Yasua nin i yi be afɔtuɛ kpakpa manlɛ
‘Bla mun, an bu amun wun’m be sran, kɛ an bu e Min’n i sran’n sa. Nán an fa amun ɲin wlawla be. Yasua mun, amun kusu an klo amun yi mun.’—EFƐZFUƐ MUN 5:22, 25.
1. ?Aja’n i wlɛ wunlɛ kpafuɛ’n yɛle mennin?
ZEZI seli kɛ aja’n, yɛle yasua kun nin bla kun mɔ Ɲanmiɛn kan be bo nun’n, ɔ maan be kaci ‘sran wunmuan’n.’ (Matie 19:5, 6). Aja’n yɛle kɛ, sran nɲɔn mɔ be nzuɛn’n timan kun’n, be yo maan be ɲin’n tran like kunngba’n su. Sɛ w’a yoman kɛ wie’n yɛ ɔ titi yasua kun nin i yi be nun sa’n, ɔ fataman kɛ aja’n yo le nɲɔn kun like. Nvle sunman be nun’n, yasua nin i yi be wiengu yralɛ’n ti like pɔpɔ. Sanngɛ Klistfuɛ’m be liɛ’n, aja’n ti be ɲrun like dan kpa. Ɔ maan sɛ bé yrá be wiengu’n, nn sa’n w’a yo tɛ dan ti ɔ.—Matie 19:9.
2. (a) ?Ukalɛ mennin yɛ be nga be o aja’n nun’n be le i ɔ? (b) ?Ngue ti yɛ ɔ ti cinnjin kɛ be yo naan aja’n ɔ yo ye ɔ?
2 Aja’n i su afɔtuɛ manfuɛ kun seli kɛ: “Aja nga be se kɛ ɔ yoli ye’n, nán kɛ ndɛ’m be tɔman yasua nin i yi be afiɛn ti ɔ. Sanngɛ yasua’n nin i yi’n be jran kekle titi sa ng’ɔ tɔ’n i ɲrun, kpɔkun be fa ninnge nga be le be’n be kunndɛ i trawlɛ.” Klistfuɛ nga be le bla nin bian’n be liɛ’n, ninnge sɔ mɔ be le be’n i wie yɛle Biblu’n nun afɔtuɛ mun, ɔ nin ukalɛ m’ɔ fin be wiengu Klistfuɛ mun’n, ɔ nin be afiɛn’n m’ɔ nin Zoova mantan’n mɔ maan be srɛ i’n. Aja ng’ɔ yo ye’n, ɔ jran kekle sa’m be ɲrun. Kpɔkun kɛ afuɛ’m bé sín’n, ɔ man yasua nin i yi’n be aklunjuɛ nin like ng’ɔ ju be’n. Sanngɛ like ng’ɔ ti cinnjin kpafuɛ’n yɛle kɛ, ɔ manman Ɲanmiɛn Zoova m’ɔ kpɛli aja’n i ba’n.—Bo Bolɛ 2:18, 21-24; 1 Korɛntfuɛ Mun 10:31; Efɛzfuɛ Mun 3:15; 1 Tɛsalonikfuɛ Mun 5:17.
Maan e sɔnnzɔn Zezi nin i asɔnun’n
3. (a) ?Yasua nin i yi be afɔtuɛ nga Pɔlu mannin’n i nun kpɔlɛ cinnjin mun yɛle mennin? (b)?Ajalɛ kpa mennin yɛ Zezi mannin ɔn?
3 I afuɛ akpi nɲɔn yɛ, akoto Pɔlu mannin Klistfuɛ nga be le bla nin bian’n be afɔtuɛ kpa. Fluwa kun m’ɔ klɛli’n nun’n, ɔ seli kɛ: ‘Kɛ asɔnun’n bu Klist sran’n, maan mmla’m be bu be wun’m be sran sɔ sa’n kwlaa nun. Yasua mun, kɛ Klist kloli asɔnun’n, amun kusu an klo amun yi mun sɔ.’ (Efɛzfuɛ Mun 5:24, 25). Nanwlɛ, i sɔ’n ti sunnzun ase kpa kun! Klistfuɛ bla nga be kan be wun ase mɔ be bu be wun’m be sran sakpa’n, mɔ be nanti sran sielɛ mmla’n su’n, be sɔnnzɔn asɔnun’n m’ɔ si i siefuɛ’n. Blɛ kpa nun o, annzɛ blɛ kekle nun o, Klistfuɛ nga be klo be yi mun’n, be kle kɛ be nian Klist i asɔnun’n i klolɛ’n ɔ nin i lika nianlɛ ajalɛ’n su.
