Ɲanmiɛn sulɛ kpafuɛ’n i nzɔliɛ

ƝANMIƐN sulɛ sunman be waan like kwlaa nga be kle’n, ɔ fin Ɲanmiɛn. Sanngɛ nán e wla fi ndɛ nga akoto Zan kannin’n su. Ɔ seli kɛ: ‘N sran kpa mun, be nga be se kɛ be ijɔ Ɲanmiɛn wawɛ’n nuan’n, nán an lafi be ngba su. An sa be nian, sɛ be ijɔ Ɲanmiɛn nuan sakpa o, annzɛ sɛ like wie yɛ be ijɔ i nuan o. Afin be nga be tɔn be wun suɛn kɛ be ti Ɲanmiɛn nuan ijɔfuɛ’n, be kpanngban kpa b’a ba mɛn’n nun.’ (1 Zan 4:1) ?Sanngɛ, é yó sɛ naan y’a wun kɛ ndɛ kun fin Ɲanmiɛn annzɛ ɔ finman Ɲanmiɛn?

Kɛ e nian like kun m’ɔ fin Ɲanmiɛn’n, e wun i sran wafa ng’ɔ ti’n. I li i sran klolɛ’n yɛ e wun i kpa ɔ. I wie yɛle kɛ e ti nvan. E kwla si kɛ waka nɲrɛ nga bɔn fannin annzɛ kpaun nga b’a tɔn i uflɛuflɛ’n bɔn fannin. Kusu klolɛ mɔ Ɲanmiɛn klo e’n ti’n, ɔ yoli maan e wun ase. Wafa nga kɛ wia’n tú i bo’n lika’n fa ti’n, e kwla wun i. E kwla wun anunman nga be ti klanman’m be wlɛ. Sɛ bakan kun su sri’n, ɔ yo e klanman. Klolɛ mɔ Ɲanmiɛn klo e’n ti’n, ɔ yoli maan e ti sa. Sɛ sran’m be su bo jue fɛfɛ wie’n, ɔ yo e fɛ. Kɛ anunman’m bé tó jue’n, e ti. Kɛ e awlɛn su sran wie su ijɔ mɔ e kwla ti’n, nanwlɛ ɔ kle kɛ Ɲanmiɛn klo sran. E bɔbɔ wunmuan’n sa’n, kannzɛ fɔ’n o e nun’n, sanngɛ e klo sran kɛ Ɲanmiɛn bɔbɔ klo sran’n sa. Ɔ maan, kɛ Zezi seli kɛ ‘sɛ a cɛ sran like’n, ɔ ti kpa tra kɛ be cɛ wɔ like’n,’ e wun kɛ ndɛ sɔ’n ti nanwlɛ. Afin, kɛ e cɛ sran like’n ɔ yo e fɛ. (Sa Nga Be Yoli’n 20:35) Sran klolɛ’n o e nzuɛn’n nun. Kɛ ɔ ti sɔ ɔ, afin Ɲanmiɛn yili e kɛ ‘i bɔbɔ Ɲanmiɛn’n sa.’ (Bo Bolɛ 1:27) Nanwlɛ Zoova i nzuɛn’n yo ɲɛnmɛn. I nzuɛn ɲɛnmɛn sɔ m’ɔ fite kpa’n, yɛle i sran klolɛ’n.

Kɛ mɔ Ɲanmiɛn ti sran klofuɛ’n ti’n, sɛ be waan fluwa kun fin i’n, ɔ fata kɛ ɔ kɛn i sran klolɛ’n i ndɛ. ?I lɛ’n nun’n niɔn, yɛ fluwa nga be klɛli be w’a cɛ’n, be li? ?Be kan Ɲanmiɛn i sran klolɛ’n i ndɛ kpa?

Sran sunman be usa be wun kɛ: “E si kɛ Ɲanmiɛn yili like kwlaa klolɛ su. ?Sanngɛ ngue ti yɛ klɔ sran’m be o ɲrɛnnɛn nin sa tɛ’n nun sɔ ɔ?” Yɛle kɛ Ɲanmiɛn sulɛ fluwa mɔ be klɛli be w’a cɛ’n, Ɲanmiɛn i sran klolɛ’n ɔ nin wafa ng’ɔ fata kɛ sran’m be klo Ɲanmiɛn’n, b’a yiyiman nun kpa. I ti yɛ maan sran’m be wunman kosan sɔ’n i bo’n niɔn. Sanngɛ fluwa sɔ’m be nun’n, Biblu’n kunngba cɛ yɛ ɔ yiyi Ɲanmiɛn i sran klolɛ’n nun ɔn. I kunngba’n, ɔ kle wafa nga e kwla klo Ɲanmiɛn nin sran’n.

