Zoova klo sa nga be yo i i nuan su’n
“Min Anannganman n klo sa nga be yo i i nuan su’n.”—EZAI 61:8.
1, 2. (a) ?Kɛ be se kɛ ‘sran kun yo sa’n i nuan su’n,’ i bo’n yɛle benin? ?Yɛ kɛ be se kɛ ‘sran kun yoman sa’n i nuan su’n,’ i bo’n yɛle benin? (b) ?Ngue ndɛ yɛ Biblu’n kɛn i Zoova i sa nuan su yolɛ’n su ɔ?
KƐ BE se kɛ sran kun yo sa i nuan su’n, yɛle kɛ sran sɔ’n ‘nianman sran ɲrun yɛ ɔ yo like ɔ, ɔ ti sɛsɛfuɛ.’ Sanngɛ, sran ng’ɔ yoman sa’n i nuan su’n i liɛ’n, ɔ nian sran ɲrun yɛ ɔ yo i ninnge mun ɔn. Ɔ di ndɛ kwlɛ. Klunwi’n yɛ ɔ yo i wiengu mun ɔn.
2 I afuɛ 3.500 tra su yɛ’n, Moizi kannin Zoova m’ɔ sie nglo nin asiɛ’n, i ndɛ kɛ: ‘I atin’m be ti seiin. Ɔ ti Ɲanmiɛn kun m’ɔ kaciman, ɔ diman ndɛ kwlɛ.’ (Mmla’n 32:4) Kɛ ɔ yoli sɔ’n, i afuɛ ya nso m’ɔ sin’n, Ɲanmiɛn maan i nuan ijɔfuɛ Ezai seli kɛ: ‘Min Anannganman n klo sa nga be yo i i nuan su’n.’ (Ezai 61:8) I sin’n, Klistfuɛ klikli’m be blɛ su’n, Pɔlu seli kɛ: ‘?É sé kɛ Ɲanmiɛn yoman sa i nuan su? Ɔ timan sɔ mlɔnmlɔn!’ (Rɔmfuɛ Mun 9:14) Piɛli kusu seli kɛ: ‘Ɲanmiɛn liɛ’n, ɔ kpaman sran nun, sanngɛ nvle kwlaa nun’n, sran ng’ɔ sro i m’ɔ yo i klun sa’n, i klun jɔ i wun.’ (Sa Nga Be Yoli’n 10:34, 35) Nanwlɛ, e wun kɛ ‘Zoova klo sa nga be yo i i nuan su’n.’—Jue Mun 37:28; Malasi 3:6.
Klunwi’n w’a yi asiɛ’n piɛ
3. ?Nin yɛ klunwi’n fin ɔn?
3 Andɛ’n, sa i nuan su yolɛ’n timan sran’m be nzuɛn. Lika kwlaa nga e o lɛ’n, sran’m be kwla yo e tɛ. Ɔ kwla yo junman su lɔ annzɛ suklu lɔ annzɛ bɔbɔ awlo lɔ. E siefuɛ’m be bɔbɔ be kwla yo e tɛ. Sanngɛ i sɔ klunwi’n, nán andɛ yɛ ɔ boli i bo ɔ. Kɛ mmusu’m be si Satan wlawlali Adam nin Ɛvu mɔ be yoli ɲin kekle’n yɛ klunwi yolɛ’n boli i bo ɔ. Kɛ Zoova yili be’n, like nga be waan bé yó’n, be kwla yo. Sanngɛ b’a yoman like kpa. Be ayeliɛ sɔ’n ti yɛ ɲrɛnnɛn nin wie’n tɔli sran’m be su ɔ.—Bo Bolɛ 3:1-6; Rɔmfuɛ Mun 5:12; Ebre Mun 2:14.
4. ?Blɛ benin nun yɛ klunwi’n wluli klɔ sran nzuɛn’n nun ɔn?
