?Amun si awlo yalɛ koko?
ZAPƆN lɔ banki kun kpɛli ngowa kanlɛ kun ba w’a di afuɛ nɲɔn kun. Ngowa sɔ’n i flɛlɛ’n yɛ: “Sran kpɛnngbɛn kun m’ɔ le afuɛ ablesiɛn’n, ɔ klɛli be wun klolɛ fluwa.” Ngowa kanlɛ sɔ nun’n, be seli Zapɔnfuɛ nga be le afuɛ 50 lele 60 be kɛ wafa nga be fa klo be yi annzɛ be wun’n, be tu be klun be klɛ i su fluwa. Be nga be kannin ngowa sɔ’n be nun kun klɛli i yi fluwa seli i kɛ: “Ndɛ nga ń wá kɛ́n i yɛ’n, n si kɛ ɔ́ klé wɔ srilɛ. Kusu sɛ m’an kanman’n, ɔ su yoman min fɛ. I ti maan n kan naan sran kwlakwla ti. Mmo mo nin min jalɛ.”
Nvle sunman nun’n, ɔ nin wia afiliɛ lɔ nvle wie’m be nun’n, ɔ timan su kɛ be kan wafa nga be fa klo be yi’n annzɛ be wun’n i ndɛ nzra nun. Sanngɛ ngowa kanlɛ sɔ’n nun’n, sran lele 15.000 be klɛli i sɔ fluwa liɛ’n. Ngowa kanlɛ sɔ’n yoli sran’m be fɛ dan. Ɔ maan be yoli kun ekun. I sin’n, be fali lɛtri nga sran’m be klɛli’n, be yili fluwa kun. I sɔ liɛ’n kle kɛ sran’m be bɔbɔ be klun lɔ’n, be klo kɛ bé yí klolɛ mɔ be fa klo be yi’n annzɛ be wun’n i nglo. Sanngɛ wie’m b’a kwlá yomɛn i sɔ. ?Ngue ti ɔ? Afin, be klun ndɛ nga bé kán klé be yi annzɛ be wun’n, i kanlɛ’n ti kekle be sa nun. Yɛ kusu sɛ be kunndɛ kɛ bé yó i sɔ’n, ɔ fata kɛ be si i yo.
Itosi Kato mɔ w’a klɛ antrɛti su fluwa le’n, ɔ seli kɛ Zapɔn lɔ be nga be jali be wun w’a cɛ’n be nun’n, sɛ bé kán yralɛ ndɛ’n, bla mun yɛ be dun mmua fɛ i sɔ ajalɛ’n niɔn. Afin ndɛ ng’ɔ yo be ya’n, be fa sie be klun lelele. Be boman su. Ɔ kɛnnin ekun kɛ: “Sɛ sran’m be yra be wun sɔ’n, yɛle kɛ, kɛ ndɛ tɔ be afiɛn’n, be tranman ase be kokoman be afiɛn yalɛ.”
Wie liɛ’n, kɛ yasua’m be ko fa antrɛti’n, kpɔkun bla’m be kunndɛ kɛ bé yrá be. Kɛ ɔ yo sɔ’n, ɔ bo yasua’m be nuan. Yasua nin bla’n be kwla tran ɔ cɛ, sanngɛ be kanman be klun ndɛ kleman be wiengu. Wie liɛ kusu’n, sɛ be waan bé kán be klun ndɛ’n, be kɛnmɛn i sa lele i bo’n guaman kpa titi. Be nɲɔn’n be tranman likawlɛ be kokoman yalɛ kpa sa. Ndɛnnganndɛnngan yɛ cɛn kwlaa ɔ o be afiɛn ɔn.
?Wafa sɛ yɛ yasua’n nin bla’n, be kwla siesie be afiɛn ndɛ amanniɛn su ɔ? ?Yɛ wafa sɛ yɛ be kwla koko be afiɛn yalɛ wɛtɛɛ su ɔ? Maan amun si kɛ, nán ajulisu fluwa nga be man aja’n i su afɔtuɛ’n i nun yɛ amún ɲán ajalɛ kpa ɔ. Sanngɛ, lalafuɛ fluwa kun mɔ i nun ndɛ’m be ti kpa dan’n yɛ ɔ kwla uka amun ɔn. Fluwa sɔ’n yɛle Biblu’n.