“Bla wa su n su”
“I sin, ɔ seli be kwlaa be kɛ: ‘Sran nga i waan ɔ́ sú n su’n, maan ɔ klɛn i wun man min, yɛ ɔ suɛ i waka’n cɛn kwlaa ɔ su n su.’”—LIK 9:23.
1, 2. (a) ?Ngue ti yɛ Zezi flɛli sran mun kɛ be yo ɔ? (b) ?Wafa sɛ yɛ amun tɛli su ɔ?
KƐ Ɔ ka kaan sa Zezi wíe i junman’n di asiɛ’n su wa’n, ɔ boli jasin fɛ’n Pere lɔ. Lika sɔ’n o Zide lɔ Zurdɛn nzue ba’n i nglo lɔ lika’n i wia afiliɛ lɔ bue liɛ’n su. Gbanflɛn kun wa usɛli i like ng’ɔ kwla yo naan w’a ɲan anannganman nguan’n. Kɛ Zezi wunnin kɛ gbanflɛn’n nanti Moizi Mmla’n su sɛsɛsɛ’n, ɔ yiɛli i kɛ ɔ yo like kun. Ɔ seli i kɛ: “Kɔ, ko yo ɔ ninnge’m be atɛ, fɛ i sika’n man yalɛfuɛ mun, yɛ á nyán ninnge kpakpa nyanmiɛn su lɔ. Naan bla wa su n su.” (Mark 10:21) Amun bɔbɔ amun nian. Ɲanmiɛn mɔ like fi nunmɛn i sin’n, i Wa kunngba cɛ’n, ɔ se gbanflɛn’n kɛ ɔ su i su!
2 Gbanflɛn’n w’a kplinman flɛlɛ nga Zezi flɛli i’n su. Sanngɛ sran wie’m be kplinnin su. Kɛ ɔ́ bó i jasin fɛ bolɛ’n bo’n, ɔ seli Filipu kɛ: “Bla wa su n su.” (Zan 1:43) Filipu kplinnin su. I sin’n, ɔ kacili Zezi i akoto’m be nun kun. Zezi flɛli Matie sɔ wie, yɛ i kusu kplinnin su. (Matie 9:9; 10:2-4) I kpa’n, kɛ Zezi se kɛ ‘sran nga i waan ɔ́ sú i su’n, maan ɔ klɛn i wun mɛn i, yɛ ɔ suɛ i waka’n cɛn kwlaa ɔ su i su’n,’ be kwlaa nga be klo sa kpa yolɛ’n yɛ Zezi flɛ be ɔ. (Lik 9:23) Ɔ maan, sran kwlaa ng’ɔ klo’n, ɔ kwla su Zezi su. ?Ɔ ti amun klun su kɛ amún sú i su? E nun sunman y’a kplin Zezi i flɛlɛ m’ɔ flɛli e’n i su klanman. Yɛ kɛ e kɔ jasin fɛ’n bolɛ’n, e flɛ sran uflɛ mun wie.
3. ?Zezi i su sulɛ nun’n, wafa sɛ yɛ e kwla yo naan y’a to y’a fuanman atin’n niɔn?
3 Sanngɛ, sran nga ndɛ nanwlɛ ng’ɔ o Biblu’n nun’n yoli be fɛ laa’n, be wa yacili i nun like suanlɛ. Blɛblɛblɛ, be yacili Zezi i su sulɛ lele be ‘to fuannin atin’n.’ (Ebre Mun 2:1) ?É yó sɛ naan y’a tɔmɛn i sɔ aya’n nun wie? Ɔ ti kpa kɛ e fa kosan yɛ mun e usa e wun: ‘?Ngue ti yɛ n kplinnin su kɛ é sú Zezi su ɔ? ?Kɛ be se kɛ be su Zezi su’n, i bo’n yɛle benin?’ Sɛ kosan nɲɔn sɔ’m be su tɛlɛ’n ka e klun’n, ɔ́ úka e naan ajalɛ nga e fɛli i kɛ é ká nguan’n i atin’n su’n, y’a jran su kpa. Asa ekun’n, ɔ́ úka e naan y’a wla sran uflɛ’m be fanngan naan b’a su Zezi su.
