?É yó sɛ naan e sa sin w’a bubuman e ndɛndɛ?

?KƐ A yo like kun m’ɔ yoman ye’n, wafa sɛ yɛ ɔ wun yo wɔ-ɔ? ?Ɔ sa sin bubu wɔ tratra su annzɛ a se ɔ wun kɛ ɔ́ yó ye cɛn kun? Fluwa sifuɛ wie’m be waan wafa nga sran kun tɛ kosan sɔ’n su’n, ɔ yo maan be wun i wlɛ sɛ i sa sin bubu i ndɛndɛ annzɛ ɔ bubumɛn i ndɛndɛ-o. Sa kekleekle’m be tɔ e ngba e su. Sanngɛ sa tɔ sran wie’m be su tra sran wie mun. Sran wie’m be liɛ’n kɛ sa tɔ be su’n be sa sin bubuman be ndɛndɛ yɛ sɛ like wie yɛ be waan bé yó’n, be ɲan wunmiɛn be yo. Sanngɛ wie’m be liɛ’n kɛ sa tɔ be su’n, kannzɛ sa sɔ’n timan kekle dan sɔ liɛ’n, sanngɛ be wla bo be wun tratra su yɛ like fi yolɛ yoman be fɛ. ?Ngue ti yɛ ɔ ti sɔ-ɔ?

Maan e se kɛ a su kunndɛ junman. Kpɛkun susute kun su kpɛn se wɔ kɛ a bla naan ɔ nin wɔ kókó yalɛ. Kɛ amun wie yalɛ i koko’n, ɔ se wɔ kɛ ɔ su manman wɔ junman’n. ?Wafa sɛ yɛ ɔ wun yó wɔ-ɔ? ?Ɔ wla bó ɔ wun dan ti á sé kɛ sran fi mianman ɔ wun naan a su ɲanman junman le? ?Annzɛ kusu junman mɔ w’a ɲɛnmɛn i’n ti’n, á sé kɛ like kwlaa nga a yo’n ɔ yoman ye le? Kpɛkun á sé ɔ wun kɛ: ‘Min liɛ bɔbɔ’n n kwlá yoman like kpa kun sa le. Be kwlá faman min yoman like fi.’ Sran ng’ɔ bu i sɔ akunndan’n, ɔ ti sran kun mɔ kɛ sa tɔ i su’n i sa sin bubu i ndɛndɛ-ɔ.

?É yó sɛ naan e sa sin w’a bubuman e ndɛndɛ?

Like klikli ng’ɔ fata kɛ a yo m’ɔ ti cinnjin kpa’n yɛle kɛ mian ɔ ɲin naan wun akunndan nga be kwla bubu ɔ sa sin’n be wlɛ. I nɲɔn su’n kpalo be. Yɛle kɛ bu sa ng’ɔ juli’n i su akunndan uflɛ. I wie yɛle kɛ a kwla usa ɔ wun kɛ: ?Sakpasakpa naan sran fi mianman min wun ti yɛ junman su kpɛn’n w’a faman min-ɔn? ?Nán kɛ mɔ junman nga n si i di’n i wie nunman lɔ ti yɛ w’a faman min-ɔn?

Kpɛkun fa ɔ ɲin sie i sa uflɛ wie’m be su. I sɔ’n yó maan á wún i wlɛ kɛ a blɔli ndɛ’n i dan. I lɛ nun’n a kwla usa ɔ wun kɛ: ?Kɛ mɔ b’a faman min junman nun’n ti’n, i sɔ’n kle kɛ n kwlá yoman like kpa kun sa sakpa? ?M’an yoman ninnge wie mɔ be yoli ye min sa nun-ɔn? Ɔ kwla yo Ɲanmiɛn sulɛ nun, annzɛ a nin ɔ osufuɛ mun nin ɔ janvuɛ’m be nantilɛ nun. Ɔ fata kɛ a wun i wlɛ kɛ sa nga a se ɔ wun kɛ bé wá jú’n, wie liɛ’n ɔ ti ndɛ blɔlɛ ngbɛn. ?Afin ngue yɛ ɔ kle kɛ a su ɲanman junman le-ɔ? Maan e kan ninnge uflɛ wie mɔ be kwla uka e naan y’a kpalo akunndan nga be kwla bubu e sa sin be ndɛ.

