?Amun klo ‘Ɲanmiɛn i mmla’n’?
‘Sran mɔ i like liɛ ng’ɔ klo i’n yɛle Ɲanmiɛn i mmla’n, i liɛ su ti ye.’—JUE MUN 1:1, 2.
1. ?Ngue ti yɛ e mɔ e ti Zoova i sufuɛ’n, e klun jɔ’n niɔn?
ƝANMIƐN ZOOVA uka e mɔ e ti i sufuɛ nanwlɛfuɛ’n, kpɔkun ɔ yra e su. Kannzɛ sa kekle fanunfanun be ju e su’n, sanngɛ nanwlɛ, e di aklunjuɛ wie kusu. I sɔ’n boman e nuan. Afin, Ɲanmiɛn mɔ e su i’n ɔ ‘di aklunjuɛ,’ kpɔkun i wawɛ’n yo maan e klun jɔ (Jue Mun 104:31; Galasifuɛ Mun 5:22). Be klun m’ɔ jɔ’n, ɔ fin like ng’ɔ ti kpa mɔ be awlɛn o su kɛ bé ɲɛ́n i’n, annzɛ kusu ɔ fin like kpa kun mɔ be ɲɛn i’n. E Si m’ɔ o ɲanmiɛn su lɔ’n kusu man e like kpa kwlaa (Zak 1:17). Ɔ maan e klun m’ɔ jɔ’n, ɔ boman e nuan!
2. ?Jue Mun mennin yɛ é wá kókó be su yalɛ ɔ?
2 Be kan aklunjuɛ’n i ndɛ kpanngban kpa Jue’m be fluwa’n nun. E wun i sɔ liɛ’n, Jue Mun 1 ɔ nin 2, be nun. Zezi Klist i sɔnnzɔnfuɛ klikli’m be nuan sɛ su kɛ Davidi m’ɔ yoli Izraɛli Famiɛn’n, yɛ ɔ toli jue nɲɔn su’n niɔn (Sa Nga Be Yoli’n 4:25, 26). Ɲanmiɛn maan kɛ sran ng’ɔ kpɛli jue klikli’n, mɔ b’a bomɛn i dunman’n, ɔ́ bó i jue’n i tolɛ’n bo’n, ɔ seli kɛ: ‘Sran ng’ɔ tieman be nga be buman Ɲanmiɛn nin i nuan ndɛ’n be like fi’n be afɔtuɛ’n, i liɛ su ti ye.’ (Jue Mun 1:1). Like suanlɛ nga nun’n, ɔ nin ng’ɔ́ bɛ́ i sin lɔ nun’n, é wá yíyí Jue Mun 1 ɔ nin 2 be nun naan sa nga ti yɛ ɔ fata kɛ e klun jɔ’n, y’a wun i wlɛ.
Like ng’ɔ man aklunjuɛ’n
3. ?Kɛ nga Jue Mun 1:1 fa kan’n sa’n, sa wie mennin ti yɛ maan sran ng’ɔ fa Ɲanmiɛn i nuan ndɛ’n su’n i liɛ su ti ye’n niɔn?
3 Jue Mun 1 ɔ kle sa nga ti yɛ maan sran ng’ɔ fa Ɲanmiɛn ndɛ su’n i liɛ su ti ye’n. Kɛ ɔ́ kán sa sɔ’m be nun wie ndɛ’n, jue tofuɛ’n seli kɛ: ‘Sran ng’ɔ tieman be nga be buman Ɲanmiɛn nin i nuan ndɛ’n be like fi’n be afɔtuɛ’n, m’ɔ faman sa tɛ yofuɛ’m be atin’n su’n, m’ɔ nin be mɔ be yo Ɲanmiɛn i finfin’n be tranman likawlɛ’n, i liɛ su ti ye.’—Jue Mun 1:1.
4. ?Ajalɛ kpa mennin yɛ Zakari nin i yi Elizabɛti be fali ɔ?
