?Ngue ti yɛ ɔ fataman kɛ e yaci sein nantilɛ ɔ?

“Anannganman, [...] kan min ti ndɛ man min, afin m’an yoman sa.”—JUE MUN 7:9.

1, 2. ?Sa benin wie mun ti yɛ sein nantilɛ’n kwla yo kekle man Klistfuɛ mun ɔn?

MAAN e bu sa nga’m be su akunndan e nian. Suklu ba kun i wiengu’m be su klɔklɔ i naan ɔ fa ya naan ɔ kpɛ be nzowa annzɛ ɔ nin be tu. ?I lɛ’n nun’n, ɔ nin be kán annzɛ ɔ́ yáci cɛ́ be naan ɔ́ kɔ́ i kɔlɛ? Bian kun kusu’n, i ngunmin su di junman ɛntɛnɛti su i awlo lɔ. Ɔ́ dí junman kpɛkun ɔn, adrɛsi kun m’ɔ blɔ sa sukusuku yolɛ’n yɛ w’a fite yɛ. ?Bian’n, ɔ́ nían sa sɔ mun annzɛ ɔ su nianman be? Klistfuɛ bla kun kusu nin i wiengu’m be su koko yalɛ. Kpɛkun w’a wun kɛ be su kan aniaan bla kun i wun ndɛ. ?Ɔ́ fɛ́ i wun wlá nun annzɛ ɔ́ yó naan b’a yaci ndɛ sɔ’n i kanlɛ naan b’a kan ndɛ uflɛ?

² Kannzɛ be sran nsan sɔ’n, ɔ le kun nin i su ndɛ’n, sanngɛ sa ng’ɔ o be su’n ti kun. Yɛle kɛ, ɔ fata kɛ be kwlaa be mian be ɲin naan b’a kle kɛ be ti Klistfuɛ mɔ be nanti sein ɔn. ?Yɛ e li? ?Kɛ e sa mian’n, annzɛ e kunndɛ kɛ é yó like wie’n, e bu sein nantilɛ’n i akunndan? Afin, kɛ sran’m be o lɛ’n, tralɛ nga be ko wla’n, annzɛ juejue yolɛ titi’n, yɛ be bu i akunndan cɛn kwlaa ɔ. Annzɛ kusu’n, be nuan nun aliɛ kunndɛlɛ ɔ nin be nin be janvuɛ’m be afiɛn ndɛ’n, yɛ soman bolɛ’n yɛ ɔ ti be cinnjin ɔn. E kusu’n, ninnge sɔ’m be kwla lo e kpa. ?Sanngɛ kɛ Zoova nian e awlɛn nun’n, e si like ng’ɔ ti i cinnjin’n? (Jue Mun 139:23, 24) E sein nantilɛ’n yɛ ɔ ti i cinnjin ɔn.

3. ?Like cinnjin kpa benin yɛ Zoova yaci e nun kɛ e bɔbɔ e yo ɔ? ?Yɛ ngue yɛ é wá yíyí nun like suanlɛ nga nun ɔn?

³ “Like kpa kwlaa nga be fa man sran’n, ɔ nin like kpa kwlaa nga be nyɛn i’n,” be fin Zoova. I yɛ ɔ man e ninnge wafawafa nga e tinuntinun e le be mun ɔn. (Zak 1:17) E wunnɛn ng’ɔ o yɛ’n, ɔ nin e akunndan’n, yɛ sɛ e ti juejue kan’n, ɔ fin Ɲanmiɛn. Like uflɛ kwlaa nga e kwla yo’n kusu’n, ɔ fin i. (1 Korɛntfuɛ Mun 4:7) Sanngɛ kɛ ɔ ti sein nantilɛ fuɛ’n, Zoova mianman e kɛ e nanti sein. I lɛ nun’n, ɔ yaci e nun maan e bɔbɔ e yo like nga e kunndɛ kɛ é yó’n. (Mmla’n 30:19) Ɔ maan, kɛ be se kɛ sran kun nanti sein’n, é wá yíyí nun. Kpɛkun é wá kán sa nga ti yɛ i sɔ’n ti cinnjin kpa’n, be nun nsan be ndɛ.

