Amun ti ɲanlɛ’n finman amun sa kpa yolɛ’n i ngunmin, sanngɛ ɔ fin ɲanmiɛn i aklunye’n
‘Amun a ɲan amun ti i su mɔ an lafi’n ti. Nán sa kpa nga an yoli’n ti ɔ, i sɔ’n ti’n, sran fi kwlá fa dimɛn i nuan.’—Efɛzfuɛ Mun 2:8, 9.
1. ?Kɛ Klistfuɛ’m be di junman kun’n, wafa sɛ yɛ be yoman kɛ sran nga’m be sa ɔ? ?Yɛ ngue ti ɔ?
ANDƐ sran’m be fa like nga be yo’n be tu be wun, yɛ i kan nn be su fa di be nuan. Klistfuɛ’m be yoman sɔ. Like nga be yo’n, kannzɛ bɔbɔ ɔ ti Ɲanmiɛn ninnge’m be nun like o, be fa tuman be wun. Kannzɛ bɔbɔ be di junman nga Zoova i nvle nunfuɛ’m be di’n i su aklunjuɛ’n, sanngɛ be faman be bɔbɔ be junman liɛ nga be di’n be kleman be wun. Be si kɛ angunndan kpa mɔ be fa di Zoova i junman’n, ɔ ti cinnjin tra like nga sran’n bɔbɔ yo’n. Sɛ sran kun ɲán anannganman nguan’n m’ɔ ti cɛlɛ like’n, i sɔ’n finman junman m’ɔ dili’n, sanngɛ ɔ fin Ɲanmiɛn i su m’ɔ lafili’n ɔ nin Ɲanmiɛn i aklunye’n.—Lik 17:10; Zan 3:16.
2, 3. ?Ngue yɛ Pɔlu i klun jɔli su ɔ? ?Yɛ ngue ti ɔ?
2 Akoto Pɔlu wunnin i sɔ liɛ’n i bɔbɔ lika weiin. Kɛ ‘tukpaciɛ wie tɔli i su ɔ kali i kplo’n nun’ mɔ i sɔ’n ti ɔ srɛli Ɲanmiɛn kpɛ nsan kɛ ɔ yo i juejue’n, Zoova seli i kɛ: ‘Ye nga n yo wɔ’n ɔ ju wɔ, afin kɛ sran’n ɔ leman wunmiɛn’n i nun sɔ’n nun yɛ n yi min wun nglo kɛ n kwla like’n kwlaa yo ɔ.’ Ajalɛ nga Zoova fali’n, Pɔlu sɔli nun aenvuɛ su. Ɔ maan ɔ seli kɛ: ‘Maan n klun jɔ n fuɛn mɔ n ti’n su naan Klist yi i dan’n m’ɔ ti’n i nglo.’ Pɔlu i wun ase kanlɛ sɔ’n, ɔ fata kɛ e nian su.—2 Korɛntfuɛ Mun 12:7-9.
3 Kannzɛ Pɔlu dili Klistfuɛ junman’n i dan lika’n, sanngɛ ɔ si kɛ junman sɔ’n m’ɔ dili’n ɔ finman i bɔbɔ i fanngan nun, annzɛ i bɔbɔ like m’ɔ si i yo’n. Aenvuɛ su’n, ɔ seli kɛ: ‘Ɲanmiɛn yoli m mɔ n ti i sran’m be kwlaa be nun kaan’n n ye, ɔ maan n kan kleli be nga be timan Zuifu’m be kɛ Klist i aɲanbeun’n cɛnnin, be kwlá kɛnmɛn i be nuan nun.’ (Efɛzfuɛ Mun 3:8) Pɔlu i ndɛ sɔ’n kle kɛ w’a tumɛn i wun naan se kɛ i nuan yɛ ɔ́ dí ɔ. ‘Ɲanmiɛn nin be nga be tu be wun’n be le i, sanngɛ ɔ yo aenvuɛfuɛ’m be ye.’ (Zak 4:6; 1 Piɛr 5:5) ?E nian Pɔlu i wun ase kanlɛ’n su, ɔ maan e bu e niaan’m be sran tra e bɔbɔ?
