Maan e suan Biblu’n nun like naan e Ɲanmiɛn srɛlɛ’n i bo’n yo kploun
“Min Min, sie ɔ su tie min srɛlɛ’n.”—NEEMI 1:11.
1, 2. ?Ngue ti yɛ sɛ e fa e ɲin e sie i Biblu’n nun Ɲanmiɛn srɛlɛ wie’m be su’n, ɔ ti kpa ɔ?
ƝANMIƐN srɛlɛ’n ɔ nin Biblu’n nun like suanlɛ’n be ti cinnjin Ɲanmiɛn sulɛ’n nun. (1 Tɛsalonikfuɛ Mun 5:17; 2 Timote 3:16, 17) Sakpa, Biblu’n timan Ɲanmiɛn srɛlɛ fluwa. Sanngɛ Ɲanmiɛn srɛlɛ’n sɔnnin nun. Be nun kpanngban be o Jue Mun fluwa’n nun.
2 Kɛ é kánngan Biblu’n nun mɔ é súan nun like’n, e kwla wun Ɲanmiɛn srɛlɛ wie mɔ be nin e su sa’m be kɔ likawlɛ ɔ. I kpa’n, Ɲanmiɛn srɛlɛ nga be o Ɲanmiɛn Ndɛ’n nun’n, kɛ e fa be nun ndɛ wie mun e wlɛ i e srɛlɛ’n nun’n, e Ɲanmiɛn srɛlɛ’n i bo’n yo kploun. ?Be nga be srɛli Ɲanmiɛn kɛ ɔ uka be’n m’ɔ tɛli be su’n, ngue yɛ e kwla suɛn i be su ɔ? ?Yɛ ngue yɛ e kwla suɛn i ndɛ nga be kɛnnin i be Ɲanmiɛn srɛlɛ’n nun’n, i su ɔ?
Maan e kunndɛ Ɲanmiɛn i atin’n naan e fa su
3, 4. ?Ngue yɛ Abraamu i sufuɛ’n ɔli i yolɛ ɔ? ?Yɛ wafa nga Zoova yoli maan ɔ yoli ye’n, ngue yɛ ɔ kle e ɔ?
3 Kɛ e suan Biblu’n nun like’n, e wun i kɛ ɔ fata kɛ e srɛ Ɲanmiɛn titi naan ɔ kle e i atin’n. Laa’n, Abraamu sunmɛnnin i junman difuɛ’m be nun kpɛnngbɛn mɔ atrɛkpa’n yɛle Eliezɛli’n Mezopotami lɔ kɛ ɔ ko kunndɛ bla kun m’ɔ sro Ɲanmiɛn’n, ɔ blɛ Izaaki. Maan e fa e ɲin e sie i sa ng’ɔ juli’n su e nian. Kɛ bla’m bé sá nzue gbo kun nun’n, Abraamu i sufuɛ’n srɛli Ɲanmiɛn kɛ: “Anannganman [...] talua nga n se i kɛ: ‘Cia ɔ sɛ’n maan n nɔn nzue kan,’ b’ɔ se kɛ: ‘Nɔn, naan n sa wie m man ɔ nyɔnngɔnmɛn mun’n,’ wuun i yɛ a kpɛli i kɛ ɔ yo ɔ sufuɛ Izaak liɛ-ɔ. Sɛ a yo sɔ’n yɛ ń wún i kɛ a nin min min Abraam be o nun sakpa-a.”—Bo Bolɛ 24:12-14.
4 Kɛ Rebeka sali nzue mannin Abraamu i sufuɛ’n i ɲɔnngɔnmɛn mun’n, ɔ kleli kɛ Ɲanmiɛn tɛli i srɛlɛ’n su. W’a cɛman ɔ nin i be ɔli Kanaan, kpɛkun ɔ kacili Izaaki i awlɛn su bla. Ɔ ti su kɛ e su minndɛman kɛ Ɲanmiɛn yi like wie nglo kle e. Sanngɛ sɛ e srɛ i naan e ta nda kɛ é yáci i wawɛ’n nun naan ɔ sie e’n, ɔ́ klé e atin.—Galasifuɛ Mun 5:18.
