An siman ng’ɔ́ wá yó kpa ɔ!

‘Lua ɔ ninnge mun nglɛmun nun lele fa ju nnɔsua nun, nán lo wunmiɛn. Afin a siman ng’ɔ́ wá yó kpa ɔ.’—AKU. 11:6.

1. ?Ngue ti yɛ wafa nga awie’n fa yo kpa’n ɔ ti abonuan, kpɛkun ɔ yo maan e kan e wun ase ɔ?

KƐ FIE difuɛ’n wo lɛ’n, ɔ trɛ i awlɛn’n yɛ ɔ di fie’n niɔn. (Zak 5:7) Kɛ ɔ ko sanndi awie’n, ɔ minndɛ kɛ ɔ fifi naan ɔ ɲin. Blɛblɛblɛ, sɛ lika’n ti kpa’n, like nga be guali’n, ɔ fin asiɛ’n bo lɔ fite. I sin’n, ɔ wla nɲa. Kpɛkun ɔ nɔn nzue kpa, i sin naan w’a wlɔ. Kpɛkun i sin ekun’n, ɔ blo, ɔ maan ɔ ju kpɛlɛ. Nanwlɛ, i sɔ’n ti abonuan! Kɛ e wun i wlɛ kɛ Ɲanmiɛn yɛ maan awie’n yo kpa’n, e kan e wun ase. Afin like nga fie difuɛ’n gua’n, ɔ kwla guɛ i bo anglɛ, yɛ ɔ kwla gua su nzue. Sanngɛ i kwlaa yoli o, Ɲanmiɛn kunngba cɛ yɛ ɔ kwla yo maan ɔ yo kpa ɔ.—An fa sunnzun 1 Korɛntfuɛ Mun 3:6.

2. ?Like suanlɛ ng’ɔ sinnin lɛ nun’n, wafa nga sran kun kaci Zezi i sɔnnzɔnfuɛ’n, i su like benin yɛ e kɛnnin i ndɛ ɔ?

² Like suanlɛ ng’ɔ sinnin lɛ nun’n, Zezi fali Ɲanmiɛn Sielɛ’n i jasin fɛ’n bolɛ’n sunnzunnin awie gualɛ. Ɔ buli asiɛ fanunfanun be su ɲanndra. Zezi fali sran’n i awlɛn’n fa sunnzunnin asiɛ. Ɔ kleli kɛ, sɛ bɔbɔ awie guafuɛ’n gua awie kpa’n, sanngɛ wafa nga sran kun i awlɛn’n fa ti’n, yɛ ɔ yo maan awie’n yo kpa annzɛ ɔ yoman kpa ɔ. (Mar. 4:3-9) Awie guafuɛ m’ɔ lafili’n, i su ɲanndra’n nun’n, Zezi kleli kɛ awie guafuɛ’n wunman wafa nga sran kun kaci Zezi i sɔnnzɔnfuɛ’n i wlɛ kpa. Ɔ ti sɔ, afin Ɲanmiɛn bɔbɔ i fanngan nun yɛ ɔ yo ye ɔ, nán klɔ sran fanngan nun ɔn. (Mar. 4:26-29) Siɛn’n, maan e nian ɲanndra nsan mɔ Zezi buli’n ekun. Ɲanndra sɔ mun yɛle tro mɔ be flɛ i mutardi’n nin kpaun are’n ɔ nin lala’n be su ɲanndra mun.a

Mutardi’n i su ɲanndra’n

3, 4. ?Ɲanmiɛn sielɛ’n i jasin fɛ’n, i su like benin yɛ mutardi mma’n i su ɲanndra’n kle e ɔ?

³ Tro nga be flɛ i mutardi’n i su ɲanndra’n wo Mark ndɛ tre 4 nun wie. Ɲanndra sɔ’n kle e like nɲɔn. I klikli’n yɛle kɛ, sran nga be sɔ Ɲanmiɛn Sielɛ’n i jasin fɛ’n nun’n, be sɔn kpa kɔ be ɲrun. I nɲɔn su’n yɛle kɛ, jasin fɛ’n mɔ be sɔ nun’n, ɔ sasa be. Zezi seli kɛ: ‘?Ngue yɛ é fá Ɲanmiɛn sielɛ’n súnnzun i ɔ annzɛ ɲanndra onin yɛ é fá klé i bo ɔ? Ɔ fa tro mɔ be flɛ i mutardi’n, kɛ bé lúa’n, ɔ ti kaan tra ninnge mma nga be lua be’n, be kwlaa. Sanngɛ kɛ be ko lua’n, ɔ ɲin, ɔ yo dan tra tro’n kwlaa, ɔ trɛ, ɔ maan anunman’m be kwla yo be sua i sama’m be fɔnvɔ’n nun.’—Mar. 4:30-32.

