‘Amun jran kekle, amun tra amun awlɛn!’

‛An tra amun awlɛn, mɛn nga nun wa’n, min yɛ n kwlaa-a.’—ZAN 16:33.

1. ?Ngue ti yɛ fanngan nga be wlali Izraɛlifuɛ mun’n, ɔ yoli i su ɔ?

KA NAAN Izraɛlifuɛ’m b’a kpɛ Zurdɛn nzue’n, naan b’a wlu mɛn nga Ɲanmiɛn seli be kɛ ɔ́ fá mán be’n i nun’n, Moizi seli be kɛ: ‘Amun jran kekle, amun tra amun awlɛn. Nán amun usu be ɲrun, nán srɛ kun amun afin [Zoova] amun Ɲanmiɛn’n ɔ nin amun wo nun, ɔ su kpɔciman amun.’ Kpɔkun Moizi flɛli Zozie, mɔ ɔ́ wá fá Izraɛlifuɛ mun wlú Kanaan mɛn’n nun’n, naan w’a wlɛ i fanngan kɛ ɔ jran kekle (Mmla’n 31:6, 7). I sin’n, Zoova bɔbɔ wa wlali Zozie i fanngan wie, ɔ seli i kɛ: “Jran kekle, yo yakpafuɛ. Jran kekle, ?A ti? Yo yakpafuɛ.” (Zozie 1:6, 7, 9). Lika’n i jranlɛ m’ɔ jrannin blɛ sɔ nun’n ti’n, ndɛ sɔ’n yoli i kanwlɛ su. Ɔ fata kɛ Izraɛlifuɛ’m be tra be awlɛn, afin be kpɔfuɛ nga be o Zurdɛn’n i bue kun lɔ’n, be le wunmiɛn kpa.

2. (a) ?Blɛ nga y’a wlu nun andɛ’n ti sɛ? (b) ?Yɛ ngue yɛ ɔ fata kɛ e yo ɔ?

² Andɛ kusu’n, Klistfuɛ’m be su wa wlu mɛn uflɛ nga Ɲanmiɛn seli kɛ ɔ́ fá mán be’n i nun. Ɔ maan kɛ Zozie sa’n, ɔ fata kɛ be kusu be tra be awlɛn wie (2 Piɛr 3:13; Sa Nglo Yilɛ 7:14). Sanngɛ, e alɛ liɛ’n timan kɛ alɛ nga Zozie kunnin’n sa. Zozie blɛ su’n, ɔ fali tokofi nin cua yɛ ɔ kunnin alɛ’n niɔn. Sanngɛ e alɛ liɛ’n, nán e nin klɔ sran yɛ e kun ɔn, e nin mmusu mun yɛ e kun ɔn. Ɔ maan e faman alɛ ninnge jrɛiin sa e kunman alɛ’n (Ezai 2:2-4; Efɛzfuɛ Mun 6:11-17). Kɛ Zozie wluli mɛn nga Ɲanmiɛn seli Izraɛlifuɛ mun kɛ ɔ́ fá mán be’n i nun’n, ɔ kunnin alɛ kekleekle kpa mun. Sanngɛ e liɛ’n, e dun mmua e kun e alɛ liɛ’n dɔ nga su kwlaa naan y’a wlu mɛn uflɛ’n nun. I sɔ ti’n, maan e nian sa nga be nun’n, ɔ fata kɛ e tra e awlɛn’n.

?Ngue ti yɛ ɔ fata kɛ e tu e klun e di Ɲanmiɛn junman’n niɔn?

3. ?Ngue ndɛ yɛ Biblu’n kɛn i e kpɔfuɛ’m be Min’n i su ɔ?

