?Min ndɛ lo Ɲanmiɛn?
Wafa nga sran sunman be tɛ su’n:
▪ “Ɲanmiɛn le ɲrun dan ti, ɔ kwlá buman e nga mun e akunndan.”
▪ “N bumɛn i kɛ min ndɛ lo Ɲanmiɛn.”
?Ngue ndɛ yɛ Zezi kannin ɔn?
▪ “?Be yo-man ndrofia nnun atɛ bablu nnyɔn? Sanngɛ ɔ nin i sɔ ngba’n, Nyanmiɛn nyin fi-man be nun kun. Ɔ si amun ti ndrɛ’n bɔbɔ i nuan. Ɔ maan, nán srɛ kun amun mlɔnmlɔn, sran kun ti kpa tra ndrofia kpanngban.” (Lik 12:6, 7) Zezi i ndɛ ng’ɔ kannin’n kle weiin kɛ e ndɛ lo Ɲanmiɛn.
▪ “Nán an koko se kɛ: ‘?Ndɛ nguɛ yɛ é dí-ɔ? Annzɛ, ?Nguɛ yɛ é nɔ́n-ɔn? Annzɛ, ?Nguɛ yɛ é klá-a?’ Like sɔ’n kwlaa be bɔ be su-man Nyanmiɛn’n be yɛ be kunndɛ-ɔ. Nán an yo sɔ, afin amun Si b’ɔ o nyanmiɛn su lɔ’n si kɛ amun sa mian like sɔ’m be wun.” (Matie 6:31, 32) Zezi si kpa kɛ Ɲanmiɛn si ninnge nga be mian e sa’n.
BIBLU’N se weiin kɛ e ndɛ lo Ɲanmiɛn. (Jue Mun 55:23; 1 Piɛr 5:7) ?Sɛ ɔ ti sɔ’n, ngue ti yɛ afɛ’n o e su dan sɔ andɛ ɔ? ?Sɛ Ɲanmiɛn ti sran klofuɛ naan ɔ kwla like kwlaa yo’n, ngue ti yɛ ɔ yoman naan ɲrɛnnɛn’n w’a jaso e su ɔ?
Sa kun mɔ sran kpanngban siman nun’n, i ti ɔ. Yɛle kɛ mmusu’m be si Satan yɛ ɔ sie mɛn tɛ nga ɔ. Kɛ Satan lakali Zezi’n, ɔ fali mɛn nun famiɛn diwlɛ’n kwlaa kleli i, yɛ ɔ seli i kɛ: “Ń fá mɛn nga i kwlaa mán wɔ kɛ a sie be, yɛ ń fá anyrunnyan ninnge’m kwlaa mán wɔ, afin be fa mannin min, yɛ n kusu ń fá mán sran nga n klo kɛ ń fá mɛ́n i’n.”—Lik 4:5-7.
?Wan yɛ ɔ fali Satan sieli i mɛn’n su ɔ? I nun mɔ e si nin e nin klikli Adam nin Ɛvu be fali Satan i ndɛ’n su mɔ be kacili be sin sili Ɲanmiɛn’n, ɔ ti kɛ b’a kplin su kɛ Satan sie be. Kɛ ɔ fin lɛ’n, Ɲanmiɛn Zoova yacili i lɛ naan e wun i wlɛ kɛ Satan i sielɛ’n yoman like fi ye. Zoova w’a mianman sran’m be kɛ be su i. Sanngɛ, ɔ yoli maan sran’m be kwla bɛ i sin ekun.—Rɔmfuɛ Mun 5:10.
E ndɛ lo Ɲanmiɛn ti’n, ɔ yoli naan Zezi kwla de e Satan i mɛn tɛ nga i sa nun. Ɔ ka kaan sa’n, Zezi “kwlá mmusu’m be si Satan’n b’ɔ maan wie’n kwla sran mun’n.” (Ebre Mun 2:14) Kɛ ɔ ko yo sɔ’n, ɔ́ ‘bú sa nga mmusu’m be si Satan yo’n i nuan nnya.’—1 Zan 3:8.
Asiɛ’n wá káci mɛn klanman ekun. I blɛ sɔ’n nun’n, Ɲanmiɛn “núnnún [sran’m be] nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.”—Sa Nglo Yilɛ 21:4, 5.a
[Ja ngua lɛ ndɛ’n]
a Sɛ amun kunndɛ kɛ amún sí like nga ti yɛ Ɲanmiɛn yaci sran’m be lɛ mɔ be wun ɲrɛnnɛn’n i su ndɛ ekun’n, amun nian fluwa ?Ngue like yɛ Biblu’n kle i sakpasakpa ɔ? i ndɛ tre 11 nun. Zoova i Lalofuɛ mun yɛ be yili ɔ.
[Ndɛ kwle, bue 8]
Asiɛ’n wá káci mɛn klanman ekun.