4 Sɛ e waan é dí aklunjuɛ kpafuɛ’n, ɔ fata kɛ e fa Zoova i mmla mɔ fiɛn kaan sa nunman nun’n, i su. Zakari ɔ nin i yi Elizabɛti ‘be yoli e Min Ɲanmiɛn klun sa, be fɛli i ndɛ’n nin i mmla’n kwlaa su kpa.’ Be yɛ Ɲanmiɛn maan be wuli Zan batɛmu yofuɛ’n, mɔ be dili aklunjuɛ’n niɔn (Lik 1:5, 6). Sɛ e fa be ajalɛ’n su naan e ta nda kɛ e “faman sa tɛ yofuɛ’m be atin’n su’n,” annzɛ be afɔtuɛ’n su’n, é kwlá dí aklunjuɛ wie.
5. ?Ngue yɛ ɔ kwla uka e naan y’a kpalo ‘sa tɛ yofuɛ’m be atin’n’ niɔn?
5 Sɛ e kpalo sa tɛ yofuɛ’m be angunndan nga be bu’n, e su ‘faman be atin’n su.’ Yɛle kɛ, e su kɔman be sa tɛtɛ yolɛ’n, annzɛ ɲannzuɛn sa yolɛ lika’m be nun wie. ?Yɛ sɛ ɔ yo e kɛ e fa e wun e wla be sa tɛ yolɛ nun’n nin? Sɛ ɔ yo e sɔ’n, maan e srɛ Ɲanmiɛn kɛ ɔ uka e naan e nian ndɛ nga akoto Pɔlu kannin’n su e nanti. Ɔ seli kɛ: ‘Nán amun nin be nga be lafiman Klist su’n, mɔ amun nzuɛn’n sɛman’n, an san nun. ?Nzu anuansɛ yɛ sran kpa nin sran tɛ’n be di ɔ? ?Wia’n nin aosin’n be kwla tran likawlɛ?’ (2 Korɛntfuɛ Mun 6:14). Sɛ e nin Ɲanmiɛn e nanti naan ‘sa tɛ fi nunman e awlɛn’n nun’n,’ é kpálo sa tɛ yofuɛ’m be ayeliɛ’n, ɔ nin be mɛn dilɛ’n. Kpɔkun é yó sa ng’ɔ ti kpa’n, yɛ é ‘láfi Ɲanmiɛn su sakpa.’—Matie 5:8; 1 Timote 1:5.
6. ?Ngue ti yɛ ɔ fata kɛ e sasa e wun be nga be yo Ɲanmiɛn i finfin’n be lika’n niɔn?
6 Sɛ e waan Zoova klun jɔ e wun’n, ɔ fataman kɛ ‘e nin be mɔ be yo Ɲanmiɛn i finfin’n e tran likawlɛ.’ Kannzɛ bɔbɔ Ɲanmiɛn mmla’n i su falɛ’n ti sran wie’m be ɲrun like finfin titi’n, sanngɛ “blɛ kasiɛn” nga nun’n, be nga laa nun be yoli Klistfuɛ mɔ b’a kaci be sin b’a si Ɲanmiɛn’n, be fa Ɲanmiɛn i sufuɛ’m be finfin yolɛ’n cici be ti. Akoto Piɛli wlali i niaan Klistfuɛ’m be su nun kɛ: ‘N sran kpa mun, maan an si kpa kɛ cɛn wie lele kɛ mɛn’n ɔ́ kɔ́ i bue nuan’n, sran wie’m bé bá, bé yó sa nga be klun klo’n, yɛ bé srí amun, bé sé kɛ: “?Ɔ seli amun kɛ ɔ́ bá, nɛ́n i ɔ? ?Yɛ ɔ o nin? Kɛ ɔ fin lalaa’n mɔ e nannan’m be wuli’n, like nga Ɲanmiɛn yili be’n, be kwlaa be te o be osu’n nun.”’ (2 Piɛr 3:1-4). Sɛ e nin ‘be mɔ be yo Ɲanmiɛn i finfin’n y’a traman likawlɛ’n,’ sa ng’ɔ́ wá jú be su’n, ɔ́ tó fuan e.—Nyanndra Mun 1:22-27.
