Maan e fa sran dan yolɛ angunndan ng’ɔ ti Klist liɛ’n su’n, i su

‘Amun nun sran ng’ɔ klo kɛ ɔ́ yó dan’n, maan ɔ su i wiengu mun.’—Matie 20:26.

1. ?Sran dan yolɛ angunndan nga sran’m be bu’n yɛle mennin?

EZIPTI klɔ nga be flɛ i Caire (an kɛnngɛn i Kɛli) i wun koko lɔ’n, kɛ á kɔ́ i ngua lɔ lika’n nun lɔ’n i kilo 500 su’n, kpɔkun w’a to klɔ nga laa nun be flɛli i Thebes (andɛ be flɛ i Karnak). Klɔ sɔ’n su lɔ’n, be kplannin Ezipti famiɛn Amenhotep III i waka sran. Waka sran sɔ’n i nglonglo’n ti mɛtri 18. Kɛ a wun i kpandangblauun m’ɔ ti’n sa’n, a buman ɔ wun like fi. Atrɛkpa’n, kɛ ɔ ko yo naan sran’m b’a sro famiɛn’n, i ti yɛ be kplannin waka sran sɔ’n niɔn. Nanwlɛ, ɔ yi sran dan yolɛ angunndan nga sran’m be bu’n i nglo. Yɛle kɛ be yo be wun dan naan be wiengu’m be sro be.

2. ?Ajalɛ kpa mennin yɛ Zezi kleli i sɔnnzɔnfuɛ mun ɔn? ?Yɛ kosan mennin yɛ ɔ fata kɛ e fa usa e wun ɔn?

² Amun fɛ i sɔ sran dan yolɛ liɛ’n be sunnzun Zezi liɛ ng’ɔ kleli naan amun nian. Kannzɛ Zezi yoli i sɔnnzɔnfuɛ’m be ‘like klefuɛ nin be min’n,’ sanngɛ ɔ kleli be kɛ be wiengu sulɛ’n yɛ ɔ yo sran’n i dan ɔn. Kɛ ɔ ko yo naan i sɔnnzɔnfuɛ’m b’a wun i sɔ liɛ’n i wlɛ’n ti’n, cɛn kasiɛn nga Zezi dili i asiɛ’n su wa’n naan w’a wu’n i nun’n, ɔ wunnzinnin be ja mun. Nanwlɛ, i sɔ’n ti be wun ase kanlɛ dan (Zan 13:4, 5, 14)! ?Sran’m be sulɛ’n, ɔ nin nga sran’m be su amun’n, menninfuɛ’n yɛ amun klo i ɔ? ?Zezi i wun ase kanlɛ ayeliɛ sɔ’n, ɔ su amun bo kɛ amun nian su be yo wie? Sran dan yolɛ angunndan ng’ɔ ti Klist liɛ’n su’n, m’ɔ nin mɛn’n nunfuɛ’m be liɛ’n be sansan be wun’n, amun e yiyi nun naan e nian.

Maan e kpalo sran dan yolɛ’n angunndan ng’ɔ ti mɛn’n nunfuɛ’m be liɛ’n

3. ?Biblu’n nun sa mennin mun yɛ be kle kɛ be nga be klo aɲrunɲan dan kunndɛlɛ’n, be awieliɛ yo tɛ ɔ?

