Amun kunndɛ “nɛnnglɛnman kpakpafuɛ’n” andɛ
‘Bé wá kán Ɲanmiɛn sielɛ’n i jasin fɛ nga mɛn wunmuan’n nun.’ —Matie 24:14.
1, 2. (a) ?Zezi blɛ su’n, wafa sɛ yɛ Zuifu’m be buli Ɲanmiɛn Sielɛ Blɛ’n niɔn? (b) ?Ngue yɛ Zezi yoli naan i sɔnnzɔnfuɛ’m b’a wun Ɲanmiɛn Sielɛ Blɛ’n i wlɛ kpa ɔ? ?Yɛ i bo’n guali sɛ?
ZEZI blɛ su’n, Ɲanmiɛn Sielɛ Blɛ’n i ndɛ’n yoli cinnjin kpa Zuifu’m be sa nun (Matie 3:1, 2; 4:23-25; Zan 1:49). Sanngɛ i klikli nun’n, ninnge nga Ɲanmiɛn Sielɛ Blɛ’n wá yó be’n, ɔ nin wafa nga ɔ́ síe sran mun’n, be nun sunman b’a wunmɛn i wlɛ kpa. Asa ekun’n, be nun wie fi w’a siman kɛ ɲanmiɛn su lɔ yɛ Ɲanmiɛn Sielɛ Blɛ’n táka ɔ (Zan 3:1-5). Zezi i sɔnnzɔnfuɛ mun bɔbɔ’n, like’n i wafa nga Ɲanmiɛn Sielɛ Blɛ’n ti’n, annzɛ ekun like ng’ɔ fata kɛ be yo naan b’a ɲan famiɛn mɔ be nin Klist bé wá dí’n i su mmlusuɛ wie’n, b’a wunmɛn i wlɛ kpa.—Matie 20:20-22; Lik 19:11; Sa Nga Be Yoli’n 1:6.
2 Kɛ ɔ́ kɔ́ i ɲrun’n, blɛblɛblɛ Zezi kleli i sɔnnzɔnfuɛ mun ninnge kpanngban kpa. Ninnge sɔ’m be nun kun yɛle nɛnnglɛnman kpakpafuɛ’n kun’n i su ɲanndra m’ɔ buli’n. Like suanlɛ ng’ɔ sinnin lɛ’n yiyili ɲanndra sɔ’n nun kleli e. Zezi buli ɲanndra sɔ’n kleli i sɔnnzɔnfuɛ mun naan be wun i wlɛ kɛ, Ɲanmiɛn Sielɛ Blɛ’n i kunndɛlɛ’n ti like cinnjin kpa (Matie 6:33; 13:45, 46; Lik 13:23, 24). Nanwlɛ, be like klelɛ sɔ’n kannin be awlɛn’n kpa. Afin, kɛ nga Sa Nga Be Yoli’n fluwa’n fa kan’n sa’n, b’a sisiman be bo. Juejue su nin yakpa su’n, be kannin Ɲanmiɛn Sielɛ Blɛ jasin fɛ’n i ndɛ lele be fa juli asiɛ’n i awieliɛ.—Sa Nga Be Yoli’n 1:8; Kolɔsfuɛ Mun 1:23.
3. ?Kɛ Zezi kán e blɛ liɛ’n i ndɛ’n, Ɲanmiɛn Sielɛ Blɛ’n i su ndɛ mennin yɛ ɔ kannin ɔn?
3 ?Yɛ e blɛ liɛ’n nun’n nin? Kɛ Ɲanmiɛn Sielɛ Blɛ’n wá yó mɔ asiɛ’n káci mɛn klanman’n, mmlusuɛ nga sran’m bé ɲɛ́n i’n, be kɛn i ndɛ kle sran kpanngban kpa. Kɛ Zezi kán sa ng’ɔ́ wá yó “mɛn’n i awieliɛ’n” i nzɔliɛ’n i ndɛ’n, ɔ fali sran’m be ɲin sieli i like cinnjin kpa kun su. Ɔ seli kɛ: ‘Bé wá kán Ɲanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Ɲanmiɛn ndɛ’n. I sin yɛ mɛn i awieliɛ’n ɔ́ jú ɔ.’ (Matie 24:3, 14; Mark 13:10). Asa ekun’n, ɔ yiyili nun kɛ bé tánndan be nga bé dí junman dan sɔ’n be ɲrun naan wie liɛ bɔbɔ’n, bé klé be ɲrɛnnɛn dan. Sanngɛ, ɔ guali be awlɛn su nzue. Ɔ seli kɛ: ‘Sran ng’ɔ trɛ i awlɛn lele ju i awieliɛ’n, ɔ́ fíte nun.’ (Matie 24:9-13). Be wun sɔ mɔ be klɛn be man Ɲanmiɛn mɔ be su i juejue su’n, yɛ aata difuɛ m’ɔ kunndɛ nɛnnglɛnman kpa’n i su ɲanndra nga Zezi buli’n ɔ yili i nglo ɔ. ?Be nga be yi i nglo kɛ be lafi Ɲanmiɛn su mɔ juejue su be kunndɛ Ɲanmiɛn Sielɛ Blɛ’n, i sɔfuɛ wie’m be o lɛ andɛ?