4 Be yoli sa tɛ’n Edɛni fie nun lɔ i afuɛ 6.000 tra su yɛ. Kɛ ɔ fɛ i blɛ sɔ nun lele andɛ’n, sa tɛ’n ti klɔ sran’m be nzuɛn. I sɔ’n boman e nuan. Afin, Satan yɛ ɔ sie mɛn nga ɔ. (2 Korɛntfuɛ Mun 4:4) Ɔ bua ato, i yɛ ɔ ti ato buafuɛ’m be si’n niɔn. Ɔ ti sran kunfuɛ yɛ ɔ ti Ɲanmiɛn ɲrun tanndanfuɛ. (Zan 8:44) Sa tɛ kwlaa nga be yo’n fin i. I wie yɛle sa ng’ɔ juli Nowe blɛ su’n. Ka naan nzue dan’n w’a tɔ’n, Satan wlawlali sran mun maan be yoli sa tɛ. I ti’n Ɲanmiɛn sieli i nzɔliɛ kɛ: ‘Sran’m be klunwi’n kɔ i ɲrun cɛn’n kwlaa. Kɛ aliɛ’n cɛn m’ɔ́ sán’n, nn be klun akunndan’n yó tɛ kɔ́ i ɲrun.’ (Bo Bolɛ 6:5) Ayeliɛ tɛ kunngba’n yɛ Zezi blɛ su’n, sran’m be yili i nglo ɔ. Zezi seli kɛ: “Cɛn ba kun nun afɛ’n ɔ ju cɛn sɔ’n nun.” Cɛn ba kun nun afɛ sɔ’n kwla yo klunwi nga be yo e’n. (Matie 6:34) I sɔ’n ti’n, Biblu’n se kɛ: ‘Kɛ ɔ fin lalaa lele mɔ w’a fa ju ndɛ’n, like nga Ɲanmiɛn yili be’n, be kwlaa be oto, yɛ be wun ɲrɛnnɛn kɛ bla mɔ w’a tran awuliɛ’n sa.’—Rɔmfuɛ Mun 8:22.
5. ?Ngue ti yɛ andɛ’n, klunwi’n w’a tru w’a tra laa’n niɔn.
5 Klunwi mɔ sran’m be yo be wiengu mun’n, i ti yɛ e wun sa tɛ kwlaa nga be o mɛn nun’n niɔn. Sanngɛ siɛn’n, lika’n i tɛ liɛ’n, be kanman. ?Ngue ti yɛ w’a yo tɛ sɔ ɔ? Afin, mɛn tɛ kain nga e o nun yɛ’n, ɔ su kɔ i ‘bue nuan.’ Ɔ maan, kɛ lika’n kɔ́ i ɲrun’n, nn lika’n ‘yó kekle’ kɔ́ wie. Biblu’n dun mmua kannin kɛ, kɛ mɛn’n wá kɔ́ i bue nuan’n, sran mun ‘bé bú be bɔbɔ be wun akunndan, bé yó sika klofuɛ, bé dí be nuan, bé tú be wun, bé sáci Ɲanmiɛn wun, be su siman ye, be ɲin su yiman Ɲanmiɛn, be su kloman sran, bé yó be sa ɔ be su yaci cɛman, bé dí abla, be su siman be wun su nian, bé yó wlɛ, bé kpɔ́ sran kpa mun, bé yí be janvuɛ mun mán, bé yó like ɔ be su bumɛn i akunndan, bé dí tutre, bé kló mɛn dilɛ’n trá Ɲanmiɛn.’ (2 Timote 3:1-5) Kɛ nga e fa wun i lɛ’n, sran’m bé yó klunwi’n lele kpé nun.
6, 7. ?Andɛ’n, sa tɛ beblebe benin yɛ sran’m be wun i ɔ?