⁴ Ɲanndra sɔ’n kan ‘Ɲanmiɛn sielɛ’n’ i trɛlɛ’n i ndɛ. Kɛ ɔ fɛ i afuɛ nga be flɛ i 33 nun Klistfuɛ klikli’m be blɛ su’n, Ɲanmiɛn Sielɛ’n i jasin fɛ’n truli’n. Asa ekun’n, Klistfuɛ’m be asɔnun’n trɛli. Wafa nga i kwlaa sɔ’n fa yoli’n, yɛ ɔ kle Ɲanmiɛn sielɛ’n i trɛlɛ’n niɔn. Mutardi mma’n ti kaan kpa. Ɔ maan, ɔ kwla yo like kun m’ɔ ti kaan kpa’n i nzɔliɛ. (An fa sunnzun Lik 17:6.) Sanngɛ kɛ ɔ́ kɔ́ i ɲrun’n, i nglonglo’n kwla ju mɛtri 3 annzɛ 5. Kpɛkun i sama’m be sɔ kpa. Ɔ maan be kwla se kɛ ɔ kaci waka.—Mat. 13:31, 32.

5. ?Wafa sɛ yɛ Klistfuɛ klikli’m be trɛli mɔ jasin fɛ’n kusu truli be blɛ’n nun ɔn?

⁵ Kɛ afuɛ nga be flɛ i 33 nun Klistfuɛ asɔnun’n bó i bo’n, Zezi i sɔnnzɔnfuɛ mɔ Ɲanmiɛn fɛli i wawɛ’n kpali be’n, be ti sran 120 cɛ. Sanngɛ w’a cɛman kpɛkun sran akpasua kaan sɔ’n be wa yoli sran akpiakpi. (An kanngan Sa Nga Be Yoli’n 2:41 nin 4:4 ɔ nin Yo 5:28, ɔ nin Yo 6:7, ɔ nin Yo 12:24, ɔ nin Yo 19:20 be nun.) Kɛ ɔ́ fá dí afuɛ ablasan’n, awie kpɛfuɛ’m be wa sɔnnin kpa. I sɔ’n ti’n, akoto Pɔlu kwla seli Kolɔsu lɔ asɔnunfuɛ mun kɛ be ‘kan jasin fɛ’n kleli asiɛ’n sufuɛ’m be kwlaa.’ (Kol. 1:23) Nanwlɛ, wafa nga jasin fɛ’n fa truli’n, ɔ ti abonuan!

6, 7. (a) ?Kɛ ɔ fɛ i afuɛ nga be flɛ i 1914 nun’n, wan mun yɛ be trɛli ɔ? (b) ?Yɛ wafa sɛ yɛ bé trɛ́ ekun ɔn?

⁶ Afuɛ nga be flɛ i 1914 nun’n, Ɲanmiɛn Sielɛ’n takali ɲanmiɛn su lɔ. Kɛ ɔ fɛ i lɛ’n, mutardi “waka’n” i sama’m be trɛli trali nga aniaan’m be sunnzunnin’n su. Ɲanmiɛn sufuɛ’m be wunnin kɛ Ɲanmiɛn nuan ndɛ nga Ezai kannin’n, ɔ kpɛnnin su. Ezai seli kɛ: ‘Be nun kaan’n i osu nunfuɛ’m bé trɛ́ lele bé jú sran akpi, be nun kaan kpa’n, i osu’n ɔ́ káci nvle dan kpa kun.’ (Eza. 60:22) I afuɛ kɔe ya kun yɛ, i nun mɔ Klistfuɛ nga be kpali be sieli be ngunmin’n bé bó jasin fɛ’n, b’a sɔnman. Kɛ bé bó junman sɔ’n i dilɛ bo’n, be siman kɛ afuɛ nga be flɛ i 2008 nun’n, Zoova i Lalofuɛ’m bé fúanfúan sran akpinngbin nso, naan bé bó jasin fɛ’n nvle 230 tra su be nun. Nanwlɛ, wafa nga be trɛli sɔ’n, ɔ ti abonuan, ɔ ti kɛ mutardi mma’n mɔ Zezi buli su ɲanndra’n sa!