³ Akoto Zan seli kɛ: “E si kɛ e ti Nyanmiɛn liɛ yɛ Klunwifuɛ’n sie mɛn wunmuan’n.” (1 Zan 5:19). Ndɛ sɔ’n kle sa nga ti yɛ ɔ fata kɛ Klist­fuɛ’m be tu be klun be di Ɲanmiɛn junman naan be Ɲanmiɛn sulafilɛ’n w’a kpɔnzɔman’n. Kɛ Klist­fuɛ’m be tra be Ɲanmiɛn sulɛ’n nun kpa’n, i sɔ’n kle kɛ sɛ é kwlá sé’n, Satan i kwlalɛ’n w’a glɔ. Sanngɛ, kɛ “asɔmɔli [...] m’ɔ kpan sa’n,’ Satan wlanwlan Klistfuɛ mun, ɔ́ kúnndɛ dí be kɛ nnɛn sa (1 Piɛr 5:8). Ɔ maan, ɔ nin Klistfuɛ nga Ɲanmiɛn fɛli i wawɛ’n mannin be’n, ɔ nin be janvuɛ mun, be kun alɛ (Sa Nglo Yilɛ 12:17). Alɛ kunlɛ sɔ nun’n, Satan wlawla sran wie mun, wie liɛ’n be si kɛ Satan i klun sa yɛ be su yo ɔ. Wie liɛ kusu, be siman sɔ. Ɔ fata kɛ e tra e awlɛn naan y’a kwla jran kekle Satan nin i sran sɔ’m be ɲrun.

4. (a) ?Ngue ndɛ yɛ Zezi boli i jɔ ɔ? (b) ?Yɛ ayeliɛ kpa mennin yɛ Klistfuɛ’m be yili i nglo ɔ?

⁴ Kɛ mɔ Zezi si kɛ Satan nin i sran’m be su kplinman jasin fɛ’n bolɛ’n su’n ti’n, ɔ seli i sɔnnzɔnfuɛ’m be kɛ: “Bé wá fá amun wlá nyrɛnnɛn nun, bé kún amun, yɛ nvle’n kwlaa bé kpɔ́ amun n dunman nun.” (Matie 24:9). I sɔ ndɛ liɛ’n m’ɔ kpɛnnin su afuɛ ya kpɔlɛ klikli nun’n, ɔ kpɛn su wie andɛ. Nanwlɛ, ɲrɛnnɛn nga laa nun be kleli Zoova i Lalofuɛ mun’n, i kunngba’n yɛ be kle be nun wie mun andɛ ɔ. Sanngɛ, Klistfuɛ nga be su Ɲanmiɛn nanwlɛ nun’n be ­trali be awlɛn ɲrɛnnɛn sɔ’m be ɲrun. Be si kɛ “srongble’n i agualiɛ’n timan kpa” ti’n, be kunndɛ tɔman sa tɛ nun.—Nya. 29:25.

5, 6. (a) ?Sa mennin mun yɛ be nun’n, ɔ fata kɛ e tra e awlɛn ɔn? (b) ?Kɛ be bo Klistfuɛ nanwlɛfuɛ’m be awlɛn tralɛ’n i ta’n, be yo sɛ?

⁵ Sa wie mun be o lɛ ekun m’ɔ fata kɛ e tra e awlɛn be nun ɔn. Yɛle kɛ, wie’m be liɛ’n, kɛ be bo jasin fɛ’n be kle sran nga be simɛn i’n, ɔ ti klekle be sa nun. Suklu ba wie’m be liɛ’n, kɛ be seli be kɛ be kan ndɛ wie m’ɔ kle kɛ be fali be wun mannin be nvle’n annzɛ be nvle’n i flanga’n, i sɔ’n yoli be awlɛn tralɛ’n i ta bolɛ. Kɛ mɔ sɛ be yo sɔ’n, nn ɔ ti kɛ be su sɔ amuɛn ti’n, yakpa su, Klistfuɛ’m be mma mun be fa ajalɛ ng’ɔ ti kpa’n. I sɔ ayeliɛ’n, ɔ yo ɲɛnmɛn dan.