Ɲanmiɛn srɛlɛ’n uka e naan e awlaboe’n w’a kan ase
5, 6. ?Kɛ Zakɔbu nin Ezau bé wá yía’n, Ɲanmiɛn ng’ɔ srɛli’n ngue ndɛ cinnjin yɛ ɔ o nun ɔn?
5 Ɲanmiɛn srɛlɛ’n kwla yo maan e awlaboe’n kan ase. Kɛ mɔ srɛ kunnin Zakɔbu i niaan bian Ezau i wun’n ti’n, ɔ srɛli Zoova kɛ: “Anannganman [...] n ti kaan ngboko. Nɛnnɛn nga a dili min’n nin nantilɛ klanman nga a nin min nantili’n, nannan, ɔ nin min fata-man. [...] Yaci, de min min niaan bian Ezau sa nun. Nanwlɛ, n sro i. Srɛ kun min, sɛ ɔ́ wá kún min nin bla ta mun nin ba mun o. A seli min kɛ: ‘Ń yó wɔ ye, ń yó maan ɔ osu’n ɔ́ trɛ́ kɛ jenvie nuan aunnyan sa, be ka be-ɔ, ɔ su yo-man ye.’”—Bo Bolɛ 32:10-13.
6 Kɛ Zakɔbu srɛli Ɲanmiɛn’n, ɔ fali ajalɛ wie mun fa sɛsɛli i awlofuɛ mun. Kpɛkun Ɲanmiɛn tɛli i srɛlɛ’n su, ɔ maan ɔ nin Ezau be afiɛn’n sɛli. (Bo Bolɛ 33:1-4) Maan e kanngan srɛlɛ’n sɔ’n nun kpa e nian. É wún kɛ Zakɔbu w’a srɛman sa ngbɛn kɛ Ɲanmiɛn ukɛ i. Ɔ kleli kɛ ɔ lafi Osu nga be seli kɛ ɔ́ bá’n i su yɛ Ɲanmiɛn i aklunye’n ti’n, ɔ lɛli i ase. ?E kusu’n, ‘srɛ kun ye’ wie? (2 Korɛntfuɛ Mun 7:5) Sɛ ɔ ti sɔ’n, Zakɔbu i srɛlɛ’n maan e wla kwla kpɛn su kɛ sɛ e srɛ Ɲanmiɛn’n, ɔ kwla uka e naan e awlaboe’n w’a kan ase. Sanngɛ e srɛlɛ’n nun’n, nán e sa nun ninnge’m be ngunmin ti yɛ ɔ fata kɛ e srɛ ɔ. Ɔ fata kɛ e yi e Ɲanmiɛn i sulafilɛ’n i nglo wie.
Maan e srɛ Ɲanmiɛn naan ɔ man e ngwlɛlɛ
7. ?Ngue ti yɛ Moizi srɛli Zoova kɛ ɔ yi i akunndan’n i nglo kle i ɔ?
7 Ɔ fata kɛ Zoova i klun mɔ e kunndɛ kɛ ɔ jɔ’n, ɔ su e bo naan e srɛ i kɛ ɔ man e ngwlɛlɛ. Moizi srɛli Ɲanmiɛn kɛ ɔ́ sí i akunndan’n. Ɔ seli kɛ: “[Zoova] a seli min kɛ n dun mmua sran [mɔ be fin Ezipti] nga’m be ɲrun, [...] Sɛ ɔ ti sɔ’n, wuun yi wɔ akunndan’m be nglo kle min. I sɔ nun yɛ [...] ń ɲán ye ɔ sa nun-ɔn. Nian, nvle nga nunfuɛ’m be ti ɔ sran mun.” (Ezipt Lɔ Tulɛ 33:12, 13) Ɲanmiɛn tɛli Moizi i srɛlɛ’n su. Ɔ maan ɔ yili i akunndan’n i nglo kpa kleli Moizi. I sɔ’n ti cinnjin mɛn i naan w’a kwla dun Zoova i nvle’n i ɲrun mmua.
