‘Like kwlaa ng’ɔ mian amun’n, an kan kle Ɲanmiɛn’
‘Nán amun koko sa fi su, sanngɛ sa’n kwlaa nun nin like kwlaa ng’ɔ mian amun’n, an kan kle Ɲanmiɛn, an srɛ i, an jran su kpa, yɛ an lɛ i ase.’—FILIPFUƐ MUN 4:6.
1. ?Wan yɛ e nin i kwla koko yalɛ m’ɔ ti e cenjele like ɔ? ?Yɛ ngue ti yɛ i sɔ liɛ’n ti abonuan ɔn?
?SƐ AMUN kunndɛ kɛ amún wún sran ng’ɔ sie amun nvle’n i wun’n, ɔ́ yó ye yɛ ɔ o lɛ? Kɛ e niɛn i kpa sa’n, nanwlɛ, ɔ́ yó kekle. Sɛ bɔbɔ i sran’m be sɔ amun nun wɛtɛɛ su’n, nɛ́n i sɔ’n ti yɛ be man amun atin ɔn. Zoova liɛ’n, ɔ timan sɔ. I yɛ ɔ sie nglo nin asiɛ’n niɔn. Sanngɛ, ɔ leman lika kun, annzɛ blɛ wie nun mɔ sɛ e waan é srɛ́ i’n, ɔ su timan ɔn. Sɛ e srɛ Ɲanmiɛn naan ɔ ti i liɛ’n su’n, saan ɔ́ síe i su i bo. Nanwlɛ, i sɔ’n ti abonuan. ?Nɛ́n i ɔ? ?Yɛ i sɔ’n yoman e fɛ? ?Sɛ ɔ yo e fɛ’n niɔn, e su srɛmɛn i titi? Afin Biblu’n waan ‘sɛ be srɛ i ɔ, ɔ ti.’—Jue Mun 65:3.
2. ?Ngue yɛ ɔ fata kɛ e yo naan Ɲanmiɛn w’a ti e srɛlɛ’n niɔn?
2 Sanngɛ sran wie’m be kwla usa kɛ: ‘?Srɛlɛ’n i wafa mennin yɛ Ɲanmiɛn sie i su i bo ɔ?’ Biblu’n kle like kun m’ɔ fata kɛ e yo naan Ɲanmiɛn w’a ti e srɛlɛ’n. I waan: ‘Sɛ be lafimɛn i su’n, i klun jɔman be wun mlɔnmlɔn. Ɔ maan sran nga i waan ɔ́ fɛ́ i wun mántan Ɲanmiɛn’n, maan ɔ lafi su kɛ ɔ o lɛ, yɛ be nga be kunndɛ i’n, ɔ́ yí i wun klé be.’ (Ebre Mun 11:6) Ndɛ yɛ’n, ɔ ti weiin. Like suanlɛ ng’ɔ sinnin’n nun’n, e wunnin kɛ sran nga i waan ɔ́ fɛ́ i wun mántan Ɲanmiɛn’n, ɔ fata kɛ ɔ lafi i su. Afin, sran ng’ɔ lafi Ɲanmiɛn su’n, m’ɔ ti nanwlɛdifuɛ’n, mɔ i angunndan’n ti kpa’n, Ɲanmiɛn fɛ i su sie i i srɛlɛ’n i bo.
3. (a) ?Kɛ nga laa Ɲanmiɛn i sufuɛ’m be fa srɛli Ɲanmiɛn’n sa’n, ndɛ mennin yɛ e kwla fa wla e srɛlɛ’n nun ɔn? (b) ?Ɲanmiɛn srɛlɛ wafa mɛnnin yɛ amun kwla bo su ɔ?
