É yía amun kpa kɛ amun bla

ATRƐKPA’N, amun a sin Zoova i Lalofuɛ’m be asɔnun sua kun i wun lɛ le. Kpɛkun amun kunndɛli kɛ amún sí like nga be yo i lɔ’n. ?Amun si kɛ be asɔnun aɲia’m be ti sran kwlaa liɛ? Be nga be kunndɛ kɛ bé kɔ́ lɔ’n, be kwla kɔ.

Sanngɛ, atrɛkpa’n amun kwla fa kosan wie mun usa amun wun. ?Ngue ti yɛ Zoova i Lalofuɛ’m be yia ɔ? ?Ngue yɛ be yo i be aɲia’m be bo lɔ ɔ? ?Yɛ ngue ndɛ yɛ be nga be timan Zoova i Lalofuɛ’m be kɛn i be aɲia’m be su ɔ?

“An yiayia sran mun”

Kɛ ɔ fɛ i laa lele’n, sran’m be yia be su Ɲanmiɛn yɛ be suɛn i su like. I afuɛ ko ju 3.500 yɛ’n, be seli Izraɛlifuɛ’m be kɛ: “Amun yiayia sran mun, i yasua mun o, i bla mun o, i bakan mun o, ɔ nin aofuɛ nga amun sike be’n, maan be ti. Amun kle be kɛ be sro Anannganman amun Nyanmiɛn’n, yɛ be fa mmla’n nun ndɛ’m be sie be klun, yɛ be nian su be nanti.” (Mmla’n 31:12) Ɔ maan Izraɛli lɔ’n, be kle bakanngan nin kpɛnngbɛn’m be kwlaa kɛ be su Ɲanmiɛn Zoova naan be ɲin yi i.

Kɛ ɔ dili afuɛ ko ju 1.500 mɔ be takali Klistfuɛ’m be asɔnun’n, yialɛ’n yoli like cinnjin titi Ɲanmiɛn sulɛ kpafuɛ’n nun. Akoto Pɔlu klɛli i kɛ: “Maan e bu e wiengu’m be akunndan e wla be fanngan naan be klo be wun yɛ be yo sran ye. Nán maan e yaci yialɛ’n kɛ sran wie’m be yo’n sa. Sanngɛ maan e yia e tu e wun fɔ.” (Ebre Mun 10:24, 25) Kɛ awlobofuɛ’m be yo ninnge mun likawlɛ’n be bo sɛ. I kunngba’n, be nga be kunndɛ kɛ bé sú Ɲanmiɛn’n, sɛ be yia be su Ɲanmiɛn’n, be klo be wun kpa.

Zoova i Lalofuɛ’m be niɛn i sɔ ajalɛ m’ɔ taka Ɲanmiɛn mmla’n su’n i su. I sɔ ti’n, be yia be asɔnun sua’m be nun kpɛ nɲɔn le mɔcuɛ kwlaa nun. Aɲia sɔ’m be uka be nga be kɔ be bo naan b’a wun i wlɛ kɛ Ɲanmiɛn mmla’m be ti cinnjin. Asa ekun’n, be uka be naan b’a si Ɲanmiɛn ndɛ’n naan b’a wun i wlɛ naan b’a nian su b’a nanti. Kɛ be yo i sɔ lɛ ɔ yo ye’n, be nin be niaan nga be o mɛn’n wunmuan’n nun’n, be suan ninnge kunngba mun. Ɔ le aɲia kun nin i like ng’ɔ fa e ɲin sie su ɔ. Ka naan b’a bo aɲia’m be bo’n, yɛ kɛ aɲia’m be ko wie’n, aniaan’m be koko yalɛ be ‘wla be wun fanngan.’ (Rɔmfuɛ Mun 1:12) ?Ngue yɛ be yo i aɲia fanunfanun sɔ’m be bo ɔ?

