?Amún kwlá fíte nun?
‘A nin wɔ awlofuɛ mun an wlu mmeli’n nun afin ɔ blɛ sufuɛ’m be kwlakwla be nun’n, wɔ kunngba yɛ n wun kɛ a nin min mantan ɔn.’—BO BOLƐ 7:1.
1. ?Nowe blɛ su’n, fiawlɛ mennin yɛ Zoova mannin sran mun ɔn?
NOWE blɛ su’n, Zoova maan ‘nzue’n tɔli ɔ yili dan kpa naan w’a kun sran tɛtɛ nga be o mɛn nun’n be kwlaa.’ Sanngɛ Zoova dun mmua kleli wafa nga sran’m be kwla fite nun’n. (2 Piɛr 2:5) Yɛle kɛ ɔ seli Nowe m’ɔ ti sran kpa’n kɛ ɔ bobo mmeli kun. Kpɔkun, wafa ng’ɔ fata kɛ Nowe bobo mmeli sɔ’n, ɔ yiyili nun kleli i. (Bo Bolɛ 6:14-16) Nowe kusu’n, ‘ndɛ nga Ɲanmiɛn fa sieli i ɲrun’n, ɔ niannin i kwlaa su yoli.’ Nanwlɛ, ‘ɔ yoli i kwlakwla kpan!’ Afin ɔ lafi Ɲanmiɛn su. Sɛ andɛ e o asiɛ’n su’n, e kwla se kɛ Nowe dunman nun ti ɔ.—Bo Bolɛ 6:22.
2, 3. (a) ?Kɛ Nowe bóbó mmeli’n, i blɛ sufuɛ’m be buli i sɛ? (b) ?Kɛ Nowe wlú mmeli’n nun’n, ngue su yɛ i wla o ɔ?
2 Mmeli’n i bobolɛ’n timan junman kaan. Ɔ maan atrɛkpa’n, kɛ Nowe nin i awlofuɛ’m bé dí i sɔ junman’n, ɔ boli sran sunman be nuan. Sanngɛ b’a lafiman su kɛ saan mmeli nun yɛ bé wlú naan b’a fite nun ɔn. Be yoli lele maan i agualiɛ su’n, Zoova w’a kwlá trɛmɛn i awlɛn be wun kun.—Bo Bolɛ 6:3; 1 Piɛr 3:20.
3 Kɛ Nowe nin i awlofuɛ’m be sɔli mmeli’n i bobolɛ’n su lele mɔ be wieli i bobo’n, Zoova seli Nowe kɛ: ‘A nin wɔ awlofuɛ mun an wlu mmeli’n nun afin ɔ blɛ sufuɛ’m be kwlakwla be nun’n, wɔ kunngba yɛ n wun kɛ a nin min mantan ɔn.’ Zoova su mɔ Nowe lafi’n ti’n, ‘ɔ nin i yi, nin i wa yasua mun, nin i wa’m be yi mun be wluli mmeli’n nun.’ Kpɔkun, Zoova ɲinnin be su anuan. Yɛ anannganman su nzue’n, tɔli ɔ. Sɛ ɔ timan mmeli mɔ Ɲanmiɛn maan be boboli’n ti’n, nn sran’m be kwlaa be wieli wu.—Bo Bolɛ 7:1, 7, 10, 16.
E blɛ liɛ’n ti kɛ Nowe blɛ su’n sa
4, 5. (a) ?Zezi seli kɛ i balɛ blɛ’n, ɔ́ yó kɛ blɛ mennin sa? (b) ?Wafa sɛ yɛ e blɛ liɛ’n ti kɛ Nowe blɛ su’n sa ɔ?