“An bu sran wie’m be sran tra amun bɔbɔ”
4. ?Ngue ti yɛ cɛn kunngun’n, ɔ kwla yo kekle man e kɛ e bu sran wie’m be sran tra e bɔbɔ ɔ?
4 Akoto Pɔlu seli Klistfuɛ’m be kɛ: ‘Nán an bu amun bɔbɔ amun wun angunndan yo like fi, nán an kunndɛ amun dunman, nán an tu amun wun, sanngɛ an bu sran wie’m be sran tra amun bɔbɔ.’ (Filipfuɛ Mun 2:3) Ndɛ sɔ’n i su falɛ’n kwla yo kekle man e. Sɛ i li be mannin e junman m’ɔ le ɲrun’n, i sɔ’n nun yɛ ɔ ti kekle kpa’n niɔn. Sa nga ti yɛ ɔ ti kekle man e’n yɛle kɛ atrɛkpa’n, akplowa silɛ angunndan m’ɔ sie andɛ mɛn’n nunfuɛ mun’n, ɔ ɲannin ta e su. Wie liɛ kusu e bakan nun’n, e awlo lɔ’n, annzɛ suklu lɔ’n, be kleli e akplowa silɛ. Atrɛkpa’n, cɛn kwlaa be kleli e suklu lɔ kɛ ngowa kanlɛ’n mɔ be fa si akplowa’n i nun’n, e mian e ɲin naan e si i yo tra e wiengu mun, annzɛ kusu e yo fluwa sifuɛ kpa. Nanwlɛ, kɛ e tu e klun e di junman’n, ɔ ti kpa. Sanngɛ kɛ Klistfuɛ’n ɔ yo sɔ’n, nán kɛ ɔ́ yó naan ɔ́ fá kúnndɛ i dunman ti ɔ. Sanngɛ, junman’n ng’ɔ di’n, annzɛ like ng’ɔ yo’n, ɔ kunndɛ kɛ sran uflɛ ɲan su mmlusuɛ wie. Be dunman mɔ cɛn kwlaa be kunndɛ kɛ be dun mmua bo’n, ɔ kwla yo tɛ dan. ?Wafa sɛ?
5. ?Sɛ sran’n w’a niɛnmɛn i wun kpa’n, ngue yɛ akplowa silɛ’n ti ɔ kwla yo ɔ?
5 Sɛ sran’n w’a niɛnmɛn i wun kpa’n, akplowa silɛ’n, annzɛ i bɔbɔ i wun angunndan bulɛ’n ti’n, i ɲin su yiman sran kpɔkun ɔ yo wun tufuɛ. I konvi kwla sɔ i wiengu’m be like mɔ be si i yo’n, ɔ nin junman mɔ be fa mannin be’n. Nyanndra Mun 28:22 waan: ‘Kɛ konvifuɛ’n ɔ kpli ɲɛn i wun’n, ɔ siman kɛ sa yalɛ’n ɔ́ wá tɔ́ i su.’ Wun tulɛ’n ti’n, ɔ kwla kunndɛ kɛ ɔ́ dí junman m’ɔ timɛn i liɛ’n. Yɛ kɛ ɔ ko yo naan b’a se kɛ i ndɛ yo fɛ’n ti’n, ɔ ijɔ i konviabo kpɔkun ɔ kɛn i wiengu’m be wun ndɛ tɛtɛ. Sanngɛ ɔ fataman kɛ Klistfuɛ’m be tɔ i sɔ ayeliɛ’m be nun. (Zak 3:14-16) I sɔ sran liɛ’n, be ngunmin be wun angunndan bulɛ’n i atin’n cɛ yɛ ɔ su fa ɔ.
6. ?Wafa sɛ yɛ Biblu’n tu e fɔ akplowa silɛ’n i lika ɔ?