6 Afuɛ ya kasiɛn nga b’a sin yɛ’n, klɔ sran’m be klunwi’n i trulɛ mɔ wa tru’n, be nin a wunmɛn i sɔ le. Alɛ dilɛ’n wa sɔnnin. Maan e yiyi nun kan e nian. Laa sa sifuɛ wie’m be waan alɛ dan 2 su nun’n, be kunnin sran ko ju miliɔn 50 nin miliɔn 60 tra su. Be nga be wuli sɔ’n, be nun sunman b’a diman alɛ’n wie. Yasua nin bla nin bakanngan nga be ti lɛ ngbɛn mɔ be timan sonja’n, be yɛ alɛ’n dili be ɔ. Kɛ alɛ dan sɔ’n wieli’n, sran kpanngban kpa be wuli alɛ uflɛ wie’m be nun. I lɛ kusu’n, be nga be wuli’n be nun sunman be siman alɛ nun ndɛ. Klunwi sɔ’n, Satan yɛ ɔ kpɛ i ba ɔ. Like nga ti yɛ ɔ yo sɔ’n, yɛle kɛ w’a fa ya dan kpa. Ɔ si kɛ ɔ cɛ kaan sa’n, Zoova wá núnnún i. Biblu’n dun mmua kannin kɛ: “Mmusu’m be si Satan’n w’a ba amun wun wa ya su yɛle kɛ ɔ si kɛ i cɛn’n w’a sɔnman kun.”—Sa Nglo Yilɛ 12:12.
7 Kɛ é sé yɛ’n, afuɛ kwlaa’n sika nga be fa nian sonja’m be lika’n, ɔ kwla ju i liɛ miliar miliar lele 500.000. Sanngɛ nn mɛn’n nun sran miliɔn nnun tra su be leman like bɔɔ kaan sa naan b’a fa ti be wun ɲanman nun. ?Sɛ ɔ ti kɛ be fɛ i sɔ sika beblebe’n be fa uka sran mun’n, nn ɔ timan kpa? Mɛn’n nun’n, sran miliar kun be ɲanman aliɛ bɔɔ kaan sa be diman. Sanngɛ nn wie’m be di be la nun. Nvle’m be anuannzɛ nga blɔfuɛ’n flɛ i Nations unies waan afuɛ kwlaa’n, bakanngan miliɔn nnun be wun. Afin, be ɲanman aliɛ be diman. ?Kɛ nga e wun i lɛ’n, sɛ be waan bé yó sa tɛ’n, bé yó i sɛ ekun? Asa kusu’n, maan e bu kuɛ nga be tu be’n, be akunndan. Afuɛ kwlaa’n, kuɛ nga sran’m be tu’n, ɔ trɛ i liɛ miliɔn 40 annzɛ miliɔn 60. ?Sa nuan su yolɛ yɛle sɔ’n?
8. ?Ngue yɛ maan sran’m be su wunman klunwi’n kun ɔn?
8 Mɛn nun famiɛn’m be su kwlá nunnunman klunwi’n le. Sɛ bɔbɔ be mian be ɲin sɛ’n, ɔ kwlá yoman ye. Ɲanmiɛn Ndɛ’n dun mmua kannin kɛ e blɛ liɛ nun’n, ‘sran nga be klun yo wi mɔ be ti gblɛfuɛ’n, be sa tɛ nga be yo’n i tɛ’n ɔ́ trá laa liɛ’n, bé láka sran mun yɛ bé láka be bɔbɔ be wun.’ (2 Timote 3:13) Be waan alua ng’ɔ kɔ ufuɛ su’n, ɔ yaciman lɔ kɔlɛ. Yɛle kɛ sa tɛ m’ɔ o klɔ sran nun’n sa. Be yo i like fi ɔ, ɔ yoman ye. Ɔ o be nzuɛn’n nun. Saan Ɲanmiɛn m’ɔ yo sa’n i nuan su’n yɛ ɔ kwla yi i sɔ liɛ’n niɔn. I kunngba yɛ ɔ kwla nunnun Satan nin i mmusu mun, ɔ nin i sran nga be yo klunwi’n niɔn.—Zeremi 10:23, 24.
Sɛ be kokoli’n, i su ɔ
9, 10. ?Ngue ti yɛ Azafu i sa sin wa bubuli i ɔ?