Ɲanmiɛn nin sran klolɛ fluwa’n

Biblu’n m’ɔ ti Ɲanmiɛn ndɛ’n kle weiin kɛ Zoova ti ‘Ɲanmiɛn m’ɔ klo sran.’ (2 Korɛntfuɛ Mun 13:11) Ɔ kan Zoova i sran klolɛ mɔ i ti’n, ɔ yili klɔ sran klikli’n i ndɛ. Blɛ sɔ’n nun’n, be siman like nga be flɛ i fɔ’n nin wie’n. Kusu Biblu’n yiyi nun kɛ sa tɛ mɔ klɔ sran klikli’m be yoli’n yɛ maan ɲrɛnnɛn’n tɔli sran su ɔ. (Mmla’n 32:4, 5; Rɔmfuɛ Mun 5:12) Sanngɛ, Zoova fali ajalɛ naan like kpa ng’ɔ fili sran klikli’n nin yi’n be sa’n, klɔ sran w’a kwla ɲɛn i ekun. Ɲanmiɛn Ndɛ’n waan: ‘Afin Ɲanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n w’a mlinman, sanngɛ ɔ ɲan anannganman nguan.’ (Zan 3:16) Ɲanmiɛn Ndɛ’n yiyi nun weinwein kɛ klolɛ su Ɲanmiɛn takali i Sielɛ Blɛ kun. I Sielɛ Blɛ sɔ’n, Zezi yɛ ɔ ti i nun famiɛn’n niɔn. Sielɛ Blɛ sɔ’n yɛ maan be nga be ti sran kpa’n, bé kwlá trán asiɛ’n su wa alaje nun kɛ i bo bolɛ’n nun sa ɔ.—Daniɛl 7:13, 14; 2 Piɛr 3:13.

Like ng’ɔ fata kɛ klɔ sran yo’n, Biblu’n bo i kpɔlɛ kɛ: ‘“Klo ɔ Min Ɲanmiɛn’n kpa, fa ɔ wla’n kwlaa guɛ i su, maan wɔ angunndan’n kwlaa trɛn i su.” I yɛ ɔ ti mmla klikli nin i nun dan’n niɔn. Yɛ i nɲɔn su m’ɔ fɛ’n yɛ ɔ o yɛ: “Klo ɔ wiengu kɛ a fa klo ɔ bɔbɔ wun’n sa.” Mmla nɲɔn nga su yɛ mmla’n kwlaa taka ɔ.’ (Matie 22:37-40) Be klɛli i Biblu’n nun weiin kɛ Ɲanmiɛn yɛ maan be klɛli Biblu’n bɔbɔ’n niɔn. Sanngɛ e kwla lafi su kɛ ɔ fin ‘Ɲanmiɛn m’ɔ klo sran’n’ sakpa. Afin, i nun yɛ sran’m be kwla wun Ɲanmiɛn i sran wafa ng’ɔ ti’n i wlɛ weinwein ɔn.—2 Timote 3:16.

Kɛ nga y’a kɛn i yɛ’n, fluwa nga be klɛli be w’a cɛ mɔ be kan Ɲanmiɛn nin sran klolɛ’n ndɛ’n yɛ be fin Ɲanmiɛn ɔn. Sran klolɛ’n kusu ti Ɲanmiɛn i sufuɛ kpa’m be nzɔliɛ. Afin, Ɲanmiɛn i sufuɛ sɔ’m be klo sran kɛ Ɲanmiɛn bɔbɔ sa.

Be nga klo Ɲanmiɛn’n be nzɔliɛ

Biblu’n se kɛ mɛn ng’ɔ o yɛ’n, ɔ ‘su kɔ i bue nuan.’ Naan i sɔ’n ti’n, sran’m ‘be bu be bɔbɔ be wun angunndan, be ti sika klofuɛ, be klo mɛn dilɛ’n tra Ɲanmiɛn.’ Kɛ aliɛ’n cɛ́n m’ɔ́ fá san’n, nn bé yó sɔ trá su. Blɛ kunngba sɔ nun ɛ e kwla sie be nga be klo Ɲanmiɛn nanwlɛ nun’n, be nzɔliɛ kpa ɔ.—2 Timote 3:1-4.