⁶ Kɛ e kpɔfuɛ’m be yo maan aladio nun, annzɛ televiziɔn nun, annzɛ fluwa wie’m be nun’n, be kan e wun ndɛ tɛtɛ’n, annzɛ kusu be wlawla sran mun kɛ be ‘kpɛ mmla be kle e ɲrɛnnɛn’n,’ i lɛ nun’n, ɔ fata kɛ e tra e awlɛn wie (Jue. 94:20). Maan e fa sunnzun ase kun e nian: ?Sɛ fluwa wie nun’n, annzɛ aladio nun’n, annzɛ kusu sɛ televiziɔn nun’n, be kan Zoova i Lalofuɛ’m be wun ndɛ tɛ’n, annzɛ be tɔn be suɛn’n, amún yó i sɛ? ?I sɔ’n bó amun nuan? Cɛcɛ o. Afin e si kɛ ninnge sɔ’m bé jú (Jue Mun 109:2). Kpɔkun, kɛ sran nga be kanngan fluwa sɔ’m be nun’n, annzɛ be tie ato ndɛ sɔ mun’n, be nun wie’m be bu ndɛ sɔ’m be nanwlɛ’n, i sɔ’n boman e nuan. Afin “sran nga i bɔbɔ ɔ kwlá ukɛ-mɛn i wun’n, ɔ lafi ndɛ kwlaa nga be kan kle i’n su.” (Nyanndra Mun 14:15). Sanngɛ ndɛ kwlaa nga sran’m be kɛn i Klistfuɛ be niaan’m be su’n, Klistfuɛ nga be su Ɲanmiɛn nanwlɛ nun’n be faman be wla guaman be su. Kpɔkun ndɛ sɔ’m be ti’n, be kpɛman be asɔnun aɲia’m be bo kɔlɛ i nun cɛn, annzɛ be jasin fɛ’n bolɛ’n kanman ase, annzɛ be Ɲanmiɛn sulafilɛ’n kpɔnzɔman. Sanngɛ nga be yo’n yɛle kɛ, be ‘fa be wun kle kɛ be ti Nyanmiɛn junman difuɛ [...] Cɛn’n wie be bu be sran, cɛn’n wie be gua be ɲin ase, cɛn’n wie be bo be dunman tɛ, yɛ cɛn’n wie be bo be dunman kpa. [Be kpɔfuɛ mun] be bu be gblɛfuɛ, sanngɛ be di nanwlɛ.’—2 Korɛntfuɛ Mun 6:4, 8.

7. ?Kosan cinnjin kpa mennin mun yɛ ɔ fata kɛ e usa e wun ɔn?

⁷ Pɔlu klɛli Timote fluwa, ɔ seli i kɛ: “Nyanmiɛn a fɛ-mɛn i wawɛ’n ɔ’a man-man e kɛ e sa nyan, sanngɛ ɔ fa mannin e kɛ ɔ wla e fanngan [...] I sɔ’n ti, nán maan nyannzuɛn kun wɔ e Min’n i ndɛ kanlɛ [...] ti.” (2 Timote 1:7, 8; Mark 8:38). Kɛ e wie ndɛ nga kanngan cɛ’n, e usa e wun kosan yɛ mun: ?Min Ɲanmiɛn sulafilɛ’n ti’n, ɲannzuɛn kun min? ?Annzɛ n ti yakpafuɛ? ?Maan ɔ yo min junman ­diwlɛ lɔ o, annzɛ suklu lɔ o, sran kwlaa si kɛ n ti Zoova i Lalofuɛ? ?Annzɛ n fia su? ?Ninnge nga n wiengu’m be yo’n mɔ n yoman wie’n ti’n, ɲannzuɛn kun min? ?Annzɛ kusu, kɛ mɔ n yoman sa kɛ be sa, n klun jɔ e nin Zoova e afiɛn’n m’ɔ sɛ su? Sɛ jasin fɛ’n bolɛ’n ti, annzɛ Ɲanmiɛn sulafilɛ’n ti, ɲannzuɛn kun sran kun’n, annzɛ srɛ kun i’n, maan i wla kpɛn Zozie i afɔtuɛ nga Zoova fa mɛnnin i’n su. Ɔ seli i kɛ: “Jran kekle, yo yakpafuɛ.” Nán e junman diwlɛ lɔ sran mun annzɛ e suklu lɔ janvuɛ’m be ɲrun dunman yɛ e kunndɛ ɔ, sanngɛ Zoova nin Zezi Klist be ɲrun dunman yɛ e kunndɛ ɔ.—Galasifuɛ Mun 1:10.