4 ‘Kɛ m mɔ n kacili Sran’n ń wá bá’n, sran’m bé yó kɛ Nowe i blɛ su’n sa.’ (Matie 24:37) Ndɛ sɔ mɔ Zezi kannin’n, ɔ kle kɛ i balɛ blɛ nun’n, é wún sa nga Nowe blɛ sufuɛ’m be yoli’n wie. Kpɔkun ɔ yoli sɔ sakpa. Kɛ nga Nowe boli sa ng’ɔ́ wá jú’n i ndolo sa’n, kɛ ɔ fɛ i afuɛ 1919 nun’n, Ɲanmiɛn i sufuɛ’m be bo ndolo kle nvlenvle mun kɛ sa kun su wa ju. Sanngɛ sran’m be sunman lika be yoli kɛ Nowe blɛ sufuɛ mun sa.
5 Zoova tɔli anannganman su nzue fa nunnunnin sran “tɛtɛ” mun. (Bo Bolɛ 6:13) Nowe nin i awlofuɛ’m be nzuɛn’n nin be junman mɔ be dili’n w’a fiaman sran’m be ɲrun. Yɛle kɛ be kwlaa be wunnin kɛ Nowe nin i awlofuɛ’m be yoman sa tɛtɛ naan mmeli’n yɛ be bobo ɔ. I sɔ kunngba’n yɛ e wun i andɛ ɔ. Yɛle kɛ sran nga be di nanwlɛ’n be ‘wun ngbaciɛ ng’ɔ o sran kpa nin sran ng’ɔ buman Ɲanmiɛn nin i nuan ndɛ’n be like fi’n be afiɛn’n, ɔ nin ngbaciɛ ng’ɔ o sran ng’ɔ su Ɲanmiɛn nin sran ng’ɔ suman Ɲanmiɛn’n be afiɛn’n.’ (Malasi 3:18) Zoova i Lalofuɛ’m be nanwlɛ dilɛ’n, ɔ nin be klun ufue yolɛ’n, ɔ nin be wɛtɛɛ yolɛ nin be juejue yolɛ’n, ɔ yo sran kpa’m be ɲɛnmɛn. Be nzuɛn sɔ’n kle kɛ be yɛ be ti Ɲanmiɛn i sufuɛ’n niɔn, naan be timan kɛ mɛn nunfuɛ’m be sa. Zoova wawɛ’n m’ɔ sie be’n ti’n, be kpalo sa tɛtɛ kwlaa. Kpɔkun be fa sa kpa yolɛ’n cici be ti, yɛ be di alaje.—Ezai 60:17.
6, 7. (a) ?Ngue yɛ Nowe blɛ sufuɛ’m b’a wunmɛn i wlɛ ɔ? ?Yɛ wafa sɛ yɛ e blɛ liɛ nunfuɛ’m be yo sɔ wie ɔ? (b) ?Sa mennin yɛ ɔ kle kɛ sran’m be wun i wlɛ kɛ ngbaciɛ o Zoova i Lalofuɛ mun nin be nga’m be afiɛn ɔn?
6 Nowe blɛ sufuɛ’m b’a wunmɛn i wlɛ kɛ Ɲanmiɛn jin Nowe sin naan Ɲanmiɛn i ndɛ’n su yɛ ɔ nanti ɔ. Ɔ maan kɛ Nowe bó ndolo’n, b’a lafimɛn i su. ?Yɛ e blɛ liɛ’n nun nin? Zoova i Lalofuɛ’m be ayeliɛ’n, ɔ nin jasin fɛ’n mɔ be bo’n, ɔ yo sran kpanngban be ɲɛnmɛn. Sanngɛ be nun sunman be fa Biblu’n nun ndɛ’n yiyi be ɲin su. Wie liɛ’n, be mantanfuɛ mun, annzɛ be junman diwlɛ lɔ be min’n, annzɛ be osufuɛ’m be yi be ayɛ. Sanngɛ be kunngba’n, be waan i tɛ kaan ng’ɔ o lɛ’n yɛle Zoova i Lalofuɛ mɔ be ti’n. Be siman kɛ Zoova wawɛ’n m’ɔ sie i Lalofuɛ mun’n, i ti yɛ be ‘klo Ɲanmiɛn nin sran, be wla gua ase, be yo sran ye, be yo aklunye, be yo wɛtɛɛ, yɛ be yo sa i nuan su’ ɔ. (Galasifuɛ Mun 5:22-25) Sɛ ɔ ti kɛ sran’m be wun sa wlɛ’n, nn Zoova i Lalofuɛ’m be nzuɛn kpa sɔ’n ti’n, bé fá be ndɛ’n su.