7. ?Ngue ti yɛ ɔ fata kɛ e awlɛn’n tran Jue Mun 1:1 i nun ndɛ’n su’n niɔn?
7 Sɛ e awlɛn w’a tranman Jue Mun 1 i nun ndɛ’n su’n, Ɲanmiɛn ninnge mɔ Biblu’n nun like suanlɛ’n ti e sili i’n, ɔ kwla saci. Ɔ maan e kwla fa e wun wla sa tɛ yolɛ’n nun mlɔnmlɔnmlɔn. Sɛ e fa sa tɛ yofuɛ’m be afɔtuɛ’n su’n, i lɛ nun yɛ e Ɲanmiɛn ninnge’m be sacilɛ’n kwla bo i bo ɔ. Atrɛkpa bɔbɔ’n, e fa e wun e mantan be titi. Ɔ maan kɛ ɔ́ kɔ́ i ɲrun’n, e kwla fa be nga be kacili be sin be sili Ɲanmiɛn mɔ be yo i finfin’n be ajalɛ’n su wie bɔbɔ. Nanwlɛ, sɛ e nin sran nga be kan Ɲanmiɛn i ndɛ tɛ’n e san nun’n, be kwla saci e kpɔkun e kaci Ɲanmiɛn i kpɔfuɛ (1 Korɛntfuɛ Mun 15:33; Zak 4:4). Nán maan e nun wie fi ɔ fɛ i sɔ ajalɛ liɛ’n le!
8. ?Ngue yɛ ɔ kwla uka e naan e angunndan’n w’a tran Ɲanmiɛn ninnge’m be su kpa ɔ?
8 Ɲanmiɛn srɛlɛ’n kwla uka e naan e angunndan’n w’a tran Ɲanmiɛn ninnge’m be su kpa, naan y’a faman sa tɛ yofuɛ’m be atin’n su. Pɔlu seli kɛ: ‘Nán amun koko sa fi su, sanngɛ sa’n kwlaa nun nin like kwlaa ng’ɔ mian amun’n, an kan kle Ɲanmiɛn, an srɛ i, an jran su kpa, yɛ an lɛ i ase. Yɛ ɔ maan amún wún jɔ́ amun fɔuun, amun su wunman sa ti mɔ amun wun jɔ amun fɔuun sɔ’n i bo mlɔnmlɔn. Aunjuɛ sɔ’n maan amun wla su boman, yɛ amun angunndan’n su sannganman sran wunmuan mɔ amun nin Klist Zezi ti’n ti.’ Like kwlaa ng’ɔ ti kpa’n, nin sa kwlaa mɔ sran yo ɔ ɔ ti kpa’n, ɔ nin ndɛ nanwlɛ’n, nin like nga be bu i like kpa’n, nin like ng’ɔ ti i nuan su’n, nin sa ng’ɔ timan tɛ mlɔnmlɔn’n, nin like ng’ɔ ti klanman’n, ɔ nin ndɛ nga be ti ɔ ɔ jɔ be klun’n, Pɔlu wlali e fanngan kɛ maan e angunndan’n tran be su (Filipfuɛ Mun 4:6-8). Maan e fa afɔtuɛ sɔ mɔ Pɔlu mannin’n su naan nán e nun wie fi ɔ fa sa tɛ yofuɛ’m be atin’n su.
9. ?Kannzɛ bɔbɔ e kpalo sa tɛ yofuɛ’m be ayeliɛ’n, sanngɛ wafa sɛ yɛ e mian e ɲin e uka sran’m be kwlaa ɔ?
