?Wan y’ɔ sie mɛn’n sakpasakpa ɔ?

Sran kaka’m bé tɛ́ su kɛ, Ɲanmiɛn Kpli yɛ ɔ sie mɛn’n niɔn. Sanngɛ, Biblu’n nun lika’n wie fi seman kɛ Zezi annzɛ i Si’n yɛ be sie mɛn’n niɔn. Zezi bɔbɔ seli kɛ: “Siɛn’n, bé wá kán sran ng’ɔ sie mɛn nga’n i bo.” Yɛ ɔ kan guali su kɛ: “Sran ng’ɔ sie mɛn nga’n, ɔ su ba. Ɔ kwlá yoman n like fi mlɔnmlɔn.”—Zan 12:31; 14:30; 16:11.

Ɔ maan mɛn nga i siefuɛ’n, ɔ tanndan Zezi ɲrun. ?Wan li yɛle i sɔ sran’n?

Mɛn’n nun sa’m be bo’n i finwlɛ’n

Kannzɛ bɔɔ sran’m be mian be ɲin be yo ninnge kpakpa mun o, sanngɛ kɛ ɔ fɛ i lele m’ɔ́ fá jú andɛ’n, ɲrɛnnɛn nga w’a tɔ mɛn’n su’n, ɔ leman wunsu. I sɔ sa’m be yo maan angunndan bufuɛ’m be usa be wun kosan mun. David Lawrence ti fluwa klɛfuɛ, andɛ ɔ nunman kun. Ɔ seli kɛ: “Sran kwlaa kunndɛ ‘fɔundi asiɛ’n su wa, ɔ sunnzun like kpa mɛn i wiengu.’ ?Yɛ ngue sa mɔ maan be ɲanman be ti alɛ’n i sa nun’n, sanngɛ nn e si kɛ fɔundi yɛ sran’m be kunndɛ’n niɔn?”

?Nán abonuan sa yɛle i sɔ’n? Sran’m be klo kɛ bé trán alaje nun, sanngɛ be kpɔ be wiengu yɛ be kun i ɲrɛnnɛn kunlɛ. Maan e bu wafa nga be yo sa sroesroe sɔ mun mɔ be klun titiman be kaan sa’n, i angunndan e nian. Klɔ sran’m be wla be wiengu mun sua ba’m be nun, be kpunngbun be kɛ koklo wete sa, yɛ be fa sran mun be ta be wiengu su bisua’m be nun. Be fa alapla mun be to sin be wɔ lika’m be nun, be fa bɔmbu mun ɔ nin ninnge i wafa tɛtɛ wie’m be fa kle be wiengu ɲrɛnnɛn, yɛ be yo be wiengu sa kekleekle mun. Kɛ bé yó i sɔ’n, be siman aunnvuɛ kaan sa.

?An bu kɛ klɔ sran nga be kunndɛ fɔundi’n ɔ nin aunjuɛ’n, be bɔbɔ be ngunmin be kwla yo klunwi kɛ nga sa? ?Ngue like yɛ ɔ su sran’m be bo mɔ be yo sa tɛtɛ annzɛ sa sroesroe mun ɔn? ?An nin a usaman amun wun le, sɛ aolia nun like tɛ wie m’ɔ le tinmin’n yɛ ɔ wlawla sran’m be kɛ be yo sa sroesroe mun o?

B’a yiyi mɛn’n i siefuɛ’n i bo

Nán e bowɛ e kle e wun yalɛ e kunndɛ lele, afin Biblu’n kle e weiin kɛ sran ngwlɛlɛfuɛ kun mɔ be kwlá wunmɛn i’n, yɛ ɔ sie sran ɔ nin nvle mun ɔn. Ɔ se kɛ: “Klunwifuɛ’n sie mɛn wunmuan’n.” Yɛ Biblu’n yiyi i bo se kɛ: ‘Be flɛ i wuo lalaa, nin Satan, i yɛ ɔ laka mɛn wunmuan nunfuɛ’m be kwlaa’n niɔn.’—1 Zan 5:19; Sa Nglo Yilɛ 12:9.