7 Amun e fa sa kun e nian. Kɛ Risi lɔ Zoova i Lalofuɛ’m bé kplán be Ɲanmiɛn Sielɛ Blɛ Sua’n, bian kun niannin be lele kpɔkun ɔ seli be nun kun kɛ: “?Sran nga’m be ti be liɛ sɛ? Be nɔnman siklɛti, be kanman ndɛ tɛtɛ, kpɔkun be nun wie fi w’a nɔnman nzan w’a boman!” Yɛ bian’n usali e niaan’n kɛ: “Ɔ kusu a ti Zoova i Lalofuɛ wie?” Aniaan’n tɛli i su kɛ: “?Sɛ n se wɔ kɛ cɛcɛ’n, á fá su?” Yɛ bian’n seli kɛ: “Sɛ a se sɔ’n, n su bumɛn i nanwlɛ.” Risi kunngba’n i klɔ uflɛ kun su’n, wafa nga Zoova i Lalofuɛ’m be boli be Ɲanmiɛn Sielɛ Blɛ Sua’n i kplanlɛ’n i bo lele be fa wieli i kplan’n, ɔ boli bian ng’ɔ ti lɔ mɛli’n i nuan. Ɔ wunnin kɛ be timan luflefuɛ naan be tu be klun be di be junman’n. Ɔ maan, i waan ɔ wun i wlɛ siɛn’n kɛ kannzu Zoova i Lalofuɛ mun nin asɔnun nga’m be timan kun. Sa nɲɔn cɛ yɛ y’a bo be su lɛ. Sa sɔ’m be kle kɛ Zoova i Lalofuɛ’m be timan kɛ be nga be nantiman Biblu’n nun mmla’n su’n sa.
8. ?Ngue yɛ ɔ fata kɛ e yo naan y’a fin mɛn tɛ’n nga nun y’a fite ɔ?
8 Ka naan anannganman su nzue’n w’a tɔ naan w’a nunnun “laa mɛn liɛ’n,” Nowe ‘boli sa nga be yo ɔ ɔ ti su’n i ndolo’ titi. (2 Piɛr 2:5) Andɛ mɛn ng’ɔ su kɔ i bue nuan yɛ’n nun’n, Zoova i Lalofuɛ’m be kusu be bo sa ng’ɔ ti Ɲanmiɛn liɛ’n su’n i ndolo kle sran mun. Kpɔkun like ng’ɔ fata kɛ sran’m be yo naan b’a fite nun’n, be kɛn i ndɛ wie. (2 Piɛr 3:9-13) Mmeli’n nun yɛ Nowe nin i awlofuɛ mɔ be ɲin yi Ɲanmiɛn’n be wluli naan b’a fite nun ɔn. I sɔ kunngba’n, andɛ sran ng’ɔ kunndɛ kɛ ɔ́ fíte nun’n, ɔ fata kɛ ɔ lafi Ɲanmiɛn su yɛ ɔ wlu Ɲanmiɛn i anuannzɛ’n i bue ng’ɔ o asiɛ’n su wa’n i nun naan ɔ ka nun titi.
Saan é láfi Ɲanmiɛn su naan y’a fite nun
9, 10. ?Ngue ti yɛ ɔ ti cinnjin kpa kɛ e lafi Ɲanmiɛn su naan kɛ Satan i mɛn’n tɛ’n wá núnnún’n, y’a fite nun ɔn?