Nanwlɛ ndɛ’n i wlɛ wunlɛ’n i su aklunjuɛ dilɛ
4. ?Ta mennin yɛ Ɲanmiɛn Sielɛ Blɛ’n i su ndɛ nanwlɛ’n ɔ ɲɛn i sran’m be su andɛ ɔ?
4 Ɲanndra nga Zezi buli nun’n, Zezi waan kɛ aata difuɛ m’ɔ kunndɛ nɛnnglɛnman kpa’n ɔ wunnin “nɛnnglɛnman kpakpafuɛ’n kun’n,” ɔ yoli i fɛ trali su. Aklunjuɛ sɔ’n suli aata difuɛ’n i bo maan ɔ yoli like kwlaa ng’ɔ kwla yo naan w’a ɲan nɛnnglɛnman sɔ’n (Ebre Mun 12:1). Andɛ kusu’n, Ɲanmiɛn nin i Sielɛ Blɛ’n be su ndɛ nanwlɛ’n ɔ yo maan sran’m be fa be wun mantan Ɲanmiɛn, kpɔkun ɔ wla be fanngan. Ndɛ kun mɔ aniaan bian A. H. Macmillan kannin’n, ɔ yi i sɔ liɛ’n i nglo weiin. Fluwa La foi en marche (Angl.) m’ɔ klɛli’n nun’n, ɔ kannin i bɔbɔ i Ɲanmiɛn kunndɛlɛ’n, ɔ nin angunndan ng’ɔ bu i sran’m be lika’n, i ndɛ. Ɔ seli kɛ: “Like nga n wunnin i wlɛ’n, afuɛ kwlaa sran kpanngban be wun i wlɛ wie titi. Sran sɔ’m be ti kɛ min nin amun sa. Afin be fin nvlenvle kwlaa nun, be aniɛn’n ti fanunfanun, be di junman wafawafa kpɔkun be afuɛ’n ti fanunfanun. Ndɛ nanwlɛ’n kpaman sran nun. Ɔ yo maan sran kwlaa nga be ti kpa’n be fa be wun mantan Ɲanmiɛn.”
5. ?Wafa sɛ yɛ afuɛ 2004 nun Ɲanmiɛn junman dilɛ’n i rapɔru’n kle kɛ junman’n dili kpa ɔ?
5 Ndɛ sɔ’n ti nanwlɛ. Afin afuɛ kwlaa nun’n, sran kpanngban mɔ be awlɛn ti kpa’n, Ɲanmiɛn Sielɛ Blɛ jasin fɛ’n su be bo maan be fa be wun man Zoova, kpɔkun be yo i klun sa. Kɛ ɔ fɛ i Sɛptamblu 2003 nun lele m’ɔ́ fá jú Utu 2004 nun’n, Ɲanmiɛn junman dilɛ’n i afuɛ nuan rapɔru’n yi i sɔ liɛ’n i nglo wie. Yɛle kɛ anglo 12 sɔ nun’n, nvle 235 be nun’n, sran 262. 416 be fali be wun mannin Zoova kpɔkun be yoli be batɛmu sran kwlaa be ɲrun. Nvle sɔ’m be nun’n, Zoova i Lalofuɛ’m be kleli sran 6. 085. 387 be awlo lɔ Biblu’n nun like le mɔcuɛ kwlaa nun naan be nanti Ɲanmiɛn Ndɛ nanwlɛ’n su. Sran sɔ’m be fin mɛn’n kwlaa nin nvlenvle’n kwlaa nun, be ijɔ aniɛn wafawafa’n kpɔkun be di junman fanunfanun.—Sa Nglo Yilɛ 7:9.
