Mɛn tɛ nga nun’n, nán e yaci sran’m be kpa yolɛ le
“Like ng’ɔ nin sran fata’n yɛlɛ nanwlɛ’n, [klun ufue yolɛ’n, NW].”—NYANNDRA MUN 19:22.
1. ?Ngue ti yɛ sran’m be kpa yolɛ’n kwla yo kekle’n niɔn?
?AMUN bu amun wun kɛ amun ti sran kpa yofuɛ? Sɛ amun ti i sɔfuɛ’n, mɛn tɛ nga nun tranlɛ’n kwla yo kekle man amun. E si kɛ Biblu’n nun’n, sran ye yolɛ’n ti ‘sa nga Ɲanmiɛn wawɛ’n maan sran yo’n,’ be nun kun. ?Sanngɛ, ngue ti yɛ sran’m be kpa yolɛ’n w’a yo kekle klɔ bɔbɔ nga be nunfuɛ’m be se be wun kɛ be ti Klistfuɛ’n be nun’n niɔn (Galasifuɛ Mun 5:22)? Like suanlɛ ng’ɔ sinnin lɛ nun’n, e wunnin kɛ ndɛ nga akoto Zan kannin’n ɔ tɛ kosan sɔ’n su kan. Yɛle kɛ, aolia nun sran klunwifuɛ kun mɔ yɛle mmusu’m be si Satan’n, yɛ ɔ sie mɛn’n niɔn (1 Zan 5:19). Zezi Klist kusu seli kɛ “sran ng’ɔ sie mɛn nga’n,” yɛle Satan (Zan 14:30). Klunwifuɛ sɔ’n i nzuɛn’n kusu yɛ e wun i mɛn’n nun ɔn.—Efɛzfuɛ Mun 2:2.
2. ?Sa mennin’m be ti yɛ sran’m be kpa yolɛ’n kwla yo kekle man e ɔ?
2 Kɛ sran wie yo e tɛtɛ’n, e wla bo e wun. E tɛ yofuɛ sɔ’n kwla yo e mantanfuɛ wie, annzɛ sran tɛ wie mɔ e simɛn i’n. Ɔ ju cɛn wie bɔbɔ’n, e janvuɛ mun nin e awlo nunfuɛ mun yɛ be yo e tɛ ɔ. Wieliɛ kusu’n, sran nga be nuan nun ndɛ yo ya’n, annzɛ be yo be wiengu kpokokpoko’n, annzɛ kusu be kan ndɛ tɛtɛ’n, be afiɛn yɛ e tran ɔn. I sɔ’n nun kusu’n, e wunman e wun fɛ. E tɛtɛ sɔ mɔ sran’m be yo’n ti’n, e kwla kpɔ e wiengu, kpɔkun e kunndɛ kɛ sran nga be yo e tɛ’n, é yó be tɛ kunngba’n wie. I sɔ yolɛ’n kusu kwla saci e nin Ɲanmiɛn e afiɛn, annzɛ ɔ kwla man e tukpaciɛ.—Rɔmfuɛ Mun 12:17.
3. ?Sa mennin mun yɛ be o sran’m be su mɔ i ti yɛ be wiengu’m be kpa yolɛ’n kwla yo kekle man be ɔ?
3 Mɛn’n nun sa’m be ti kusu maan sran’m be kpa yolɛ’n kwla yo kekle man e. I wie yɛle kɛ kakawlongafuɛ mun nin nzaje sa mun, ɔ nin nvle wie mun mɔ be kwla fa alɛ kunlɛ ninnge tɛtɛ mun be to yi be wiengu’m be su’n ti’n, sran’m be klun titi be cɛn kwlaa. Asa ekun’n, yalɛ’n mɔ w’a di sran kpanngban ti’n, be ɲanman aliɛ kpa be diman. Be leman sua kpa naan b’a la nun, be leman tralɛ, yɛ be kwlá yoman be wun dɔɔtrɔ ayre kɛ ɔ nin i fata’n sa. Sran nga sa kɛ ngalɛ’n sa’m be o i su m’ɔ wunmɛn i ɲrun ɔ wunmɛn i sin’n, nanwlɛ, i wiengu’m be kpa yolɛ’n kwla yo kekle mɛn i.—Akunndanfuɛ’n 7:7.