?Kɛ be se kɛ sran kun nanti sein’n, i bo’n yɛle benin?

4. ?Kɛ be se kɛ sran kun nanti sein’n, i bo’n yɛle benin? ?Zoova i mmla ng’ɔ kpɛli i nnɛn nga be fa yi tɛ’n su’n, afɔtuɛ benin yɛ ɔ kwla man e ɔ?

⁴ Kɛ be se kɛ sran kun nanti sein’n, sran kpanngban be wunmɛn i wlɛ kpa. Be liɛ’n, be bu i kɛ sran ng’ɔ nanti sein’n yɛle sran ng’ɔ di nanwlɛ’n. Nanwlɛ dilɛ ti cinnjin sɔ. Sanngɛ nɛ́n i sɔ ngunmin yɛ maan sran kun kwla se kɛ ɔ nanti sein ɔn. Biblu’n nun’n, sran ng’ɔ nanti sein’n yɛle sran ng’ɔ yo sa i nuan su mɔ be kwlá sacimɛn i wun’n. Ebre ndɛ mma mɔ be fa kan like annzɛ sran m’ɔ be ti ‘sein’n’ be ndɛ’n, be fin ndɛ mma kun mɔ i bo’n yɛle kɛ fiɛn kaan sa nunman like sɔ’n annzɛ sran sɔ’n i wun naan ɔ ti kpa’n. Be fa ndɛ mma sɔ’m be nun kun fa kan tɛ nga be yi be fa man Zoova’n i ndɛ. Yɛle kɛ, kɛ ɔ ko yo naan Zoova w’a sɔ nun klanman’n, ɔ fataman kɛ lɛ kaan sa tran nnɛn sɔ’n i wun. (An kanngan Saun Yolɛ 22:19, 20 nun.) Ɔ maan, kɛ wie’m be ɲin kpali i ndɛ’n su mɔ be fali nnɛn mɔ be kwlaman nanti’n annzɛ be ja’n ti buwa’n annzɛ mɔ be wunman ase’n fa mannin Zoova’n, ɔ ijɔli be kpa.—Malasi 1:6-8.

5, 6. (a) ?Sunnzun ase benin wie mun yɛ be kle kɛ ninnge nga be ti kpa’n yɛ be ti e nanndoliɛ ɔ? (b) ?Sɛ klɔ sran’m be nanti sein’n i bo’n yɛle kɛ be fɔnman le? An yiyi nun.

⁵ Sɛ sran kun kunndɛ ninnge nga be ti kpa mɔ lɛ nunman be wun’n naan be ti i nanndoliɛ’n, ɔ boman e nuan. I wie yɛle sran kun mɔ i junman liɛ ng’ɔ di’n yɛle kɛ ɔ kunndɛ fluwa kpakpa mun sie’n. Ɔ kunndɛli fluwa kpa kun lele ɔ́ wún i ɔ, i nun nɲa wie’m b’a wie titi. I sa sin m’ɔ bubuli i ti’n, ɔ fa sieli i osu’n nun. I wie ekun yɛle bla kun m’ɔ kɔ klenzua tolɛ gua bo’n. Kɛ ɔ ju lɔ’n, ɔ́ níannían klenzua’m be nun, ng’ɔ ti kpa’n yɛ ɔ́ fá ɔ. Ɔ su faman ng’ɔ timan kpa’n. I kunngba’n niɔn. Ɲanmiɛn kunndɛ be nga be ti kpa mɔ be fa be wla’n kwlaa guɛ i su’n.—2 Be Nyoliɛ 16:9.