Maan e fa ninnge wie mun e sie e ɲrun kɛ é yó be

Koko nun wa’n fluwa sifuɛ wie’m be yiyili e wla mɔ e fa guɛ i like su’n i nun. Be waan á wún kɛ sran kun fɛ́ i wla guɛ́ i like kun su’n, nn ɔ lafi su kɛ ɔ kwla yo maan like sɔ’n kpɛ́n su ti-ɔ. Sanngɛ ndɛ nga be kannin’n yiyiman e wla mɔ e fa guɛ i like su’n i nun kpa sa. Ndɛ nga i sin liɛ’n nun’n, é wá wún i wlɛ kɛ nán ngalɛ’n ngunmin ti yɛ sran kun fɛ i wla guɛ i like su-ɔ. Sanngɛ ndɛ nga be kɛnnin i lɛ’n ɔ timan ato. Afin kɛ sran kun fɛ i ɲin sie i ninnge ng’ɔ sunnzun kɛ ɔ́ yó be’n be su’n, i sɔ’n ukɛ i naan w’a bu akunndan kpa.

Sɛ sran kun kunndɛ kɛ ɔ́ wún i wlɛ kɛ ɔ kwla yo like’n, ɔ fata kɛ ɔ fɛ i ɲin sie i like kun su kɛ ɔ́ yó yɛ ɔ miɛn i ɲin yo like sɔ’n. Sɛ a sie i nzɔliɛ kɛ a ti sran kun mɔ kɛ ɔ sunnzun kɛ ɔ́ yó like kun’n, ɔ kwlá guɛmɛn i bo’n, bu like nga ɔ waan á yó’n i akunndan kpa. ?W’a fa ninnge wie mun w’a sie ɔ ɲrun kɛ á yó be? Ɔ ju wie’n kɛ mɔ e ɲin blo ninnge wie’m be yolɛ nun’n ti’n, e faman blɛ e buman ninnge nga be ti cinnjin’n be akunndan. Sanngɛ Biblu’n wla e fanngan kɛ ‘e wun ninnge nga be ti cinnjin kpa’n be wlɛ.”—Filipufuɛ Mun 1:10.

Kɛ a ko wun ninnge nga be ti cinnjin’n be wlɛ’n, a kwla fa ninnge wie mun sie ɔ ɲrun kɛ á yó be. Ɔ kwla yo Ɲanmiɛn sulɛ nun, annzɛ awlobo tranlɛ nun annzɛ junman dilɛ’n nun. Sanngɛ i bo bolɛ nun’n, nán sunnzun kɛ á yó ninnge kpanngban. Kpɛkun like nga a nian siin a kwla yo’n, yo i lifuɛ’n. Afin sɛ like nga ɔ waan á yó’n i yolɛ ti kekle dan’n, ɔ cɛman naan ɔ sa sin w’a bubu wɔ. I sɔ’n ti’n, sɛ a sunnzunnin kɛ á yó like kun naan like sɔ’n i yolɛ’n fá blɛ’n, fa ɔ ɲin sie i nga a kwla yo i dɔ nga su’n i su.

Be kan be ndɛ kun kɛ: “Sɛ sran kun fua kpa kɛ ɔ́ yó like kun’n, ɔ kwla yo.” Ndɛ sɔ’n kle kɛ sɛ e sunnzun kɛ é yó like kun’n, ɔ fata kɛ e fua kpa. Sanngɛ sɛ e kunndɛman kɛ e sa sin bubu e’n, maan e bu like nga e waan é yó’n i cinnjin m’ɔ ti’n ɔ nin i su ye nga é ɲɛ́n i’n be akunndan. I yo, like sɔ’n i yolɛ nun’n sa wie’m be kwla tanndan e ɲrun. Sanngɛ nán sa sɔ’m be ti’n e sa sin bubu e. Maan e tra e awlɛn e yo. I liɛ’n e sa tɔ́ like sɔ’n i yolɛ’n nun.