9 Kannzɛ bɔbɔ e kpalo sa tɛ yofuɛ’m be ayeliɛ’n, sanngɛ maan e bo jasin fɛ’n e kle be amanniɛn su kɛ nga akoto Pɔlu fa yoli’n sa. Ɔ kannin ‘nanwlɛ dilɛ’n nin be wun su nianlɛ’n, ɔ nin jɔlɛ dilɛ m’ɔ́ wá bá’n be ndɛ’ kleli Felisi m’ɔ ti Rɔmufuɛ’m be siefuɛ’n (Sa Nga Be Yoli’n 24:24, 25; Kolɔsfuɛ Mun 4:6). E bo Sielɛ Blɛ jasin fɛ’n e kle sran’m be kwlaa, kpɔkun e yo be kpa. Kpɔkun e lafi su kɛ be nga be ti ‘sran kpa’n,’ bé wá yó Ɲanmiɛn i sufuɛ naan bé kló Ɲanmiɛn i mmla’n.—Matie 10:11.
I like liɛ ng’ɔ klo i’n yɛle Ɲanmiɛn i mmla’n
10. ?Kɛ é súan e ngunmin e Biblu’n nun like’n, ngue yɛ e kwla yo naan like nga e suan’n w’a ka e awlɛn’n nin e angunndan’n nun ɔn?
10 Kɛ jue tofuɛ’n ɔ́ kán sran mɔ i liɛ su ti ye’n i ndɛ’n, ɔ seli ekun kɛ: ‘I like liɛ ng’ɔ klo i’n yɛle Ɲanmiɛn i mmla’n, m’ɔ bu i angunndan [ɔ kanngan nun blɛblɛ, NW] kɔnguɛ nin wia su’n.’ (Jue Mun 1:2). E mɔ e ti Ɲanmiɛn i sufuɛ’n, e ‘like liɛ nga e klo i’n yɛle Ɲanmiɛn i mmla’n.’ Sɛ e le i wun alaje’n, kɛ é súan e ngunmin e Biblu’n nun like’n, mɔ e ‘bu i angunndan’n,’ e kwla ‘kanngan nun blɛblɛ.’ Sɛ Biblu’n i lika kwlaa nga é kánngan nun’n e yo i kɛ ngalɛ’n sa’n, i sɔ’n úka e maan like nga e kanngan ɔ́ ká e awlɛn’n nin e angunndan’n nun.
11. ?Ngue ti yɛ ɔ fata kɛ e kanngan Biblu’n nun “kɔnguɛ nin wia su” ɔ?
11 ‘Sran kpa nanwlɛfuɛ m’ɔ si ngwlɛlɛ’n,’ ɔ wla e fanngan kɛ e kanngan Biblu’n nun cɛn kwlakwla (Matie 24:45). Kɛ mɔ e kunndɛ kɛ é sí ndɛ nga Zoova kan kle sran mun’n ti’n, ɔ ti kpa kɛ e kanngan Biblu’n nun “kɔnguɛ nin wia su.” Ɛɛn, kɛ wie liɛ bɔbɔ sa wie ti lafilɛ kunman e’n, maan e kanngan nun. Piɛli wlali e su nun kɛ: ‘Kɛ ba nɔnman kunndɛ ɲɔnflɛn’n, amun kusu an kunndɛ Ɲanmiɛn ndɛ m’ɔ ti kɛ nɔnnɔn mɔ b’a guaman nun like’n sa. Sɛ amun nɔn’n, amún yó sran yɛ amún ɲán amun ti.’ (1 Piɛr 2:1, 2). ?Amun klo Biblu’n nun kannganlɛ cɛn kwlaa, yɛ amun bu Ɲanmiɛn Ndɛ’n nin i klun sa’n i angunndan kɔnguɛ? I sɔ yɛ jue tofuɛ’n yoli ɔ.—Jue Mun 63:7.
12. ?Sɛ e klo Zoova i mmla’n, ngue yɛ é yó ɔ?
