‘Sa ng’ɔ ti dan trɛ i ngba’n yɛle kɛ an klo amun wun dan’
‘Like’n kwlaa be awieliɛ’n w’a mantan. Sa ng’ɔ ti dan trɛ i ngba’n yɛle kɛ an klo amun wun [dan, NW].’—1 PIƐR 4:7, 8.
ZEZI su wunmɛn i akoto mun kun. Ɔ maan blɛ kaan ng’ɔ le i m’ɔ nin be o likawlɛ’n, ɔ ti i liɛ cinnjin kpa. Like nga i sɔnnzɔnfuɛ’m bé wá wún i’n, ɔ boli su kleli be. Ɔ si kɛ junman dan kpa kun o lɛ m’ɔ fata kɛ be di ɔ. Sanngɛ bé wá kpɔ́ be, yɛ bé klé be yalɛ kɛ be kleli i bɔbɔ Zezi i yalɛ’n sa (Zan 15:18-20). Kɛ kɔnguɛ kunngba sɔ’n nun’n, Zezi nin i sɔnnzɔnfuɛ’m be o likawlɛ’n, ɔ kan flannin nun kɛ ɔ fata kɛ be ‘klo be wiengu.’—Zan 13:34, 35; 15:12, 13, 17.
2 Akoto Piɛli m’ɔ o lɛ kɔnguɛ sɔ’n nun wie’n, ɔ wunnin ndɛ sɔ’n i bo kpa. Kɛ afuɛ’m be sinnin’n, ka naan b’a nunnun Zerizalɛmu nvle’n, Piɛli i fluwa nga ɔ klɛli’n nun’n, ɔ jrannin be wiengu klolɛ’n su kpa. Ɔ mannin Klistfuɛ’m be afɔtuɛ kɛ: ‘Like’n kwlaa be awieliɛ’n w’a mantan. Sa ng’ɔ ti dan trɛ i ngba’n yɛle kɛ an klo amun wun [dan, NW].’ (1 Piɛr 4:7, 8). Be nga be tran e ‘mɛn tɛ nga m’ɔ́ kɔ́ i bue nuan’ yɛ’n i nun’n, ndɛ sɔ’n timan ndɛ finfin be ɲrun mlɔnmlɔn (2 Timote 3:1). ?Ngue yɛle ‘e wiengu klolɛ dan’n?’ ?Ngue ti yɛ ɔ fata kɛ e klo e wiengu’m be sɔ ɔ? ?Yɛ wafa sɛ yɛ e kwla kle kɛ e klo e wiengu mun kɛ ngalɛ’n sa ɔ?
‘?E wiengu klolɛ dan’n i bo’n yɛle mennin?’
3 Sran sunman be bu i kɛ klolɛ mɔ be klo sran’n ɔ fin be awlɛn nun sa ngbɛn, kpɔkun be su klo sran’n. Sanngɛ sran klolɛ’n i wafa’n sɔnnin, yɛ nga Piɛli kɛnnin i ndɛ’n lɛ’n, i dan tra be ngba. Glɛki aniɛn nun’n, ndɛ mma nga be kacili i kɛ “klolɛ” m’ɔ o 1 Piɛr 4:8 nun’n yɛle a·gaʹpɛ. Ndɛ mma sɔ’n i bo’n yɛle kɛ sran nga ɔ klo sran’n, ɔ minndɛman i sin like fi. Klolɛ sɔ’n taka mmla su. Fluwa kun se kɛ: “Sran klolɛ mɔ be flɛ i agapɛ sɔ’n, ɔ timan afubenun like mɔ e yi i nglo sa ɔ. Sran’n i bɔbɔ yɛ ɔ fa ajalɛ kɛ ɔ́ yí sran klolɛ sɔ’n i nglo ɔ.” Fɔ m’ɔ o e nun ti’n, e bɔbɔ e wun angunndan yɛ e bu i titi ɔ. I sɔ’n ti’n, be kpɛn e wla kɛ ɔ fata kɛ e klo e wun kɛ Ɲanmiɛn mmla’n fa kle e’n sa.—Bo Bolɛ 8:21; Rɔmfuɛ Mun 5:12.