9 ?Satan i mɛn mɔ i nunnunlɛ w’a mantan koko yɛ nun’n, ngue yɛ ɔ fata kɛ sran ng’ɔ kunndɛ kɛ ɔ́ fíte nun’n ɔ yo ɔ? (1 Zan 5:19) Ɔ fata kɛ ɔ wun i wlɛ kɛ ɔ kwlá sɛsɛmɛn i bɔbɔ i ti naan ɔ fata kɛ ɔ ko fia lika nga be kle i’n i nun. Nowe blɛ sufuɛ’m be liɛ’n, like nga be yo i titi’n yɛ ɔ loli be ɔ. B’a wunman kɛ sa kun su wa tɔ naan ɔ fata kɛ be sasa be ti. Nanwlɛ, b’a lafiman Ɲanmiɛn su bɔɔ kaan sa.
10 Sanngɛ Nowe nin i awlofuɛ’m be liɛ’n, be wunnin i wlɛ kɛ sa kun su wa tɔ naan be kwlá deman be bɔbɔ be ti. Asa ekun’n, Ɲanmiɛn Zoova m’ɔ sie nglo nin asiɛ’n, be lafili i su. Akoto Pɔlu seli kɛ: ‘Sɛ be lafiman Zoova su’n, i klun jɔman be wun mlɔnmlɔn. Ɔ maan sran nga i waan ɔ́ fɛ́ i wun mántan Ɲanmiɛn’n, maan ɔ lafi su kɛ ɔ o lɛ, yɛ be nga be kunndɛ i’n, ɔ yi i wun kle be.’ Kpɔkun, ɔ kan guali su kɛ: ‘Ɲanmiɛn su mɔ Nowe lafi’n ti, kɛ ɔ boli like nga be nin a wunmɛn i le’n su kleli i’n, ɔ boboli mmeli kun ɔ fa deli i osufuɛ mun srolɛ m’ɔ sro i’n ti. Kɛ ɔ yoli sɔ’n, ɔ buli mɛnfuɛ’m be fɔ, yɛ ɔ yoli sran kpa i su m’ɔ lafi’n ti.’—Ebre Mun 11:6, 7.
11. ?Wafa nga laa Zoova deli sran mun’n, afɔtuɛ mennin yɛ ɔ man e ɔ?
11 Sɛ e wun i wlɛ kɛ Ɲanmiɛn wá núnnún mɛn tɛ’n nga’n, ɔ ti kpa. Sanngɛ i sɔ mɔ e wun i wlɛ’n, i ngunmin kwlá yoman naan y’a fite nun. Ɔ fata kɛ like kwlaa nga Ɲanmiɛn waan e yo naan y’a fite nun’n, e lafi su e yo. I lɛ nun’n, ɔ fata kɛ e lafi e ti kpɔlɛ tɛ nga Ɲanmiɛn i Wa Zezi Klist yili’n su. (Zan 3:16, 36) Maan ɔ kpɛn e klun titi kɛ Nowe blɛ su’n, be nga be nin Nowe be wluli mmeli nun’n be ngunmin cɛ yɛ be fiteli nun ɔn. Izraɛlifuɛ’m be blɛ su kusu’n, Ɲanmiɛn kleli fiawlɛ klɔ mun naan sran nga sanvuɛsa ɲɛn i naan ɔ kun sran’n, ɔ wanndi ko fia lɔ lele saan Ɲanmiɛn ɲrun jranfuɛ’m be su kpɛn’n w’a wu. (Kalɛ 35:11-32) Moizi blɛ su’n, Ɲanmiɛn fali ɲrɛnnɛn guali Ezipti mɛn’n su. Ɲrɛnnɛn’n i blu su’n, ɔ kunnin Eziptifuɛ’m be wa klikli mun. Sanngɛ Izraɛlifuɛ’m be mma liɛ’m be fiteli nun. ?Ngue ti ɔ? Afin ka naan i sɔ ɲrɛnnɛn’n w’a tɔ’n, Zoova kleli Moizi like ng’ɔ fata kɛ be yo’n. Ɔ seli i kɛ: ‘Maan Izraɛlifuɛ’m be sɔ Delɛ-cɛn nnɛn’n mmoja’n wie naan be fa klikli sua kwlaa nga be di nnɛn sɔ’n nun’n i anuan’n i kadri’n i fama su nin i bɛ su, ɔ nin i ti su nglo. Kɛ ɔ fɛ i blɛ sɔ nun’n lele mɔ aliɛ’n fá cɛ́n’n, nán sran fi fite gua’n su kun.’ (Ezipt Lɔ Tulɛ 12:7, 22) ?I sɔ ndɛ mɔ Ɲanmiɛn kannin’n, sɛ Izraɛlifuɛ’m be awlobo kun nanti su’n, i nunfuɛ mennin yɛ ɔ́ sé kɛ ɔ́ fíte gua su lɔ ɔ?