12 Sɛ e waan é dí aklunjuɛ tititi’n, saan é kló Ɲanmiɛn i mmla’n. Fiɛn kaan sa nunman nun, kpɔkun ɔ ti nanwlɛ. Sran ng’ɔ fa su’n, ɔ ɲan su mmlusuɛ (Jue Mun 19:8-12). Zaki m’ɔ ti Zezi i sɔnnzɔnfuɛ’n seli kɛ: ‘Sanngɛ Ɲanmiɛn mmla’n m’ɔ ti niannun kpa’n, m’ɔ maan sran’m be ɲan be ti’n, sran ng’ɔ nian nun’n, m’ɔ nian nun tititi’n, mɔ kɛ ɔ ti mmla’n i wla fiman sanngɛ ɔ fa su’n, Ɲanmiɛn maan like ng’ɔ yo’n ɔ́ yó ye.’ (Zak 1:25). Sɛ e klo Zoova i mmla’n kpa’n, é fá e ɲin é síe su cɛn kwlaa. Asa ekun’n, é ‘kúnndɛ sa’n kwlaa bo,’ kpɔkun Sielɛ Blɛ junman’n yɛ é dún mmua é dí ɔ.—1 Korɛntfuɛ Mun 2:10-13; Matie 6:33.
Ɔ ti kɛ waka sa
13-15. ?Kɛ be se kɛ e kwla yo kɛ waka m’ɔ o nzue nuan sa’n i bo’n yɛle mennin?
13 Jue tofuɛ’n kan sran kpa’n i ndɛ ekun kɛ: ‘Ɔ ti kɛ waka m’ɔ o nzue ba nuan’n sa. Waka sɔ’n i sulɛ blɛ’n ɔ sɛnmɛn i wun le, kusu i nɲa’m be bloman le. Like kwlaa nga i sɔ sran liɛ’n yo’n, saan ɔ́ yó ye i sa nun.’ (Jue Mun 1:3). Fɔ’n wo e kwlaa e nun ti’n, afɛ’n nun yɛ e su Zoova ɔ (Zɔb 14:1). E Ɲanmiɛn sulafilɛ’n ti’n, be kwla kle e yalɛ annzɛ be kle e ɲrɛnnɛn fanunfanun wie mun (Matie 5:10-12). Sanngɛ Ɲanmiɛn fanngan nun’n, e jran sa sɔ’m be ɲrun kekle kpa kɛ waka mɔ i olui’m be wla ase kpa mɔ kɛ aunmuan’n fita’n, ɔ tumɛn i bo’n sa.
14 Waka ng’ɔ o nzue ba nuan’n, wawa blɛ nun bɔbɔ’n, ɔ wuman kee. Sɛ e sro Ɲanmiɛn’n, wunmiɛn’n ng’ɔ suan e bo’n ɔ su wieman le. Afin, Zoova wun lɔ yɛ wunmiɛn sɔ’n ɔ fin ɔn. Pɔlu wunnin kɛ Ɲanmiɛn yɛ ɔ mɛn i fanngan ɔn. I sɔ’n ti’n, ɔ seli kɛ: ‘I [Zoova] m’ɔ wla n fanngan’n ti’n, n kwla like kwlaa yo.’ (Filipfuɛ Mun 4:13, NW). Kɛ Zoova fɛ i wawɛ’n kle e atin’n m’ɔ wla e fanngan’n, e to fuanman atin’n, kpɔkun Ɲanmiɛn ninnge’m be nun e kpɔnzɔman. Sanngɛ e di Ɲanmiɛn junman’n i kpa, kpɔkun e yi sa nga Ɲanmiɛn wawɛ’n maan sran yo be’n, be nglo.—Zeremi 17:7, 8; Galasifuɛ Mun 5:22, 23.
15 Jue tofuɛ’n fali ebre aniɛn’n nun ndɛ mma nga be kaci i mɔ be se kɛ “ɔ ti kɛ,” ɔ wlɛli i jue m’ɔ toli’n nun. Kɛ ɔ́ sé sɔ’n, ɔ fali like kun m’ɔ ti i liɛ ngunmin’n ɔ sunnzunnin like ngunmin kun m’ɔ ti uflɛ’n. Sran’n timan waka. Ɔ maan kɛ jue tofuɛ’n kán be nga Ɲanmiɛn ninnge’m be nun’n be yo ye’n be ndɛ’n, waka m’ɔ o nzue nuan’n i mlanmlanmlan m’ɔ ti’n, i su yɛ i angunndan’n wɔli ɔ. Afin, i sɔfuɛ’m be ‘like liɛ nga be klo i’n yɛle Ɲanmiɛn i mmla’n.’ Sɛ e like liɛ nga e klo i’n yɛle Ɲanmiɛn i mmla’n, e nguan’n ɔ́ yó kɛ waka’m be liɛ’n sa. Yɛle kɛ, e kwla ɲan anannganman nguan.—Zan 17:3.