4 Nán kɛ ɔ ti mmla’n ti yɛ saan fii é nían su é yó ɔ. Sran klolɛ mɔ be flɛ i agapɛ’n ɔ ti be awlɛn nun like wie. I sɔ’n ti yɛ Piɛli seli kɛ ɔ fata kɛ ‘e klo e wun dan [i bo klikli’n yɛle kɛ e “trɛ”] e sran klolɛ’n nun.’a (Kingdom Interlinear). Sanngɛ, ɔ fata kɛ e mian e ɲin naan y’a klo sran kɛ ngalɛ’n sa. Glɛki aniɛn nun’n, ndɛ mma ‘dan’ i su’n, fluwa sifuɛ kun seli kɛ: “Ɔ ti kɛ wanndifuɛ kun m’ɔ wanndi lele mɔ kɛ wanndilɛ’n wá wíe’n, ɔ wlɛ i wun ase fɛ i wunmiɛn kan ng’ɔ o i nun’n fa cuɛn i ja nun naan w’a ju’n sa.”
5 Nán maan e sran klolɛ nun’n, e yo ninnge nga ɔ fata kɛ e yo be’n be ngunmin cɛ, annzɛ e yo ninnge mun e man sran wie’m be kunngba cɛ. Sɛ bɔbɔ i sɔ yolɛ ti kekle o, ɔ fata kɛ Klistfuɛ’m be “trɛ” be sran klolɛ’n nun (2 Korɛntfuɛ Mun 6:11-13). Sran klolɛ sɔ’n, ɔ fata kɛ e suɛn i kɛ wanndifuɛ kun suan wanndilɛ’n naan i wanndilɛ’n w’a yo kpa w’a tra su’n sa. Ɔ fata kɛ e kwlaa e klo e wun kɛ ngalɛ’n sa. ?Ngue ti ɔ? Like nsan ti ɔ.
?Ngue ti yɛ ɔ nin i fata kɛ e klo e wun ɔn?
6 Like klikli’n yɛle kɛ ‘sran klolɛ’n fin Ɲanmiɛn.’ (1 Zan 4:7). Zoova mɔ nzuɛn kpa sɔ’n i talie’n o i sa nun’n, i yɛ ɔ dun mmua kloli e ɔ. Akoto Zan seli kɛ: ‘An nian kɛ klolɛ nga Ɲanmiɛn fa klo e’n i ɲin fiteli dan ɔn: ɔ sunmɛnnin i Wa kunngba’n mɛn’n nun naan e ɲan nguan.’ (1 Zan 4:9). Klɔ sran’m be ti yɛ Ɲanmiɛn “sunmɛnnin” i Wa’n niɔn. Yɛle kɛ, ɔ bali asiɛ’n su wa. Ɔ dili i jasin fɛ’n bolɛ junman’n. Kpɔkun ɔ wuli ɲrɛnnɛn wie waka’n su. Kɛ ɔ ko yo naan y’a ‘ɲan nguan’n,’ i ti yɛ i sɔ sa’m be yoli sɔ ɔ. ?Klolɛ dandan sɔ mɔ Ɲanmiɛn yili i nglo e lika’n, é kwlá yó i su sa? Zan se kɛ: ‘Sɛ Ɲanmiɛn klo e dan kɛ nga sa’n, maan e kusu e klo e wun sɔ.’ (1 Zan 4:11). Maan e wun i wlɛ kɛ Zan seli kɛ: ‘Sɛ Ɲanmiɛn klo e’n.’ W’a seman kɛ sɛ Ɲanmiɛn klo wɔ’n, sanngɛ i waan sɛ Ɲanmiɛn klo e’n. Ndɛ sɔ’n ti weiin. Yɛle kɛ Ɲanmiɛn klo e niaan Klistfuɛ mun. I sɔ ti’n ɔ fata kɛ e kusu e klo be wie.
7 Like’n i nɲɔn su mɔ i ti yɛ kɛ é sé yɛ’n, ɔ ti cinnjin kpa kɛ e klo e wun’n tra su’n, yɛle kɛ ‘like’n kwlaa be awieliɛ’n w’a mantan.’ Ɔ maan, ɔ ti cinnjin kɛ e niaan nga be le ukalɛ’n i awuliɛ’n, e uka be dan kpa (1 Piɛr 4:7). ‘Lika’n w’a yo kekle.’ (2 Timote 3:1). Lika’n i sukusuku mɔ w’a yo’n, ɔ nin sa sroesroe kɛ aunmuan dan mun, ɔ nin asiɛ’n i kejelɛ, ɔ nin ninnge wie mun ekun’n, ɔ nin yalɛ mɔ sran’m be kle e’n, be yo maan afɛ’n o e su. Ɲrɛnnɛn kɛ nga sa mɔ e wun be’n ti’n, ɔ ti cinnjin kɛ e fa e wun mantan e niaan mun kpa ekun. E wun klolɛ dan’n, ɔ́ wá yó maan é yó sran wunmuan kun. Kpɔkun ɔ́ sú e bo maan ‘é úka e wun.’—1 Korɛntfuɛ Mun 12:25, 26.
