Nzraama’m be yi Ɲanmiɛn i wunmiɛn’n i nglo

‘Amun man amun ɲin su nglo be nian! ?Wan yɛ ɔ yili nzraama mun ɔn? ?Nán sran nga mɔ maan be kwlaa be fite ɲannglaan’n niɔn? Ɔ fa be dunman’n flɛflɛ be kwlaa, i kwlalɛ m’ɔ kwla dan’n nin i wunmiɛn dan’n ti’n, wie fi tuman nun.’—EZAI 40:26.

SƐ E fa wia’n e sunnzun nzraama wie mun’n, wia’n ti i liɛ sɛsɛ kaan sa. Ɔ nin i sɔ ngba’n, i nɔnnin’n tra asiɛ’n kpɛ 330.000. Nzraama nga be mantan asiɛ’n i wun koko wa’n, be ti kanngan tra wia’n. Sanngɛ, nzraama wie’m be o lɛ’n, be yo nɔnnin kpa. Nzraama nga be flɛ i V382 Cygni i nɔnnin’n tra wia’n kpɛ kɔe 27.

?Sɛ be sunnzun wia’n i ta’n, ɔ kwla ju nɲɛ? ?Sɛ sin jue lika kun, naan e nin sin sɔ’n e afiɛn’n ti nun kilo 15 sanngɛ i ta’n gua e su’n, e su seman kɛ sin sɔ’n ti dan? Asiɛ’n nin wia’n be afiɛn’n ti nun kilo miliɔn 150. Sanngɛ, sɛ wia’n bo kpa’n, ɔ kwla ra e kplo’n! Sanngɛ kusu’n, wia’n i bolɛ’n i bue kaan plili sa yɛ ɔ to e asiɛ’n su wa ɔ. Ɔ nin i sɔ ngba’n, i bolɛ kaan sɔ’n ti yɛ maan ninnge kwlaa be kwla tran asiɛ’n su ɔ.

Sa sifuɛ’m be sunnzunnin wia’n i ta wunmuan’n ng’ɔ to e asiɛ’n su wa’n. Be waan sɛ asiɛ’n sɔnnin kpa lele ju akpinngbin tra su bɔbɔ’n, wia’n i ta’n kwla ju be kwlaa sɔ’n. Like kun ekun kwla uka e naan y’a wun i ta’n i wlɛ. Sran wie mɔ be nian wafa nga lika fa kaci’n, be klɛli ɛntɛnɛti nun kɛ sɛ be kwla kan wia’n i ta wunmuan’n bo nun segɔndu kunngba cɛ’n, “ɔ kwla ju Amlɛnkɛn mun lele afuɛ 9.000.000.”

Wia’n i ta’n fin i klun lɔ. Kɛ mɔ i dan’n timan aɔwi’n, mɔ i klun’n yo nɔnnin’n ti’n, lele nin i kɛ i ta’n fin i klun lɔ fite’n, ɔ kwla di afuɛ akpinngbin. Sran kunngba nga be klɛli ɛntɛnɛti nun’n, be waan “sɛ wia’n i ta’n ɔ fiteman kun’n, ɔ́ dí afuɛ lele 50.000.000 naan b’a wun i sɔ’n asiɛ’n su wa!”

Maan e bu i sin e nian. Kɛ e man e ɲin su nglo lɔ e nian’n, e wun nzraama akpinngbin. Be kwlaa’m be le ta kɛ wia’n sa. Fluwa sifuɛ dandan’m be waan nzraama nga be o lɛ’n, be tra akpi ngbinngbin kpanngban kpa!

?Ninfan yɛ nzraama kpanngban sɔ’m be fin ɔn? Sa sifuɛ’m be waan i afuɛ akpi ngbinngbin 14 yɛ, like ti mɔ ninnge’m be boli nun kpɛ kunngba’n be nin a wunmɛn i wlɛ. Biblu’n liɛ’n ng’ɔ kan’n yɛle kɛ: ‘Kɛ mɛn’n bo i bo’n, Ɲanmiɛn yili nglo nin asiɛ’n.’ (Bo Bolɛ 1:1) Nanwlɛ, Sran ng’ɔ yili nzraama mun m’ɔ man be ta’n, ‘i wunmiɛn’n ti dan.’—Ezai 40:26.

