Ninnge’m be sielɛ kun mɔ maan Ɲanmiɛn klun sa’n kpɛn su’n
‘Like kwlaa nga Ɲanmiɛn klo kɛ ɔ́ yó’n, ɔ yo.’—Efɛzfuɛ Mun 1:11.
1. ?Afuɛ 2006 nun Avrili i le 12, ngue yɛ Zoova i Lalofuɛ’m bé yó ɔ?
AFUƐ 2006 nun’n, wue’n m’ɔ ti Avrili i le 12 i nnɔsua nun’n, sran miliɔn 16 bé bá E Min’n i Aliɛ’n i Cɛn dilɛ’n i bo. Cɛn sɔ nun’n, Zoova i Lalofuɛ’m bé táka tabli kun be yiawlɛ lika’m be nun. Kpɔkun, bé síe su kpaun nga kpaun ayre nunman nun’n m’ɔ ti Klist wunnɛn’n i nzɔliɛ’n, ɔ nin divɛn m’ɔ ti i mmoja m’ɔ guɛli i ase’n i nzɔliɛ’n. I sin’n, sa nga ti yɛ e fa Zezi i wie’n e kpɛn e wun wla’n, nzra nun ijɔlɛ kun yíyí nun. Kɛ ijɔlɛ’n wá wíe’n, bé fá kpaun sín nzrafuɛ’m be ɲrun. Kpɔkun i sin’n, bé fá divɛn’n sín wie. Kɛ bé fá nzɔliɛ ninnge sɔ mun sín’n, be nga be lafi su kɛ bé kɔ́ ɲanmiɛn su’n be ngunmin cɛ yɛ bé dí ɔ. Yɛ kɛ mɔ i sɔfuɛ’m be ti kaan sa’n ti’n, wie liɛ’n sran fi su diman. ?Yɛ ngue ti yɛ Klistfuɛ kpɔlɛ kan nga bé kɔ́ ɲanmiɛn su’n be ngunmin yɛ be di nzɔliɛ ninnge mun mɔ sran kpanngban nga bé ká asiɛ’n su wa’n, be diman wie ɔ?
2, 3. (a) ?Wafa sɛ yɛ Zoova boli sa ng’ɔ o i klun kɛ ɔ́ yó’n i yolɛ’n bo ɔ? (b) ?Ngue ti yɛ Zoova yili asiɛ’n nin sran mun ɔn?
2 Zoova ti Ɲanmiɛn m’ɔ le i klun sa kun kɛ ɔ́ yó ɔ. Sa sɔ’n i yolɛ nun’n, ‘like kwlaa ng’ɔ klo kɛ ɔ́ yó’n, ɔ yo.’ (Efɛzfuɛ Mun 1:11) Kɛ ɔ́ bó i ninnge’m be yilɛ’n i bo’n, ɔ dun mmua yili i Wa kunngba cɛ’n. (Zan 1:1, 14; Sa Nglo Yilɛ 3:14) I sin’n, Ɲanmiɛn maan i Wa’n yili anzi mun, ɔ nin ninnge mɔ be o ɲanmiɛn su lɔ nin asiɛ’n su wa’n be kwlaa.—Zɔb 38:4, 7; Jue Mun 103:19-21; Zan 1:2, 3; Kolɔsfuɛ Mun 1:15, 16.
3 Zoova w’a yiman asiɛ’n kɛ sran’m be tran su naan be wun ɲrɛnnɛn naan i sin’n, ɔ́ fá be kɔ́ i wun lɔ kɛ nga asɔnun tɛtɛ’m be fa kan’n sa. Angunndan kunngba cɛ nga Zoova buli mɔ i ti yɛ ɔ yili asiɛ’n, yɛle kɛ maan sran’m “be tran su.” (Ezai 45:18) Ɔ maan asiɛ’n ti sran’m be liɛ. Ɲanmiɛn fa mannin be. Ɔ fa mannin be kɛ be di nun junman, naan be nian su, naan asiɛ wunmuan’n kaci lika klanman, naan sran nga be ti kpa’m be tran su. (Jue Mun 115:16) Sran klikli’n, ɔ nin i yi’n b’a buman angunndan le kɛ cɛn kun bé kɔ́ ɲanmiɛn su.—Bo Bolɛ 1:26-28; 2:7, 8, 15.