8 Like’n i nsan su mɔ i ti yɛ ɔ fata kɛ e klo e wun’n, yɛle kɛ e kplinman su kɛ é ‘mán mmusu’m be si Satan’n i wluwlɛ,’ naan ɔ laka e (Efɛzfuɛ Mun 4:27). Satan w’a sa cɛin naan ɔ́ fá e niaan’m be fɔ m’ɔ o be nun’n m’ɔ fite be nzuɛn nun’n, ɔ́ fá tánndan e ɲrun. ?Sa wie mɔ e niaan’m be yoli mɔ b’a bumɛn i sin’n, ɔ kwla yo maan é jáso asɔnun’n nun (Nyanndra Mun 12:18)? Cɛcɛ, sɛ e klo e wun dan’n, e su jasoman asɔnun’n nun! Sran klolɛ sɔ’n, ɔ uka e maan e tran fɔun nun, yɛ e “bo yo kun” e su Ɲanmiɛn.—Sofoni 3:9.
Wafa nga e kle kɛ e klo e wiengu mun’n
9 E wiengu klolɛ’n, ɔ bo i bo awlo lɔ. Zezi seli i sɔnnzɔnfuɛ’m be kɛ sɛ be klo be wun’n, i sɔ nun yɛ sran’m be kwlaa bé sí kɛ be ti i sufuɛ kpa ɔ (Zan 13:34, 35). Nán asɔnun’n nun kunngba yɛ ɔ fata kɛ e yi e sran klolɛ’n i nglo ɔ. Sanngɛ maan e yi i nglo e awlo lɔ wie. Yɛle kɛ maan e klo e yi annzɛ e wun. Kpɔkun maan siɛ nin niɛn’m be yi klolɛ’n i nglo ba’m be lika. I kwlaa sɔ’n, yɛle kɛ sɛ e si kɛ e klo e awlobofuɛ mun’n, ɔ ti kpa. Sanngɛ nán maan ɔ ka ngalɛ’n su. Ɔ fata kɛ e yi i nglo e kle be weiin kɛ ɔ nin i fata’n sa.
10 ?Wafa sɛ yɛ yasua kun nin i yi, be kwla yi i nglo kɛ be klo be wun ɔn? Sɛ yasua kun klo i yi sakpa’n, nzra nun o, awlo lɔ o, ndɛ nga ɔ́ kán’n nun o, i ayeliɛ’n nun o, ɔ kle weiin kɛ ɔ klo i. Ɔ bu i yi’n i sran, ndɛ nga i yi sɔ’n kan’n, ɔ nin wafa nga bla’n fa wun ninnge mun’n, ɔ fɛ i ɲin sie be su (1 Piɛr 3:7). Ɔ dun mmua bu i yi’n i ninnge’m be su angunndan ka naan w’a bu i liɛ’m be angunndan. Kpɔkun Ɲanmiɛn ninnge’m be nun, ɔ nin ninnge ng’ɔ mian bla’n i sa’n, ɔ nin like kwlaa nga ɔ kwlɛ i yo naan bla’n i wun w’a fɛ i feke’n, yɛ ɔ yo be ɔ (Efɛzfuɛ Mun 5:25, 28). Bla nga ɔ klo i wun’n sakpa kusu’n, sɛ bɔbɔ ɔ kunndɛ kɛ i wun’n yo like mɛn i naan ɔ nin a yoman’n, sanngɛ ɔ ‘bu i sran.’ (Efɛzfuɛ Mun 5:22, 33). Ɔ ukɛ i wun’n, yɛ ɔ fɛmɛn i ɲin wlawlaman yasua’n. Kpɔkun, ɔ semɛn i kɛ ɔ mɛn i like nga i sa junman su’n. Sanngɛ ɔ ukɛ i wun’n naan b’a kwla fa be ɲin b’a sie i Ɲanmiɛn ninnge’m be su.—Bo Bolɛ 2:18; Matie 6:33.