6. ?Junman’n i nvlɛ m’ɔ ba afuɛ kwlaa nun’n, ɔ fin wan?
6 ?Junman’n i nvlɛ balɛ sɔ’n fin wan? Ɔ lemɛn i su akplowa silɛ lele, sran sɔ mun mɔ be ti kpa’n, Zoova yɛ ɔ flɛ be maan be fa be wun mɛntɛn i ɔ (Zan 6:65; Matie 10:11). Sanngɛ, be nga be klɛnnin be wun, mɔ be miannin be ɲin be dili Ɲanmiɛn Sielɛ Blɛ junman sɔ’n, e wla kwlá fiman be su. I nun mɔ aniaan bian Macmillan le afuɛ 79, ɔ seli kɛ: “Kɛ ɔ fin cɛn mɔ n suannin Biblu’n nun like mɔ n wunnin tukpaciɛ nin wie’n, be su ndɛ nanwlɛ’n mɔ n lafili su’n, m’an yaciman i su falɛ le. Kɛ ɔ fin i lɛ’n, like nga Biblu’n kle’n, n kunndɛ kɛ ń sí i kpa trá su ekun. I liɛ’n, Ɲanmiɛn Zoova mɔ like fi nunmɛn i sin’n, ɔ nin ninnge ng’ɔ seli kɛ ɔ́ yó mán sran mun’n, n wiengu nga be kunndɛ kɛ bé sí be su like’n, ń kwlá úka be.”
7. ?Sa mennin yɛ ɔ kle weiin kɛ be nga be wun Biblu’n nun ndɛ nanwlɛ’n i wlɛ’n, be di aklunjuɛ naan be wun blibli be ɔ?
7 Awunblibliɛ mɔ be fa di junman sɔ’n, be wun i Zoova i sufuɛ’m be lika wie andɛ. Daniela tran Autriche lɔ klɔ nga be flɛ i Vienne su. Amun e fɛ i su sunnzun ase e nian. I waan: “Kɛ ɔ fin n bakan nun’n, n fali Ɲanmiɛn yoli min janvuɛ kpa. Titi’n, n kunndɛli kɛ ń sí i dunman’n. Afin min liɛ’n, kɛ be flɛ e Bofuɛ’n kɛ ‘Ɲanmiɛn’n,’ ɔ ti min ɲrun sa paloo ngbɛn. Sanngɛ n minndɛli lele, kɛ n ɲannin afuɛ 17, yɛ Zoova i Lalofuɛ’m be bali min awlo lɔ’n naan b’a yiyi Ɲanmiɛn i su ndɛ kwlaa nga n kunndɛli kɛ ń sí i’n, i nun b’a kle min. I agualiɛ su’n, n wunnin kɛ ndɛ’n ti nanwlɛ, yɛ ɔ yoli n fɛ dan! Min wun m’ɔ blibli min ti’n, n boli ndɛ’n i sran kwlaa be kan klelɛ’n i bo.” Daniela i juejue yolɛ’n ti’n, w’a cɛman naan i wiengu suklu ba’m b’a bo i finfin yolɛ’n bo. Daniela kan gua su kɛ: “Sanngɛ min liɛ’n, ndɛ nga Biblu’n kannin’n yɛ n wun kɛ ɔ su kpɛn su ɔ. Afin like nga n suɛnnin Biblu’n nun’n, ɔ kle kɛ Zezi seli i sɔnnzɔnfuɛ’m be kɛ i dunman nun ti’n, sran’m bé wá kpɔ́ be yɛ bé klé be ɲrɛnnɛn. I sɔ’n yoli min fɛ, yɛ ɔ boli min nuan wie kusu.” W’a cɛman lele, Daniela fɛli i wun mannin Zoova kpɔkun be yoli i batɛmu. I sin’n, ɔ fɛli i wun wlali ngaliɛ difuɛ junman’n nun. Kɛ ɔ jali bian’n, ɔ nin i wun Helmut be boli jasin fɛ’n kleli sran ble nin Sinua mun, ɔ nin Filipinifuɛ mun nin Ɛndiɛn nga be o Vienne lɔ mun. Kɛ é sé yɛ’n, Daniela nin Helmut be ti ngaliɛ difuɛ sran ble mɛn’n i wia afiliɛ lɔ ngua lɔ lika’n nun.