Sa nga Zoova waan ɔ́ yó’n i su akplowa silɛ
4. ?Zoova i ninnge’m be sielɛ’n i su akplowa onin yɛ be sili i sran klikli’m be blɛ su ɔ?
4 Anzi kun w’a simɛn i jranwlɛ’n. Ɔ maan ɔ yoli ɲin kekle, kpɔkun ɔ fuali kɛ ɔ́ tánndan sa nga Zoova waan ɔ́ yó’n i ɲrun. I sɔ’n ti’n, sran’n kwlaa nga klolɛ su be fa be wun man Zoova kɛ ɔ sie be’n, ɔ tanndan be alaje dilɛ’n i ɲrun. Anzi sɔ mɔ i dunman’n yɛle Satan’n, ɔ suli Adam nin i yi’n be bo maan be kpɔcili Ɲanmiɛn. (Bo Bolɛ 3:1-6) Satan si kɛ like fi nunman Zoova sin. Sanngɛ, ɔ sili Zoova i ninnge’m be sielɛ wafa’n i su akplowa kɛ Zoova siman be sie. I sɔ akplowa liɛ’n, ɔ sili i Adam nin i yi’n be blɛ su.
5. ?Akplowa onin ekun yɛ Satan sili ɔ? ?Yɛ wan mun yɛ akplowa sɔ’n wɔ be ɔ?
5 I sin’n, Satan sili akplowa kun ekun Zɔbu blɛ su. Akplowa sɔ’n, ɔ nin klikli liɛ’n be afiɛn ti kun. Kpɔkun, ɔ wɔ sa nga ti yɛ sran’m be ɲin yi Ɲanmiɛn mɔ be su i’n. Satan seli kɛ sran’m be bɔbɔ be like liɛ ng’ɔ lo be’n, i ti yɛ be ɲin yi Ɲanmiɛn yɛ be su i ɔ, naan sɛ ɲrɛnnɛn tɔ be su’n, bé yáci Ɲanmiɛn sulɛ. (Zɔb 1:7-11; 2:4, 5) Sanngɛ akplowa sɔ’n wɔman klɔ sran’m be ngunmin. Ɔ wɔ anzi mun, ɔ nin Zoova i Wa kunngba cɛ’n bɔbɔ wie.
6. ?Wafa sɛ yɛ Zoova kle kɛ i dunman’n ti’n, sa ng’ɔ se kɛ ɔ́ yó’n, ɔ yo naan ɔ kacimɛn i ɔ?
6 Kɛ mɔ sa nga Zoova se kɛ ɔ́ yó’n, ɔ yo ɔ kacimɛn i’n, ɔ nin i bɔbɔ i dunman’n ti’n, ɔ ijɔ i bɔbɔ i nuan kpɔkun ɔ yo e Defuɛ.a Ɔ seli Satan kɛ: ‘Ń fá kpɔlɛ ń wlá a nin bla’n be afiɛn, ń fá wlá ɔ osu’n nin bla’n i osu liɛ’n be afiɛn. Bla’n i osufuɛ’m bé kpɔ́tɔ ɔ ti’n, yɛ ɔ kusu á ká be ja sin.’ (Bo Bolɛ 3:15) Ɔ maan, Zoova sín “bla’n,” annzɛ i anuannzɛ mɔ i bue kun o nglo lɔ’n i osu’n i lika naan ɔ́ kpɛ́ akplowa mɔ Satan si’n nun. Kpɔkun ɔ́ yó maan Adam i mma’m bé fíte nun, yɛ bé ɲán nguan.—Rɔmfuɛ Mun 5:21; Galasifuɛ Mun 4:26, 31.
‘I klun sa m’ɔ fa fiɛli sran’m be ɲrun’n’
7. ?Zoova i klun sa onin yɛ ɔ sinnin akoto Pɔlu i lika yili i nglo ɔ?