4. ?Sran’m be kpa yolɛ’n i su angunndan tɛ mennin yɛ sran wie’m be kwla bu ɔ?
4 Sran kun kwla bu i kɛ i wiengu’m be kpa yolɛ’n timan like cinnjin naan i kpa bɔbɔ’n, i sɔ’n kwla yo lufle yolɛ. I li bɔbɔ sɛ sran’n w’a yoman sa fi mɔ sanngɛ be yo i tɛtɛ’n, ɔ kwla se kɛ be buli i lufle (Jue Mun 73:2-9). Sanngɛ, Biblu’n kle e ajalɛ ng’ɔ ti kpa kɛ e fa’n. I waan: “Sɛ sran fa ya kan ndɛ tɛ kle wɔ naan a tɛ i su amanniɛn su’n, i ya’n ɔ jɔ. Jɔlɛ tɛ’n ɔ klɔklɔ ya.” (Nyanndra Mun 15:1). Amanniɛn su ijɔlɛ nin ye yolɛ’n mɔ be ti sa nga Ɲanmiɛn wawɛ’n maan sran yo’n be nun like nɲɔn’n, ayeliɛ sɔ’m be afiɛn’n ti kun. Ɔ maan sa kwlaa ɲrun’n, be kwla uka e maan e jran kekle.
5. ?Nin yɛ ɔ fata kɛ e yo sran’m be kpa ɔ?
5 Kɛ mɔ sa nga Ɲanmiɛn wawɛ’n maan sran yo’n be nglo yilɛ’n ti e mɔ e ti Klistfuɛ’n e like cinnjin kpa’n ti’n, ɔ fata kɛ e wun wafa nga e kwla yi ye yolɛ’n i nglo’n i wlɛ kpa. ?Mɛn tɛ nga nun’n, e kwla yo sran’m be kpa titi? ?Sɛ e tɛ su kɛ ɛɛn’n, ninfan yɛ e kwla kle kɛ e kluman e ti Satan i mɛn tɛ’n i bo naan sanngɛ sa’n kwlaa nun’n e kwla yo sran’m be kpa ɔ? Maan ɔ yo awlo lɔ o, ɔ nin junman diwlɛ lɔ nin suklu lɔ o, yɛ e nin e mantanfuɛ mun e afiɛn lɔ o, ɔ nin jasin fɛ’n bolɛ’n nun o, ɔ nin e niaan Klistfuɛ’m be afiɛn o, wafa nga e kwla yo sran’m be kpa titi’n, amun e yiyi nun e nian.
Maan awlo lɔ’n, e yo sran’m be kpa
6. ?Ngue ti yɛ awlo nunfuɛ’m be wiengu kpa yolɛ’n ti like cinnjin’n niɔn? ?Yɛ wafa sɛ yɛ be kwla yi i sɔ liɛ’n i nglo ɔ?
6 Sɛ e waan Zoova yra e su naan ɔ bo e ɲrun atin’n, ɔ ti cinnjin kpa kɛ e suan sa nga Ɲanmiɛn wawɛ’n maan sran yo’n be nglo yilɛ kpa (Efɛzfuɛ Mun 4:32). Amun e nian sa nga ti yɛ ɔ ti cinnjin kpa kɛ awlo nunfuɛ’m be yo be wiengu kpa’n. Cɛn kwlaa be ninnge’m be yolɛ nun’n, ɔ fata kɛ siɛ nin niɛn’n be bɔbɔ be afiɛn’n, yɛ be nin ba mun be afiɛn’n be yo be wiengu kpa (Efɛzfuɛ Mun 5:28-33; 6:1, 2). Be wiengu kpa yolɛ sɔ’n, ɔ fata kɛ i ɲin fite wafa nga be kan ndɛ kle be wiengu’n, i nun. Yɛle kɛ be si nin be nin’m be sran bulɛ nun’n, maan ba’m be yo sran kpa yɛ be ɲin yi be. Kpɔkun maan siɛ nin niɛn’m be kusu be fa sa ng’ɔ ti su’n be yo be mma mun. I wie yɛle kɛ nán maan be kpli be bu ba’m be fɔ, sanngɛ, maan be mo yolɛfuɛ’n yɛ ɔ yo pɔpɔ be nuan’n nun ɔn.