?É yó sɛ naan y’a wun be nga be klo Ɲanmiɛn’n be wlɛ? Biblu’n se kɛ: ‘Ɲanmiɛn i klolɛ’n yɛle kɛ e fɛ i ndɛ’n su.’ (1 Zan 5:3) Ɔ maan, be nga be klo Ɲanmiɛn’n, be nanti i mmla ng’ɔ o Biblu’n nun’n su. I wie yɛle bian nin bla nna nin aja’n i su mmla ng’ɔ o Biblu’n nun’n. Biblu’n kle kɛ sɛ yasua kun nin bla kun bé sí sua’n, nn b’a ja be wun kɛ awa’n fa kan’n sa. Yɛ ɔ kle kɛ aja’n timan le nɲɔn like. Be nga be o aja nun’n, ɔ fata kɛ be tran sɔ tititi. (Matie 19:9; Ebre Mun 13:4) Bla kun fin abloki lɔ nvle nga be flɛ i Ɛspaɲi’n. Ɔ ti Ɲanmiɛn sulɛ wafawafa’m be su like sifuɛ. Cɛn kun’n, bla sɔ’n ɔli Zoova i Lalofuɛ’m be aɲia kun bo. Aɲia sɔ’n i bo lɔ’n, be yiyili Biblu’n nun mmla ng’ɔ kan sran nzuɛn’n i ndɛ’n, i nun kpa. Kɛ aɲia’n wieli’n, bla sɔ’n seli kɛ: “Ɔ yoli min ye dan. Nán ijɔlɛ’n nun yiyilɛ weinwien’n i ngunmin yɛ ɔ ukali min ɔn. Sanngɛ be afiɛn m’ɔ sɛ’n, ɔ nin be nzuɛn klanman’n, ɔ yoli min fɛ dan.”

Nán Ɲanmiɛn klolɛ’n i ngunmin yɛ be fa sie Ɲanmiɛn i sufuɛ kpa’m be nzɔliɛ ɔ. Like kun nga be fa sie be nzɔliɛ ekun’n, yɛle klolɛ mɔ be klo be wiengu’n. Be junman liɛ’n yɛle Ɲanmiɛn Sielɛ’n i jasin fɛ’n bolɛ. Afin Ɲanmiɛn Sielɛ’n kunngba cɛ yɛ maan sran’m bé fíte nun ɔn. (Matie 24:14) Like uflɛ fi nunman lɛ m’ɔ kwla man e wiengu’m be mmlusuɛ kɛ Ɲanmiɛn Silɛ’n sa ɔ. (Zan 17:3) Klistfuɛ kpa’m be yi be sran klolɛ’n i nglo sa uflɛ wie’m be nun ekun. Yɛle kɛ be nga kekle’n o be su’n, be uka be. I wie yɛle sa ng’ɔ juli abloki lɔ nvle nga be flɛ i Itali’n. Blɛ wie nun’n, asiɛ’n kejeli lɔ. Kɛ sa sɔ’n yoli’n, lɔ zronali kun kannin like nga Zoova i Lalofuɛ’m be yoli’n, i ndɛ. I waan: “Be bali sran’m be ukalɛ. B’a nianman be asɔnun nga be o nun’n ti.” 

Ɲanmiɛn i sufuɛ kpa’m be klo Ɲanmiɛn nin be wiengu sɔ. Sanngɛ be ngunminngunmin be afiɛn’n, be klo be wun wie. I lɛ’n nun’n, Zezi seli kɛ: ‘Ḿ mán amun mmla kun ekun: an klo amun wiengu. Klolɛ nga n fa kloli amun’n, amun kusu an fa klo amun wiengu sɔ. Sɛ an klo amun wiengu’n, i sɔ’n nun yɛ sran’m be kwlaa bé sí kɛ an ti n sɔnnzɔnfuɛ ɔ.’—Zan 13:34, 35.