³ Biblu’n nun sa kpanngban kpa be kle kɛ sran dan yolɛ’n angunndan ng’ɔ ti mɛn’n nunfuɛ’m be liɛ’n su’n, i agualiɛ’n yɛle awieliɛ m’ɔ wie be’n. Maan amun wla kpɛn Aman mɔ Ɛstɛli nin Mardose be blɛ su’n ɔ yoli sran dan famiɛn Asierisi i awlo lɔ’n, i su. Aɲrunɲan mɔ Aman kunndɛli i dan’n ti’n, ɔ yoli i ɲin ase gualɛ nin i wie (Ɛster 3:5; 6:10-12; 7:9, 10). ?Yɛ Nɛbikadnɛzali mɔ kɛ i famiɛn dilɛ’n takali kpa’n, tutre dilɛ’n ti’n i ɲin su tuli’n nin? I sran dan yolɛ angunndan ng’ɔ buli m’ɔ timan su’n, i ɲin fite ndɛ ng’ɔ kannin’n nun. Ɔ kpan seli kɛ: ‘?Nán Babilɔni klɔ dan mɔ m bɔbɔ n fali min wunmiɛn dan’n n kplɛnnin i kɛ ń fá yó min famiɛn klɔ’n yɛ ɔ o yɛ? ?M’an kplɛnmɛn i kɛ ń fá yí min fanngan nin min aɲrunɲan’n i nglo?’ (Daniɛl 4:27). Sran sɔ’m be nun kun ekun yɛle Erɔdu Agripa 1 wun tufuɛ’n. Ɔ kplinnin su kɛ be mɛnmɛn i be yaci Ɲanmiɛn lɛ. I sɔ’n ti ‘kakaa’m be loli i wun naan w’a wu.’ (Sa Nga Be Yoli’n 12:21-23). E wun i wlɛ weiin kɛ sran sɔ’m be sran dan yolɛ angunndan’n m’ɔ timan Zoova liɛ’n su ti’n, be awieliɛ’n yoli tɛ.

4. ?Tutre dilɛ’n fin wan?

⁴ Kɛ e kunndɛ kɛ sran’m be bu e sran naan be yi e ayɛ’n, i sɔ’n ti su. Sanngɛ kɛ mɔ mmusu’m be si Satan fɛ i sɔ angunndan’n wla sran’m be ti’n nun dan’n ti’n, be tu be wun. I sɔ’n yi i bɔbɔ i klun sa m’ɔ kunndɛ kɛ sran’m be yo’n, i nglo (Matie 4:8, 9). Maan ɔ kpɛn e klun titi kɛ i yɛ ɔ ti “mɛn nga i min’n” niɔn, naan ɔ fuali kɛ ɔ́ fɛ́ i klun angunndan’n trú mɛn wunmuan’n nun (2 Korɛntfuɛ Mun 4:4; Efɛzfuɛ Mun 2:2; Sa Nglo Yilɛ 12:9). Kɛ mɔ Klistfuɛ’m be si sɔ’n ti’n, be kpalo sran dan yolɛ angunndan ng’ɔ ti mɛn’n nunfuɛ’m be liɛ’n.

5. ?Aklunjuɛ nga mɛn’n nun kpa yolɛ’n, ɔ nin dunman fulɛ’n, ɔ nin aɲanbeun’n be man’n, ɔ ka lɛ tititi? Amun yiyi nun.

⁵ Angunndan kun ekun nga Mmusu’m be si Satan fa wla sran’m be ti’n nun’n yɛle kɛ, ɔ yo maan sran’m be bu i kɛ sɛ be dunman’n fu’n, annzɛ sran’m be yi be ayɛ’n, annzɛ kusu be ɲan be wun’n, be ka lɛ di aklunjuɛ. ?Ɔ ti sɔ sakpa? ?Like nga be yo’n mɔ be dunman’n fu’n, ɔ nin aɲanbeun’n, yɛ ɔ man aklunjuɛ’n niɔn? Biblu’n wla e su nun kpa kɛ nán maan e tɔ i sɔ ato ndɛ’n nun. Afin Famiɛn Salomɔn m’ɔ ti angunndanfuɛ’n, ɔ seli kɛ: ‘N wunnin ekun kɛ sran’m be klo kɛ bé yó kɛ be wiengu’m be sa, i ti yɛle be wun ase nga be wla di junman lɛ’n. Sa sɔ’n tra sran i angunndan’n su, yɛ i kwlaa ti afɛ ngbɛn. Ɔ ti kɛ sran kun waan ɔ́ fúan aunmuan’n naan ɔ́ kó trɛ́ i sa.’ (Akunndanfuɛ’n 4:4). Sran sunman nga be kunndɛli dunman mɛn’n nga nun’n, be wun kɛ Biblu’n i nun afɔtuɛ sɔ’n ti nanwlɛ. I wie yɛle bian kun m’ɔ dili alapla nga be fa kɔ anglo ba’n su lɔ’n i su junman’n wie’n. Ɔ seli kɛ: “N miannin min ɲin n suannin ninnge sɔ’m be yolɛ, kpɔkun n sili i sɔ junman kusu kpa liɛ su. Sanngɛ i kwlaa yoli afɛ ngbɛn, afin aklunjuɛ’n nin fɔundi nga min waan m’an ɲɛn i’n b’a kaman lɛ tititi.”a Maan ɔ yo sika nun junman dilɛ’n nun o, annzɛ be wun kpinngbinlɛ’n nun o, annzɛ be ɲin su yiyilɛ’n nun o, sran dan yolɛ’n ng’ɔ ti mɛn’n nunfuɛ’m be liɛ’n i su aklunjuɛ’n, ɔ kaman lɛ tititi.