6 I sɔ’n ti’n, Biblu’n se Klistfuɛ’m be kɛ: ‘Nán maan e kunndɛ dunman, nán maan e yo sa m’ɔ kun e wiengu ya, yɛ nán maan e fa e ɲin ci e wiengu.’ (Galasifuɛ Mun 5:26) Klistfuɛ kun m’ɔ tɔli i sɔ ayeliɛ’n nun’n, akoto Zan kɛnnin i ndɛ. Ɔ seli kɛ: ‘N klɛ ndɛ kaan m blɛli asɔnun’n i nunfuɛ mun, sanngɛ Diotrɛfu m’ɔ klo kɛ ɔ́ yó be su kpɛn’n, ɔ faman e ndɛ’n su. Ɔ maan sɛ n ju lɔ’n, ń kán sa ng’ɔ yo’n nin e wun ndɛ tɛtɛ ng’ɔ kan’n.’ Nanwlɛ, ɔ nin i fataman mlɔnmlɔn kɛ Klistfuɛ kun tɔ i sɔ ayeliɛ’n nun!—3 Zan 9, 10.
7. ?Klistfuɛ’n i junman’n su lɔ’n, ngue yɛ ɔ fata kɛ ɔ kpalo i ɔ?
7 Sanngɛ, e kwlá seman kɛ Klistfuɛ’n kwlá siman akplowa mlɔnmlɔn. Afin i junman diwlɛ lɔ’n, akplowa silɛ kwla tɔ ɔ nin i wiengu junman difuɛ’m be afiɛn, annzɛ sɛ ɔ ti aata dilɛ’n nun ɔn, akplowa silɛ kwla tɔ ɔ nin i wiengu aata difuɛ’m be afiɛn. Sanngɛ i sɔ’n nun bɔbɔ’n, ɔ fata kɛ Klistfuɛ ɔ yo wɛtɛɛfuɛ, ɔ klo sran, kpɔkun ɔ bu i wiengu angunndan. Ɔ fata kɛ ɔ kpalo ndrunmun dilɛ’n, annzɛ ayeliɛ ng’ɔ nin Klistfuɛ fataman’n naan b’a siemɛn i nzɔliɛ kɛ akplowa silɛ’n mɔ maan be nin be wiengu’m be kaka be wun kɛ alua mun sa’n, yɛ ɔ ti i nzuɛn ɔn. Like kwlaa yolɛ nun’n, nán i dunman m’ɔ kunndɛ kɛ be dun mmua bo’n yɛ ɔ yo i cinnjin ɔn. Nanwlɛ, sɛ ɔ fata kɛ Klistfuɛ’n kpalo i sɔ angunndan bulɛ’n i junman diwlɛ lɔ’n, ɔ fata kɛ Ɲanmiɛn sulɛ nun’n, ɔ yo i sɔ tra su!
‘Ɔ faman sran uflɛ liɛ’n sunnzunmɛn i liɛ’n’
8, 9. (a) ?Ngue ti yɛ asɔnun kpɛnngbɛn be kwlá seman kɛ be nin be wiengu bé sí akplowa ɔ? (b) ?Ngue ti yɛ afɔtuɛ ng’ɔ o 1 Piɛr 4:10 nun’n ɔ ti Ɲanmiɛn i sufuɛ’m be kwlaa be liɛ ɔ?
8 Angunndan nga Klistfuɛ’m be Ɲanmiɛn sulɛ’n nun ɔ fata kɛ be bu’n, Biblu’n nun ndɛ mma nga kɛn i ndɛ. I waan: ‘Maan sran kun niɛn i bɔbɔ i ɲoliɛ’n, sɛ ɔ wun kɛ ɔ ti kpa’n, ɔ́ yó i fɛ, ɔ maan ɔ su faman sran uflɛ liɛ’n sunnzunmɛn i liɛ’n.’ (Galasifuɛ Mun 6:4) Asɔnun kpɛnngbɛn’m be si kɛ ɔ fataman kɛ be nin be wiengu si akplowa, naan sanngɛ ɔ fata kɛ be bo yo kun be di junman kɛ sran wunmuan kun sa. Wafa nga aklunjuɛ su be uka be wiengu’n, ɔ kwla yo asɔnun’n wunmuan’n i ye. I sɔ’n ti’n, kɛ ɔ ko yo naan fɔun w’a tran asɔnun’n nun ti’n, be kpalo akplowa silɛ’n kpɔkun be yi bo kun yolɛ ajalɛ klanman kpa nglo.