Be yacimɛn i dilɛ
8. ?Be nga be kle kɛ be klo Ɲanmiɛn naan be kpɔcimɛn i Sielɛ Blɛ’n, mmlusuɛ mennin yɛ be ɲɛn i ɔ?
8 Sanngɛ, ajalɛ nga andɛ Zoova i sufuɛ’m be fa naan b’a kle kɛ be klo Ɲanmiɛn naan be kpɔcimɛn i Sielɛ Blɛ’n, be nun kun yɛle ngaliɛ difuɛ junman dilɛ’n. Kɛ Zezi i ɲanndra’n nun aata difuɛ’n m’ɔ kunndɛ nɛnnglɛnman kpa’n sa’n, be nga be fa be wun wla junman sɔ nun’n, be mian be ɲin be tu ajalɛ be kɔ lika mmuammua kpa Ɲanmiɛn Sielɛ Blɛ’n i junman dilɛ’n ti. I lɛ nun’n, nán Ɲanmiɛn Sielɛ Blɛ jasin fɛ’n i kunndɛlɛ ti yɛ ngaliɛ difuɛ sɔ’m be tu ajalɛ’n niɔn. Sanngɛ be tu ajalɛ be ko to sran nga be o asiɛ’n i tiwa kwlaa su’n, be kle be like kpɔkun be uka be maan be kaci Zezi Klist i sɔnnzɔnfuɛ (Matie 28:19, 20). Lika sunman nun’n, be jrannin kekle ɲrɛnnɛn’m be ɲrun. Sanngɛ be ɲannin be kekle jranlɛ sɔ’n i su mmlusuɛ dan.
9, 10. ?Jasin fɛ’n bolɛ nun ndɛ fɛfɛ mennin mun yɛ be mannin ngaliɛ difuɛ nga be o lika mmuammua kɛ République de Centre Afrique sa’n, be aklunjuɛ ɔ?
9 Amun e fa sran ble mɛn’n i klɔ nga be flɛ i République de Centre Afrique i su sunnzun ase e nian. Afuɛ ng’ɔ sinnin lɛ’n nun’n, klɔ sɔ’n su sran 16.184 be trannin e Wla kpɛnlɛ Cɛn dilɛ’n i bo. Sran sɔ’m be nuan’n, ɔ tra lɔ Ɲanmiɛn Sielɛ Blɛ jasin fɛ’n bofuɛ mun kpɛ nso. Lika sɔ’n i klɔ kpanngban su’n, be leman kannin m’ɔ kpaja kɔnguɛ’n. I sɔ’n ti’n, sran’m be yo be ninnge mun wia’n nun waka’m be fɔnvɔ’m be bo. Ngaliɛ difuɛ’m be kusu be niɛn i sɔ’n su be di be junman liɛ’n wie. Yɛle kɛ, waka’m be fɔnvɔ’m be bo yɛ be tran be kle sran’m be Biblu’n nun like ɔ. I sɔ yolɛ’n i kpa lika’n yɛle kɛ, lika’n kpaja kpɔkun awunyɛyɛ nunman nun. Sanngɛ nɛ́n i ngba ɔ. Lika sɔ’n nunfuɛ’m be klo Ɲanmiɛn Ndɛ’n kpa. Ɔ maan Ɲanmiɛn sulɛ’n i su yalɛ kokolɛ’n ti be nzuɛn, kɛ nga balɔn ndɛ’n, annzɛ wafa nga lika’n wá yó’n, be ndɛ kanlɛ’n ti lika wie nunfuɛ’m be nzuɛn’n sa. Ɔ maan sɛ sran kun su sin naan ɔ wun kɛ amun su kle Biblu’n nun like’n, kpɔkun w’a b’a like suanlɛ’n wie.