⁶ Sanngɛ e kwla bu i kɛ, kɛ be se kɛ sran kun nanti sein’n yɛle kɛ fɔ kaan sa nunmɛn i nun. Kɛ mɔ fɔ’n o e nun’n ti’n, atrɛkpa’n ɔ kwla yo e kɛ e ti kɛ fluwa mɔ i nun nɲa wie’m b’a titi’n sa annzɛ kusu e ti kɛ klenzua mɔ i bue kun ti bowa’n sa. ?Cɛn wie kɛ ɔ yo e sɔ sakpa ɔ? Sɛ ɔ ti sɔ’n, maan e si kɛ Zoova seman e kɛ e yo kɛ sran m’ɔ kwlá fɔnman cɛn kun sa le ɔ. Ɔ seman e kusu kɛ e yo like ng’ɔ tra e wunmiɛn’n su’n.a (Jue Mun 103:14; Zak 3:2) Sanngɛ i waan e nanti sein. ?Kusu’n, nán sran ng’ɔ nanti sein i kunngba’n yɛle sran mɔ fɔ nunmɛn i nun’n? Cɛcɛ, nɛ́n i kunngba’n niɔn! Maan e fa sunnzun ase nga e nian. Gbanflɛn kun w’a wu talua kun ti kpo yɛ ɔ su wa jɛ i. Sɛ ɔ bu i kɛ talua’n su fɔnman le’n, nn ɔ su lɛkɛ i wun. Sanngɛ sɛ ɔ kunndɛ kɛ wafa nga talua’n klo i’n, nán ɔ klo sran uflɛ sɔ’n, i su ɔ. I kunngba’n, Zoova m’ɔ ti e ‘Nyanmiɛn’n ɔ si kwla.’ (Ezipt Lɔ Tulɛ 20:5) Ɔ seman e kɛ nán maan e fɔn le. Sanngɛ, ɔ kunndɛ kɛ i kunngba cɛ yɛ e klo i naan e su i ɔ.

7, 8. (a) ?Ajalɛ benin yɛ Zezi kleli e sein nantilɛ’n su ɔ? (b) ?Kɛ Ɲanmiɛn Ndɛ’n se kɛ be nanti sein’n, i bo’n yɛle benin?

⁷ Kɛ sran kun usali Zezi kɛ mmla’n i nun dan’n yɛle benin, wafa ng’ɔ tɛli i su’n, atrɛkpa’n ɔ te o e klun. (An kanngan Mark 12:28-30 nun.) Zezi w’a tɛmɛn i su sa ngbɛn. Sanngɛ ndɛ ng’ɔ kannin’n, ɔ nian su nantili. Afin, ɔ kloli Zoova kpa, ɔ fɛli i wla’n kwlaa guɛli i su yɛ i akunndan’n kwlaa trɛnnin i su yɛ ɔ fɛli i wunmiɛn’n kwlaa yoli like ng’ɔ kle kɛ ɔ klo i’n. I sɔ nun’n, ɔ kleli e ajalɛ kpa. Ɔ kle kɛ nán be nuan bui su yɛ be nanti sein ɔn. Sanngɛ sa kpa nga sran yo m’ɔ fin i awlɛn’n nun’n yɛ ɔ fa kle kɛ ɔ nanti sein ɔn. Sɛ e waan é nánti sein titi’n, ɔ fata kɛ e nian Zezi i ajalɛ’n su e nanti.—1 Piɛr 2:21.

⁸ Ɔ maan, kɛ Ɲanmiɛn Ndɛ’n se kɛ e nanti sein’n, i bo’n yɛle kɛ e fa e wun mantan Ɲanmiɛn Zoova lele guɛ i ti nin i bo. Yɛ Ɲanmiɛn i klun sa’n yɛ e yo ɔ. Kpɛkun like nga Ɲanmiɛn waan ɔ́ yó’n, e suɛn i bo. Ɔ maan, sɛ e yaciman sein nantilɛ’n, like nga e ko yo naan w’a jɔ Ɲanmiɛn Zoova klun’n yɛ e kunndɛ cɛn kwlaa ɔ. Ninnge nga be ti Zoova i cinnjin’n, be ti e cinnjin wie. Maan e kan sa nsan mɔ i ti yɛ i sɔ’n ti cinnjin kpa’n be ndɛ.

