MƐN’N W’A YO KEKLE

3 | A nin sran’m be tran klanman

?NGUE TI YƐ I SƆ’N TI CINNJIN-ƆN?

Kɛ mɔ mɛn’n nun sa’m b’a sɔn’n ti’n, sran’m be koko dan. I sɔ’n ti’n, be nin be wiengu’m be tranman klanman.

Sran’m be faman be wun be mantanman be janvuɛ mun.
Be nga b’a ja bla annzɛ bian’n be kan ndɛnngan cɛn kwlaa.
Siɛ nin niɛn’m be nianman be mma’m be lika kɛ ng’ɔ nin i fata’n sa.

Like ng’ɔ fata kɛ a wun i wlɛ’n

Blɛ kekle nun’n, ɔ janvuɛ’m be kwla uka wɔ kpa.
Kɛ lika’n yo kekle’n amun awlobo tranlɛ’n kusu kwla yo kekle wie.
Mɛn’n nun sa’m be su nganniɛn’m be kwla kle ba’m be yalɛ kpa.

Like nga a kwla yo’n

Biblu’n se kɛ: “Janvuɛ kpa’n, ɔ kle kɛ ɔ klo sran blɛ kwlaa nun, yɛ kɛ lika’n jran ɔ su’n, ɔ kaci ɔ niaan.”—Ɲanndra Mun 17:17.

Bu ɔ janvuɛ kun mɔ blɛ kekle nun’n, ɔ kwla suan ɔ bo yɛ ɔ kwla man ɔ afɔtuɛ kpakpa mun’n i akunndan. Afin kɛ e si kɛ e ndɛ lo sran kun’n, i sɔ’n kwla man e wunmiɛn naan y’a jran e su sa’m be ɲrun kekle.

LIKE NGA A KWLA YO’N—Afɔtuɛ wie mun

Blɛ kekle nun’n, yo ninnge nga mun naan a nin sran’m b’a tran klanman titi.

YO NAAN Ɔ AJA’N TAKA KPA

Yo naan ɔ aja’n taka kpa

Biblu’n se kɛ: “Sran nɲɔn flunman tra sran kunngba. [...] Afin sɛ be nun kun tɔ’n, kun’n kwla ukɛ i naan w’a jaso.” (Akunndanfuɛ’n 4:9, 10) Ɔ fata kɛ yasua kun nin i yi’n be bo yo kun titi. Ɔ fataman kɛ be tran kɛ sran kun nin i wla sa.

Amun fua kpa kɛ amun su faman amun su sa’n guɛmɛn i amun wiengu su. Amun tra amun awlɛn amun wiengu wun.
Lemɔcuɛ kwlaa nun’n, amun koko sa nga be kle amun yalɛ’n be su yalɛ. Sa ng’ɔ kle amun yalɛ’n yɛ ɔ fata kɛ amun siesie-ɔ. Nán amun kan ndɛ gua amun wiengu su.
Amun yo ninnge nga amun sran nɲɔn’n amun klo be’n.
Ɔ ju wie’n, amun bu ninnge kpakpa nga amun yoli be likawlɛ’n be akunndan. I wie yɛle kɛ amun kwla nian amun aja foto mun annzɛ blɛ uflɛ mɔ amun dili aklunjɔɛ’n i su foto mun.

Be flɛ bian kun kɛ Davidi. Ɔ seli kɛ: “Nán sa ngba nun yɛ yasua kun nin i yi be nuan sɛ́ be wun-ɔn. Sanngɛ i sɔ’n kleman kɛ be bo kwlá yoman kun. Be bo kwla yo kun be fa ajalɛ kpɛkun be mian be ɲin be yiɛ i nuan.”

NÁN KPƆCI Ɔ JANVUƐ MUN

Nán kpɔci ɔ janvuɛ mun

Sɛ ɔ janvuɛ’m be uka wɔ’n, ɔ kusu uka be wie. Sɛ a wla ɔ wiengu’m be fanngan’n, i sɔ’n wlá ɔ fanngan wie.
Cɛn kwlakwla’n, flɛ ɔ janvuɛ kun annzɛ nɲɔn naan usa be osu.
Sɛ sa wie o ɔ su’n, usa ɔ janvuɛ mun wafa nga kɛ sa sɔ’n tɔli be su’n be jrannin kekle’n.

Be flɛ bla kun kɛ Nikɔlu. Ɔ seli kɛ: “Kɛ sa kekle’m be tɔ e su’n, e janvuɛ’m be kwla uka e kpa. Be kwla man e afɔtuɛ kpakpa wie mun. Kannzɛ bɔbɔ ndɛ nga bé kán’n e si i laa’n, sanngɛ ɔ kwla yo e ye. E janvuɛ’m be nian e lika, yɛ e kusu e nian be lika wie.”

NIAN Ɔ MMA’M BE LIKA

Nian ɔ mma’m be lika

Biblu’n se kɛ: “Maan sran ngba klo kpa kɛ ɔ́ tíe ndɛ nga be kan kle i’n. Nán maan sran fi kpli kan ndɛ.” (Zaki 1:19) I bo bolɛ nun’n, kɛ ɔ ko yo naan ɔ mma’m b’a kan be klun ndɛ b’a kle wɔ’n, ɔ́ yó kekle mán be. Sanngɛ sɛ a tra ɔ awlɛn tie ndɛ nga be kan’n, bé kán be klun ndɛ klé wɔ.

Yo like kwlaa nga a kwla yo naan ɔ mma’m b’a kan be klun ndɛ b’a kle wɔ’n. Ba wie’m be liɛ’n, kɛ be nin amun yó ninnge wie mun’n yɛ be kwla kan be klun ndɛ-ɔ. I wie yɛle kɛ sɛ amun o loto nun annzɛ amun su nanti kɔ lika’n, be kwla kan be klun ndɛ tra kɛ kɛ be nin amun titi likawlɛ’n.
Fa ajalɛ wie mun naan ɔ mma’m b’a timan mɛn’n nun nganniɛn mun dan.
Kan ajalɛ nga a fali be naan w’a kwla sasa be’n, be ndɛ kle be.
Sɛ sa kekle wie fu amun nun’n, like nga amun kwla yo’n bu i akunndan sie. Kpɛkun a nin ba mun amun yi i nglo kan be nian.

Be flɛ bla kun kɛ Betanin. Ɔ seli kɛ: “Amun nin ba’m be koko yalɛ. Yɛ amun man be atin naan be kan be klun ndɛ. Kɔlɛ’n, like wie kun be srɛ, annzɛ sa wie ti’n be koko annzɛ ya o be klun sanngɛ be fia su. Sɛ sa kunngba’n wo amun su’n, amun kan kle be. Kpɛkun amun kan wafa nga amun jrɛn i ɲrun kekle’n i ndɛ kle be.”