?É yó sɛ naan y’a kwla tra e awlɛn?

8, 9. (a) ?Blɛ wie nun’n, wafa sɛ yɛ be boli Klist­fuɛ klikli’m be yakpa yolɛ’n i ta ɔ? (b) ?Kɛ be kleli Piɛli nin Zan be yalɛ’n, ngue yɛ be yoli ɔ? ?Yɛ ngue yɛ ɔ juli ɔ nin i wiengu’m be su ɔ?

⁸ ?É yó sɛ naan ɲrɛnnɛn blɛ nga nun’n, y’a kwla jran kekle naan e Ɲanmiɛn sulɛ’n w’a taka kpa ɔ? ?Amun nian, ngue yɛ Klistfuɛ klikli’m be yoli naan b’a kwla jran kekle ɔ? Kɛ Ɲanmiɛn ɲrun jranfuɛ’m be nin Zerizalɛmu lɔ kpɛnngbɛn’m be seli Piɛli nin Zan be kɛ, be yaci Zezi dunman bolɛ’n, amun e nian like nga be yoli’n. Zezi i sɔnnzɔnfuɛ sɔ’m b’a kplinman su. I sɔ ti’n, be kannvunnin be naan b’a yaci be nun. I sin’n, be ɔli be wiengu’m be sin, kpɔkun be kwlaa be mannin be nɛn’n su be seli Ɲanmiɛn kɛ: “Nannan Nyanmiɛn, nian e wlanwlanlɛ bɔ be wlanwlan ye-ɔ, i sɔ’n ti siɛn’n, yo maan ɔ sran’m be kan ɔ ndɛ’n yakpa su.” (Sa Nga Be Yoli’n 4:13-29). Kɛ be kannin ndɛ’n wieli’n, Zoova fɛli i wawɛ’n mannin be, naan b’a yo yakpafuɛ. Ɔ maan Zuifu’m be kpɛnngbɛn’m be seli be kɛ b’a fa ndɛ sɔ’n b’a “tru Zerizalɛmu klɔ’n nun.”—Sa Nga Be Yoli’n 5:28.

⁹ Amun e bu sa nga be yoli i blɛ sɔ nun’n, be su angunndan e nian. Kɛ Zuifu’m be kpɛnngbɛn’m be kannvun­nin Zezi i sɔnnzɔnfuɛ mun’n, b’a yaciman jasin fɛ’n i bolɛ. Sanngɛ be srɛli Ɲanmiɛn kɛ ɔ yo maan be bo jasin fɛ’n i yakpa su. Kɛ be miannin be ɲin be yoli ndɛ nga be kan kleli Ɲanmiɛn’n i nuan su like’n, Zoova fɛli i wawɛ’n wlali be fanngan. Sa sɔ’n m’ɔ juli’n, ɔ kle kɛ fluwa nga i sin’n, Pɔlu wa klɛli’n, ɔ ti Klistfuɛ nga be kle be yalɛ’n be liɛ. I waan: “[Ɲanmiɛn] b’ɔ wla n fanngan’n ti’n, n kwla like kwlaa yo.”—Filipfuɛ Mun 4:13.

10. ?Wafa sɛ yɛ sa nga Zeremi wunnin i’n kwla uka be nga be ti ɲan safuɛ mun ɔn?

