2 Maan e si Ɲanmiɛn kpa
“Kɛ be se kɛ bé nyán anannganman nguan’n, i bo’n yɛlɛ kɛ bé sí wɔ bɔ ɔ kunngba cɛ yɛ a ti Nyanmiɛn’n.”—Zan 17:3.
?NGUE YƐ Ɔ TI NDƐ’N NIƆN? Sran wie’m be waan Ɲanmiɛn nunman lɛ. Wie’m be waan ɔ ti wunmiɛn ngbɛn sa. Be nga kusu mɔ be bu i kɛ Ɲanmiɛn o lɛ sakpa’n, ninnge nga be kle’n, ɔ nin i nzuɛn’n su ninnge nga be kle’n, be sansan be wun.
?WAFA SƐ YƐ É KPƐ́ NDƐ’N NUN ƆN? Like kun mɔ e kwla yo naan y’a si Ɲanmiɛn’n, yɛle kɛ e fa e ɲin e sie i ninnge ng’ɔ yili be’n be su. Akoto Pɔlu seli kɛ: “Sran nyinma wun-man Nyanmiɛn’n, sanngɛ kɛ ɔ fin cɛn ng’ɔ yili mɛn’n, ninnge kwlaa ng’ɔ yo be bɔ be wun be’n, ɔ maan be wun i wlɛ weiin kɛ Nyanmiɛn o lɛ yɛ ɔ kwla sa’n kwlaa yo.” (Rɔmfuɛ Mun 1:20) Sɛ e fa e ɲin sie ninnge nga Ɲanmiɛn yili be’n be su kpa’n, é kwlá sí e Yifuɛ’n i ngwlɛlɛ’n nin i tinmin’n be su ninnge kpanngban.—Jue Mun 104:24; Ezai 40:26.
Sanngɛ, kɛ ɔ ko yo naan y’a si Ɲanmiɛn i sran wafa’n kpa’n, ɔ fata kɛ e tinuntinun e nian Biblu’n m’ɔ ti Ɲanmiɛn Ndɛ’n nun. Nán e yaci sran uflɛ lɛ naan ɔ kle e akunndan nga ɔ fata kɛ e bu i Ɲanmiɛn su’n. Maan e fa afɔtuɛ nga Biblu’n man e yɛ’n su. I waan: “Nán an yo kɛ sran mun bɔ be o lɛ ndɛ’n be sa, sanngɛ maan Nyanmiɛn kaci amun akunndan’n naan an kaci mlɔnmlɔn. Kɛ ɔ ko yo sɔ’n, amún wún Nyanmiɛn i klun sa’n i wlɛ, yɛ amún sí sa ng’ɔ ti kpa, b’ɔ jɔ i klun, b’ɔ maan amún yó kpa’n.” (Rɔmfuɛ Mun 12:2) Maan e nian ndɛ nga Biblu’n kan be Ɲanmiɛn su yɛ’n.
Ɲanmiɛn le dunman. Kɛ bé klɛ́ Biblu’n i klikli nun’n, Ɲanmiɛn dunman’n o nun kpɛ akpiakpi ko ju wie. Biblu sunman nun’n, be wun dunman sɔ’n Jue Mun 83:18 annzɛ 19 nun. Be klɛli i kɛ: “Maan be si kɛ wɔ bɔ ɔ dunman’n yɛle Zoova’n, ɔ kunngba cɛ yɛ like fi nunman ɔ sin asiɛ wunmuan’n su ɔ.”—Abbé Crampon 1905.
Like nga klɔ sran’m be yo’n, ɔ klwa yo Zoova fɛ annzɛ ɔ kwla yo i ya. Kɛ Zoova deli Izraɛlifuɛ mun kanga nun Ezipti lɔ’n, kpɛ sunman b’a faman afɔtuɛ ng’ɔ mannin be’n su. Be jasoli i wun. “Be klɔklɔli i [be boli i wla, NW].” —Jue Mun 78:40, 41.
E tinuntinun e ndɛ lo Zoova. Zezi seli i sɔnnzɔnfuɛ’m be kɛ: “?Be yo-man ndrofia nnyɔn atɛ bablu kun? Sanngɛ ɔ nin i sɔ’n ngba, sɛ amun Si a kplin-man su’n, be nun kun sa tɔ-man. Amun ti ndrɛ’n bɔbɔ, ɔ si i nuan. Ɔ maan nán srɛ kun amun mlɔnmlɔn, afin an ti kpa tra ndrofia kpanngban.”—Matie 10:29-31.
Ɲanmiɛn kloman nvle kun annzɛ sran akpasua kun traman uflɛ. Akoto Pɔlu seli Glɛki nga be o Atɛni lɔ’n be kɛ “sran ng’ɔ [Nyanmiɛn] yili be’n be kwlaa be osu’n ti kun. Ɔ yili be kɛ be tran asiɛ’n su.” Ɔ seli ekun kɛ “ɔ nin ye nin e nun wie fi nun-man mmua.” (Sa Nga Be Yoli’n 17:26, 27) Akoto Piɛli seli kɛ: “Nyanmiɛn liɛ’n, ɔ kpa-man sran nun, sanngɛ nvle kwlaa nun’n, sran ng’ɔ sro i b’ɔ yo i klun sa’n, i klun jɔ i wun.”—Sa Nga Be Yoli’n 10:34, 35.
?MMLUSUƐ BENIN YƐ É ƝƐ́N I NUN ƆN? Sran wie’m “be klo Nyanmiɛn dan, sanngɛ klolɛ sɔ’n bɔ be fa klo i’n, be si-man su ngwlɛlɛ.” (Rɔmfuɛ Mun 10:2) Sɛ amun si like nga Biblu’n kle i Ɲanmiɛn su sakpasakpa’n, be su kwlá lakaman amun. Yɛ amún kwlá fá amun wun ‘mɛ́ntɛn i.’—Zak 4:8.
Sɛ amun waan amún sí nun kpa’n, amun nian fluwa ?Ngue like yɛ Biblu’n kle i sakpasakpa ɔ? i ndɛ tre 1 mɔ be flɛ i “?Ɲanmiɛn i su nanwlɛ ndɛ’n yɛle mennin?” i nun.a
[Ja ngua lɛ ndɛ’n]
a Zoova i Lalofuɛ mun yɛ be yili ɔ.
[Foto, bue 6]
Like kun mɔ e kwla yo naan y’a si Ɲanmiɛn’n, yɛle kɛ e fa e ɲin e sie i ninnge ng’ɔ yili be’n be su.