⁷ ?Sanngɛ ngalɛ’n su yɛ trɛlɛ’n ká ɔ? Cɛcɛ. Blɛ kun wá jú mɔ be nga be lo be wun man Ɲanmiɛn kɛ ɔ sie be’n, be kunngba cɛ yɛ bé trán asiɛ wunmuan’n su ɔ. Be nga be tanndan Ɲanmiɛn Sielɛ’n i ɲrun’n, be su tranman lɛ kun mlɔnmlɔn. Nán klɔ sran yɛ ɔ́ yó i sɔ liɛ’n niɔn. Ɲanmiɛn Zoova m’ɔ ti nglo nin asiɛ’n be Famiɛn’n, yɛ ɔ́ yó i sɔ like’n niɔn. (An kanngan Daniɛl 2:34, 35 nun.) Blɛ sɔ nun’n, Ɲanmiɛn nuan ndɛ kun ekun mɔ Ezai kannin’n, i nuan yía. Ndɛ sɔ’n yɛle kɛ: ‘Kɛ jenvie’n i nzue’n ɔ kata i bo lɔ’n su’n ju’n, i kunngba’n niɔn, asiɛ’n wunmuan’n su sran’m bé sí Anannganman lelele.’—Eza. 11:9.

8. (a) ?Zezi i ɲanndra nun’n, wan mun yɛ anunman’m be ti be nzɔliɛ ɔ? (b) ?Ninnge benin mun yɛ asɔnun’n sasa e be lika ɔ?

⁸ Awie guafuɛ’n i su ɲanndra nga Zezi buli nun’n, anunman nga be wa dili awie mɔ awie guafuɛ’n sanndili’n, be ti Ɲanmiɛn Sielɛ’n i kpɔfuɛ’m be nzɔliɛ. (Mar. 4:4) Anunman sɔ’m be nin anunman nga Zezi seli kɛ be wa fiali mutardi waka mɔ yɛle Ɲanmiɛn Sielɛ’n i fɔnvɔ’n bo’n, be timan kun. Mutardi mma’n i su ɲanndra nun’n, anunman’m be ti sran nga be awlɛn ti kpa’n be nzɔliɛ. Be yɛ be kunndɛ fiawlɛ Klistfuɛ asɔnun nun’n niɔn. Ikisa’n, asɔnun’n sasa be. Ɔ maan, be leman nzuɛn tɛ m’ɔ kwla saci be nin Ɲanmiɛn be afiɛn ɔn. Kpɛkun, be yoman mɛn tɛ nga i nun ninnge fiɛnfiɛn’m be wie fi. (An fa sunnzun Ezai 32:1, 2.) Kɛ Zoova kán e ɲrun lɔ sa’m be ndɛ’n, i kusu fali Mɛsi i Sielɛ’n sunnzunnin waka kun. Ɔ seli kɛ: ‘Ń tɛ́ i oka nga m’ɔ ti fleiin kpa Izraɛli lɔ’n i su. Ɔ́ ɲán sama, yɛ ɔ́ sú mma. Ɔ́ yó sɛdri klanman kpa. Anunman wafa’n kwlaa bé kó trɛ́n i sama fleiin’m be fɔnvɔ’n bo.’—Eze. 17:23.

Kpaun are’n i su ɲanndra’n

9, 10. (a) ?Ngue yɛ Zezi yili i nglo kpaun are’n i su ɲanndra ng’ɔ buli’n nun ɔn? (b) ?Biblu’n nun’n, ngue yɛ blɛ sunman nun’n, kpaun are’n ti i nzɔliɛ ɔ? ?Yɛ kosan benin yɛ é wá tɛ́ su ɔ?

⁹ Nán cɛn ngba yɛ sran ɲinma wun wafa nga like kun trɛ’n niɔn. Ɲanndra kun ekun mɔ Zezi buli’n nun’n, ɔ yili i sɔ liɛ’n i nglo. Ɔ seli kɛ: ‘Ɲanmiɛn sielɛ’n ɔ fa kpaun are mɔ bla kun fa guali kpaun nzuɛn m’ɔ kwla ju kilo ablaɔn nin nnun nun’n, naan i wunmuan’n w’a wla.’ (Mat. 13:33) ?Ngue yɛ kpaun are’n ti i nzɔliɛ ɔ? ?Yɛ wafa sɛ yɛ i sɔ’n kan Ɲanmiɛn Sielɛ’n i trɛlɛ’n i ndɛ ɔ?