Sran dan yolɛ’n fin be wiengu mɔ be su i klolɛ su’n

6. ?Ngue yɛ ɔ kle kɛ sran dan yolɛ angunndan nga Zaki nin Zan be buli’n, ɔ timan kpa ɔ?

⁶ Sa kun m’ɔ juli Zezi blɛ su’n, ɔ kle e sran dan yolɛ’n i kpafuɛ’n. Afuɛ 33 nun E.B.N, Zezi nin i sɔnnzɔnfuɛ’m be ɔli Delɛ Cɛn’n i dilɛ Zerizalɛmu lɔ. Kɛ be juli lɔ’n, Zaki nin Zan mɔ be nin Zezi be ti ngawangawa’n, be kleli kɛ sran dan yolɛ’n i su angunndan nga be buli’n ɔ timan kpa. Be sinnin be nin sin be seli Zezi kɛ: ‘Kɛ á wá dí ɔ famiɛn’n, yo maan e tran ɔ fama su nin ɔ bɛ su.’ (Matie 20:21). Zuifu’m be nzuɛn’n nun’n, kɛ be fa sran be tran be sa fama su annzɛ be bɛ su’n, nn b’a mɛn i kɔmin su dan (1 Famiɛn Mun 2:19). Zaki nin Zan be ɲin bloli aɲrunɲan tranwlɛ lika sɔ’m be su. Ɔ maan be su kunndɛ sín be nin sin naan be kanndan tranwlɛ sɔ’m be su. Kɛ mɔ Zezi wunnin be angunndan’n i sin’n ti’n, ɔ kali lɛ tinngɛli be sran dan yolɛ’n i su angunndan tɛ’n mɔ be buli’n.

7. ?Wafa sɛ yɛ Zezi kleli Klistfuɛ kpa’m be sran dan yolɛ ajalɛ liɛ’n niɔn?

⁷ Zezi si kɛ mɛn nun’n, sran ng’ɔ ti dan’n yɛle sran ng’ɔ miɛnmiɛn i wiengu mun, annzɛ ɔ tin be su’n, annzɛ kusu yɛle sran nga mɔ like ng’ɔ kunndɛ’n, saan w’a kanman yɛ w’a ɲɛnmɛn i ɔ. Sanngɛ Zezi i sɔnnzɔnfuɛ’m be liɛ’n, be wun ase mɔ be kan be su be wiengu’n, yɛ ɔ ti sran dan yolɛ’n niɔn. Zezi seli kɛ: ‘Amun nun sran ng’ɔ klo kɛ ɔ́ yó dan’n, maan ɔ su i wiengu mun, yɛ amun nun sran ng’ɔ klo kɛ ɔ́ yó su kpɛn’n, maan ɔ yo i wiengu’m be kanga.’—Matie 20:26, 27.

8. ?Ndɛ mma nga be kaci i kɛ “ɔ su i wiengu’n,” i bo’n yɛle mennin? ?Yɛ kosan mennin yɛ e kwla fa usa e wun ɔn?

⁸ Glɛki aniɛn’n nun ndɛ mma nga Biblu’n nun be kacili i kɛ “ɔ su i wiengu,” ɔ kan sran ng’ɔ tu i klun yo like titi fa mɛn i wiengu’n, i ndɛ. Ɔ maan kɛ Zezi se i sɔnnzɔnfuɛ’m be sɔ’n, ngwlɛlɛ dan kpa kun yɛ ɔ kleli be lɛ ɔ. Yɛle kɛ, nán sran’m be mianlɛ kɛ be yo ninnge mun’n yɛ ɔ ti sran dan yolɛ’n niɔn. Sanngɛ sran dan yolɛ’n yɛle be wiengu mɔ be su i klolɛ su’n. Amun e usa e wun kosan yɛ’n: ‘?Sɛ min yɛle Zaki annzɛ Zan’n, angunndan mennin yɛ ń bú ɔ? ?Ń bú i kɛ be wiengu mɔ be su i klolɛ su’n yɛ ɔ yo maan be yo sran dan ɔn?’—1 Korɛntfuɛ Mun 13:3.