4. ?Wafa sɛ yɛ yasua’m be kwla nian Zezi i ajalɛ’n su ɔ?
4 Klistfuɛ yasua’m be sie be awlo mun. Sanngɛ Zezi yɛ ɔ sie be bɔbɔ ba’n niɔn (1 Korɛntfuɛ Mun 11:3). Ɔ maan, kɛ nga Zezi niannin i asɔnun’n i lika’n sa’n, yasua’m be kusu klolɛ su be klɛn be wun be nian be awlofuɛ’m be lika Ɲanmiɛn ninnge’m be nun, kpɔkun be man be like ng’ɔ ju be’n. Be dun mmua yo like ng’ɔ ti kpa man be awlofuɛ mun’n, naan b’a yo be bɔbɔ be liɛ’n. Zezi seli kɛ: ‘Like kwlaa nga an klo kɛ sran yo man amun’n, an yo i kunngba sɔ’n man be.’ (Matie 7:12). I sɔ mmla liɛ’n i su falɛ’n ti cinnjin kpa aja’n nun. Pɔlu kleli i sɔ liɛ’n weiin fluwa kun m’ɔ klɛli’n nun. Ɔ seli kɛ: ‘Yasua mun, an klo amun yi mun kɛ an fa klo amun bɔbɔ amun wun’n sa. Sran fi kpɔmɛn i bɔbɔ wun, sanngɛ ɔ tɛ i wun, ɔ niɛn i wun su.’ (Efɛzfuɛ Mun 5:28, 29). Ɔ fata kɛ yasua’n ɔ tɛ i yi’n, kpɔkun ɔ niɛn i su kɛ ng’ɔ fa tɛ i bɔbɔ wun’n m’ɔ niɛn i wun su’n sa.
5. ?Wafa sɛ yɛ bla’m be kwla nian asɔnun’n i ajalɛ’n su ɔ?
5 Bla nga be su Ɲanmiɛn’n, be nian asɔnun’n i ajalɛ’n su. I nun mɔ Zezi o asiɛ’n su wa’n, i sɔnnzɔnfuɛ’m be klunklo su be yacili be ninnge mun, kpɔkun be suli i su. Kɛ Zezi wuli bɔbɔ’n, b’a yacimɛn i su sulɛ. Kannzɛ bɔbɔ Zezi wuli w’a di afuɛ 2.000 tra su’n, sanngɛ Klistfuɛ kpa’m be asɔnun’n ɔ lo i wun man Zezi, kpɔkun ɔ su i su titi sa kwlaa nun. I sɔ kunngba’n, Klistfuɛ bla’m be kpɔman be wun mun, annzɛ kusu awlo’n i sielɛ’n mɔ Ɲanmiɛn Ndɛ’n nun’n, ɔ ti yasua’n i trɔ’n, be kunndɛman kɛ bé fá trátrá be sa bɛ’n nun. Sanngɛ, be uka be wun mun, be ɲin yi be, be nuan sɛ, kpɔkun be wla be fanngan. Kɛ yasua nin i yi be nɲɔn’n be tran klolɛ su kɛ ngalɛ’n sa’n, saan be aja’n ɔ́ yó ye kpɔkun ɔ́ mán be aklunjuɛ.
Amun nin be tran kpa titi
6. ?Afɔtuɛ mennin yɛ Piɛli mannin yasua mun ɔn? ?Yɛ ngue ti yɛ ɔ ti afɔtuɛ cinnjin ɔn?
6 Akoto Piɛli mannin yasua nin i yi be afɔtuɛ wie. Kpɔkun kɛ ɔ́ kán ndɛ klé yasua mun’n, ɔ seli weiin kɛ: ‘Nja mun, kɛ mɔ an si kɛ amun yi’m be wunmiɛn’n juman amun liɛ nun’n, amun nin be tran kpa. An bu be sran, afin ye nga Ɲanmiɛn yoli amun mɔ maan amún ɲán nguan’n, ɔ yoli be wie. Sɛ an yoman sɔ’n, amun nin Ɲanmiɛn su kwlá kokoman yalɛ wafa ng’ɔ ti su’n.’ (1 Piɛr 3:7). Afɔtuɛ sɔ mɔ Piɛli mannin’n i cinnjin m’ɔ ti’n, i ɲin fite ndɛ kasiɛn’n nun. Yɛle kɛ, sɛ yasua kun nin i yi’n b’a tranman kpa naan w’a buman bla’n i sran’n, ɔ nin Zoova be afiɛn’n sáci. Ɔ maan ɔ nin Ɲanmiɛn be su kwlá kokoman yalɛ wafa ng’ɔ ti su’n.