7, 8. (a) ?Sɛ e waan é yó awlo nunfuɛ’m be kpa’n, nzuɛn mennin yɛ ɔ fata kɛ e wlɛ i ase ɔ? (b) ?Ngue ti yɛ amanniɛn su yalɛ kokolɛ’n ɔ ti awlo’n nun like kpa ɔ? (c) ?Wafa sɛ yɛ amun kwla yo amun awlo lɔfuɛ’m be kpa ɔ?
7 E awlo nunfuɛ’m be kpa yolɛ’n i wie yɛle afɔtuɛ nga akoto Pɔlu mannin’n i su falɛ’n. I waan: ‘An yaci sa sɔ’n kwlaa: ya falɛ, awlɛn fufu, klunwi, sran wun sacilɛ, nin ndɛ tɛtɛ m’ɔ fin amun nuan fite’n.’ Klistfuɛ’m be awlo nunfuɛ’m be afiɛn’n, ɔ fata kɛ cɛn kwlaa be nin be wiengu be ijɔ amanniɛn su. ?Ngue ti ɔ? Afin kɛ awlo nunfuɛ’m be ti be wun aniɛn’n, awlo’n yo kpa kpɔkun i nun tranlɛ’n yo fɛ. Sɛ ndɛ tɔ awlo nun’n, nán amun bu ndɛ’n yi i amun wiengu su. Sanngɛ amun siesie. I liɛ’n, ya’n kán ase. Awlo nga i nun tranlɛ’n yo fɛ’n, i nunfuɛ’m be mian be ɲin be yo be wiengu kpa, kpɔkun be bu be wiengu sran.—Kolɔsfuɛ Mun 3:8, 12-14.
8 Sran’m be kpa yolɛ’n timan like tɛ, ɔ ti like kpa. Ɔ su e bo maan e kunndɛ wafa nga e kwla uka e wiengu’n, annzɛ e kwla bu i sran’n. Sanngɛ sɛ e waan i sɔ’n yo ye awlo nun’n, ɔ fataman kɛ ɔ yo sran kunngba sa nun ndɛ. Kɛ awlo nunfuɛ be kwlaa be yo be wiengu kpa’n, Ɲanmiɛn yra awlo’n su. Kpɔkun, asɔnun’n nun’n, ɔ nin be tranwlɛ lɔ’n, awlo nunfuɛ’m be ayeliɛ’n manman Zoova m’ɔ ti aklunyefuɛ dan’n.—1 Piɛr 2:12.
Maan junman diwlɛ lɔ’n, e yo sran’m be kpa
9, 10. Amun yiyi sa wie mun mɔ be kwla tɔ junman diwlɛ lɔ’n, be nun. Kpɔkun wafa nga e kwla fa sran’m be kpa yolɛ ajalɛ’n e siesie ndɛ sɔ mun’n, amun yiyi nun wie.