Kɛ cɛn kun mɔɔ ‘mmusu’m be si Satan waan ɔ́ kó láka Zezi’n,’ Zezi w’a siman akplowa kɛ nán Satan yɛ ɔ sie mɛn nga e o nun yɛ’n niɔn. Biblu’n kɛn i ndɛ se kɛ: “Mmusu’m be si Satan fɛ i ekun ɔli oka fleiin kpa kun su, ɔ fa mɛn’n i famiɛn diwlɛ’n kwlaa nin i nun ninnge m’ɔ ba be ɲrunɲan’n kleli i, ɔ seli i kɛ: ‘Sɛ a koto m bo a manman min’n, ń fá ninnge nga kwlaa mán wɔ.’ Yɛ Zezi seli i kɛ: ‘Satan, jaso lɛ!’”—Matie 4:1, 8-10.

E bu i sin e nian. Kɛ Satan laka Zezi’n, i waan ɔ́ fá “mɛn’n i famiɛn diwlɛ kwlaa” ɔ́ mɛ́n i. ?Sanngɛ, sɛ nán Satan yɛ ɔ sie mɛn’n i famiɛn diwlɛ kwlaa sɔ’n sakpasakpa’n, nn ɔ́ kwlá fá súa Zezi i aya? Ɔ si’ɛ. I kusu Zezi w’a seman kɛ nán Satan yɛ ɔ sie mɛn nun awa kwlaa sɔ mun ɔn. Sɛ ɔ ti kɛ nán Satan yɛ ɔ sie be’n, nn ɔ kannin. I sɔ ti’n, Bae’n mɔ yɛle Satan’n m’ɔ ti aolia nun sran’n, yɛ ɔ ti mɛn’n i siefuɛ’n niɔn! Biblu’n bɔbɔ flɛ i “mɛn nga i min’n.” (2 Korɛntfuɛ Mun 4:4) ?Sanngɛ, ɔ yo sɛ ti’ɛ sran klunwifuɛ kɛ nga sa’n, ɔ kwla ɲannin ɲrun sa ɔ?

Ɲanmiɛn Kpli yili anzi kun. Anzi sɔ’n yɛ ɔ kacili Satan’n niɔn. Yɛ i ɲin wa bloli Ɲanmiɛn i nglo nin asiɛ’n be sielɛ’n su. Sielɛ’n m’ɔ nin Ɲanmiɛn i kunngba cɛ yɛ ɔ fata’n, Satan wa fɛ i ɲin wɔli i. Ɔ maan i ti’n, ɔ fiali wuo kun sin, yɛ ɔ ijɔli lakali Ɛvu bla klikli’n niɔn. Ɔ yoli naan be bu i kɛ wuo’n yɛ ɔ ijɔli ɔ. I sɔ yɛ Satan yoli yɛ maan Ɛvu nin i wun Adam be ɲin wa yili i trali Ɲanmiɛn ɔn. Kpɔkun yɛ b’a yoman Ɲanmiɛn i klun sa kun ɔn. (Bo Bolɛ 3:1-6; 2 Korɛntfuɛ Mun 11:3) Ɔ tɔn i wun suɛn kɛ ɔ kwla laka Adam nin Ɛvu be afinliɛ nunfuɛ nga bé wá wú be’n mun, naan be kpaci Ɲanmiɛn. I sɔ’n ti, Ɲanmiɛn yacili Satan i nun naan be wun i ndɛ m’ɔ kannin’n i bo, sanngɛ Satan i ndɛ’n w’a kpɛnman su.—Zɔb 1:6-12; 2:1-10.

