Siɛ nin niɛn mun, an ta amun mma mun klolɛ su
“Like kwlaa nga amún yó’n, an bu amun wiengu akunndan.”—1 KORƐNTFUƐ MUN 16:14.
1. ?Kɛ siɛ nin niɛn’m be wu ba’n, ɔ yo be sɛ?
KƐ SIƐ nin niɛn kwlaa be wu ba’n, ɔ yo be fɛ dan. Be flɛ bla kun kɛ Alea. Ɔ seli kɛ: “Kɛ n wuli min wa ba bla klikli’n, ɔ yoli min fɛ dan. Min waan ba uflɛ timan klanman kɛ i sa.” Siɛ nin niɛn’m be ba wulɛ’n man be aklunjuɛ sɔ. Sanngɛ kusu’n, ɔ man be ngokoɛ wie. Alea i wun’n seli kɛ: “Wafa nga n ko ta min wa’n naan cɛn wie lele w’a yo sran’n, i li yɛ n su bu i akunndan siɛn’n niɔn.” Like kunngba’n ti yɛ siɛ nin niɛn sunman be koko ɔ. Ɔ maan, be wun i wlɛ kɛ ɔ fata kɛ be ta be mma mun klolɛ su. Sanngɛ, ɔ yo kekle man siɛ nin niɛn nga be ti Klistfuɛ’n. ?Ngue ti ɔ?
2. ?Ngue ti yɛ ba’m be talɛ’n ti kekle ɔ?
2 Andɛ’n, e o mɛn’n i awieliɛ blɛ’n nun. Yɛ kɛ nga Biblu’n fa kannin’n sa’n, klunwifuɛ’m b’a yi asiɛ’n piɛ. Awlo’m be nun bɔbɔ’n, be ‘kloman sran.’ Kusu’n, be ‘siman ye, be ɲin yiman Ɲanmiɛn, yɛ be siman be wun su nian.’ (2 Timote 3:1-5) Sran kɛ ngalɛ sa mɔ be nin Klistfuɛ’m be o nun cɛn kwlaa’n, ɔ cɛman naan be nzuɛn’n w’a sa be. Siɛ nin niɛn’m be kusu’n, ɔ ti kekle man be kɛ be nian be wun su. Be si kɛ, ɔ cɛman naan b’a ijɔ tɛtɛ naan b’a yo sa uflɛ m’ɔ timan su’n.—Rɔmfuɛ Mun 3:23; Zak 3:2, 8, 9.
3. ?Wafa sɛ yɛ siɛ nin niɛn’m bé yó naan b’a ta ba’m be kpa ɔ?
3 Kannzɛ ba’m be talɛ’n ti kekle’n, sanngɛ siɛ nin niɛn’m be kwla ta be mma mun naan b’a su Ɲanmiɛn. ?Wafa sɛ yɛ bé yó naan w’a yo ye ɔ? Saan bé nánti Biblu’n nun afɔtuɛ nga su. I waan: “Like kwlaa nga amún yó’n, an bu amun wiengu akunndan.” (1 Korɛntfuɛ Mun 16:14) Afin, sa mɔ maan ‘i kwlaa yó ye’n,’ yɛle sran klolɛ’n. (Kolɔsfuɛ Mun 3:14) Korɛntifuɛ’m be fluwa klikli nga akoto Pɔlu klɛli nun’n, ɔ yiyili like nga sran m’ɔ klo sran’n yo’n nun. Amun e fɛ i nun yiyilɛ sɔ’n i nun kpɔlɛ nsan naan e nian wafa nga siɛ nin niɛn’m be kwla nanti su be ta be mma mun’n.—1 Korɛntfuɛ Mun 13:4-8.
Ɔ fata kɛ be tra be awlɛn be mma’m be wun
4. ?Ngue ti yɛ ɔ fata kɛ siɛ nin niɛn’m be tra be awlɛn be mma’m be wun ɔn?