10 Ɔ maan, kɛ ngaliɛ difuɛ kun ɔ́ klé sran kun i Biblu’n nun like gua’n su’n, gbaflɛn kun wa toli be. Ɔ seli kɛ, kɛ mɔ b’a flɛmɛn i be like suanlɛ’n i bo’n ti’n, ngaliɛ difuɛ’n to i lɔ naan ɔ ko kle i Biblu’n nun like wie. I lɛ nun’n, ngaliɛ difuɛ’n w’a sisimɛn i bo. Gbaflɛn’n ɔli i ɲrun ndɛndɛ kpa like suanlɛ’n nun. Mɛn kunngba sɔ’n nun lɔ’n, wie liɛ polisie’m be jran Zoova i Lalofuɛ mun. Sanngɛ nán kɛ be jran be naan bé íjɔ be, annzɛ bé fú be alamannin ti ɔ. Sanngɛ be jran be naan be man be La Tour de Garde nin Réveillez-vous ! nga b’a yi be uflɛuflɛ’n wie. Annzɛ kusu’n, ndɛ wie mɔ kɛ be kanngannin nun m’ɔ jɔli be klun ti’n, be jran be naan bé yó be kwla.
11. ?Kannzɛ bɔbɔ ɔ timan pɔpɔ be sa nun’n, sanngɛ wafa sɛ yɛ be nga b’a cɛ ngaliɛ difuɛ junman nun’n be bu be junman’n niɔn?
11 Ngaliɛ difuɛ sɔ’m be nun sunman be boli be junman’n i dilɛ’n bo w’a di afuɛ 40, annzɛ afuɛ 50, sanngɛ be te di. Nanwlɛ, be Ɲanmiɛn sulafilɛ’n nin be awlɛn tralɛ’n, ɔ man e kwlaa e ajalɛ kpa. Ngaliɛ difuɛ kun nin i yi’n, be dili be junman’n nvle fanunfanun nsan nun lele afuɛ 42. Aniaan bian’n waan: “W’a yoman e sa nun pɔpɔ. Afin, jɛkuajo’n kleli e yalɛ lele afuɛ 35. Sanngɛ, ngaliɛ difuɛ junman mɔ e fali e wun wlali nun’n, w’a yoman e nsisɔ le.” I yi’n kan gua su kɛ: “Aklunjuɛ nga jasin fɛ’n bolɛ man e cɛn kwlaa’n, ɔ ti dan. Afin ndɛndɛ kpa’n, e bo sran’m be Biblu’n nun like klelɛ’n i bo. Kɛ Biblu’n nun like suanfuɛ’m be ba asɔnun aɲia’m be bo mɔ a wun kɛ be kunndɛ sran uflɛ’m be silɛ’n, ɔ ti kɛ awlo kun nunfuɛ mun yɛ be yia cɛn kwlaa sa.”
Be “buman like’n wie fi like”
12. ?Ngue ndɛ yɛ be nga be klo Ɲanmiɛn Sielɛ Blɛ’n m’ɔ ti kpa sakpa’n, be kan ɔn?
12 Kɛ aata difuɛ m’ɔ kunndɛ nɛnnglɛnman kpa’n ɔ wunnin i kpakpafuɛ’n, “ɔ ko yoli i sa nun ninnge’n kwlaa atɛ fa toli nɛnnglɛnman sɔ’n.” (Matie 13:46). Be sa nun like m’ɔ kwla yo like kpa mɔ be klunklo be yaci i lɛ’n, i sɔ’n ti be nga be klo Ɲanmiɛn Sielɛ Blɛ’n i kpa m’ɔ ti’n, be nzuɛn. Be nga be nin Klist bé wá dí famiɛn Ɲanmiɛn Sielɛ Blɛ nun’n, akoto Pɔlu seli be nun kun kɛ: ‘Nanwlɛ, kɛ m bu min Min Klist Zezi i silɛ mɔ n si i’n like kpa sakpa’n ti’n, ɔ maan n buman like’n wie fi like. I ti m’an yaci like’n kwlaa kɛ ɔ́ yó naan Klist a yo n like kpa naan min nin i y’a kaci sran wunmuan’n ti.’—Filipfuɛ Mun 3:8.
13. ?Wafa sɛ yɛ République Tchèque lɔ sran kun kleli kɛ ɔ klo Ɲanmiɛn Sielɛ Blɛ’n niɔn?
