Halak Kristen do Saksi Jahowa?

I do. Halak Kristen do hami, alana:

• Marsitutu do hami mangihutton ajaran dohot parange ni Jesus Kristus.—1 Petrus 2:21.

• Dihaporseai hami do holan marhite Jesus dapot haluaon, jala “ndang adong haluaon di bagasan manang ise na asing; ai ndang adong goar na asing ditoru ni langit dilehon tu jolma, parhiteanta tu haluaon.”—Ulaon ni Apostel 4:12.

• Tikki sasahalak tardidi gabe Saksi Jahowa, di bagasan goar ni Jesus do nasida tardidi.—Mateus 28:18, 19.

• Dipasahat hami do tangiangnami marhite goar ni Jesus.—Johannes 15:16.

• Dihaporseai hami do molo Jesus na Manguluhon huria, jala ibana do na marhak lao manguluhon sude halak.—1 Korint 11:3.

Alai, marimbar do hami sian agama na asing na digoari Kristen. Umpamana, dihaporseai hami do ajaran ni Bibel molo Jesus anak ni Debata, dang Debata Sitolusada. (Markus 12:29) Dang dihaporseai hami molo tondi ni halak naung mate toktong mangolu. Jala, dang adong dipaboa di Bibel molo Debata pasiaksiakkon jolma di api na roko. Asing ni i, dang dihaporseai hami molo na manguluhon ulaon ni agama ikkon halak na martitel, na mambahen ibana tumimbo sian na asing.—Parjamita 9:5; Hesekiel 18:4; Mateus 23:8-10.