9. ?Zezi nin i wiengu’m be tranlɛ nun’n, ajalɛ kpa mennin yɛ ɔ yili i nglo ɔ?

⁹ Zezi kleli i sɔnnzɔnfuɛ’m be kɛ sran dan yolɛ’n angunndan ng’ɔ ti mɛn’n nunfuɛ’m be liɛ’n, ɔ timɛn i liɛ’n su. Afin sran ng’ɔ suli be’n, w’a yomɛn i wun dandan be su, annzɛ w’a tinman be su le. Sran wafa kwlaa, i yasua nin bla mun o, i ba kanngan mun o, i aɲanbeunfuɛ nin yalɛfuɛ mun o, i sran dandan mun o, yɛ sa tɛtɛ yofuɛ bɔbɔ mun o, kɛ be ba Zezi wun’n srɛ kunman be (Mark 10:13-16; Lik 7:37-50). Kɛ sran’m be wiengu kun kwlá yoman ninnge wie mun kɛ nga be bɔbɔ be fa yo ju’n sa’n, be traman be awlɛn be wiengu sɔ’n i wun. Sanngɛ Zezi liɛ w’a yoman sɔ. Afin, kannzɛ blɛ sunman nun i sɔnnzɔnfuɛ’m b’a buman sa’m be sin angunndan’n naan be kannin ndɛnngan titi’n, sanngɛ ɔ trɛli i awlɛn ɔ tinngɛli be angunndan’n. Ɔ maan be wunnin kɛ ɔ ti wun ase kanfuɛ nin wɛtɛfuɛ.—Zakari 9:9; Matie 11:29; Lik 22:24-27.

10. ?Wafa sɛ yɛ Zezi i mɛn dilɛ wunmuan nun’n, ɔ kleli kɛ ɔ tuli i klun suli i wiengu mun naan ɔ yoli be ye ɔ?

¹⁰ Ajalɛ kpa sɔ mɔ Ɲanmiɛn i Wa’n m’ɔ ti sran dan’n ɔ yili i nglo’n, ɔ kleli sran dan yolɛ’n i kpafuɛ’n. Zezi w’a baman asiɛ’n su kɛ sran’m be su i, sanngɛ ɔ bali kɛ ɔ́ sú i wiengu mun. I wie yɛle kɛ, ɔ yoli sran mɔ be “tukpaciɛ’n ti fanunfanun’n” be juejue kpɔkun ɔ yoli maan mmusu’m be jasoli sran’m be su. Kannzɛ bɔbɔ ɔ fɛli naan ɔ fata kɛ ɔ lo wunmiɛn’n, sanngɛ i wiengu’m be ndɛ loli i dan trɛli i bɔbɔ liɛ’n. Ɔ maan ɔ tuli i klun fɔnvɔli be (Mark 1:32-34; 6:30-34; Zan 11:11, 17, 33). I sran klolɛ’n ti’n, ɔ ukali be Ɲanmiɛn ninnge’m be nun. Ɔ ɔli klɔ mmuammua kpa’m be su ɔ ko boli Ɲanmiɛn Sielɛ Blɛ jasin fɛ’n kleli sran mun (Mark 1:38, 39). Nanwlɛ, sran’m be sulɛ’n yoli Zezi i cinnjin kpa.

Maan e nian Klist i wun ase kanlɛ’n su e yo

11. ?Nzuɛn mennin yɛ be kunndɛ i aniaan nga be sie be asɔnun sunianfuɛ’n be lika ɔ?