Nanwlɛ, nán Satan i ngunmin yɛ ɔ sie mɛn’n niɔn. Ɔ lakali anzi wie mun yɛ ɔ ɲannin be, ɔ maan be suli i su be yoli ɲin kekle Ɲanmiɛn su. I sɔ anzi’m be kacili mmusu. Be yɛ be ti i aolia nun sran nga Satan nin be be bo yo kun be yo sa mun ɔn. Kɛ Biblu’n srɛ Klistfuɛ’m be kɛ: ‘Kɛ ɔ ko yo naan amun a kwla jran mmusu’m bé si Satan m’ɔ kpɛ amun gblɛ’n i ɲrun’n ti’n, an fa Ɲanmiɛn i alɛ ninnge’n kwlaa wla amun wun. Afin nán e nin klɔ sran yɛ e kun ɔn, sanngɛ e nin aosin tuun nga e o nun yɛ’n i min’n i kpɛnngbɛn mun, yɛ mmusu tɛtɛ mɔ be o nglo lɔ’n yɛ e kun ɔn,’ mmusu sɔ’m be ndɛ yɛ ɔ kan ɔn.—Efɛzfuɛ Mun 6:11, 12.

An jran kekle mmusu’m be ɲrun

Mɛn siefuɛ klunwifuɛ sɔ mun mɔ be wunman be’n, b’a buabua be wun naan bé mlín klɔ sran’m be kwlakwla, naan be yaci Ɲanmiɛn i sulɛ. Ajalɛ kun mɔ mmusu sɔ’m be fa’n, yɛle kɛ bé yó naan sran’m be bu i kɛ be nga be wuli’n be o lɔ. Sanngɛ Ɲanmiɛn ndɛ’n kle weiin kɛ be nga be wuli’n be siman sa kun. (Bo Bolɛ 2:17; 3:19; Ezekiɛl 18:4; Jue Mun 146:3, 4; Akunndanfuɛ’n 9:5, 10) Wie liɛ’n, mmusu kun kwla sɔnnzɔn sran ng’ɔ wuli’n i nɛn’n, kpɔkun ɔ kwla sin wunnzue yifuɛ mun annzɛ be nga be nin wunmiɛn be ijɔ’n be sin, naan sran ng’ɔ wuli’n nin i janvuɛ mun annzɛ i osufuɛ’m be kwla ijɔ. “Nɛn” sɔ’n kwla se kɛ i yɛ ɔ ti sran ng’ɔ wuli’n niɔn, kannzu li nn nanwlɛ, mmusu kun yɛ ɔ ijɔ sɔ ɔ!

Sɛ cɛn kun an ti “nɛn” kun kɛ nga sa’n, nán an kplin su naan ɔ laka amun. An kpalo ndɛ ng’ɔ kan kle amun’n, naan kɛ nga Zezi fa seli Satan sa’n, an kusu an se wie kɛ: “Satan, jaso lɛ!” (Matie 4:10; Zak 4:7) Nán e kunndɛ kɛ é kpɛ́ like kwlaa nga mmusu’m be yo’n i bo e nian, afin i sɔ’n kwla yo maan é yó ninnge nga mmusu’m be yo’n i wie. I sɔ ayeliɛ’n yɛ be flɛ i bae dilɛ’n niɔn. I ti yɛ maan Ɲanmiɛn wlɛ i sufuɛ’m be su nun kɛ nán be kan bae dilɛ’n i wafa wie fi’n niɔn. Sran kwlaa ng’ɔ ‘di bae’n annzɛ ɔ yi wunnzue annzɛ ɔ nin wunmiɛn be ijɔ’n, ng’ɔ yo fuɛn kannganfuɛ’n,’ Biblu’n bu i fɔ.—Mmla’n 18:10-12; Galasifuɛ Mun 5:19-21; Sa Nglo Yilɛ 21:8.