4 Pɔlu seli kɛ: ‘Sran m’ɔ klo sran’n, ɔ trɛ i awlɛn sran wun.’ (1 Korɛntfuɛ Mun 13:4) Glɛki nun ndɛ mma nga be kacili i kɛ ‘ɔ trɛ i awlɛn sran wun’n,’ i bo’n yɛle kɛ sran’n faman ya ndɛndɛ, sa sɔn i nun. I lɛ nun’n, siɛ nin niɛn’m be bɔbɔ be si kɛ like nga ti yɛ ɔ fata kɛ be tra be awlɛn ba’m be wun’n sɔnnin. I wie yɛle kɛ, kɛ ba’m be o lɛ’n, be flan. Sɛ like wie o lɛ naan be si nin be nin be waan be fa manman be’n, be yaciman be diin. Gbanflɛn nin talua’m be liɛ’n, sɛ atin wie ti tɛ naan be se be kɛ nán be fa’n, be si akplowa. (Nyanndra Mun 22:15) I kun ekun yɛle kɛ ba’m be kusu’n, sa tɛ nga be yo’n, cɛn uflɛ be kwla yo i ekun.—Jue Mun 130:3.
5. ?Wafa sɛ yɛ siɛ nin niɛn’m be kwla yo naan b’a tra be awlɛn be mma’m be wun ɔn?
5 ?Ngue yɛ ɔ kwla uka siɛ nin niɛn mun naan b’a tra be awlɛn be mma’m be wun ɔn? Famiɛn Salomɔn seli kɛ: “Sran ng’ɔ si ngwlɛlɛ’n ɔ faman ya ndɛndɛ.” (Nyanndra Mun 19:11) Siɛ nin niɛn’m be si kɛ be bɔbɔ be bakan nun’n, be ‘ijɔli bakan ijɔlɛ, be buli bakan akunndan, yɛ be kannin bakan ndɛ.’ Ɔ maan, sɛ be mma’m be yo sɔ’n, ɔ fata kɛ be tra be awlɛn. (1 Korɛntfuɛ Mun 13:11) ?Siɛ nin niɛn mun, amun bakan nun’n, nán ndɛ finfin yɛ amun fa tinnin amun si nin amun nin’m be wun ɔn? ?I nun mɔ amun ti gbanflɛn annzɛ talua’n, amun a bumɛn i kɛ ndɛ nga amun kan’n, amun si annzɛ amun nin’m be wunman be wlɛ? Ɔ maan sɛ ba’m be yo sɔ wie’n, amun wun i wlɛ. I sɔ’n ti’n, ɔ fata kɛ amun tra amun awlɛn. Ɔ fataman kɛ ndɛ nga amun kan kle be’n, amun yaci be kan klelɛ. (Kolɔsfuɛ Mun 4:6) I lɛ nun’n, an nian ndɛ nga Zoova kan kleli Izraɛlifuɛ mun’n. Ɔ seli be kɛ be fɛ i mmla’n ‘kan kle’ be mma mun. (Mmla’n 6:6, 7) Ebre nun ndɛ mma nga be kacili i kɛ ‘kan kle’n,’ yɛle kɛ be “kan ndɛ’n flan nun,” annzɛ be “kɛn i lele naan ɔ ka sran’n i klun.” I sɔ’n kle kɛ, saan siɛ nin niɛn’m bé kán Ɲanmiɛn ndɛ’n klé ba mun lele naan b’a nanti su. I sɔ kunngba’n yɛ like uflɛ kwlaa nga bé klé ba mun’n, ɔ fata kɛ be yo ɔ.
6. ?Kɛ be se kɛ be tra be awlɛn ba’m be wun’n i ti yɛ bé yáci be lɛ naan be kplɔ ɔ?