Nzra nun ijɔlɛ

Aɲia nga sran sunman be kɔ i bo’n yɛle nzra nun ijɔlɛ’n m’ɔ taka Biblu’n su’n. Titi’n Fue cɛn annzɛ mɔnnɛn cɛn yɛ be yo aɲia sɔ’n niɔn. Aɲia sɔ’n ti sran kwlaa liɛ. Zezi Klist ijɔli nzra nun kpɛ sunman. Ijɔlɛ sɔ’n kun yɛle ndɛ ng’ɔ kɛnnin i oka’n su lɔ mɔ sran kpanngban be si i’n. (Matie 5:1; 7:28, 29) Akoto Pɔlu ijɔli nzra nun kleli Atɛnifuɛ mun. (Sa Nga Be Yoli’n 17:22-34) Zoova i Lalofuɛ’m be nian ajalɛ kunngba’n su. I sɔ’n ti’n, be aɲia’m be bo’n, be ijɔ nzra nun. Ijɔlɛ sɔ’n, sran kwlaa kwla kɔ i bo. Wie mun’n, Zoova i Lalofuɛ’m be aɲia klikli nga bé kɔ́ i bo’n yɛle ngalɛ’n.

Kɛ bé bó aɲia’n bo’n, be nian fluwa E to jue e manman Zoova nun be to jue.a Sran kwlaa nga i waan ɔ́ jáso naan ɔ́ tó jue’n wie’n, ɔ kwla yo sɔ. I sin’n, be srɛ Ɲanmiɛn. Kpɛkun sran kun m’ɔ si ijɔ kpa’n, ɔ ijɔ nzrafuɛ’m be ɲrun miniti 30. (An nian kuku nga be flɛ i “Nzra nun ijɔlɛ mɔ be yo sran ye’n” i nun.) I ijɔlɛ’n taka Biblu’n su. Kɛ ijɔfuɛ’n kán ndɛ’n, ɔ se nzrafuɛ mun kpɛ sunman kɛ be fa be Biblu’n naan kɛ ɔ́ kánngan ndɛ mma cinnjin wie’m be nun’n, be fa be ɲin be sie su. Ɔ maan, amun kwla fa amun Biblu’n be ba, annzɛ kwlaa naan aɲia’n w’a bo i bo’n, amun kwla se Zoova i Lalofuɛ kun kɛ ɔ man amun Biblu kun.

Sasafuɛ Tranwlɛ’n i nun ninnge suanlɛ

Zoova i Lalofuɛ’m be asɔnun kpanngban nun’n, kɛ be ko wie nzra nun ijɔ’n, be suan Sasafuɛ Tranwlɛ’n i nun like. Ɔ ti kosan usalɛ nin i su tɛlɛ. Ɔ di dɔ kun yɛ ɔ taka Biblu’n su. Aɲia sɔ’n wla nzrafuɛ’m be fanngan kɛ be nian Pɔlu i blɛ su Bere lɔfuɛ’m be ajalɛ’n su. Afin “be fali Nyanmiɛn ndɛ’n su ndɛndɛ, [...] be fa Nyanmiɛn ndɛ nga be klɛli’n nin ndɛ nga Pɔlu kan kle be’n, be sunnzun nian.”—Sa Nga Be Yoli’n 17:11.

Be dun mmua to jue naan b’a suan Sasafuɛ Tranwlɛ’n i nun like. Like nga be suan’n, ɔ nin kosan nga aniaan ng’ɔ tinngɛ like suanlɛ’n usa’n, be o Sasafuɛ Tranwlɛ’n nun. Amun kwla se Zoova i Lalofuɛ mun naan i kwlaa ng’ɔ fite’n, be man amun wie. Ndɛ nga e suannin be su like koko nga nun’n, i wie yɛle nga mun: “Siɛ nin niɛn mun, an ta amun mma mun klolɛ su,” “Sran ng’ɔ yo amun tɛ’n, nán amun yo i wie,” yɛ “Like nga ti yɛ ɔ ka kaan sa’n, ɲrɛnnɛn’n wíe’n.” Kannzɛ like suanlɛ sɔ’n ti kosan usalɛ nin i su tɛlɛ’n, sanngɛ sran nga i waan ɔ́ tɛ́ su’n, yɛ be fa ijɔlɛ’n mɛn i ɔ. Asa ekun’n, be nga be tɛ kosan’m be su’n be dun mmua kanngan nun kpɛkun be bu Biblu’n nun ndɛ mma’m be su akunndan laa. Be to jue yɛ be srɛ Ɲanmiɛn be fa gua aɲia’n i bo.—Matie 26:30; Efɛzfuɛ Mun 5:19.

