‘Sran mɔ be aniɛn’n ti ngunminngunmin’n’ be ti jasin fɛ’n
‘Sran blu mɔ be aniɛn’n ti ngunminngunmin’n, bé sé kɛ: “E nin amun yɛ é kɔ́ ɔ, afin e tili i kɛ Ɲanmiɛn’n o amun sin.”’—ZAKARI 8:23.
1. ?Wafa sɛ yɛ Zoova mannin jasin fɛ’n nga be bo i aniɛn wafawafa nun’n i wun atin ɔn?
E O AFUƐ 33 nun Pantekɔtu nun Klistfuɛ klikli’m be blɛ su. Zuifu nin be nga be timan Zuifu mɔ be tran Rɔmu nvle’n i akpasuaakpasua kɔe 15 be su’n b’a ba Delɛ Cɛn’n i dilɛ Zerizalɛmu lɛ. Cɛn sɔ’n nun’n, yasua nin bla mɔ Ɲanmiɛn wawɛ’n jrali be su’n, be boli jasin fɛ’n aniɛn wafawafa nga be kɛn i nvle’n nun’n, be nun. Sran mɔ be kan aniɛn wafawafa sɔ’m be tili Ɲanmiɛn ndɛ’n weiin. W’a yoman kɛ laa Babɛli klɔ’n su lɔ mɔ sran’m be aniɛn’n sanngannin mɔ b’a timan be wun aniɛn’n kun sa. (Sa Nga Be Yoli’n 2:1-12) Cɛn sɔ’n nun’n, yɛ Klistfuɛ asɔnun’n takali ɔ. Kpɔkun cɛn sɔ’n nun yɛ jasin fɛ’n i bolɛ aniɛn wafawafa nun, ɔ nin mɛn wunmuan’n nun’n, ɔ boli i bo lele fa juli e blɛ liɛ’n su ɔ.
2. ?Wafa sɛ yɛ afuɛ 33 nun Pantekɔtu nun’n, Zezi i sɔnnzɔnfuɛ’m be ‘boli be nga be tie be ndɛ’m be nuan’ ɔn?
2 Atrɛkpa’n, Zezi i sɔnnzɔnfuɛ’m be kan Glɛki aniɛn. Sanngɛ Glɛki aniɛn nga be kan’n, yɛ ɔ ti blɛ sɔ’n nun aniɛn mɔ sran sunman be kan ɔn. Kusu be kan Ebre aniɛn’n wie. Ebre aniɛn’n yɛ be kɛn i Ɲanmiɛn ndɛ suanlɛ nin i srɛlɛ sua’n nun lɔ ɔ. Sanngɛ Pantekɔtu cɛn sɔ’n nun’n, be ‘boli be nga be tie be ndɛ’m be nuan.’ Afin sran nga be aniɛn’n ti ngunminngunmin mɔ be o lɛ’n, be tili jasin fɛ’n be bɔbɔ be aniɛn’m be nun. ?I bo’n guali sɛ? Ɲanmiɛn ndɛ mɔ be tili i be klɔ aniɛn nun’n ti’n, nanwlɛ’n kannin be awlɛn’n. Lele mɔ aliɛ’n fá sán’n, Zezi i sɔnnzɔnfuɛ akpasua kaan sɔ mɔ be o lɛ’n be wa yoli kpanngban kpa. Be yoli sran 3.000 tra su!—Sa Nga Be Yoli’n 2:37-42.
3, 4. ?Kɛ Zezi i sɔnnzɔnfuɛ’m bé tú Zerizalɛmu, nin Zida nin Galile bé kó trán lika uflɛ’n, wafa sɛ yɛ jasin fɛ’n bolɛ’n truli ɔ?
3 Kɛ abonuan sa sɔ’n juli wieli’n, w’a cɛman yɛ be boli Zezi i sɔnnzɔnfuɛ’m be yalɛ klelɛ bo Zerizalɛmu lɔ ɔ. Kpɔkun ‘be mɔ be sanndili’n, be kɔ klɔ’m be su be kan Ɲanmiɛn ndɛ’n.’ (Sa Nga Be Yoli’n 8:1-4) I wie yɛle Filipu jasin bofuɛ mɔ Sa Nga Be Yoli’n ndɛ tre 8 kɛn i ndɛ’n. Atrɛkpa’n, Filipu bɔbɔ kan Glɛki. Filipu boli jasin fɛ’n kleli Samalifuɛ mun. Asa kusu’n, ɔ boli jasin fɛ’n kleli Etiopi lɔ sran dan kun m’ɔ sɔli Klist i ndɛ’n nun’n.—Sa Nga Be Yoli’n 6:1-5; 8:5-13, 26-40; 21:8, 9.