¹⁰ Biblu’n nun’n, blɛ sunman’n, kpaun are’n ti sa tɛ’n i nzɔliɛ. Kɛ akoto Pɔlu kán wafa nga sa tɛ yofuɛ kun saci laa Korɛnti klɔ’n i su asɔnun’n, ɔ fali kpaun are’n sunnzunnin sa tɛ’n. (1 Kor. 5:6-8) ?Ɲanndra nga Zezi buli nun’n, like tɛ wie yɛ Zezi fali kpaun are’n sunnzunnin i trɛlɛ’n niɔn?

11. ?Laa nun Izraɛlifuɛ’m be blɛ su’n, ngue yɛ be fa kpaun are’n be yo ɔ?

¹¹ Ka naan y’a tɛ kosan sɔ’n su’n, ɔ fata kɛ e bu like nsan be akunndan. I klikli’n yɛle kɛ, Zoova w’a kplinman su kɛ delɛ cɛn dilɛ nun’n, be di kpaun mɔ kpaun are o nun’n. Sanngɛ ɔ kplinnin su kɛ, kɛ bé yí tɛ uflɛ mun’n, be fa ninnge mɔ kpaun are o be nun’n. Ɔ maan, bo kun yolɛ’n i tɛ nga be yi nun’n, be fa kpaun mɔ kpaun are o nun’n. Sran ng’ɔ yi tɛ sɔ’n, i bɔbɔ i klunklo su yɛ ɔ yi tɛ man Zoova ɔ. Ninnge kpanngban nga Zoova yo mɛnnin i’n ti’n, ɔ yo sɔ fa lɛ i ase. Sran nga be di tɛ sɔ’n i nun like’n, be kwlaa be klun jɔ.—Sau. 7:11-15.

12. ?Wafa sɛ yɛ Biblu’n fa like kunngba’n fa sunnzun like fanunfanun ɔn?

¹² Like’n i nɲɔn su’n yɛle kɛ, Ɲanmiɛn Ndɛ’n nun’n, like kun kwla yo like tɛ wie i nzɔliɛ. Sanngɛ Ɲanmiɛn Ndɛ’n i bue uflɛ nun’n, like kunngba sɔ’n kwla yo like kpa wie i nzɔliɛ. I kun yɛle kɛ, 1 Piɛr 5:8 nun’n, be fa Satan sunnzun asɔmɔli, afin ɔ yo wlɛ, kpɛkun ɔ yo sran’m be abɔlɛ. Sanngɛ Sa Nglo Yilɛ 5:5 nun’n, kɛ bé kán Zezi ndɛ’n, be se kɛ ɔ ti ‘asɔmɔli’n mɔ fin Zida osu nun.’ Afin asɔmɔli’n ti sa nuan su yolɛ yakpa su’n i nzɔliɛ.

13. ?Ngue like yɛ kpaun are’n i su ɲanndra nga Zezi buli’n, ɔ kle e wafa nga sran kun fɛ i wun mantan Ɲanmiɛn’n i su ɔ?

¹³ Like’n i nsan su’n yɛle kɛ, ɲanndra nga Zezi buli nun’n, w’a seman kɛ kpaun are’n sacili kpaun nzuɛn wunmuan’n naan ɔ kwlá yoman like fi ye kun. Sanngɛ wafa nga be yo kpaun titi’n yɛ ɔ kɛnnin i ndɛ ɔ. Bla’n bɔbɔ yɛ ɔ fali kpaun are’n niɔn. Kusu’n, ɔ fa yoli like kpa. Yɛle kɛ ɔ fa kpaun are’n guɛli i kpaun nzuɛn’n nun. Sanngɛ, wafa nga kpaun are’n yoli maan kpaun nzuɛn’n wlali’n, bla’n i ɲinma kwlá wunmɛn i. I sɔ liɛ’n ti kɛ awie guafuɛ m’ɔ lafili’n i liɛ’n sa. Zezi seli kɛ ‘awie’n bɔbɔ fifi, ɔ ɲin, awie guafuɛ’n siman kɛ ɔ yo m’ɔ yo sɔ’n.’ (Mar. 4:27) Nanwlɛ, ɲanndra sɔ’n kle weiin kɛ sran ɲinma wunman wafa nga sran kun fɛ i wun mantan Ɲanmiɛn’n! Atrɛkpa’n kɛ ɔ́ bó i bo’n, e wunmɛn i, sanngɛ e wun wafa nga i bo’n gua’n.