3 Akoto Pɔlu seli i wiengu Klistfuɛ’m be kɛ: ‘Nán amun koko sa fi su, sanngɛ sa’n kwlaa nun nin like kwlaa ng’ɔ mian amun’n, an kan kle Ɲanmiɛn, an srɛ i, an jran su kpa, yɛ an lɛ i ase.’ (Filipfuɛ Mun 4:6, 7) Biblu’n nun’n, sran nga be fali be ndɛ mun wlali Ɲanmiɛn sa nun’n, be diman be yalɛ. Ɔ fata kɛ e nian be liɛ’n su. Be nun wie yɛle Ani, ɔ nin Elize, ɔ nin Ezekiɛli nin Daniɛli. (1 Samiɛl 2:1-10; 1 Famiɛn Mun 18:36, 37; 2 Famiɛn Mun 19:15-19; Daniɛl 9:3-21) Like kun ekun nga e kwla sie i nzɔliɛ ndɛ nga Pɔlu kannin’n nun’n yɛle kɛ, Ɲanmiɛn srɛlɛ’n i wafa’n sɔnnin. I waan e kwla srɛ Ɲanmiɛn e lɛ i ase, ye m’ɔ yo e’n ti. Kɛ é lá Ɲanmiɛn i ase sɔ’n, e kwla mɛnmɛn i wie. Ɔ seli ekun kɛ, e srɛ Ɲanmiɛn e jran su kpa. Sanngɛ e yo i sɔ liɛ’n ɔ nin wun ase kanlɛ. Kpɔkun Pɔlu kan guali su kɛ like kwlaa ng’ɔ mian e’n, e kan kle Ɲanmiɛn. (Lik 11:2, 3) Nanwlɛ, Ɲanmiɛn srɛlɛ wafa kwlaa sɔ’n, be jɔ i klun yɛ ɔ fɛ i su sie i be bo.
4. ?Kannzɛ bɔbɔ Ɲanmiɛn si like ng’ɔ mian e sa’n, sanngɛ ngue ti yɛ ɔ fata kɛ e bo su e kle i ɔ?
4 Sran wie’m be kwla se kɛ: ‘?Ɲanmiɛn bɔbɔ siman like ng’ɔ mian e sa’n?’ (Matie 6:8, 32) ?Yɛ ngue ti yɛ i waan e srɛ i ekun ɔn? Amun e fa sunnzun ase kun naan y’a wun i wlɛ. Bian kun le i aata diwlɛ. Kpɔkun sran nga be bɛ i ninnge’m be tolɛ’n, ɔ cɛ be nun wie’m be like. Sanngɛ sran ng’ɔ ko wun bian’n i wun’n, yɛ ɔ ɲan cɛlɛ like’n niɔn. ?Yɛ sɛ sran’n waan ɔ wunman bian’n i wun’n nin? I sɔ’n kle kɛ cɛlɛ like sɔ’n timɛn i nnana. I kunngba’n yɛle Ɲanmiɛn srɛlɛ’n. Sɛ like nga Ɲanmiɛn fa man e’n, ɔ timan sran kun i cinnjin’n, ɔ su srɛman Ɲanmiɛn. Zezi seli kɛ: ‘An srɛ, amún ɲɛ́n i.’ (Zan 16:24) Ɔ maan sran ng’ɔ srɛ Ɲanmiɛn’n, ɔ yi i nglo kɛ ɔ lafi i su.
?Wafa sɛ yɛ ɔ fata kɛ be srɛ Ɲanmiɛn ɔn?
5. ?Ngue ti yɛ Zezi dunman nun yɛ ɔ fata kɛ e srɛ Ɲanmiɛn ɔn?
5 Zoova w’a kpɛman i srɛlɛ’n i wun mmla sa tɛɛn. Sanngɛ Biblu’n kle wafa ng’ɔ fata kɛ e srɛ i’n. Zezi seli i sɔnnzɔnfuɛ’m be kɛ: ‘Like kwlaa nga an srɛ n Si min dunman nun’n, ɔ́ fá mán amun.’ (Zan 16:23) Ɔ maan sɛ é srɛ́ Ɲanmiɛn’n, ɔ fata kɛ e srɛ i Zezi dunman nun. Afin i kunngba cɛ i dunman nun yɛ Ɲanmiɛn wá yrá sran’m be su ɔ.
6. ?Kɛ é srɛ́ Ɲanmiɛn wafa sɛ yɛ ɔ fata kɛ e jran, annzɛ e tran ɔn?
6 ?Sanngɛ é jrán wafa sɛ, annzɛ é trán wafa sɛ naan y’a srɛ Ɲanmiɛn? Biblu’n w’a yiyimɛn i sɔ liɛ’n nun. (1 Famiɛn Mun 8:22; Neemi 8:6; Mark 11:25; Lik 22:41) Sanngɛ sran ng’ɔ ti nanwlɛdifuɛ’n, mɔ i angunndan’n ti kpa’n, Ɲanmiɛn fɛ i su sie i i srɛlɛ’n bo.—Zoɛl 2:12, 13.