9 Laa kpa nun bɔbɔ be nga be klɛli Biblu’n, be nun wie’m be usali Ɲanmiɛn kɛ be wunman sa ti m’ɔ nunnunman sa tɛ’n naan be yoman sa’n i nuan su’n. I wie yɛle sran ng’ɔ klɛli Jue Mun ndɛ tre 73 i liɛ’n. Jue sɔ’n i su fitilɛ ndɛ’n bo sran sɔ’n i dunman kɛ yɛle Azafu. Atrɛkpa’n, Azafu sɔ’n yɛle Levifuɛ mɔ Davidi blɛ su kɛ bé sú Ɲanmiɛn ɔ to jue’n, annzɛ kusu i anunman mun. Azafu nin i osufuɛ’m be kpɛli jue kpanngban kpa mɔ kɛ bé sú Ɲanmiɛn’n, be toli be ɔ. Sanngɛ blɛ wie nun’n, sran ng’ɔ klɛli Jue Mun 73 i sa sin wa bubuli i. Ɔ sieli i nzɔliɛ kɛ sran tɛ’m be ninnge’m be yo ye be sa nun. Naan be siman afɛ nin kekle nin ɲrɛnnɛn. Kɛ be o lɛ’n yɛ be o ɔ.
10 Biblu’n seli kɛ: ‘N wunnin i kɛ be nga be yi Ɲanmiɛn’n blo’n, be ninnge’m be yo ye be sa nun, kpɛkun min ɲin bloli ɲin keklefuɛ sɔ’m be wun. Sran sɔ mun’n, sa kekle tɔman be su. Be wunnɛn’n ɔ o be wun. Afɛ nga sran’m be fɛ i yɛ’n, be fɛman wie. Sa kekle ng’ɔ tɔ be nga’m be su’n, ɔ tɔman be su wie.’ (Jue Mun 73:2-8) Sanngɛ kɛ ɔ́ kɔ́ i ɲrun’n, ɔ wa wunnin i wlɛ kɛ akunndan tɛ yɛ ɔ su bu ɔ. (Jue Mun 73:15, 16) Jue tofuɛ sɔ’n miɛnnin i ɲin kacili i akunndan’n. Sanngɛ, like nga ti yɛ klunwifuɛ’m be o lɛ mɔ sran kpa mun yɛ be fɛ’n, w’a wunmɛn i wlɛ kpa.
11. ?Ngue yɛ Azafu wa wunnin i wlɛ ɔ?
11 Sanngɛ kɛ ɔ́ kɔ́ ɲrun’n, Ɲanmiɛn sufuɛ kpa sɔ’n wa wunnin like ng’ɔ minndɛ sa tɛ yofuɛ mun’n, i wlɛ. Ɔ wunnin i wlɛ kɛ Zoova wá núnnún klunwifuɛ mun mlɔnmlɔn. (Jue Mun 73:17-19) Davidi seli kɛ: ‘Fa ɔ wla gua Anannganman su, fɛ i atin’n su. Yɛ ɔ́ dí ɔ nɛnnɛn, mɛn’n ɔ́ yó ɔ liɛ. Klunwifuɛ’m be nunnunlɛ’n ɔ́ yó ɔ ɲrun.’—Jue Mun 37:9, 11, 34.
12. (a) ?Ngue yɛ Zoova wá yó klunwifuɛ mun ɔn? (b) ?Kɛ amun bu sa tɛ’n i wun ajalɛ nga Zoova wá fá’n, ɔ yo amun sɛ?