Asɔnun’n i Biblu’n nun like suanlɛ

Le mɔcuɛ kwlaa nun’n, Zoova i Lalofuɛ’m be yia be asɔnun sua’m be nun nnɔsua nun cɛn kun, be yo aɲia wafawafa nsan. I kwlaa sɔ’n di dɔ kun nin miniti 45. Aɲia nga be dun mmua yo’n yɛle Asɔnun’n i Biblu’n nun like suanlɛ’n. Ɔ di miniti 25. Aɲia sɔ’n uka be nga be o i bo’n naan b’a si Biblu’n kpa. Asa kusu’n, ɔ uka be naan b’a kaci be akunndan’n nin be aeliɛ’n, naan b’a yo Klist i sɔnnzɔnfuɛ kpa. (2 Timote 3:16, 17) Ɔ ti kosan usalɛ nin i su tɛlɛ kɛ Sasafuɛ Tranwlɛ’n sa. Yɛ ɔ taka Biblu’n su wie. Be nga be klo’n yɛ be tɛ kosan’m be su ɔ. Biblu’n i akua nga be nian nun’n, yɛle Zoova i Lalofuɛ’m be fluwa nga be yi be’n, be nun kun.

?Ngue ti yɛ be fa Biblu’n i akua’m be yo aɲia mun ɔn? Laa’n, be kannganman Ɲanmiɛn Ndɛ’n nun sa ngbɛn. Kɛ be kanngan nun’n, ‘be tu i bo kɛ ɔ́ yó naan sran’m be kwlaa b’a ti nga be kanngannin’n ti.’ (Neemi 8:8) Koko nga nun’n, fluwa nga be yiyi Ezai nin Daniɛl nin Sa Nglo Yilɛ fluwa’m be nun’n, be ukali be nga be bali aɲia sɔ’m be bo naan b’a wun Biblu’n i bue sɔ’m be nun ndɛ’m be wlɛ.

Ɲanmiɛn junman dilɛ suklu

Kɛ be ko wie Asɔnun’n i Biblu’n nun like suanlɛ’n yo’n, aɲia ng’ɔ bɛ i sin’n yɛle Ɲanmiɛn junman dilɛ suklu’n. Aɲia sɔ’n m’ɔ di miniti 30, ɔ uka Klistfuɛ mun naan “b’a si like kle” kpa. (2 Timote 4:2, NW) ?E wa annzɛ e janvuɛ wie nin a usaman e Ɲanmiɛn annzɛ Biblu’n su kosan’n wie mɔ i su tɛlɛ’n yoli kekle mannin e ɔ? Ɲanmiɛn junman dilɛ suklu’n kwla kle e wafa nga e kwla fa Biblu’n e tɛ kosan kekleekle’m be su klanman’n. Ɔ maan é kwlá kán ndɛ kunngba nga Ɲanmiɛn nuan ijɔfuɛ Ezai kannin’n wie. I waan: “Anannganman Nyanmiɛn’n ɔ yo maan n si ijɔ kɛ be nga be suan like’n be fa ijɔ’n sa, i waan ɔ́ yó naan m’an si ndɛ ng’ɔ fata kɛ n kan naan m’an fa uka be nga b’a fɛ mun’n ti.”—Ezai 50:4.

Ɲanmiɛn junman dilɛ suklu’n bo i bo nin ijɔlɛ kun m’ɔ taka Biblu’n i bue kun su. Be dun mmua se be nga be bɛ i bo’n be kɛ be kanngan Biblu’n i bue sɔ’n nun le mɔcuɛ sɔ’n nun naan b’a ba aɲia’n i bo. Kɛ ijɔlɛ’n ko wie’n, ijɔfuɛ’n se aniaan’m be kɛ Biblu’n i bue nga be kanngannin nun mɔ be wunnin i kɛ ɔ kwla uka be’n, be kan be ndɛ. Kɛ i sɔ’n ko wie’n, be nga be klɛli be dunman suklu nun’n, mɔ be mannin be junman cɛn sɔ’n nun’n, be di be junman liɛ’n.