9 Junman kun mɔ Klistfuɛ kun ɔ nin i wiengu’m be di i likawlɛ cɛn kwlaa’n ti’n, i wiengu junman difuɛ’m be kpa yolɛ’n kwla yo kekle mɛn i. Kɛ aɲinciɛ ko tran junman difuɛ’m be afiɛn’n, be kwla yo be wiengu abɔlɛ, annzɛ be di be wiengu wun abla be kle be min’n (Akunndanfuɛ’n 4:4). I sɔ ngalɛ nun’n, be wiengu i kpa yolɛ’n yo kekle man be. Sanngɛ, nán an wla fi su mlɔnmlɔn kɛ, sran’m be kpa yolɛ’n yɛ ɔ ti like kpa’n niɔn. Afin like ng’ɔ nin Zoova i sufuɛ’n fata’n, yɛle kɛ ɔ miɛn i ɲin yo like kwlaa nga ɔ kwla yo naan w’a ɲan sran mun’n. Sran’m be wun angunndan kpa bulɛ’n, ɔ kwla uka e i sɔ yolɛ’n nun. Yɛle kɛ wie liɛ’n, sɛ e wiengu junman difuɛ’n kun kpinndinman, annzɛ i awlo nunfuɛ’n kun kpinndinman’n, maan e usɛ i sɔfuɛ’n i osu, e kle kɛ i ndɛ lo e. I sɔ yolɛ’n kwla ɲan ta klanman kpa. Nanwlɛ, ɔ fata kɛ Klistfuɛ’m be kunndɛ like kwlaa nga be kwla yo’n naan ndɛ w’a tranman be nin be wiengu’m be afiɛn’n. Wieliɛ’n, ndɛ’n i kanlɛ amanniɛn su m’ɔ kle kɛ sran’n i ndɛ lo e’n, ɔ́ kwlá yó sa ye.
10 Sa ng’ɔ kwla tɔ junman’n su lɔ ekun’n, yɛle kɛ junman su kpɛn’n kwla se i junman difuɛ’m be kɛ be yo sa wie m’ɔ yi be nvle’n i klolɛ’n i nglo’n. Wie kusu ɔ kwla yo cɛn wie’m be dilɛ m’ɔ nin Ɲanmiɛn ndɛ’n be kɔman likawlɛ’n. Sɛ Klistfuɛ kun kplinman sa sɔ’m be yolɛ’n su wie’n, wieliɛ’n i sɔ’n kwla kpɛ ɔ nin i min’n be afiɛn ndɛnngan. Blɛ sɔ nun’n, ɔ nin i fataman kɛ e yiyi nun lele e kle like nga ti yɛ ɔ timan su kɛ e di e min’n i ndɛ’n su’n. Afin i kwlaa yoli o, be nga be timan Klistfuɛ’n, be le atin be kwla se kɛ bé yó sa sɔ’n (1 Piɛr 2:21-23). Like nga e kwla yo’n yɛle kɛ, sa nga ti yɛ e bɔbɔ e yoman sa sɔ’n wie’n maan e yiyi nun amanniɛn su. Sɛ i sɔ’n nun be yo amun finfin’n, nán amun tɛ su. Ɔ ti kpa kɛ Klistfuɛ’m be fa Rɔmfuɛ Mun 12:18 i nun afɔtuɛ’n su. I waan: ‘Like kwlaa nga amun kwla yo mɔ amun nin sran su kanman ndɛ’n, amun yo.’
Maan suklu lɔ’n, e yo sran’m be kpa
11. ?Ngue ti yɛ suklu ba’m be wiengu’m be kpa yolɛ’n kwla yo kekle man be ɔ?