7. ?Wafa sɛ yɛ ɔ fata kɛ yasua kun bu i yi sran ɔn?
7 ?Wafa sɛ yɛ yasua’m be kwla bu be yi’m be sran ɔn? Be yi’n i sran bulɛ’n yɛle kɛ, be yo i kpa klolɛ su, kpɔkun be ɲin yi i. Bla mɔ be nin i tran kpa kɛ ngalɛ sa’n, atrɛkpa ɔ yoli sran sunman be ɲrun kɛ like mɔ be nin a wunmɛn i sɔ le sa. Glɛki fluwa sifuɛ kun seli kɛ: “Rɔmufuɛ’m be mmla’n nun’n, bla’n ɔ leman ɲrun. Be yo i kɛ bakan wie sa. [...] I wun’n sie i mlɔnmlɔn, ɔ leman ndɛ kanman.” Nanwlɛ, nɛ́n i sɔ yɛ be kle Klistfuɛ mun kɛ be yo ɔ! Klistfuɛ’n, ɔ bu i yi sran. Be tranlɛ’n nun’n, ɔ nian Klist mmla’m be su. Ɔ kpɛmɛn i bɔbɔ i ti nun liɛ. Kɛ mɔ i yi’n i wunmiɛn’n jumɛn i liɛ’n nun’n ti’n, ɔ nin i “be tran kpa.”
?Wafa sɛ yɛ ‘be wunmiɛn’n juman amun liɛ’n nun’ ɔn?
8, 9. ?Ngue nun yɛ yasua nin bla’m be ti kun ɔn?
8 Kɛ Piɛli se kɛ bla’m be “wunmiɛn’n juman amun liɛ’n nun,” nán kɛ ɔ su se kɛ Ɲanmiɛn ninnge’m be yolɛ nun’n, yasua’m be yo tra bla mun, annzɛ yasua’m be si ngwlɛlɛ tra bla mun ti ɔ. Nanwlɛ, junman ngunmin kun nga yasua sunman be di i asɔnun’n nun’n, bla’m be seman kɛ bé dí wie. Kpɔkun awlo lɔ’n, yasua’m be sie bla mun (1 Korɛntfuɛ Mun 14:35; 1 Timote 2:12). Sanngɛ, yasua nin bla’m be kwlaa be lafi Ɲanmiɛn su, be tra be awlɛn, be nanti Ɲanmiɛn mmla kunngba’n be su. Ɔ maan kɛ nga Piɛli fa kannin’n sa’n, ‘ye nga Ɲanmiɛn yoli yasua’n mɔ maan ɔ́ ɲán nguan’n, ɔ yoli bla’n wie.’ Nanwlɛ, nguan ɲanlɛ’n nun’n, yasua nin bla’m be kwlaa be ti kun Zoova ɲrun (Galasifuɛ Mun 3:28). Afuɛ ya kpɔlɛ klikli’n nun Klistfuɛ nga be kpali be sieli be ngunmin’n be liɛ yɛ Piɛli klɛli fluwa’n niɔn. Ɔ maan i ndɛ nun’n, ɔ kpɛnnin Klistfuɛ yasua’m be wla kɛ, sɛ be lafi su kɛ like nga Ɲanmiɛn se kɛ ‘ɔ́ fá mán Klist’n, bé bó be dunman nun wie’n,’ be yi’m be lafi su sɔ wie (Rɔmfuɛ Mun 8:17). Cɛn kun’n, be bue nɲɔn’n bé wá yó Ɲanmiɛn i ɲrun jranfuɛ, kpɔkun bé dí famiɛn Ɲanmiɛn Sielɛ Blɛ’n nun!—Sa Nglo Yilɛ 5:10.