1. E sein nantilɛ’n ɔ nin wafa nga Zoova sie’n i su akplowa ng’ɔ tɔli’n

9. ?Wafa sɛ yɛ akplowa ng’ɔ tɔli Zoova i sielɛ’n su’n ɔ nin e sein nantilɛ’n be kɔ likawlɛ ɔ?

⁹ Sɛ e nanti sein o annzɛ e nantiman sein o, Zoova yɛ ɔ sie ɔ. I yɛ ɔ sie like kwlaa ɔ. I sielɛ’n leman awieliɛ kpɛkun ɔ si sran sie. Maan be utu i be lɛngɛ i, i yɛ ɔ́ síe titi ɔ. Sanngɛ nglo lɔ’n nin asiɛ’n su wa’n, be wa kannin Ɲanmiɛn i sielɛ sɔ’n i wun ndɛ tɛ. Ɔ maan, ɔ fata kɛ ɔ kpɛ ndɛ’n nun naan sran’m be kwlaa be wun i wlɛ. Yɛle kɛ, ɔ kle kɛ i sielɛ’n ti su naan ɔ si sran sie yɛ i sielɛ’n taka klolɛ su. E mɔ e ti Zoova Lalofuɛ’n, kɛ e yiyi nun kle sran’m be kɛ Ɲanmiɛn yɛ ɔ fata kɛ ɔ sie like kwlaa’n, ɔ yo e fɛ dan. ?Sanngɛ e bɔbɔ’n, wafa sɛ yɛ e kwla jran Zoova sin ɔn? ?Wafa sɛ yɛ e kwla yi i sɔ liɛ’n i nglo ɔ? Sɛ e yaciman sein nantilɛ’n yɛ é yí i sɔ liɛ’n i nglo ɔ.

10. ?Suɛn benin yɛ Satan tɔnnin i e sein nantilɛ’n su ɔ? ?Yɛ wafa sɛ yɛ amun kunndɛ kɛ amún tɛ́ sú ɔ?

¹⁰ Sa nga ti yɛ ɔ ti cinnjin kɛ e tinuntinun e nanti sein’n, maan e yiyi nun e nian. Kɛ e niɛn i siin’n, e wun kɛ Satan seli kɛ sran fi su jranman Zoova sin naan e nun kun sa kwlá sunmɛn i klolɛ su. Afin, anzi kpanngban be ɲrun lɛ’n, mmusu’m be si Satan seli Zoova kɛ: “Sran i wunnɛn’n yɛ ɔ ti cinnjin i sa nun ɔn. Kannzɛ sran kun i anyanbeun’n ɔ ti sɛ, sɛ sa’n tɔ cinnjin’n kpa’n, ɔ fɛ i anyanbeun’n fa to i ti ɔ ɔ yo ye.” (Zɔb 2:4) Kɛ nga e fa kɛnngɛn i lɛ’n, nán Zɔbu m’ɔ ti sran kpa’n, i kunngba yɛ Satan tɔnnin i suɛn ɔn. Ɔ tɔnnin sran’m be kwlaa be suɛn. I sɔ’n ti’n, Biblu’n waan Satan ti e “niaan’m be sanmanfuɛ.” (Sa Nglo Yilɛ 12:10) Ɔ klɔklɔ Zoova se kɛ Klistfuɛ fi kwlá sumɛn i guɛmɛn i ti nin bo. Ndɛ sɔ’n ti e kwlaa e liɛ. Satan waan e wunnɛn m’ɔ ti e cinnjin’n ti’n, sɛ sa tɔ e su’n, é jáso Zoova wun. ?Kɛ amun ti i sɔ’n ndɛ’n, ɔ yo amun sɛ? ?Sɛ amun kwla kle kɛ Satan ti atofuɛ’n, ɔ su yoman amun fɛ? Sɛ amun a yaciman sein nantilɛ’n, amún kwlá klé sɔ.