12 Ɔ ti Zoova klun su kɛ, kɛ i blɛ wá jú’n, ɔ́ wá núnnún klunwi’n. Ɔ fata kɛ Klistfuɛ’m be bu i akunndan cɛn kwlaa naan ɔ ka be klun. Afin, be kwlaa nga be yoman Zoova klun sa mɔ be bɔbɔ be ninnge liɛ mun yɛ be waan bé yó’n, Zoova su wa nunnun be. Yɛ be nga be yo i klun sa’n, ɔ́ wá rá be su. Biblu’n seli kɛ: ‘Anannganman nian, ɔ nian sa nga klɔ sran’m be yo’n. Anannganman si sran kpa’n i klun akunndan’n. Sanngɛ klunwifuɛ’n, ɔ nin sran ng’ɔ fa sa tɛ yolɛ’n cici i ti’n, ɔ kpɔ i sɔfuɛ mun. Ɔ́ gúa klunwifuɛ’m be su sɛnmlɛn nin sufru, ɔ́ fíta be su aunngban kun m’ɔ lo klakla kpa. Afin Anannganman ti sɛsɛ. Ɔ klo like nga be yo i i nuan su sɛsɛ’n.’—Jue Mun 11:4-7.
Bé wá yó sa i nuan su asiɛ’n su
13, 14. ?Ngue ti yɛ sa kpa nin sa i nuan su yolɛ ngunmin yɛ sran’m bé wá yó i mɛn’n nun ɔn?
13 Mɛn tɛ ng’ɔ o yɛ mɔ Satan yɛ ɔ sie i’n, kɛ Zoova ko nunnun i su sa tɛ’n, sran kpa mun yɛ bá wá trán su ɔ. Ɲanmiɛn i Sielɛ’n yɛ ɔ́ wá síe asiɛ’n niɔn. Ɲanmiɛn i Sielɛ sɔ’n yɛ Zezi seli i sɔnnzɔnfuɛ’m be kɛ be srɛ naan i blɛ’n ju’n niɔn. Mɛn uflɛ nun’n, klunwi nin sa tɛ’n be su tranman lɛ kun. Sa kpa nin sa nuan su yolɛ’n yɛ é wá wún i ɔ. I blɛ sɔ nun’n, srɛlɛ mɔ e srɛ Ɲanmiɛn kɛ ‘maan i sielɛ blɛ’n ju, maan e mɔ e o asiɛ’n su wa’n e yo i klun sa kɛ be mɔ be o ɲanmiɛn su lɔ’n be yo’n sa’n,’ ɔ́ kpɛ́n su mlɔnmlɔn.—Matie 6:10.
14 Wafa nga Ɲanmiɛn i Sielɛ’n wá síe sran mun’n, Biblu’n kɛn i ndɛ. Sielɛ nga sran kpa’m be minndɛ i’n, yɛle ngalɛ’n. I blɛ sɔ nun’n, ndɛ ng’ɔ o Jue Mun 145:16 kpɛ́n su sakpa. Ɔ se kɛ: ‘Ɲanmiɛn Zoova a trɛ ɔ sa’n nun. A man ninnge nga nguan o be nun’n be kwlaa be like ng’ɔ ju be’n.’ Asa ekun’n, Ezai 32:1 se kɛ: “Famiɛn kun [Zezi Klist m’ɔ o ɲanmiɛn su lɔ’n] ɔ́ nían mmla’n su ɔ́ síe mɛn’n, i awlo lɔ sran dandan’m [be nga be ti Klist i ja nunfuɛ asiɛ’n su wa’n] bé yó sa’m be nuan su.” Ezai 9:6 kan Klist Zezi m’ɔ ti famiɛn’n i ndɛ kɛ: ‘Ɔ́ yó maan i sielɛ’n ɔ́ trɛ́, yɛ ɔ maan fɔundi’n trán lɛ tititi. Ɔ́ yó maan Davidi i sielɛ’n nin i famiɛn diwlɛ’n bé yó kpa, yɛ bé táka. Mmla’n i su falɛ’n nin sa nuan su yolɛ’n, bé yó sielɛ sɔ’n nin famiɛn diwlɛ sɔ’n be bo bia lele yɛ ɔ́ yó kɛ ɔ́ fá yó’n niɔn. Anannganman m’ɔ sie mɛn wunmuan’n i klolɛ’n ti sa ng’ɔ́ wá yó’n yɛ ɔ o lɛ ɔ.’ ?Amun kunndɛman kɛ amún trán lika sɔ mɔ famiɛn kɛ ngalɛ’n sa wá síe’n, i nun wie?