4 Kɛ Klistfuɛ’m be jasoli be ɔli Zerizalɛmu nin Zida nin Galile be wun mmua kpa lɔ tranlɛ’n, ɔ yoli kekle mannin be. Afin be nin lɔfuɛ’m be kanman aniɛn kunngba. Atrɛkpa’n, be nun wie’m be boli jasin fɛ’n kleli be nga be ti Zuifu’n be ngunmin. Sanngɛ Zezi i sɔnnzɔnfuɛ Liki seli kɛ: ‘Be nun sran wie’m be fin Sipri nin Sirɛni, be bali Antiɔsu, be kan ndɛ kleli Glɛki mun wie, yɛ be bo e Min Zezi i jasin fɛ’n kleli be.’—Sa Nga Be Yoli’n 11:19-21.
Ɲanmiɛn m’ɔ kpaman sran nun’n, ɔ le jasin m’ɔ ti sran kwlaa liɛ’n
5. ?Wafa sɛ yɛ jasin fɛ’n junman’n yi Zoova i sran nun m’ɔ kpaman’n, i nglo ɔ?
5 Wafa nga Zezi i sɔnnzɔnfuɛ’m be boli jasin fɛ’n kleli sran nga be kan aniɛn ngunminngunmin’n, ɔ ti Ɲanmiɛn i klun su. Afin Ɲanmiɛn kpaman sran nun. Kɛ Zoova ukali akoto Piɛli m’ɔ kacili i angunndan ng’ɔ bu i nvle uflɛ’m be su’n, ɔ seli kɛ ‘nanwlɛ, m’an wun i wlɛ kɛ Ɲanmiɛn liɛ’n, ɔ kpaman sran nun, sanngɛ nvle kwlaa nun’n, sran ng’ɔ sro i m’ɔ yo i klun sa’n, i klun jɔ i wun.’ (Sa Nga Be Yoli’n 10:34, 35; Jue Mun 145:9) Kɛ akoto Pɔlu mɔ i klikli’n nun ɔ kleli Klistfuɛ’m be ɲrɛnnɛn’n seli kɛ Ɲanmiɛn ‘klo kɛ ɔ́ dé sran’m be kwlaa naan be wun sa ng’ɔ ti nanwlɛ’n i wlɛ kpa’n,’ ɔ tinnin su kpa kɛ Ɲanmiɛn kpaman sran nun sakpa. (1 Timote 2:4) Kɛ be se kɛ Ɲanmiɛn kpaman sran nun’n, ɔ ti nanwlɛ. Afin, sran wafawafa kwlaa, ɔ nin sran nga be kan aniɛn wafawafa kwlaa’n, ɔ nin be nga be fin nvle kwlaa’n be kwla tran Sielɛ Blɛ’n i bo wie.
6, 7. ?Biblu’n nun ndɛ mennin yɛ ɔ boli i jɔ kɛ bé wá bó jasin fɛ’n mɛn wunmuan’n nun aniɛn fanunfanun’m be nun ɔn?
6 Jasin fɛ’n i bolɛ’n aniɛn wafawafa kwlaa nun mɔ w’a tru mɛn wunmuan nun’n, be dun mmua boli su afuɛ ya kpɔlɛ nga be sinnin’n be nun. Kɛ nga Ɲanmiɛn nuan ijɔfuɛ Daniɛli i ndɛ’n fa kannin’n sa’n, ‘be fali kwlalɛ’n be mannin Zezi, be mɛnmɛnnin i, yɛ be fali famiɛn diwlɛ’n be wlɛli i sa nun. Nvlenvle’n kwlaa nin mɛnmɛn’n kwlaa be nunfuɛ mun mɔ be kan aniɛn wafawafa’n kwlaa’n, bé sú i.’ (Daniɛl 7:14) Kɛ be yi e fluwa nga e su suan nun like yɛ aniɛn 151 nun’n, mɔ be fa man sran mun mɛn wunmuan’n nun’n, mɔ i ti e kwla kanngan Zoova i Sielɛ Blɛ’n i su ndɛ’n, i sɔ’n kle kɛ Ɲanmiɛn nuan ndɛ sɔ m’ɔ o Biblu’n nun’n, ɔ su kpɛn su.