7. ?Ngue ti yɛ kɛ e wie srɛ’n, e guɛ i bo kɛ “maan ɔ yo sɔ” ɔ?
7 ?Kɛ e wie Ɲanmiɛn srɛ’n, ngue ti yɛ e se kɛ “maan ɔ yo sɔ” ɔ? Ɲanmiɛn Ndɛ’n kle kɛ sɛ be srɛ Ɲanmiɛn nzra nun’n, ɔ nin i fata kɛ e guɛ i bo kɛ “maan ɔ yo sɔ.” (Jue Mun 72:19; 89:53) McClintock nin Strong be fluwa Cyclopedia nun’n, be waan kɛ e wie srɛ mɔ e guɛ i bo kɛ “maan ɔ yo sɔ’n,” i sɔ’n kle kɛ “e jran ndɛ nga e kannin’n su, kpɔkun e srɛ Ɲanmiɛn kɛ ɔ yo sɔ sakpa.” Ɔ maan, kɛ sran kun wie Ɲanmiɛn srɛ m’ɔ se kɛ “maan ɔ yo sɔ’n,” ɔ kle kɛ ndɛ ng’ɔ kannin’n ɔ ti i bɔbɔ i klun su. Sɛ kusu asɔnun lɔ yɛ sran’n srɛ’n, kɛ ɔ guɛ i bo kɛ “maan ɔ yo sɔ’n,” be nga be tili i srɛlɛ’n be kwla tɛ su sɔ wie. Sɛ be klun lɔ yɛ be tɛ su’n annzɛ be tɛ su kekle’n, be kle kɛ srɛlɛ sɔ’n ti be kwlaa be klun su.—1 Korɛntfuɛ Mun 14:16.
8. ?Wafa sɛ yɛ e kwla srɛ Ɲanmiɛn kɛ nga Zakɔbu nin Abraamu be srɛli i’n sa ɔ? ?I sɔ srɛlɛ mɔ e srɛ’n, ɔ kle sɛ?
8 Wafa nga sran kun i ndɛ’n lo i’n, yɛ ɔ fa srɛ Ɲanmiɛn ɔn. Wie liɛ’n, Ɲanmiɛn man e atin kɛ e yi i sɔ liɛ’n i nglo. ?Amun wun wafa nga Zakɔbu nin anzi kun be srali su naan anzi’n w’a yrɛ i nguan’n? I sɔ yɛ wie liɛ’n, ɔ fata kɛ e srɛ ɔ. (Bo Bolɛ 32:24-26) ?Abraamu kusu’n, i nun mɔ Ɲanmiɛn seli kɛ ɔ́ núnnún Sodɔmu klɔ’n, Lɔtu nin sran kpa nga be tran lɔ’n be angunndan m’ɔ bu’n ti’n, amun wun wafa ng’ɔ srɛli Ɲanmiɛn’n? Ɔ srɛli Ɲanmiɛn mannin be lele. I sɔ yɛ ɔ ju cɛn wie’n, ɔ fata kɛ e yo ɔ. (Bo Bolɛ 18:22-33) Ɔ maan sɛ like wie mian e sa kpa’n, kɛ mɔ e si kɛ Zoova yo sa’n i nuan su’n, naan i klun ti ufue’n kpɔkun ɔ si aunnvuɛ’n ti’n, e kwla jran i sɔ’n su e srɛ i. Nanwlɛ, e kwla srɛ Ɲanmiɛn kɛ nga Zakɔbu nin Abraamu be srɛli i’n sa.
Like nga e kwla fa wla e srɛlɛ’n nun’n
9. ?Kɛ é srɛ́ Ɲanmiɛn’n, ngue yɛ ɔ fata kɛ ɔ yo e cinnjin kpa ɔ?