¹¹ Kɛ afuɛ 1800 ɔ́ kɔ́ i bue nuan’n, be nga bé síe be asɔnun sunianfuɛ naan be su Ɲanmiɛn i nvle nunfuɛ mun’n, nzuɛn ng’ɔ fata kɛ be ɲɛn i’n, be jrannin su kpa be kɛnnin i ndɛ weiin. Kɛ nga La Tour de Garde de Sion, 1 septembre, 1894 (Angl.) fa kannin’n sa’n, i waan maan sran sɔ’m be “yo wɛtɛfuɛ, ɔ fataman kɛ be yo wun tufuɛ. Maan be yo wun ase kanfuɛ mɔ be kanman ndɛ be fa manmanman be bɔbɔ be wun’n, sanngɛ be fa manman Klist’n. Yɛle kɛ nán maan be fa be bɔbɔ be sa silɛ’n be kle sran mun, sanngɛ maan be fa Klist liɛ’n mɔ be wun i wlɛ weiin’n m’ɔ le ta’n, be kle be.” Nanwlɛ, ɔ fataman kɛ Klistfuɛ’n ɔ kunndɛ kɛ be mɛn i sa su naan ɔ fa yo i bɔbɔ i klun sa’n, annzɛ ɔ fa yo i wun dandan, annzɛ ɔ fa tin i wiengu’m be su. Asɔnun sunianfuɛ ng’ɔ ti wun ase kanfuɛ’n, ɔ kɛ i angunndan nun titi kɛ i junman’n ti ‘junman kpa,’ naan ɔ timan i wun manmanlɛ junman (1 Timote 3:1, 2). Ɔ fata kɛ asɔnun kpɛnngbɛn nin asɔnunfuɛ’m be lika nianfuɛ’m be mian be ɲin be yo wun ase kanfuɛ naan be su be wiengu. Kpɔkun maan be fa jasin fɛ’n bolɛ’n i nun ta naan be wiengu’m be nian be ajalɛ kpa’n su be yo.—1 Korɛntfuɛ Mun 9:19; Galasifuɛ Mun 5:13; 2 Timote 4:5.

12. ?Kosan mennin mun yɛ be nga be kunndɛ kɛ be man be sa su asɔnun’n nun’n, be kwla fa usa be wun ɔn?

¹² Ɔ fata kɛ aniaan kwlaa ng’ɔ kunndɛ kɛ be mɛn i sa su asɔnun’n nun’n, ɔ usɛ i wun kosan yɛ mun: ‘?N kunndɛ kɛ be man min sa su naan n su min wiengu mun, annzɛ kusu naan be su min? ?N tu min klun n di junman ng’ɔ yo sran’m be ye’n, mɔ sanngɛ sran be siemɛn i nzɔliɛ’n?’ I wie yɛle kɛ, aniaan gbaflɛn kun kwla klo nzra nun ijɔlɛ’n, sanngɛ ɔ sisi i bo naan w’a nian aniaan oke’m be lika. Ɔ kwla klo asɔnun kpɛnngbɛn mun, annzɛ akpasua sunianfuɛ’m be wun lalalɛ, sanngɛ jasin fɛ’n bolɛ’n kwla yo i sa nun tankantankan. Ɔ fata kɛ aniaan sɔ’n, ɔ usɛ i wun kosan yɛ mun: ‘?Ɲanmiɛn i klun sa yolɛ’n ɔ nin i manmanlɛ’n be su yɛ n dun mmua n fa min ɲin n sie ɔ? ?N ti dunman klofuɛ?’ Sɛ e ti dunman klofuɛ’n, e kwlá seman kɛ e fa Klist i ajalɛ’n su.—Zan 5:41.

13. (a) ?Wafa sɛ yɛ asɔnun sunianfuɛ’n i wun ase kanlɛ ajalɛ’n kwla ɲan ta i wiengu’m be su ɔ? (b) ?Ngue ti yɛ e kwla se kɛ be wun ase kanlɛ’n, annzɛ be wun aenvuɛ yolɛ’n, ɔ timan like mɔ Klistfuɛ kun kwla se kɛ sɛ ɔ klo’n, ɔ kwla yo annzɛ ɔ kwlá yoman’n niɔn?