12. ?Kosan mennin yɛ ɔ fata kɛ e tinuntinun e fa usa e wun ɔn? ?Yɛ ngue ti ɔ?
12 ?Like kwlaa nga Zoova waan e yo naan i sulɛ’n nun w’a sasa e’n, yɛ e yo ɔ? Ɔ fata kɛ e tinuntinun e bu i angunndan kpa. Afin kɛ ɲrɛnnɛn dan’n wá tɔ́’n, be nga be miannin be ɲin be yoli sɔ’n be klun m’ɔ́ jɔ́ dan’n ti’n, be ɲinmuɛn’n gúa. Be nga be nunman nun’n, be ɲinmuɛn’n ɔ́ gúa wie. Sanngɛ be liɛ’n, awlabɔɛ’n nin nsisɔ’n ti yɛ ɔ́ gúa ɔ.
Anuannzɛ’n i nun ajalɛ’m be tinngɛlɛ’n sasa e
13. (a) ?Ngue ti yɛ be tinngɛli anuannzɛ’n i nun ajalɛ mun ɔn? (b) Amun kan ajalɛ mɔ be tinngɛli be’n, be nun wie’m be ndɛ.
13 Zoova tinngɛli i anuannzɛ’n i bue ng’ɔ o asiɛ’n su wa’n i nun ajalɛ mun blɛblɛblɛ. I sɔ’n yoli maan sɛ Ɲanmiɛn sulɛ’n m’ɔ sasa e’n ɔ ti sua’n, nn é sé kɛ sua’n yoli klanman, ɔ takali kpa. Kɛ ɔ fɛ i afuɛ 1870 nun lele m’ɔ́ fá jú afuɛ 1932 nun’n, asɔnunfuɛ’m be yoli vote naan b’a sie asɔnun kpɛnngbɛn nin asɔnunfuɛ’m be lika nianfuɛ mun. Sanngɛ afuɛ 1932 nun’n, annuanzɛ’n tinngɛli i sɔ yolɛ’n. Yɛle kɛ, anuannzɛ’n bɔbɔ sieli asɔnun kpɛnngbɛn kun (directeur de service). Kpɔkun asɔnunfuɛ’m be yo vote be sie asɔnun kpɛnngbɛn akpasua kun (comité de service) naan ɔ uka kpɛnngbɛn sɔ mɔ anuannzɛ’n sieli i asɔnun’n nun’n. Sanngɛ afuɛ 1938 nun’n, be yacili vote’n yolɛ. Siɛn’n, sran kwlaa nga bé síe i asɔnun’n nun’n, be nian Biblu’n nun mmla’m be su yɛ be sie i ɔ. Kpɔkun kɛ ɔ fɛ i afuɛ 1972 nun’n, be nga be bo be dunman kpa asɔnun nun’n, e ɲrun dinfuɛ’m be anuannzɛ’n ɔ nian nun maan be sie be asɔnun kpɛnngbɛn annzɛ asɔnunfuɛ be lika nianfuɛ. I sin’n, be klɛ i su fluwa ko man asɔnun’n. Kɛ ɔ́ kɔ́ i ɲrun mɔ e ɲrun dinfuɛ’m be anuannzɛ’n i su junman’n yó dan’n, be fali ajalɛ wie mun naan junman’n w’a tinmɛn i su.
14. ?Junman dilɛ’n i ti suklu mennin yɛ be kpɛli i ba afuɛ 1959 nun ɔn?