?Ngue ti yɛ e su Zezi su ɔ?
4, 5. ?Ngue ti yɛ ɔ nin fata kɛ Zezi yɛ ɔ sie e ɔ?
4 Zeremi m’ɔ ti Ɲanmiɛn nuan ijɔfuɛ’n, ɔ seli kɛ: “Anannganman, n si kɛ sran’n i nguan’n nunmɛn i sa nun. Ajalɛ ng’ɔ tu’n, ɔ finmɛn i.” (Zeremi 10:23) Kɛ ɔ fɛ i laa lele ju andɛ’n, klɔ sran’m be aeliɛ’n kle kɛ Zeremi i ndɛ sɔ’n ti nanwlɛ. Sran kwlakwla wun i wlɛ weiin kpa kɛ klɔ sran mɔ fɔ o be nun’n, be sie be wun ɔn, ɔ yoman ye. Kɛ mɔ e wunnin i wlɛ kɛ Zezi kwla yo e Siefuɛ, naan ɔ leman klɔ sran fi m’ɔ kwla yo kɛ i sa’n, i ti yɛ e kplinnin su kɛ é sú i su ɔ. Maan e fa e ɲin e sie ninnge nga ti yɛ Zezi kwla yo e siefuɛ’n be nun wie’m be su e nian.
5 I klikli’n yɛle kɛ Zoova bɔbɔ yɛ ɔ kpali Zezi kɛ ɔ yo Mɛsi’n niɔn. ?Sɛ w’a yoman kɛ e Yifuɛ’n sa’n, wan cɛ yɛ ɔ kwla si sran ng’ɔ kwla yo e Siefuɛ kpa’n niɔn? Sa’n i nɲɔn su’n yɛle kɛ Zezi kleli e ajalɛ kpa mɔ e kwla nian su ɔ. (An kanngan Ezai 11:2, 3 nun.) I ajalɛ ng’ɔ kle e’n, fiɛn kaan sa nunman nun. (1 Piɛr 2:21) Sa’n i nsan su’n yɛle kɛ Zezi nian be nga be su i su’n be lika kpa. Wulɛ mɔ sran’m be ti ɔ wuli’n, ɔ yi i sɔ liɛ’n i nglo. (An kanngan Zan 10:14, 15 nun.) Asa ekun’n, Zezi kleli kɛ ɔ ti bua tafuɛ kun m’ɔ niɛn i bua’m be lika kpa ɔ. Afin ɔ kle e atin ng’ɔ ko man e aklunjuɛ ikisa’n, naan e ɲrun lɔ y’a ɲan anannganman nguan. (Zan 10:10, 11; Sa Nglo Yilɛ 7:16, 17) Sa nga y’a wun be lɛ’n, ɔ nin sa uflɛ wie mun ekun ti’n, kɛ e fali ajalɛ kɛ é sú Zezi su’n, i sɔ’n ti ngwlɛlɛ aeliɛ. ?Sanngɛ kɛ be se kɛ be su Zezi su’n, i bo’n yɛle benin?
6. ?Kɛ be se kɛ be su Zezi su’n, i bo’n yɛle benin?
6 Nán be nuan nun sa ngbɛn mɔ be se kɛ be ti Klistfuɛ’n ti yɛ ɔ ti kɛ be su Klist su ɔ. Sran ko ju akpi ngbinngbin nɲɔn be se be wun kɛ be su Klist su andɛ. Sanngɛ be aeliɛ’n kle kɛ be ti sran mɔ be “saci mmla’n.” (An kanngan Matie 7:21-23 nun.) Ɔ maan sɛ sran wie’m be kunndɛ kɛ bé sú Zezi su’n, e kle be kɛ ajalɛ kwlaa nga Klistfuɛ kpa’m bé fá’n, be nanti ninnge nga Zezi kleli’n su, yɛ be niɛn i ajalɛ’n su cɛn kwlakwla. Kɛ ɔ ko yo naan y’a wun i wlɛ kpa’n, maan e kan Zezi i su ninnge nga e si be’n, be nun wie’m be ndɛ e nian.