16. ?Ngue ti yɛ ‘like kwlaa yo ye e sa nun’ ɔn? ?Yɛ i sɔ’n yo e sɛ?
16 Kɛ e yo sa kpa titi’n, Zoova uka e maan e jran kekle yalɛ klelɛ’n nin afɛ’n be ɲrun. E di aklunjuɛ, kpɔkun sɛ é kwlá sé’n, e su mma kpanngban Ɲanmiɛn i junman dilɛ’n nun (Matie 13:23; Lik 8:15). Kɛ mɔ Zoova i klun sa’n yɛ e yo’n ti’n, ‘like kwlaa yo ye e sa nun.’ Yɛ, kɛ mɔ sa nga Zoova se kɛ ɔ́ yó be’n be kpɛn su titi’n, mɔ e fɛ i nuan ndɛ’n e yo e awlɛn su like ti’n, e yo kpa Ɲanmiɛn ninnge’m be nun (Bo Bolɛ 39:23; Zozie 1:7, 8; Ezai 55:11). Kɛ sa kekleekle’m be ju e su bɔbɔ’n, e yo kpa.—Jue Mun 112:1-3; 3 Zan 2.
A wun klunwifuɛ’n niɔn ɔ waan w’a yo kpa
17, 18. (a) ?Jue tofuɛ’n fa klunwifuɛ mun sunnzun ngue? (b) ?Kannzɛ klunwifuɛ’m be ninnge’m be yo ye’n, ngue ti yɛ be wla guaman ase’n niɔn?
17 Nanwlɛ, klunwifuɛ’m be mɛn dilɛ’n, ɔ nin sran kpa’m be liɛ’n timan kun mlɔnmlɔn. Klunwifuɛ’m be ninnge’m be kwla yo ye be sa nun, sanngɛ be leman Ɲanmiɛn ninnge’m be wie. I sɔ yɛ jue tofuɛ’n kɛnnin i ndɛ’n niɔn. I waan: ‘Klunwifuɛ’m be liɛ’n, ɔ timan sɔ mlɔnmlɔn. Be ti kɛ ijre mɔ aunmuan’n fitɛ i kɔ’n sa. I sɔ’n ti’n, jɔlɛ dilɛ cɛn’n nun’n, klunwifuɛ’m be su ɲanman jranwlɛ. Kɛ Ɲanmiɛn i sran ng’ɔ bu be sran kpa’m be yia sa’n, sa tɛ yofuɛ’m be nin be tran ɔn, ɔ yoman ye.’ (Jue Mun 1:4, 5). Amun nian, jue tofuɛ’n seli kɛ, “klunwifuɛ’m be liɛ’n, ɔ timan sɔ mlɔnmlɔn.” Yɛle kɛ, sran nga Ɲanmiɛn bu be sran kpa mɔ be fali be sunnzunnin waka mɔ be wuman kee mɔ be su mma’n, be timan kɛ be sa.