7 Blɛ nga mɔ sran nga be kan aniɛn wafawafa bé wá tí nguan ndɛ ng’ɔ o Biblu’n nun’n, Biblu’n bɔbɔ boli i jɔ. Kɛ Zakari kán wafa nga Ɲanmiɛn sulɛ kpa’n wá kán sran sunman’n, ɔ seli kɛ: ‘I blɛ sɔ nun’n, sɛ sran blu be aniɛn’n ti ngunminngunmin’n, bé kó trá Zuifu kunngba cenje [Klistfuɛ nga be kpali be sieli be ngunmin’n, mɔ be o ‘Izraɛlifuɛ nga be ti Ɲanmiɛn liɛ sakpa’n’ be nun wie’n] i wun tralɛ’n i nuan su’n, kpɔkun bé sé i kɛ: “E nin amun yɛ é kɔ́ ɔ, afin e tili i kɛ Ɲanmiɛn’n o amun sin.”’ (Zakari 8:23; Galasifuɛ Mun 6:16) Asa ekun’n, kɛ akoto Zan kán aolia nun like ng’ɔ wunnin i’n, i ndɛ’n ɔ seli kɛ: ‘N niannin lɔ ekun, n wunnin sran kpanngban kpa, sran fi kwlá kaman be, sran sɔ’m be fin mɛnmɛn’n kwlaa nin nvlenvle’n kwlaa nun, yɛ sran wafawafa’n kwlaa o be nun, be ijɔ aniɛn wafawafa’n kwlaa. Be jinjin bia’n nin Bua Gbaflɛn’n be ɲrun lɛ.’ (Sa Nglo Yilɛ 7:9) E wunnin kɛ Ɲanmiɛn nuan ndɛ kɛ nga sa’m be kpɛnnin su!
E kan ndɛ kle sran wafawafa kwlaa
8. ?Andɛ’n, ngue yɛ e wun i mɔ i ti yɛ ɔ fata kɛ e siesie e jasin fɛ’n bolɛ junman’n i wafa uflɛ ɔ?
8 Andɛ’n, sran sunman be tu ajalɛ be kɔ nvle uflɛ’m be nun. Angunndan uflɛ nga w’a ju su mɔ yɛle kɛ sran’m be kwlaa be kan be bo nun’n, i ti sran kpanngban kpa be tu ajalɛ kɔ nvle uflɛ nun. Alɛ’n, ɔ nin sika ndɛ ti’n sran sunman be tu ajalɛ be kɔ nvle uflɛ nun sika annzɛ mɛn kpa kunndɛlɛ. Lika sunman nun’n, sran sunman be ko taloli nvle uflɛ mun. Wie liɛ’n, alɛ ti yɛ be yo sɔ ɔ. I sɔ’n yoli maan aniɛn fanunfanun be wɔnsɔn be wun lika wie’m be nun kpanngban kpa. I wie yɛle kɛ Fɛnlandi lɔ’n, be kan aniɛn 120 tra su. Ɔstrali lɔ’n be kan aniɛn 200 tra su. Amlɛnkɛn mɛn’n nun lɔ klɔ nga be flɛ i San Diego i kunngba su lɔ’n, be kan aniɛn 100 tra su!
9. ?Wafa sɛ yɛ ɔ fata kɛ e bu e jasin fɛ’n bowlɛ lika’m be nun sran nga be kan aniɛn uflɛ mun ɔn?