7 Wafa nga Zoova sie i ninnge mun mɔ maan sa ng’ɔ o i klun kɛ ɔ́ yó’n ɔ yo’n, akoto Pɔlu kɛnnin i ndɛ klanman kpa Efɛzfuɛ’m be fluwa’n nun. Ɔ seli kɛ: ‘Ɔ maan e si i klun sa m’ɔ fiɛli sran’m be ɲrun’n, ɔ nin sa klanman nga i waan Klist yo man ye’n. Sa sɔ’n mɔ i waan ɔ́ yó’n, sɛ i cɛn’n ju’n, ɔ́ yó. Sa sɔ’n yɛle kɛ ɔ́ kán sran’m be kwlaa nin asiɛ’n su like’n kwlaa nin ɲanmiɛn su lɔ liɛ’n kwlaa bo nun, yɛ ɔ́ fá Klist síe be su.’ (Efɛzfuɛ Mun 1:9, 10) Zoova i klun sa’n m’ɔ yo ɲɛnmɛn’n, yɛle kɛ ɔ́ kán sran kwlaa nga be kplin su kɛ ɔ sie be’n, ɔ nin ɲanmiɛn su lɔ liɛ’n kwlaa bo nun. (Sa Nglo Yilɛ 4:11) I liɛ’n, sran kwlaa wún kɛ Satan ti ato buafuɛ. Yɛ bé bó Ɲanmiɛn dunman fɛ. Kpɔkun e mɔ e wo ‘asiɛ’n su wa’n é yó i klun sa’n kɛ be mɔ be o ɲanmiɛn su lɔ’n be yo’n sa.’—Matie 6:10.
8. ?‘Sielɛ’n,’ nga Pɔlu kɛn i ndɛ’n i bo’n yɛle onin?
8 ‘Like nga Zoova klo kɛ ɔ́ yó’n,’ ɔ sin ‘sielɛ kun’ lika yɛ ɔ yo ɔ. Sielɛ sɔ mɔ Pɔlu kɛn i ndɛ’n, ɔ timan awa kun kɛ Ɲanmiɛn Sielɛ Blɛ’n sa. Sanngɛ, ɔ ti ‘awlo sielɛ.’b Ninnge’m be sielɛ klanman sɔ mɔ Zoova sie mɔ maan i klun sa’n kpɛ́n su’n, ɔ fa ‘fiɛli sran’m be ɲrun.’ Sanngɛ kɛ ɔ́ kɔ́ i ɲrun’n, ɔ́ wá yí sa sɔ’n i nglo blɛblɛblɛ klé be.—Efɛzfuɛ Mun 1:10; 3:9.
9. ?Wafa sɛ yɛ blɛblɛblɛ Zoova yili i klun sa m’ɔ fa fiɛli sran’m be ɲrun’n i nglo ɔ?
9 Wafa nga bla’n i osu’n mɔ Zoova kɛnnin i ndɛ Edɛni fie’n nun lɔ’n bá’n, Zoova bɔbɔ yili i nglo blɛblɛblɛ aenguɛ fanunfanun be nun. Aenguɛ ng’ɔ nin Abraamu be trali’n nun’n, ɔ seli Abraamu kɛ i afinliɛ nun yɛ osu sɔ’n fíte ɔ. Kpɔkun osu sɔ’n yó ‘asiɛ’n su nvlenvle’n kwlaa’ be ye. Aenguɛ kunngba’n kleli kɛ like ng’ɔ ti osu’n i liɛ’n, sran wie’m be dunman tɛ́ nun. (Bo Bolɛ 22:17, 18) I sin’n, Zoova nin Izraɛli nvle’n be trali aenguɛ kɛ sɛ be yo i klun sa’n, ɔ́ fá be yó ‘i ɲrun jranfuɛ’m be nvle.’ (Ezipt Lɔ Tulɛ 19:5, 6) Kpɔkun, ɔ nin Davidi be trali aenguɛ kɛ i osu’n yó famiɛn naan i sielɛ’n ká lɛ tititi. (2 Samiɛl 7:12, 13; Jue Mun 89:4, 5) Kɛ mɔ Mmla’n ti kɛ sran kun m’ɔ kleli Zuifu’m be atin nga be fa su’n lele Mɛsi bali’n ti’n, Zoova yiyili wafa nga i klun sa’n kpɛ́n su’n i kpɔlɛ wie’m be nun ekun. (Galasifuɛ Mun 3:19, 24) Sran ng’ɔ́ wá fá be mɔ be nin bla’n i osu’n i akpasua klikli’n bé yó sran wunmuan’n, bé káci ‘i ɲrun jranfuɛ’m be nvle’ kɛ ng’ɔ fa kannin’n sa. Kpɔkun ɔ nin be trá “aenguɛ uflɛ” yɛ bé káci ‘Izraɛli’ uflɛ mɔ be ti i liɛ sakpa’n.—Zeremi 31:31-34; Ebre Mun 8:7-9.c
10, 11. (a) ?Wafa sɛ yɛ Zoova yili osu ng’ɔ kɛnnin i ndɛ’n i balɛ’n i nglo ɔ? (b) ?Ngue ti yɛ Ɲanmiɛn i Wa kunngba cɛ’n bali asiɛ’n su ɔ?