18 Kannzɛ klunwifuɛ’m be ninnge’m be yo ye’n, be wla guaman ase (Jue Mun 37:16; 73:3, 12). Be ti kɛ bian aɲanbeunfuɛ sinnglinfuɛ mɔ kɛ ɔ seli Zezi kɛ ɔ kpɛ aja ninnge’m be nun cɛlɛ’n i su akplowa’n nun’n, ɔ fɛli i wun ndɛ’n buli ɲanndra’n, i sa. Zezi seli be kwlaa nga be o lɛ’n be kɛ: ‘An nian amun wun kpa konvi kpli yolɛ’n i lika, afin maan sran ɲɛn i wun ɔ ɲɛn i wun sɛ, nán ninnge sɔ mun yɛ bé mɛ́n i nguan ɔn.’ Kɛ Zezi yíyí ndɛ sɔ nun’n, ɔ seli kɛ bian aɲanbeunfuɛ kun i fie’n yoli ye kpa. Ɔ maan, ɔ bubuli i tanngannin mun kpɔkun ɔ kplannin uflɛ dandan kpa naan w’a fɛ i ninnge mun w’a gua be nun. Bian seli i wun kɛ siɛn’n, ɔ́ wá trán ase, ɔ́ ló wunmiɛn, naan ɔ́ dí i klun like. Sanngɛ Ɲanmiɛn usali bian sɔ’n kɛ: ‘?Sinnglinfuɛ, andɛ kɔnguɛ bé fá wɔ, yɛ ninnge nga a yiayia be su yɛ’n, ɔ́ kɔ́ wan sa nun?’ Kpɔkun Zezi guɛli i ɲanndra’n i bo kɛ: ‘Sran ng’ɔ kunndɛ ninnge kɛ ɔ́ ɲɛ́n i wun m’ɔ leman Ɲanmiɛn ninnge’m be wie fi’n, kɛ ɔ ti sɔ ɔ.’—Lik 12:13-21.
19, 20. (a) Amun kan wafa nga laa Izraɛli mɛn’n nun lɔ be kpaja awie nun’n i ndɛ. (b) ?Ngue ti yɛ be fa klunwifuɛ’m be sunnzun awie wun bui’n niɔn?
19 Klunwifuɛ’m be leman ‘Ɲanmiɛn ninnge’m be wie fi.’ I sɔ’n ti’n, be wla’n guaman ase, kpɔkun be ti fakafaka kɛ awie wun bui’n sa. Laa Izraɛli mɛn’n nun lɔ kɛ be ko kpɛ awie’n, be isa be guɛ i kple kun su. Kpɔkun nnɛn kun cuɛn kakaklolo kun mɔ be cicili i bo yɔbuɛ mun, annzɛ blalɛ m’ɔ le je’n, ɔ fa sin awie’n su. Kɛ ɔ́ sín su sɔ’n, nn awie’n su si. I sin’n, be fa peli be kpaja nun (Ezai 30:24). Aunmuan’n fa awie’n nun wla mun kɔ, kpɔkun be tian awie kpafuɛ’n i nuan (Rit 3:2). I sin’n, kɛ be ko fa awie’n ko sin tɛmɛn kun nun mɔ be ko yiyi i nun yɔbuɛ mma mun’n, nn be su fa ko guɛ i tanngannin’n nun siɛn’n.—Lik 22:31.
20 Wafa nga kɛ be kpaja awie’n nun mɔ aunmuan’n fɛ i wun bui’n kɔ mɔ be fa awie kpa’n be sie’n sa’n, i sɔ kunngba’n yɛ bé yí klunwifuɛ mun sran nga Ɲanmiɛn bu be sran kpa’n, be nun ɔn. Nanwlɛ, kɛ m’ɔ ka kaan sa bé tú klunwifuɛ’m be bo mlɔnmlɔn’n ti’n, e klun jɔ dan. Kɛ be ko tu be bo sɔ ko wie’n, sran nga be like liɛ nga be klo i’n yɛle Ɲanmiɛn mmla’n, mɔ be ɲin yi Ɲanmiɛn’n, Zoova yrá be su dan kpa. Afin, like nga Ɲanmiɛn fá cɛ́ be’n yɛle anannganman nguan’n.—Matie 25:34-46; Rɔmfuɛ Mun 6:23.
‘Sran nga Anannganman bu be sran kpa’n’ be liɛ su ti ye
21. ?Wafa sɛ yɛ Zoova ‘nian sran ng’ɔ bu be sran kpa’n be su’ ɔ?