9 ?E mɔ e ti jasin fɛ’n bofuɛ’n, aniɛn fanunfanun’m be ti e ɲrun kɛ ce sa, ɔ maan e kwlá boman jasin fɛ’n? Nán maan ɔ yo sɔ mlɔnmlɔn. Sanngɛ maan e wun i sɔ liɛ’n kɛ like mɔ kwla tike e jasin fɛ’n i wun atin dan uflɛ sa. Afin, sɛ é kwlá sé’n, e jasin fɛ’n lika’m be nun’n, ‘awie’n w’a blo yɛ w’a ju i kpɛlɛ.’ (Zan 4:35) E mian e ɲin naan e uka sran nga be di Ɲanmiɛn ninnge’m be yalɛ’n. Aofuɛ’m be aniɛn fanunfanun nga be kan’n, ɔ bubuman e sa sin be jasin fɛ’n i bo klelɛ’n nun. (Matie 5:3) Kɛ e yo sɔ’n, afuɛ kwlaa sran sunman mɔ be ‘fin mɛnmɛn nin nvlenvle’n kwlaa nun’n’ be kaci Klist i sɔnnzɔnfuɛ. (Sa Nglo Yilɛ 14:6) I wie yɛle kɛ afuɛ 2004 nun Utu nun Alemaɲi nvle nun lɔ’n, be boli jasin fɛ’n aniɛn kɔe 40 nun. Blɛ kunngba sɔ nun’n, be boli jasin fɛ’n Ɔstrali nvle mun lɔ aniɛn kɔe 30 nun. Sanngɛ i afuɛ blu kasiɛn nga nun’n, be boli jasin fɛ’n Ɔstrali lɔ aniɛn 18 nun. Zoova i Lalofuɛ nga be o Glɛki nvle nun lɔ’n, be bo jasin fɛ’n aniɛn wafawafa kɔe 20 nun. Mɛn wunmuan’n nun’n, Angle aniɛn’n yɛ sran’m be tɛ i kan ɔn. Sanngɛ Zoova i Lalofuɛ nga be o mɛn wunmuan’n nun’n sɛ be fa be nun ya’n, be nun 80 be kan aniɛn uflɛ.
10. ?Nvlenvle kwlaa be like klelɛ nun naan b’a kaci Zezi i sɔnnzɔnfuɛ’n, ngue junman yɛ ɔ o su e tinuntinun ɔn?
10 Nanwlɛ Zezi i ndɛ ng’ɔ kɛnnin i kɛ ‘an wɔ ko kle nvlenvle’n kwlaa be like maan be kaci n sɔnnzɔnfuɛ’n,’ ɔ su kpɛn su. (Matie 28:19) Kɛ mɔ Zoova i Lalofuɛ’m be wun blibli be kɛ bé fá Zezi i ndɛ sɔ’n su ti’n, be bo jasin fɛ’n mɛnmɛn 235 nun. Kpɔkun be fa Biblu’n i akua nga be yi be aniɛn 400 tra su nun’n, be fa man sran mun. Kɛ Zoova i anuannzɛ’n yí Biblu’n i akua nga ɔ fata kɛ sran’m be ɲɛn i’n, ɔ nin i fata kɛ jasin fɛ’n bofuɛ’m be kusu be tinuntinun be fa ajalɛ naan be kan Biblu’n nun ndɛ’n kle ‘sran’m be kwlaa’ be bɔbɔ be aniɛn’m be nun. (Zan 1:7) E klun mɔ e tu i sɔ’n, ɔ yo maan sran akpinngbin mɔ be kan aniɛn ngunminngunmin’n be ti jasin fɛ’n i ndɛ wie. (Rɔmfuɛ Mun 10:14, 15) Nanwlɛ, e tinuntinun’n e di junman dan kun!
Maan e mian e ɲin e kan aniɛn uflɛ
11, 12. (a) ?Junman mennin yɛ ɔ o e ɲrun aniɛn uflɛ’n i kanlɛ’n nun ɔn? ?Yɛ wafa sɛ yɛ Ɲanmiɛn i wawɛ’n uka e ɔ? (b) ?Ngue ti yɛ kɛ e bo jasin fɛ’n sran’m be klɔ aniɛn’n nun’n, ɔ ti kpa dan ɔn?