15. ?Asiɛ uflɛ’n su’n, ngue like yɛ Zoova wá yó mán sran mun ɔn?
15 Mɛn uflɛ nun’n, e su kanman ndɛ ng’ɔ o Akunndanfuɛ’n 4:1 nun’n kun. I waan: ‘Ɲrɛnnɛn nga sran’m be kle be wiengu mun ɲanmiɛn’n bo wa’n, m buli i akunndan. Be nga be wun ɲrɛnnɛn’n, kannzɛ bé kpán sɛ, be ɲanman sran m’ɔ́ fɔ́nvɔ be ɔ. Afin be nga be kle sran’m be ɲrɛnnɛn’n yɛ kwlalɛ’n o be sa nun ɔn. Ɲrɛnnɛn wunfuɛ’m be ɲanman sran m’ɔ́ fɔ́nvɔ be ɔ.’ I yo, kɛ mɔ fɔ o e nun’n ti’n, kɛ be kan kɛ sa kpa ngunmin yɛ é wá wún i mɛn sɔ nun’n, ɔ ti kekle kan man e. Sanngɛ, ɔ́ yó sɔ sakpa. Cɛn kwlaa’n, sa kpa ngunmin yɛ é wún i ɔ. Like kwlaa ng’ɔ ti tɛ’n, Zoova maan e su wunmɛn i kun. I li, nga Zoova wá yó’n, ɔ́ trá nga e sunnzun’n lele. Zoova maan Piɛli seli kɛ: ‘Ɲanmiɛn seli kɛ ɔ́ mán e ɲanmiɛn su lɔ nin asiɛ uflɛ, lɔ yɛ be nga be yo sa kpa’n bé trán ɔn. I yɛ e su minndɛ i ɔ.’—2 Piɛr 3:13.
16. ?Wafa sɛ yɛ be yili ‘ɲanmiɛn su lɔ uflɛ’n’ niɔn? ?Yɛ wafa sɛ yɛ andɛ be su yiayia be nga bé wá trán “asiɛ uflɛ” su’n niɔn?
16 “Ɲanmiɛn su lɔ uflɛ” mɔ yɛle Ɲanmiɛn i awa m’ɔ o ɲanmiɛn su lɔ mɔ Klist yɛ ɔ ti i su famiɛn’n, w’a taka. Be nga kusu mɔ bé yó ‘asiɛ uflɛ’n’ yɛle sran kpa mun. Be su yiayia sran sɔ mun mɛn’n i bue nuan nga y’a ju yɛ’n nun. Dɔ nga su’n, be kwla ju be liɛ sran miliɔn nso. Be o nvlenvle kɔe 235 be nun, yɛ be yia asɔnun ko ju 100.000 nun. Sran sɔ’m be suan Zoova i sa nuan su yolɛ nin i sa kpa’m be su like. I sɔ’n ti’n, mɛn wunmuan’n nun’n, be bo ti kun. Be klo be wun kɛ Klist fa klo sran sa. Be bo kun yolɛ sɔ’n, sran kwlaa wun i. Yɛ i sɔ liɛ’n, nán andɛ sa yɛ ɔ boli i bo ɔ. I sɔ bo kun yolɛ liɛ’n, Satan i sran’m be simɛn i. I sɔ’n kle kɛ, kɛ asiɛ’n wá káci mɛn klanman’n, sran’m bé bó yó kun yɛ bé kló be wiengu kɛ ngalɛ’n sa. Ɔ maan, sa kpa nin sa nuan su yolɛ ngunmin yɛ bé yó ɔ.—Ezai 2:2-4; Zan 13:34, 35; Kolɔsfuɛ Mun 3:14.