21 Jue tofuɛ’n guɛ i jue tolɛ klikli’n i bo kɛ: “Anannganman nian sran ng’ɔ bu be sran kpa’n be atin nga be fa’n su. Klunwifuɛ’m be atin liɛ’n, ɔ fa be kɔ mlinlɛ nun.” (Jue Mun 1:6). ?Wafa sɛ yɛ Ɲanmiɛn ‘nian sran ng’ɔ bu be sran kpa’n be su’ ɔ? Yɛle kɛ, sɛ e fa sa kpa yolɛ’n e cici e ti naan e fa Ɲanmiɛn mmla su’n, e kwla si weiin kɛ e Si m’ɔ o ɲanmiɛn su lɔ’n ɔ wun e, naan i klun jɔ e wun. Ɔ maan sɛ e fa sa kwlaa nga be o e su’n e wlɛ i sa nun’n, e si kɛ ɔ́ nían e lika kpa.—Ezekiɛl 34:11; 1 Piɛr 5:6, 7.
22, 23. ?Ngue yɛ ɔ́ wá jú klunwifuɛ’m be su ɔ? ?Yɛ ngue yɛ sran kpa’m bé ɲɛ́n i ɔ?
22 “Sran kpa’m be atin nga be fa’n,” ɔ́ yó ye titi. Sanngɛ klunwifuɛ mɔ be kaciman’n, bé mlín mlɔnmlɔn. Afin Zoova wá dí be jɔlɛ. I sɔ’n ti’n, be “atin liɛ’n,” ɔ́ fá be kɔ́ mlinlɛ nun. E kwla fa e wla’n e guɛ i ndɛ nga Davidi kannin’n i su kɛ ɔ́ kpɛ́n su. I waan: ‘Ɔ ka kaan sa be su wunman klunwifuɛ’n kun. Sɛ a nian kan ɔ tran lɛ’n, a su wunman sran. Yalɛfuɛ mun [wun ase kanfuɛ mun, NW] yɛ mɛn’n ɔ́ wá yó be liɛ ɔ. Be wun jɔ́ be kpa fɔuun. Mɛn’n ɔ́ yó sran kpa’m be liɛ. Bé trán nun tititi.’—Jue Mun 37:10, 11, 29.
23 Kɛ klunwifuɛ’m be su tranman lɛ kun mlɔnmlɔn mɔ asiɛ’n wá káci mɛn klanman’n, sɛ e kwla tran su wie’n, nanwlɛ, ɔ́ yó e fɛ dan! Wun ase kanfuɛ nin sran kpa’m bé wún jɔ́ be kpa fɔuun, afin cɛn kwlaa be kloli ‘Ɲanmiɛn i mmla’n.’ Sanngɛ ka naan i kwlaa sɔ’n w’a kpɛn su’n, ɔ fata kɛ be bo ‘Anannganman i ndɛ m’ɔ fin i nuan fiteli’n i jɔ’ kekle kpa (Jue Mun 2:7a). Like suanlɛ ng’ɔ́ bá lɛ’n, ɔ́ wá úka e naan y’a wun ndɛ sɔ m’ɔ fin Anannganman nuan fiteli’n i wlɛ. Kpɔkun wafa nga ndɛ sɔ’n ti e liɛ wie’n, ɔ nin asiɛ’n su sran kwlaa be liɛ’n, é wún i wlɛ.
?Wafa sɛ yɛ amún tɛ́ kosan’m be su ɔ?
• ?Ngue ti yɛ sran ng’ɔ sro Ɲanmiɛn’n i liɛ su ti ye ɔ?
• ?Ngue yɛ ɔ kle kɛ e like liɛ nga e klo i’n yɛle Zoova i mmla’n niɔn?
• ?Wafa sɛ yɛ sran kun kwla yo kɛ waka m’ɔ o nzue ba nuan’n sa ɔ?
• ?Wafa sɛ yɛ sran kpa’m be atin liɛ’n timan kɛ klunwifuɛ’m be liɛ’n sa ɔ?