13 I sɔ kunngba’n, kɛ ɔ ko yo naan Ɲanmiɛn Sielɛ Blɛ’n w’a yra be su wie’n ti’n, andɛ sran sunman be mian be ɲin be kaci be mɛn dilɛ’n. Amun e fa sunnzun ase kun. République Tchèque lɔ bian kun ti suklu su kpɛn, yɛ ɔ le afuɛ 60. Afuɛ 2003 nun ɔktɔblu nun’n, ɔ ɲannin Biblu’n i akua nga be flɛ La connaissance qui mène à la vie éternelle. Kɛ ɔ kanngannin nun’n, ndɛndɛ kpa’n ɔ kunndɛli i tranwlɛ lɔ Zoova i Lalofuɛ mun naan be kle i Biblu’n nun like. Ɔ ɔli i ɲrun ndɛndɛ kpa Ɲanmiɛn ninnge’m be nun. Ɔ maan be ja nun lɛ’n, ɔ ɔli asɔnun aɲia’m be kwlaa be bo. Laa nun’n, ɔ kunndɛli kɛ be sie i Mɛli naan i sin’n, ɔ́ yó depite. ?Sanngɛ ɔ yoli sɛ siɛn’n? Ɔ fali ajalɛ uflɛ. Yɛle kɛ siɛn’n, like ng’ɔ fɛ i ɲin sie su’n yɛle Ɲanmiɛn Sielɛ Blɛ jasin fɛ’n bolɛ’n. I waan: “N kwla yacili Biblu’n i akua kpanngban min suklu ba’m be sa nun.” Afuɛ 2004 nun Zuie anglo’n nun’n, ɔ fɛli i wun mannin Zoova maan be yoli i Batɛmu aɲia dan nga be yoli’n, be nun kun bo.
14. (a) ?Ɲanmiɛn Sielɛ Blɛ jasin fɛ’n su sran akpinngbin be bo maan be yo ngue like? (b) ?Kosan mennin mun yɛ e tinuntinun e kwla fa usa e wun ɔn?
14 I sɔ kunngba’n, asiɛ wunmuan’n su sran akpinngbin b’a sɔ Ɲanmiɛn Sielɛ Blɛ jasin fɛ’n nun klanman. Be fin mɛn tɛ’n nun lɔ fiteli. Be yacili be laa nzuɛn tɛ nin be janvuɛ tɛ mun, ɔ nin mɛn’n nun ninnge’m be klolɛ’n (Zan 15:19; Efɛzfuɛ Mun 4:22-24; Zak 4:4; 1 Zan 2:15-17). ?Ngue ti yɛ be fali ajalɛ kwlaa sɔ mun ɔn? Afin be wunnin kɛ suyralɛ nga Ɲanmiɛn Sielɛ Blɛ’n man’n, ɔ ti kpa tra mɛn tɛ nga nun like’n kwlaa nga be kwla ɲɛn i’n. ?Kɛ amun bu i sɔ wie Ɲanmiɛn Sielɛ Blɛ’n jasin fɛ’n, i lika ɔ? ?Like kwlaa ng’ɔ fata kɛ amun yo naan amun mɛn dilɛ’n, ɔ nin amun ɲrun lɔ ninnge nga amun kunndɛ’n, b’a yo Zoova liɛ’n su’n, amun awlɛn’n su amun bo kɛ amun yo be? Sɛ amun yo sɔ’n, i bo’n ɔ́ gúa kpa mán amun. Yɛle kɛ, andɛ nin ainman, amún ɲán suyralɛ dan.
Ɲanmiɛn ninnge’m be nun awie kpɛlɛ’n wo i blɛ kasiɛn’n nun
15. ?Ngue yɛ Ɲanmiɛn nuan ijɔfuɛ’n seli kɛ Ɲanmiɛn i sufuɛ’m bé yó i blɛ kasiɛn’n nun ɔn?
15 Jue tofuɛ’n seli kɛ: “Blɛ nga á yíayía wɔ alɛ kunfuɛ’m be nuan’n, sonja yakpafuɛ’m be nin wɔ ɔ.” Sonja yakpafuɛ sɔ’m be wie yɛle ‘gbaflɛn mun mɔ be ba kɛ nglɛmun bɔlɛ’n m’ɔ gua’n sa’n,’ ɔ nin “bla nga be bo jasin kpa be sin’n” mɔ be ‘ba kpanngban kɛ sonja mun sa’n.’ (Jue Mun 68:12; 110:3). ?Blɛ kasiɛn nga nun’n, Zoova i sufuɛ bla nin yasua mun, ɔ nin gbaflɛn nin kpɛnngbɛn’m be ɲin mɔ be mian’n, ɔ nin be wun mɔ be klɛn’n, i bo’n gua sɛ?
16. Wafa nga Ɲanmiɛn i sufuɛ’m be kunndɛ kɛ bé úka be wiengu mun naan be suan Ɲanmiɛn Sielɛ Blɛ’n i su like’n, amun fɛ i su sunnzun ase kun.