9 Klistfuɛ nga Ɲanmiɛn kpali be sieli be ngunmin’n, be kwlá seman kɛ be ti kpa tra be yi mɔ be kpali be sieli be ngunmin wie’n. Be nga be lafi su kɛ bé trán asiɛ’n su kusu’n, be ti sɔ wie. Yɛle kɛ ‘sran kpanngban kpa’ mɔ be kpu be tralɛ ufue’n Bua Gbaflɛn’n i mmoja’n nun’n, yasua nin bla’m be nɲɔn’n be o be nun wie. Asa ekun’n, be kan Zoova ndɛ asiɛ wunmuan’n su be mɛnmɛn i “wia nun nin kɔnguɛ.” (Sa Nglo Yilɛ 7:9, 10, 14, 15). ‘Ɲrun nga Ɲanmiɛn mma’m bé ɲɛ́n i cɛn nga bé ɲán alaje’n, mɔ bé “ɲán nguan sakpa’n,” be bue nɲɔn’n, be ɲin o i sin.’ (Rɔmfuɛ Mun 8:21; 1 Timote 6:19). Maan ɔ yo Klistfuɛ nga be kpali be sieli be ngunmin mun o, annzɛ bua’m be wie mun o, Klistfuɛ’m be kwlaa be su Zoova likawlɛ, ‘be akpasua’n ti kun,’ yɛ be ‘tafuɛ’n ti kunngba.’ (Zan 10:16). Nanwlɛ, i sɔ’n kwlaa ngalɛ’n kle weiin kɛ, ɔ fata kɛ Klistfuɛ’n ɔ nin i yi’n be bu be wiengu sran!
10. ?Wafa sɛ yɛ bla’m be ‘wunmiɛn’n juman’ yasua’m be liɛ’n nun ɔn?
10 ?Sɛ ɔ ti sɔ’n niɔn, wafa sɛ yɛ bla’m be wunmiɛn’n juman yasua’m be liɛ’n nun ɔn? Atrɛkpa kɛ Piɛli kán ndɛ sɔ’n, ɔ buli bla mɔ titi be ti kaan, mɔ be wunnɛn’n nunman be nun kɛ yasua mun sa’n, be angunndan. Asa ekun’n, fɔ’n m’ɔ o e nun’n, ɔ nin ba wulɛ m’ɔ ti nanndoliɛ like’n, be wiewie bla’m be wunmiɛn’n. Kɛ be ko yo bla’n, blɛ wie’m be nun be wun faman be feke. Kɛ blɛ sɔ’n ju’n, annzɛ kɛ ba wulɛ aklunya’n tɔ be su’n mɔ be fɛfɛ’n, be kunndɛ kɛ be nian be lika kpa naan be bu be sran. Yasua ng’ɔ bu i yi’n i sran’n, m’ɔ wun i wlɛ kɛ i yi’n kunndɛ kɛ be fɔnvɔ i’n, i sɔ’n ɲan ta dan kpa aja’n i ye m’ɔ́ yó’n su.
Kɛ sran kun le i Ɲanmiɛn sulɛ liɛ’n
11. ?Sɛ yasua’n nin i yi’n be Ɲanmiɛn sulɛ wafa’n ti ngunminngunmin’n, wafa sɛ yɛ be aja’n kwla yo ye ɔ?
11 ?Yɛ sɛ yasua’n annzɛ i yi’n ɔ le i Ɲanmiɛn sulɛ liɛ’n, afin kɛ be jali m’ɔ́ kɔ́ i ɲrun’n, be nun kun wa kacili Klistfuɛ’n, i sɔ aja liɛ’n kwla yo ye? Aja sunman be kleli kɛ i sɔ’n kwla yo ye. Sɛ sran kun le i Ɲanmiɛn sulɛ liɛ’n, yasua nin i yi’n be aja’n kwla yo ye, ɔ kwla cɛ kpɔkun ɔ man be aklunjuɛ. Kɛ mɔ be jali be wun ti’n, be “kacili sran wunmuan.” Ɔ maan Zoova klun jɔ be aja’n su. I sɔ’n ti yɛ sɛ yasua’n, annzɛ bla ng’ɔ timan Klistfuɛ’n ɔ kplin su kɛ ɔ nin i yi’n, annzɛ i wun’n bé trán’n, Ɲanmiɛn Ndɛ’n wlɛ i fanngan kɛ ɔ nin i be tran’n niɔn. Ɔ maan sɛ be le ba mun’n, sran ng’ɔ ti Klistfuɛ’n, ɔ kwla fɛ i Ɲanmiɛn sulafilɛ’n yo be ye.—1 Korɛntfuɛ Mun 7:12-14.