8. ?Sɛ e bu 1 Famiɛn Mun 3:7-14 i su akunndan’n, ngue yɛ é ɲɛ́n i ɔ?
8 Davidi kusu srɛli Ɲanmiɛn kɛ: “Anannganman, kle min wɔ atin’n.” (Jue Mun 25:4) Davidi i wa Salomɔn srɛli Ɲanmiɛn kɛ ɔ mɛn i ngwlɛlɛ ng’ɔ nin i fata’n naan w’a kwla di Izraɛlifuɛ’m be su famiɛn. Like nga Salomɔn srɛli’n, ɔ yoli Zoova i fɛ. Ɔ maan, ɔ fali like sɔ’n mɛnnin i. Kpɛkun ɔ mɛnnin i aɲanbeun nin aɲrunɲan wie. (An kanngan 1 Famiɛn Mun 3:7-14 nun.) Sɛ be man e Ɲanmiɛn junman wie naan ɔ yo kɛ ɔ́ tín e su sa’n, maan e srɛ Ɲanmiɛn naan ɔ man e ngwlɛlɛ naan e kan e wun ase. Sɛ e yo sɔ’n, Ɲanmiɛn úka e naan y’a si ngwlɛlɛ naan y’a fa ngwlɛlɛ y’a di e junman’n kɛ ɔ nin i fata’n sa klolɛ su.
Maan e Ɲanmiɛn srɛlɛ’n fin e awlɛn’n nun
9, 10. ?Kɛ bé yí Ɲanmiɛn sua’n i nglo’n, be awlɛn’n i su ndɛ nga Salomɔn kɛnnin i i srɛlɛ’n nun’n, ngue yɛ amun wunnin i kɛ ɔ ti cinnjin nun ɔn?
9 Sɛ e kunndɛ kɛ Ɲanmiɛn ti e srɛlɛ’n, ɔ fata kɛ ɔ fin e awlɛn’n nun. Afuɛ nga be flɛ i 1026 nun lele naan b’a wu Zezi’n, sran kpanngban kpa be yiali Zerizalɛmu lɔ. Be ɔli Zoova i sua’n i nglo yilɛ. Kwlaa naan b’a yia sɔ’n, Salomɔn tuli i klun srɛli Ɲanmiɛn. I sɔ srɛlɛ’n be klɛli i 1 Famiɛn Mun ndɛ tre 8 nun. Kɛ be fali Ɲanmiɛn i alaka’n sieli i Ɲanmiɛn sua’n i lika kpa tra su’n i nun lɔ mɔ Zoova maan ɲanmiɛn ble’n yili sua’n, Salomɔn manmannin Ɲanmiɛn.
10 Maan e suan Salomɔn i srɛlɛ’n su like kpa naan e nian e awlɛn’n i su ndɛ ng’ɔ kannin’n. Salomɔn dili i nanwlɛ kɛ Zoova kunngba yɛ ɔ si sran kun i awlɛn’n nun lɔ sa mun ɔn. (1 Famiɛn Mun 8:38, 39) Srɛlɛ kunngba sɔ’n kle kɛ sɛ sa tɛ yofuɛ kun ‘tu i klun kpata Ɲanmiɛn sakpa’n,’ i liɛ’n kwla yo kpa ekun. Sɛ Ɲanmiɛn i nvlefuɛ’m be kpɔfuɛ’m be tra be lomuɛn kɔ naan be srɛ Zoova yɛ be awlɛn’n kaci i liɛ titi’n, ɔ́ tí be srɛlɛ’n. (1 Famiɛn Mun 8:48, 58, 61) Ɔ maan, ɔ ti weiin kɛ ɔ fata kɛ e srɛlɛ’n fin e awlɛn’n nun.