¹⁰ ?Yɛ, sɛ sran’n ti ɲan safuɛ nin? ?Sɛ be kle i yalɛ’n, ɔ kwla tu i klun su Zoova? Ɔ kwla yo sɔ. Kɛ Zoova kpali Zeremi kɛ ɔ yo i nuan ijɔfuɛ’n, maan e wla kpɛn ndɛ nga Zeremi kannin’n su. Ɔ seli kɛ: “N ti bakan.” I ndɛ sɔ’n kle kɛ, ɔ yoli srongble. Sanngɛ, Zoova wlɛli i fanngan, ɔ seli i kɛ: “Nán se kɛ a ti bakan, sran nga n sunman wɔ be sin’n, kɔ be kwlaa be sin. Ndɛ kwlaa nga n waan a kan’n, kan. Nán yo srongble sran fi nyrun, afin n jin ɔ sin, ń dé wɔ.” (Zeremi 1:6-10). Zeremi fɛli i wla guali Zoova su, ɔ maan w’a sisimɛn i bo, i ti’n ɔ yoli Izraɛli blɛ su juejue su jasin bofuɛ kpa.

11. ?Fanngan wlalɛ mennin yɛ andɛ Klistfuɛ’m be ɲɛn i kɛ Zeremi liɛ’n sa ɔ?

¹¹ Junman nga be fa mannin Zeremi, i kunngba’n yɛ andɛ be fa mannin Klistfuɛ nga Ɲanmiɛn fɛli i wawɛ’n mannin be’n mun ɔn. Ɔ maan sɛ sran’m be sɔman be nun kpa o, sɛ be sri be o, yɛ sɛ be kle be yalɛ o, sanngɛ be nin “sran kpanngban kpa” mɔ be ti “bua’m be wie mun’n,” be yaciman Zoova i ndɛ’n i kanlɛ (Sa Nglo Yilɛ 7:9; Zan 10:16). Fanngan nga Zoova wlali Zeremi kɛ: “Nán yo srongble,” be fa be awlɛn sie su. Be si kɛ Ɲanmiɛn yɛ ɔ sunmannin be ɔ, i ti’n, i ndɛ’n yɛ be kan ɔn.—2 Korɛntfuɛ Mun 2:17.

Yakpa yolɛ’n i su ajalɛ kpa ng’ɔ fata kɛ e fa be su’n

12. a) ?Yakpa yolɛ ajalɛ kpa mennin yɛ Zezi yili i nglo ɔ? (b) ?Yɛ wafa sɛ yɛ ɔ wlali i sɔnnzɔnfuɛ’m be fanngan ɔn?

¹² Sran wie mun ekun be yoli yakpa kɛ Zeremi sa. Sɛ e bu be ayeliɛ kpa’n i su angunndan’n, e kwla yo yakpa wie (Jue Mun 77:12). I nun mɔ Satan láka Zezi’n, ɔ nin kɛ Zuifu’m be kpɛnngbɛn’m be kunndɛli kɛ bé jrɛ́n i junman’n, kɛ e nian Zezi i yakpa yolɛ’n, ɔ bo e nuan (Lik 4:1-13; 20:19-47). Fanngan mɔ Zoova wlɛli i’n ti’n, Zezi w’a usuman le. Ɔ maan ka naan w’a wu’n, ɔ seli i sɔnnzɔnfuɛ’m be kɛ: “Amun wá wún amun nyin su kpa, sanngɛ an tra amun anwlɛn, mɛn nga nun wa’n, min yɛ n kwlaa-a.” (Zan 16:33; 17:16). I sɔ’n kle kɛ sɛ Zezi i sɔnnzɔnfuɛ’m be yo kɛ i sa’n, be kusu bé ɲán kwlalɛ’n wie (1 Zan 2:6; Sa Nglo Yilɛ 2:7, 11, 17, 26). Sanngɛ ɔ fata kɛ be “tra be anwlɛn.”

13. ?Fanngan mennin yɛ Pɔlu wlali Filipu lɔ Klist­fuɛ mun ɔn?