9 Asɔnun kpɛnngbɛn wie’m be ti awlowa, annzɛ b’a cɛ asɔnun kpɛnngbɛn yolɛ’n nun, annzɛ kusu junman’n i dilɛ’n ti pɔpɔ be sa nun. I sɔ’n ti’n, be kwla si ninnge’m be yo, annzɛ be kwla wun sa wie’m be wlɛ ndɛndɛ tra be wiengu mun. Ɔ maan Zoova i anuannzɛ’n nun’n, asɔnun kpɛnngbɛn’m be junman’n ti fanunfanun. Yɛ be faman be wun sunnzunman be wiengu, sanngɛ be fa Biblu’n nun afɔtuɛ nga su. I waan: ‘Kɛ mɔ Ɲanmiɛn mannin amun ninnge wafawafa nga sran yo’n i wie’n, maan sran kun fɛ i liɛ nga Ɲanmiɛn mɛnnin i’n ukɛ i wiengu.’ (1 Piɛr 4:10) Kɛ e niɛn i kpa sa’n, Zoova i sufuɛ mɔ be mannin be sa silɛ’n, ɔ nin be mɔ aklunjuɛ su be di cenjele junman mɔ yɛle jasin fɛ’n bolɛ’n, Biblu’n nun ndɛ sɔ’n ti be kwlaa be liɛ.
10. ?Like mennin kunngba cɛ yɛ maan Zoova i klun kwla jɔ i junman mɔ e di’n su ɔ?
10 Kɛ klolɛ su ɔ nin Ɲanmiɛn srolɛ’n ti’n, e faman Ɲanmiɛn junman nga e di’n e yoman e wun dandan e wiengu’m be su’n, i sɔ’n nun kunngba cɛ yɛ Zoova klun jɔ e wun ɔn. I sɔ’n ti’n, ɔ ti cinnjin kpa kɛ e ɲan angunndan sɛsɛ Ɲanmiɛn junman mɔ e di’n su. Kannzɛ bɔbɔ sran fi kwlá siman i wiengu’m be angunndan’n nun’n, sanngɛ Zoova liɛ’n, ɔ “si nun.” (Nyanndra Mun 24:12; 1 Samiɛl 16:7) I sɔ’n ti’n, ɔ ti kpa kɛ cɛn kunngun e usa e wun kɛ: ‘?Angunndan mennin yɛ n fa di Zoova i junman’n niɔn?’—Jue Mun 24:3, 4; Matie 5:8.
Maan e angunndan’n yo sɛsɛ Ɲanmiɛn junman mɔ e di’n su
11. ?E jasin fɛ’n bolɛ’n su kosan mennin mun yɛ be usalɛ’n timan tɛ ɔ?
11 ?Sɛ angunndan nga e fa di junman’n yɛ ɔ ti like cinnjin kpafuɛ’n naan Zoova klun w’a jɔ e wun’n niɔn, ngue ti yɛ ɔ fata kɛ junman nga e di’n ɔ yo e cinnjin ekun ɔn? Sɛ titi e fa angunndan sɛsɛ e bo jasin fɛ’n niɔn, sɛ é bó i kaan annzɛ é bó i kpanngban o, i cinnjin lika’n yɛle mennin ekun? Kɛ mɔ Zoova i junman dilɛ’n nun e kunndɛman kɛ dɔ nga e di’n, ɔ yo cinnjin tra e Ɲanmiɛn sulafilɛ’n i nuan su like kwlaa nga e yo’n ti’n, i sɔ kosan’m be usalɛ’n timan tɛ.
12, 13. (a) ?Ngue ti yɛ e man jasin fɛ’n mɔ e bo’n i su rapɔru’n niɔn? (b) ?Ngue ti yɛ kɛ e nian jasin fɛ’n mɔ e bo i mɛn wunmuan nun’n i su rapɔru’n, ɔ man e aklunjuɛ’n niɔn?