Satan su kwlaman
17. ?Ngue ti yɛ e lafi su kɛ nunnunlɛ mɔ Satan waan ɔ́ núnnún Zoova i sufuɛ mun’n, ɔ́ kpí ase ɔ?
17 Ɔ cɛ kaan sa’n, Satan nin i sran’m bé fá ajalɛ kɛ bé núnnún Ɲanmiɛn i sufuɛ mun. (Ezekiɛl 38:14-23) Blɛ sɔ’n, Zezi waan ‘ɲrɛnnɛn ɔ́ yó dan mɔ kɛ ɔ fin mɛn’n i bo bolɛ’n nun lele ndɛ, i wunsu nin a yoman le yɛ i wunsu su yoman kun le.’ (Matie 24:21) ?Satan kwlá? Cɛcɛ. Afin, Ɲanmiɛn Ndɛ’n wla e fanngan kɛ: “Anannganman klo kɛ be yo like mun sɛsɛsɛ. Ɔ yimɛn i sufuɛ mɔ be ti nanwlɛfuɛ’m be ase. Ɔ nian be su tititi. Mɛn’n ɔ́ yó sran kpa’m be liɛ. Bé trán su tititi.”—Jue Mun 37:28, 29.
18. (a) ?Kɛ Satan wá bá Ɲanmiɛn i sufuɛ’m be tɛ yolɛ’n, ngue yɛ Ɲanmiɛn wá yó ɔ? (b) ?Sa i nuan su yolɛ m’ɔ́ wá yí asiɛ’n mɔ e yiyili nun like suanlɛ nga nun’n, wafa sɛ yɛ ɔ ukali amun ɔn?
18 Kɛ Satan nin i sran’m be ko fa ajalɛ kɛ bé núnnún Zoova i sufuɛ mun’n, Zoova su sisimɛn i bo kun. Zoova maan i nuan ijɔfuɛ Zakari dun mmua seli kɛ: ‘Sran ng’ɔ kan amun’n, nn w’a fɛ i sa w’a wɔ min ɲin su.’ (Zakari 2:12) Sran sɔ’n, Ɲanmiɛn wá núnnún i ndɛndɛ kpa. Be nga asiɛ wunmuan’n su be klo be wiengu kpa, mɔ be bo ti kun, mɔ be tran fɔun nun, mɔ be nanti mmla’n su’n, yɛle Zoova i sufuɛ mun. Ɔ maan, sɛ be waan bé yó be like tɛ’n nn klunwi kpa yɛle i sɔ’n. I sɔ’n ti’n, Ɲanmiɛn m’ɔ ‘klo kɛ be yo like mun sɛsɛsɛ’n’ su yacimɛn i sɔ like’n lɛ. Ɔ́ wá núnnún i sufuɛ’m be kpɔfuɛ mun kɛ ɔ nin i fata’n sa. Ɔ maan, be kwlaa nga be su Ɲanmiɛn Kpli’n, bé fíte nun. Nanwlɛ, i sɔ sa liɛ mɔ be o e ɲrun lɔ’n, be yo ɲɛnmɛn!—Nyanndra Mun 2:21, 22.
?Wafa sɛ yɛ amún tɛ́ kosan’m be su ɔ?
• ?Ngue ti yɛ klunwi’n w’a tru ɔ?
• ?Wafa sɛ yɛ Zoova wá wíe klunwi m’ɔ o asiɛ’n su’n niɔn?
• ?Sa i nuan su yolɛ m’ɔ́ wá yí asiɛ’n i su like mɔ e suannin’n, benin yɛ ɔ yoli amun fɛ ɔ?
[Foto, bue 15]
Ka naan Nowe blɛ su nzue dan’n w’a tɔ’n, be wunnin klunwi’n, sanngɛ ‘mɛn’n i bue nuan’ nga nun’n, w’a tru.
[Foto, bue 16]
Ɲanmiɛn i mɛn uflɛ’n nun’n, sa i nuan su yolɛ nin sa kpa’n bé wá káci sa tɛ’n.