¹³ Kɛ Zezi wuli m’ɔ dili afuɛ lɔun kan’n, be wa fali Pɔlu nin Silasi yili be bisua Filipu klɔ’n nun lɔ. I sin’n, Pɔlu wlali Filipu lɔ Klistfuɛ’m be fanngan, ɔ seli be kɛ: ‘Amún bo yo kun, amun jran kekle, yɛ amun akunndan’n yo kun, yɛ an mian amún ɲin jasin fɛ’n mɔ an lafi su’n ti. Nán an lo amun wun man amun kpɔfuɛ mun maan be wla amun srɛ sa fi nun.’ Kɛ ɔ ko yo naan be sa sin w’a bubuman be ti’n, Pɔlu seli be kɛ: “[Ɲrɛnnɛn nga be kle Klistfuɛ mun’n] ɔ kle be [kpɔfuɛ mun] kɛ bé mlín, yɛ amun kusu amún nyán amun ti, Nyanmiɛn yɛ ɔ sieli i sɔ-ɔ, afin nán Krist sulafilɛ ngunmin yɛ Nyanmiɛn maan amun lafi-ɔ, sanngɛ ɔ maan amun wun nyrɛnnɛn i dunman nun ekun.”—Filipfuɛ Mun 1:27-29.

14. ?Pɔlu i yakpa yolɛ’n guali sɛ mɛnnin i Rɔmu lɔ?

¹⁴ I nun mɔ Pɔlu klɛ́ Filipfuɛ Mun’n, nn b’a wlɛ i bisua Rɔmu lɔ. Sanngɛ i sɔ nun’n, w’a yaciman jasin fɛ’n bolɛ yakpa su. ?I sɔ yolɛ’n guali sɛ mannin Pɔlu? Ɔ seli kɛ: “Sa sɔ’n ti’n, be nga be nian famiɛn’n i awlo’n su’n be kwlaa, be nin sran’m be kwlaa be si kɛ Krist ti yɛ be wlali min bisua-a. Kɛ e niaan’m be nun lɔuun kpa be tili i kɛ n wo bisua nun’n, be fa be wla gua e Min’n su kpa tra laa’n, ɔ maan be tra be anwlɛn be kan Nyanmiɛn ndɛ’n, yɛ srɛ kun-man be.”—Filipfuɛ Mun 1:13, 14.

15. ?Ninfan yɛ e kwla ɲan ajalɛ kpa m’ɔ kwla wla e fanngan naan y’a tra e awlɛn ɔn?

¹⁵ Pɔlu i ajalɛ kpa’n wla e fanngan. Klistfuɛ nga e blɛ liɛ nun’n, be jrannin kleli ɲrɛnnɛn nga famiɛn wlɛfuɛ’m be kle be’n, i nun’n, annzɛ ɲrɛnnɛn nga be nga be tɔn be wun suɛn kɛ be ti Klistfuɛ’n be su kpɛnngbɛn’m be kleli be’n i nun’n, be man e ajalɛ kpa wie. Be kannin wie’m be ndɛ e fluwa Sasafuɛ Tranwlɛ’n, ɔ nin periodiki Réveillez-Vous!, yɛ Annuaire des Témoins de Jéhovah, be nun. Kɛ e kanngan sran sɔ’m be su ndɛ’m be nun’n, e wun kɛ be ti sran kɛ e sa; sanngɛ ɲrɛnnɛn wafawafa kwlaa nun’n, Zoova m’ɔ kwla like kwlaa yo’n, ɔ yoli maan be jrannin kekle. Sɛ e kusu e srɛ i sa kwlaa nun’n, e si kɛ ɔ́ yó i nuan su like mán e, yɛ é ɲán kwlalɛ sɔ’n wie.

E yakpa yolɛ’n manman Zoova kpɔkun ɔ jɔ i klun

16, 17. ?Wafa sɛ yɛ andɛ e kwla suan yakpa yolɛ’n niɔn?