Wafa nga Jue Mun fluwa’n kwla uka e naan e srɛlɛ’n i bo’n w’a yo kploun’n
11, 12. ?Ngue yɛ Levifuɛ nga blɛ kun nun’n, ɔ kwlá kɔman Ɲanmiɛn sua’n nun lɔ’n, i srɛlɛ’n ɔ kle e ɔ?
11 Jue Mun be su like suanlɛ’n kwla yo naan e srɛlɛ’n i bo’n w’a yo kploun. Kpɛkun ɔ kwla uka e naan y’a tran y’a minndɛ Ɲanmiɛn naan ɔ tɛ e su. Maan e nian minndɛlɛ nga Levifuɛ mɔ be trɛli i lomuɛn ɔli’n, ɔ minndɛli’n. Kannzɛ bɔbɔ blɛ kun nun’n w’a kwlá ɔman Zoova i sua’n nun’n, sanngɛ ɔ toli jue kɛ: “?Nguɛ ti yɛ maan n wla ko bo min wun-ɔn? ?Nguɛ ti yɛ maan n ko fɛfɛ-ɔ? Ɔ fata kɛ n fa min wla’n n guɛ i Nyanmiɛn su yɛ m mɛnmɛn i, afin ɔ ti min defuɛ, i kunngba’n ɔ ti min Nyanmiɛn.”—Jue Mun 42:5, 11; 43:5.
12 ?Ngue yɛ Levifuɛ sɔ’n kle e ɔ? Yɛle kɛ sɛ sa kpa wie ti be wla e bisua naan e nin e wiengu Klistfuɛ mun e kwlá yiaman kun’n, maan e minndɛ Ɲanmiɛn naan ɔ yo ng’ɔ nin e fata’n man e. (Jue Mun 37:5) Maan e bu aklunjuɛ nga laa e dili i Ɲanmiɛn i sulɛ’n nun’n i akunndan. Kpɛkun maan e srɛ Ɲanmiɛn naan y’a jran kekle. Kɛ ɔ́ yó sɔ’n, e ‘fa e wla’n e guɛ i Ɲanmiɛn su’ kɛ ɔ́ yó naan e nin i nvle nunfuɛ mun y’a kwla yia ekun’n.
Kɛ é srɛ́ Ɲanmiɛn’n maan e lafi i su
13. ?Kɛ nga Zak 1:5-8 fa kan’n sa’n, ngue ti yɛ kɛ é srɛ́ Ɲanmiɛn’n ɔ fata kɛ e lafi i su ɔ?
13 Kannzɛ sa ng’ɔ o e su’n ti sɛ ti sɛ’n, sanngɛ kɛ é srɛ́ Ɲanmiɛn’n maan e lafi i su. Sɛ like wie sa e seiin nantilɛ’n, maan e fa Zezi i sɔnnzɔnfuɛ Zaki i afɔtuɛ’n su. Maan e kpɛ e ɲin Zoova wun lɔ yɛ e srɛ i. Yɛ maan e lafi su kpa kɛ ɔ kwla man e ngwlɛlɛ ng’ɔ nin i fata’n naan y’a kwla jran kekle. (An kanngan Zak 1:5-8 nun.) Ɲanmiɛn si sa nga be sanngan e akunndan’n. Ɔ kwla fɛ i wawɛ’n kle e atin kpɛkun ɔ fɔnvɔ e. Wafa nga e wun fa yo e’n maan e lafi i su e kan kle i. Nán maan ‘e sie e nyin nnyɔn-nnyɔn.’ Kusu maan e fa atin nga i wawɛ’n kle e’n, ɔ nin afɔtuɛ ng’ɔ o i Ndɛ’n nun’n, be su.
14, 15. ?Ngue ti yɛ e kwla se kɛ Ani lafili Ɲanmiɛn su srɛli i yɛ ɔ yoli i srɛlɛ’n i nuan su sa ɔ?