11 Andɛ’n, Sielɛ Blɛ’n i su jasin fɛ’n bofuɛ kpanngban be kunndɛ kɛ bé súan aniɛn uflɛ. Sanngɛ be kwlá lafiman su kɛ Ɲanmiɛn i wawɛ’n wá yí atrɛ naan be ja nun lɛ b’a kan aniɛn uflɛ. (1 Korɛntfuɛ Mun 13:8) Aniɛn uflɛ suanlɛ’n timan junman pɔpɔ. Be nga bɔbɔ mɔ be kan aniɛn uflɛ’n, ɔ fata kɛ wie liɛ’n be kacikaci be angunndan bulɛ wafa nin be like yolɛ mun naan b’a kan Biblu’n nun jasin’n b’a kle sran nga be ti i aniɛn’n. Ɔ ti sɔ afin, be kwla kan aniɛn kun, sanngɛ be nga be kan aniɛn sɔ’n be akpasuaakpasua’n ti’n, be ninnge yolɛ’m be kwla kacikaci. Asa kusu’n, be nga be talo nvle uflɛ mun’n, be sa ɲan. Ɔ maan sɛ e kunndɛ kɛ é sí like nga ti yɛ be ti sɔ’n, ɔ fata kɛ e mian e ɲin kpa.
12 Sanngɛ, kɛ Ɲanmiɛn i sufuɛ’m be mian be ɲin be uka sran be kan aniɛn uflɛ mun’n, Ɲanmiɛn wawɛ’n suan be bo. (Lik 11:13) Ɲanmiɛn i wawɛ’n su yoman abonuan like naan y’a kan aniɛn uflɛ. Sanngɛ ɔ yo maan e klo jasin fɛ’n nga e bo e kle be nga be kan aniɛn uflɛ mun’n. (Jue Mun 143:10) Nanwlɛ, sɛ e bo jasin fɛ’n, aniɛn nga sran’m be timɛn i kpa’n i nun’n, ɔ gua be su’n nun ngbɛn. Sanngɛ, sɛ e bo jasin fɛ’n be bɔbɔ be klɔ aniɛn nun’n, e kwla lafi su kɛ saan ɔ́ kán be awlɛn’n. Afin, ɔ ti be aniɛn yɛ be wun i ngbɛsungbɛsu kwlaa i wlɛ.—Lik 24:32.
13, 14. (a) ?Ngue yɛ ɔ su jasin bofuɛ wie’m be bo mɔ be ko bo jasin fɛ’n lika nga be kan aniɛn uflɛ lɔ’n niɔn? (b) ?Yɛ wafa sɛ yɛ be bu be wun klɛnlɛ ayeliɛ sɔ’n niɔn?
13 Kɛ jasin bofuɛ sunman be wun kɛ jasin fɛ’n nga be bo i aniɛn uflɛ nun’n, ɔ ba nvlɛ ti’n, be fɛli i sɔ jasin fɛ’n bolɛ atin liɛ’n. Wienun ɔn, kɛ be jasin fɛ’n bolɛ’n ti be mian be ɲin, kpɔkun ɔ man be aklunjuɛ’n, i sɔ’n wla be fanngan. Blɔfuɛ mɛn’n i gua lika nun lɔ betɛli kun seli kɛ: “Be nga be fin Blɔfuɛ mɛn’n i wia atɔliɛ lɔ be ba’n, be di Ɲanmiɛn ndɛ’n i yalɛ kpa.” Nanwlɛ, kɛ e uka sran sɔ mun’n, ɔ yo e fɛ dan kpa!—Ezai 55:1, 2.