¹³ Kɛ e mian e ɲin e fa Klist i wun ase kanlɛ ajalɛ’n su’n, i sɔ’n su e bo kɛ e su e wiengu mun. Amun e fa nvlenvle’m be akpasua sunianfuɛ kun (surveillant de zone) m’ɔ ɔli Zoova i Lalofuɛ’m be Betɛli kun nun lɔ junman nga aniaan’m be di’n i nianlɛ’n, i su sunnzun ase e nian. Kannzɛ bɔbɔ aniaan sɔ’n i su junman’n sɔnnin’n, sanngɛ kɛ ɔ wunnin kɛ mannzin nga be fa yi fluwa’n ɔ su kle aniaan gbaflɛn kun i yalɛ kpa’n, ɔ jrannin naan w’a ukɛ i. Kɛ aniaan gbaflɛn’n ɔ́ kɛ́n i ndɛ’n, ɔ seli kɛ: “Nanwlɛ, ɔ boli min nuan dan! Ɔ seli min kɛ i nun m’ɔ ti gbaflɛn m’ɔ́ dí junman Betɛli lɔ’n, mannzin kɛ ngalɛ’n sa su yɛ ɔ dili junman ɔn. Ɔ maan i wla w’a fiman wafa nga mannzin sɔ’n kleli i yalɛ wie’n i su. Kannzɛ bɔbɔ junman cinnjin kpanngban kpa’m be dilɛ’n wo asɔnun sunianfuɛ sɔ’n i su’n, sanngɛ ɔ nin min dili mannzin’n su junman ɔ cɛli kpa naan w’a wɔ. Nanwlɛ, i sɔ’n boli min nuan dan.” Kɛ é sé yɛ’n, aniaan sɔ mɔ i wla te kpɛn be wun ase kanlɛ ajalɛ sɔ’n su’n, ɔ ti Zoova i Lalofuɛ’m be Betɛli kun nun junman sunianfuɛ kun. Nán maan e nun wie fi ɔ bu i wun sran dan naan ɔ se kɛ ɔ diman junman nga sran’m be ɲin yimɛn i’n. Sanngɛ, maan e yo e “wun aenvuɛ.” I sɔ liɛ’n, ɔ timan like mɔ be kwla se kɛ, sɛ n klo ɔ ń yó, annzɛ kusu sɛ n kloman’n n yoman. “Nzuɛn uflɛ” m’ɔ fata kɛ Klistfuɛ’m be yi i nglo’n, e wun aenvuɛ yolɛ’n wo nun wie.—Filipfuɛ Mun 2:3; Kolɔsfuɛ Mun 3:10, 12; Rɔmfuɛ Mun 12:16.

Wafa nga e kwla fa sran dan yolɛ angunndan ng’ɔ ti Klist liɛ’n su’n i su’n

14. ?Wafa sɛ yɛ e nin Ɲanmiɛn ɔ nin e wiengu Klistfuɛ mun e nantilɛ’n i su angunndan bulɛ’n, ɔ kwla uka e naan y’a suan sran dan yolɛ’n ng’ɔ ti su’n i wie ɔ?

¹⁴ ?Ngue yɛ e kwla yo naan y’a bu sran dan yolɛ angunndan ng’ɔ ti su’n i wie ɔ? Like nga e kwla yo’n, i kun yɛle kɛ e bu wafa nga e nin Zoova e nanti’n i su angunndan. Klɔ sran’m be mantanman Zoova i famiɛn m’ɔ ti’n, ɔ nin i tinmin’n, ɔ nin i ngwlɛlɛ’n bɔbɔ kaan sa (Ezai 40:22). Wafa nga e nin e wiengu Klistfuɛ mun e nanti’n, i su angunndan bulɛ’n ɔ kwla uka e wie ekun naan y’a suan e wun aenvuɛ yolɛ. Afin, nán ninnge ngba yɛ e si be yo ɔ. Yɛle kɛ, sɛ e si ninnge wie’m be yo tra e niaan mun’n, ninnge cinnjin kpa uflɛ mun kusu be o lɛ mɔ be si be yo tra e ɔ. Afin, sran kwlaa nga Ɲanmiɛn bu be sran kpa’n, be yɛle be nga be yoman be wun dandan’n mɔ sanngɛ be ti wɛtɛfuɛ nin wun ase kanfuɛ’n.—Nyanndra Mun 3:34; Zak 4:6.