12 Amun nian ndɛ nga fluwa Organisés pour faire la volonté de Jéhovah ɔ kan’n. I waan: “Zezi Klist i sɔnnzɔnfuɛ klikli’m be jasin fɛ’n bolɛ’n i su rapɔru’n yoli be cinnjin kpa. (Mark 6:30) Biblu’n nun’n, Sa Nga Be Yoli’n fluwa’n se kɛ Pantekɔti nun’n, Ɲanmiɛn fɛli i wawɛ’n mannin Zezi i sɔnnzɔnfuɛ 120 mɔ be o lɛ cɛn sɔ’n nun’n. Kɛ ɔ yoli sɔ’n w’a cɛman lele, i sɔnnzɔnfuɛ’m be wa juli akpi nsan (3.000), kpɔkun i sin’n sran akpi nnun (5.000) be wa ukali be su ekun. (Sa Nga Be Yoli’n 1:15; 2:5-11, 41, 47; 4:4; 6:7) Nanwlɛ, sran mɔ be wa ukali be su sɔ’n i nganniɛn’n wlali Zezi i sɔnnzɔnfuɛ’m be fanngan kpa!” Fanngan wlalɛ kunngba sɔ’n ti’n, kɛ andɛ Zoova i Lalofuɛ’m be di junman nga Zezi fa mannin be’n i mɛn wunmuan nun’n, be mian be ɲin be mɛn i su rapɔru ng’ɔ ti nanwlɛ’n. Zezi seli kɛ: ‘Bé wá kán Ɲanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Ɲanmiɛn ndɛ’n. I sin yɛ mɛn i awieliɛ’n ɔ́ jú ɔ.’ (Matie 24:14) Rapɔru sɔ’m be kle junman nga be di i mɛn wunmuan nun’n. Asa ekun’n, lika nga be sa mian ukalɛ wun’n, ɔ nin fluwa wafa’n, ɔ nin fluwa’n i nuan kun ng’ɔ fata kɛ be yi naan jasin fɛ’n bolɛ’n w’a ɔ i ɲrun’n, rapɔru’m be kle i sɔ liɛ’m be wie.
13 Ɔ maan e jasin fɛ’n i su rapɔru mɔ e man’n, ɔ uka e maan Ɲanmiɛn Sielɛ Blɛ jasin fɛ’n mɔ be fa mannin e kɛ e bo’n, e bo i kpa liɛ su. ?I kpa bɔbɔ’n, kɛ e ti junman nga mɛn’n i bue kun su lɔ e niaan’m be di’n i nganniɛn’n, i sɔ’n wlaman e fanngan? Jasin fɛ’n i trɛlɛ m’ɔ trɛ asiɛ’n su’n ɔ man e aklunjuɛ, ɔ su e bo maan e di junman’n i dan kpa, kpɔkun ɔ gua e awlɛn su nzue kɛ Zoova yra e su. Ɔ maan kɛ e si kɛ e bɔbɔ e junman liɛ’n nga e dili’n i rapɔru’n wo mɛn wunmuan nun rapɔru’n nun wie’n, nanwlɛ, ɔ yo e fɛ dan! Rapɔru nga e man’n, mɛn wunmuan’n nun liɛ’n i ɲrun, ɔ ti kaan sa. Sanngɛ, Zoova fɛ i ɲin sie su. (Mark 12:42, 43) Sanngɛ maan ɔ kpɛn ɔ klun kɛ, sɛ w’a faman ɔ rapɔru liɛ’n w’a manman’n, mɛn wunmuan’n nun liɛ’n i nuan’n su yiaman.
14. ?Kɛ e fa jasin fɛ’n bolɛ’n ɔ nin sran’m be like klelɛ’n e sie i bue kun’n, ngue yɛ Zoova sulɛ’n nun e yo be ekun ɔn?