Maan e bu ninnge trele ng’ɔ fata kɛ e yo naan y’a yia like nga e waan é yó’n i nuan’n be akunndan. Be flɛ fluwa klefuɛ kun kɛ Sinaidɛɛ. Ɔ boli i ɲin ase suannin like nga ti yɛ kɛ sran kun fɛ i wla guɛ i like kun su’n i sɔ’n ti kpa’n, i su like. Ɔ seli kɛ sɛ sran kun kunndɛ kɛ ɔ́ yó like kun’n, maan ɔ bu ajalɛ fanunfanun ng’ɔ kwla fa be naan w’a yia like sɔ’n i nuan’n i akunndan sie. I liɛ’n sɛ ɔ fa ajalɛ kun naan i bo w’a guaman kpa’n, ɔ kwla fa ajalɛ uflɛ.

Bian sɔ’n seli ekun kɛ sɛ e su yo like kun naan e nian siin e su kwlá guɛmɛn i bo’n, maan e yo like uflɛ. Afin sɛ e waan saan fii é yó like sɔ’n, é sá sin búbú e. Sanngɛ sɛ e fa e ɲin e sie i like uflɛ mɔ e kwla yo’n i su’n, é fá e wla é guɛ́ i like kun su. Ɔ maan e sa sin su bubuman e.

Biblu’n kan sran kun mɔ i su ndɛ’n uka e naan y’a wun ndɛ sɔ’n i wlɛ kpa’n i ndɛ. Sran sɔ’n yɛle Famiɛn Davidi. Ɔ sunnzunnin kɛ ɔ́ kplán sua kun mán Zoova. Sanngɛ Ɲanmiɛn seli i kɛ nɛ́n i yɛ ɔ́ kplán sua’n niɔn. I wa Salomɔn yɛ ɔ́ kplán-ɔn. Kɛ ɔ yoli sɔ’n Davidi w’a faman ya yɛ w’a seman kɛ ɔ́ kplán sua’n kekle nun. Sanngɛ ɔ fɛli i ɲin sieli i like uflɛ m’ɔ kwla yo’n i su. Yɛle kɛ ɔ kunndɛli sika nin ninnge nga bé fá kplán sua’n kaka kpa sieli. I liɛ’n kɛ i wa’n wá kplán sua’n i sa su mianman like wun.—1 Famiɛn Mun 8:17-19; 1 Be Nyoliɛ 29:3-7.

Kannzɛ bɔbɔ e mian e ɲin kpa naan e sa sin w’a bubuman e ndɛndɛ naan e sunnzun kɛ é yó ninnge wie mun’n, sanngɛ ɔ ju wie’n e sa sin kwla bubu e. ?Ngue ti-ɔ? Afin be diman ninnge nga be kwla yo maan e sa sin bubu e’n, be yalɛ mɛn nga nun. I wie yɛle yalɛ’n nin alɛ’n nin sran lufle bulɛ’n nin tukpacɛ’n nin wie’n. ?Ɔ nin i sɔ ngba’n, é yó sɛ naan e wla w’a boman e wun w’a tratraman su?

[Foto]

?Sɛ e kunndɛ kɛ é dí junman kun naan b’a fa manman e’n, i sɔ’n ti’n é sé e wun kɛ e su ɲanman junman kun le?

[Foto]

Kɛ Famiɛn Davidi w’a kwlá yoman like ng’ɔ sunnzunnin kɛ ɔ́ yó’n, ɔ fɛli i ɲin sieli i like uflɛ su.