?Sran kwlaa wun kɛ Ɲanmiɛn i sufuɛ kpa’m be ngunminngunmin be afiɛn’n, be yoman kɛ sran nga’m be sa naan be klo be wun sakpa? Be flɛ bla kun kɛ Ema, ɔ fin Bolivi. Ɔ o klɔ nga be flɛ i La Paz su lɔ, yɛ ɔ di junman sran kun i awlo. Ɔ wunnin kɛ Ɲanmiɛn i sufuɛ kpa’m be ngunminngunmin be afiɛn’n, be klo be wun sakpa. Afin, lika sɔ’n nun lɔ’n, sɛ aɲanbeunfuɛ kun nin yalɛfuɛ kun be kanman aniɛn kunngba’n, be sanman nun mlɔnmlɔn. Sanngɛ bla sɔ’n seli kɛ: “Le kunngba nga n ɔli Zoova i Lalofuɛ’m be aɲia’n bo’n, n wunnin kɛ gbaflɛn aunɲanfuɛ kun nin Indiɛn bla yalɛfuɛ kun be ti lɛ be su koko yalɛ. N nin a wunmɛn i sɔ’n le. Kɛ ɔ fin i lɛ’n, n seli min wun kɛ Zoova i Lalofuɛ’m be ti Ɲanmiɛn sran sakpa.” I kunngba’n yɛ talua kun mɔ be flɛ i Miriamu ɔ kannin ɔn. Ɔ fin nvle nga be flɛ i Bresili’n. I waan: “Kɛ be se kɛ sran di aklunjuɛ’n, n nin a diman wie le. Awlo lɔ bɔbɔ o, n klun jɔman. Saan Zoova i Lalofuɛ’m be afiɛn cɛ yɛ n wa wunnin like nga be flɛ i sran klolɛ’n niɔn.” Amlɛnkɛn’m be mɛn nun lɔ’n, bian kun ti be nga be yo zronali televiziɔn nun’n, be su kpɛn’n kun. Ɔ seli kɛ: “Amun Ɲanmiɛn sulɛ’n ti’n wafa nga amun nanti’n, sɛ ɔ ti kɛ sran’m be sunman lika be nanti sɔ wie’n, nn e mɛn’n su yoman kɛ nga e o nun yɛ’n sa. Min junman nga n di’n ti’n, n si kɛ amun anuannzɛ’n nun’n, amun klo e yifuɛ’n yɛ amun lafi i su.”

An kunndɛ Ɲanmiɛn sulɛ kpafuɛ’n i atin

Sran klolɛ’n ti Ɲanmiɛn sulɛ kpa’n, i nzɔliɛ’n kun. Zezi kleli kɛ Ɲanmiɛn sulɛ kpafuɛ’n ti kɛ atin kpa mɔ be wun i mɔ be nanti su’n sa. Ɲanmiɛn sulɛ kpafuɛ’n i atin’n i su nantilɛ’n yɛ ɔ man anannganman nguan’n niɔn. Ɔ leman atin uflɛ. Zezi seli kɛ: ‘An sin anuan fii’n nun, afin sɛ be sin anuan tɛtrɛ’n nun’n, be kpɛn atin dan’n mɔ i awieliɛ ti ɲrɛnnɛn’n nun, yɛ be nga be fa atin sɔ’n su’n, be sɔnnin. Sanngɛ anuan nin atin nga be sin nun ɔn be ɲan nguan’n be ti kaan, yɛ be nga be kunndɛ be wun i’n, b’a sɔnman.’ (Matie 7:13, 14) Be nga be nin Ɲanmiɛn be nanti atin kpa sɔ’n su’n, yɛle Klistfuɛ kpa mun. Yɛ be ti sran akpasua kunngba cɛ. Ɔ maan, kɛ be se kɛ asɔnun’n deman sran’n, i sɔ’n timan nanwlɛ. I sɔ’n ti’n, sɛ y’a wunman Ɲanmiɛn sulɛ kpafuɛ’n i atin naan y’a fa su’n, like ɲɛnmɛn sán e wun. Afin, atin sɔ’n ti sran klolɛ atin.—Efɛzfuɛ Mun 4:1-4.

?Sɛ ɔ ti kɛ amun o nanwlɛ atin’n su sa’n, ɔ su yoman amun fɛ? Ɔ ti kɛ nn amun nin Ɲanmiɛn be su nanti sa. Sɛ e nin Ɲanmiɛn e nanti’n, é súan ngwlɛlɛ nin sran klolɛ. I sɔ liɛ’n yó maan e nin e wiengu mun é trán klanman, yɛ é dí aklunjuɛ. Sɛ e nin Ɲanmiɛn e nanti’n, é wún like ti mɔ e o asiɛ’n su wa’n i wlɛ. É sí Ɲanmiɛn kpa, yɛ é fá e wla gúa e ɲrun lɔ like kpa kun mɔ e si kɛ é ɲɛ́n i’n su. Ɔ maan, Ɲanmiɛn sulɛ kpa’n i atin mɔ e kunndɛli’n, ɔ su yoman e nsisɔ le.

[Foto, bue 3]

Ɲanmiɛn sulɛ fluwa nga be klɛli be w’a cɛ’n, saan Biblu’n kunngba yɛ ɔ yiyi Ɲanmiɛn i sran klolɛ’n nun ɔn.

[Foto mun, bue 5]

Klistfuɛ kpa’m be kloman sran be nuan bui su.