12, 13. ?Wafa sɛ yɛ Piɛli i afɔtuɛ’n i su falɛ’n ɔ kwla yo maan Klistfuɛ bla kun ɔ ukɛ i wun’n m’ɔ timan Klistfuɛ’n niɔn?
12 Klistfuɛ bla nga be wun’m be timan Klistfuɛ’n, Piɛli man be afɔtuɛ kpa kun. Sanngɛ Klistfuɛ yasua nga sa kunngba sɔ’n wo be su’n, be kwla fa afɔtuɛ sɔ’n su wie. Piɛli seli kɛ: ‘Mmo mun, amun kusu an bu amun wun’m be sran, nán an fa amun ɲin wlawla be. I liɛ’n sɛ be nun wie’m be faman Ɲanmiɛn ndɛ’n su’n, kɛ be wun amun nzuɛn kpa’n nin sran mɔ an bu be’n, an su kanman ndɛ fi naan b’a kaci.’—1 Piɛr 3:1, 2.
13 Sɛ bla kun kwla kan i Ɲanmiɛn sulafilɛ’n i ndɛ wɛtɛɛ su kle i wun’n, i sɔ’n ti kpa. ?Yɛ sɛ yasua’n waan ɔ timan’n nin? Ɔ ti kɛ i bɔbɔ sa. Sanngɛ, kɛ mɔ Klistfuɛ nzuɛn’n ɔ le ta kpa wie ti’n, be kwlá seman kɛ yasua sɔ’n i liɛ w’a wie mlɔnmlɔn. Yasua sunman mɔ i klikli nun Ɲanmiɛn ndɛ’n w’a yoman be cinnjin’n, annzɛ be tanndannin be yi’m be Ɲanmiɛn sulafilɛ’n i ɲrun’n, be wa kacili “sran kpa” be yi’m be nzuɛn klanman’n ti (Matie 10:11). Sɛ yasua’n w’a kaciman Klistfuɛ bɔbɔ’n, sanngɛ i yi’n i nzuɛn klanman’n kwla ɲan ta i su. Ɔ maan be aja’n, ɔ yo ye. Yasua kun mɔ i yi’n ti Zoova i Lalofuɛ’n, ɔ seli kɛ ɔ kwlá faman Zoova i Lalofuɛ’m be mmla’m be su wie le. Sanngɛ, fluwa kun m’ɔ klɛli m’ɔ fiteli zronali kun nun’n, ɔ flɛli i bɔbɔ i wun kɛ “yasua aklunjuɛfuɛ m’ɔ le bla klanman’n,” kpɔkun ɔ tuli i klun kannin i yi’n, ɔ nin i wiengu Lalofuɛ’m be ndɛ klanman kpa.
14. ?Wafa sɛ yɛ yasua’m be kwla uka be yi mɔ be lafiman Ɲanmiɛn su’n niɔn?
14 Klistfuɛ yasua nga be fali Piɛli i afɔtuɛ su’n be kusu be nzuɛn kpa’n ti’n, be yi’m be kacili. Bla nga be lafiman Ɲanmiɛn su’n, be wunnin kɛ be wun mɔ be ti Klistfuɛ’n be nin aɲinyiɛ fata. Afin be saciman sika siklɛti nɔnlɛ’n nun kun, be timan nzannunmunfuɛ kun, be toman sika nun mma kun, kpɔkun be yaci ndɛ tɛtɛ kanlɛ. Bla sɔ’m be nun wie’m be wa fali be wun mantannin asɔnunfuɛ mun. Be wunnin kɛ Klistfuɛ’m be klo be wiengu kɛ sran nin i niaan sa. Kpɔkun like nga be sieli i nzɔliɛ aniaan’m be lika’n ti’n, be fali be wun mannin Zoova.—Zan 13: 34, 35.
Sran’n i ‘awlɛn’n’
15, 16. ?Nzuɛn mennin yɛ Klistfuɛ bla kun kwla fa ɲan i wun’n m’ɔ lafiman Klist su’n niɔn?