11 E nun gbaflɛn nin talua nga be kɔ suklu’n, be wiengu suklu ba’m be kpa yolɛ’n kwla yo kekle man be. Suklu ba’m be kunndɛ kɛ be suklu lɔ’n, be wiengu’m be klo be sa. I sɔ’n ti’n, wie’m be fa ɲin kekle yolɛ’n be kle be wun. Wieliɛ kusu’n, be mianmian be wiengu mun, annzɛ be yo be kpokokpoko (Matie 20:25). Sran wie mun ekun be liɛ’n, be wun kpinngbinlɛ nun’n, annzɛ like uflɛ yolɛ’n nun yɛ be kle be wun ɔn. Yɛle kɛ, ninnge sɔ mɔ be si be yo’n ti’n, be yo be wun dandan be wiengu’m be su. Be bu i kɛ sɛ be yo sɔ’n, nn b’a yo kpa tra be wiengu mun. Ɔ fata kɛ Klistfuɛ gbaflɛn nin talua’m be nian be wun su kpa naan b’a yoman kɛ be wiengu sɔ’m be sa (Matie 20:26, 27). Akoto Pɔlu seli kɛ: ‘Sran m’ɔ klo sran’n, ɔ trɛ i awlɛn sran wun, ɔ yo aklunye, ɔ diman tutre, ɔ tumɛn i wun.’ Ɔ fataman kɛ Klistfuɛ’n ɔ sɔnnzɔn i wiengu’m be ayeliɛ sɔ’n. Sanngɛ suklu lɔ’n, ɔ fata kɛ ɔ fa Biblu’n nun afɔtuɛ’m be su.—1 Korɛntfuɛ Mun 13:4.
12. (a) ?Ngue ti yɛ suklu ba’m be like klefuɛ’m be kpa yolɛ’n kwla yo kekle man be ɔ? (b) ?Kɛ suklu ba wie’m be wiengu’m be mian be kɛ be yo sran tɛ’n, nin yɛ be kwla kunndɛ ukalɛ ɔ?
12 Ɔ fata kɛ suklu ba’m be yo be like klefuɛ’m be kpa wie. Suklu ba sunman be klo be like klefuɛ’m be awlɛn su fitalɛ. Kɛ be yo ɲin kekle be like klefuɛ’m be su’n, be bu i kɛ i sɔ’n ti ngwlɛlɛ ayeliɛ. Wieliɛ’n, be wlanwlan be wiengu mun naan be su be su ɲin kekle yolɛ’n nun. Yɛ sɛ suklu ba’n ng’ɔ ti Klistfuɛ’n w’a kplinman su’n, be kwla yo i tokotoko, annzɛ be yo i finfin. I sɔ sa ngalɛ’m be ti’n, ɔ kwla yo kekle man Klistfuɛ suklu ba’n kɛ ɔ yo i wiengu’m be kpa. Sanngɛ maan be fa sie be klun titi kɛ, sran’m be kpa yolɛ’n ti Zoova i sufuɛ’m be like cinnjin kpa. Amun kwla lafi su kɛ blɛ kekle sɔ’m be nun’n, Zoova fɛ́ i wawɛ’n súan amun bo.—Jue Mun 37:28.
Maan e yo e mantanfuɛ’m be kpa
13-15. ?Ngue ti yɛ e mantanfuɛ’m be kpa yolɛ’n kwla yo kekle’n niɔn? ?Yɛ wafa sɛ yɛ e kwla yo naan be kpa yolɛ’n w’a yoman kekle e sa nun ɔn?
13 Lika kwlaa nga amun tran’n, maan ɔ yo amun ngunmin amun sua’n nun o, annzɛ etazi su o, amun kwla kunndɛ wafa nga amun kwla kle kɛ amun mantanfuɛ’m be ndɛ lo amun naan amun a yo be kpa’n. I sɔ’n yolɛ’n kusu timan pɔpɔ cɛn kwlaa.
14 ?Sɛ amun osu’n ti’n, annzɛ amun Ɲanmiɛn sulɛ wafa’n ti’n, amun mantanfuɛ’m be kpli be di amun jɔlɛ’n, ngue yɛ amún yó ɔ? ?Kpɔkun sɛ cɛn wie be yo amun finfin annzɛ be buman amun sran’n, ngue yɛ amún yó ɔ? Kɛ mɔ amun ti Zoova i sufuɛ’n ti’n, sɛ amun mian amun ɲin be yo sran’m be kpa’n, amún ɲán su ye dan. Yɛle kɛ, amun nzuɛn’n yó kpa kpɔkun, ɔ́ mánmán Zoova m’ɔ ti sran i kpa yofuɛ dan’n. Amun mantanfuɛ’m be kpa yolɛ’n ti’n, atrɛkpa, be kwla kaci be nzuɛn’n. Kpɔkun bé yó Zoova i sufuɛ.—1 Piɛr 2:12.