¹⁶ Sɛ Klistfuɛ kun jran nanwlɛ nin sa kpa yolɛ’n be sin kekle’n, nn ɔ ti yakpafuɛ. Sɛ srɛ kun i naan sanngɛ ɔ jran kekle’n, nn ɔ ti yakpafuɛ dan. Nanwlɛ, Klistfuɛ kwlaa nga ɔ miɛn i ɲin yo Zoova klun sa’n, naan ɔ fɛ i wla’n guɛ i su tititi’n, kpɔkun sɛ sa kwlaa nun i wla kpɛn laa sa nga Zoova yoli fa wlali i sufuɛ’m be fanngan’n be su’n, ɔ kwla trɛ i awlɛn. Asa ekun, kɛ mɔ e si kɛ e awlɛn tralɛ’n manman Zoova kpɔkun ɔ jɔ i klun’n ti’n, é mían e ɲin kpa naan y’a kpɔnzɔman. E mian e ɲin e jran kekle sran srilɛ’n, annzɛ sran yalɛ klelɛ’n i ɲrun, afin e klo Ɲanmiɛn klun sa yolɛ.—1 Zan 2:5; 4:18.

¹⁷ Like ng’ɔ fataman kɛ e wla fi su’n yɛle kɛ, sɛ e Ɲanmiɛn sulafilɛ’n ti be kle e ɲrɛnnɛn’n, nán kɛ e yoli sa tɛ kun ti ɔ (1 Piɛr 3:17). Kɛ mɔ e jran Zoova mɔ i kunngba cɛ y’ɔ ti famiɛn’n i sin’n, mɔ e yo sa ng’ɔ ti kpa’n, kpɔkun mɔ e timan mɛn’n nunfuɛ’n, i ti yɛ e wun ɲrɛnnɛn ɔn. I lɛ nun’n, akoto Piɛli seli kɛ: ‘Sɛ an yo sa kpa mɔ be blu su be kle amun nyrɛnnɛn’n, mɔ nyrɛnnɛn sɔ’n ɔ sɔn amun nun’n, i sɔ’n yɛ ɔ yo Nyanmiɛn fɛ ɔ.’ Ɔ seli ekun kɛ: “Be nga be nyrɛnnɛn wunlɛ’n ɔ ti Nyanmiɛn klun su’n, maan be fa be wun man Nyanmiɛn b’ɔ yili be’n, bɔ be kwla fa be wla guɛ i su’n. Maan be yo sa ng’ɔ ti kpa’n tititi.” (1 Piɛr 2:20; 4:19). Nanwlɛ, e Ɲanmiɛn sulafilɛ’n jɔ Zoova klun, yɛ e ninnge’m be yolɛ’n mɛnmɛn i. ?I sɔ sa liɛ’m be wlaman e fanngan kɛ e yo yakpafuɛ?

Mɛn nun famiɛn’m be ɲrun ijɔlɛ

18, 19. ?Kɛ e jran kekle yakpa su jɔlɛ difuɛ’m be ɲrun’n, ndɛ mennin yɛ e yi i nglo ɔ?

¹⁸ Kɛ Zezi seli i sɔnnzɔnfuɛ’m be kɛ bé wá klé be ɲrɛnnɛn’n, ɔ seli be ekun kɛ: “[Sran mun] bé wá fá amun kɔ́ jɔlɛ difuɛ’m be ja su, bé bó amun nin ngble be Nyanmiɛn ndɛ suanlɛ nin srɛlɛ sua’m be nun. Bé fá amun kɔ́ be bɔ be sie mɛn’n nin famiɛn’m be ja su min ti naan an kan min ndɛ kle be nin be bɔ be ti-man Zuif’n.” (Matie 10:17, 18). Ɔ fata kɛ e yo yakpafuɛ naan sɛ be tɔn e suɛn, y’a kwla jran jɔlɛ difuɛ mun annzɛ famiɛn’m be ɲrun. Sanngɛ, sɛ blɛ sɔ nun’n, e bo jasin fɛ’n yakpa su e kle jɔlɛ difuɛ mun’n, nn e su jran ɲrɛnnɛn mɔ be kle e’n su é yó like cinnjin kpa kun. Yɛle kɛ, e su se jɔlɛ difuɛ’m be kɛ maan be wla kpɛn Zoova i ndɛ ng’ɔ kɛnnin i Jue Mun ndɛ tre nɲɔn nun’n, i su. I waan: “I ti’n, famiɛn mun, amun yo ngwlɛlɛfuɛ. Asiɛ’n su jɔlɛ difuɛ mun, amun jran maan be man amun afɔtuɛ. Sɛ amún sú [Zoova] amun su i nin anyinyiɛ.” (Jue Mun 2:10, 11). Wie liɛ’n, be tɔn Zoova i Lalofuɛ’m be suɛn. Sanngɛ mmla ng’ɔ kle kɛ sran ngba kwla su Ɲanmiɛn i wafa ng’ɔ klo’n, kɛ jɔlɛ difuɛ’m be jran su be di e jɔlɛ’n, i sɔ’n jɔ e klun kpa. Sanngɛ e kpɔfuɛ’m be wlawla jɔlɛ difuɛ wie mun. Biblu’n se jɔlɛ difuɛ sɔ’m be kɛ: “Amun jran maan be man amun afɔtuɛ.”