14 Afuɛ 1950 nun’n, kɛ anuannzɛ’n boli i ɲin ase niannin Jue Mun 45:17 nun’n, ɔ wunnin i wlɛ kɛ ɔ fata kɛ be kle aniaan’m be junman wie’m be dilɛ. Biblu’n nun ndɛ mma sɔ’n waan: “Famiɛn, ɔ mma yasua’m bé wá sín ɔ si’m be osu. Á síe be mɛn wunmuan’n i su kpɛnngbɛn.” I sɔ’n ti’n, junman nga Ɲanmiɛn fa mannin asɔnun kpɛnngbɛn mun’n, be kle be i dilɛ naan b’a kwla di i kpa ikisa, kpɔkun kɛ Armagedɔn ko sin’n, naan b’a kwla di i ekun. (Sa Nglo Yilɛ 16:14, 16) Ɔ maan afuɛ 1959 nun’n, be kpɛli suklu nga be flɛ i École du Ministère du Royaume i ba. Blɛ sɔ nun’n, asɔnun sunianfuɛ’m be lika siesiefuɛ’m be ngunmin yɛ be di suklu sɔ’n niɔn. Be di i lele anglo kun. Sanngɛ siɛn’n, asɔnun kpɛnngbɛn’m be kwlaa, ɔ nin asɔnunfuɛ’m be lika nianfuɛ’m be di suklu sɔ’n wie. Kpɔkun kɛ be sa be sin be asɔnun’m be nun’n, be fa like nga be kle be suklu’n i bo lɔ’n be kle aniaan mun be tinuntinun. Ɔ maan ukalɛ ng’ɔ fata kɛ sran kun ɲɛn i naan w’a su Ɲanmiɛn naan w’a bo Ɲanmiɛn Sielɛ Blɛ jasin fɛ’n i kpa ekun’n, ɔ ɲɛn i sɔ ukalɛ’n.—Mark 13:10.
15. ?Asɔnun’n i sasalɛ ajalɛ nɲɔn mennin yɛ Klistfuɛ’m be fali ɔ?
15 Sran kun kwlá jasoman sa ɔ seman kɛ ɔ ti Klistfuɛ. Saan ɔ́ nánti mmla wie’m be su. Nowe blɛ su’n, be nga be srili i’n, b’a manman be atin kɛ be wlu mmeli’n nun wie. I sɔ kunngba’n, be mɔ e blɛ liɛ’n nun be yo sɔ wie’n be leman atin be tranman Klistfuɛ’m be nun. (2 Piɛr 3:3-7) Kɛ ɔ fɛ i afuɛ 1952 nun’n, Zoova i Lalofuɛ’m be wunnin i wlɛ kpa kɛ ɔ fata kɛ be nian asɔnun’n su kpa naan w’a saciman. Kɛ ɔ fin lɛ’n, sa tɛ yofuɛ nga be kaciman’n, be tu be asɔnun’n nun. Sanngɛ be nga be kaci be nzuɛn’n, be uka be klolɛ su naan b’a ‘kpɛ atin nga be sin nun’n kpa.’—Ebre Mun 12:12, 13; Nyanndra Mun 28:13; Galasifuɛ Mun 6:1.
16. ?Ɲanmiɛn sulɛ nun’n, wafa sɛ yɛ Zoova i nvle nunfuɛ’m be ti ɔ?