11, 12. (a) ?Sa nsan benin yɛ be kle kɛ e sein nantilɛ’n i su ndɛ’n ti’n, ajalɛ nga e fa be cɛn kwlaa’n be ti cinnjin ɔn? (b) ?Ngue ti yɛ e sein nantilɛ’n ti e cenjele like ɔ?

¹¹ E sein nantilɛ’n i su ndɛ’n ti’n, ajalɛ nga e fa be cɛn kwlaa’n be ti cinnjin kpa. Maan e bu sa nsan nga e fa fitili like suanlɛ nga su’n, be akunndan ekun e nian. ?Wafa sɛ yɛ sran sɔ’m be kwla kle kɛ be nanti sein ɔn? Ba’n i liɛ’n, ɔ yoli kɛ ɔ tɛ i janvuɛ’m be su naan ɔ nin be tu. Sanngɛ i wla kpɛn afɔtuɛ nga su: “N sran kpa mun, nán amun se kɛ amun bɔbɔ amún tú amun klunngbɔ’n, sanngɛ an yaci man Nyanmiɛn, afin be klɛli i kɛ: ‘E Min’n se kɛ: “Min yɛ n tu klunngbɔ’n niɔn, min yɛ ń túa be kalɛ ɔ.”’” (Rɔmfuɛ Mun 12:19) I sɔ’n ti’n, ba’n yaci be lɛ ɔli. Bian nga kusu m’ɔ su nian ɛntɛnɛti’n, ɔ kwla nian sa sukusuku mɔ be kle be’n. Sanngɛ i wla kpɛnnin Zɔbu i ndɛ ng’ɔ kɛnnin i yɛ’n su: “N tali nda kɛ n faman min nyinma n kpɛman talua wie kannglɛ.” (Zɔb 31:1) Ɔ maan, i kusu w’a nianman sa sukusuku sɔ’m be lɔ afin be ti kɛ duwlɛ sa i ɲrun. Yɛ bla nga mɔ i wiengu’m be su kan sran wun ndɛ’n, ɔ kwla se kɛ: ‘Maan n sie n su kan.’ Sanngɛ i wla kpɛnnin afɔtuɛ nga su: “Maan e kwlaa e yo like ng’ɔ jɔ e wiengu klun’n, i sɔ’n nun e ukɛ i maan ɔ yo kpa.” (Rɔmfuɛ Mun 15:2) Sran wun ndɛ kanlɛ m’ɔ kwla fɛ i wun wla nun’n, ɔ kwlá yoman naan sran w’a yo kpa. Afin i sɔ’n ti i niaan bla’n i wun sacilɛ, yɛ e si Ɲanmiɛn kusu klomɛn i sɔ’n. I sɔ’n ti’n, w’a fɛmɛn i wun w’a wlaman be ndɛ’n nun. Ɔ yoli maan be kannin ndɛ uflɛ.

¹² Ajalɛ nga Klistfuɛ sɔ’m be tinuntinun be fali’n, ɔ ti kɛ be su se kɛ: ‘Zoova yɛ ɔ sie min ɔn. Sa sɔ nun’n, like ng’ɔ ko jɔ i klun’n yɛ ń yó ɔ.’ ?Kɛ amun kusu amun fa ajalɛ’n, akunndan kunngba’n yɛ amun bu ɔ? Sɛ i sɔ’n yɛ amun yo’n nn ndɛ fɛfɛ ng’ɔ o yɛ’n i su yɛ amun nanti ɔ. Ɔ se kɛ: “Min wa, fa akunndan nanti. Sɛ a fa akunndan nanti’n, ń klún jɔ́. I liɛ’n, sɛ sran kan min wun ndɛ’n, ń kwlá sɔ́ su.” (Nyanndra Mun 27:11) ?Nanwlɛ kɛ e kwla yo naan Ɲanmiɛn i klun w’a jɔ’n, nán e cenjele nun ɔn? ?I sɔ’n wlaman e fanngan kɛ e nanti sein titi?