¹⁹ Maan jɔlɛ difuɛ’m be si weiin kɛ Zoova i mmla mun yɛ be ti mmla kwlaa be ti’n niɔn. Maan be wla kpɛn su kɛ Zoova nin Zezi Klist bé wá dí sran kwlaa, ɔ nin jɔlɛ difuɛ’m be bɔbɔ, be jɔlɛ (Rɔmfuɛ Mun 14:10). I sɔ’n ti’n, maan klɔ sran jɔlɛ difuɛ’m be di e jɔlɛ kpa o, annzɛ maan be di e ndɛ kwlɛ o, e liɛ’n, é sú Zoova yakpa su. Afin ɔ jin e sin. Biblu’n waan: “Sran ng’ɔ kunndɛ fiawlɛ i nun’n, i liɛ su ti ye.”—Jue Mun 2:12.

20. ?Ngue ti yɛ sɛ be kle e yalɛ’n naan be tɔn e suɛn’n, maan e klun jɔ ɔ?

²⁰ Kɛ Zezi kán Ɲanmiɛn Ndɛ’n i oka’n su’n, ɔ seli kɛ: “Kɛ bé kpɛ́ amun nzowa, bɔ bé klé amun yalɛ, bɔ bé tɔ́n amun suɛn tɛtɛ’n kwlaa n dunman nun’n, amun liɛ su ti ye, yɛlɛ kɛ amun mo’n ɔ́ wá yó dan nyanmiɛn su lɔ. I sɔ’n ti, maan amun klun jɔ, maan amun wun blibli amun. Afin laa kɛ be kleli Nyanmiɛn nuan ijɔfuɛ’m be yalɛ sɔ-ɔ, i sin naan b’a wu amun.” (Matie 5:11, 12). Nanwlɛ, sran fi kloman kɛ be kle i yalɛ. Sanngɛ kɛ e jran kekle yalɛ klelɛ’n, ɔ nin suɛn tɔnlɛ’n be ɲrun’n, i sɔ’n man aklunjuɛ. E kekle jranlɛ’n kle kɛ Zoova klun jɔ e wun naan é ɲɛ́n i su akatua. E awlɛn tralɛ’n kle kɛ e o nanwlɛ’n nun. Kpɔkun e lafi su kɛ Zoova i klun jɔ e wun. Nanwlɛ, i sɔ ayeliɛ’n kle kɛ e lafi Zoova su. E Ɲanmiɛn sulafilɛ sɔ’n m’ɔ ti Klistfuɛ’m be cinnjin kpa, yɛ é wá kɛ́n i ndɛ e ɲrun lɔ like suanlɛ’n nun ɔn.

?Ngue yɛ amun suannin ɔn?

• ?Andɛ sa mennin be nun yɛ ɔ fata kɛ e tra e awlɛn ɔn?

• ?Wafa sɛ ye e kwla suan nzuɛn kpa kɛ awlɛn tralɛ sa’n niɔn?

• ?Wan mun yɛ be awlɛn tralɛ’n ti ajalɛ kpa’n niɔn?

• ?Ngue ti yɛ ɔ fata kɛ e yo like yakpa su ɔ?