14. ?Ɲanndra’n nun’n, kɛ kpaun are’n yo maan ble sanmlɛn’n i wunmuan’n yɛ ɔ wla’n, i sɔ’n ti ngue like i nzɔliɛ ɔ?

¹⁴ Wafa nga sran kun fɛ i wun mantan Ɲanmiɛn’n, sran ɲinma wunmɛn i. Asa kusu’n, nán lika kunngba cɛ yɛ sa sɔ’n ju ɔ, sanngɛ asiɛ wunmuan’n su yɛ ɔ ju ɔ. Kpaun are’n i su ɲanndra’n kle i sɔ liɛ’n wie. Afin ‘ble sanmlɛn m’ɔ ju kilo ablaɔn nin nnun’n,’ i wunmuan’n yɛ kpaun are’n yo maan ɔ wla ɔ. (Lik 13:21) Ɔ maan, kɛ nga kpaun are’n fa yoli’n sa’n, Ɲanmiɛn Sielɛ’n i jasin fɛ’n bolɛ’n ti’n, sran kpanngban be fa be wun mantannin Ɲanmiɛn. I sɔ’n ti’n, siɛn’n be bo Ɲanmiɛn Sielɛ’n i jasin fɛ’n “lele fa ju asiɛ’n i awieliɛ.” (Yol. 1:8; Mat. 24:14) Nanwlɛ, kɛ mɔ e bo Ɲanmiɛn Sielɛ’n i jasin fɛ’n wie’n ti’n, e cenjele nun ɔn!

Lala’n i su ɲanndra’n

15, 16. (a) An bo lala’n i su ɲanndra’n i kpɔlɛ. (b) ?Ngue yɛ lala’n ti i nzɔliɛ ɔ? ?Yɛ Ɲanmiɛn Sielɛ’n i trɛlɛ’n i su like benin yɛ ɲanndra sɔ’n kle e ɔ?

¹⁵ Sɛ be nga be se kɛ be ti Zezi Klist i sɔnnzɔnfuɛ’n be sɔnnin o, sɛ b’a sɔnman o, nɛ́n i yɛ ɔ ti cinnjin ɔn. Like ng’ɔ ti cinnjin’n yɛle kɛ, maan be yo Zezi i sɔnnzɔnfuɛ kpa. Lala’n i su ɲanndra nga Zezi buli’n nun’n, ɔ kleli Ɲanmiɛn Sielɛ’n i su like sɔ’n. Ɔ seli kɛ: ‘Ɲanmiɛn sielɛ’n ɔ fa lala ekun. Be gua lala sɔ’n i jenvie nun, ɔ fa jue wafawafa’n kwlaa’n ekun.’—Mat. 13:47.

¹⁶ Lala m’ɔ tra jue wafawafa’n kwlaa’n, ɔ ti Ɲanmiɛn Sielɛ’n i jasin fɛ’n bolɛ’n i nzɔliɛ. Zezi se ekun kɛ: ‘Kɛ lala’n yi’n, be cuɛn kɔ cenje’n su lɔ, be tran ase, be kpa jue’n i kpakpafuɛ’n guɛ gbogbo nun, yɛ be guɛ i tɛtɛfuɛ’n blo. Kɛ mɛn’n i awieliɛ’n ɔ́ wá yó sɔ ɔ: anzi’m bé bá, bé wá yí sran klunwifuɛ mun nanwlɛfuɛ’m be nun, yɛ bé gúa be sin dan kpa’n nun, lɔ yɛ bé sún bé dí be je’n niɔn.’—Mat. 13:48-50.

17. ?Jue nga be kan be ndɛ lala’n i su ɲanndra’n nun’n, blɛ benin nun yɛ be kpa be ɔ?