Maan e nian Zezi i ngwlɛlɛ m’ɔ si i’n su
7, 8. (a) ?Ngue yɛ be flɛ i ngwlɛlɛ silɛ’n niɔn? ?Yɛ ngue ti yɛ Zezi si ngwlɛlɛ dan ɔn? (b) ?Wafa sɛ yɛ Zezi yili i nglo kɛ ɔ si ngwlɛlɛ ɔ? ?Yɛ wafa sɛ yɛ e kwla niɛn i liɛ’n su ɔ?
7 Ninnge kpakpa nga Zezi yili be nglo i nzuɛn nun’n, be sɔnnin. Sanngɛ maan e fa e ɲin e sie be nun nnan su. Ninnge sɔ mun yɛle i ngwlɛlɛ’n, ɔ nin i wun ase kanlɛ’n, ɔ nin i junman juejue su dilɛ’n, yɛ i sran klolɛ’n. I klikli’n, maan e kɛn i ngwlɛlɛ’n i ndɛ. Kɛ be se kɛ sran kun si ngwlɛlɛ’n, yɛle kɛ ninnge ng’ɔ si be’n, annzɛ nga ɔ wun be wlɛ’n, ɔ si wafa ng’ɔ kwla nanti su’n. Akoto Pɔlu klɛli i kɛ: “[Zezi] ti kɛ bɛtrɔ sa, i nun yɛ Nyanmiɛn fɛ i ngwlɛlɛ’n nin sa wlɛ wunlɛ’n kwlaa fiali ɔ.” (Kolɔsfuɛ Mun 2:3) ?Ninfan yɛ Zezi ɲannin ngwlɛlɛ sɔ’n niɔn? Zezi bɔbɔ seli kɛ: “Ndɛ nga n Si kan kle min’n yɛ n kan-an.” (Zan 8:28) I ngwlɛlɛ’n fin Zoova. Ɔ maan sɛ ɔ sili akunndan’n, ɔ boman e nuan.
8 I aeliɛ’n kwlaa nun’n, ɔ fali akunndan nantili. Zezi w’a kloman ninnge dandan yolɛ. Like kunngba cɛ yɛ ɔ fɛli i ɲin sieli su ɔ. Like sɔ’n yɛle Ɲanmiɛn i klun sa yolɛ’n. Ɔ fɛli i blɛ’n, ɔ nin i wunmiɛn’n kwlaa fa dili Ɲanmiɛn Siɛlɛ’n junman’n. Sɛ e “nyinma’n ti kpa’n” naan sɛ e mian e ɲin naan ɔ yo sɔ titi’n, i sɔ’n nun yɛ é fá Zezi i ajalɛ’n su ɔ. Kɛ e yo sɔ’n, e faman e blɛ’n nin e wunmiɛn’n, e yoman ninnge nga be timan cinnjin’n e kleman e wun yalɛ. (Matie 6:22) Klistfuɛ kpanngban’m be yacili ninnge wie’m be yolɛ naan b’a ɲan be ti b’a di Ɲanmiɛn junman’n i kpa b’a tra laa’n. Wie’m be kwla yoli atin bofuɛ. Sɛ amun ti i sɔfuɛ’n, amun nin mo yolɛ fata. Kɛ e ‘dun mmua fa e wun man Nyanmiɛn maan ɔ sie e’n,’ ɔ man e aklunjuɛ dan.—Matie 6:33.
Maan e kan e wun ase kɛ Zezi sa
9, 10. ?Wafa sɛ yɛ Zezi kɛnnin i wun ase ɔ?
9 Zezi i sran wafa kun ekun mɔ é wá kɛ́n i ndɛ’n, yɛle i wun ase kanlɛ’n. Klɔ sran mun’n, kɛ be man be atin kɛ be sie be wiengu’n, kpɛkun be su tu be wun. Zezi w’a yoman sɔ mlɔnmlɔn! Zoova i klun sa’n i su kpɛnlɛ nun’n, Zezi yɛ ɔ yo maan ɔ kpɛn su ɔ. Ɔ nin i sɔ ngba’n, Zezi w’a tumɛn i wun bɔɔ kaan sa. Ɔ nin i fata kɛ e nian Zezi i ajalɛ liɛ’n su. Akoto Pɔlu klɛli i kɛ: “An bu akunndan kunngba nga Krist-Jésus buli’n wie. I b’ɔ nin Nyanmiɛn be ti kun’n, w’a kunndɛman kɛ ɔ́ fɛ́ i wun súnnzun i. W’a bumɛn i sɔ’n like fi, ɔ yoli i wun kanga, ɔ yoli i wun kɛ klɔ sran sa.” (Filipfuɛ Mun 2:5-7) ?Wafa sɛ yɛ ɔ yoli sɔ ɔ?