14 Kɛ Ani m’ɔ ti Levifuɛ nga be flɛ i Elkana’n i yi nɲɔn’m be nun kun’n, ɔ́ srɛ́ Ɲanmiɛn’n, ɔ lafili i su. Kpɛkun ɔ yoli sɔ i aeliɛ’n nun wie. Kɛ m’ɔ leman ba’n ti’n, i wla Pɛnina m’ɔ wuli ba kaka’n, ɔ yo i fiaan. Ɲanmiɛn i tannin sua’n i nun lɔ’n, Ani tali nda kɛ sɛ ɔ wu ba yasua kun’n ɔ́ fá mán Zoova. Kɛ ɔ́ srɛ́ Ɲanmiɛn mɔ i nuan bui’n kéje’n, Ɲanmiɛn ɲrun jranfuɛ’m be su kpɛn Eli buli i kɛ w’a nɔn nzan. Kɛ ɔ wunnin kɛ nɛ́n i sɔ’n, ɔ seli i kɛ: “Maan Izraɛl Nyanmiɛn’n ɔ man wɔ like nga a srɛli i’n.” Kannzɛ Ani siman wafa nga i Ɲanmiɛn srɛlɛ sɔ’n kpɛ́n su’n, sanngɛ ɔ lafili su kɛ Ɲanmiɛn tɛ́ i srɛlɛ’n su. Ɔ maan, “i nyrun m’ɔ ti mlanwa’n ɔ titili.” I sa sin w’a bubumɛn i kun.—1 Samiɛl 1:9-18.
15 Kɛ be wuli Samiɛli mɔ be kpɛli i ɲɔnflɛn’n, Ani fali ba’n ko kleli Zoova i tannin sua’n nun lɔ naan ɔ ka lɔ su Ɲanmiɛn. (1 Samiɛl 1:19-28) Sɛ e fa blɛ naan e bu srɛlɛ nga Ani srɛli blɛ sɔ’n nun’n i su akunndan’n, ɔ kwla yo naan e Ɲanmiɛn srɛlɛ’n i bo’n w’a yo kploun. Yɛ ɔ kwla uka e naan y’a wun kɛ sɛ ɲrɛnnɛn’n ti’n awlaboe’n tɔ e su’n, naan e lafi Zoova i su e srɛ i’n, ɔ́ tɛ́ e srɛlɛ’n su.—1 Samiɛl 2:1-10.
16, 17. ?Kɛ Neemi i Ɲanmiɛn srɛlɛ’n nin i aeliɛ’n nun ɔ lafili Ɲanmiɛn su’n, i bo’n guali sɛ?
16 Afuɛ ko ju ya nnun ka naan b’a wu Zezi’n, bian ndɛnmanfuɛ mɔ be flɛ i Neemi’n, i Ɲanmiɛn srɛlɛ’n nin i aeliɛ’n nun’n, ɔ lafili Ɲanmiɛn su. Ɔ kpatali Ɲanmiɛn kɛ: “Min Min, sie ɔ su tie min srɛlɛ’n ɔ nin ɔ sran nga be nyin yi wɔ’n be srɛlɛ’n. Maan n nyan muae ndɛkɛn, yo maan n nyan jranwlɛ bian sɔ’n i nyrun.” ?Wan yɛle bian sɔ’n? Pɛrsifuɛ’m be famiɛn Artaksɛrksɛsi mɔ Neemi ti i nzan sufuɛ’n niɔn.—Neemi 1:11.