9 Nán e wla fi ndɛ nga Pɔlu kannin’n su. Ɔ seli kɛ: ‘Sa’n kwlaa nun nin like kwlaa ng’ɔ mian amun’n, an kan kle Ɲanmiɛn.’ (Filipfuɛ Mun 4:6) Ɔ maan, ɔ leman sa kun mɔ e kwlá kan kleman Ɲanmiɛn ɔn. Sanngɛ like ng’ɔ fata kɛ ɔ yo e cinnjin kpa’n, yɛle Zoova bɔbɔ i ninnge liɛ mun. I sɔ yɛ Daniɛli yoli i ɔ. I nun mɔ Izraɛlifuɛ’m be yoli sa tɛ’n mɔ bé wún i su afɛ’n, Daniɛli srɛli Zoova kɛ ɔ si be aunnvuɛ. Ɔ seli kɛ: ‘Min Ɲanmiɛn, nian ɔ bɔbɔ ɔ ti naan bla.’ (Daniɛl 9:15-19) Zoova yɛ ɔ fata kɛ sran’m be si kɛ i yɛ ɔ ti Ɲanmiɛn naan i klun sa’n yɛ ɔ́ kpɛ́n su ɔ. ?Kɛ é srɛ́’n, e kle kɛ i sɔ ndɛ’m be lo e kpa?
10. ?Ngue yɛ ɔ kle kɛ e kwla srɛ e bɔbɔ e like liɛ’m be ti wie ɔ?
10 E bɔbɔ e like liɛ’m be ti’n, e kwla srɛ Ɲanmiɛn wie. I wie yɛle kɛ, e kwla srɛ Ɲanmiɛn kɛ ɔ tike e ɲin naan e wun i ndɛ m’ɔ ti kploun i wlɛ. I sɔ yɛ jue tofuɛ’n yoli ɔ. Ɔ seli kɛ: ‘Man min ngwlɛlɛ maan n fa ɔ mmla’n su yɛ n tu n klun n fa su.’ (Jue Mun 119:33, 34; Kolɔsfuɛ Mun 1:9, 10) Zezi kusu’n, ɔ ‘srɛli Ɲanmiɛn m’ɔ kwla de i wie’n nun’n kɛ ɔ niɛn i su, ɔ jrannin su kpa.’ (Ebre Mun 5:7) I sɔ m’ɔ yoli’n, ɔ kle like kun ekun mɔ i ti yɛ e kwla srɛ Ɲanmiɛn’n. Yɛle kɛ, sɛ sa tɔ e su’n, annzɛ e jran wie’n nuan’n, e kwla srɛ Ɲanmiɛn kɛ ɔ de e. Asa ekun’n, kɛ Zezi klé wafa ng’ɔ fata kɛ i sɔnnzɔnfuɛ’m be srɛ’n, ɔ seli kɛ e kwla srɛ Ɲanmiɛn kɛ ɔ yaci e sa tɛ mun cɛ e, yɛ ɔ man e cɛn kun aliɛ ng’ɔ ju e’n.
11. ?Kɛ e srɛ Ɲanmiɛn kɛ nán Lakafuɛ’n laka e’n, wafa sɛ yɛ i sɔ’n uka e ɔ?
11 Ɲanmiɛn srɛlɛ nga Zezi kleli i sɔnnzɔnfuɛ mun’n i nun’n, ɔ seli kɛ: ‘Nán yaci e lɛ maan Lakafuɛ’n laka e, sanngɛ de e i sa nun.’ (Matie 6:9-13) I sin’n, ɔ seli kɛ: ‘Maan amun ɲin tran su, yɛ amun srɛ Ɲanmiɛn naan Lakafuɛ’n w’a lakaman amun.’ (Matie 26:41) Nanwlɛ, sɛ Lakafuɛ’n laka e naan y’a srɛman Ɲanmiɛn’n, e su fiteman nun. Lakalɛ’n kwla yo suklu lɔ, annzɛ e junman diwlɛ lɔ. Yɛle kɛ, e si Ɲanmiɛn Ndɛ’n sanngɛ angunndan tɛ kwla ba e ti nun. Afin sran wie mɔ be timan Zoova i Lalofuɛ’n, be kwla flɛ e kɛ e nin be e yo sa wie mɔ e si kɛ ɔ nin Klistfuɛ fataman’n. Annzɛ kusu’n, ɔ kwla yo sa tɛ kun sa trele yɛ be waan e yo ɔ. I lɛ’n nun’n, maan e fa Zezi i afɔtuɛ’n su. Yɛle kɛ maan e srɛ Ɲanmiɛn naan Lakafuɛ’n w’a lakaman e. Sɛ kusu sa tɛ’n sa e anuan’n nun lɛ’n, ɔ fata kɛ e srɛ Ɲanmiɛn naan y’a tɔman nun.
12. ?Ngokɔɛ mennin ti yɛ e kwla srɛ Ɲanmiɛn ɔn? ?Yɛ Zoova sɔ e srɛlɛ sɔ’n nun sɛ?