15 ?Nzuɛn mennin yɛ be kwla fa ɲan be wun’n niɔn? Nzuɛn sɔ’n, be mianman Klistfuɛ bla mun lele naan b’a yi i nglo. Piɛli seli kɛ: ‘Kɛ amún síesíe amun wun’n, nán maan ɔ yo be wunnɛn su like kɛ be ti yolɛ, nin sika wlalɛ, ɔ nin tralɛ klanman wlalɛ sa’n. Sanngɛ maan be wun amun klanman’n amun nzuɛn’n, nin amun awlɛn wɛtɛɛ’n, ɔ nin diin mɔ an ti’n nun. Klanman sɔ’n wieman, ɔ ti kpa Ɲanmiɛn ɲrun. Laa bla nga be sro Ɲanmiɛn’n, mɔ be wla o i su’n, kɛ be siesie be wun sɔ ɔ, yɛ be bu be wun’m be sran. Kɛ Sara kusu yoli sɔ ɔ, i ɲin yili Abraamu, ɔ maan ɔ flɛli i kɛ i min. Sɛ an yo sa ng’ɔ ti kpa’n, mɔ srɛ kunman amun sa fi nun’n, an ti i mma mun.’—1 Piɛr 3:3-6.
16 Piɛli man Klistfuɛ bla’n i afɔtuɛ kɛ nán maan i klanman’n ɔ yo i wunnɛn su siesielɛ’n ngunmin. Sanngɛ, ɔ fata kɛ ɔ yo naan i wun’n ɔ wun i wlɛ kɛ Biblu’n nun like m’ɔ suannin’n w’a kaci i awlɛn’n. Ɔ fata kɛ ɔ yo naan i wun’n sie i nzɔliɛ kɛ w’a fa nzuɛn uflɛ. Atrɛkpa’n, i yi’n i nzuɛn laa’n yɛ ɔ́ fá síe i nzɔliɛ kɛ w’a fa nzuɛn uflɛ ɔ (Efɛzfuɛ Mun 4:22-24). Ɔ́ wún kɛ i yi’n i ‘awlɛn wɛtɛɛ’n, ɔ nin diin m’ɔ ti’n,’ ɔ gua sran wla ase kpɔkun sran kwla fɛ i wun mɛntɛn i. Nán yasua’n i ngunmin yɛ ɔ klo i sɔ klanman liɛ’n niɔn. Sanngɛ, ‘ɔ ti kpa Ɲanmiɛn ɲrun.’—Kolɔsfuɛ Mun 3:12.
17. ?Ajalɛ kpa mennin yɛ Sara man Klistfuɛ bla mun ɔn?
17 Be kan Sara ndɛ kɛ ɔ ti bla kpa, naan Klistfuɛ bla kwlaa nga be wun’m be ti Klistfuɛ annzɛ be timan Klistfuɛ’n, ɔ man be ajalɛ kpa. Sara si weiin kɛ Abraamu yɛ ɔ sie i ɔ, w’a simɛn i sɔ liɛ’n su akplowa le. Ɔ maan i klun lɔ bɔbɔ’n, ɔ flɛ i kɛ i “wun.” (Bo bolɛ 18: 12). Sanngɛ, i sɔ’n w’a kpɛman Sara i sran mɔ be bu i’n i sin. Ɲanmiɛn ninnge’m be nun’n, ɔ ti bla juejue kpa kpɔkun ɔ lafi Zoova su tantrantan. I sɔ’n ti’n, ‘sran kpanngban kpa mɔ be kan Ɲanmiɛn sulafilɛ ndɛ’n,’ m’ɔ fata kɛ be Ɲanmiɛn sulafilɛ’n su e bo naan e ‘mian e ɲin sin lika nga be kle e’n nun’n,’ be bo i dunman be nun wie (Ebre Mun 11:11; 12:1). Ɔ maan sɛ Klistfuɛ bla kun fa Sara i ajalɛ’n su’n, i sɔ’n timan i ɲin ase gualɛ.
18. ?Kɛ aja’n nun sran kun le i Ɲanmiɛn sulɛ liɛ’n, mmla mennin mun yɛ ɔ fata kɛ be fa be su ɔ?