6 Nán amun awlɛn mɔ amun tra’n, i ti yɛ amún yáci ba’m be lɛ naan be kplɔ ɔ. Biblu’n waan: ‘Ba nga mɔ i bɔbɔ yɛ ɔ sie i wun’n, ɔ guɛ i nin ɲin ase.’ Kɛ ɔ ko yo naan w’a yoman sɔ’n ti’n, Biblu’n nun ndɛ mma kunngba’n waan: ‘Ɲantiaan’n nin fɔ tulɛ’n be kle ngwlɛlɛ.’ (Nyanndra Mun 29:15) Sanngɛ wie liɛ’n, ba’m be waan nán be si nin be nin’m be sa kan be. Ɔ ti kɛ nvle wie nunfuɛ mɔ be yɛ be kle like ng’ɔ fata kɛ be siefuɛ’m be yo’n sa. Sanngɛ, ɔ fataman kɛ i sɔ’n tran Klistfuɛ’m be awlo’m be nun. Afin, Zoova mɔ awlo kwlaa ti i liɛ’n, ɔ mannin siɛ nin niɛn’m be atin kɛ be ta be mma mun naan be tu be fɔ klolɛ su. (1 Korɛntfuɛ Mun 11:3; Efɛzfuɛ Mun 3:15; 6:1-4) I kpa’n bɔbɔ’n, like’n i nɲɔn su nga sran m’ɔ klo sran’n yo mɔ Pɔlu yiyili nun’n, ɔ nin ba’m be fɔ tulɛ’n kɔ likawlɛ. I yɛ é wá kɛ́n i ndɛ siɛn’n niɔn.
Fɔ’n i tulɛ klolɛ su
7. ?Ngue ti yɛ siɛ nin niɛn mɔ be ti kpa’n, be tu be mma’m be fɔ ɔ? ?Wafa sɛ yɛ be tu ba fɔ ɔ?
7 Pɔlu seli kɛ: ‘Sran m’ɔ klo sran’n, ɔ yo aklunye.’ (1 Korɛntfuɛ Mun 13:4) Awlo wie nun kɛ ba’n yo sa’n, be tu i fɔ. Sanngɛ kɛ cɛn uflɛ ɔ yo sa kunngba’n, be yaci i lɛ. Siɛ nin niɛn nga be ti aklunyefuɛ’n, be yoman sɔ. Be nian Zoova i ajalɛ’n su. Pɔlu seli kɛ: ‘Zoova tu be nga ɔ klo be’m be fɔ.’ Kɛ Biblu’n se kɛ be tu sran fɔ’n, maan e wun i wlɛ kɛ nɛ́n i yɛle like yolɛ kɛ i bolɛ sa ngunmin. Sanngɛ, be kle sran’n i ngwlɛlɛ. I lɛ nun’n, Pɔlu waan: ‘Be nga be fa su mɔ be kaci’n, ɔ maan be yo kpa, yɛ be di alaje.’ (Ebre Mun 12:6, 11) Kɛ siɛ nin niɛn’m be kan be ɲin ase be kle be mma’m be ngwlɛlɛ Ɲanmiɛn liɛ’n su’n, i sɔ’n yo maan cɛn wie lele ba’m be yo sran, be di alaje. Kɛ ‘Anannganman tu ba’m be fɔ’ mɔ be fa su’n, be si ngwlɛlɛ, be si sa yɛ be si akunndan. I sɔ ninnge’m be ti kpa lele tra jɛtɛ ufue annzɛ sika ɔkwlɛ.—Nyanndra Mun 3:11-18.
8. ?Kɛ siɛ nin niɛn’m be tuman be mma’m be fɔ’n, wafa sɛ yɛ i bo’n gua ɔ?