11 ?Siɛ nin niɛn mun, wafa sɛ yɛ amun kwla kle kɛ amun klo amun mma mun ɔn? Amun ɲin mɔ amun mian be nian ba’m be lika’n, ɔ kle weiin kɛ amun klo be (1 Timote 5:8). Sanngɛ, nán aliɛ’n, ɔ nin tralɛ’n, ɔ nin sua kunngba yɛ ɔ ti cinnjin man ba mun ɔn. Ɔ fata kɛ amun kle ba’m be Ɲanmiɛn i atin’n. I liɛ’n kɛ bé ɲín kɔ́’n, nn bé kló Ɲanmiɛn kɔ́, yɛ bé sú i (Nyanndra Mun 22:6). Yɛle kɛ ɔ fata kɛ amun siesie blɛ naan amun nin amun awlobofuɛ mun amun suan Biblu’n nun like. Kpɔkun, amun bo jasin fɛ’n likawlɛ, yɛ amun wɔ asɔnun aɲia’m be bo (Mmla’n 6:4-7). Kɛ mɔ lika’n w’a yo kekle’n ti’n, saan amún mían amun ɲin kpa naan amun a kwla di junman sɔ mun titi. Amun mma’m be kpa yolɛ Ɲanmiɛn ninnge’m be nun m’ɔ lo amun’n, ɔ nin amun ɲin mɔ amun mian naan amun w’a ta be i sɔ liɛ’n nun’n, ɔ ti be klolɛ’n i wafa’n kun. Kɛ amun yo sɔ’n, amun kle kɛ be anannganman nguan ɲanlɛ’n, ɔ lo amun.—Zan 17:3.
12 Ɔ ti cinnjin kɛ siɛ nin niɛn’m be klo ba mun kɛ be fa klo ba’n sa. Ba’m be awlɛn’n sɔman, ɔ maan be klolɛ’n yɛ siɛ nin niɛn’m be kwla fa cici be awlɛn ɔn. Ɔ maan, amun se be kɛ amun klo be, yɛ amun klo be kɛ be fa klo ba’n sa. I sɔ’n yo maan, be wun i kɛ be nin klolɛ fata naan be ti sran’n wie. Sɛ be yo like kpa wie’n, amun yo be mo kpa afin ɔ kle be kɛ amun bu be angunndan. Amun tu be fɔ klolɛ su. I sɔ’n kle kɛ be bɔbɔ be kpa yolɛ ti yɛ amun tu be fɔ ɔ (Efɛzfuɛ Mun 6:4). Wafa nga amun fa klo be lɛ ti’n, amun awlo’n i nun tranlɛ’n ɔ́ yó fɛ yɛ amun bo yó kun. Ɔ maan awlo nunfuɛ’m be kwla jran kekle mɛn’n m’ɔ́ kɔ́ i bue nuan yɛ’n, i ɲrun.
13 Sɛ e klo sran’n, é yáci i fɔnlɛ’n é cɛ́ i. Maan amun wla kpɛn su kɛ, kɛ Piɛli seli be nga be kɛnngɛn i fluwa nun’n kɛ ‘an klo amun wun dan’n,’ ɔ kleli like ti mɔ i sɔ’n ti cinnjin kpa’n. Ɔ seli kɛ: ‘Afin sran ng’ɔ klo sran’n, ɔ yaci sa kpanngban nga be yo i cɛ.’ (1 Piɛr 4:8). Kɛ be se kɛ be ‘yaci sa cɛ’n’ nán kɛ e kata sa tɛ’m be su ti ɔ. Sa tɛtɛ sɔ mun’n, asɔnun kpɛnngbɛn mun yɛ ɔ ti mɔ be siesie i sɔ liɛ’n niɔn (Saun Yolɛ 5:1; Nyanndra Mun 29:24). Sɛ e yaci sa tɛtɛ yofuɛ mun lɛ naan be saci be wiengu’n, ɔ ti kɛ e kloman sran sa. Kpɔkun i sɔ’n nin Ɲanmiɛn mmla’n be kɔman likawlɛ.—1 Korɛntfuɛ Mun 5:9-13.