14 Sɛ e kunndɛ kɛ e jasin fɛ’n junman’n ba nvlɛ’n, ɔ fata kɛ e mian e ɲin yɛ e klɛn e wun. (Jue Mun 110:3) I wie yɛle kɛ Zoova i Lalofuɛ awlobo wunmuan kun sa mɔ be aniɛn’n yɛle Zapɔn aniɛn’n, be jasoli be sua klanman’n nun be ɔli lika mmua kpa naan b’a ko uka Sinua nga be bali nvle sɔ’n nun’n naan b’a si Biblu’n kpa. Amlɛnkɛn mɛn’n nun lɔ wia i afiliɛ lɔ lika nun’n, jasin fɛ’n bofuɛ kun fa loto kɔ mmua kpa. Ɔ di dɔ kun annzɛ nɲɔn naan w’a ju lika sɔ’n nun lɔ. Ɔ kɔ lɔ ko kle sran kun i Biblu’n nun like. Lika ng’ɔ kɔ sɔ’n, be nga be kan Filipini aniɛn’n yɛ be bo jasin fɛ’n i lɔ ɔ. Nɔrwe lika liɛ’n nun lɔ’n, aniaan bian kun nin i yi be kle awlobo kun m’ɔ fin Afghanistan’n i nunfuɛ’m be Biblu’n nun like. Aniaan’n nin i yi’n, be fa fluwa ?Ngue like yɛ Ɲanmiɛn Kpli kunndɛ kɛ e yo ɔ?a Angle nin Nɔrwe aniɛn’n nun. Awlobofuɛ sɔ’m be kanngan fluwa’n nun Pɛrsi aniɛn’n nun. Pɛrsi aniɛn’n nin be klɔ aniɛn mɔ yɛle Dari’n be fa be wun kpa. Kpɔkun be kan ndɛ’n Angle nin Nɔrwe aniɛn’n nun. Be wun klɛnlɛ kɛ ngalɛ’n sa’n, ɔ nin be wun siesielɛ kpa kɛ ngalɛ’n sa’n, ɔ man aklunjuɛ dan kpa. I li kɛ aofuɛ sɔ mɔ e nin be e suan like’n be fa nanwlɛ atin’n su, ɔ yo fɛ dan.b
15. ?Wafa sɛ yɛ e nun kunngun e kwla mian i ɲin naan y’a bo jasin fɛ’n aniɛn wafawafa’m be nun ɔn?
15 ?Amun kwla bo jasin fɛ’n aniɛn uflɛ nun wie? ?Sɛ amun kunndɛ kɛ amún yó i sɔ’n, ngue ti yɛ amun kunndɛman lika nga amun jasin fɛ’n bowlɛ’n nun’n, aofuɛ’m be o lɛ’n niɔn? Kpɔkun kɛ amún kɔ́’n, aniɛn nga be kɛn i lika sɔ’m be nun’n, amun kwla fa i su Biblu’n i akua wie’m be kɔ. Fluwa Une bonne nouvelle pour des gens de toutes nations mɔ be yili i afuɛ 2004 nun’n, w’a uka sran mun Ɲanmiɛn Sielɛ Blɛ’n i su ndɛ kanlɛ’n nun kpa. I nun ndɛ’n ti pɔpɔ, yɛ be klɛli i aniɛn fanunfanun nun.
Maan ‘e klo aofuɛ mun’
16. ?Wafa sɛ yɛ aniaan wie’m be tu be klun be uka aofuɛ nga be kan aniɛn uflɛ mun ɔn?
16 Sɛ e suan aniɛn uflɛ o annzɛ sɛ e suanman aniɛn uflɛ o, Ɲanmiɛn ninnge’m be nun’n, e ngba e kwla uka aofuɛ nga be o jasin fɛ’n bowlɛ lika’m be nun’n. Zoova seli i nvlefuɛ’m be kɛ be ‘klo aofuɛ mun.’ (Mmla’n 10:18, 19) I wie yɛle kɛ Amlɛnkɛn mɛn’n i nglo lɔ klɔ dan kun nun’n, asɔnun nnun be yia Ɲanmiɛn Sielɛ Blɛ Sua kunngba’n nun. Kɛ nga asɔnun sunman be yo’n sa’n, afuɛ nuan kwlaa’n asɔnun nga be sɔnnin mɔ be yia sua kunngba’n nun’n, be kacikaci be aɲia cɛn mun. I sɔ ngalɛ’n ti’n, Sinua asɔnun liɛ’n be sieli be aɲia’n i Mɔnnɛn cɛn, yɛ be suli dɔ’n i siɛn kan. Sanngɛ, ndɛ ng’ɔ o lɛ’n yɛle kɛ sɛ be yaci aɲia’n i dɔ ngalɛ’n su’n, Sinuafuɛ nga be di junman aliɛ diwlɛ lika’m be nun’n, be su kwlá baman aɲia’n i bo. I sɔ’n ti’n, klolɛ su asɔnun onga’m be nun asɔnun kpɛnngbɛn’m be siesieli ninnge’m be uflɛ naan Sinua asɔnun’n w’a kwla yo i aɲia’n Mɔnnɛn cɛn, sanngɛ be fali dɔ’n be bɛli i ɲrun kan.