8 Kɛ siɛ nin niɛn’m be tuman be mma’m be fɔ’n, be yoman ba’m be ye mlɔnmlɔn. Zoova maan Salomɔn seli kɛ: ‘Sran ng’ɔ faman ngble kɛnmɛn i wa’n, nn klolɛ yɛ ɔ klomɛn i ɔ. Sran ng’ɔ klo i wa’n, ɔ jrɛnjrɛnmɛn i fɔ tulɛ’n wun.’ (Nyanndra Mun 13:24) Ba nga be tumɛn i fɔ kɛ ɔ nin i fata sa’n, ɔ bu i ngunmin i wun akunndan yɛ i ɲin yiman like. Sanngɛ, siɛ nin niɛn nga be ti aklunyefuɛ’n, be kle like ng’ɔ fata kɛ be mma’m be yo annzɛ ɔ fataman kɛ be yo’n, yɛ be jran su. Kɛ be yo sɔ’n, be mma’m be si like suklu lɔ, be nin sran si tran yɛ be klun jɔ. Nanwlɛ, siɛ nin niɛn nga be tu be mma’m be fɔ’n, be kle kɛ be klo be sakpa.
9. ?Ngue yɛ ɔ fata kɛ siɛ nin niɛn’m be kle be mma mun ɔn? ?Wafa sɛ yɛ ɔ fataman kɛ ba’m be bu i sɔ ninnge mun ɔn?
9 ?Kɛ be se kɛ be tu ba fɔ klolɛ su’n, i bo yɛle benin? Like nga siɛ nin niɛn’m be kunndɛ kɛ be mma’m be yo’n, ɔ fata kɛ be yiyi nun kle be weiin. Siɛ nin niɛn nga be ti Klistfuɛ’n, be kle be mma kanngan mun Ɲanmiɛn ndɛ suanlɛ’n i bo bolɛ ninnge mun. Kpɛkun, be kle be ninnge ng’ɔ fata kɛ be yo be Ɲanmiɛn sulɛ nun’n. (Ezipt Lɔ Tulɛ 20:12-17; Matie 22:37-40; 28:19; Ebre Mun 10:24, 25) Ɔ fata kɛ ba’m be wun i wlɛ kɛ ninnge sɔ’m be yolɛ nun’n, be kwlá totoman be ti.
10, 11. ?Kɛ siɛ nin niɛn’m bé kpɛ́ awlo’n nun mmla mun’n, ngue ti yɛ wie liɛ’n be kwla bu be mma’m be ndɛ liɛ’n i akunndan ɔn?
10 Wie liɛ’n, kɛ siɛ nin niɛn’m bé kpɛ́ awlo’n nun mmla’n, be kwla wun ba’m be wun naan be nuan sɛ su. Sɛ be yo sɔ’n, be su mianman ba mun naan b’a nanti su. I wie yɛle kɛ, sɛ siɛ nin niɛn’m be waan bé klé dɔ kun m’ɔ fataman kɛ ba’m be fite’n, ɔ fata kɛ be kle i trele naan b’a kwla nanti su. Annzɛ kusu’n, be kwla man ba’m be atin naan be bɔbɔ be kle be dɔ liɛ’n naan like nga ti yɛ be bu i kɛ i sɔ dɔ’n yɛ ɔ ti kpa’n, be yiyi nun. Siɛ nin niɛn’m be kusu’n, like nga ti yɛ be bu i kɛ be dɔ liɛ’n yɛ ɔ ti kpa’n, bé yíyí nun. ?Kɛ ɔ yo sɔ’n, sɛ siɛ nin niɛn’m be wun kɛ ngbaciɛ dan nunman be dɔ liɛ’n nin be mma’m be liɛ’n i afiɛn’n, ngue yɛ ɔ fata kɛ be yo ɔ? I lɛ nun’n, siɛ nin niɛn wie’m be fa be mma’m be dɔ liɛ’n. Afin sɛ be yo sɔ’n, be saciman mmla fi. ?Sanngɛ, i sɔ’n kleman kɛ ba mun yɛ be sie be ɔ?