Kɛ mɔɔ bae dilɛ’n ɔ yo maan sran’m be kaci mmusu’m be kanga ti’n, sɛ bɔɔ ɔ ti amun ɲin su yiyilɛ like o, annzɛ kusu ɔ yo amun klanman o, an wla ayeliɛ kwlakwla sɔ’m be ase. Ayeliɛ sɔ’m be nun, e kwla bobo nglowama ɔ nin srala gualɛ, nzan bo ɔ nin be sa klun kannganlɛ, ngɔɲinman yilɛ. Sɛ mmusu’m be fa be sa sie i awlo kun su’n, be kle i nunfuɛ’m be yalɛ. Be kwla sanngan ninnge’m be nun kpɔkun e kwla ti be ngan.

Kɛ mɔɔ mmusu klunwifuɛ sɔ’m be nian mɔɔ fɔ o klɔ sran’m be nun ti’n, be jran su be wlawla be naan be yi ninnge nga ɔ yi sa sukusuku’m be nglo’n mun. Ninnge sɔ mun yɛle fluwa mun, sriman ɔ nin televiziɔn nun ninnge mun. Be yo maan sran’m be klo ayeliɛ sukusuku sɔ mun. Mmusu’m be si kɛ sɛ sran’m be nin a wlaman be ti’n nun’n angunndan tɛtɛ’m be ase’n, angunndan tɛtɛ sɔ’m bé trá ndin, kpɔkun bé sú sran’m be bo naan be yo sa sukusuku mun kɛ be bɔbɔ be fa yoli’n sa.—Bo Bolɛ 6:1, 2; 1 Tɛsalonikfuɛ Mun 4:3-8; Zid 6.

Nanwlɛ, sɛ be se sran kpanngban kɛ mmusu mun yɛ be sie mɛn nga’n, i sɔ sran’m bé srí. Sɛ sran’m be faman ndɛ sɔ’n su’n, ɔ boman e nuan, afin Biblu’n se kɛ: ‘Satan bɔbɔ kaci i wun kɛ anzi m’ɔ kpaja’n sa.’ (2 Korɛntfuɛ Mun 11:14) I lakalɛ ng’ɔ fa ɲannin sran mun dan’n, yɛle kɛ ɔ si sran’m be ɲin maan be wunman kɛ mmusu’m be o lɛ sakpasakpa. Nán an yaci amun wun lɛ naan be laka amun! Satan nin i mmusu’m be o lɛ sakpasakpa. I sɔ’n ti, ɔ fata kɛ e jran be ɲrun kekle tititi.—1 Piɛr 5:8, 9.

Ɲanmiɛn sa! Ɔ cɛ kan’n, Satan nin i osufuɛ’m be su tranman lɛ kun! Biblu’n se kɛ: “Mɛn’n [ɔ nin mmusu nga be sie mɛn’n] ɔ́ wíe, sanngɛ sran ng’ɔ yo Ɲanmiɛn i klun sa’n, ɔ́ ká lɛ tititi.” (1 Zan 2:17) ?Kɛ ayeliɛ tɛ sɔ’n ko wie’n, nn nán alaje yɛ é dí ɔ? Maan e fa e wun e wla be nga be yo Ɲanmiɛn i klun sa’n mɔ bé ɲán anannganman nguan’n Ɲanmiɛn i mɛn uflɛ sɛsɛ’n nun’n, be nun wie.—Jue Mun 37:9-11, 29; 2 Piɛr 3:13; Sa Nglo Yilɛ 21:3, 4.

Sɛ b’a bo’a Biblu uflɛ i dunman’n, ndɛ mma’m be fin Nyanmiɛn Ndɛ’n nun. E siesieli be nɛn’n i kacikacilɛ nzɔliɛ’n i kpa naan kannganlɛ’n w’a yo pɔpɔ.

[Foto, bue 4]

?Sɛ mɛn’n nun awa’m be kwlaa be timan Satan liɛ’n, nn ɔ́ kwlá sé kɛ ɔ́ fá mán Zezi?