18 Kannzɛ bɔbɔ aja’n nun’n, sran kun le i Ɲanmiɛn sulɛ liɛ’n, sanngɛ yasua’n yɛ ɔ sie awlo’n niɔn. Sɛ i m’ɔ ti yasua’n yɛ ɔ fa nanwlɛ ndɛ’n su’n, naan i yi’n i Ɲanmiɛn sulɛ liɛ’n sacimɛn i liɛ’n nin o, sanngɛ ɔ fata kɛ i ɲin yi i yi’n i Ɲanmiɛn sulɛ liɛ’n. Sɛ bla’n kusu yɛ ɔ lafi nanwlɛ ndɛ’n su’n, ɔ su kplinman su wie kɛ ɔ́ yó sa ng’ɔ timɛn i liɛ’n su’n (Sa Nga Be Yoli’n 5:29). Sanngɛ, ɔ fataman kɛ ɔ nin i wun’n be kpli awlo’n i sielɛ’n. Ɔ fata kɛ ɔ bu i wun’n i sran, kpɔkun ɔ di ‘mmla m’ɔ o ɔ nin i wun be afiɛn’n su.’—Rɔmfuɛ Mun 7:2.
Biblu’n nun afɔtuɛ kpakpa mun
19. ?Sa mennin wie mun yɛ be tanndan aja’n i ye yolɛ’n i ɲrun ɔn? ?Sanngɛ wafa sɛ yɛ be kwla jran kekle sa sɔ’m be ɲrun ɔn?
19 Andɛ’n, sa kpanngban be tanndan aja’n i ye yolɛ’n i ɲrun. Yasua wie’m be suaman be trɔ mun. Bla wie’m be kplinman su kɛ be wun’m be sie be. Awlo wie’m be nun’n, yasua’n, annzɛ bla’n ɔ yo i wiengu kun’n i tɛtɛ, annzɛ ɔ kle i ɲrɛnnɛn. Sika yalɛ dilɛ’n, ɔ nin fɔ’n m’ɔ o sran nun’n, ɔ nin angunndan nga sran’m be bu’n m’ɔ ti bla nin bian kunndɛlɛ sukusuku angunndan’n, be kwla sa Klistfuɛ’m be nantilɛ seiin’n nian. Sanngɛ, Klistfuɛ yasua nin bla nga be fa Biblu’n nun mmla’m be su’n, maan be su sa’n ɔ yo sɛ o, Zoova yra be su. Aja nun’n, kɛ yasua’n nin bla’n be nun kunngba cɛ yɛ ɔ fa Biblu’n nun mmla’m be su bɔbɔ’n, ɔ flunman tra kɛ be nun wie fi faman su. Kpɔkun Zoova i sufuɛ nga titi be ɲin yi aja’n nun nda nga be tali be’n, blɛ kekle nun bɔbɔ’n, Zoova klo be kpɔkun ɔ uka be. I wla fiman be nantilɛ seiin su.—Jue Mun 18:25; Ebre Mun 6:10; 1 Piɛr 3:12.
20. ?Piɛli i afɔtuɛ mennin yɛ ɔ ti Klistfuɛ’m be kwlaa be liɛ ɔ?
20 Kɛ akoto Piɛli wieli yasua nga be le bla’n ɔ nin be yi’m be afɔtuɛ man’n, ɔ fali fanngan wlalɛ fɛfɛ tɛli i ndɛ’n i bo. Ɔ seli kɛ: ‘Min ndɛ’n i atabo’n yɛ, maan amun angunndan’n yo kun, maan amun nuan sɛ, an klo amun wiengu kɛ amun niaan sa, an si i aunnvuɛ, yɛ an yo amun wun aenvuɛ. Sɛ sran yo amun tɛ’n, nán an yo i wie, sɛ be kpɛ amun nzowa’n, nán an yi man be, sanngɛ an yra be nguan, afin kɛ Ɲanmiɛn flɛli amun’n, ɔ seli kɛ ɔ́ yrá amun nguan.’ (1 Piɛr 3:8, 9). Nanwlɛ, afɔtuɛ sɔ’n ti kpa dan! Kannzɛ bɔbɔ ɔ ti yasua nin i yi be liɛ trele’n, sanngɛ ɔ ti e kwlaa e liɛ wie!
?Amun wla kwla kpɛn su?
• ?Wafa sɛ yɛ Klistfuɛ yasua’m be nian Zezi i ajalɛ’n su ɔ?
• ?Wafa sɛ yɛ Klistfuɛ bla’m be nian asɔnun’n i ajalɛ’n su ɔ?
• ?Wafa sɛ yɛ yasua’m be kwla bu be yi’m be sran ɔn?
• ?Ngue yɛ ɔ ti kpa kɛ Klistfuɛ bla nga i wun’n le i Ɲanmiɛn sulɛ liɛ’n ɔ yo ɔ?