Zedeɔn nin sran ya nsan

?AMUN wun like nga be su yo i lɛ’n i wlɛ? Sran nga’m be kwlaa be ti Izraɛli mɛn’n nun sonja. Zedeɔn m’ɔ ti jɔlɛ difuɛ’n, yɛle nga ɔ jin sonja nga be su nɔn nzue’n be wun lɛ’n. Ɔ su nian wafa nga be nɔn nzue’n.

Amun niɛn i kpa naan amun wun wafa nga sran kun nɔn i nzue liɛ’n. Wie’m be fa be ti’n bo i nzue’n nun. Kun kusu sa nzue’n i sa nun yɛ ɔ nɔn ɔn, kɛ ɔ ko yo naan w’a kwla wun ninnge nga be bo sin yiɛ i’n ti. I sɔ yolɛ’n ti cinnjin, afin Zoova seli Zedeɔn kɛ saan be nga kɛ bé nɔ́n nzue be sasa be wun’n, be ngunmin cɛ yɛ ɔ́ kpá be síe ɔ. Zoova seli Zedeɔn kɛ maan be onga’n be sa be sin be tranwlɛ’m be nun. É wá yíyí nun.

Izraɛlifuɛ’m be su wun ɲrɛnnɛn ekun. Be afɛ’n i bo’n yɛle kɛ be ɲin w’a yiman Zoova. Ɔ maan Madianfuɛ’m be wa miannin Izraɛlifuɛ mun kplɔlɔ, yɛ be kleli be yalɛ kpa liɛ su. Yɛ be kpan flɛli Zoova kɛ ɔ de be Madianfuɛ’m be sa nun. Yɛ Zoova tili be kpanlɛ’n niɔn.

Zoova seli Zedeɔn kɛ ɔ flɛ sonja mun naan be yia. Yɛ Zedeɔn yiayiali sonja sran akpiakpi ablasan nin nɲɔn (32.000) ɔn. Madianfuɛ nga be nin Izraɛlifuɛ’m be kun’n, be ti sran akpiakpi ya sran akpiakpi ablasan nin nnun (135.000). Sanngɛ ɔ nin i sɔ ngalɛ’n, Zoova seli Zedeɔn kɛ: ‘Sran nga be o ɔ sa nun be te sɔn.’ ?Ngue ti yɛ Zoova kannin sɔ ɔ?

Yɛle kɛ alɛ’n kunlɛ nun’n, sɛ Izraɛlifuɛ’m be ɲan kwlalɛ’n, bé kwlá bú i kɛ ɔ fin be bɔbɔ. Naan b’a mianman Zoova kɛ ɔ uka be. I sɔ’n ti’n, Zoova seli Zedeɔn kɛ: ‘Sran nga i klun titi i mɔ i wun usu i’n, maan ɔ sɛ i sin wɔ i awlo.’ Kɛ Zedeɔn yoli i sɔ’n, sonja’m be nun sran akpiakpi ablaɔn nin nɲɔn (22.000) be sali be sin. Sran nga be kali lɛ mɔ be nin sran 135.000 bé kún’n, be ti sran akpiakpi blu (10.000) cɛ.

Sanngɛ Zoova seli Zedeɔn kɛ: ‘Sran nga be o ɔ sa nun’n be te sɔn.’ Ɔ maan ɔ seli Zedeɔn kɛ ɔ fa sran mun bla nzue nga i nuan wa naan be wa nɔn nzue, naan sran nga be koto be fa be ti bo i nzue nun’n, maan be sa be sin be tranwlɛ’m be nun. Zoova seli Zedeɔn kɛ: ‘Sran ya nsan (300) nga kɛ bé nɔ́n nzue’n be sasa be wun’n, a nin be yɛ ń wá fá kwlalɛ’n ń wlá amun sa nun ɔn.’

Alɛ’n i kunlɛ blɛ’n w’a ju siɛn’n. Zedeɔn buli i sran’m be nun akpasua nsan. Kpɛkun ɔ wlali be sa nun awɛ mun sɛsɛsɛ, yɛ ɔ mannin be sɛ mun. Be fali tɛ’m be wlɛli i sɛ’m be nun. Kɛ Zedeɔn nin i sran’m be juli be kpɔfuɛ’m be ngblaliɛ’n i wun lɔ’n, be sin yiali be. Kɛ ɔ́ yó sɔ’n, nn lika w’a bu nun. Yɛ be kwlaa be fitali be awɛ’m be nun likawlɛ ɔ, kpɛkun be boboli sɛ mun, yɛ be kpannin seli kɛ: ‘Zoova i tokofi’n nin Zedeɔn i tokofi’n!’ Kɛ Madian sonja’m be kpiti kpli be tinngeli’n, be nun wa sanngannin kpɛkun be wun usuli be. Be kwlaa be wanndili naan Izraɛlifuɛ’m b’a kwla be.