¹⁷ Zezi seli kɛ jɔlɛ dilɛ cɛn’n nun’n, kɛ ɔ́ bá’n, ɔ́ yí i famiɛn’n nglo. Kpɛkun ɔ́ bú bua mun nin boli’m be nun, ɔ́ gúa be ngunminngunmin. ?Blɛ nga bé kpá jue’m be nun’n, i kunngba’n nun yɛ bé bú bua mun nin boli’m be nun ɔn? (Mat. 25:31-33) Cɛcɛ. Ɲrɛnnɛn dan’n nun yɛ Zezi wá bá jɔlɛ dilɛ ɔ. Sanngɛ jue’m be nun kpalɛ nga be kɛn i ndɛ lala’n i su ɲanndra’n nun’n, ɔ ju “mɛn’n i awieliɛ’n” nun.b Kusu’n, e o i sɔ blɛ’n nun. Ɲrɛnnɛn dan’n nun yɛ blɛ sɔ’n ɔ́ wíe ɔ. ?Sanngɛ wafa sɛ yɛ jue’m be nun kpalɛ’n ndɛ’n, ɔ kpɛn su andɛ ɔ?

18, 19. (a) ?E blɛ liɛ nun’n, wafa sɛ yɛ be kpa jue’m be nun ɔn? (b) ?Ngue yɛ ɔ fata kɛ be nga be awlɛn’n ti kpa’n be yo ɔ? (An nian ndɛ ng’ɔ o bue 21 nun’n i ngua lɛ’n i nun wie.)

¹⁸ Mɛn’n nga e o nun’n, be fa sunnzun jenvie’n. Yɛ i nun sran mɔ be ti kɛ jue mun sa’n, be nun miliɔn kpanngban be klo Zoova i asɔnun’n. Be nun wie’m be ba E Wla Kpɛnlɛ cɛn’n i bo. Wie mun ekun be ba asɔnun aɲia’m be bo. Yɛ wie mun kusu’n, be suan Biblu’n nun like aklunjuɛ su. ?Sanngɛ be sɔfuɛ’m be ngba be ti Klistfuɛ kpa? Be kwla ‘cuɛn be kɔ cenje’n su lɔ.’ Sanngɛ kɛ nga Zezi fa kannin’n sa’n, “jue’n i kpakpafuɛ’n” yɛ be guɛ i gbogbo’n nun ɔn. Gbogbo’n ti Klistfuɛ asɔnun’n i nzɔliɛ. Kpɛkun be gua jue’n i tɛtɛfuɛ’n m’ɔ ti nzɔliɛ like’n i blo. I agualiɛ su’n, be yi jue tɛtɛfuɛ’n gua sin dan kpa’n m’ɔ ti nzɔliɛ like’n i nun. I sɔ’n kle kɛ bé wá núnnún be.

¹⁹ Jue kpanngban nga lala’n trali be’n, be nun wie’m be ti tɛtɛ. I sɔ’n ti’n, be guaman be gbogbo’n nun. I kunngba’n, sran kpanngban be sɔ jasin fɛ’n mɔ e kan kle be’n nun klanman. Sanngɛ nán be ngba yɛ be fa su lele be kaci Zezi i sɔnnzɔnfuɛ ɔ. Sran wie’m be si’n nin be nin’n be ti Klistfuɛ, sanngɛ b’a kplinman su le kɛ bé káci Zezi i sɔnnzɔnfuɛ sakpa. Annzɛ kusu’n, kɛ be suli Zoova le nɲɔn kun’n, i sin’n be yacili i sulɛ.c (Eze. 33:32, 33) Sanngɛ ɔ ti cinnjin kpa kɛ, sran kwlaa nga be awlɛn’n ti kpa’n be kaci asɔnun mɔ be fa sunnzun gbogbo’n i nunfuɛ. Kpɛkun ɔ fata kɛ be ka asɔnun’n m’ɔ sasa be’n i nun lele naan jɔlɛ dilɛ cɛn’n w’a ju.

20, 21. (a) ?Zezi i ɲanndra m’ɔ kan Ɲanmiɛn Sielɛ’n i jasin fɛ’n i trulɛ’n ɔ nin Zezi i sɔnnzɔnfuɛ’m be trɛlɛ’n be ndɛ’n, ngue like yɛ ɔ kle e ɔ? (b) ?Ngue yɛ amun a fua kɛ amún yó ɔ?