15 ?Wafa sɛ yɛ e kwla yo e mantanfuɛ’m be kpa ɔ? I wie yɛle kɛ, maan e awlo nunfuɛ’m be nzuɛn nun’n, be yi sa nga Ɲanmiɛn wawɛ’n maan sran yo’n, be nglo. Cɛn wie’n, amun kwla mian amun ɲin be yo amun mantanfuɛ’m be ye. Nán amun wla fi su kɛ sran’m be kpa yolɛ’n, i bo’n yɛle kɛ e kunndɛ kɛ é tí be wun ɲanman nun.—1 Piɛr 3:8-12.
Maan jasin fɛ’n bolɛ’n nun e yo sran’m be kpa
16, 17. (a) ?Ngue ti yɛ sran’m be kpa yolɛ jasin fɛ’n bolɛ’n nun’n ti like cinnjin ɔn? (b) ? Wafa sɛ yɛ e kwla yo sran’m be kpa e jasin fɛ’n bolɛ lika fanunfanun’m be nun ɔn?
16 Ɔ ti cinnjin kpa kɛ sran’m be kpa yolɛ’n i ɲin fite lika kwlaa nga e bo jasin fɛ’n, i nun. Yɛle kɛ, maan ɔ yo sran’m be awlo’m be nun o, annzɛ be junman diwlɛ’n su lɔ o, annzɛ nzra nun o, ɔ fata kɛ e yo sran’m be kpa. Maan ɔ kpɛn e klun titi kɛ, e ti Zoova m’ɔ ti aklunyefuɛ dan’n, i ja nunfuɛ.—Ezipt Lɔ Tulɛ 34:6.
17 ?Ngue yɛ jasin fɛ’n bolɛ’n nun e kwla yo i ekun naan y’a kle kɛ e yo sran’m be kpa ɔ? I wie yɛle kɛ, kɛ e jran sran mun akpɔ’m be nuan mɔ é kán ndɛ é klé be’n, maan ndɛ’n yo tika. Kɛ é nánti akpɔ nuan’n, nán e fa atin’n i wunmuan’n naan e tanndan sran’m be ɲrun. Asa ekun’n, kɛ é bó jasin fɛ’n junman diwlɛ’m be su, annzɛ aata diwlɛ’n be nun’n, maan e yo sran’m be kpa. Yɛle kɛ, like tofuɛ’m be ti’n, maan ndɛ nga é kán’n ɔ yo tika.
18. ?Sɛ jasin fɛ’n bolɛ’n nun e yo ngwlɛlɛfuɛ’n, wafa sɛ yɛ i sɔ’n úka e naan y’a yo sran’m be kpa ɔ?
18 Kɛ é bó jasin fɛ’n awloawlo’m be nun’n, maan e yo ngwlɛlɛfuɛ. Yɛle kɛ sɛ é nían naan blɛ’n nin i fataman’n, nán maan e cɛ anuan’n nun lɛ ngboko. Sɛ e wun kɛ sran ng’ɔ sɔli e nun’n, ɔ su kle kɛ y’a cɛ i awlo nun dan’n naan ɔ su fa ya’n, maan e wun i sɔ liɛ’n i wlɛ ndɛndɛ. Sɛ amun tranwlɛ’n nun lɔ’n, Zoova i Lalofuɛ’m be bo jasin fɛ’n lika kunngba’n nun titi’n, maan e yo sran’m be kpa, kpɔkun e yo wɛtɛɛ tra su (Nyanndra Mun 17:14). Sɛ sran’n i waan ɔ sɔman e nun cɛn sɔ nun’n, nán e fa yo ndɛ. Maan ɔ kpɛn e klun kɛ, e wiengu Klistfuɛ kun kwla sin lika sɔ’n nun cɛn uflɛ. Sɛ sran kun w’a sɔman amun nun kpa’n, amun mian amun ɲin be yo i kpa. Amun tra amun awlɛn be ijɔ amanniɛn su, nán amun mlan amun ɲrun. Klistfuɛ’n nin utre’n fataman (Matie 10:11-14). Atrɛkpa’n, cɛn uflɛ’n sran sɔ’n ɔ́ sɔ́ e niaan uflɛ wie nun kpa.