10 Zoova i ninnge’m be yolɛ nun’n, kɛ osu ng’ɔ kɛnnin i ndɛ’n i balɛ’n asiɛ’n su wa’n i blɛ’n juli’n, ɔ sunmannin anzi Gabliɛli kɛ ɔ wa kan ndɛ kle Mali. Anzi’n seli Mali kɛ ɔ́ wá wú ba kun naan bé flɛ́ i kɛ Zezi. Kpɔkun ɔ kan guali su kɛ: ‘Ɔ́ yó sran dan, bé flɛ́ i kɛ Ɲanmiɛn mɔ like fi nunmɛn i sin’n i Wa, yɛ e Min Ɲanmiɛn’n ɔ́ fɛ́ i nannan Davidi bia’n mɛ́n i. Ɔ́ síe Zakɔbu awlo’n, yɛ ɔ́ ká be osu’n nun tititi.’ (Lik 1:32, 33) Kɛ ɔ fin i lɛ’n, be wunnin osu mɔ Ɲanmiɛn kɛnnin i balɛ’n i ndɛ’n i wlɛ weiin.—Galasifuɛ Mun 3:16; 4:4.
11 Zoova i Wa kunngba cɛ’n, ɔ́ bá asiɛ’n su wa kpɔkun ɔ́ wún ɲrɛnnɛn dan kpa. ?Blɛ sɔ nun’n, ɔ́ kwlá sú i Si’n lele gúɛ i ti nin i bo? Afin wafa ng’ɔ́ yó naan w’a kpɛ akplowa nga Satan sili nun’n, ɔ wo i sa nun. I sɔ sa liɛ’n, Ɲanmiɛn fa fiɛli sran’m be ɲrun. Sanngɛ kɛ ɔ́ kɔ́ i ɲrun’n, akoto Pɔlu yiyili sa nga Zezi wá yó’n nun. Ɔ seli kɛ: ‘E kwlaa e si kɛ kɛ ɔ yoli mɔ e yoli Ɲanmiɛn liɛ’n, ɔ ti abonuan dan, sran wunmɛn i wlɛ. Ɔ yoli i wun sran’n, ɔ yili i wun nglo, Ɲanmiɛn wawɛ’n kle kɛ ɔ ti sran kpa, anzi’m be wunnin i. Be kɛnnin i ndɛ nvle’m be nun. Be lafili i su mɛn wunmuan’n nun. Be mɛnnin i su ɔli ɲanmiɛn su lɔ, ɔ ɲannin ɲrun dan.’ (1 Timote 3:16) Nanwlɛ, Zezi fɛli i nantilɛ sein kpɛli akplowa mɔ Satan sili’n nun. Sanngɛ, sa mɔ sran wunmɛn i wlɛ’n i wie ekun te o lɛ.
‘Ɲanmiɛn Sielɛ’n i wun angunndan mɔ sran wunmɛn i wlɛ’n’
12, 13. (a) ?‘Ɲanmiɛn Sielɛ’n i wun angunndan mɔ sran wunmɛn i wlɛ’n,’ i nun sa’n kun yɛle mennin? (b) ?Ngue ti yɛ Zoova kpa sran kaan sa kɛ be ɔ ɲanmiɛn su ɔ?