14 Nanwlɛ, ninnge kpanngban nga Zoova i sufuɛ mɔ e ti’n ti e yo be’n, be fiteman rapɔru nun. I wie yɛle kɛ, e ngunmin e Biblu’n nun like suanlɛ’n, ɔ nin asɔnun aɲia’m be bo kɔlɛ’n nin be bo lɔ junman’m be dilɛ’n, ɔ nin asɔnun’n i kalɛ’m be yilɛ’n, ɔ nin e niaan’m be lika nianlɛ’n, ɔ nin sika nga e man e fa suan mɛn wunmuan nun Ɲanmiɛn Sielɛ Blɛ jasin fɛ’n bolɛ’n i bo’n, yɛ ninnge wie mun ekun’n, be fiteman rapɔru’n nun wie. Ɔ maan, kannzɛ jasin fɛ’n mɔ e bo’n i rapɔru’n ti cinnjin kpa’n, afin ɔ uka e maan titi e yo juejue jasin fɛ’n bolɛ’n nun kpɔkun Ɲanmiɛn ninnge’m be nun e lafiman’n, sanngɛ nɛ́n i yɛ ɔ fata kɛ ɔ yo like’n kwlaa be nun cinnjin’n niɔn. Nán maan e bu i kɛ rapɔru’n yɛ ɔ ti like m’ɔ man anannganman nguan’n niɔn.
Maan “e tu e klun yo sran ye”
15. ?Kannzɛ bɔbɔ e ti ɲanlɛ’n finman junman nga e di’n be ngunmin’n, sanngɛ ngue ti yɛ be ti cinnjin ɔn?
15 Nanwlɛ, kannzɛ e ti ɲanlɛ’n ɔ finman junman nga e di’n be ngunmin’n, sanngɛ be ti cinnjin. I sɔ’n ti’n, be seli Klistfuɛ’m be kɛ be kaci ‘sran mɔ be wun sa tɛtɛ’n kwlaa w’a wie, naan be tu be klun yo sran ye.’ Kpɔkun be wlali be fanngan wie ekun kɛ “be klo be wun yɛ be yo sran ye.” (Tit 2:14; Ebre Mun 10:24) Asa ekun’n, kɛ Zaki m’ɔ ti Biblu’n i klɛfuɛ kun’n ɔ́ klé kɛ i sɔ’n ti cinnjin’n, ɔ seli kɛ: ‘Sɛ sran kun o sa m’ɔ loman wunmiɛn’n, nn w’a wu. I kunngba’n niɔn, sɛ sran kun se kɛ ɔ lafi Ɲanmiɛn su mɔ be wunmɛn i sɔ i nzuɛn’n nun’n, nn i Ɲanmiɛn sulafilɛ’n ti ngbɛn.’—Zak 2:26.
16. ?Ngue yɛ ɔ ti cinnjin kpa tra junman bɔbɔ nga e di’n niɔn? ?Sanngɛ ngue yɛ ɔ fataman kɛ e yo ɔ?
16 Kannzɛ bɔbɔ junman nga e di’n ɔ ti cinnjin kpa sɛ’n, sanngɛ angunndan nga e fa di junman sɔ’n ɔ ti cinnjin kpa tra su. I sɔ’n ti’n, ɔ ti kpa kɛ cɛn kunngunngun e kunndɛ e si e klun angunndan’n. Kɛ mɔ sran fi kwlá siman i wiengu’m be klun angunndan’n ti’n, ɔ fataman kɛ e bu e wiengu’m be fɔ. Biblu’n usa e kɛ: ‘?A ti ɔ liɛ sɛ mɔ a kan ɔ niaan wie i junman difuɛ’n i wun ndɛ ɔ? Kpɔkun ɔ tɛ su man e kɛ: ‘Sɛ i nzuɛn ti kpa o, sɛ ɔ timan kpa o, nán ɔ ndɛ ɔ, i min’n i ndɛ ɔ.’ (Rɔmfuɛ Mun 14:4) Zoova m’ɔ ti e kwlaa e Min’n, ɔ sieli Zezi Klist kɛ ɔ ti i Jɔlɛ difuɛ. Kɛ ɔ́ wá dí e jɔlɛ’n, ɔ su jranman junman nga e dili’n i ngunmin su, sanngɛ ɔ́ jrán angunndan nga e fa dili junman’n, ɔ nin blɛ nga e ɲɛnnin i’n, ɔ nin e sran klolɛ’n, ɔ nin e Ɲanmiɛn sulɛ’n be su wie. Kɛ nga akoto Pɔlu fa kan’n sa’n, Klistfuɛ junman kwlaa nga be fa mannin e kɛ e di’n, sɛ e dili i kpa annzɛ e dili i tɛ o, Zoova nin Klist Zezi be ngunmin cɛ yɛ be kwla kɛn i ndɛ ɔ. Ɔ seli kɛ: ‘Mian ɔ ɲin di junman kpa maan Ɲanmiɛn yo wɔ mo, yo junman difuɛ mɔ ɲannzuɛn kunmɛn i i junman’n ti’n, m’ɔ kan ndɛ nanwlɛ ɔ ɔ kpɛmɛn i wun’n.’—2 Timote 2:15; 2 Piɛr 1:10; 3:14.