Be man suklu ba wie’m be junman kɛ be fu cenje’n su lɔ be kanngan Biblu’n i bue wie nun annzɛ wafa nga be fa Ɲanmiɛn Ndɛ’n be tɛ sran wie’m be kosan’m be su’n, be yi i nglo. Kɛ sran kun wie i junman liɛ’n i di’n, aniaan nga ɔ tinngɛ suklu’n mɔ i sa w’a tɔ junman sɔ’n i dilɛ’n nun’n, ɔ nian like nga sran ng’ɔ dili i junman yoli i kpa’n, i su yo i mo. Afɔtuɛ ng’ɔ o fluwa Tirez profit de l’École du ministère théocratique nun’n, i su yɛ ɔ jran ɔn. I sin’n, suklu ba’n, i junman’n i bue nga w’a yomɛn i kpa’n, ɔ flɛ i aamiɛn mɛn i su afɔtuɛ.

Suklu sɔ mɔ i nun’n, aniaan’m be tinuntinun be sin be ko di be junman liɛ’n, nán suklu ba’m be ngunmin yɛ ɔ uka be ɔ. Sanngɛ ɔ uka sran kwlaa nga be ba suklu sɔ’n i bo’n, naan be kannganlɛ nun o, be ijɔlɛ nun o, be like klelɛ nun o, b’a wɔ be ɲrun kpa. Kɛ Ɲanmiɛn junman dilɛ suklu’n ko wie’n, be to jue m’ɔ taka Biblu’n su’n, be fa fiti aɲia nga be flɛ i junman dilɛ aɲia’n i su.

Junman dilɛ aɲia

Aɲia kasiɛn nga be yo’n yɛle junman dilɛ aɲia’n. Ijɔlɛ’n nga be ijɔ’n, ɔ nin ninnge’m be nglo yilɛ’n, ɔ nin kosan usalɛ nin i su tɛlɛ’n, yɛ ndɛ nga nzrafuɛ’m be kan’n, be kle be nga be o aɲia’n i bo’n be Biblu’n nun like klelɛ kpa. Ka naan Zezi w’a sunmɛn i sɔnnzɔnfuɛ mun kɛ be ko bo jasin fɛ’n, ɔ yiali be yɛ ɔ kleli be like ng’ɔ fata kɛ be yo’n. (Lik 10:1-16) Kɛ be sili like ng’ɔ fata kɛ be yo’n, be dili aklunjuɛ be junman’n nun. I sin’n, be bali be wa kannin ninnge nga be wunnin be’n, be ndɛ kleli Zezi. (Lik 10:17) Kpɛ sunman Zezi i sɔnnzɔnfuɛ’m be kan ninnge nga be wunnin be’n, be ndɛ kle be wiengu.—Sa Nga Be Yoli’n 4:23; 15:4.

Junman dilɛ aɲia’n m’ɔ di miniti 35, i siesielɛ’n o fluwa kun mɔ be yi i anglo kwlaa nun’n i nun. Be flɛ i kɛ Ɲanmiɛn Sielɛ Blɛ junman fluwa. Ndɛ nga be kannin be fluwa sɔ’n nun koko nga nun’n i wie mun yɛ: “Maan e nin e awlofuɛ mun e su Zoova,” “Like nga ti yɛ e ko nian sran’m be osu titi’n,” ɔ nin “Maan e sɔnnzɔn Klist jasin fɛ’n bolɛ’n nun.” Be to jue be fa gua aɲia’n i bo, kpɛkun be se asɔnunfuɛ kun kɛ ɔ srɛ Ɲanmiɛn.