²⁰ ?Ngue yɛ Zezi i ɲanndra mɔ be kan Ɲanmiɛn Sielɛ’n i trɛlɛ’n ɔ nin i jasin fɛ’n bolɛ’n i trulɛ’n be ndɛ’n, be kle e ɔ? I klikli’n yɛle kɛ, kɛ nga mutardi mma’n fa ɲin’n sa’n, sran kpanngban kpa be fali Ɲanmiɛn Sielɛ’n i jasin fɛ’n su. Like fi kwlá jranman Zoova i junman’n, saan jasin fɛ’n trú! (Eza. 54:17) Asa ekun’n, be kwlaa nga be yo ‘be sua waka’n i sama’m be fɔnvɔ’n nun’n,’ Ɲanmiɛn Sielɛ’n sasa be Satan nin i mɛn tɛ’n be lika. Like’n i nɲɔn su’n yɛle kɛ, Ɲanmiɛn yɛ maan ɔ yo kpa ɔ. Kpaun are’n yo maan kpaun nzuɛn wunmuan’n wla. I kunngba’n, kɛ mɔ Ɲanmiɛn Sielɛ’n i jasin fɛ’n tru dan kpa’n ti’n, sran kpanngban kpa be fali be wun mantannin Ɲanmiɛn. Sanngɛ nán cɛn ngba yɛ sran ɲinma wun wafa ng’ɔ fa yo sɔ’n niɔn. Kusu’n, nán cɛn ngba yɛ e wun wafa ng’ɔ fa yo sɔ’n i wlɛ ɔ. Sanngɛ i kwlaa yoli o, sran’m be fa be wun mantan Ɲanmiɛn yɛ be kaci Zezi i sɔnnzɔnfuɛ! Like’n i nsan su’n yɛle kɛ, nán be kwlaa nga be sɔ jasin fɛ’n nun klanman’n, yɛ be awlɛn’n ti kpa sakpa ɔ. Wie’m be ti kɛ jue’n i tɛtɛfuɛ’n nga Zezi kɛnnin i ndɛ ɲanndra ng’ɔ buli nun’n be sa.

²¹ Sanngɛ, kɛ e wun kɛ Zoova bɔbɔ maan sran nga be awlɛn’n ti kpa’n be bɛli i sin’n, nanwlɛ, i sɔ’n yo e fɛ kekleke! (Zan 6:44) Kusu’n, wafa nga Zezi i sɔnnzɔnfuɛ’m be uka su nvle kpanngban nun’n, ɔ ti abonuan. Sanngɛ Ɲanmiɛn Zoova yɛ maan Zezi i sɔnnzɔnfuɛ’m be trɛ sɔ ɔ. Kɛ mɔ e wun i sɔ’n ti’n, ɔ fata kɛ e nanti ndɛ yɛ mɔ be klɛli w’a cɛ kpa’n i su. Yɛle kɛ: ‘Lua ɔ ninnge mun nglɛmun nun. Afin a siman ng’ɔ́ wá yó kpa ɔ, sɛ nglɛmun liɛ’n nin o, sɛ nnɔsua nun liɛ’n nin o, sɛ kusu nglɛmun nun liɛ’n nin nnɔsua nun liɛ’m be nɲɔn yɛ bé yó kpa o.’—Aku. 11:6.

[Ja ngua lɛ ndɛ mun]

?Wafa sɛ yɛ amún tɛ́ kosan’m be su ɔ?

• ?Ngue yɛ mutardi mma’n i su ɲanndra’n kle e Ɲanmiɛn Sielɛ’n i trɛlɛ’n, ɔ nin wafa ng’ɔ sasa sran mun Satan nin i mɛn tɛ’n be lika’n, be su ɔ?

• ?Ɲanndra nga Zezi buli’n nun’n, ngue like yɛ kpaun are’n ti i nzɔliɛ ɔ? ?Yɛ Ɲanmiɛn Sielɛ’n i trɛlɛ’n i su ndɛ nanwlɛ benin yɛ Zezi kannin ɔn?

• ?Ɲanmiɛn Sielɛ’n i trɛlɛ’n i su like benin yɛ lala’n i su ɲanndra’n kle e ɔ?

• ?Wafa sɛ yɛ é yó naan y’a ka be nga be ‘guali be gbobgo nun’n,’ be nun ɔn?

[Foto mun, bue 26]

?Ngue like yɛ mutardi mma’n i su ɲanndra’n kle e trɛlɛ mɔ y’a trɛ’n su ɔ?

[Foto, bue 27]

?Ngue like yɛ kpaun are’n i su ɲanndra’n kle e ɔ?

[Foto, bue 29]

?Ngue yɛ jue’m be nun kpalɛ’n ti i nzɔliɛ ɔ?