Zɔbu

17 “Min akunndan’n w’a sanngan, min cɛn’m b’a wie.

Asieliɛ’n yɛ ɔ su minndɛ min-ɔn.+

 2 Sran finfin yofuɛ’m be bo sin yia min,+

yɛ ɔ fata kɛ n fa min ɲin n sie i* be ɲin kekle ayeliɛ’n su.

 3 Yaci, sɔ min aowa’n nun, yɛ fa sie ɔ sa su kpa.

?Sɛ nán wɔ’n, wan yɛ ɔ́ súnman min nun m’ɔ́ kplí min ti-ɔ?+

 4 Afin a fali ngwlɛlɛ’n fiali be wun.*+

I sɔ’n ti yɛ a yiman be ayɛ-ɔ.

 5 I waan ɔ́ cɛ́ i janvuɛ’m be like,

kusu nn i mma’m be ɲinma’n wunman ase kpa kun.

 6 Ɔ yoli maan nvlenvle’m be nunfuɛ’m be yoli min finfin,*+

ɔ maan n kacili sran mɔ be ti be nuan nzue tɛ i ɲrun’n nun-ɔn.+

 7 Klunngbɔ ti’n, min ɲinma’n su si,+

yɛ min wunnɛn’n i likalika’m be kwlaa be o lɛ kɛ fɔnvɔ’n sa.

 8 Kɛ sran ndɛnmanfuɛ’m be wun i sɔ liɛ’n, be nuan bo be wun,

yɛ sran nga i ndɛ nunman Ɲanmiɛn i ndɛ nun’n* ti’n, sran nga w’a yoman sa’n i akunndan’n sanngan.

 9 Sran kpa’n kacimɛn i atin ng’ɔ nanti su’n,+

yɛ sran nga w’a yoman sa tɛ’n, ɔ ɲan wunmiɛn titi.+

10 Sanngɛ amun kwlakwla, amun bla be wa yiyi amun ndɛ’n nun ekun,

afin m’an wunman kɛ amun nun kun sa si ngwlɛlɛ.+

11 Min cɛn’m b’a wie.+

Like nga n sunnzunnin’n, mɔ min awlɛn o su’n, w’a kpi ase.+

12 Be bu kɔnguɛ’n i titi kɛ wia’n nun’n sa,

be se kɛ: ‘Lika’n su wa kpaja, afin ɔ lu.’

13 Sɛ n minndɛ’n, Ndia’n* káci min sua.+

Ń trɛ́ min bɛ’n nun aosin’n nun.+

14 Ń sé kunman’n*+ kɛ: ‘A ti min si!’

Ń flɛ́ kakaa mma’n kɛ: ‘Min nin nin min niaan bla.’

15 ?Ngue su yɛ ń fá min wla’n gúa-ɔ?+

?Wan yɛ ɔ kwla wun kɛ ń ɲán min ti-ɔ?

16 Kɛ e kwlaa e ko jra ndutre’n nun’n,

ɔ́* jrá kan Ndia’n* i anuan’m be o lɔ’n.”+