Like nga Zezi i ajalɛ’n kle e’n

“Mɛn’n i awieliɛ’n” i su ndɛ’n

?Mɛn m’ɔ́ wíe’n i bo’n yɛle benin?

Zezi i sɔnnzɔnfuɛ’m be usɛli i kɛ: “?Nguɛ yɛ ɔ ti ɔ balɛ’n nin mɛn’n i awieliɛ’n i nzɔliɛ nin-ɔn?” (Matie 24:3) Kɛ Zezi tɛ́ kosan sɔ’n su’n, w’a seman kɛ bé núnnún asiɛ’n. W’a dun mmua w’a kan “mɛn’n” i ndɛ le. Kɛ ɔ́ kán’n, politikifuɛ nin aata difuɛ nin Ɲanmiɛn sulɛ wafa nga be o Satan i mɛn’n nun’n, be yɛ ɔ flɛli be mɛn’n niɔn. (Matie 13:22, 40, 49) Ɔ maan kɛ ɔ seli kɛ ‘mɛn i awieliɛ’n ɔ́ jú’n,’ mɛn kunngba sɔ’n i ndɛ yɛ ɔ kan ɔn.—Matie 24:14.

?Wafa sɛ yɛ Zezi yiyili mɛn’n i awieliɛ’n nun ɔn?

Mɛn nga i awieliɛ ndɛ’n ti “jasin fɛ.” Zezi seli kɛ: ‘Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n. I sin yɛ mɛn i awieliɛ’n ɔ́ jú-ɔ.’ Wafa nga Zezi yiyili mɛn’n i awieliɛ’n nun’n yɛ. I waan: “Blɛ sɔ’n nun’n, nyrɛnnɛn’n ɔ́ yó dan bɔ kɛ ɔ fin mɛn’n i bo bolɛ’n nun lele ndɛ, i wunsu nian yo-man le yɛ i wunsu su yo-man kun le. Sɛ Nyanmiɛn a kpɛ-man cɛn sɔ’n su’n, sran fi su fite-man nun.”—Matie 24:14, 21, 22.

?Wan mun yɛ bé núnnún be ɔ?

Saan be nga be kloman Zoova nin Zezi mɔ be suman be’n, yɛ bé núnnún be ɔ. I sɔ sran’m be ɲin yiman Ɲanmiɛn. Zezi seli kɛ: “Kɛ m bɔ n kacili Sran’n ń wá bá’n, sran’m bé yó kɛ Noe i blɛ su’n sa. Blɛ sɔ’n nun’n, kɛ nzue dan’n i tɔlɛ’n ɔ ka kaan ɔ́ jú’n, [...] b’a bu-man like fi akunndan lele nzue dan’n ɔ wa fa be kwlaa ɔli.” (Matie 24:36-39) Zezi waan be nga be sin atin dan mɔ i awieliɛ’n ti ɲrɛnnɛn’n nun’n, be sɔnnin. Sanngɛ ɔ guali e awlɛn su nzue kɛ “atin” kaan kun o lɛ ‘be sin nun-ɔn be nyan nguan.’—Matie 7:13, 14.

?Blɛ benin yɛ mɛn nga i awieliɛ’n jú ɔ?

Kɛ be usali Zezi kɛ ngue yɛ ɔ ti i balɛ’n nin “mɛn’n i awieliɛ’n” i nzɔliɛ’n, ɔ tɛli su kɛ: “Nvle kun wá jáo nvle kun wun, yɛ famiɛn kun wá jáo i wiengu famiɛn kun wun. Lika wie’m be nun’n awe’n wá kpɛ́n, asiɛ’n ɔ́ wá kéje. [...] Sa tɛtɛ’n b’ɔ́ wá sɔ́n’n ti sran kpanngban be sran klolɛ’n ɔ́ wíe.” (Matie 24:3-12) Ɔ maan, sa tɛtɛ nga e ti be ngan andɛ yɛ’n i bo’n gúa kpa. Yɛle kɛ Ɲanmiɛn Sielɛ’n ɔ́ wá yó naan klɔ sran nga be ɲin yi Ɲanmiɛn’n be ɲan aunjuɛ. Zezi seli kɛ: “Kɛ amún wún kɛ sa sɔ’m be su yo’n, an si kɛ Nyanmiɛn sielɛ blɛ’n w’a mantan.”—Lik 21:31.

?Ngue yɛ ɔ fata kɛ amun yo ɔ?

Zezi seli kɛ Ɲanmiɛn “fɛ i Wa kunngba cɛ’n mannin naan sran kwlaa ng’ɔ lafi i su’n w’a mlin-man, sanngɛ ɔ nyan anannganman nguan.” (Zan 3:16) Ɔ fata kɛ amun si Ɲanmiɛn nin i Wa’n be kpa naan amun a kwla lafi be su. I sɔ ti’n, Zezi seli kɛ: “Kɛ be se kɛ bé nyán anannganman nguan’n, i bo’n yɛlɛ kɛ bé sí wɔ bɔ ɔ kunngba cɛ yɛ a ti Nyanmiɛn’n nin Jésus-Krist bɔ a sunmɛnnin i’n.”—Zan 17:3.

Amun nian amun wun su. Nán maan ngokoɛ’n yo naan amun a ɲanman amun ti b’a suanman Ɲanmiɛn i su like naan amun a yi i nglo kɛ amun klo i. Zezi waan: “An sasa amun wun, [...] nán an koko ninnge’m be ti, sɛ an yo sɔ’n, ɔ cɛ-man naan cɛn sɔ’n w’a fu amun nun. Afin cɛn sɔ’n ɔ́ wá fú sran [...] kwlaa be nun kɛ aya sa.” Sɛ amun fa Zezi i afɔtuɛ’n su’n, amún ‘kwlá fíte sa b’ɔ́ wá bá mɛn nun’n i kwlaa i nun.’—Lik 21:34-36.

Sɛ amun waan amún sí nun kpa’n, amun nian fluwa ?Ngue like yɛ Biblu’n kle i sakpasakpa ɔ? i ndɛ tre 9 mɔ be flɛ i “?E o ‘mɛn’n i bue nuan?’” i nun.a

[Ja ngua lɛ ndɛ mun]