16 Wafa nga Zoova i nvle’n yo kpa Ɲanmiɛn i sulɛ nun’n, ɔ timan like m’ɔ yoli sa ngbɛn ɔn. Zoova sinnin i nuan ijɔfuɛ Ezai lika seli kɛ: ‘Amun nian, min sufuɛ’m bé ɲán like bé dí, sanngɛ amun liɛ’n, awe kún amun. Amun nian, min sufuɛ’m bé ɲán nzue bé nɔ́n, sanngɛ amun liɛ’n, nzuewe kún amun. Amun nian, min sufuɛ’m be wun kpája be, sanngɛ amun liɛ’n, amun ɲin ɔ́ gúa ase. Be klun jɔ́ lele trátrá su, i ti bé bó sro, sanngɛ amun liɛ’n, ɲrɛnnɛn m’ɔ́ wá tɔ́ amun su’n ti amún kplín. Yɛ awlabɔɛ m’ɔ́ kún amun kpo’n ti, amún fɛ́fɛ́.’ (Ezai 65:13, 14) Nanwlɛ, Zoova man e aliɛ kpanngban kpa blɛ ng’ɔ ti i nuan su’n i su naan y’a yo juejue y’a su i kpa.—Matie 24:45.
Maan e buabua e wun
17. ?Ngue yɛ ɔ kwla uka e naan y’a buabua e wun naan y’a fite nun ɔn?
17 Blɛ nga e o nun yɛ’n ti’n, ‘maan e bu e wiengu’m be angunndan e wla be fanngan naan be klo be wun yɛ be yo sran ye. Nán maan e yaci yialɛ’n kɛ sran wie’m be yo’n sa. Sanngɛ maan e yia e tu e wun fɔ.’ Maan e yo sɔ tra su. (Ebre Mun 10:23-25) Mɛn wunmuan nun’n, e asɔnun’m be ju 98.000 tra su. Maan e wɔ aɲia’m be bo titi. Sɛ é kwlá sé’n, maan e nin asɔnun’n e yo sran wunmuan naan e di junman kpa. I sɔ’n úka e naan y’a buabua e wun. Kpɔkun e niaan’m bé súan e bo naan y’a ‘fa nzuɛn uflɛ m’ɔ fa Ɲanmiɛn liɛ’n.’ Yɛ é tú e klun é úka e wiengu mun naan b’a si Zoova naan be kusu b’a fite nun.—Efɛzfuɛ Mun 4:22-24; Kolɔsfuɛ Mun 3:9, 10; 1 Timote 4:16.
18. ?Ngue ti yɛ amun kunndɛ kɛ saan amún ká asɔnun’n nun titi ɔ?
18 Mmusu’m be si Satan kunndɛ kɛ ɔ́ láka e naan e wanndi asɔnun’n. Sanngɛ, e kwla ka asɔnun’n nun titi naan kɛ mɛn tɛ kain nga wá wíe’n, y’a fite nun. I sɔ’n ti’n, maan klolɛ mɔ e klo Zoova’n, ɔ nin ninnge ng’ɔ fa man e klolɛ su mɔ e si su ye’n ti’n, e jran kekle kpa Satan ɲrun. Sɛ e bu ninnge nga ti yɛ Klistfuɛ mɔ e ti’n ti e ɲrun ba ɲan’n be su angunndan’n, é ɲán wunmiɛn é jrán kekle titi. Like suanlɛ ng’ɔ́ bá lɔ nun’n, é wá kán ninnge sɔ wie’m be ndɛ.
?Wafa sɛ yɛ amún tɛ́ su ɔ?
• ?Ngue yɛ ɔ kle kɛ e blɛ liɛ’n ti kɛ Nowe blɛ su’n sa ɔ?
• ?Nzuɛn mennin yɛ ɔ kwla uka e naan y’a fite nun ɔn?
• ?E sasalɛ’n ti’n, anuannzɛ’n i nun ajalɛ mennin yɛ Zoova tinngɛli be ɔ?
• ?Wafa sɛ yɛ e kwla buabua e wun ɔn?
[Foto, bue 8]
Nowe blɛ sufuɛ’m be yoli ndolo ng’ɔ boli’n i finfin.
[Foto, bue 9]
Kɛ be fa Ɲanmiɛn ndɛ’n su’n, be ɲan su mmlusuɛ.
[Foto, bue 10]
?Ngue ti yɛ be kpɛli suklu nga be flɛ École du Ministère du Royaume i ba ɔ?
[Foto, bue 11]
Dɔ nga su’n, ɔ fata kɛ e ka asɔnun’n nun titi.