17 Be seli Neemi kɛ Zuifu nga be fin kanga nun Babilɔni be ɔli’n, ‘be o nyrɛnnɛn nin nyannzuɛn’n nun. Be seli i ekun kɛ Zerizalɛm klɔ’n kusu i talɛ’n wie w’a bu.’ Ɔ maan ɔ fali cɛn kpanngban srɛli Ɲanmiɛn yɛ ɔ lafili i su. (Neemi 1:3, 4) Wafa nga Ɲanmiɛn tɛli Neemi i srɛlɛ’n su’n, ɔ tratrali ng’ɔ sunnzunnin’n su. Yɛle kɛ famiɛn Artaksɛrksɛsi mɛnnin i atin kɛ ɔ wɔ Zerizalɛmu naan ɔ ko kplan klɔ’n i talɛ’n. (Neemi 2:1-8) W’a cɛman yɛ be wieli talɛ’n i kplan ɔn. Sa nga ti yɛ Ɲanmiɛn tɛli Neemi i srɛlɛ’n su’n yɛle kɛ i srɛlɛ’n nun’n, Ɲanmiɛn sulɛ kpafuɛ’n yɛ ɔ yoli i cinnjin ɔn. Kpɛkun kɛ ɔ́ srɛ́’n, ɔ lafili Ɲanmiɛn su. ?E yo sɔ e srɛlɛ’n nun wie?
Nán e wla fi i manmanlɛ’n nin i ase lalɛ’n su
18, 19. ?Ngue ti yɛ ɔ fata kɛ Zoova i sufuɛ kun mɛnmɛn i naan ɔ lɛ i ase ɔ?
18 Kɛ é srɛ́ Ɲanmiɛn’n, nán e wla fi Zoova i manmanlɛ’n nin i ase lalɛ’n su. Be diman sa nga ti yɛ e kwla yo sɔ’n be yalɛ! I wie yɛle kɛ Davidi manmannin Zoova i famiɛn dilɛ’n. (An kanngan Jue Mun 145:10-13 nun.) ?E Ɲanmiɛn srɛlɛ’n kle kɛ e klo cenjele like mɔ yɛle Zoova i Sielɛ’n i jasin fɛ’n i bolɛ’n? Ndɛ nga jue tofuɛ’m be kannin’n, ɔ kwla uka e wie naan y’a tu e klun y’a la Ɲanmiɛn i ase e Klistfuɛ aɲia kanngan nin dandan’m be ti.—Jue Mun 27:4; 122:1.
19 E nin Ɲanmiɛn e afiɛn m’ɔ mantan’n i su ye mɔ e si i’n, ɔ kwla su e bo naan y’a tu e klun y’a srɛ Ɲanmiɛn y’a se kɛ: “Min Min, ḿ bó ń flɛ́ wɔ sran’m be afiɛn! Ń tó jue ń yí wɔ ayɛ mɛnmɛn nunfuɛ’m be nyrun. Anannganman, ɔ klun-ufue’n ti dan lele kpe nun. I kunngba’n, a ti nanwlɛfuɛ dan. Ee Nyanmiɛn, a ti dan tra nyanmiɛn b’ɔ la nglo lɔ plaii yɛ’n. Yi ɔ dan sɔ bɔ a ti’n i nglo. Maan ɔ nyrun nyannyan’n ɔ kpaja asiɛ wunmuan’n su.” (Jue Mun 57:10-12) Nanwlɛ ndɛ sɔ’n wla fanngan. ?Nɛ́n i ɔ? Ndɛ kpakpa kɛ ngalɛ’n sa mɔ be fin Jue Mun fluwa nun’n, be kwla yo naan e srɛlɛ’n i bo’n w’a yo kploun.
Maan e tu e klun e srɛ Ɲanmiɛn aɲinyiɛ su
20. ?Wafa sɛ yɛ Mali kleli kɛ i ɲin yi Ɲanmiɛn ɔn?