13. ?Wafa sɛ yɛ ndɛ nga Zɔbu nin Davidi be kannin’n, be kle kɛ e sein nantilɛ’n su yɛ Zoova jran di e jɔlɛ ɔ?

¹³ Kɛ e fa wun i lɛ’n, kɛ e nanti sein’n yɛ e kwla jran Zoova m’ɔ sie like kwlaa’n i sin ɔn. Ɔ maan, e seiin nantilɛ’n su yɛ Ɲanmiɛn jran di e jɔlɛ ɔ. Zɔbu wunnin i sɔ liɛ’n i wlɛ kpa. (An kanngan Zɔb 31:6 nun.) Ɔ si kɛ “toe nga ɔ ti sɛsɛ’n” yɛ Ɲanmiɛn fa sunnzun klɔ sran mun ɔn. Yɛle kɛ i mmla mɔ be ti sɛsɛ’n be yɛ ɔ fa nian sɛ e nanti seiin o. Davidi kusu seli kɛ: “Anannganman, wɔ bɔ a di nvlenvle’m be jɔlɛ’n, kan min ti ndɛ man min, afin m’an yoman sa. [...] A si sran’m be akunndan’n nin sa ng’ɔ o be klun lɔ’n.” (Jue Mun 7:9, 10) Kɛ Zoova nian e’n, like ng’ɔ kunndɛ’n, nán maan e wla fi su. Afin kɛ nga Davidi fa kannin sa’n, e sein nantilɛ’n su yɛ Zoova nian di e jɔlɛ ɔ.

2. E sein nantilɛ’n su yɛ Zoova jran di e jɔlɛ ɔ

14. ?Kannzɛ e fɔn’n, ngue ti yɛ ɔ fataman kɛ e se kɛ e kwlá nantiman sein titi ɔ?

¹⁴ Sran kpanngban kpa nga be o asiɛ’n su wa andɛ’n mɔ Ɲanmiɛn Zoova nian be akunndan’n, maan e bu i sin e nian. (1 Be Nyoliɛ 28:9) ?Kɛ ɔ nian be sɔ’n, nanwlɛ be nun nɲɛ yɛ ɔ wun be mɔ be nanti sein kɛ Klistfuɛ mun sa ɔ? Be juman lika fi! Sanngɛ nɛ́n i sɔ’n ti yɛ é sé kɛ fɔ’n m’ɔ o e nun’n ti’n, e kwlá nantiman sein ɔn. Ɔ fata kɛ e lafi su kɛ, kɛ Davidi nin Zɔbu sa’n, e kusu kannzɛ e fɔn’n, e kwla nanti sein Zoova ɲrun. ?Ngue ti ɔ? Yɛle kɛ, nán kɛ fɔ nunman sran kun nun’n ti yɛ saan fii ɔ́ kwlá nánti sein ɔn. Afin sran nsan nga be trannin asiɛ’n su mɔ fɔ nunman be nun’n, be nun nɲɔn, Adam nin Ɛvu, b’a kwlá nantiman sein b’a guɛmɛn i ti nin bo. Sanngɛ sran miliɔn kpanngban mɔ fɔ o be nun’n, be nantili seiin’n lele guɛli i ti nin bo. E kusu’n, e kwla yo sɔ wie.

15. ?Wafa sɛ yɛ Davidi kleli kɛ, sɛ e waan é ɲán like nga Ɲanmiɛn waan ɔ́ fá mán e’n, ɔ fata kɛ e nanti sein ɔn?