15. ?Wafa sɛ yɛ Ɲanmiɛn i nvle’n nunfuɛ nga ɲrɛnnɛn’n nun be kpɔcimɛn i’n, be kle kɛ ɔ fataman kɛ sran kun sa’n, ɔ bu i wun dan tra i wiengu mun’n niɔn?

¹⁵ Ɲrɛnnɛn nga Zoova i Lalofuɛ’m be Ɲanmiɛn sulafilɛ’n ti be wun i’n, i su ndɛ’m be yi i sɔ liɛ’n i nglo weiin. Sa kpanngban nun’n, e wunnin kɛ be nga sran’m be buman be wie’n, be yɛ ɲrɛnnɛn’n nun be kpɔciman Ɲanmiɛn ɔn. I sɔ liɛ’n i su angunndan bulɛ’n, ɔ kle e kɛ ‘nán e bu e wun sran dan tra wafa nga e ti’n su,’ sanngɛ e yo wun ase kanfuɛ.—Rɔmfuɛ Mun 12:3.b

16. ?Asɔnun’n nun’n, wafa sɛ yɛ sran kwlaa be kwla fa sran dan yolɛ angunndan nga Zezi kleli’n i su wie ɔ?

¹⁶ Ɔ fata kɛ Klistfuɛ’m be kwlaa, i gbaflɛn nin talua mun o, i kpɛnngbɛn mun o, be kunndɛ be fa sran dan yolɛ angunndan ng’ɔ ti Klist liɛ’n su’n i su wie. Asɔnun’n nun’n, ɔ le junman fanunfanun m’ɔ fata kɛ be di ɔ. Nán maan sran fi se kɛ, kɛ mɔ be bumɛn i sran’n i ti yɛ be fɛli sɔ junman’n be mɛnnin i kɛ ɔ di ɔ (1 Samiɛl 25:41; 2 Famiɛn Mun 3:11). ?Siɛ nin niɛn mun, maan ɔ yo Ɲanmiɛn Sielɛ Blɛ Sua’n nun lɔ o, annzɛ aɲia dandan’m be bo lɔ o, junman kwlaa nga be fa man amun mma mun’n, amun wla be fanngan kɛ be tu be klun be di? ?Amun bu junman sɔ’m be kɛ be ti ɲannzuɛn like? Aniaan kun mɔ kɛ é sé yɛ’n ɔ ti Zoova i Lalofuɛ’n, i ɲin te kpɛn i si’n nin i nin’n, be ajalɛ kpa’n su. Kɛ ɔ́ kán be ndɛ’n, i waan: “Wafa nga be di Ɲanmiɛn Sielɛ Blɛ Sua’n, annzɛ aɲia dandan lika’m be nun nunnunlɛ junman’n, ɔ kleli min kɛ be bu i junman cinnjin kpa. Ɔ wie junman ng’ɔ ti wun ase kanlɛ junman’n nin o, be klunklo su be di junman be yo aniaan mun, annzɛ asɔnun be ye. Be ajalɛ kpa sɔ’n, ɔ uka min maan n tu n klun di junman kwlaa nga be fa man min Betɛli lɔ’n.”

17. ?Wafa sɛ yɛ bla nga be ti wun ase kanfuɛ’n be kwla yo maan asɔnun’n ɲan ɲrun ɔn?

¹⁷ Sɛ e waan é kúnndɛ kɛ e wiengu i ndɛ’n yo e cinnjin tra e bɔbɔ e liɛ’n, maan e fa Ɛstɛli mɔ afuɛ ya kpɔlɛ 5 nun laa blɛ liɛ nun’n, ɔ yoli famiɛn Asierisi i yi’n, i ajalɛ kpa’n su. Yɛle kɛ, kannzɛ famiɛn’n i sua ngblingbli kun nun yɛ ɔ tran’n, sanngɛ ɔ klɛnnin i wun Ɲanmiɛn i nvle’n nunfuɛ’m be ti naan Ɲanmiɛn i klun sa’n kpɛn su (Ɛster 1:5, 6; 4:14-16). Maan be yo aɲanbeunfuɛ annzɛ yalɛfuɛ o, andɛ Klistfuɛ bla’m be kwla yo kɛ Ɛstɛli fa yoli’n sa. Yɛle kɛ, be kwla wla be nga be awlɛn sɔman’n be yakpa, be kwla nian tukpacifuɛ’m be lika, be kwla bo jasin fɛ’n, kpɔkun be kwla uka asɔnun kpɛnngbɛn mun kpa. Nanwlɛ, aniaan bla wun ase kanfuɛ kɛ ngalɛ sa’m be ti asɔnun’n i aɲrunɲan like dan!