12 Cɛn kun mɔ Zezi bó jasin fɛ’n Galile lɔ’n, ɔ kleli kɛ Ɲanmiɛn i klun sa m’ɔ fa fiɛli sran’m be ɲrun’n, ɔ kan Ɲanmiɛn Sielɛ’n. Ɔ seli i sɔnnzɔnfuɛ mun kɛ: ‘Amun yɛ be yi Ɲanmiɛn sielɛ’n i wun angunndan mɔ sran wunmɛn i wlɛ’n i nglo kleli amun ɔn.’ (Mark 4:11; Matie 13:11) Sa sɔ mɔ sran wunmɛn i wlɛ’n, i kun yɛle kɛ Zoova wá kpá sran 144.000 mɔ be ti kɛ “bua akpasua kaan kun sa’n” naan be nin i Wa’n m’ɔ ti bla i osu’n bé káci sran wunmuan, naan be nin i bé dí famiɛn ɲanmiɛn su lɔ.—Lik 12:32; Sa Nglo Yilɛ 14:1, 4.
13 Kɛ mɔ Zoova boli sran mun kɛ be tran asiɛ’n su wa’n ti’n, sɛ be nun kun kɔ́ ɲanmiɛn su’n, nn Zoova w’a “bo i uflɛ.” (2 Korɛntfuɛ Mun 5:17) Piɛli m’ɔ o be mɔ bé kɔ́ ɲanmiɛn su’n be nun wie’n, ɔ seli kɛ: ‘E Min Zezi-Klist i Si Ɲanmiɛn i kwla o! I aunnvuɛ silɛ dan’n ti, ɔ wuli ye ekun, ɔ maan e wla o like mɔ e si weiin kpa kɛ ɔ o lɔ’n su Zezi-Klist i cɛnlɛ’n ti. Ɔ wuli ye sɔ naan e ɲan like kpa ng’ɔ sieli i ɲanmiɛn su lɔ’n. Like sɔ’n kwla saciman, ɔ yoman fiɛn, yɛ ɔ mlinman.’—1 Piɛr 1:3, 4.
14. (a) ?Ɔ yo sɛ yɛ maan be nga be timan Zuifu’n be dunman tɛ ‘Ɲanmiɛn sielɛ’n i wun angunndan mɔ sran wunmɛn i wlɛ’n’ nun ɔn? (b) ?Ngue yɛ ɔ uka e maan e kwla si ‘Ɲanmiɛn bɔbɔ i angunndan’n’ niɔn?
14 Sa kun ekun m’ɔ o Ɲanmiɛn sielɛ’n i angunndan mɔ sran’m be wunmɛn i wlɛ’n nun’n, yɛle kɛ sran akpasua kan nga bé kɔ́ ɲanmiɛn su mɔ be nin Klist bé dí famiɛn’n, be ngba be timan Zuifu. Pɔlu yiyili Zoova i ninnge’m be yolɛ wafa sɔ’n nun. Ɔ seli kɛ: ‘Lalafuɛ nun’n, sa sɔ’n Ɲanmiɛn yimɛn i nglo kleman sran mun kɛ ndɛ ɔ maan i wawɛ’n yi i nglo kle i sran’m mɔ Zezi sunmannin be’n nin i nuan ijɔfuɛ mun’n sa. Sa sɔ’n yɛle kɛ like nga Ɲanmiɛn waan ɔ́ fá mɛ́n i sran mun’n, ɔ nin like ng’ɔ se kɛ ɔ́ yó mán be’n, be nga be timan Zuifu’n be dunman tɛ́ nun wie, yɛ be nin Zuif mun b’a yo kun jasin fɛ mɔ maan be nin Klist Zezi b’a kaci sran wunmuan’n ti.’ (Efɛzfuɛ Mun 3:5, 6) I sɔ sa liɛ mɔ Ɲanmiɛn fa fiɛli sran’m be ɲrun’n, ‘i sran’m mɔ Zezi sunmannin be’n nin i nuan ijɔfuɛ mun’ be wunnin i wlɛ. Afin ɔ yili i nglo kleli be. Andɛ kusu sɛ ɔ timan Ɲanmiɛn wawɛ’n i fanngan nun ti’n, nn e kwla siman ‘Ɲanmiɛn bɔbɔ i angunndan’n.’—1 Korɛntfuɛ Mun 2:10; 4:1; Kolɔsfuɛ Mun 1:26, 27.