¹⁵ E sein nantilɛ’n su yɛ Zoova jran di e jɔlɛ ɔ. Ɔ maan i ti’n, like nga Ɲanmiɛn waan ɔ́ fá mán e’n, sɛ é ɲɛ́n i annzɛ e su ɲɛnmɛn i’n, ɔ fin i. Davidi bɔbɔ wunnin i wlɛ sɔ. (An kanngan Jue Mun 41:13 nun.) I wla m’ɔ o su kɛ Ɲanmiɛn níɛn i su tititi’n, ɔ yoli i fɛ dan. Kɛ Klistfuɛ kpa nga andɛ be o lɛ’n sa’n, Davidi kusu lafili su kɛ ɔ́ ɲán anannganman nguan. Ɔ maan, ɔ́ kwlá sú Ɲanmiɛn Zoova tititi yɛ ɔ́ fɛ́ i wun mɛ́ntɛn i kpa ekun trá laa’n. Davidi si kɛ sɛ w’a yaciman sein nantilɛ’n, i sɔ’n yó ye mɛ́n i. I kunngba’n, sɛ e kusu e nanti sein titi’n, Zoova súan e bo, ɔ́ klé e like, ɔ́ klé e atin’n yɛ ɔ́ rá e su.

3. Sein nantilɛ’n maan e kwla lafi like nga Ɲanmiɛn waan ɔ́ fá mán e’n su

16, 17. (a) ?Ngue ti yɛ amun ta nda kɛ amún su yaciman sein nantilɛ ɔ? (b) ?Kosan benin mun yɛ é yíyí nun ɔn?

¹⁶ Sɛ e le like m’ɔ e kwla fa e wla’n gua su’n, yɛ e klun kwla jɔ klanman ikisa ɔ. Ɔ maan, blɛ kekle nun’n, e kwla tra e awlɛn kpɛkun e klun jɔ. Asa ekun’n, e akunndan’n su sannganman. Biblu’n waan e wla m’ɔ o like su kɛ é ɲɛ́n i’n, ɔ ti kɛ kpongbo kle sa. (1 Tɛsalonikfuɛ Mun 5:8) Kɛ sonja kun di alɛ’n, i kpongbo kle’n sɛsɛ i ti’n. I kunngba’n, like nga e wla o su’n maan e ti’n nun su sannganman kɛ nga Satan fa sanngan sran’m be ti nun mɛn tɛ kaiin ng’ɔ su kɔ i bue nuan yɛ nun’n sa. Nanwlɛ, sɛ e leman like fi naan y’a fa e wla’n y’a gua su’n, nn e liɛ’n w’a yoman ye. Ɔ maan i ti’n, e bu e klun lɔ kpa e nian sɛ e nanti sein ti maan like nga e wla’n o su kɛ é ɲɛ́n i’n, e te lafi su kpa o. Nán maan e wla fi su kɛ, sɛ e yaciman sein nantilɛ’n, é klé kɛ e jran Zoova m’ɔ sie nglo nin asiɛ’n i sin. Kpɛkun like nga e wla o su kɛ é ɲɛ́n i’n, ɔ su fiman e sa. Ɔ maan, é srɛ́ amun kɛ amun nanti sein titi, nán amun yaci i sɔ yolɛ le!

¹⁷ Kɛ mɔ sein nantilɛ’n ti cinnjin sɔ’n ti’n, ɔ fata kɛ e bu kosan uflɛ nga’m be su akunndan. ?É yó sɛ naan y’a kwla nanti sein? ?Wafa sɛ yɛ é yó sɔ titi ɔ? ?Wafa sɛ yɛ sran kun m’ɔ yacili sein nantilɛ’n kwla fa atin sɔ’n su ekun ɔn? Like suanlɛ ng’ɔ ba lɛ’n wá yíyí nun.

[Ja ngua lɛ ndɛ’n]

?Amún tɛ́ su sɛ?

• ?Sein nantilɛ’n i bo’n yɛle benin?

• ?Akplowa ng’ɔ tɔli Zoova i sielɛ’n su’n ti’n, ngue ti yɛ e sein nantilɛ’n ti cinnjin ɔn?

• ?Wafa sɛ yɛ e sein nantilɛ’n kwla yo naan y’a kwla lafi like nga Ɲanmiɛn waan ɔ́ fá mán e’n su ɔ?

[Foto mun, bue 14]

Ninnge nga e yo be cɛn kwlaa’n, be kwla sa e sein nantilɛ’n nian.