11 Kɛ ɔ ko yo naan y’a tɛ i sɔ kosan’n su’n, amun e fa wafa nga Zoova nin Lɔtu nin i mma’m be trannin’n i su sunnzun ase. Kɛ Zoova seli kɛ ɔ́ wá núnnún Sodɔmu mɔ i anzi’m be ko fali Lɔtu nin i yi nin i mma mun fiteli’n, anzi kun seli Lɔtu kɛ: ‘Wanndi kɔ oka’n bo lɔ naan w’a wuman.’ Sanngɛ Lɔtu usɛli i kɛ: ‘?Nannan n ju lɔ sɛ yɛ ɔ yo ye ɔ?’ Kpɛkun, i bɔbɔ kleli lika ng’ɔ kwla wanndi ko fia lɔ’n. Ɔ seli kɛ: ‘Klɔ kaan kun yɛ ɔ o lɔ lɛ ɔ, ɔ nunman mmua ngboko, n wanndi n ju lɔ ɔ ɔ yo ye. Ɔ ti kaan sɔ, sanngɛ n fia lɔ ɔ ɔ yo ye.’ ?Kɛ Lɔtu seli sɔ’n, Zoova tɛli i su sɛ? Ɔ seli i kɛ: “N tili ń sí wɔ aunnvuɛ ekun.” (Bo Bolɛ 19:17-22) ?I sɔ mɔ Zoova yoli’n, ɔ kle kɛ w’a yaci sran uflɛ naan ɔ kle i atin? Cɛcɛ. Sanngɛ, ɔ buli Lɔtu i akunndan. Ɔ wunnin kɛ ndɛ nga Lɔtu kannin’n timan tɛ naan ɔ kwla si i aunnvuɛ ekun. ?Siɛ nin niɛn mun, kɛ amún kpɛ́ awlo nun mmla mun’n, ɔ nin i fataman kɛ amun bu amun mma’m be ndɛ liɛ’n i akunndan wie?
12. ?Ngue yɛ maan bakan kun i wun yó i fɛ ɔ?
12 Fɔ nga sɛ ba’m b’a nantiman mmla’n su’n bé fá tú be’n, ɔ fata kɛ be yiyi nun kle be. Kɛ be ko yiyi nun mɔ be ngba be nuan w’a sɛ su’n, ɔ fata kɛ awlo’n nunfuɛ’m be kwlaa be nanti su. Siɛ nin niɛn nga cɛn kwlaa ijɔlɛ ngbɛn yɛ be ijɔ’n, be kleman kɛ be klo be mma mun. Biblu’n waan: ‘Kɛ be kaman be ja nun lɛ be tuman sran ng’ɔ yo sa tɛ’n i fɔ kɛ ɔ nin i fata’n sa’n, i ti yɛ sa tɛ yolɛ’n i akunndan’n o sran’m be awlɛn’n nun m’ɔ wieman le’n niɔn.’ (Akunndanfuɛ’n 8:11) Siɛ nin niɛn wie’m be se kɛ be tuman be wa’n i fɔ nzra nun annzɛ i wiengu’m be ɲrun naan ba’n w’a ɲanman ɲannzuɛn. Sɛ bɔbɔ ɔ ti sɔ’n, sanngɛ maan ba’m be wun kɛ like nga amun se kɛ amún yó’n, amun yo. Yɛle kɛ, kɛ amun “se kɛ ɛɛn” ɔ ka su, yɛ kɛ amun “se kɛ cɛcɛ” ɔ ka su. Kɛ ɔ yo sɔ’n, ɔ yo ba’m be ye yɛ be ɲin yi amun.—Matie 5:37.
13, 14. ?Ba’m be talɛ nun’n, wafa sɛ yɛ be kwla nian Zoova i ajalɛ’n su ɔ?