17. ?Kɛ aniaan wie’m be jaso be lika nun be kɔ lika uflɛ ko uka be nga be kan aniɛn uflɛ’n, wafa sɛ yɛ ɔ fata kɛ i sɔ ayeliɛ’n ɔ yo e ɔ?
17 Klolɛ su asɔnun kpɛnngbɛn’m be yo aniaan bian nin aniaan bla nga be klo kɛ bé kɔ́ lika nga be kan aniɛn uflɛ lɔ naan bé kó úka sran mun’n, be mo. I sɔ ajalɛ tulɛ’n, ɔ kwla yo kekle man asɔnun nga aniaan sɔ’m be fin nun’n. Sanngɛ angunndan kunngba nga Listri nin Ikoni asɔnun kpɛnngbɛn’m be buli’n, yɛ be bu i wie ɔ. Sɛ bɔbɔ Timote ti asɔnun’n nun sran cinnjin kun’n, sanngɛ asɔnun kpɛnngbɛn’m b’a seman kɛ be kloman kɛ Timote nin Pɔlu be wɔ. (Sa Nga Be Yoli’n 16:1-4) Asa ekun’n, sɛ bɔbɔ aofuɛ’m be angunndan bulɛ ɔ nin be nzuɛn’n nin be nga be fa jasin fɛ’n i bolɛ’n i nun ta’n be liɛ’n timan kun’n, sanngɛ i sɔ liɛ’n bubuman be sa sin. Sanngɛ like nga be yo’n yɛle kɛ be klo sran nga be kan aniɛn fanunfanun sɔ mun’n. Kpɔkun be kunndɛ wafa nga be nin sran sɔ’m be kwla tra janvuɛ’n. Be yo i kwlaa sɔ’n jasin fɛ’n ti.—1 Korɛntfuɛ Mun 9:22, 23.
18. ?Jasin fɛ’n bolɛ i wun atin dan mennin yɛ w’a tike e kwlaa e ɲrun ɔn?
18 Kɛ nga Ɲanmiɛn nuan ijɔfuɛ’m be ndɛ’n fa kannin’n sa’n, be su bo jasin fɛ’n kle sran mɔ ‘be aniɛn’n ti ngunminngunmin’n.’ E jasin fɛ’n i ɲrun kɔlɛ atin dan kpa te o lɛ. Yɛle lika nga be kan aniɛn uflɛ mun lɔ’n be nun jasin fɛ’n bolɛ’n. ‘Atin dan sɔ mɔ maan be kwla di junman kpa’n’ yɛ jasin fɛ’n bofuɛ kpanngban kpa mɔ be sa w’a tɔ junman’n nun’n, be fali su ɔ. (1 Korɛntfuɛ Mun 16:9) Sanngɛ, kɛ nga é wá wún i like suanlɛ ng’ɔ́ bá lɔ’n nun sa’n, be le jasin fɛ’n bofuɛ’m be awuliɛ naan be di junman jasin fɛ’n bowlɛ lika nga be kan aniɛn fanunfanun’m be nun.
[Ja ngua lɛ ndɛ mun]
a Zoova i Lalofuɛ mun yɛ be yili ɔ.
b Sɛ amun waan amún wún sunnzun ase kpanngban ekun’n, amun nian ndɛ mɔ be flɛ i kɛ “E wun klɛnlɛ kan m’ɔ mannin e mmlusuɛ kpanngban’n” m’ɔ o afuɛ 2004, Avrili 1 Sasafuɛ Tranwlɛ’n, i bue 24-8 nun’n, i nun.
?Amun kwla yiyi nun?
• ?Kɛ Zoova sa’n, wafa sɛ yɛ e kwla kle kɛ e kpaman sran nun ɔn?
• ?Wafa sɛ yɛ ɔ fata kɛ e bu be nga be o e jasin fɛ’n bowlɛ lika nun mɔ be kan aniɛn uflɛ mun ɔn?
• ?Ngue ti yɛ ɔ ti kpa kɛ e bo jasin fɛ’n e kle sran’m be bɔbɔ be klɔ aniɛn’n nun ɔn?
• ?Wafa sɛ yɛ e kwla kle kɛ aofuɛ nga be o e lika’n nun’n, be ndɛ lo e ɔ?