12 Andɛ sa yalɛ mɔ i ti’n Ɲanmiɛn i sufuɛ’m be koko’n, be dimɛn i yalɛ. Tukpaciɛ nin awlabɔɛ’n liɛ’n, be kanman. Nzaje sa mɔ sran’m be yo’n ti’n, lika’n i nun tranlɛ’n w’a yo kekle. Sika’n kusu be ɲɛnmɛn i. Sanngɛ kɛ e si kɛ e kwla kan sa kwlaa sɔ’m be ndɛ e kle Zoova ti’n, e wla gua ase! Afin Jue Mun 102:18 seli kɛ: ‘Ɔ́ síe i su be nga afɛ o be su’n be srɛlɛ’n i bo. Be srɛlɛ sɔ’n yomɛn i tɛ.’
13. (a) ?E su sa mennin yɛ e kwla kan kle Zoova ɔ? (b) Amun fa sran kun i su ndɛ be yiyi nun.
13 Ɔ leman like kun mɔ e kwlá kan kleman Zoova ɔ. E kwla kan i junman mɔ e di’n, ɔ nin wafa nga e nin i e afiɛn’n fa ti’n, be ndɛ e kle i. (1 Zan 5:14) Sɛ kusu bian annzɛ bla yɛ e kunndɛ kɛ é já’n, annzɛ junman yɛ e kunndɛ’n, maan e kan kle Zoova naan ɔ fa e sie atin kpa’n su. Sɛ kusu jasin fɛ’n bolɛ’n yɛ e waan é bó i dan’n, maan e bo su e kle i. Blɔfuɛ’m be lɔ nvle nga be flɛ i Filipini lɔ’n, e niaan bla kun kunndɛ kɛ ɔ́ dí junman naan i liɛ’n, ɔ́ yó atin bofuɛ. Sanngɛ, ɔ ɲanman junman. Ɔ seli kɛ: “Fue cɛn kun’n, n srɛli Zoova. N kannin atin bofuɛ junman mɔ min waan ń dí’n i ndɛ n kleli i naan m’an ɔ jasin fɛ’n bolɛ. N ɔli ɔ, n ko toli talua kun naan m’an fa e Biblu’n i akua’n kun m’an mɛn i. I liɛ m’ɔ́ kán klé min’n yɛ: ‘Kisie nglɛmun kɛ a jaso cɛ’n, kɔ min suklu lɔ.’ N usɛli i kɛ: ‘?Ndɛ kan wie o lɛ ti ɔ?’ Ɔ seli min kɛ be sa w’a mian junman difuɛ kun i wun kpa be suklu lɔ. Kɛ n ɔli kusu’n, be kali lɛ be fali min junman’n nun. Nanwlɛ, i sɔ’n boli min nuan.” Sa kɛ ngalɛ’n sa’n, be diman be yalɛ Zoova i Lalofuɛ’m be afiɛn. Ɔ maan like kwlaa ng’ɔ mian e sa’n, maan e kan kle Zoova, nán e sisi e bo!
?Yɛ sɛ e yoli sa tɛ’n nin?
14, 15. (a) ?Sɛ sran kun yoli sa tɛ’n, ngue ti yɛ ɔ fataman kɛ ɔ se kɛ ɔ srɛman Ɲanmiɛn ɔn? (b) ?Wan ekun yɛ ɔ kwla srɛ man sran ng’ɔ yoli sa tɛ’n naan ɔ nin Ɲanmiɛn be afiɛn’n w’a sɛ ɔ?