17. ?Kannzɛ bɔbɔ e mian e ɲin e di junman’n, ngue ti yɛ ɔ fata kɛ titi e wla kpɛn Zak 3:17 su ɔ?
17 Zoova si ngwlɛlɛ, ɔ seman e kɛ e yo like nga e kwlá yoman’n. Kɛ nga Zak 3:17 fa kan’n sa’n, ‘ngwlɛlɛ m’ɔ fin ɲanmiɛn su’n, sɛ ɔ ti sran’n, nn é sé kɛ’ like ng’ɔ ti’n i kun yɛle kɛ “ɔ ti wɛtɛfuɛ [annzɛ ɔ si ngwlɛlɛ, NW].” ?Nɛ́n i sɔ’n ti yɛ ninnge’m be yolɛ’n nun’n, ɔ fata kɛ e fa ngwlɛlɛ e yo be kɛ Zoova liɛ’n sa’n niɔn? I sɔ’n ti’n, like nga e kwlá yoman’n, annzɛ e niaan’m be kwlá yoman’n, ɔ fataman kɛ e se kɛ é yó annzɛ kusu e se kɛ be yo.
18. ?Kɛ e angunndan’n ti kpa junman nga e di’n, ɔ nin Zoova i aklunye’n be su’n, ngue yɛ e ɲin kwla tran su ɔ?
18 Sɛ titi e angunndan’n ti sɛsɛ Zoova junman’n mɔ e di’n, ɔ nin Zoova i aklunye’n be su’n, aklunjuɛ’n mɔ be fa sie Zoova i sufuɛ’m be nzɔliɛ’n, é dí i titi. (Ezai 65:13, 14) Kannzɛ junman nga e bɔbɔ e di’n ɔ ti sɛ o, kɛ e wun kɛ Zoova yra i nvle wunmuan’n su’n, ɔ jɔ e klun. Maan titi e ‘kan kle Ɲanmiɛn, e srɛ i, e jran su kpa’ kɛ ɔ uka e naan e mian e ɲin e di i junman’n. Sɛ e yo sɔ’n, ɔ lemɛn i yowlɛ, ‘e wun jɔ́ e fɔuun, e su wunman sa ti mɔ e wun jɔ e fɔuun sɔ’n i bo mlɔnmlɔn. Aunjuɛ sɔ’n maan e wla su boman, yɛ e angunndan su sannganman sran wunmuan mɔ e nin Klist Zezi ti’n ti.’ (Filipfuɛ Mun 4:4-7) Nanwlɛ, kɛ e si kɛ e ti ɲanlɛ’n finman sa kpa nga e yo’n i ngunmin naan sanngɛ ɔ fin Zoova i aklunye’n, i sɔ’n kwla fɔnvɔ e kpɔkun ɔ wla e fanngan!
?Amun kwla yiyi nun?
• ?Ngue ti yɛ Klistfuɛ’m be faman junman nga be di’n be diman be nuan’n niɔn?
• ?Ngue ti yɛ Klistfuɛ’m be kpalo akplowa silɛ’n niɔn?
• ?Ngue ti yɛ Klistfuɛ’m be man jasin fɛ’n mɔ be bo’n i su rapɔru’n niɔn?
• ?Ngue ti yɛ Klistfuɛ’m be kpalo be wiengu Klistfuɛ’m be junman nga be di’n i ndɛ tɛ kanlɛ’n niɔn?