10 Zezi nin i Si be tranlɛ mɔ be trannin likawlɛ ɲanmiɛn su lɔ’n, ɔ yoli i fɛ kpa. Sanngɛ “w’a bumɛn i sɔ’n like fi.” Ɲanmiɛn yoli maan Zuifu talua kun m’ɔ nin a siman bian’n, ɔ wunnzɛli. Ɔ dili anglo ngwlan naan w’a wu Zezi, Zozɛfu m’ɔ ti ajuin difuɛ aenvuɛfuɛ i sa nun. I sa nun yɛ ɔ boli i ja tutulɛ bo lele yɛ ɔ fa yoli gbanflɛn ɔn. Fɔ w’a trɛnmɛn i nun. Ɔ nin i sɔ ngba’n, i ɲin yili i si nin i nin mɔ fɔ o be nun mun. (Lik 2:51, 52) Ɔ kɛnnin i wun ase dan sakpa!
11. ?Wafa sɛ yɛ e kwla kan e wun ase kɛ Zezi sa ɔ?
11 Kɛ be man e junman mɔ be kwlá bumɛn i kɛ junman m’ɔ le ɲrun’n, mɔ sanngɛ e tu e klun e di’n, i lɛ nun’n, e kle kɛ e nian Zezi i ajalɛ liɛ’n su. I wie yɛle jasin fɛ’n mɔ be seli e kɛ e bo’n. Kɛ sran’m be buman ndɛ nga e kan’n i ndɛ’n, annzɛ be sɔman e nun klanman’n, annzɛ be yo e finfin’n, e kwla bu i kɛ jasin fɛ bolɛ’n timan junman m’ɔ ti nanndoliɛ ɔ. Sanngɛ, sɛ e mian e ɲin e bo jasin fɛ’n, é kwlá úka sran uflɛ naan w’a sɔ flɛlɛ nga Zezi flɛ i’n su. Kɛ e yo sɔ’n, e uka sran mun naan b’a fite nun. (An kanngan 2 Timote 4:1-5 nun.) Like kun ekun mɔ e kwla kɛn i ndɛ’n yɛle Ɲanmiɛn Sielɛ Blɛ Sua’m be lika nianlɛ’n. Ɔ kwla yo wla blo gualɛ, annzɛ lika nun nunnunlɛ, ɔ nin abialiɛ’n i nun wunnzinlɛ. Ɔ fata kɛ be yo be wun ase kanfuɛ naan b’a kwla di i sɔ junman’n. Sanngɛ e si kɛ Ɲanmiɛn Sielɛ Blɛ Sua’n i nun yɛ e su Ɲanmiɛn ɔn. Kɛ e kplin su mɔ e di i sɔ junman mun’n, e kle kɛ e kan e wun ase. Kɛ e yo sɔ kusu’n, Klist i ajalɛ’n su yɛ e nanti ɔ.
Kɛ Zezi sa’n, maan e di junman juejue su
12, 13. (a) ?Wafa sɛ yɛ Zezi kleli kɛ ɔ ti juejue su junman difuɛ ɔ? ?Yɛ ngue ti yɛ ɔ yoli sɔ ɔ? (b) ?Ngue yɛ ɔ kwla yo naan y’a bo jasin fɛ’n i juejue su ɔ?