14 ?Sɛ e yoli sa tɛ’n, ngue ti yɛ ɔ fata kɛ e srɛ Ɲanmiɛn ɔn? Kɛ sran wie’m be yo sa tɛ’n, ɲannzuɛn m’ɔ kun be’n ti’n, be srɛman Zoova. Nanwlɛ, i sɔ’n timan ngwlɛlɛ ayeliɛ mlɔnmlɔn. Amun e fa sunnzun ase kun. Sran nɲɔn b’a ɔ koniɛn kpɔkun kun w’a mlin. ?I lɛ’n nun’n, sran m’ɔ mlinnin’n, ɔ́ sé kɛ ɲannzuɛn kun i ti naan ɔ su kpanman naan i janvuɛ’n w’a kle i atin’n? Sɛ ɔ yo sɔ’n, ɔ́ mlín mlɔnmlɔn! I sɔ kunngba’n, sɛ sran kun yo sa tɛ naan i waan ɲannzuɛn kun i ti naan ɔ srɛman Ɲanmiɛn’n, ɔ kwla mlin wie mlɔnmlɔn. Nán maan e yo sɔ. I kpa bɔbɔ’n, Ɲanmiɛn se be nga be yoli sa tɛ’n kɛ be srɛ i. Ɲanmiɛn nuan ijɔfuɛ Ezai seli be nga be yoli sa tɛ’n kɛ be ‘bla e Ɲanmiɛn m’ɔ yaci sran’m be wun sa cɛ be weiin’n i sin.’ (Ezai 55:6, 7) Sanngɛ sɛ sran kun kunndɛ kɛ ɔ́ ‘kpáta Ɲanmiɛn naan i ya’n gua ase’n,’ ɔ fata kɛ i bɔbɔ’n, ɔ bu i wun fɔ, yɛ ɔ tu i klun kaci i nzuɛn.—Jue Mun 119:58; Daniɛl 9:13.
15 Kɛ sran kun yo sa tɛ’n, like kun ekun o lɛ mɔ i ti yɛ srɛlɛ’n ti cinnjin ɔn. Zezi i sɔnnzɔnfuɛ Zaki kannin sran ng’ɔ yo sa tɛ’n m’ɔ fata kɛ be ukɛ i’n i ndɛ. I waan: ‘Maan ɔ flɛ asɔnun kpɛnngbɛn mun. Yɛ be srɛ Ɲanmiɛn kɛ ɔ yo i juejue. Ɲanmiɛn srɛlɛ sɔ’n maan tukpacifuɛ sɔ’n ɲɛ́n i ti.’ (Zak 5:14, 15) Ɔ maan, ɔ fata kɛ sran bɔbɔ’n di i sa tɛ i nanwlɛ kle Zoova. Sanngɛ ɔ kwla se asɔnun kpɛnngbɛn mun kɛ be srɛ Ɲanmiɛn mɛn i. I liɛ’n, ɔ nin Ɲanmiɛn be afiɛn’n ɔ́ sɛ́ ekun.
E Ɲanmiɛn srɛlɛ’n i su tɛlɛ
16, 17. (a) ?Wafa sɛ yɛ Zoova tɛ e srɛlɛ’n su ɔ? (b) ?Jasin fɛ’n bolɛ’n i nun ndɛ mennin yɛ ɔ kle kɛ Ɲanmiɛn tɛ sran’m be srɛlɛ’n su ɔ?
16 ?Wafa sɛ yɛ Ɲanmiɛn tɛ e srɛlɛ’n su ɔ? Wie liɛ’n, ɔ cɛman naan w’a tɛ su. Kpɔkun kɛ ɔ tɛ su’n, e wun i wlɛ weiin. (2 Famiɛn Mun 20:1-6) Wie liɛ kusu’n, ɔ cɛ. Sɛ e wunman sa wlɛ’n, e su wunman kɛ w’a tɛ su. Zezi buli ɲanndra kun kɛ angbeti bla kun fɛli i ndɛ’n ɔli jɔlɛ difuɛ kun ja su. Kpɔkun cɛn kwlaa, ɔ jin i sin kɛ ɔ di. I sɔ kunngba’n yɛ wie liɛ’n, ɔ fata kɛ e yo ɔ. Yɛle kɛ maan e srɛ Ɲanmiɛn, yɛ e jran su. (Lik 18:1-8) Nanwlɛ, sɛ e srɛlɛ’n ti Zoova liɛ’n su’n, ɔ su seman e le kɛ: “Nán kle n yalɛ.”—Lik 11:5-9.