13 Kɛ siɛ nin niɛn’m be tu be mma’m be fɔ’n, kannzɛ i sɔ’n kle kɛ be klo be’n, sanngɛ ɔ le ba kun nin i fɔ bulɛ. Be flɛ bla kun kɛ Pamu. Ɔ seli kɛ: “E le ba nɲɔn. Kɛ be o lɛ’n, nán fɔ kunngba’n yɛ e fa tu be ɔ. Afin fɔ tulɛ ng’ɔ yo kun ye’n, ɔ yoman kun’n like fi.” I wun Lari kan gua su kɛ: “Kpɛnngbɛn fuɛ’n, be kan ndɛ kle i ɔ timan. Saan é tú i fɔ kekle. Sanngɛ kasiɛn’n, be kan ndɛ kle i ɔ ti. Wie liɛ bɔbɔ sɛ ɔ su yo like naan a niɛn i’n, kpɛkun w’a kaci i sa.” Nanwlɛ, siɛ nin niɛn mɔ be klo be mma mun’n, ba kun i fɔ liɛ ng’ɔ ti kpa mɛn i’n, yɛ be mian be ɲin be tu i ɔ.
14 Kɛ Zoova o lɛ’n, ɔ si like nga i sufuɛ’m be kwlɛ i yo’n, ɔ nin like nga be kwlá yoman’n. I lɛ nun’n, ɔ kle siɛ nin niɛn’m be ajalɛ kpa. (Ebre Mun 4:13) Kɛ Zoova i sufuɛ’m be yo sa tɛ m’ɔ́ tú be fɔ’n, ɔ tumɛn i kekle traman su. Kusu’n, ɔ tranman lɛ nianman be. Sa nga be yo’n, i ‘su yɛ ɔ nian yo be ɔ,’ ɔ kaciman. (Zeremi 30:11) ?Siɛ nin niɛn mun, amun si like nga amun mma’m be kwla yo’n, ɔ nin nga be kwlá yoman’n? ?Amun niɛn i sɔ’n su be fa ta be? Sɛ amun yo sɔ’n, nn amun ta amun mma mun klolɛ su.
Amun uka ba mun naan be kan be klun ndɛ kle amun
15, 16. ?Wafa sɛ yɛ siɛ nin niɛn’m be kwla uka ba mun naan b’a kan be klun ndɛ ɔ? ?I sɔ nun’n, ajalɛ benin yɛ Klistfuɛ wie’m be fali mɔ be wunnin kɛ ɔ ti kpa ɔ?
15 Like kun ekun mɔ sran m’ɔ klo sran’n yo’n yɛle kɛ, ‘sa tɛ’n yomɛn i fɛ, nanwlɛ dilɛ’n yɛ ɔ yo i fɛ ɔ.’ (1 Korɛntfuɛ Mun 13:6) ?Wafa sɛ yɛ siɛ nin niɛn’m be kwla ta be mma mun naan sa tɛ’n w’a yoman be fɛ naan sanngɛ nanwlɛ dilɛ’n w’a yo be fɛ ɔ? Like cinnjin kpa kun m’ɔ fata kɛ be yo’n yɛle kɛ, maan be wla be mma’m be fanngan naan be kan be klun ndɛ kle be. Kannzɛ ndɛ sɔ’n kwla sanngan amun akunndan bɔbɔ’n, sanngɛ amun yaci be lɛ naan be kan. Kɛ ba’m be kan be klun ndɛ m’ɔ kle kɛ be klo sa ng’ɔ ti kpa’n, i sɔ’n yo siɛ nin niɛn’m be fɛ dan. Sanngɛ wie liɛ’n, ndɛ nga ba’n kan’n kwla kle kɛ i ɲin o sa tɛ’n i sin. (Bo Bolɛ 8:21) ?I lɛ nun’n, ngue yɛ siɛ nin niɛn’m bé yó ɔ? Wie liɛ’n, be tu ba’n i fɔ kekle be ja nun lɛ. Sanngɛ sɛ be yo sɔ’n, ba’n kwla se i klun lɔ kɛ cɛn uflɛ’n, ɔ́ búa ato. Ɔ maan, kɛ ba’m be kan ndɛ wie m’ɔ timɛn i kanwlɛ su’n, ɔ fata kɛ be tinngɛ i be ja nun lɛ. Sanngɛ, kɛ be se kɛ be tinngɛ ba’m be nuan ndɛ’n, nɛ́n i kunngba’n yɛle ndɛ nga be fa wla be nuan kɛ be kan’n.