12 Maan e kan jasin fɛ’n mɔ Zezi boli i juejue su’n i ndɛ siɛn’n. Kɛ Zezi o asiɛ’n su wa’n, ɔ yoli ninnge kpanngban. I bakan nun’n atrɛkpa’n, ɔ nin i si Zozɛfu be dili ajuin likawlɛ. Kɛ ɔ boli i junman’n i dilɛ bo’n, ɔ yoli abonuan sa mun. Yɛle kɛ ɔ yoli sran’m be juejue, ɔ cɛnnin be nga be wuli mun. Sanngɛ i junman bɔbɔ ba’n yɛle jasin fɛ’n i bolɛ, yɛ sran nga be sie be su’n i ndɛ’n bo’n, be like klelɛ. (Matie 4:23) E mɔ e su i su’n, junman kunngba’n yɛ ɔ fata kɛ e di ɔ. ?Wafa sɛ yɛ e kwla nanti Zezi i ajalɛ liɛ’n su ɔ? Like nga ti yɛ Zezi boli jasin fɛ’n, e kwla nian su wie.
13 Like cinnjin kpa nga ti yɛ Zezi boli jasin fɛ’n, yɛ ɔ kleli sran’m be like’n yɛle kɛ ɔ klo Ɲanmiɛn. Sanngɛ ɔ klo ndɛ nanwlɛ’n m’ɔ kleli sran mun’n, i wie. Zezi buli ndɛ nanwlɛ’n kɛ bɛtrɔ kpa m’ɔ lemɛn i wunsu’n sa. Yɛ ɔ kunndɛli kɛ ɔ́ kán klé sran mun. E mɔ e ti ‘mmla klefuɛ’n,’ yɛle kɛ e ko kle sran’m be like’n, kɛ e bu i sɔ wie ɔ. Maan e bu ndɛ nanwlɛ’n mɔ e suannin be Ɲanmiɛn Ndɛ’n nun’n, be nun wie’m be akunndan e nian! Nglo’n nin asiɛ’n be sielɛ ndɛ’n, ɔ nin wafa nga bé síesíe ndɛ sɔ’n, e si i. Ninnge nga Ɲanmiɛn Ndɛ’n kle i sran nga be wuli’n be su’n, ɔ nin wafa nga Ɲanmiɛn wá rá e su mɛn uflɛ’n nun’n, e si be kpa. Sɛ e suannin ninnge sɔ mun w’a cɛ o, annzɛ sɛ blɛ yɛ é súan be o, be te yo cinnjin kpa. Be ti kɛ bɛtrɔ kpa kun m’ɔ leman wunsu’n sa. (An kanngan Matie 13:52 nun.) Sɛ e tu e klun e bo jasin fɛ’n, é yó maan sran uflɛ’m bé kló ninnge nga Zoova kle e’n kɛ e fa klo be’n sa.
14. ?Wafa sɛ yɛ e kwla nian wafa nga Zezi kle sran’m be like’n su ɔ?
14 Maan e sie wafa nga Zezi kleli like’n i nzɔliɛ wie e nian. Ɔ fɛli i ndɛ tiefuɛ’n be ɲin sieli i Ɲanmiɛn Ndɛ’n su titi. Kpɛ sunman’n, kɛ ɔ́ bó ndɛ kun m’ɔ ti cinnjin’n i kanlɛ bo’n, ɔ seli kɛ: “Be klɛli i kɛ.” (Matie 4:4; 21:13) Ɲanmiɛn Ndɛ nga be klɛli be laa Ebre aniɛn nun’n, sɛ be bu nun nɲɔn’n, Zezi fɛli i bue kun tra su wlɛli i ijɔlɛ’n nun. Wie liɛ’n, ɔ fali ndɛ mma’n trele, annzɛ ɔ boli su. Kɛ Zezi sa’n, kɛ é bó jasin fɛ’n, Biblu’n yɛ e jran su ɔ. Sɛ e ɲɛn i wun atin’n, e kanngan Biblu’n nun. Kɛ e yo sɔ’n, sran kpa’m be wun i wlɛ kɛ Ɲanmiɛn Ndɛ’n yɛ e kan naan e kpɛman e ti nun. Kɛ sran kun kplin su mɔ e kanngan Biblu’n nun e kle i m’ɔ wun i wlɛ’n, i fɛ m’ɔ yo e’n, be kanman! Kpɛkun kɛ i sɔfuɛ’m be kplin su kɛ bé sú Zezi su’n, e klun jɔ tratra su.
Zezi i su sulɛ’n yɛle kɛ e klo e wiengu
15. ?Zezi i nzuɛn ng’ɔ lemɛn i wunsu’n yɛle benin? ?Yɛ wafa sɛ yɛ sɛ e bu i sɔ liɛ’n i akunndan’n, e kwla niɛn i liɛ’n su ɔ?