14 Blɛ sunman nun’n, e niaan’m be fɔnlɛ timan dan ngboko. Kɛ mɔ e kwlaa e fɔn sa sunman nun ti’n, e kwla lo e wiengu ngasi. Ɔ kwla yo e ijɔlɛ nun, annzɛ e ninnge yolɛ nun (Zak 3:2). ?E ti nuan nun tɛfuɛ? I sɔ ayeliɛ liɛ’n kwla kpɛ lare yi i asɔnun’n nun (Efɛzfuɛ Mun 4:1-3). Sɛ klolɛ su yɛ e yo e ninnge mun’n, nanwlɛ, e niaan Klistfuɛ kun sa’n e su ‘sacimɛn i wun.’ (Jue Mun 50:20). Wafa kunngba nga be kan talɛ i ayre’n naan i lika fiɛnfiɛn’m b’a wie’n, i kunngba’n yɛ sran nga ɔ klo kɛ klolɛ’n tran i nin i niaan’m be afiɛn’n ɔ yo ɔ. Sran sɔ’n, ɔ yaci i niaan’m be fɔnlɛ’n cɛ.—Nyanndra Mun 17:9.
15 Sran klolɛ’n ti’n, e uka be nga be le ukalɛ’n i awuliɛ’n. Kɛ mɔ mɛn’n i bue nuan blɛ nga nun lika’n saci kɔ i ɲrun’n ti’n, e niaan Klistfuɛ’m be sa mian ninnge wie’m be wun (1 Zan 3:17, 18). ?Asɔnun nun’n, e niaan kun di sika yalɛ annzɛ i junman’n w’a saci? Atrɛkpa’n, e kwla nian kɛ e sa’n fa ju lɛ’n, naan y’a uka e niaan sɔ’n (Nyanndra Mun 3:27, 28; Zak 2:14-17). ?Ɔ nin i fata kɛ e siesie e niaan angbeti bla kpɛnngbɛn kun i awlo’n i ye? Atrɛkpa’n, i lɛ’n e kwla ko ukɛ i junman sɔ’n i wie dilɛ nun.—Zak 1:27.
16 Nán be nga e si be’n be ngunmin yɛ ɔ fata kɛ e yi i nglo kɛ e klo be ɔ. Blɛ wie nun’n, e niaan nga be o mɛn uflɛ nun mɔ sa kɛ aunmuan dan wie sa annzɛ asiɛ m’ɔ keje’n, annzɛ alɛ m’ɔ o be nvle liɛ’n nun lɔ’n, be nganniɛn kwla gua e su wa. Atrɛkpa’n, be sa mian aliɛ, ɔ nin tralɛ, ɔ nin ninnge uflɛ wie mun ekun be wun. Sɛ bɔbɔ be timan e nvle nunfuɛ mun o, annzɛ e kanman aniɛn kunngba o, i sɔ’n timan like fi. Afin e ‘klo e niaan Klistfuɛ mun.’ (1 Piɛr 2:17). Ɔ maan, kɛ nga afuɛ ya kpɔlɛ klikli nun Klistfuɛ’m be yoli sa’n, ajalɛ kwlaa nga be siesie i kɛ bé fá úka e niaan mun’n, é súɛn i bo (Sa Nga Be Yoli’n 11:27-30; Rɔmfuɛ Mun 15:26). Sɛ e kle kɛ e klo e niaan mun kɛ nga sa’n, mɛn’n i blɛ kasiɛn nga nun’n, e afiɛn’n sɛ́ kpa.—Kolɔsfuɛ Mun 3:14.
17 Sran klolɛ’n ti’n, e bo Sielɛ Blɛ jasin fɛ’n e kle e wiengu mun. Maan e nian Zezi i ajalɛ liɛ’n su. ?Ngue ti yɛ ɔ boli jasin fɛ’n, m’ɔ kleli sran’m be like ɔ? Sran’m be ‘yoli i annvɔ’ ti ɔ. Afin Ɲanmiɛn ninnge’m be nun’n be yo annvɔ (Mark 6:34). Be nga ɔ fata kɛ be kle nvlefuɛ’m be nanwlɛ ndɛ’n, naan be fa nanwlɛ ndɛ sɔ’n be fa cici be awlɛn’n, b’a yoman like fi, be lakali be. Ɔ maan kɛ mɔ Zezi klo sran mun dan m’ɔ sili be aunnvuɛ ti’n, ɔ fali ‘Ɲanmiɛn sielɛ’n i ndɛ’n’ fa fɔnvɔli sran mun.—Lik 4:16-21, 43.