Sran dan yolɛ angunndan ng’ɔ ti Klist liɛ’n su’n i su mmlusuɛ’n

18. ?Kɛ be fa sran dan yolɛ angunndan ng’ɔ ti Klist liɛ’n su’n i su’n, mmlusuɛ mennin yɛ be ɲɛn i ɔ?

¹⁸ Kɛ titi be fa sran dan yolɛ angunndan ng’ɔ ti Klist liɛ’n su’n i su’n, be ɲan su mmlusuɛ kpanngban kpa. Sɛ e yo ninnge mun e man e wiengu mun’n, e bɔbɔ ɔ nin be nga e yo e mannin be’n e di aklunjuɛ (Sa Nga Be Yoli’n 20:35). Sɛ amun tu amun klun amun yo amun niaan’m be ye’n, bé kló amun kpa (Sa Nga Be Yoli’n 20:37). Mmlusuɛ’n i dan kpafuɛ’n yɛle kɛ, ye nga amun yo amun wiengu Klistfuɛ mun’n, Zoova ɲin kpaman su. Afin ye sɔ’n ti kɛ nnɛn mɔ be fa yi tɛ be mɛn i’n mɔ i klun jɔ su’n sa.—Filipfuɛ Mun 2:17.

19. ?Sran dan yolɛ angunndan ng’ɔ ti Klist liɛ’n su’n i nglo yilɛ’n nun’n, ngue yɛ ɔ fata kɛ e kunndɛ i yolɛ titi ɔ?

¹⁹ Ɔ fata kɛ e tinuntinun e usa e wun kosan yɛ’n: ‘?Ń kán sran dan yolɛ angunndan ng’ɔ ti Klist liɛ’n su’n i ndɛ min nuan nun sa ngbɛn, annzɛ kusu ḿ má súɛn i nglo yilɛ?’ Wun dandan yofuɛ’m be wun angunndan nga Zoova bu’n, ɔ ti weiin (Nyanndra Mun 16:5; 1 Piɛr 5:5). I sɔ’n ti’n, maan ɔ yo asɔnun’n nun lɔ o, annzɛ e awlo lɔ o, annzɛ cɛn kwlaa e nin e wiengu mun e tranlɛ’n nun o, maan e kle kɛ sran dan yolɛ angunndan ng’ɔ ti Klist liɛ’n su’n, ɔ ti e awlɛn su like. Maan e yo i sɔ e fa manman Ɲanmiɛn naan ɔ ɲan ɲrun.—1 Korɛntfuɛ Mun 10:31.

[Ja ngua lɛ ndɛ mun]

?Amun kwla yiyi nun?

• ?Ngue ti yɛ ɔ fata kɛ e kpalo sran dan yolɛ ng’ɔ ti mɛn’n nunfuɛ’m be liɛ’n su’n niɔn?

• ?Zezi ɲrun’n, sran dan’n yɛle wan?

• ?Wafa sɛ yɛ asɔnun sunianfuɛ’m be kwla nian Klist i wun ase kanlɛ’n su ɔ?

• ?Ngue yɛ ɔ kwla uka e naan y’a fa sran dan yolɛ angunndan ng’ɔ ti Klist liɛ’n su’n i su wie ɔ?

[Kuku, bue 31]

?Sran ng’ɔ bu sran dan yolɛ angunndan ng’ɔ ti Klist liɛ’n su’n yɛle wan?

?Sran ng’ɔ kunndɛ kɛ be su i’n, annzɛ sran ng’ɔ tu i klun su i wiengu mun’n niɔn?

?Sran ng’ɔ klo dunman’n, annzɛ sran ng’ɔ di wun ase kanlɛ junman’n niɔn?

?Sran ng’ɔ yo mɔ i bɔbɔ dunman’n ɔ fu’n, annzɛ sran ng’ɔ mɛn i wiengu kɔmin su’n niɔn?