15 I kasiɛn su’n, Zezi i nzuɛn nga é wá kɛ́n i ndɛ’n, yɛ ɔ wluwlu e wun kpa’n niɔn. Yɛle kɛ ɔ klo sran. Akoto Pɔlu klɛli i kɛ: “Sa kwlaa nga e yo’n, e yo i klolɛ bɔ Krist fa klo sran’n ti.” (2 Korɛntfuɛ Mun 5:14) Wafa nga Zezi fa wun sran’m be kwlaa’n, ɔ nin wafa ng’ɔ klo be be tinuntinun’n, kɛ e bu i akunndan’n, ɔ wluwlu e wun dan. Ɔ maan, e kunndɛ kɛ é nánti i ajalɛ’n su.
16, 17. ?Wafa sɛ yɛ Zezi kleli kɛ ɔ klo i wiengu ɔ?
16 ?Wafa sɛ yɛ Zezi kleli kɛ ɔ klo sran mun ɔn? Zezi i sran klolɛ ti’n, ɔ fɛ i wun mannin. I sran klolɛ sɔ’n, ɔ ti dan trɛ i ngba. (Zan 15:13) Sanngɛ, i nun m’ɔ́ bó jasin fɛ’n, ɔ yili i sran klolɛ’n i nglo wafa uflɛ ekun. I wie yɛle kɛ be nga ɲrɛnnɛn’n o be su’n, be yoli i annvɔ. Kɛ Lazali i wie’n ti Mali nin sran nga be o lɛ’n bé sún’n m’ɔ wunnin be’n, i awlɛn’n kpɛli i klun. Kannzɛ ɔ si kɛ ɔ́ cɛ́n Lazali’n, sanngɛ i wie’n yoli i ya ti ɔ “sunnin.”—Zan 11:32-35.
17 Kɛ ɔ́ bó jasin fɛ’n i bo bolɛ nun’n, kokowefuɛ kun bɛli i wun lɛ, kpɛkun ɔ seli Zezi kɛ: “Yaci, yo maan n kokowe’n wie weiin.” ?Wafa sɛ yɛ Zezi tɛli i su ɔ? Ɲanmiɛn Ndɛ’n waan: “Ɔ yoli Jésus annvɔ.” Ɔ maan ɔ yoli abonuan sa kun. “Ɔ tinngɛli i sa’n kɛnnin i, ɔ seli i kɛ: ‘M’an ti, maan ɔ kokowe’n wie weiin.’ Be ja osu kunngba’n nun lɛ’n, kokowe’n ka lɛ wieli sran sɔ’n i wun yɛ i wunnɛn’n yoli treketreke ɔ.” I nun mɔ be te di Moizi i Mmla’n su’n, kokowefuɛ’m be ti fiɛn. Yɛ sɛ Zezi waan ɔ kanman bian’n naan w’a yo i juejue, ɔ kwla yo. Sanngɛ, kɛ Zezi yó bian i juejue’n, ɔ fɛli i sa’n kɛnnin i. Atrɛkpa’n, i afuɛ ko ju wie yɛ, sran fi nin a kɛnmɛn i le. Sran annvuɛ silɛ kɛ ngalɛ sa’n, ɔ lemɛn i wunsu!—Mark 1:40-42.
18. ?Wafa sɛ yɛ e kwla ‘klo e wiengu kɛ e niaan sa’ ɔ?