18 Andɛ kusu, Ɲanmiɛn ninnge’m be nun’n, b’a nianman sran sunman lika, be lakali be. Kpɔkun sran sɔ’m be leman like kun sa mɔ bé fá be wla’n gúa su ɔ. Sɛ kɛ Zezi sa’n, be nga be nin a siman Ɲanmiɛn Kpli’n, be Ɲanmiɛn silɛ’n i ndɛ lo e’n, i sɔ’n sú e bo maan klolɛ su nin aunnvuɛ su, é kán Ɲanmiɛn Sielɛ i ndɛ’n é klé be (Matie 6:9, 10; 24:14). Kɛ mɔ mɛn’n o i bue nuan ti’n, like cinnjin kpa nga ɔ fata kɛ e yo’n, yɛle nguan ndɛ sɔ’n i kanlɛ’n.—1 Timote 4:16.
‘Like’n kwlaa be awieliɛ’n w’a mantan’
19 Maan e wla kpɛn su kɛ, kɛ Piɛli man afɔtuɛ kɛ e klo e wun’n, ndɛ nga ɔ fa fitili su’n yɛ: ‘Like’n kwlaa be awieliɛ’n w’a mantan.’ (1 Piɛr 4:7). Ɔ cɛ kaan Ɲanmiɛn i mɛn’n mɔ sran kpa’m bé trán nun’n, ɔ́ wá sín mɛn tɛ nga i osu (2 Piɛr 3:13). Kɛ é sé yɛ’n, nán maan e se e wun kɛ y’a fite nun. Afin Zezi wla e su nun kɛ: ‘An sasa amun wun, nán an yo aliɛ safuɛ mun nin nzanboɛfuɛ mun, nán an koko ninnge’m be ti, sɛ an yo sɔ’n, ɔ cɛman naan cɛn sɔ’n w’a fu amun nun. Afin cɛn sɔ’n ɔ́ wá fú sran mɔ be o mɛn wunmuan’n nun’n be kwlaa be nun kɛ aya sa.’—Lik 21:34, 35.
20 Maan like kwlaa nun ‘e tran minndɛ.’ Kpɔkun kɛ blɛ’n fa ti’n, maan e wun i wlɛ kpa (Matie 24:42). Maan e buabua e wun e sie naan Satan i lakalɛ ninnge kwlaa nga ɔ fa sie e ɲrun’n, y’a jrɛn i ɲrun kekle. Mɛn nun sran’m be kloman be wun, be buman be wiengu sran. Nán maan i sɔ’n yo maan e yaci sran klolɛ’n. Sa nga ɔ ti dan trɛ i ngba’n, yɛle kɛ maan e fa e wun mantan Ɲanmiɛn Zoova m’ɔ́ wá fɛ́ i Siɛlɛ Blɛ m’ɔ fa mɛnnin i Wa Zezi’n, ɔ́ fá yó i klun sa kwlaa asiɛ’n su ekun’n.—Sa Nglo Yilɛ 21:4, 5.
[Ja ngua lɛ ndɛ’n]
a Biblu’n wie’m be kacili ndɛ ng’ɔ o 1 Piɛr 4:8 nun’n kɛ ɔ fata kɛ e klo e wun “nanwlɛ su” annzɛ e klo e wun “kpa.”
LIKE SUANLƐ’N SU KOSAN MUN
• ?Ka naan Zezi w’a wu’n, afɔtuɛ mennin yɛ ɔ fa mɛnnin i sɔnnzɔnfuɛ mun ɔn? ?Yɛ wafa sɛ yɛ Piɛli kleli kɛ ɔ wunnin ndɛ’n i wlɛ ɔ? (1-2)
• ?Kɛ be se kɛ ‘amun klo amun wun dan’n’ i bo’n yɛle mennin? (3-5)
• ?Ngue ti yɛ ɔ fata kɛ e klo e wun ɔn? (6-8)
• ?Wafa sɛ yɛ e kwla yi i nglo kɛ e klo e wiengu ɔ? (9-18)
• ?Ngue ti yɛ kɛ é sé yɛ’n, nán maan e se e wun kɛ y’a fite nun ɔn? ?Yɛ ngue yɛ ɔ fata kɛ e jran su kɛ é yó ɔ? (19-20)
[Foto, bue 29]
Awlo nunfuɛ nga be bo ti kun’n, be jran kekle mɛn m’ɔ́ kɔ́ i bue nuan yɛ’n, i nun sa’m be ɲrun.
[Foto, bue 30]
Klolɛ’n su e bo maan e uka be nga be le ukalɛ’n i awuliɛ’n.
[Foto, bue 31]
Ɲanmiɛn i Sielɛ’n su jasin fɛ’n nga e bo kle e wiengu mun’n, ɔ kle kɛ e klo be.