16 Ɛndi lɔ’n, wafa nga be ko yo naan b’a uka sran akpinngbin nɲɔn tra su nga be ti sutrefuɛ’n, naan b’a suan Ɲanmiɛn Sielɛ Blɛ’n i su like’n, i ndɛ loli atin bofuɛ bla kun kpa (Ezai 35:5). I sɔ’n ti’n, ɔ ɔli Bangalore ɔ ko suannin sutrefuɛ’m be aniɛn’n. Ɔ maan ɔ kwla boli Ɲanmiɛn Sielɛ Blɛ jasin fɛ’n kleli sutrefuɛ’m be nun sunman. Kpɔkun be takali Biblu’n nun like suanlɛ akpasua mun. Kɛ ɔ yoli sɔ’n w’a cɛman lele, sran sɔ’m be nun blu nin nɲɔn tra su be ɔli Ɲanmiɛn Sielɛ Blɛ Sua’n nun lɔ asɔnun aɲia’m be bo. Cɛn kun’n, atɔnvlɛ falɛ kun i bo lɔ’n, atin bofuɛ’n ɔ nin gbaflɛn sutrefuɛ kun m’ɔ fin Calcutta’n be wunnin be wun. Kosan kpanngban mɔ gbaflɛn’n usali’n kleli kɛ, Ɲanmiɛn Ndɛ’n lo i kpa naan ɔ́ kúnndɛ kɛ ɔ́ sí Zoova i su like kpanngban. Sanngɛ like kun o lɛ ɔ miɛn i sa. Yɛle kɛ, gbaflɛn’n wá sɛ́ i sin Calcutta lɔ naan ɔ́ kó dí suklu. Klɔ sɔ’n kusu nin lika nga be o lɛ’n be afiɛn’n ti nun kilo 1,600. Kpɔkun Zoova i Lalofuɛ nga be si bobo nin sutrefuɛ’m be aniɛn’n i kan’n, be nunman lɔ. Gbaflɛn’n kpatali i si kpa lele kɛ ɔ́ kó dí i suklu’n i Bangalore. Lɔ liɛ’n, ɔ́ kwlá súan Biblu’n nun like titi. Ɔ ɔli i ɲrun ndɛndɛ kpa Ɲanmiɛn ninnge’m be nun. Ɔ maan kɛ afuɛ kun sinnin cɛ’n, ɔ fɛli i wun mannin Zoova. Kpɔkun i kusu’n, be nga be ti sutrefuɛ kɛ i bɔbɔ sa’n, ɔ nin i bakan nun janvuɛ kun’n, ɔ kle be nun kpanngban be Biblu’n nun like wie. Kɛ é sé yɛ’n, Ɛndi lɔ Betɛli’n w’a siesie i wun naan atin bofuɛ’m be suan bobo nin sutrefuɛ’m be aniɛn’n naan be uka i sɔfuɛ mun.
17. Afuɛ 2004 nun Ɲanmiɛn junman nga Zoova i Lalofuɛ’m be dili’n mɔ i rapɔru’n wo fluwa’n i bue 24 lele 27 nun’n, kan i nun sa kun m’ɔ wla ɔ fanngan’n i ndɛ.
17 Fluwa nga i bue 24 lele 27 nun’n, Ɲanmiɛn junman nga afuɛ 2004 nun Zoova i Lalofuɛ’m be dili i asiɛ wunmuan’n su’n i su rapɔru’n o nun. Amun fa blɛ kan naan amun fa amun ɲin sie su kpa. I liɛ’n, amun bɔbɔ amún wún i wlɛ kɛ andɛ asiɛ wunmuan’n su Zoova i sufuɛ’m be fa be ɲin sie i “nɛnnglɛnman kpakpafuɛ’n kun’n” i kunndɛlɛ’n su kpa.
Amun ‘dun mmua fa amun wun man Ɲanmiɛn maan ɔ sie amun’
18. ?Aata difuɛ m’ɔ kunndɛ nɛnnglɛnman kpa’n i su ɲanndra nun’n, ndɛ mennin yɛ Zezi w’a kanman ɔn? ?Yɛ ngue ti ɔ?