18 E mɔ e ti Klist i sɔnnzɔnfuɛ’n, be se e kɛ e ‘klo e wiengu kɛ e niaan sa.’ (1 Piɛr 3:8) Kɛ ɔ ko yo naan y’a wun tukpacɛ kekle ng’ɔ o e niaan kun su’n i wlɛ’n, annzɛ i wla m’ɔ bo i wun i wlɛ’n, ɔ timan blɛblɛ. I li sɛ i sɔ like nin a yoman e le’n, yɛ i wlɛ wunlɛ ti kekle’n niɔn. Sanngɛ Zezi liɛ’n, kannzɛ w’a tɔman tukpacɛ’n, sanngɛ kɛ ɔ wun sran nga tukpacɛ o be su’n, ɔ yo i ɲrɛnnɛn. ?Wafa sɛ yɛ e kwla suɛn i sɔ aunnvuɛ silɛ’n niɔn? Sɛ sran kun wun ɲrɛnnɛn naan ɔ koko kle e’n, maan e sie e su. Kusu’n, e kwla usa e wun kɛ: ‘?Sɛ min yɛ sa sɔ’n yo min’n, wafa sɛ yɛ min wun yó min ɔn?’ Sɛ e suan sran’m be aunnvuɛ silɛ’n, é kwlá ‘wlá be nga be anwlɛn sɔman’n be yakpa.’ (1 Tɛsalonikfuɛ Mun 5:14) Sɛ e yo sɔ’n, nn Zezi i ajalɛ’n su yɛ é fɛ́ i lɛ ɔ.
19. ?Sɛ e nian Zezi i ajalɛ liɛ’n su’n, wafa sɛ yɛ ɔ́ úka e ɔ?
19 Ndɛ nga Zezi Klist kannin’n, ɔ nin i aeliɛ’n be su ninnge suanlɛ’n, ɔ yo fɛ dan! Kɛ é wún i sran wafa’n i wlɛ é kɔ́ e ɲrun’n, é kúnndɛ kɛ é nánti kɛ i sa kpa ekun. Kpɛkun ɔ́ yó e fɛ kpa kɛ e uka sran uflɛ naan ɔ yo kɛ Zezi sa wie. Ɔ maan, sɛ ɔ́ yó sɛ, ɔ́ yó sɛ o, maan Famiɛn Mɛsi’n i su sulɛ’n, ɔ yo e fɛ andɛ, yɛ maan ɔ yo e fɛ tititi!
?Amun kwla yiyi nun?
• ?Wafa sɛ yɛ e kwla yo ngwlɛlɛfuɛ kɛ Zezi sa ɔ?
• ?Wafa sɛ yɛ e kwla kle kɛ e ti sran m’ɔ kɛn i wun ase ɔ?
• ?Wafa sɛ yɛ e kwla yo naan y’a bo jasin fɛ’n juejue su ɔ?
• ?Wafa sɛ yɛ e kwla kle kɛ e klo sran mun kɛ Zezi sa ɔ?
[Kuku/Foto, bue 11]
FLUWA KUN M’Ɔ UKA E NAAN Y’A SƆNNZƆN ZEZI’N
Aɲia dan nga e yoli i afuɛ nga be flɛ i 2007 nun’n, be yili fluwa kun blɔfuɛ nun. Ɔ le bue 192 yɛ be flɛ i kɛ “ Viens, suis-moi. ” Like nga ti yɛ be yili fluwa’n yɛle kɛ bé úka Klistfuɛ mun naan be fa be ɲin sie i Zezi su. Naan be sie i nzuɛn’n i nzɔliɛ kpa. Fluwa’n dun mmua kan aeliɛ kpa nga Zezi yili i nglo’n i ndɛ. I sin’n, ɔ yiyi i wun ase kanlɛ’n, ɔ nin i yakpa yolɛ’n, ɔ nin i aɲinyiɛ’n yɛ i awlɛn tralɛ’n be nun.
I sin ekun’n, jasin fɛ nga Zezi boli’n, ɔ nin wafa ng’ɔ kleli sran’m be like’n, yɛ wafa ng’ɔ yili i sran klolɛ dan’n i nglo’n, yɛ fluwa’n yiyi nun ɔn. Kɛ ɔ ko yo naan Klistfuɛ’m b’a nian Zezi i ajalɛ su’n, i su yɛ be niannin klɛli fluwa wunmuan’n niɔn.
E lafi su kɛ fluwa sɔ’n úka e. Ɔ́ yó maan e tinuntinun’n é bú e klun lɔ nían, yɛ é úsa e wun kosan yɛ mun: ‘?N su Zezi su sakpa? ?Wafa sɛ yɛ n kwla su i su kpa ɔ?’ Asa ekun’n, ɔ́ kwlá úka “sran kpa” nga be klo kɛ be nin e bé sú Klist su’n wie.—Matie 10:11.