20 Ɔ fata kɛ e ɲin m’ɔ yi Ɲanmiɛn’n i ɲin fite e srɛlɛ’n nun. Kɛ Mali tili kɛ i yɛ ɔ́ wá wú Mɛsi’n, ndɛ ng’ɔ kɛnnin i aɲinyiɛ’n su’n, ɔ nin nga kɛ Ani fá Samiɛli mán kɛ ɔ di Ɲanmiɛn i tannin sua’n nun junman’n ɔ kannin’n, be ti kun. Mali i ɲin m’ɔ yi Ɲanmiɛn’n i ɲin fiteli i ndɛ yɛ m’ɔ kannin’n i nun. Ɔ seli kɛ: “Min wun blibli min, ɔ maan ḿ mánmán min Min Nyanmiɛn’n. Nyanmiɛn b’ɔ ti n defuɛ’n ti, n klun jɔ.” (Lik 1:46, 47) ?E kwlá fɛmɛn i sɔ ndɛ liɛ mun e yoman naan e srɛlɛ’n i bo’n yo kploun? Nanwlɛ sɛ Ɲanmiɛn kpali Mali m’ɔ sro i’n kɛ ɔ yo Zezi m’ɔ ti Mɛsi’n i nin’n, ɔ boman e nuan!
21. ?Wafa sɛ yɛ Zezi i srɛlɛ’n kle kɛ i ɲin yi Ɲanmiɛn naan ɔ lafi i su ɔ?
21 Zezi srɛli Ɲanmiɛn aɲinyiɛ su yɛ ɔ lafili i su kpa. I wie yɛle kɛ ka naan Zezi w’a cɛn Lazali’n, ɔ “mɛnnin i nyin su niannin nyanmiɛn’n su lɔ, yɛ ɔ seli kɛ: ‘N Si, kwla o, afin ndɛ nga n kannin’n, a tili. N si kɛ a ti min ndɛ’n titi.’” (Zan 11:41, 42) ?E srɛlɛ’n kle kɛ e ɲin yi Ɲanmiɛn naan e lafi i su kɛ ngalɛ’n sa? Maan e nian Ɲanmiɛn srɛlɛ’n i wun ajalɛ nga Zezi kleli i sɔnnzɔnfuɛ mun’n. É wún kɛ ndɛ cinnjin nga be o nun’n, yɛle Zoova i dunman’n i sanwun yolɛ’n, ɔ nin i Sielɛ’n i takalɛ’n, yɛ i klun sa’n i su kpɛnlɛ’n. (Matie 6:9, 10) Maan e bu e bɔbɔ e srɛlɛ’n i akunndan. ?Be kle kɛ Zoova i Sielɛ’n nin i klun sa’n i yolɛ’n yɛ i dunman m’ɔ leman wunsu’n i sanwun yolɛ’n, be lo e kpa? Ɔ fata kɛ be kle sɔ.
22. ?Ngue ti yɛ e kwla lafi su kɛ Zoova mán e fanngan naan y’a bo jasin fɛ’n i juejue su ɔ?
22 Wie liɛ’n, ɲrɛnnɛn nin sa kekle uflɛ wie’m be ti’n, e srɛ Zoova kɛ ɔ uka e naan e su i yakpa su. Kɛ Zuifu’m be jɔlɛ difuɛ dandan’m be seli Piɛli nin Zan kɛ nán ‘be kle like Jésus dunman nun kun mlɔnmlɔn’n,’ yakpa su akoto sɔ’m b’a kplinman su. (Sa Nga Be Yoli’n 4:18-20) Kɛ be wlali be bisua mɔ be yacili be nun’n, be kannin sa ng’ɔ juli’n kleli be wiengu Klistfuɛ mun. Ɔ maan be kwlaa nga be o lɛ’n, be srɛli Ɲanmiɛn kɛ ɔ uka be naan be kɛn i ndɛ’n yakpa su. Kɛ ɔ yoli sɔ’n, “Nyanmiɛn wawɛ’n yili i wun nglo be kwlaa be nun, naan b’a kan Nyanmiɛn ndɛ’n yakpa su.” Nanwlɛ i sɔ’n yoli ɲɛnmɛn o! (An kanngan Sa Nga Be Yoli’n 4:24-31 nun.) I sɔ’n ti’n, sran kpanngban kpa be wa kacili Zoova i sufuɛ. Ɲanmiɛn srɛlɛ’n kwla wla e fanngan naan y’a bo jasin fɛ’n juejue su wie.