16 ?Wafa sɛ yɛ siɛ nin niɛn’m be kwla yo naan be mma’m b’a kan be klun ndɛ ɔ? Alea mɔ e dun mmua kɛnnin i ndɛ’n seli kɛ: “Kɛ e mma’m bé kán ndɛ wie klé e’n, sɛ ɔ sanngan e akunndan’n, e tra e awlɛn. Ɔ maan, be kan be klun ndɛ.” Be flɛ siɛ kun kɛ Tɔmu. Ɔ se i liɛ kɛ: “E wlali e wa bla’m be fanngan kɛ kannzɛ be bu i kɛ ndɛ mɔ be waan bé kán’n su yoman e liɛ’n su’n, sanngɛ maan be kan. Sɛ e timan be ndɛ liɛ’n naan e liɛ’n yɛ cɛn kwlaa ɔ fata kɛ be nanti su’n, be sa sin kwla bubu be. Ɔ maan, be su kanman be klun ndɛ kleman e kun. Sanngɛ kɛ e ti be ndɛ liɛ’n, e wun kɛ i sɔ’n wla be fanngan.” Ɔ nin i fata kɛ ba’m be ɲin yi be si nin be nin mun. (Nyanndra Mun 6:20) Sanngɛ kusu’n, sɛ siɛ nin niɛn’m be nin ba’m be koko yalɛ klanman’n, i sɔ’n ti kpa. Afin, i sɔ’n uka ba mun naan b’a si akunndan. Be flɛ siɛ kun kɛ Vɛnsan, yɛ ɔ le ba bla nnan. Ɔ seli kɛ: “Cɛn kwlaa e nin be e koko sa kun su yalɛ. E kle be sa’n i kpa m’ɔ ti’n, annzɛ i tɛ m’ɔ ti’n. Ɔ maan, be wun ajalɛ kun mɔ be kwla fa’n. I sɔ mɔ e nin be e yo’n, ɔ uka be maan be si akunndan.”—Nyanndra Mun 1:1-4.
17. ?Ngue ti yɛ siɛ nin niɛn’m be wla kwla gua ase ɔ?
17 E si kɛ, siɛ nin niɛn fi kwlá nantiman ba talɛ’n i su afɔtuɛ ng’ɔ o Biblu’n nun’n i su tɛɛn guɛmɛn i ti nin bo. Sanngɛ, maan amun wla gua ase. Afin, wafa nga amun tra amun awlɛn amun mma’m be wun mɔ amun yo be ye mɔ amun ta be klolɛ su’n, be wla su fiman su le. Zoova kusu’n, i wla su fiman amun su. Saan, ɔ́ rá amun su. (Nyanndra Mun 3:33) Like cinnjin kpa nga siɛ nin niɛn kwlaa nga be ti Klistfuɛ’n be kunndɛ’n, yɛle kɛ be mma’m be klo Zoova naan be su i wie kɛ be liɛ’n sa. ?Ngue yɛ bé yó naan i sɔ liɛ’n w’a yo ye ɔ? Like suanlɛ ng’ɔ́ bá lɛ’n wá yíyí nun.
?Amun kwla tɛ su?
• ?Wafa sɛ yɛ ngwlɛlɛ mɔ siɛ nin niɛn’m be si i’n ti’n, be tra be awlɛn be mma’m be wun ɔn?
• ?Wafa sɛ yɛ ba’n i klolɛ nin i fɔ tulɛ’n, be kɔ likawlɛ ɔ?
• ?Ngue ti yɛ ɔ ti cinnjin kpa kɛ siɛ nin niɛn mun nin be mma’m be kan be klun ndɛ ɔ?
[Foto, bue 25]
?Siɛ nin niɛn mun, kɛ amun wla kpɛn amun bakan nun’n, amun wun amun mma’m be ayeliɛ’n i wlɛ?
[Foto, bue 26]
?Amun wla ba’m be fanngan kɛ be kan be klun ndɛ kle amun?