17 Kɛ be se kɛ Ɲanmiɛn tɛ e srɛlɛ’n su’n, Zoova i sufuɛ’m be si i kpa. I li jasin fɛ’n bolɛ’n nun yɛ be wun i sɔ liɛ’n i kpa ɔ. Nvle nga be flɛ i Filipini nun lɔ’n, e niaan bla nɲɔn be ɔli be lɔ lika mmuammua kpa kun nun jasin fɛ’n bolɛ. Be fali e fluwa nɲa pɛplɛpɛ’n kun mannin bla kun. Bé nían ɔn, bla’n su sun. Ɔ seli be kɛ: “Kɛ be se kɛ flɛlɛ nin srolɛ’n be yia nun’n, i wie yɛle nga. Afin anunman kɔnguɛ’n, n srɛli Ɲanmiɛn kɛ ɔ sunman sran naan ɔ wa kle min Biblu’n nun like.” W’a cɛman yɛ bla’n boli aɲia’m be bo kɔlɛ’n i bo ɔ. Azi mɛn’n nun lɔ kusu’n, be seli e niaan bian kun kɛ ɔ ko bo jasin fɛ’n etazi sua kun nun. Sran’m be nian sua sɔ’n su kpa. I sɔ’n ti’n, srɛ kunnin e niaan’n. Sanngɛ kɛ ɔ srɛli Zoova’n, ɔ ɲannin wunmiɛn ɔli. Anuan kun m’ɔ ko boboli’n, talua kun yɛ ɔ fiteli ɔ. Kɛ aniaan’n boli i jasin su’n cɛ’n, talua’n le sunlɛ. Afin i waan, ɔ kunndɛ Zoova i Lalofuɛ mun w’a cɛ, naan i sɔ’n ti’n, ɔ srɛli Ɲanmiɛn. Aniaan’n tuli i klun ukɛli i naan Zoova i Lalofuɛ nga be trɛn i wun koko lɛ’n, b’a niɛn i lika.
18. (a) ?Sɛ Zoova tɛ e srɛlɛ’n su’n, ngue yɛ ɔ fata kɛ e yo ɔ? (b) ?Sɛ e srɛ Zoova titi’n, ngue yɛ e si kɛ é ɲɛ́n i ɔ?
18 Nanwlɛ, srɛlɛ mɔ e srɛ Ɲanmiɛn’n, ɔ ti like nanndoliɛ, ɔ yo ɲɛnmɛn. Kɛ e srɛ Zoova’n, ɔ ti. Kpɔkun, ɔ kunndɛ kɛ ɔ́ yó i nuan su like man e. (Ezai 30:18, 19) Sanngɛ, ɔ fata kɛ e yo angunndanfuɛ. Yɛle kɛ maan e bo e ɲin ase e nian wafa nga Zoova tɛ e su’n. Afin wie liɛ’n, nán wafa nga e kunndɛ kɛ ɔ fa like’n man e’n, i su yɛ ɔ nian ɔn. Sanngɛ sɛ e wun atin nga Ɲanmiɛn kle e’n i wlɛ’n, maan e lɛ i ase e mɛnmɛn i. (1 Tɛsalonikfuɛ Mun 5:18) Kpɔkun ndɛ nga akoto Pɔlu kannin’n, nán maan e wla fi su. Ɔ seli kɛ: ‘Nán amun koko sa fi su, sanngɛ sa’n kwlaa nun nin like kwlaa ng’ɔ mian amun’n, an kan kle Ɲanmiɛn, an srɛ i, an jran su kpa, yɛ an lɛ i ase.’ Nanwlɛ, sɛ é fín ase é jáso o, maan e srɛ Ɲanmiɛn. Sɛ e yo sɔ’n, é wún kɛ be nga Ɲanmiɛn fɛ i su sie i be srɛlɛ’n i bo’n, i su ndɛ nga Pɔlu kannin’n, ɔ ti nanwlɛ. I waan: ‘Yɛ ɔ maan amun wun jɔ́ amun fɔuun, amun su wunman sa ti mɔ amun wun jɔ amun fɔuun sɔ’n i bo mlɔnmlɔn. Aunjuɛ sɔ’n maan amun wla su boman, yɛ amun angunndan su sannganman.’—Filipfuɛ Mun 4:6, 7.
?Amún tɛ́ su sɛ?
• An bo srɛlɛ’n i wafa wie’m be su.
• ?Wafa sɛ yɛ ɔ fata kɛ e srɛ Ɲanmiɛn ɔn?
• ?Ngue yɛ e kwla fa wla e srɛlɛ’n nun ɔn?
• ?Kɛ sran kun yo sa tɛ’n, ngue ti yɛ ɔ fata kɛ ɔ srɛ Ɲanmiɛn ɔn?
[Foto, bue 29]
Sɛ e tu e klun e srɛ Ɲanmiɛn’n, Lakafuɛ’n su lakaman e.
[Foto, bue 31]
E kwla srɛ Ɲanmiɛn e lɛ i ase, kpɔkun e kan sa kwlaa ng’ɔ o e su’n e kle i.