Maan e srɛlɛ’n i bo’n yo kploun titi
23, 24. (a) Ndɛ uflɛ mɔ be kle kɛ Biblu’n nun like suanlɛ’n kwla yo naan e srɛlɛ’n i bo’n w’a yo kploun’n, an kan be ndɛ. (b) ?Ngue yɛ é yó naan e Ɲanmiɛn srɛlɛ’n i bo’n w’a yo kploun ɔn?
23 E kwla kan sran kpanngban be ndɛ e fa kle kɛ Biblu’n nun kannganlɛ’n ɔ nin i nun like suanlɛ’n, be kwla yo naan e Ɲanmiɛn srɛlɛ’n i bo’n w’a yo kploun. Kɛ Zonasi sa’n, e kwla di i nanwlɛ srɛlɛ’n nun kɛ “delɛ’n fin Anannganman.” (Zonas 2:2-11) Sɛ sa tɛ dan wie ti e akunndan’n w’a sanngan naan y’a se asɔnun kpɛnngbɛn’m be kɛ be uka e’n, ndɛ nga Davidi kannin be i jue’m be nun’n, be kwla uka e naan e bɔbɔ e srɛlɛ’n nun y’a kle kɛ ɔ yo e nsisɔ. (Jue Mun 51:3-14) E srɛlɛ wie’m be nun’n, e kwla manman Zoova kɛ Zeremi sa. (Zeremi 32:16-19) Sɛ e su kunndɛ bian annzɛ bla é já’n, Ɲanmiɛn srɛlɛ ng’ɔ o Ɛsdras ndɛ tre 9 nun’n i su like suanlɛ’n, ɔ nin e bɔbɔ e srɛlɛ’n, be kwla wla e fanngan. I liɛ’n, é kwlá tú e klun é fá Ɲanmiɛn ndɛ’n su, naan e ‘aja sɔ’n w’a yo e Min’n i klun su.’—1 Korɛntfuɛ Mun 7:39; Ɛsdras 9:6, 10-15.
24 Maan e kanngan Biblu’n nun titi yɛ e suan nun like titi. Maan e kunndɛ ninnge nga e kwla fa wla e Ɲanmiɛn srɛlɛ’n nun’n. Sɛ e yo sɔ’n, é wún i sɔ akunndan wie mɔ e kwla fa wla e Ɲanmiɛn i like srɛlɛ’n, ɔ nin i ase lalɛ’n yɛ i manmanlɛ’n nun ɔn. Sɛ e suan Biblu’n nun like naan e Ɲanmiɛn srɛlɛ’n i bo’n yo kploun’n, e kwla lafi su kɛ e nin Ɲanmiɛn Zoova e afiɛn’n mántan kpa trá laa’n.
?Amún tɛ́ su sɛ?
• ?Ngue ti yɛ ɔ fata kɛ e kunndɛ Ɲanmiɛn i atin’n naan e fa su ɔ?
• ?Ngue yɛ ɔ fata kɛ ɔ su e bo naan e srɛ Ɲanmiɛn naan ɔ man e ngwlɛlɛ ɔ?
• ?Wafa sɛ yɛ Jue Mun fluwa’n kwla yo naan e srɛlɛ’n i bo’n w’a yo kploun ɔn?
• ?Ngue ti yɛ ɔ fata kɛ e srɛ Ɲanmiɛn aɲinyiɛ su naan e lafi i su ɔ?
[Foto, bue 15]
Abraamu i sufuɛ’n srɛli Ɲanmiɛn kɛ ɔ kle i atin. ?E yo sɔ wie?
[Foto, bue 17]
E awlobofuɛ’m be Ɲanmiɛn sulɛ’n kwla uka e naan e Ɲanmiɛn srɛlɛ’n i bo’n w’a yo kploun.