Maan asɔnun aɲia’m be bo’n, e yo sran’m be kpa
19, 20. ?Ngue ti yɛ sran’m be kpa yolɛ’n ti like cinnjin asɔnun’n nun ɔn? ?Yɛ ninnge mennin nun yɛ ɔ fata kɛ be yi i sɔ liɛ’n i nglo ɔ?
19 Ɔ ti cinnjin wie ekun kɛ e yo e niaan Klistfuɛ’m be kpa (Ebre Mun 13:1). Kɛ mɔ e niaan nga be o mɛn wunmuan nun’n e o be nun wie’n ti’n, ɔ ti cinnjin kpa kɛ e nin be e tranlɛ nun’n, e yo be kpa.
20 Sɛ asɔnun nɲɔn, annzɛ asɔnun kpanngban be yo be aɲia mun Sielɛ Blɛ Sua kunngba’n nun’n, ɔ ti cinnjin kpa kɛ ninnge’m be yolɛ nun’n, be bu be wiengu’m be angunndan naan be yo be kpa. Kɛ amun siesie aɲia’m be dɔ’n, annzɛ ninnge kɛ Sielɛ Blɛ Sua’n i nun saun yolɛ sa’n, ɔ nin i nun ye siesielɛ’n blɛ sa’n, nán amun si su nzokwle. Afin, i sɔ’n saci sran’m be afiɛn. Kannzɛ bɔbɔ amun angunndan’n ti fanunfanun ninnge sɔ’m be yolɛ’n su’n, sanngɛ amun yo amun wiengu’m be kpa, yɛ an bu be sran. I liɛ’n, Zoova yrá amun su.
Nán e yaci sran’m be kpa yolɛ le
21, 22. ?Kɛ nga Kolɔsfuɛ Mun 3:12 fa kan’n sa’n, ngue yɛ ɔ fata kɛ e ta nda kɛ é yó ɔ?
21 Sran’m be kpa yolɛ’n kan e mɛn dilɛ’n i wafa’n kwlaa. I sɔ’n ti’n, ɔ fata kɛ e yo naan ɔ kaci e Klistfuɛ nzuɛn mlɔnmlɔn.
22 Maan cɛn kwlaa, e yo e wiengu’m be kpa. Kpɔkun ndɛ nga akoto Pɔlu kannin’n, maan e tinuntinun e nian su e nanti. I waan: ‘An ti Ɲanmiɛn i sran, ɔ klo amun, yɛ ɔ fali amun. I sɔ’n ti’n, maan sran’m be yo amun annvɔ, an yo be kpa, an yo amun wun aenvuɛ, an yo wɛtɛɛfuɛ, yɛ an blu sa’m be su. An fa like sɔ mun cici amun ti.’—Kolɔsfuɛ Mun 3:12.
?Amun wla te kpɛn su?
• ?Ngue ti yɛ sran’m be kpa yolɛ’n kwla yo kekle man Klistfuɛ’n niɔn?
• ?Ngue ti yɛ ɔ ti cinnjin kɛ awlo lɔ’n e yo sran’m be kpa ɔ?
• ?Sa mennin ti yɛ suklu lɔ’n, annzɛ junman diwlɛ lɔ’n, ɔ nin e mantanfuɛ’m be wun lɔ’n, sran’m be kpa yolɛ’n kwla yo kekle’n niɔn?
• Amun kan wafa nga jasin fɛ’n bolɛ’n nun Klistfuɛ’m be kwla yo sran’m be kpa’n, i ndɛ.