15, 16. ?Ngue ti yɛ Zoova kpali sran’m be nun wie mun naan be nin Klist be di famiɛn ɔn?
15 ‘Sran akpiakpi ya sran akpiakpi ablanan nin nnan’ nga be nin Klist Zezi m’ɔ ti ‘Bua Gbaflɛn’n’ be jin Siɔn Oka’n m’ɔ o ɲanmiɛn su lɔ’n su’n, be kan be ndɛ kɛ ‘be kpɔli be ti asiɛ’n su sran’m be nun kɛ be yo Ɲanmiɛn nin Bua Gbaflɛn’n be sran’m be nun klikli.’ (Sa Nglo Yilɛ 14:1-4) ?Sɛ Zoova fɛli i anzi’m be nun klikli’n yoli osu ng’ɔ kɛnnin i ndɛ Edɛni fie’n nun lɔ’n niɔn, ngue ti yɛ ɔ kpali asiɛ su sran wie mun kɛ be nin Klist be yo sran wunmuan ɔn? Sran kaan sɔ mɔ bé kɔ́ ɲanmiɛn su’n, akoto Pɔlu kannin be ndɛ kɛ Zoova ‘flɛli be yɛle kɛ ɔ bu be angunndan sieli laa’n,’ naan ‘i klun jɔli su kɛ ɔ́ yó i sɔ’n ti yɛ ɔ yoli sɔ ɔ.’—Rɔmfuɛ Mun 8:17, 28-30; Efɛzfuɛ Mun 1:5, 11; 2 Timote 1:9.
16 Zoova klun sa’n, yɛle kɛ maan be bo i dunman fɛ, yɛ maan sran’m be si kɛ i yɛ ɔ sie nglo nin asiɛ’n niɔn. I lɛ nun’n, Zoova bɔbɔ i ninnge’m be yolɛ ngwlɛlɛ su dan’n ti’n, ɔ sunmɛnnin i Wa kunngba cɛ’n asiɛ’n su wa. Kpɔkun, be kleli i Wa’n i ɲrɛnnɛn lele ɔ wuli. Asa ekun’n, ɔ kpali sran wie mɔ be nantili sein lele guɛli i ti nin bo’n, naan be nin i Wa’n be di famiɛn.—Efɛzfuɛ Mun 1:8-12; Sa Nglo Yilɛ 2:10, 11.
17. ?Kɛ be nga be nin Klist bé dí famiɛn’n be dun mmua yoli klɔ sran’n, ngue ti yɛ i sɔ’n yo e fɛ dan ɔn?
17 Zoova kleli kɛ ɔ klo Adam i mma mun kpa. Afin be ti’n, ɔ sunmɛnnin i Wa’n asiɛ’n su wa’n. Kpɔkun, ɔ kpali sran wie mun naan be nin i Wa’n be di famiɛn. ?Sanngɛ kɛ ɔ fɛ i Abɛli su lele andɛ’n, wafa sɛ yɛ sran nga be su Zoova ndɛnman su’n be kwla ɲan Zoova i ninnge’m be yolɛ sɔ’n i su mmlusuɛ ɔ? Kɛ mɔ be wuli sran mun fɔ nun’n, mɔ be ti sa tɛ nin wie’n be kanga ti’n, ɔ fata kɛ be kpɔ be ti naan b’a yo kpa kɛ nga i klikli nun’n Zoova fa boli be’n sa. (Rɔmfuɛ Mun 5:12) E kwlaa nga e lafi su kɛ é ɲán anannganman nguan asiɛ’n su wa’n, e si kɛ e Min’n wá yí i nglo kɛ ɔ klo e. Kpɔkun, ɔ́ bú e sran kpa kɛ nga i nun m’ɔ o asiɛ’n su wa’n ɔ fa buli i sɔnnzɔnfuɛ mun’n sa’n. Nanwlɛ, i sɔ’n gua e awlɛn su nzue dan! (Matie 11:28, 29; Ebre Mun 2:17, 18; 4:15; 7:25, 26) Sa ng’ɔ yo e fɛ dan ekun’n, yɛle kɛ bla nin yasua nga be nin Klist bé dí famiɛn’n be si like nga be flɛ i ɲrɛnnɛn wunlɛ’n. Afin, be bɔbɔ be wunnin wie!—Rɔmfuɛ Mun 7:21-25.