Wafa nga Ɲanmiɛn fɛ i wunmiɛn’n di junman’n

Sran nga be yo Zoova i klun sa’n, ɔ fɛ i wunmiɛn’n suan be bo. Akoto Pɔlu kplinnin i ɲin ɔ kleli sran’m be like naan be si Ɲanmiɛn. Pɔlu ti kɛ e kwlaa e sa, yɛle kɛ ɔ ti klɔ sran. Sanngɛ sɛ bɔbɔ sran’m be tɛnndɛnnin i ɲrun’n, sanngɛ ɔ dili junman kpa. ?Ngue ti ɔ? I bɔbɔ seli kɛ ‘Ɲanmiɛn m’ɔ kwla like kwlaa yo’n yɛ ɔ yo sa ɔ.’—2 Korɛntfuɛ Mun 4:7-9.

Zoova fɛli i wunmiɛn’n fa nunnunnin be nga be ɲinfu b’a nantimɛn i mmla’m be su’n. Zoova nunnunnin Sodɔmu nin Gomɔru, kpɛkun Nowe blɛ su’n nzue dan’n tɔli nunnunnin klunwifuɛ mun. Zezi fali ndɛ sɔ’n kleli kɛ Zoova fɛ i wunmiɛn’n nunnun klunwifuɛ mun. Ɔ seli kɛ ɔ ka kaan sa’n, Zoova wá núnnún sran nga be nantimɛn i mmla’m be su’n.—Matie 24:3, 37-39; Lik 17:26-30.

?Wafa sɛ e wun yo e ɔ?

Wafa nga nzraama’m be yi Ɲanmiɛn i wunmiɛn’n i nglo’n, kɛ e bu i sin’n, e kwla kan ndɛ nga Famiɛn Davidi kannin’n wie. I waan: ‘Kɛ n nian nglo lɔ ninnge mɔ a yili be’n, kɛ n nian anglo nin nzraama mɔ a sieli be lɔ’n, n usa min wun kɛ: ?Wan yɛle sran mɔ maan ɔ wla ko kpɛn i su ɔ? ?Wan yɛle klɔ sran mɔ maan i ndɛ ko lo wɔ sɔ ɔ?’—Jue Mun 8:4, 5.

Nanwlɛ, kɛ e fa e wun e sunnzun ninnge nga Ɲanmiɛn yili be’n, e wun kɛ e junman lika fi. Sanngɛ ɔ fataman kɛ e bui kɛ, kɛ mɔ e junman lika fi ti’n, e kwlaman like fi yo. Zoova maan i nuan ijɔfuɛ Ezai klɛli ndɛ nga fa cici e wla. I waan: ‘Sran nga w’a fɛ’n, ɔ mɛn i wunmiɛn. Yɛ ɔ wla sran ng’ɔ ti fakafaka’n i nun fanngan. Fanngan’n wie gbanflɛn’m be nun ɔn ɔ yo ye, yɛ be kusu be fɛ wie ɔ ɔ yo ye. Gbanflɛn nga be ti juejue kpa’n, be tɔ cɛn wie ɔ ɔ yo ye. Sanngɛ be nga be fa be wla gua Anannganman su’n, be liɛ be ɲan wunmiɛn uflɛ tititi. Sɛ bé jáso’n, be jaso kpɛ kunngba waka kɛ anunman ɲin’n ɔ fa tu’n sa. Be wanndi, sanngɛ be fɛman, be nanti tititi, sanngɛ be wunmiɛn’n wieman.’—Ezai 40:29-31.

Sɛ e kunndɛ kɛ é yó Ɲanmiɛn klun sa’n, e kwla lafi su kɛ ɔ́ fɛ́ i wawɛ’n fá súan e bo. Sanngɛ ɔ fata kɛ e srɛ i naan ɔ fa man e. (Lik 11:13) Kɛ Ɲanmiɛn suan e bo’n, e kwla tra e awlɛn sa kekle kwlaa ɲrun. Kpɛkun e kwla ɲan wunmiɛn naan y’a yo sa ng’ɔ ti kpa’n.

[Ndɛ kwle, bue 7]

Kɛ Ɲanmiɛn suan e bo’n, e kwla ɲan wunmiɛn naan y’a yo sa ng’ɔ ti kpa’n.

[Foto, bue 7]

Kɛ ɔ fɛ i nglo lɔ bɛ su, m’ɔ́ kɔ́ fama su’n: Nzraama kwle kun bo seke, nzraama kpanngban be mantan su, like fuai susrai mɔ be flɛ i Oriɔn, nzraama kwle Andromède.

[Foto, bue 7]

Wia’n i nɔnnin’n tra asiɛ’n kpɛ 330.000.

[Foto cifuɛ mun, bue 7]

Pleiades: NASA, ESA and AURA/Caltech; all others above: National Optical Astronomy Observatories