Heber. Jala dipakke nasida do goar i di parngoluan ni nasida siganup ari. Adong dope muse dapot sian gua i akka ukiran na asing, na patuduhon jotjot do gua i gabe inganan ni halak marpungu dohot martabuni. Adong do diukir disi goar pribadi ni nasida na digabungkon tu singkatan ni goar ni Jahowa.

Taringot akka ukiran on, didok Dr. Rachel Nabulsi na sian University of Georgia do songon on, “Jotjot do diukir goar YHWH najolo. On patuduhon . . . penting do goar YHWH di parngoluan ni halak Israel dohot halak Juda najolo.” Jadi masuk akkal do molo sappe marribu hali goar ni Debata, i ma YHWH di bahasa Heber, disurat di Bibel. Jala goar pribadi ni jolma pe di tikki i, jotjot do digabungkon tu goar ni Jahowa.

Hata “Yahweh Sabaot” na adong di ukiran i lapatanna “Jahowa Pamimpin ni Akka Tentara”. On patuduhon dang holan goar ni Debata na diboto akka halak di tikki i. Alai diboto nasida do tong istilah “Jahowa Pamimpin ni Akka Tentara”. On ma buktina masuk akkal do molo sappe 283 hali disurat istilah “Jahowa Pamimpin ni Akka Tentara” di Akka Bukku Heber, na godangan disurat si Jesaya, si Jeremia, dohot si Sakaria.