Zoova klun sa’n kaman ngbɛn
18, 19. ?Wafa sɛ yɛ e wun Pɔlu i ndɛ’n m’ɔ o Efɛzfuɛ Mun 1:8-11 nun’n, i wlɛ kpa siɛn’n niɔn? ?Yɛ ngue yɛ like suanlɛ ng’ɔ́ bá lɔ’n wá yíyí nun ɔn?
18 Be nga be kpali be sieli be ngunmin’n be fluwa nga Pɔlu klɛli’n m’ɔ o Efɛzfuɛ Mun 1:8-11 nun’n, y’a wun i bo kpa siɛn’n. Pɔlu waan Zoova yili ‘i klun sa m’ɔ fa fiɛli sran’m be ɲrun’n’ i nglo kleli be, naan like ng’ɔ seli kɛ ɔ́ fá mán Klist’n, ‘bé bó be dunman nun wie,’ naan ‘like kwlaa nga Ɲanmiɛn klo kɛ ɔ́ yó’n, ɔ yo, afin i bɔbɔ yɛ ɔ sieli i sɔ ɔ.’ E wun i wlɛ kpa ekun kɛ sa kwlaa sɔ’m be o Zoova i ninnge’m be sielɛ abonuan mɔ maan i klun sa’n kpɛn su’n, be nun. Kpɔkun e wun sa nga ti yɛ e Min’n i Aliɛ’n i Cɛn dilɛ nun’n, Klistfuɛ kaan sa yɛ be di nzɔliɛ ninnge mun’n i wlɛ wie.
19 Wafa nga Klistfuɛ nga bé kɔ́ ɲanmiɛn su’n be bu Klist i wie’n, like suanlɛ ng’ɔ́ bá lɔ’n wá yíyí nun. Kpɔkun, sa nga ti yɛ ɔ fata kɛ e wla kpɛnlɛ’n ɔ yo be mɔ be lafi su kɛ bé ɲán anannganman nguan asiɛ’n su wa’n be cinnjin kpa’n, é wún i wlɛ wie.
[Ja ngua lɛ ndɛ mun]
a Dunman Zoova’n i bo’n yɛle kɛ “ɔ kaci sran wafa ng’ɔ klo kɛ ɔ́ káci’n.” Sran wafa ng’ɔ nin i fata kɛ Zoova kaci naan sa ng’ɔ seli kɛ ɔ́ yó’n w’a kpɛn su’n, ɔ yo i sɔfuɛ.—Ezipt Lɔ Tulɛ 3:14, NW.
b Pɔlu i ndɛ’n kle kɛ i blɛ su’n, awa kun o lɛ yɛ ɔ “sie” ɔ. Sanngɛ, Biblu’n kle kɛ afuɛ 1914 nun yɛ be takali Mɛsi’n i Sielɛ’n niɔn.
c Sɛ amun waan amún wún aenguɛ fanunfanun sɔ’m be su ndɛ wie mun ekun’n, amun nian Sasafuɛ Tranwlɛ’n, afuɛ 1989, Fevrie 1 (w-F i bue 10-15 nun).
I nun flanlɛ
• ?Ngue ti yɛ Zoova yili asiɛ’n kpɔkun ɔ fali sran mun sieli su ɔ?
• ?Ngue ti yɛ ɔ yoli cinnjin kɛ Zoova i Wa kunngba cɛ’n ɔ wun ɲrɛnnɛn asiɛ’n su wa ɔ?
• ?Ngue ti yɛ klɔ sran mun yɛ Zoova kpali be nun wie naan be nin Klist bé dí famiɛn ɔn?