Ndɛ nga be nga be bɛli i bo’n be kannin’n

Asɔnunfuɛ’m be mian be ɲin be yo maan be nga be ba aɲia’n i bo’n be wun yo be fɛ. I wie yɛle Andre liɛ’n. Ɔ tili Zoova i Lalofuɛ’m be su ndɛ tɛtɛ kpanngban. Sanngɛ, i le kunngba ng’ɔ ɔli be aɲia’n i bo’n, wafa nga be sɔli i nun’n, ɔ boli i nuan. Andre seli kɛ: “Lɔ kɔlɛ yo fɛ dan. Wafa nga be sɔli min nun mɔ be fali min yoli be janvuɛ’n, ɔ nin wafa nga be kleli kɛ min ndɛ lo be’n, ɔ boli min nuan.” Ashel m’ɔ ti Kanada lɔ talua kun’n, ɔ kannin ndɛ kunngba’n. I waan: “Aɲia’n yoli fɛ kpa! I wlɛ wunlɛ yoman ya.”

Zoze tran Brezili lɔ. Yɛ sran kwlaa ng’ɔ si i’n, ɔ si kɛ i like yolɛ yo ya kpa. Ɔ nin i sɔ’n ngba’n, be yiɛli i aɲia kun bo. Ɔ seli kɛ: “Be kwlaa nga be o Ɲanmiɛn Sielɛ Blɛ Sua nun lɔ’n, be sɔli min nun klanman. Sanngɛ nn be si min aeliɛ’n.” Atsushi m’ɔ tran Zapɔn’n, ɔ seli kɛ: “Ɔ fata kɛ n di i nanwlɛ kɛ cɛn kunngba nga n ɔli Zoova i Lalofuɛ’m be aɲia’n i bo’n, m’an wunman min wun fɛ. Sanngɛ n wunnin i kɛ be nga be o lɔ’n be ti kɛ sran onga’m be sa. Be yoli maan min wun yoli min fɛ.”

Sɛ amun waan bé bá’n, atin la nun

Kɛ nga sran’m be fa kɛnnin i lɛ’n, Ɲanmiɛn Sielɛ Blɛ Sua nun lɔ aɲia’m be bo kɔlɛ’n, ɔ kwla yo e ye kpa. Amún kwlá súan Ɲanmiɛn i su like. Kpɛkun Ɲanmiɛn Zoova maan like nga bé fá Biblu’n bé klé amun’n, ɔ́ yó “amun bɔbɔ amun kpa.”—Ezai 48:17.

Sran kwlaa kwla kɔ Zoova i Lalofuɛ’m be aɲia’m be bo, yɛ dein fiteman nun. ?Amun klo kɛ amún kɔ́ amun bue liɛ’n su lɔ Ɲanmiɛn Sielɛ Blɛ Sua nun lɔ aɲia kun bo? É yía amun kpa kɛ amun bla.

[Ja ngua lɛ ndɛ’n]

[Kuku, bue 30]

Nzra nun ijɔlɛ mɔ be yo sran ye’n

Nzra nun ijɔlɛ i ajalɛ fluwa nga be nian su be kan ndɛ mun’n, be ti 170 tra su. Be wie mun yɛ:

◼ Mɛn’n nun ninnge’m be nzɔliɛ ng’ɔ kle kɛ Ɲanmiɛn o lɛ sakpa’n

◼ ?Angunndan mennin yɛ Ɲanmiɛn bu i bian nin bla nna nin aja’n su ɔ?

◼ ?Mɛn’n i blɛ kasiɛn’n nun’n, amún fíte nun?

◼ Ngokɔɛ’n i ɲrun kekle jranlɛ’n

◼ E nanti nguan atin’n su

[Foto, bue 30]

Nzra nun ijɔlɛ.

[Foto, bue 30]

“Sasafuɛ Tranwlɛ’n” i nun ninnge suanlɛ.

[Foto mun, bue 31]

Asɔnun’n i Biblu’n nun like suanlɛ.

[Foto, bue 31]

Ɲanmiɛn junman dilɛ suklu.

[Foto, bue 32]

Junman dilɛ aɲia.