18 Sɛ e fa e ɲin sie aata difuɛ m’ɔ kunndɛ nɛnnglɛnman kpa’n i su ɲanndra nga Zezi buli’n i su ekun’n, like nga kɛ aata difuɛ’n yoli i sa nun like’n kwlaa atɛ’n, ɔ yoli naan w’a diman yalɛ’n, é wún kɛ Zezi w’a kanmɛn i ndɛ. Ɔ maan, sran wie’m be kwla usa kɛ: ‘?Nin yɛ aata difuɛ’n ɲán aliɛ naan w’a di ɔ? ?Kɛ m’ɔ leman like fi kun’n niɔn, nin yɛ ɔ́ ɲán tralɛ naan w’a wla ɔ? ?Yɛ ngue yɛ ɔ́ fá sɛ́sɛ́ i wun ɔn? ?Like kpa mennin bɔbɔ cɛ yɛ nɛnnglɛnman kpakpa sɔ’n kwla mɛn i ɔ? Kannzɛ bɔbɔ kosan sɔ’m be usalɛ ti su’n, sanngɛ be fin klɔ sran angunndan. Zezi seli i sɔnnzɔnfuɛ’m be kɛ: ‘An dun mmua fa amun wun man Ɲanmiɛn maan ɔ sie amun, yɛ an yo i klun sa’n, i sin ɔ́ wá fá ninnge sɔ’n kwlaa uka su man amun.’ (Matie 6:31-33). ?Nɛ́n i ɔ? Ɲanndra mɔ Zezi buli’n i nun afɔtuɛ cinnjin’n yɛle kɛ, ɔ fata kɛ be tu be klun be yi Ɲanmiɛn sulɛ’n, ɔ nin Ɲanmiɛn Sielɛ Blɛ’n i ti juejue yolɛ’n i nglo. ?Afɔtuɛ sɔ’n ti e liɛ wie?
19. ?Afɔtuɛ cinnjin mennin yɛ nɛnnglɛnman kpakpafuɛ’n kun’n i su ɲanndra nga Zezi buli’n ɔ kwla man e ɔ?
19 Kannzɛ bɔbɔ e boli jasin fɛ’n ndɛ’n i suanlɛ’n i bo ɔ nin a cɛman’n, annzɛ kusu sɛ e kunndɛli Ɲanmiɛn Sielɛ Blɛ’n naan titi e kan ninnge kpakpa nga ɔ́ wá yó be’n be ndɛ kle e wiengu mun w’a cɛ kpa’n, nán maan e yaci i yolɛ le. Maan Ɲanmiɛn Sielɛ Blɛ’n i ndɛ lo e tititi. Lika’n ti kekle sɔ. Sanngɛ, kɛ nɛnnglɛnman kpakpafuɛ’n kun’n mɔ aata difuɛ’n wunnin i’n sa’n, e kwla lafi su kɛ like kpafuɛ’n yɛ e kunndɛ ɔ, naan ɔ lemɛn i wunsu. Mɛn’n nun sa mun nin Biblu’n nun ndɛ’m be su kpɛnlɛ’n, be kle weiin kɛ e o ‘mɛn’n i awieliɛ’ blɛ’n nun (Matie 24:3). Kɛ aata difuɛ m’ɔ kunndɛ nɛnnglɛnman kpafuɛ’n sa’n, maan e tu e klun e yi e Ɲanmiɛn Sielɛ Blɛ’n i ti juejue yolɛ’n i nglo. Kpɔkun e cenjele like mɔ yɛle jasin fɛ’n bolɛ’n, maan e klun jɔ su.—Jue Mun 9:2, 3.
?Amun wla kwla kpɛn su?
• ?Ɲanmiɛn i sufuɛ kpa’m be junman i nvlɛ m’ɔ ba afuɛ kwlaa nun’n, ɔ fin wan?
• ?Angunndan mennin yɛ e wun i ngaliɛ difuɛ’m be lika?
• ?Ɲanmiɛn Sielɛ Blɛ jasin fɛ’n ti’n, kacilɛ mennin yɛ sran wie’m be kacili ɔ?
• ?Afɔtuɛ cinnjin mennin yɛ nɛnnglɛnman kpakpafuɛ’n kun’n i su ɲanndra nga Zezi buli’n ɔ kwla man e ɔ?
[Tableau, pages 24-27]
RAPPORT MONDIAL DES TÉMOINS DE JÉHOVAH POUR L’ANNÉE DE SERVICE 2004
(Voir la publication)